Jamita Minggu Reminiscere, 12 Maret 2017; Psalmen/ Mazmur 121: 1 - 8

BAHAN JAMITA MINGGU

MINGGU REMINISCERE

Minggu, 12 Maret 2017

Nas Jamita: Psalmen 121: 1 – 8

PANGURUPION NA SUMURUNG DO IANGGO JAHOWA

Patujolo

            Autsugari disungkun, hea do hita mangido pangurupion di ngolunta be? Pasti do sude hita mandok hea, nang pe marasing be bentuk pangurupion na itapangido i, jala nang pe sipata olo maila hita manghatindanghon na hea hita mangido pangurupion tu sasahalak. Mangido pangurupion ima tanda na adong do hagaleaonta alai hagaleon i marasing do tu haleaon. So tung gabe tarrimas manang gabe gale hita molo didok na adong do hagaleonta. Molo boi do itamananda hagaleonta disi do adong hagogoon. Turpuk jamita on ima sada ende manang sada panghatindanghonon ni parpsalmen taringot pangaramotion ni Jahowa di ngoluna. Asa lam tangkas hita mangantusi turpuk jamit on, antong masuk ma hita tu hatorangan ni turpuk.

Hatorangan ni Turpuk

            Molo idaonta taringot Psalmen on didok do ende hananangkok. Ndang pola dipaboahon ise do goar ni parpsalmen on. Deba na bisuk mandok si Daud do na manurathon turpuk on. Diida marhite hata ni turpuk on na paboahon sada ende na marsoarahon mansai balga tutu pangaramotion ni Jahowa di ibana tarlumobi di na torop angka jolma na naeng pamatehon ibana. Boi ma tutu didok na bisuk i, hinorhon i ni pangeleleion ni si Saul na naeng mamunu ibana. Na deba muse mandok ndang si Daud na manurathon turpuk on ala ndang adong disurathon sian si Daud songon di deba ende Psalmen ni si Daud di buku Psalmen on. Nang pe songon i, ndang na gabe tarfokus hita manaringoti ise do na manurathon turpuk on, alai na mansai ringkot idaonta ima panghatindanghonon ni parpsalmen on taringot pangaramotion dohot panjagaon ni Jahowa di ngolu pardagingon nang songon i di partondionna.

            Psalmen 121 on ima sada ende hananangkok (nyanyian ziarah) ima sada ulaon ni halak Jahudi di na laho borhat tu Bagas Joro di Jerusalem jala nangkok ma nasida borhat mandapothon dolok Sion. Molo didok ende hanangkok ima sada ende na niendehon halak Jahudi di na laho nangkok tu Jerusalem jala ende on marisihon saluhut panghatindanghonon ni pangurupion ni Jahowa di ngoluna. “sai mangaranapi do matangku dompak angka dolok” (ay. 1), ima gombaran na manghalungunhon sada gogo na boi mangurupi ngoluna. Dolok di halak Jahudi nang di humaliangna di uju i ima sada inganan parmianan ni angka debata, ido umbahen molo di dolok Sion sai didok do inganan parmianan ni Jahowa Debata, laho manghatai dohot bangso Israel marhite naposoNa. Molo songon i, panatapan ni parpsalmen di angka dolok songon di ayat 1 on ima panatapan taringot mangido gogo manang pangurupion sian pangisi ni dolok i, ima angka debata hombar tu na hinaporseaonna. Alai molo tu dolok Sion do ibana marpanatap, marlapatan do i manatap mangido pangurupion tu na mian di dolok Sion, ima Jahowa. Ido na didok “sian Jahowa Sitompa langit dohot tano on sambing ro pangurupion ianggo tu ahu” (ay. 2).

            Jahowa do na diparhatopot na mangurupi ngoluna. Boha do hita mangantusi pangurupion ni Jahowa di ngolunta be? Jotjot do sai angka na haporluon na olo salpu hita mangido pangurpion ni Jahowa. Itapangido do pangurupion ni Jahowa asa dipamonang ianakhon manang keluarga monang ujian, testing PNS dohot lan ujian di parkarejoan nang parsingkolaan, pangurupion hinorhon ni hapogoson dohot angka lan parungkilon di pardaging on. Jala sai italapati do pangurupion ni Jahowa i holan laho manggohi angka pangidoan ni pingkiran dohot pangantusionta. Antong aha do pangurupion ni Jahowa di ngolunta? Jumolo ma hita tangkas hita mananda ise do Jahowa, Debatanta i. Ibana do na manompa langit dohot tano on (1 Musa 1 – 2), jala sude angka panompaon na binahenNa holan marhite huaso ni HataNa dohot angka hamuliaon ni gogoNa. Marhite panompaon i dipataridahon do lomo manang guru di Ibana do saluhutna angka na tinompa i jala ditanda do sude angka na tinompa i. Ibana do na manompa hita, marlapatan ditanda Jahowa do hita jala aha do na gabe gogo dohot hagaleonta diboto do saluhutna. Dilehon do hosa hangoluan dohot Tondi hangoluan asa mangolu hita angka jolma hombar tu panjouon ni TondiNa i, pangurupion na mansai balga na naeng tangkas ingoton jala hangoluhonon ima parsuruonNa di AnakNa, Jesus Kristus laho mangurupi hita manaluhon huaso dosa dohot sorop ni hamatean i.

            Ndang tagamon loasonNa tarsulandit patmu, dang tagamon nok mata ni Sijaga ho (ay. 3). Pat na tarsulandit ima sada kondisi ragu-ragu atau salah melangkah, molo songon i, molo Jahowa do Pangurupi di ngolunta, ndang masa be biar ni roha manang tahuton jala marsinondang ma hamuliaon ni Jahowa na mangalehon pangantusion tu hita dia do ulaon na nihalomohon ni Jahowa ingkon itaulahon jala dia do ulaon na ingkon itapasiding. Ndang tagamon nok mata Sijaga angka hasianNa (ay. 3 – 4). Ndada songon panjagaon ni sada harajaon na adong partingkian nok mata ni panjaga harbangan ni harajaon jala boi masuk angka musu na naeng manegai harajaon i. dison ma patar dihatahon ianggo parhal (penjaga kota) adong do batas ni gogo dohot ketahananna laho marhal (manjaga) huta manang harajaon. Alai ianggo Jahowa, Ibana do na nampuna saluhut partingkian arian nang botari, jala na so hea Ibana loja laho parorot dohot parmudumuduhon angka hasianNa. Sai jagaonNa do jala na so jadi nok ianggo Jahowa marhal hasianNa i.

            Ay. 5 – 6 digombarhon do songon sada ama na manjaga anakna na maniop tangan ni anakna di tingki rap mardalan sada ama rap dohot ianakhonna. Diparmudumudu jala sonang do anakhonna i mardalan nang pe ragam na ingkon bolusonna di pardalananna i. songon do pangurupion ni Jahowa di hita angka na niasianNa. Di na mandali ngolu na gok siboluson, molo Jahowa do itabahen donganta sonang ma hita mangalangkahon tudia do dalan sidalanonta. Dang adong be biar manang ganggu ni roha, tubu ma las ni roha dohot olopolop mian di linggoman ni Jahowa. “ndang tagamon doiton ni mata ni ari di arian, manang bulan di bornginna i” martudutudu do i di angka musu manang angka gogo na naeng manosak manang na naeng mambunu ibana di arian manang borngina i. molo pangantusion di tingki na mas di turpuk on (zaman Israel uju i) molo halak naung hona sondang ni bulan boi do i mambahen marsahit tondi ni jolma i (uju i diantusi do na marsinondang do bulan, ndang songon pangantusio sisaonari na mandok ndang na marsinondang bulan i) ndang itaboto arian manang bodari ro pangunjungan manang ro sibolis i laho pamagohon hita. Alai molo nunga rap hita dohot Jahowa ndang sihabiaranta be i saluhutna.

            Ay. 7 – 8 ima ujung ni ende hananangkok ni parpsalmen on. Di ayat 7 ima panjagaon ni Jahowa di nasa parmaraan. Di ngolunta on tung na so boi do hita malua sian ragam parmaraan di pardagingon na mambahen dagingta gale manang manghilalahon hansit. Alai nang pe songon i na itaadopi unang ma nian gabe dohot partondionta marmara. Ai ido mansai tegas do parpsalmen marhite endena on, “sai jagaonNa do tondim”. Molo nunga margogo tondi jala pir tondi, margogo ma daging on mangulahon angka ulaon laos diuduti ma pasupasu na naeng sijaloonta. Molo idaonta hata ni umpasa ni halak batak: pir ma pongki bahulbahul pansalongan, pir ma tondi lujuluju ma pangomoan. Ido tutu, sai jumolo do ingkon pir tondi, jala dao ma angka parmaraan ni tondi di ngolunta. Parmaraan ni tondi boi do masa ala ni tekanan, ancaman dohot angka pangoloion di ragam tondi ni portibi on. Parmaraan nit tondi mambahen jolma i tahuton, ndang tontu di ngoluna, sai sibusesaon jala ndang jumpang las ni roha di ngoluna. Di ay. 8 tangkas do dibaritahon manang sadihari pe manang didia pe jala manang aha pe na masa di ngolunta sahat tu na mate hita manadinghon portibi on, sai na ramotan ni Jahowa do tondinta. Ndang loasonNa hita punjung manaon angka na masa di hasiangon on. Sai tongtong do Ibana adong mandongani hita, nang pe sipata hita jotjot manadinghon Ibana hinorhon ni ragam sidalian di angka ulaon.

Hahonaan ni Turpuk

            ndang na sala hita mangido pangurupion tu angka dongan, alai unang ma gabe marsigantung hita tu pangurupion ni dongan na boi mambahen hita mardebataon dongan jolma, tarlumobi mardebatahon angka gogo ni portibi on asa boi diurupi hita manggohi hagiot ni daging dohot hagiot ni pingkiranta. Adong do pangurupion ni jolma na laho mangurupi donganna jolma hape laho mambuat hauntungon do sian i. isarana, adong sahalak jolma na mangido pangurupion tu sahalak donganna na paradongan. Dipangido do pangurupion di parhepengon laho manuhor obat ni keluarga manang laho manuhor boras laho panganon ni keluargana, dilehon do pangurupion di parhepengon i alai laos dibahen do bunga na timbo na so tolap digarar hinorhon ni hapogosonna i. ndang na laho mangurupi na marsitutu ianggo sisongon i alai pangurupi na marpambuat do. Pangurupion ni dongan jolma tarbatas do intap didia batas ni na boi uruponna jala ndang na gabe hot taon tu taon boi uruponna.

            Marhite ende hananangkok ni parpsalmen on dipatandahon do sada pangurupion na manongtong jala na so tarbatas ni saluhut inganan dohot tingki. Pangurupion na dibaritahon ni parpsalmen on ima pangurupion na so pola marpambuat tu diriNa alai pangurupion laho ngolu ni jolma i do tarlumobi ngolu ni partondion. Sian do do ulaning pangurupion na sisongon i? sian Jahowa, Debata Zebaot, Ama ni Jesus Kristus. Sian dia do botoonta pangurupionNa i? ndada sian pangantusion dohot pingkiran ni jolma, alai sian haporseaon na sintong do.

            Jahowa do na gabe pangurupi na so hea marujung pangurupionNa. Manang aha pe na masa di ngolunta on, nang hea pe hita merasa gagal, manang manghilalahon punjung di na mandalani ngolunta on, unang ma gabe tahuton hita di saluhutna i. molo nunga Jahowa donganta, dipapos ngolu partondion jala pir tondinta dibahen margogo ma hita di na mandalani ngolu on, jala mangihut ma angka pasupasu di ngolu pardagingon disarihon. Antong, beta hita ro tu Ibana mangido pangurupion di ngolunta, unang be marsidalian hita mandapothon Pangurupionta marhite parsaoran di partangiangan nang di parsaoran di bagas joro. Tuhan ma mamasumasu. Amen.