Bahan Jamita Minggu X Trinitatis, 24 Agustus 2014

BAHAN JAMITA

MINGGU X TRINITATIS

Minggu, 24 Agustus 2014

Ev.: Rom 12: 1 – 8; Ep.: Jesaya 51: 1 – 6; S.Patik: Pilippi 4: 6

oleh: Pdt. Daniel Bonardo Pane, S.Th.

PASAHATMA PELAN NA TUTU TU JAHOWA!

Patujolo

            Nunga torop be jolma naung gabe antipati maradaphon halak Kristen. Sikap antipati on boi idaonta 2 ragamna: (i) radical antiphaty: ima parange antipati na manggosagosa jala na pasiaksiakhon halak Kristen marhitehite fisik. (ii) silent antiphaty: ima parange antipati na mambahen panggosagosaon manang pasiaksiakhon marhite psikologis, dohot angka aturanaturan na mambahen susa halak Kristen. Jala nunga torop be halak Kristen sandiri naung apatis taringot tu haKristenon. Nunga mardosdos diida taringot haKristenon, boi ma i sian dongan Kristen (marhite angka parange ni halak Kristen na sai tongtong ro mandohoti parmingguon manang parhuriaon na so suman manang dang dos songon di haKristenon), manang sian na masa tu ngoluna (mangalapati haKristenon holan tu hasonangan di ngoluna).

Boha do haKristenonta nuaeng?  Aut sugari disungkun tu hita huria Kristen saonari, aha do hasurunganta di ngolunta sian ngolu ni na so Kristen? Manang aha do hasurunganta parhalado ni huria, manang na ringgas marminggu sian halak na so parhalado manang na so hea marminggu? Torop do halak Kristen mangantusi ulaon haKristenonna (hadaulaton = peribadahan) holan naung piga godang angka na dilehonna di huria i (target, hamauliateon, pelean, dohot lan na asing). Molo itaetong sude angka peleanta na itapasahat tu adopan ni Jahowa marhite huria-Na, nunga sadia godang do saluhutna? Jala saluhut na itapasahat i, naung tuk do i mangimbangi angka pasupasu na pinasahat Jahowa di ngolunta on? Ingkon patar do antusanta, ndada hinorhon ni godang ni pelean i patandahon hita na mar-TUHAN, manang ndada hinorhon ni godang ni pelean na itapasahat i gabe marlomolomo na mar-TUHAN marhite huria-Na. Marhite surat ni si Paulus on, diajarhon do hita taringot aha do peleanta na tutu na boi itapasahat di bagasan ngolu ni hadaulathonta (hidup peribadahan kita).

Hatorangan ni Turpuk

            Apostel Paulus manongoshon suratna tu huria na mian di Rom. Didapot si Paulus barita taringot angka na masa tu huria (halak Kristen) na mian di Rom sian halak Kristen na di Rom na ro tu Korint, inganan panuratan ni surat on. Molo itajaha Rom 16: 22, na panurat turpuk on surat on ima si Tertius.[1] Marhite surat on, Paulus mamodahon halak Kristen asa boi mamboto parange na songon aha dona ingkon adong di halak Kristen. Nang pe di ragam angka hasusaan manang sitaonon sian panggomgomion di masa i,[2] dohot halak Kristen na sian Jahudi. Hombar tusi ma Apostel Paulus manongoshon suratna on mamodai jala paingothon parange ni halak Kristen na tandi manang marhasurungan sian halak na so Kristen.[3]

            Di ayat 1, “diapoi Apostel Paulus do halak Kristen na di Rom marhitehite asi ni roha ni Debata”. Paulus mangasahon asi ni roha ni Debata do mangapoi halak Kristen, ndada alani hamaloon, hapistaran, manang parbinotoanna, alai marhitehite asi ni roha ni Debata.[4] Pasahat ma dagingmuna[5] bahen pelean[6] na mangolu, na badia, na hinalomohon ni Debata; ima hadaulaton ni na marroha[7]. Hata ni si Paulus on mangapoi huria Kristen na di Rom asa pasahathon hadirionna (tubuh, jiwa, roh) gabe pelean na mangolu. Adong lapatan haundukhon na polin tu Debata, ima mian dibagasan hata nang aturan ni Debata, , pelean na marasing sian angka pelean na dipele tu debata sileban (ida 1 Korint 8: 1 – 11).  Ai ido hadaulaton na marroha manang hadaulaton (peribadahan, kepatuhan) tu Debata Jahowa, ala ampuna-Na do hita marhite Jesus Kristus.

            Antong molo songon i, ingkon adong do hasurungan ngolu ni halak Kristen sian halak na so Kristen. Alani i, Paulus mandok: unang gabe sarombang[8] dohot portibi[9], gabe imbaru, jala ido na tau manimbangi lomo ni roha ni Debata, ima na uli, na hinaloshonna dohot na sun denggan (ay. 2). Di ayat 2 on Paulus mansai tegas mangapoi asa unang gabe dos halak Kristen tu portibi on, portibi na gok roha na mangalo tu hata ni Debata. Alai gabe imbaru marhitehite ngolu na imbaru[10] dung muba pingkiranmuna.[11] Ndada rupa manang pardagingon na siubaon, alai pingkiran (mind set) tu harajaon dohot hamuliaon ni Debata na manongtong. Asa tau manimbangi[12] lomo ni roha ni Debata, ima na uli, na hinalashonna dohot na sun denggan. Manimbangi lomo ni roha ni Debata ima marhitehite hata dohot angka pambahenan ni Debata di tonga ragam angka na masa di portibi on. Marhite ayat on Paulus mangapoi halak Kristen tu parpunguan Kristen songon sada huria (bukan satu pribadi), sada pamatang ni Kristus asa rap marsipodaan, marsiapulan, marsituturan mangadopi angka na masa hombar tu hata ni Debata. Hata ni Debata ndada songon bungku ni uhum (kitab hukum), alai patandahon dalan hangoluan, hasintongan, daohot hatigoran asa boi masuk tu hangoluan i.

             Diulahi si Paulus do mula ni ayat 3 on sian ayat 1, marhite asi ni roha ni Debata do ibana mangapoi huria i. laos dipaingot asa unang torbang dirajumi hamu dirimu, lobi sian na patut, alai intap ni na tama ma parrohaonmuna. Marhite ayat on Paulus manosohon asa huria i boi mangarajumi dirina (menguasai diri), ganup marguru tu godang ni haporseaon na tinurpukhon ni Debata[13] tu ibana. Godang ni haporseaon dison ndada songon pangantusionta piga godang tu sada an, piga godang tu sada on. Alai tu aha na boi tolap dibahen angka na denggan hombar tu Debata di tongatonga ni parsaoranna, gabe pasupasu tu humaliangna, jala ndada mambahen susa angka donganna.

            Ayat 4 – 8 ima hatorangan udutni ayat 3 taringot parsaoran ni huria i songon pamatang ni Kristus, torop do ruasna. Pola do digombarhon si Paulus huria i, songon pamatang ni jolma, sada do pamatang (tubuh/ Yun: soma) alai ragam do ruasna hombar tu na boi diula ruas i. Tung na so tolap do mata manendang, manang maniop, tung na so tolap do sipareon laho manjama, manang marpingkir, ala nunga adong tugas na be hombar tu na boi bahenonna, alai ingkon do gabe pelean na mangolu saluhutna i tu Jahowa, manang gabe sada tanda haundukhon mian di bagasan aturan manang hata ni Debata.

Apikasi Tologi

            Marhite hatorangan ni turpuk, mulak ma hita tu sungkunsungkun di patujolo. Marhite turpuk on naeng ma pita hita mananda haKristenonta di tonga ni ngolunta on. Loja hita mangulahon panghobasion, martangiang, marminggu, dohot godanggodang pasahathon pelean, alai molo patubuhon ginjang ni roha, gabe marlomolomo di huria i, manang ndang adong haundukhon tong do i ndang marlapatan.

            Itapasahat ma pelean na tutu, ima sude hadirionta (tubuh, jiwa, roh) gabe ginomgoman ni Jahowa, marparange ma hita songon halak naung dipaimbaru marhitehite Jesus Kristus, jala na gok Tondi Parbadia di ngolunta. Unang be dos antong parangenta sian parange ni portibi on, manang unang umjorbut parangenta sian portibion. Mansai lungun do roha molo adong mandok, “jolma dope hita, di portibi dope hita mian”, na boi mempersilahkan asa mangulahon dosa, manang mempersilahkan secara sengaja atau tidak mangoloi hisaphisap ni daging gabe lupa manang gabe maralo tu na dihalomohn ni Debata. Jahowa, Debatanta marhite Jesus Kristus tidak mentolerir atau memaklumi parange manang pola pikir na sisongon i. Ngolu ni haKristenon ima ngolu na marhasurungan. Marhasurungan do asi ni roha ni Jahowa tu na niasianNa sian halak na so niasiaNa, antong hita pe ingkon marhasurungan do parangenta nang pe mian hita di portibi on. Hita naung ditobus marhite Jesus Kristus, boi ma dohonon halak pardisurgo (orang sorgawi, warga sorgawi) na mian di portibi on, asa boi idaon ni jolma na asing taringot haKristenonta, jala boi ma tarjou nasida. Sikap apatis mannag antipati marganti gabe sikap panombaon na polin tu Debata Jahowa.

            Ngolu ni haKristenon ima ngolu parsaoran dibagasan sada pamatang ni Kristus. Sada do pamatang alai torop do ruasna. Ruas na boi mangulahon angka ulaonna hombar tu tolap na boi diula. Alai unang ma gabe patubuhon ginjang ni roha partondion (kosombongan rohani), alai gabe pelean na tutu ma i songon tanda hamauliateon ni rohanta, jala parsombaonta tu Debata, na mamintori hita marhite Jesus Kristus. Gabe sada ma ruas ni huria i di bagasan pamatang ni Kristus. Itaulahon ma nasa ulaon na boi itaula di ragam angka profesi di bagasan roha na serep, jala di bagasan hadaulaton (peribadahan) na marroha. Hadaulaton ndada na di ari minggu, manang di huria, alai ngolunta pe ima dalan hadaulaotn (hidup ini adalah ibadah). Hadaulaton na polin pasahathon dirina gabe ampuna ni Debata Jahowa, marhite Jesus Kristus. Itapelehn ma pelean na tutu jala na tama ima haundukhononta tu Ibana na mamaumasu hita jala na paluahon hita marhite Jesus Kristus. Amen.

Angka Ende Huria:

1. 9: 1, 3 – 4
2. 432: 1 – 2
3. 467: 2 – 3
4. 216: 2, 5
5. 248: 1.....
6. 262: 2, 4
7. 206: 1..........

---

[1] Tertius adalah sekretaris khusus Apostel Paulus, yang menuliskan apa yang dikatakan Paulus kepada orang Kristen di Roma (Samuel Benyamin Hakh, Perjanjian Baru: Sejarah, Pengantar, dan Pokok – pokok Teologinya, Bandung: Bina Media Informasi, 2010: hlm. 201 – 210)

[2] Menurut pendapat beberapa tokoh Perjanjian Baru, surat ini dituliskan sekitar tahun 53 – 56 atau tahun 57, yaitu masa pemerintahan Kaisar Nero (kaisar yang memerintah Kekaisaran Romawi pada tahun 53 – 68). Kaisar Nero yang dikenal kaisar yang paling kejam dari semua kaisar yang memerintah Kekaisaran Romawi pada masa Kekristenan mula-mula (waktu Kekristenan pada masa kehidupan para rasul). Kaisar Nero yang terus menyiksa kejam jemaat Kristen di seluruh kekaisarannya khususnya di Roma, serta yang menuduh jemaat Kristen membakar kota Roma, yang sesungguhnya Kaisar Nero yang membakar. Tuduhan ini merupakan fitnah supaya jemaat Kristen disiksa atau bahkan dibumihanguskan.

[3] Tidak lagi membedakan Jemaat Kristen non Yahudi atau Kristen Yahudi. Akan tetapi Surat ini ditujukan kepada seluruh umat Kristen yang berdiam di kota Roma.

[4] Bahasa Yunani : των οικτιρμων (ton oiktirmon)(belas kasihan, rasa kasihan) = sesuatu pengangkatan dari sesuatu yang tidak dianggap, hina menjadi yang dikasihi. Bukan karena perbuatan atau apa yang diberikan dari yang dikasihi, tetapi inisiatif yang mengasihi. Dalam hal ini yang mengasihi adalah Allah, Bapa melalui Yesus Kristus.

[5] Dalam bahasa asli disebutkan dengan kata  ta. sw,mata  (ta somata), yang berarti tubuh. Bukan dikatakan daging (sarx = sax). Tubuh mencakup 3 bagian penting: Tubuh, jiwa, dan roh. Bagian ini disebutkan dengan istilah pandangan Trikhotomi. Pandangan trikhotomi marupakan andangan ini berdasarkan pada pengertian bahwa, Allah menciptakan manusia, dengan memberikan tiga unsur utama di dalam diri manusia yaitu tubuh, jiwa dan roh. Sebagaimana juga dalam pandangan para filsuf Yunani, memandang bahwa tubuh, jiwa dan roh adalah satu kesatuan, yang ada dalam manusia yang hidup.

[6] Persembahan dalam bahasa Yunani: parasth,shte( (parastesete) yang dituntut pengabdian kepada seorang raja, dan penyerahan secara totalitas kepada seorang raja. Ada sikap bagaikan seorang hamba terhadap tuannya.

[7] Dalam bahasa Yunani disebutkan: logikh: (logike) yang berarti sejati, yang sesungguhnya,

[8] Dalam bahasa Yunani: summorfo,nesqe yang berarti sepola, serupa betul

[9] Tidak dikatakan dengan kata kosmoV, tetapi menggunakan kata aiwn (aion), yang bararti dunia yang penuh dengan keberdosaan, hawa nafsu, sikap yang menentang perintah Allah.

[10] Hidup yang telah dipenuhi oleh Roh Kudus, hidup yang  telah ditebus.

[11] Pikiran atau pola pikir menentukan apa tujuan hidup manusia itu. Pola pikir orang Kristen adalah perintah dan aturan Allah menuju kemuliaan Kerajaan Allah, sedangkan pola pikir dunia (aion) adalah kehormatan, kekayaan dan kerajaan dunia yang bersifat fana (tidak kekal), yang pada kenyataan nyata dalam perbuatan atau perilaku hidup.

[12][12] Yunani:  dokima,zhte  (kata dasar: dokima,zein) yang berarti memeriksa, menguji

[13] Yang berarti talenta, atau kemampuan atau kelebihan yang dimiliki dan dapat dirasakan oleh masyarakat sekitar atau persekutuan menjadi berkat. Tidak menimbulkan kesombongan, tetapi menimbulkan kerendahatian, dan ketaatan serta pengabdian kepada Allah.

Bahan Jamita Minggu IX Dung Trinitatis, 17 Agustus 2014

BAHAN JAMITA

MINGGU IX DUNG TRINITATIS

Minggu, 17 Agustus 2014

Ev.: Psalmen 67: 2 – 8; Ep.: Mateus 16: 13 – 20 (16); S.Patik: Jeremia 33: 10 – 11

oleh Pdt. Daniel Bonardo Pane, S.Th.

MANDOK MAULIATE MA HAMU TU JAHOWA

ALA PASUPASU-NA NAUNG SAHAT TU NGOLUM!

Patujolo

            Boha do pangantusionta taringot pasupasu ni Jahowa? Torop do halak mangantusi pasupasu ni Jahowa holan sebatas arta, hahipason, pangkat manang lan angka na asing na boi mamboan hasonangan manang hasangapon tu dirina. Molo pe adong halak na mangantusi na si songon i, alai parang mandok mauliate pe torop do halak ndang marningot i saluhutna. Di tingki tu haringkotan di dirina do di ingot Tuhan i, alai dung dapot na dihirimna di ngoluna, laos ditadinghon do Tuhan i, manang lupa mandok mauliate.

            Panandaiaon na jempek di pasupasu ni Jahowa manghorhon do i tu panombaon na jempek tu Ibana, jala Debata ndang toleran tu parange na songon i. panandaion na tangkas di pasupasu ni Jahowa manghorhon do i tu panombaon na hibul tu Ibana. Mandok mauliate tu Jahowa ndada ala ni godang na itapasahat hamauliateon i, alai boha do hita marhatopothon jala las rohanta pasahathon na denggan sian pasupasu ni Jahowa i tu Ibana marhite bagas joro. Sian turpuk on, boi do tangkas panandaionta tu pasupasu ni Jahowa tu halak na niasianna, jala boha do panghorhon tu halak na so mananda Jahowa jala mambahen Jahowa Debatana.

Hatorangan ni Turpuk

            Mandok mauliate, ima sada parange na marhatopothon pangurupion na didapotna, jala disi pe adong parange haserephon. Di turpuk on hasahatan hamauliateon, ima tu Jahowa jala na pasahathon hamauliateon ima Israel manang na ni asianNa. Molo diuduti mula ni hatorangan ni turpuk boi do italapati halak na so mandok mauliate ima halak na so marhatopothon pangurupion ni Jahowa, Debata di ngoluna jala tubu ma ginjang ni roha, jala marudut ma tu pangasahon gogo dohot pingkiranna dohot siadonganna laho mangadopi angka na masa di ngoluna. Jala turpuk jamita on sada ende hamauliateon mardonganhon parhinaloan sipiltihon jala somalna diendehon di ulaon gotilon jala diendehon di Bagas Joro (ay. 1). Ende hamauliateon on marningot panggomgomion ni Jahowa dohot hasintonganNa di halak na niasianNa, jala marisihon tangiang taringot hasintongan ni Jahowa na manongtong di pardalanan ngoluna.

            Ale Debata, sai asi ma rohaM di hami, jala pasupasu hami, sai marsinondang ma bohiM mandongani hami (ay. 2). Asi ni roha ima hak mutlak ni Debata tu ise hasahatanna. Pangidoan asi ni roha ni Debata, ima patandahon hagaleonna maradophon Jahowa, jala holan ala asi ni roha ni Jahowa ma boi malua ngoluna sian hagogotan. Asi ni roha ni Jahowa dihilala di pangaramotion, pandonganion ni Jahowa jala marhite pasupasu ni Jahowa di parbue gogo na niulanasida (petani gandum). Pasupasu ni Debata na paluarhon bangso i sian haraparon (ancaman kelaparan), jala boi nasida manggotil sian na niulanasida i. “marsinodang ma bohim....dst”, na marningot hata pasupasu ni malim tu ruas manang na niasian ni Debata (4 Musa 6: 25). Hata pasupasu ni malim on pabotohon habasaon dohot pangaramotion ni Debata Jahowa tu na niasianNa. Habasaon dohot pangaramotion na so tardodo ni pingkiran ni jolma dohot parbinotoan ni portibi on. “Sinondang ni bohiM”, pabotohon habadiaon dohot hahomion ni bohi ni Debata, na mangaramoti jala mandongani na niasianNa di ragam angka na masa di ngolu.

            Marhite saluhut asi dohot habasaon ni Debata Jahowa, sude na di tano on lam marbinoto sude angka hatuaon ni Jahowa (ay. 3). Hata hatuaon di bagasan bahasa Indonesia disurathon do Keselamatan-Mu. Haluaon na didok dison, ndada holan haluaon sian parporangan, alai haluaon sian haraparon, jala taruli haluaon marhite na parbue gotilon sian ulaonnasidal. Hata “sude na di tano on”, pabotohon tu sude na mian di tano on, tu sude bangso. Songon naung dipatorang di patujolo, sude do na tinompa jala nasa na di tano on gok pangaramotionNa, dohot huasoNa. Marhite i saluhutna, boi ma idaon manang ditanda bangso na asing (bangso na so mangharporseai Jahowa dope Debatana), jala marudut ma tu pamujion tu Jahowa (ay.4). Pamujion tu Debata marlapatan do tu parhatopothon huaso na ni Debata na umgogo sian huaso na hea ditanda manang dihaporseai. Jala pamujion i marudut do tu panombaon manang pamelehon diri tu Jahowa. Ai holan di goar ni Jahowa do adong hatuaon.

            Tung mansai balga tutu habasaon ni Jahowa dohot pangaramotion ni Jahowa di tu sude na di tano on, jala tigor do sude uhumNa. Hatigoran ni uhum-Na i ma manghorhon parolopolophon ni angka bangsa, huhut mamuji Jahowa (ida ay. 5). Laos panoguon ni Jahowa tu sude bangso di tano on. Panoguon tu haluaon manang hatuaon na pinatupa ni Jahowa. Hatigoran ni Debata ima hangoluan tu na niasianNa alai gabe paruhuman do tu bangso na so olo unduk jala mian di panggomgomionNa. Ringkot botoon, panggomgommion ndang boi malua sian huaso, aturan jala sude na i nunga patar be marhite hata ni Debata Jahowa manang pangajarion ni hataNa.

            Di ayat 6, ditegashon parpsalmen do pamujion tu Jahowa Debata marhite halak Israel, songon bangso na niasian ni Jahowa. Sude angka bangso manggombarhon sude harajaon na adong di portibi on. Ayat on pabotohon na ingkon pujion angka harajaon di portibi on do Jahowa, jala marhatopothon na so tolap sude parbinotoan manang hagogoon ni portibi laho manigati manang mangimbangi huaso manang pasupasu ni Jahowa di ngoluna, jala huaso harajaon ni portibi on di toru ni huaso ni Jahowa do.

            Sude do na di portibi on pasupasuon ni Jahowa, alai ndang boi itabatasi pasupasuon ni Jahowa holan marhite aha na itahirim manang sangkapi. Tano mangalehon gogona (ay. 7) ima sada panindangion pasupasu ni Jahowa marhite ulaoan ni halak Israel (torop halak partani gandum) jala songon naung dipatorang di mula ni hatorangan, bindu 67 on diendehon do di tingki ulaon pesta gotilon ni halak Israel, marningot pangaramotion ni Jahowa di angka ulaonnasidaa. Ndang pola disurathon parPsalmen sadia godang do parbue gogo tanonasida i, alai otik manang godang pe parbue ni ulaonna i, tongtong doi pasupasu ni Jahowa jala boi mangalehon mangan keluargana, ndang hurang sipanganon na pokok (makanan pokok bangso i ima gandum). Jala sai pasupasuon ni Jahowa ma hita, halak na niasianNa. Jala marhitehite pasupasu ni Jahowa di angka bangso na niasiaNa, idaon ni sude bangso di portibi on ma sude pambahenan ni Jahowa di angka ni asianNa, gabe tubu ma sikap biar ma sude harajaon di portibi on maradophon Jahowa (ay. 8). Sikap biar dison ima sada sikap panombaon jala pamujion di Jahowa Debata. Bangso na niasianNa gabe sitindangi tu angka bangso – bangso na so tumanda Jahowa, Debata. 

Refleksi – Teologis

            Merdeka...........!!!!! Merdeka (haluaon), ima sada sian pasupasu ni Jahowa na marragam naung sahat tu bangso Indonesia on. Pinuji ma Jahowa, dipargogoi jala didongani Jahowa, Debatanta do angka natuatuanta na parjolo i gabe boi malua bangso Indonesia sian jajahan ni angka penjajah, jala boi mansuarhon haluaon (proklamasi kemerdekaan) 69 taon na salpu.

            Mulak ma hita tu turpuk jamita on, boha do panandaionta taringot pasupasu ni Jahowa di ngolunta jala marhite i adong roha na marhatopothon hamauliateon di sasudena i. ndang boi itabatasi pasupasu ni Debata i holan marhitehite piga godang na itagotil sian gogo ni haumanta, manang sian gogo na itaula di ragam ulaonta. Mandok mauliate ima panindangion di pangaramotion dohot pandonganion ni Jahowa di ngoluna nang ulaonna. Nunga tangkas be pasupasu ni Jahowa marhite hatorangan ni turpuk jamita on, ima pandonganion dohot pangaramotion ni Jahowa, nang angka parbue na niula.

            Di hurianta se-ressort pe pasti do naung mangulahon pesta gotilon di hurianta be. Pesta gotilon ima pesta las ni roha marningot pangaramotion dohot pandonganion ni Jahowa di ngoluna nang di angka ulaonna, jala tubu ma pasahathon hamauliateon dohot panombaon nang pamujion tu Ibana. Pasahathon hamauliateon ndada alani sadia godang na itapasahat, alai jujur rohanta marhatopothon i di tangianta, jala ias dohot las rohanta, jala angka na denggan ma na ingokon pasahathonta songon hamauliateonta. Ndang na hurangan mangan Jahowa, jala unang na gabe sogokan hamauliateon itapasahat tu Jahowa. Ndang tuk dope angka na dilehonta i mangimbangi pasupasu ni Jahowa. Alai boha do parangenta pasahathon hamauliateon i, ido na ringkot idaonta di ngolunta pasahathon hamauliateon. Udut ni i, molo itaida angka pelean di hurianta, sai na adong dope na pasahathon pelean hamualiateon i na marribak, manang dia na so langku di partigatiga manang ndang langku ongkos, dipalangku do i di huria marhite pelean. Asi do roha nian tu parange jolma na si songon i, boi ma goaron halak na so mananda dope pasupasu ni Debata di ngoluna, jala ndang jumpang roha mauliate di pasupasu ni Jahowa.

            Mandok mauliate ndang boi malua sian pamujion dohot panombaon tu Jahowa. Ala naung itatanda do pasupasu ni Jahowa marhite gabe na itaula di hauma, di ladang, manang di partigatigaan, manang didia pe hita mangulahon ulaonta i tama situtu do hita pasahathon pelean hamauliateon ni rohanta. Pelean hamauliateon na denggan jala mamuji Ibana dohot pasahathon ngolunta tu Jahowa, na Mamasumasu ngolunta. Ringkot do ingotonta, ndada ala ni godang manang otik boi itaputik parbue na itaula i pasupasu ni Jahowa, alai pandonganion dohot pangaramotion ni Jahowa di ngolunta, ido pasupasu ni Jahowa. Halak na mandapot pasupasu ni Jahowa ndada laho patubuhon haginjangon ni roha partondion (kesombongan rohani), alai patubuhon haundukhon na polin di hata nang panggomion ni Jahowa. Pasupasu ni Jahowa ndada laho mambahen susa angka jolma na asing, alai ingkon boi bangso manang halak na asing mananda pandonganion dohot pangaramotion ni Jahowa di ngolunta i, jala tarjou ma nasida parsidohot mamuji Jahowa. Sai pasupasuon ni Jahowa ma hita olat ni on sahat ro di salelengna. Amen.

Angka Ende

• 12: 1, 7, 8
• 182: 1 – 2
• 437: 1 – 2
• 256: 1, 3
• 204: 1........
• 362: 1, 3
• 373: 1........