BAHAN JAMITA MINGGU
MINGGU ROGATE
Minggu, 21 Mei 2017
Nas: Psalmen 66: 8 – 20
JOUJOU MA HITA TU JAHOWA NA
SAI TONGTONG MANGARAMOTI HITA!
Oleh. Pdt. Daniel Bonardo Pane, S.Th.
Patujolo
Ngolu na martangiang ima
ngolu na ringkot adong jala dihangoluhon ganup angka na porsea. Nda tung sai
itadok hita halak Kristen manang siihuthon Kristus alai maol jala bangkol di na
laho martangiang. Tangiang ima sada sian parsombaonta tu na itahaporseai, molo
dison tangkas ma itahaporseai ima Jahowa Debata. Ibana ma Debata na mangatasi
saluhut angka debata na di portibi on. Ndang na jadi margogo angka debata ni
angka bangso di portibi on molo di adopan ni Jahowa, Debatanta. Aha do
hadomuan hatorangan i tu turpuk jamita on? tangkas ma itapaihuihut hatorangan
ni turpuk jamita minggu on.
Hatorangan ni Turpuk
Tangkas
do dipaboa di mula ni turpuk jamita on (Psalmen 66) ianggo turpuk on ima sada
ende ni si Daud nang pe na bisuk na asing mandok ndang na si Daud na manurathon
Psalmen 66 on. Molo itaida do ende na tarsurat di turpuk jamita on ima sada
ende hamauliateon ni sahalak na daulat mangendehon taringot huaso dohot
hamuliaon ni Jahowa na paluarhon bangso na pinilitNa sian sada situasi na mansai hansit jala gok
sitaonon. Molo mulak hita satongkin di parngoluan ni halak Israel di padan na
robi, adong do 2 partingkian na mansai ringkot diboto songon sada parningotan (sejarah) ni bangso Israel na
marpardomuan tu situasi na mansai
hansit dohot na gok sitaonon: ima parhatobanon di Misir dohot habungaon di
Babel. Dua na masa i sai jotjot do dihubunghon tu pardebataon. Isarana, molo
marporang sada bangso tu bangso na asing, marlapatan ma i na dohot do debatana
marporang. Molo talu do sada bangso maralahon bangso na asing, marlapatan
debata ni bangso na talu i dohot do talu maralohon bangso na monang i. molo
manat hita majaha isi ni turpuk jamita on jonok do partingkian on ima masa
habuangon na di Babel.
Sejenak hita manjaha turpuk jamita on
(ay. 8 – 12) olo ro tubu sungkunsungkun roha, boasa ma masa songon i? boasa ma
songon i pambahenan ni Jahowa tu bangso na nipillitNa. Alai unang ma so hita
holan tu sungkunsungkun i. ingkon sahat do hita tu alusna dohot aha do hapatean
sude na binahen ni Jahowa tu bangso na niasianNa i ima di ay. 13 – 20.
Mula
ni turpuk jamita on (ay.8) ima joujou laho mamuji “Debatanami”. Ise do ‘-nami’
na didok dison? Ima halak na daulat sian Israel na tongtong satia jala hot di
haporseaonna nang pe ingkon dibolus ragam angka hasusaan dohot sitaonon di
parngoluan on. “mamuji” ima sada panghatindanghon halobion jala disi patuduhon
na so sarupa tu gogo manang hadirion na mamuji. Mamuji jolma ima mamuji na
holan sangombas sambing ala olo do saonari tama sipujion hinorhon ni burju
dohot malo nang gogo ni sahalak jolma, alai di lan ari adong ma jolma na asing
na lobi burju, ummalo, dohot umgogo sian sasahalak i gabe ndang be sipujion
jolma na parjolo dipuji i alai jolma na asing i do dipuji. Alai pamujion tu
Jahowa Debata ima pamujion na manongtong jala ndang marpahasohotan pujian i.
boasa? Ala Ibana do mual jala mula ni nasa na adong jala na manongtong do
ianggo harajaonNa. Di ganup tingki, di ganup na masa dohot di ganup inganan
ndang adong jolma manang ragam angka na asing na boi dipatudos tu huaso dohot
hamuliaonna. Tu ise do joujou on? Ima tu sude bangso, ima sude marga, sude
harajaon jala patubegehon ma soara pujipujian. Panjouon sude bangso
marpardomuan do i sude angka debata ni saluhut bangso, marga nang harajaon
dohot ma mamuji Jahowa, Debata. Parsidohot di na manghatindahon huaso dohot
hamuliaon ni Jahowa na mangatasi saluhut huaso dohot hamuliaon ni angka
pardebataon ni saluhut bangso.
Ay.
9 – 12 dihatindanghon do songon dia do ragam pangaramotion dohot pandonganion
ni Jahowa di angka na niasianNa. Nang pe ingkon mamolus ragam angka hasusaan
manang sitaonon na mansai dokdok halak na niasianNa alai tung na so jadi
ditandinghon Jahowa punjung mangadopi saluhutna i. dibahen Jahowa do sitaonon
manang angka hasusaan i laho manguji taringot haporseaonta dohot hasatiaonta tu
Ibana. Songon na masa tu si Job, sahalak na daulat jala na tongtong manghangoluhon
patik dohot aturan ni Jahowa alai dipaloas Jahowa do angka hasusaan manang
sitaonon masa di ngoluna. Ringkot ma botonta ale angka dongan, molo naung jonok
hita tu Jahowa ndang na marlapatan ngolunta on ndang mangodopi hasusaan manang
parungkilon di portibi on. Alai molo pe songgop i di parngoluanta ndang na
marlapatan dibalonghon Jahowa manang ditadinghon hita di saluhutna i. alai
dipatudos do i songon di na laho manopa perak na ingkon dibahen tu api, dilala
jala ditopa ma hombar tu lomo ni panopa i. dapot ma perak na ummarga argana
(patudos tu 1 Petrus 1: 7). Alai adong do sitaonon manang parungkilon i masa
laho mangalehon parsiajaran manang uhum ni Jahowa Debata tu na niasianNa.
Songon sahalak natoras na mangalehon uhum tu ianakhonna na mangulahon na sala.
Paruhuman na binahen ni Debata ndang na laho patuduhon na mandao Ibana sian na
niasianNa, alai marhite paruhuman on dipapatar Jahowa do hatigoran dohot
hasintongan ni uhumNa jala patuduhon holongNa asa unang mago nian jolma na
niasianNa i ala tabo mangulahon dosa.
Nunga mardosa bangso Juda (Israel Selatan)
dohot Efraim (Israel Utara) di adopan ni Jahowa. Jotjot do ditundalhon bangso i
angka hata dohot singotsingot ni Jahowa na pinasahat angka panurirang ni
Jahowa, alai ndang ditangihon. Disoarahon do asa muba ma nian roha ni bangso
Juda dohot Efraim alai ndang ditangihon. Dipangke Jahowa do bangso Babel na
niuluhon ni Nebukadnezar laho mangalehon uhum tu bangso i. ndang na gabe talu
Jahowa maralohon Marduk, debata ni Babel ala na talu Juda maralohon Babel. Sian
pambahenan ni Jahowa di pangaramotionNa tu ganup bangso na pinillitNa paboahon
jala paandaphon na so boi batason huaso dohot hamuliaon ni Jahowa sian
hasomalan na masa hatiha i. nang pe talu bangso Israel, na marlapatan na so
adong be Debatanasida. Dipaloas Jahowa do bangso Babel i laho mangalehon
parsiajaran na mansai arga tu bangso Israel nang pe songon na suhar
dipangantusion taringot “habasaon ni Jahowa”. Tutu do na basa Jahowa. Binahen
habasaonNa i do umbahen na ditogutogu muse bangso i mulak haruar sian habuangon
i mulak tu Israel muse marhite Koresy, Raja Persia.
Marnida huaso dohot
hamuliaon ni Jahowa Debata i na mangatasi debata ni Babel dohot angka debata di
portibi on, tama ma ganup jolma na marnida dohot na manghilalahon sude pangaramotion
ni Jahowa di ngoluna manghamauliateon saluhutna i huhut mamuji Ibana. Di ay. 13
– 20, ima hataridaan na mansai las roha jala gok olopolop ni halak naung
pinalua Jahowa. Isarana: ro tu bagas joroNa (masuhangku ma jabum); mangalehon
pelean hamauliateon; dohot manggarar bagabagaba (nazar) (ay. 13). Ro tu bagas joroNa ima sada pambahenan na
patuduhon parsombaon jala manghasiholi Jahowa dohot hataNa. Songon sahalak na
mauas di mual na tio songon i ma uas ni rohana laho pajumpang dohot Jahowa di
bagas joroNa jala taruli ibana di hata ni Jahowa. Mangalehon
hamauliateon: songon sada tanda olopolop, angka pelean na denggan. Unang ma dipelehon hamauliateon sian neang
ni roha, na maribak, na so langku. Alai angka na denggan i ma dipelehon. Ndang
ala ni godangna manang otikna, alai boha do hita pasahathon pelean hamauliateon
sian hibul dohot ias ni rohanta jala denggan ma dipasahat. Mangalehon
bagabagaba (nazar) ima sada na ingkon
digarar. Unang ma uju ringkot marbagabaga tu Jahowa alai ndung jumpang na di
rohana i, lupa do ibana di bagabagana i. sahala marbagabaga hita tu Jahowa na
so jadi lupahonon manang juaon saluhut bagabaga i.
Bibir ima sada na mansai
ringkot dipangke jolma laho mandok hataNa. Molo di adopan ni Jahowa sai unang
ma angka hata gabus na haruar sian bibir manang pamangan ni jolma i. songon i
do na martangiang. Molo joujou do hita tu Jahowa Debata, sai hata na haruar
sian roha na ias ma haruar. Hata na haruar sian roha na ias ima hata na
siniraan manang hata na marimpola. Joujou hita tu Ibana, Pargogo na so
hatudosan jala sai itapuji ma Ibana marhitehite pamanganta. Jahowa,
Debata na mamboto aha do na ringkot di parngoluanta be jala na mananda boha do
parrohaonta be, na denggan manang na jat. Aut sugari denggan hita mandok
tangiangta alai na jat do di bagasan rohanta, na so jadi ditangihon Jahowa
tangiangta i. Ganup na
martangiang di bagasan hatigoran dohot hasintongan sai tangihonon ni Jahowa do
i jala sai diparateatehon do sude parngoluanta on. Molo songon i do Jahowa,
Debata na itahaporseai boasa ma mabiar jala ganggu hita di pangaramotion jala
di panarihonon ni Jahowa di ngolunta.
Hahonaan ni Turpuk
Adong
do pigapiga na ringkot idaonta marhite Jamita on, ima:
-
Ngolu di portibi on ima ngolu na gok hasusaan,
gok sitaonon, gok nadokdok, gok na jahat, dohot lan angka ragam sitaonon na
asing. Molo itadok do “Jahowa do Debatangku” disi ma adong gogo dohot apulapul
jala na so jadi sibolis i laho mangagohon hita dohot haporseaonta.
-
Jahowa do Debatangku, ima sada panghatindanghon
di pos ni rohanta di pangurupionNa dohot dipanarihononNa di ngolunta be. Songon
dia pe balga ni sitaonon dohot na hansit i, na so jadi mandate partondionta ala
adong do Jahowa na mamereng hita manaon saluhutna i, ndada holan mamereng alai
dipatupa Ibana do sada haluaon na mansai tonggi jala gok las ni roha asal ma
satia hita di Ibana, paima jumpang tingkina salpuhononta ma anakg sitaonon di
portibi on masuhanta ma bagasNa, harajaonNa na gok las ni roha jala gok ende
pujipujian di HabangsaNa.
-
Molo jumpang do di ngolunta pandohan : “Jahowa
do Debatangku” tama ma hita unduk jala marsomba tu Ibana. Ai Ibana do Debata na
so hatudosan jala na so boi dipatudos tu ragam angka na asing. Antong joujou ma
hita tu Ibana marhite pujipujian dohot mangendehon hamuliaon ni GoarNa na Sun
Timbul i.
-
Di minggu Rogate sadari on, ima na marlapatan
Martangiang disosohon do hita asa martangiang hita tu Ibana. Ro ma hita
mandapothon habangsaNa dohot hamuliaonNa marhite tangiang. Marhite tangiang,
boi do hita paboahon na di bagasan rohanta be, alai ingkon sian ias dohot tulus
ni roha ma. Ngolu na martangiang ndada holan sekedar mangalompit tangan, unduk
simanjujung, jala pimpit simalolong. Alai ngolu na martangian ima adong pos ni
roha, adong hasatiaon jala dapot roha na jotjot uasan di na laho manangihon hata
dohot pangajarion ni Jahowa laho bohal parngoluaon ni partondionna.
-
Unang be hita olo mabiar mandapothon hamuliaon
ni Jahowa marhite tangiang. Ganup jolma naung manghilalahon pasupasu dohot
pangaramotion ni Jahowa di ngoluna, tama ma ibana manghamauliateon saluhutna i
jala lam tu solhotna ma ibana tu Jahowa Debata. Amen.
Tidak ada komentar:
Posting Komentar