Bahan Jamita Minggu Okuli, 23 Maret 2014

BAHAN JAMITA

MINGGU OKULI

Minggu, 23 Maret 2014

Ev.: Psalmen 95: 1 – 11; Ep.: Rom 5: 6 – 11; S.Patik: 1 Tesalonika 5: 15

SOMBA MA JAHOWA DEBATA SALELENG NGOLUM!

Patujolo

            Di tingki sadari on ragam angka elaela ni portibi on na boi mambahen jolma i, tarlumobi halak Kristen alang haporseaonna. Didok do ibana Kristen alai ndang adong parange na unduk manang somba tu Ibana na dihaporseai; didok do dirina sahalak Kristen, alai ndang manghaposi na dihaporseaina i. Antong boha do ngolunta sadari on? Na parsidohot do hita di bagasan horong ni songon halak na mandok dirina Kristen alai ndang adong parange na manomba jala manghaposi na dihaporseaonna.

            Ragam do na gabe disomba manang dibahen angka jolma na gabe debata di portibi on nang pe dang na patar tanda panombaon i. Boi do i tarida sian parange manang parngoluanna ganup ari. Boi do jolma i mardebatahon sinamotna, artana, parbinotoan, gogo manang ragam na asing na gabe haposan di ngoluna jala boi mambahen sonang ngoluna di portibi on. Didok do ibana Kristen alai patupahon panombaon marhite parsaoran Kristen nang di huria manang di parsaoran na asing dang adong parsidohot. Molo jumpang ari minggu, sai godang dope na mangharingkothon laho mangalului na boi mambahen sonang rohana i sian portibi on, gabe ndang adong be tingki laho marsaor rap dongan sahaporseaon marsomba tu Debata di huria.

Hatorangan Turpuk

            Turpuk jamita on ima panjouon asa marsomba tu Jahowa Debata. Dipanghilalahon parpsalmen on do taringot gogo manang huaso ni Jahowa nang pangaramotion ni Jahowa di ngoluna. Di ayat 1 – 2 disosohon do asa mangendehon Jahowa, jala mangolophon partanobatoan ni hatuaon. Marende ima ulaon na pabotohon taringot na di bagasan rohana marhite nada asa halak na mambege mamboto aha do lapatan manang tona na dipasahat marhite ende i. ndada songon torop parende sadari on na asal adong hata ni endena. Alai mangendehon Jahowa jala mangolophon partanobatoan ni hatuaon ima sada panindangion na mansai bagas taringot parsaoran jala panandaionna tu Jahowa, Debatana. Hata ni mangendehon Jahowa marpardomuan do i tu hata na sian ateatena na mangholuhon pandonganion ni Jahowa di ngoluna. Jala marhite i halak na mambege jala na manangihon hata ni ende i boi mangantusi dia do tona ni hata ni ende i jala marhite i lam ditanda nasida ma Jahowa, Debata.

            Aha do ulangi umbahen parpsalmen on mangolophon Jahowa? Diparhatopot parpsalmen do taringot huaso dohot gogo ni Jahowa, Debata na dihaporseana. Di ayat 3 – 5 dibaritahon do ulaon ni Jahowa, Debata na manompa saluhut nas na denggan sian na so adong gabe adong. Jahowa na nampuna saluhut jala na mangatasi angka debata na adong di portibi on. Torop do angka debata na di portibi on tarlumobi uju panurat ni turpuk on na ganup bangso adong do debatana jala adong do sada bangso pambagian ni debatanasida hombar tu na bidang ni ngolunasida. Molo bidang partanian adong ma debata na hombar tusi, songon i do di bidang na asing. Jala dibahen nasida do debata i hombar tu na dihaporluhonnasida. Alai anggo Jahowa ima Debata ima Debata na so ditompa tangan ni jolma jala Debata na so dibahen hombar tu pingkiran ni jolma. Jahowa, Debata do nampuna jolma i dohot na tinompana, jala sude debata na dibahen angka jolma adong di toruNa. Guru di Jahowa do punsu ni angka dolok na marpardomuan tu inganan ni angka panombaon sude angka bangso tu debatana. Tutu ma Jahowa do Debata Pargogo na so hatudosan, jala Ibana do Raja nasa na tinompaNa, jala guru tu Ibana do saluhutna.

            Molo songon i do gogo ni Jahowa, Debata mansai tama ma hita manungkap dohot marsomba, marsinggang tu jolo ni Debata na manompa hita. Ibana do Debatanta jala bangso pinarmahanNa, jala birubiru ni tanganNa. Sadari on, aut ditangihon nian soaraNa. Parmahan na di tanganna adong tungkot dohot linsinglinsing asa sude angka na pinarmahanNa ndang adong na mandao manang lari sian na dihalomohon ni Jahowa. Ndang dihalomohon Jahowa angka na pinarmahanNa mago alai sai dilului jala diajar do angka na pinarmahanNa i asa hot jala mian di panggomgomanNa. Nang pe mansai maol do diantusi dilapatai torop jolma taringot Jahowa na gabe parmahan di ngoluna di ragam na masa di ngoluna.

            Parpsalmen paingothon angka pangalaho ni halak Heber/ Israel na mansai tangkang rohanasida uju ni Meriba songon ari uju masa pangunjunan di halongonan. Pangalaho na masa di Meriba boi do itaida di 2 Musa 17: 1 – 7 na manggombarhon parange na so mandok mauliate di sude pambahenan ni Jahowa di ngolunasida. Parange na so adong pos ni roha di pandonganion dohot panarihonon ni Jahowa di ngoluna. Sai jotjot do roha biar, holso dohot parange na sai marungutungut. Parange ni hatoban na so mananda haluaon jala ndang mangalapati pandonganion manang parmahanion ni Jahowa ni ngoluna. Parange ni hatoban na mansai tonggi di parhatobanon na marhapatean tu hamagoan, jala ndang sahat tu hapatean ni tano na niuarihon Jahowa tu nasida. Dang adong na sahat sundut na haluar sian parhatobanon ni Misir hinorhon ni pangalaho manang parangenasida na sai marungutungut jala ndang adong roha na unduk tu Jahowa asing ni si Josua dohot si Kaleb (ida 4 Musa 14: 29 – 30). Hinorhon ni ungutungut jala ganggu ni roha boi do mambahen jolma i ndang be tangkas manghilalahon pangaramotion dohot panarihonon ni Jahowa di ngoluna. Laos tubu ma parange na holan menuntut.

Refleksi – Teologi

            Adong do na mansai ringkot siputihon sian turpuk jamita on:

1. Turpuk Jamita on manosohon hita asa sai tongtong hita marhatopothon gogo manang huaso ni Jahowa na mangatasi saluhutna. Debata na so ditompa pingkiran ni jolma, alai Debata na manompa jolma.
2. Itahangoluhon ma pangaramotion dohot panarihon ni Jahowa di ngolunta. Molo aut sugari boi itabilangi sude pambahenan dohot panarihon ni Jahowa Debata di ngolunta, ra ndang hasuhatan jala ndang tarhabilangan saluhutna. Ndang tarasam sude denggan basa ni Jahowa. Molo songon i, tama ma nian hibul dirinta manomba Ibana. Marsomba tu Jahowa ndang boi malua i sian mamelehon hibul dirina gabe ampuna ni Debata, jala mangudut tu parange na unduk di hata ni Debata.
3. Mansai tonggi dame do panghilalan molo boi dipanghilalahon pandonganion dohot panarihon ni Jahowa di ngolunta. Disarihon do ngolunta boi marhosa saonari, dohot ragam pasupasu ni Jahowa. Antong, boasa be adong mian holso, hatahuton mandalanhon ngolu, jala na sai jotjot menuntut na boi mambahen hita ndang sahat tu inganan na naung niuarihon ni Jahowa marhite Jesus Kristus tu angka na satia.
4. Di minggu Okuli, disosohon do hita mananda Jahowa marhite gogo dohot ragam na denggan na tinompaNa, jala disi ma tubu parange na olo marsinggang jala mangoloi Debata di ngoluna.
5. Antong sai tongtong jala unang marnaloja marhatopothon Jahowa, Debatanta saleleng ni lelengna. Jala holan Ibana do Debata na mangolu saleleng ni lelengna. Amen.

Digurithon: Pdt. Daniel Bonardo Pane

Angka Ende Huria:

1. 14: 1, 3, 5
2. 216: 2 + 4
3. 303: 3, 5
4. 464: 1 – 2
5. 362: 1......
6. 257: 4, 6
7. 117: 1.......

Bantuan Dana/ financial support

Saya sangat mengharapkan bantuan dana dari bapak/ ibu, saudara/i untuk kegiatan yang saya rencanakan. untuk itu saya mengharapkan kerjasama yang baik dari bapak/ ibu, saudara/i untuk dapat membantu saya dalam hal materi dan doa. bantuan yang diharapkan bukanlah bantuan yang terikat. bagi bapak/ ibu, saudara/i yang berkenan membantu dapat mengirimkan ke nomor Rekening: 2084-01-001500-50-8. a.n. Daniel Bonardo Pane.
Bank :BRI (Bank Rakyat Indonesia)
demikianlah post bantuan dana ini saya tuliskan. atas perhatian dan kerjasamanya saya sangat mengucapkan banyak terimakasih. Tuhan Yesus memberkati. amin.

I fully expect financial support from my brother and sister for my activities which I had planned. I so expect for the participation from brother and sister to help me in terms of material and prayer. expected aid is not tied aid. for brother and sister who is willing to help me can send to the Account number: 2084-01-001500-50-8. name: Daniel Bonardo Pane.; Bank: BRI (Bank Rakyat Indonesia)

thus aid post I write. for your attention and cooperation I really would like to thank. God bless us. amen.