Bahan Jamita/ Khotbah Hananaek - Kenaikan Tuhan Yesus Kristus, Ulaon ni Apostel/ Kisah Para Rasul 1: 1 - 11

BAHAN JAMITA

PARNINGOTAN HANANAEK NI TUHAN JESUS

Kamis, 25 Mei 2017

Ev.: Ulaon ni Apostel 1: 1 – 11; Ep.: Psalmen 47: 1 – 10; S. Patik: 5 Musa 7: 9

BARITAHON MA BARITA HANGOLUAN TU SUDE BANGSO

oleh. Pdt. Daniel Bonardo Pane, S.Th.

Patujolo

            Sada partingkian na mansai lungun do molo jumpang tingki parsirangan ni daging dohot mudar angka na marsihaholongan, tarlumobi molo mansai tonggi jala dasip haholonganna i. jotjot do sai martading hata manang mangalehon poda sada jolma na naeng manadinghon donganna jolma, israna natoras tu ianakhonna, alai ndang na sude boi adong tingkina pasahathon hata partadinghonna.  ndang adong na boi manggabusi rohana nang pe adong sogo ni rohana mida donganna, alai ditingki dongan na sinogohonna i marujung ngolu manang marsirang di daging dohot mudar pasti do lungun dihilala nang pe ndang songon balga ni lungun halak na manghaholongi ibana. Parsirangan sibuk dohot mudar di ganup jolma ima ujung ni parsaoranna, jala ndang adong be hadomuan na. aha do hadomuanna tu turpuk jamita on? Di turpuk jamita on, ima tingki parsirangan ni Jesus tu angka siseanNa. Marsirang ma Jesus Kristus, Tuhan jala Guru i manadinghon angka siseanNa dohot angka na porsea di Ibana uju i, parsirangan mudar dohot sibuk na mambahen mansai lungun roha ni angka sisean marnida na masa i. alai adong do na mansai ringkot botoonta jala ingkon itahaposi taringot ulaonta sadari on hombar tu turpuk jamita on. Antong masuk ma hita tu hatorangan ni turpuk jamita on.

Hatorangan ni Turpuk

            Buku Ulaon ni Apostel ima na sinurathon ni si Lukas, sada dongan ni si Paulus laho mangurupi angka ulaon parbaritanaulion tu ganup ingananna. Lukas ima sahalak pangubati naung gabe porsea nang pe ndang sian halak Jahudi ibana. Disurathon si Lukas pe buku Ulaon ni Apostel on, laho paboahon jala mambaritahon tu si Teopilus, sahalak na pinarsangapan (ay. 1 bdk. Lukas 1: 3). Torop do na bisuk mangantusi ianggo si Teopilus ima martudutu tu “na hinaholongan ni Debata (yang dikasihi oleh TUHAN) ndang adong na pasti goar do si Teopilus on manang punguan ni anak ni Debata, na niasian ni Debata (ima halak na sai tongtong ringgas mambaritahon barita na uli nang pe ingkon diadopi ragam hasusaan manang hamaolon di parngoluonna, alai satia do ibana di haporseaonna i). dimulai si Lukas do suratna on ima songon udut ni baritana na parjolo i (ima evangelium si Lukas) taringot poda dohot ulaon na pinungka ni Jesus uju di portibi on Ibana.

            Disurathon si Lukas do angka panghobasion ni angka apostel dohot parbarita na uli, jala pola do disurathon si Lukas angka sitaonon ni halak na porsea na satia di haporseaonna nang pe ingkon hamagoan hosa. Dibaritahon si Lukas on do tu si Teopilus di bungku on taringot hahihinsat ni Jesus Kristus dung salpu haporsuhon na tinaonNa i jala mulak mangolu. 40 ari ma Jesus rap dohot angka na porsea i jala mambaritahon na tutu do Ibana naung hehe sian hamatean songon naung dihatahonNa hian. Ro ma tingkina, ingkon tadingkononNa portibi on dohot sude angka hagiotna. Borhat ma Ibana manadinghon angka sisean na sampulusada i (alana si Judas Iskariot nunga mate maningkot Mat. 27: 5) dohot angka na porsea jala na sai tongtong na masihol manangihon pangajarion dohot poda ni Tuhan Jesus (ay. 2 – 3). Andorang so hinsat Jesus tu Surgo, dipatihi ma angka siseanNa na so jadi meret nasida sian Jerusalem, so jolo dipaima bagabaga ni Ama i, na binege angka sisean i sian Ibana (ay. 4, patudos Luk 24: 49; Joh. 15: 26). Diboto Jesus do boha do karakter ni angka siseanNa i, ima parbiar. Molo mulak ma muse hita tu partingkian na ditangkup Jesus di Getsemane marserak do angka sisean i. gariada si Petrus, sisean na hinaholonganNa mansoadahon Jesus asa unang dohot ibana mangae songon na niae Jesus. Biar do do jumolo mangajarai angka sisean i dung ditangkup Jesus, jala biar ni roha on boi do mambahen marserak angka na porsea i. dipatikhon pe asa “so jadi meret angka sisean i” asa unang marserak do angka sisean i ala adong do ulaon na naeng udutan nasida dung manaek Jesus tu Surgo. Ulaon marbaritahon Harajaon ni Debata ndang na gabe marujung nang pe manaek Jesus manandinghon angka sisean i. ulaon marbarita Harajaon ni Debata diuduti angka sisean nang songon i angka na porsea. Alai andonrang so marbarita na uli angka sisean i, ingkon jumolo do nasida sada pandidion na badia, ndada songon na binahen ni si Johannes pandidi di aek Jordan. Pandidion na didok dison ima pandidion Tondi Parbadia (ay. 5), Tondi na so sian portibi on, jala Tondi na marhasurungan sian ragam tondi na adong di portibi on, Tondi na sian Jahowa, Ama i. ima na naeng sijaloon ni angka sisean i. Nang pe marsirang Jesus dohot angka sisean dohot angka na porsea uju i di pardagingon, alai tung na so jadi marsirang ianggo di partondion marhitehite Tondi Parbadia. Tondi Parbadia i ma na margogoihon, mangajari, mangapuli dohot maniroi angka sisean nang songon i na porsea nang pe ndang rap dohot Jesus di pardagingonna.

            Harajaon na dilapati angka sisean nang angka na porsea ima Harajaon ni portibi on (menghancurkan dan menguasai) ido umbahen disungkun taringot hajongjongon ni Harajaon i di Israel (ay. 6). Sungkunsungkun on ima sada sihabiaran na mansai bolon do di harajaon na adong hatiha i songon harajaon ni Rom na marhuaso jala na manggomgom Israel uju i. tutu do ianggo Harajao ni Debata na ingkon ro jala mangatasi saluhut harajaon na adong di portibi on, jala sude harajaon nang angka na sangap unduk do jala marsomba di jolo ni Raja na Manongtong i. alai molo disungkun andigan? Ndang na marguru tu jolma haroro ni Harajaon i, alai guru di Ama na marsuru Jesus Kristus i do, ima Jahowa Debatanta (ay. 7 patudos Mat. 24: 36 – 51). On ma na gabe pos ni roha ni angka sisean i asa sai tongtong dungo, martangiang jala marhiras ni roha (berani, kuat, teguh) laho mambaritahon barita hangoluan tu sude bangso manang marga, nang pe ingkon dibolus ragam angka na masa di parngoluan on.

Marhite pandidion Tondi Parbadia i, asa gabe sitindangi ni Jesus ma angka na porsea i di Jerusalem sahat tu saluhut bangso manang marga di ganup inganan di portibi on (ay. 8).  Ndang adong be na mambahen batas holan tusan manang holan tuson do Barita na uli, ndan pola dohot angka na asing. Haroro ni Jesus mambaritahon Harajon ni Debata ndada holan tu halak Israel alai tu sandok bangso dohot marga nang pe peristiwa Jesus na tubu sahat di na naeng naek tu Surgo masa i saluhutna di Israel. Sian purba tu pastima, utara tu dangsina; tu na mokmok dohot na marniang; tu halak na bontar, na birong dohot na huning; tu sude marga; sude bangso; sude adat  ingkon baritahonhon do barita na uli, ima manghatindanghon Jesus Kristus, Sipalua i jala manghatindanghon hangoluan na pinatupa ni Jesus Kristus hombar tu parsuruon ni AmaNa na Sangap jala Marmulia i.

Dung didok songon i (ay. 4 – 8) tarhinsat ma Ibana dipanotnoti angka sisean nang angka natorop disi. Dung i diholipi ombun i ma Ibana sian jolo ni matanasida (ay. 9). Ndang pola tubu sungkunsungkun di rohanta boha do dalanna Jesus boi hinsat tu Surgo? Unang lilu hita, hahomion ni Jahowa do patupahon saluhutna i. dipaloas Jahowa Debata do angka sisean nang angka natorop marnida hahomion i. gok hamuliaon ma masa di inganan i. mansai sonang do panghilalaan angka sisean nang natorop i marnida na masa i, sai tinuluthon nasida dope Jesus na laho i tu ginjang, jala dang diboto nasida naung jongjong di lambungnasida 2 halak parulos na marlinanglinang (ay. 10). 2 halak na marlinanglinang ima pardisurgo na laho paingothon natorop i asa borhat ma nasida mulak laho manguduti ulaon hombar tu naung dipatikhon Jesus i tu nasida (ay. 11). Dipaingot 2 pardisurgo i do nasida nang pe mansai sonang marnida hamuliaon ni Anak I, alai naeng ma mulak nasida muli tu ngolu ni portibi on alai ndang be mulak pangalaho manang parngoluannasida songon andorang so rap dope rap dohot Jesus Kristus. Molo itatolhashon sahat tu ay. 14 turpuk jamita on, tangkas ma idaonta angka ulaon ni Apostel dung mulak nasida marnida hamuliaon ni Jahowa i: ima martangiang, didatdati do martangiang sian sada ni rohanasida rap dohot angka parompuan, si Maria, ina ni Jesus rap dohot anggiNa i (ida Joh. 7: 3 – 5).

            Laos sude na adong di Ulaon ni Apostel on mambaritahon do pardalanan ni ha-Kristenon dung manaek Jesus tu Surgo sahat tu parmonding ni angka apostel hinorhon ni barita na uli na niajarhonnasida. Laos disurathon si Lukas do suratna on gabe pangajarion dohot patoguhon Teopilus nang na manjaha “nang pe songon dia parir ni sitaonon manang dokdok ni sitaonon alai tung na so jadi mambahen mintop hiras ni roha (semangat, keteguhan) angka parbarita na uli laho mambarita na uli.

Hahonaan ni Turpuk

            Parsidohot do hita laho manguduti ulaon parbarita na ulion sahat tu ngolunta sisaonari on. Adong do na ringkot idaonta mutiha sian turpuk jamita on, ima:

• Unang marnaloja hita mambaritahon naung monang do Jesus manaluhon sorop ni dosa dohot hamatean, jala naung manaek do Ibana di bagasan hamuliaon ni Harajaon ni Jahowa ndada laho manadinghon angka na joujou di gaorNa jala manghirim di Ibana. Marsirang di pardagingon alai sai digomgomi do di bagasan Tondi Parbadia.
• Molo dibaritahon taringot hamuliaon ni Jahowa Debatanta marhite Jesus Kristus, mansai sonang do panghilalan jala naeng ma pintor hatop hita tusi. Tarjou do hita tusi, tu inganan naung dipauli Jesus tu hita angka na porsea jala satia di Ibana (Joh. 14: 1 – 3). Alai tung na so diajari do hita angka na porsea di Ibana asa mandele, jala lari sian parngoluan siganup ari. Alai diparbagabagahon do Tondi Parbadia, asa i mangaramoti, maniroi, mangajari, mangapuli angka na porsea i asa hot jala togu di haporseaon jala tongtong manghirim parsidohot ma nian di hamuliaon i.
• Sai tongtong ma hita marhiras ni roha mandalani ngolunta nang pe ingkon masa ragam sitonon, arsak dohot anggukangguk nang songon i las ni roha. Marhiras ni roha mandalani ulaon marbarita na uli marhite denggan mulamulaon, tubu tongtong semangat baru di ganup parngoluanta. Marbarita na uli marhitehite pambahenan na burju nang hatana pe sai na tutu, tingkos jala sintong do sude . unang ma holan tu dongan sahorong, dongan na sosok. Alai ganup naung manjanghon Jesus di ngoluna. Debata Jahowa ma mamasumasu. Amen.

           

Bahan Jamita/ Khotbah Epistel, Minggu Exaudi; 1 Petrus 5: 6 - 11

BAHAN JAMITA EPISTEL

MINGGU EXAUDI

Minggu, 28 Mei 2017

Nas: 1 Petrus 5: 6 – 11

JAHOWA DO HAPOSANKU

oleh. Pdt. Daniel Bonardo Pane, S.Th.

Patujolo

            Di parngoluan on sipata ro do ragam sitaonon na mambahen sungkunsungkun haporseaonta na mandok: didia do Debata na hita puji jala na hita joujou di na songgaop sitaonon i. sian sungkunsungkun i tubu ma ganggu ni roha nang ganggu di haporseaonna taringot hadirion ni Debata di ngoluna. Na dipasombu Debata do hita punjung manaon sitonon i? songon i ma tubu sungkunsungkun di roha ni halak na mandok tung madokdokhu do sitaonon on songgop di dirina. Ingkon ma tangkas hita mangantusi, ianggo sitaonon nang parungkilon na niadopan di turpuk on ima sitaonon hinorhon ni hasatiaonna marhaporseaon di Jesus Kristus, Tuhan i, ndada ala ni ulaon na jahat na binahenna. Antong molo songon i, aha do na boi idaonta ulaon ni Debata molo songgop sitaonon i di ngolunta? Hita paihutihut ma hatorangan ni turpuk jamita on.

Hatorangan ni Turpuk

            Nunga jotjot ra hita manjaha turpuk 1 Petrus on, jala torop do hatorangan naung hita jaha taringot turpuk 1 Petrus  on. Ianggo buku 1 Petrus on ima sada buku na marisihon pangajarion dohot panogunoguion ni sahalak parbaritanauli tu halak Kristen (na porsea) di ragam angka sitaonon na songgop jala na naeng songgop muse. Ragam do pandapot ni jolma taringot ise do panurat ni turpuk 1 Petrus on. Adong na mandok si Petrus ima sisean ni Jesus Kristus do na manurathon turpuk on, marhite sian isi ni turpuk on na paingothon muse (mengingatkan) taringot angka jamita dohot pangajarion ni Jesus andorang na rap dope si Petrus dohot Jesus di portibi on. Na deba muse mandok na so si Petrus na manurat turpuk on, alana molo niida sian panurat ni turpuk on di bahasa asli (hata Gorik/ Junani) tung maol situtu do tarjalo roha anggo si Petrus na manurathon turpuk on hinorhon ni parngoluan ni si Petrus na so adong parsingkolaonna jala mardengke do na niulana. Alai tung na so jadi diambati jolma huaso dohot ulaon ni Tondi Parbadia holan marhitehite parbinotoan dohot hapistaronna be. Nang pe so adong parsingkolaon ni si Petrus, alai molo naung songgop do tu ibana Tondi Parbadia, sai diajari jala diparbisuki Tondi i do ibana manghatahon barita taringot Jesus Kristus tu sandok bangso, songon naung diulana di huta Jerusalem uju di na saor Tondi Parbadia i (bdk. Ulaon ni Apostel 2).

            Buku 1 Petrus on disurathon ma hirahira taon 64 - 65 uju kaisar Nero Claudius Caesar Augustus Germanicus (Kaisar Nero) manggomgom di harajaon Rom. Na bisuk na asing muse mandok ianggo turpuk 1 Petrus on disurathon di taon 81 – 96 uju Titus Flavius Domitianus (kaisar Domitianus) manggomgom harajaon Rom. 2 partingkian ni kaisar na manggomgom saluhut luat ginomgoman harajaon Rom, ima partingkian na mansai hansit jala dokdok niadopan ni halak Kristen nang pe ragam sitaonon na didaopi. Nero mambahen hata manang barita na so tutu maradophon halak Kristen taringot na mambakar Kota Rom hape sasingtongna Kaisar Nero do na mangulahonsa. Alai dibahen pe barita na so tutu i dalan asa adong sidalianna mambahen na hansit ngolu ni halak Kristen jala suda ma halak Kristen di harajaonna. Ndang dihalomohon si Nero haroro ni Barita na Uli taringot Jesus Kristus, disiala gabe na naeng manggulinghon harajon ni Rom do dietong rohana halak Kristen i. Molo Kaisar Domitianus sai didok do dirina dos tu debata jala dipardebatahon ibana do dirina. Jala sude jolma na adong di panggomgomionna ingkon marsomba tu ibana songon debata. Ndang olo ianggo halak Kristen uju i marsomba tu Kaisar, holan tu Jahowa Debata marhite Jesus Kristus do nasida marsomba. Ido umbahen gabe dibahen ma patik laho mamunu saluhut halak Kristen jala dipasiaksiak do ngolu ni halak Kristen di pulo Patmos. Alai halak na so olo dipasiaksiak jala ndang olo parsidohot di sitaonon i, ditadinghon nasida ma haporseaonna i asa sonang ngolu pardagingonna. Ido umbahen disurathon si Petrus buku on laho patoguhon haporseaon ni halak Kristen uju i di na mangadopi sitaonon na ro jala na naeng ro muse. Asa unang mandele halak na porsea i molo pe ingkon songon i dokdok ni sitaonon i ro.

            Turpuk Jamita on ima sada sian pangajarion ni si Petrus di na laho patoguhon haporseaon ni angka na porsea di Jesus Kristus Tuhan i. molo hita ida ay. 1 – 4 ima pangajarion ni si Petrus tu angka sintua. Sintua dison ima natuatua na pinillit angka apostel jala angka pangajari di na laho mangurupi ulaon marbarita na uli jala panghobasion marbarita na uli tu luat hapeahan ni  Barita na uli. Di ay. 5 turpuk jamita on, ima pangajarion ni si Petrus tu angka na umposo. Ise do umposo na nidokna dison? Halak na umposo dison ima halak Kristen na poso di umur nang di pamatang. Halak naposo sai dilapati do i na gogo (songon pandok ni natuatua ni halak batak: na matua pangalapan poda, naposo pangalapan gogo). Jala naposo dison ima halak na mangurupi angka sintua di na laho patupahon panghobasion marbarita na uli tarlumobi di ragam angka hamaolon na masa. Angka na umposo unduk ma di angka na tumunggane (martudutudu tu angka sintua boi do martudutudu tu angka na umtua di umur nang di pamatang). Unduk dison ima marlapatan pasangaphon jala patupahon na denggan di angka natuatua. Ala ni i naeng ma na umtua dohot na umposo adong roha na serep, ai dialo Debata do angka na ginjang roha, alai dilehon do asiasi tu angka na serep marroha (1 Petrus 5: 5 patudos tu Poda 3: 34). Halak na ginjang roha ima halak na paburnanghon dirina nang hadirionna, mamuji dirina, jala molo siginjang roha boi do i madabu tu na mardebatahon dirina, laos dirimpu do na gabe dos do huaso dohot arta manang hadirionna tu debata. Sian ulaon sisongon i ma tubu roha na mangasahon gogona, dirina, habisukhonna, artana, nang sude hadirionna. Ndang adong be roha na biar dohot unduk tu Debata.

            Ido umbahen didok di ayat 6 asa patoruhon diri tu tangan ni Debata na gogo i, asa dipatimbo di tingkina i. ay. 6 on paingothon tu hita di pangajarion ni Jesus uju di portibi on dope Ibana (ida Mateus 23: 12; Lukas 14: 11). patutoruhon diri tu tangan ni Debata marlapatan do i asa pasahathon hadirionta; sai marhaposan ma tu Debata jala haradeon di na laho marsomba. Ndang adong be jumpang di ibana roha na paburnang dirina, mamuji dirina manang mambahen artana, gogona, dohot nasa na adong di portibi on gabe parsigantunganna. Boha do hita patoruhon diri tu tangan ni Debata? Ima: unang be marhaposan jala marsigantung tu nasa na adong di portibi on, benget manaon salahut haporsuhon, dungo di na laho martangiang manang aha pe na masa dohot na naeng masa, jala tung na so jadi diparsoadahon manang ditadinghon Debata, mual ni ngolu dohot haluaonna. Dipatimbo dison marlapatan do i parsidohot taruli di Harajaon na manongtong rap dohot hamuliaon ni Debata, alai jumolo ingkon manahan ma di saluhutna di portibi on. Tontu mansai maol do i diulahon hinorhon ni sitaonon na mansai dokdok dihilala. Laos ido umbahen didok muse di ay. 7 asa maningganghon nasa na hinolsohon, ai disarihon do hita. Ay. 7 on manosoohon hita asa marhaposan jala pasahathon dirinta hita tu Debata. Unang be sai dihaposi jala marsomba tu angka gogo ni portibi dohot hagiot ni portibi on. Panarihonon ni Debata marlapatan do i di pangaramotion dohot panjagaan ni Jahowa na mangaramoti jala manjaga halak na ro tu Ibana di bagasan roha na serep. Panarihonon ni Debata ima panarihonon ni hosa, hadameon, pos ni roha, hahipason, sonang ni roha,  jala ndang hurangan di sipanganon dohot parabiton (boi patudos tu pangajarion ni Jesus taringot pangaramotion ni Debata di angka pidong na martongatonga langit na sai tongtong diparmudumudu Debata (Mateus 6: 26) lam ma hita jolma na porsea).

            Ai halak na gale do ianggo jolma ala gale do dagingna di na laho mangulahon na denggan, ima hata ni Debata. Tarlumobi di na songgop ragam sitaonon manang paraloan hinorhon ni haporseaonta, pintor hatophatop do mandiori didia gogo na umgogo na adong di portibi on. Gok ma naung apatis di haporseaonna songon na so marlapatan didok rohana haporseaonna i.  Laos ido umbahen dipaingot apostel Petrus angka huria na manjaha suratna on asa torang ma roha, jala dungo. Torang jala dungo ima sada parenta asa manat, togu, unang tertuktuk, adong paradehon bohal laho mangadopi sada siadopan. Aha do na naeng siadopan? Ima sada parporangan manang paraloan ni angka na porsea i. ise do alo ni na porsea i? ima sibolis. Digombarhon do songon babiat na marauang, mangalului sibondutonna. babiat na marauang asa mabiar do punguan ni birubiru dungi birubiru na gale ido na gabe siallangan ni babiat i. songon i nang ulaon ni sibolis na marhite angka sitaonon na dokdok jala ragam haporsuhon na mambahen hita ganggu di haporseaonta jala ditadinghon ma haporseaonna dung i hamagoan jala hamatean sisalelenglelengna do upana disi. Ingkon tangkas do diboto, na so hea do sian Debata ro angka sitaonon dohot haporsuhon, alai dipaloas Debata do masa i di angka na porsea. Ndang na so boi disalpuhon Debata sude angka sitaonon ni na porsea holan sangkidop mata, alai ndada i na gabe saut dipatupa Debata. Alai masa do i asa lam pita jala lam arga ma mutiha haporseaonta i umarga sian sere di portibi on. Tung na so hea do sibolis i so manang maradi di na laho mamboan hamagoan tu angka jolma. Alai ganup na mangulahon jala mangoloi hagiot ni sibolis, hamagoan dohot hamatean sisaleleng na do didapot.

Antong gomos ma hita mangalo sibolis i marhitehite haporseaon (ay. 9). Apostel Paulus di Efesus 6: 14 – 18 tangkas do dipajojor si Paulus taringot sinjata ni angka na porsea di na laho marporang dompak sibolis pangago i. alai na ingkon songgop do sitaonon tu halak na porsea binahen ni sibolis, asa unang malua na porsea i jala ndang taruli di hangoluasn salelengna. Alai unang ma ala ni pangalanta na so ture dohot parangenta na so denggan gabe marsitaonon hita. Uju na rap dope Jesus dohot angka siseanNa, nunga pola dilumbahon Ibana hian aha do na naeng masa tu angka sisean nang tu angka na porsea tu Ibana (ida. Johannes 15: 18 – 25). Di tonga sitaonon manang tingki na gok hasusaan di portibi on, dipauliuli, dipahot, jala dipatogu do hit asa unang olo hita talu maralohon sibolis, pangago i (ay. 10) asal ma olo hita ro tu Ibana jala togu hita di na mangoloi Ibana sian nasa roha, pingkiran, ateate. Holan marhite Jesus Kristu do hita boi margogo jala togu marhaporseaon paima ro tingkina di na parsidohot hita manghilalahon hamuliaon ni Harajaon ni Debata, alai  ingkon rade do hita manaon haporsuhon. Di Ibana (di Debata) ma hagogoon ro di salelengna, amen (ay. 11). Ay. 11 on, ima ende hamuliaon ni angka na porsea na jotjot diendehon laho paboahon hamuliaon (doxa) dohot huaso ni Debata na so boi dipatudos tu manang ise, manang aha, sadihari, didia di sandok harajaon dohot angka na gogo di portibi on. Marhite ende hamuliaon adong panghatindahon huaso dohot gogoNa ro disalelengna.

Hahonaan ni Turpuk

1. Aha do mambahen hita marungkil manang marsitaonon. Ala ni hajahatonta do manang ala ni haporseaonta dohot pambahenanta na tingkos na gabe sisogo tu ganup jolma na so manghalomohon adong hasintongan dohot hatigoran. Turpuk jamita on, paboahon molo pe songgop ragam sitaonon ala ni haporseaonta jala ala na so olo hita mangihuthon angka dalan dohot tahi ni parjahat, jolma na martua ma hita disi ala na parsidohot do hita mian di pangondianan ni Debata Jahowa, jala ala parsidohot hita manghilalaon songon sitaonon ni angka na badia (patudos tu Mateus 5: 11 – 12).
2. Unang ma sai mangido hita tu Debata asa malua sian ragam sitaonon manang ragam haporsuhon di portibi on. Na ingkon do i masa di ngolu ni angka na porsea nang di ruas ni huria. Ingot ma hita asa ro hita tu Debata marhitehite haserepon ni roha, jala pasahathon hadirianta on polin gabe ampuna ni Debata ai disarihon do hita. Tung na ganggu ma hita di panarihonon ni Debata di ngolunta on? Molo pe ro halisungsung manang alogo na naeng manegai haporseaonta, torang jala dungo ma hita disi. Mangido hita tu Debata asa dipargogoi ngolunta on asa boi manang aha pe na masa boi do itaadopi saluhutna (ida Filippi 4: 13).
3. Parsatongkinan do hita mangolu di portibi on. Nang pe 100 taon hita mangadopi ragam hasusaan tung na so marlapatan do i molo naung masuk hita tu hamuliaon ni Debata di HarajaonNa i. antong, boasa ma hita sai marhaposan tu na olo salpu? Ro ma hita tu Ibana, haposi ma Ibana bona ni hangoluan sisalelengna. Hagogoonma di Ibana salelenglelengna, amen.

Jamita Epistel Minggu Rogate, 21 Mei 2017, Kisah Para Rasul/ Ulaon ni Apostel 17: 22 - 31

JAMITA EPISTEL

MINGGU ROGATE

MINGGU 21 MEI 2017

Nas: Ulaon ni Apostel 17: 22 – 31

POS MA ROHANTA

SAI DITANGIHON JAHOWA, DEBATA DO TANGIANGTA!

oleh. Pdt. Daniel Bonardo Pane, S.Th.

Patujolo

            Ulaon na mansai ringkot do di parngoluan ni halak Kristen “na martangiang”. Marhite tangiang do boi panghilalaonta songon dia do jonokta di na mar-Tuhan. Sipingkiron do sinuaeng molo adong halak Kristen tarlumobi naung matua mandok: “ndang huboto na martangiang”, manang “nunga malas au di na martangiang”, dohot lan ragam sidalian asang unang disuru martangiang ibana. Tangiang ima sada sian panombaonta tu na itahaporseai. Alai andorang itaulahon panombaon i, mansai ringot do hita mananda ise do na itasomba, so tung itasomba sisombaon marhite tangiang alai ndang itatanda ise do na itasomba i. laos on ma parasingan ni tangiang manan panombaon ni halak Kristen naung mananda taringot tu ise do ibana martangiang, jala tangkas panandaionna marhite haporseaonna ise do na manangihon tangiangna i. aha do hadomuan ni turpuk jamita on hombar tu hatoranan di patujolo jamita on? Tangkas ma itapaihutihut hatorangan ni turpuk jamita di Minggu Rogate on.

Hatorangan ni Turpuk

            Turpuk jamita epistel di minggu Rogate on, ima taringot pangajarion ni si Paulus di Aten (Athena), ima sada huta na mansai balga jala ibukota ni luat Junani (Greece). Ditanda do huta Aten on ima huta haroroan ni angka na bisuk (filsuf) na patandahon taringot ragam parbinotoan di parngoluan on (isarana: Socrates, Plato, Aristoteles). Laos di huta Aten, ragam do sisombaon ni halak Gorik hatiha i, isarana dewi Athen (dewi kebijaksanaan terkhusus dalam hal perang), molo hatiha i (agama bangsa-bangsa kuno) sai dibahen bangso i do goar ni debatanasida hombar tu haringkot ni parngoluannasida (isarana, ringkot nasida udan dibahen nasida do goar ni debata i, debata ni udan (dewa hujan/ kesuburan), diida nasida na ringkot mataniari dibahen nasida goar ni debata i debata ni mataniari (dewa matahari/ cahaya). Hinorhon ni na mansai gomos do nasida di ruhutruhut ni parugamoonnasida, sahat do dibahen nisida pelean tu debata na so tinanda, ima angka debata na so adong diboto goarna (Agnostos Theos (Allah yang tidak dikenal)) asa sude angka debata na adong di portibi on parsidot di pameleannasida i. Sai marsomba jala martangiang huhut mangalehon pelean do halak Aten i tu debata na so ditanda nasida i. jala dibahen halak Aten do sada langgatan ni pelean tu debata na so ditandanasida i.

            Disurathon si Lukas do angka na masa uju naung jongjong huria na parjolo (Kristen mula-mula) asa ganup na manjaha buku Ulaon ni Apostel on nang songon i si Theopilus (Ul. Apostel 1: 1) mangantusi jala marnida hiras ni roha (semangat/ keberanian) ni angka apostel di na laho pararathon Barita na Uli, Barita Haluaon marhite Jesus Kristus, Tuhan i nang pe ragam angka hamaolon manang angka sitaonon na songgop uju i. nang pe ingkon hamagoan hosa angka apostel hinorhon ni pangajarion dohot Barita na uli na pinasahatna, ndang na gabe mandele manang gale pardagingon nang partondion nasida di na laho mambaritahon Barita na Uli i.

            Sahat ma barita na uli on tu halak Aten na binoanhon ni si Paulus. Andorang so sahat si Paulus tu Aten, marbarita na uli ma si Paulus di huta Tessalonik dohot di Beroa (75 km. sebelah barat Tessalonika), jala sahat ma tu luat Aten. Dijamitahon si Paulus do taringot Jesus Kristus, naung hehe sian angka na mate. Alai suhar do di angka na deba jamita ni si Paulus ala maralo tu pangantusion ni angka pangajari na adong disi, ima Epikurus (ajaran yang menekankan usaha manusia untuk menggapai kebahagiaannya sendiri dan menghindari berbagai rasa sakit) dohot Stoa (ajaran yang menekankan manusia untuk menyatu dengan alam, sehingga alam akan mengatur kehidupan manusia. Manusia hanya menjalani kehidupan sesuai dengan alam, dengan kata lain ajaran Stoa menekankan “kodrat”/ nasib) (ay. 18). Laos dialap sian horong ni Epikurus dohot Stoa ma si Paulus laos diboan ma tu Areopagus, ima parrapoton ni angka na sangap jala angka natuatua na mangantusi jala na tangkas manjaga adat dohot uhum ni halak Aten. Dijou nasida do si Paulus laho patangkashon dia do pangalaho ni jamita na jinamitahon ni si Paulus i (Ul. Apostel 17: 16 – 21).

            Ianggo turpuk jamita on ima alus ni si Paulus taringot sungkunsungkun ni Areopagus (ay. 22 – 31). Dipatujolo si Paulus do mangalusi i marhite taringot haporseaonnasida di pardebataonnasida i (halak aten), laos dipatorang si Paulus do taringot parsombaonnasida i tu angka debata ni halak Aten tarlumobi na mambahen langgatan tu ‘Debata na so tinanda”. Hata ni si Paulus di ayat 22 – 23 turpuk jamita on marlapatan ma ianggo halak aten sai marsomba jala mamele do tu debata na so tinandanasida. Parsombaon tu na so tinanda marlapatan parsombaon na so umboto adong manang so adong; mangolu manang mate; marnida manang na so marnida; manangihon manang so manangihon; jala disi adong ma gombaron na so pasti ise do na disombanasida i. boi do parsombaon sisongon i hinorhon ni sada pangajarion taringot hagogoon na so tarida, jala na tarida i boi na so toho molo niida sian na so tarida (bdk. Ajaran Aristoteles mengenai dunia ide, dalam ajaran Aristoteles diajarkan apa yang kita lihat ini adalah semu dan fana sedangkan dunia ide, dunia yang tidak dapat dilihat adalah kebenaran sejati yang bersifat kekal. Tetapi Aristoteles tidak menjelaskan apa maksud dengan dunia ide. Serta ajaran filsafat metafisik, yang mengajarkan bahwa ada satu kekuatan yang melebihi segala kekuatan yang ada dan tidak diketahui apa serta siapa itu. Dalam filsafat metafsik ini mucul ajaran causa prima: ada penyebab segala sesuatu, namun apa dan siapakah prima segala sesuatu termasuk siapakah pencipta bumi, pencipta segala sesuatu dan segala dewa yang ada).

             Laos dipatorang si Paulus ma taringot hadirion ni Jahowa Debata hombar naung nihaporseaonna i. di ay. 24 – 28 dipatorang do taringot huaso dohot hamuliaon ni Jahowa Debata na so boi dipatudos dohot angka debata ni Atena. Dijamitahon si Paulus taringot holong ni roha ni Jahowa Debata dohot hatigoranNa i jala Ibana do manggomgom sude saluhut harajaon na di portibi on. Haroroan sian Ibana do hosa hangoluan tu saluhut na margulmit di portibi on songon i di halak Jahudi dohot di halak Aten. Laos hombar tu tangiang dohot ende ni halak atena taringot ise do mual jala ise do mula ni hangoluan? Marhite jamit ni si Paulus on taralusan ma saluhutna nang songon i mangalusi angka pangajarion causa prima, taringot asal jala mual ni saluhut na nasa na adong, ima Jahowa, Debatanta. Laos ido umbahen didok si Paulus ai sabangso do hita dohot Ibana. Jahowa, na so tinompa ni jolma jala na so tinompa ni angka debata ni bangso. Marbalik sian angka debata manang ganaganaan na ditompa tangan ni jolma jala jolma i sandiri do na mambahen goarna hombar tu haringkot ni ngoluna. Alai Jahowa Debata, Ibana do manompa saluhutna jala disarihon do sude angka na ringkot di jolma i. Jahowa, Debata na mangolu jala di Ibana do hatongtongon salelengna. Molo Jahowa do Debata na mangolu, marlapatan ma i na ditangihon do hita molo na joujou Ibana, jala manang ise na manjou GoarNa sian nasa ias dohot hibul ni roha di ganup inganan dohot di ganup tingki disi do Ibana rap dohot ibana.

            Antong molo songon i, sabangso do ganup jolma di portibi on nang pe marragam be luatna, hatana, dohot hasomalanna. Hata sabangso dison martudutudu do i tu Sabangso di bagasan harajaon na manongtong, ima Harajaon ni Jahowa, Debata na manongtong i. antong molo songon i, rap sian Ibana do hita jala rap na tinompaNa ganup jolma di saluhut bangso di portibi on, sai unang be marguru jala marsomba dohot martangiang hita tu angka ganaganaan ala ndang dos jala ndang na boi i dipasuman dohot Jahowa, Debata. Ndang na gabe dos manang suman Jahowa tu angka debata na ditopa sian sere, perak, manang batu na pinandean jala piningkiran ni roha ni jolma (ay. 29). Molo pe na uju i dipaotooto angka na masa on halak Aten dohot hita na porsea, dipaotooto marhite angka haulion dohot hisaphisap ni daging on na manjou hita tu parsombaon tu angka na so tangka itaboto adong manang so adong; mangolu manang mate. Di tingki saonari, dibaritahon do tu hita saluhutna tingting hamubaon ni roha (ay. 30). Haruar jala hehe sian haotoonna i, ditadinghon ma hasomalon dohot parsombaon na so marimpola i. didapothon ma asi ni roha na sian Jahowa, ima marhitehite pangaramotion dohot pandonganionNa di ngolunta be. Nunga ro be tingkina Ibana patupahon paruhuman marhite asi ni roha dohot basabasaNa patandahon tu hita sada dalan tu hamubaon ni roha, ima marhite Jesus Kristus (ay. 31). Tung na so boi do jolma i marguru tu gogo dohot parbinotoanna laho manjalo basabasa dohot asi ni roha ni Jahowa di hamubaon ni rohana. Marhite Jesus Kristus, naung hehe sian na mate marhite huaso dohot hamuliaon ni Jahowa boi ma sada kepastian jala jaminan tu hita tung na so jadi ditulak Jahowa ganup na ro tu Ibana marhite Jesus Kristus, Tuhan i.

Hahonaan ni Turpuk

            Nuaeng sahat ma hita tu hahonaan ni turpuk. Adong do na ringkot putihononta sian hatorangan ni turpuk jamita on, ima:

-          Tung na so jadi hita ganggu taringot Jahowa, Debata na itahaporseai marhite Jesus Kristus Tuhan i. ndang songon debata angka jolma na mardebatahon gogona, huasona, artana, debata na sian batu, sere, perak dohot angka lan na asing na boi dipardebatahon sian na tinompa ni Jahowa. Jahowa, Debatanta do Debata na mangolu, jala na manongtong do ianggo harajaonNa. Molo pos do rohanta tu Jahowa, Debatanta, pos ma rohanta sai ditangihonNa ma tangiangta. Ndang adong tangiang na so ditangihon Jahowa nang pe marragam alus ni tangiangta i. isarana “Olo”, “ndang”, manang “Paima”.

-          Sai pos ma rohanta di na martangiang hita. Tangkas ma hita mananda jala tangkas ma hita mangantusi jala manghaporseai tu ise do hita martangiang? Jotjot do jolma martangiang alai ndang diboto jala ganggu do ibana tu ise do hasahatan ni tangiangna i. sai didok do hata ni tangiangna, dilompit do tangan jala unduk do simanjungjungna alai ianggo rohana ndang na tutu tu Jahowa Debata. Martangiang do ibana manjouhon goar ni Jahowa Debata alai ianggo rohana tu hadatuon dohot sahala manang sumangot ni na mate, nang songon i tu artana dohot hadirionna. Ganggu do rohana disi.

-          Molo tangkas do hita mananda jala manghaporseai Jahowa, Debatanta marhite Jesus Kristus, aha ma nuaeng sihabiaranta molo ditodo gabe manguluhon tangiang. Tangiang di keluarga, tangiang di punguan partangiangan dohot lan ulaon parsombaon haKristenon na asing. Marhite tangiang do hita paboahon na di rohanta on. Sai unang marusaha hita manghatahon na so tutu di tangiang ai nang pe so didok nunga jumolo Jahowa mamboto na di rohanta. Na naeng niida marhite tangiang ima boha do hita pasahathon na di rohanta on sian ias dohot tulus ni roha. Pos ma rohanta, holan marhite Jesus Kristus do hita pasahathon sude angka tangiangta tu Jahowa Debata. Alai naeng ma pos rohanta pasahathon tangiangta i unang ma marganggu ni roha. Amen.