Bahan Jamita/ Khotbah Epistel, 05 Februari 2017; Psalmen 112: 1 - 10

BAHAN JAMITA EPISTEL

MINGGU V DUNG EPHIPANIAS

Minggu, 05 Februari 2017

Nas: PSALMEN 112: 1 – 10

DAPOTAN TUA DO GANUP JOLMA NA DAULAT MARROHA

(Oleh: Pdt. Daniel Bonardo Pane, S.Th.)

Patujolo

            Ngolu na marhadaulaton ima ngolu na mansai ringkot di tingki parngoluan sinuaeng. Molo idaonta na masa sinuaeng ndang adong be biar ni roha ni jolma laho mangulahon dosa. Mansai tonggi do jolma i mangulahon dosa jala ndang adong roha na marhadaulaton. Torop do jolma mangulahon hadaulaton holan hasomalon sambing jala ndang marparbue. Antong boha do halak Kristen di taon 2017 on marhadaulaton? On ma na naeng dialusi turpuk jamita epistel di minggu on. Antong itapaihutihut ma hatorangan ni turpuk on.

Hatorangan ni Turpuk

            Psalmen 112 ima sada sian ende parpsalmen na so pola disurathon ise do panuratna. Alai ndang pola hita tarfokus tu manang ise panuratna, alai fokus ma hita tu teologi na adong di turpuk jamita on. Molo itajaha marulakulak turpuk jamita epistel on, boi do hita mangalapati ia turpuk jamita on ima sosososo manang joujou ni parpsalmen asa marhadaulaton di parngoluanna.

            Turpuk jamita on dimulai sian joujou mamuji Jahowa mandok “Halleluya”. Halleluya bentuk ajakan dan perintah na marlapatan “Puji ma Jahowa”. Boasa ma hita ingkon mamuji Jahowa? Pamujion tu Jahowa boi do i pamatehon parange na olo mamuji dirina sandiri manang mamuji angka hagogoon na di portibi on; pamujion tu Jahowa marlapatan mambaritahon angka ulaon ni Jahowa dohot tanda halongangan naung dipatupa Jahowa jala na so hatudosan do saluhutna i; mamuji Jahowa marlapatan manghatindanghon saluhut huaso dohot asi ni roha dohot hasintongan nang songon i hatigoranNa tu sude bangso, tu sude marga, dohot tu sude luat; mamuji Jahowa tongtong do i diuduti laho mangoloi jala marsomba tu Ibana jala na so jadi adong na boi dipardebatahon na boi dipatudos tu Jahowa Debata. Aha do parbue na mamuji Jahowa jala ise do na mamuji Jahowa?

            Itaida di ay. 1 didok “martua”. Hata martua jotjot do itadapot di bibelta. Uju di panghobasion ni Jesus dijamitahon Ibana do jamita martua (Mateus 5: 3 – 12). Nuaeng hata “martua” mamungka ay 1 turpuk on. Molo dilapati hombar tu hata Heber, hata martua on dilapati do ima “tarpasupasu”. Hata martua dison ndada holan mandok sonang, jala gok las ni roha alai “tarpasupasu ngoluna”. Ngolu na tarpasupasu ima ngolu na nihirim ganup jolma na mangolu di portibi on. Ndada holan tarpasupasu di sinamot alai jumolo tarpasupasu di partondion. Ngolu na tarpasupasu na marlapatan na so jadi hurangan manang aha di ngoluna, alai ndang boi dietong holan di sinamot ngolu tarpasupasu, alai boi manghalashon saluhut na di ibana jala ringgas mangula angka denggan i, tarpasupasu ma ngoluna, jala sai marroan ma pasupasu i tu ngoluna. Ise na tarpasupasu manang na martua dison? Ima “baoa na manghabiari Jahowa”. Na holan baoa (apabila dilihat dari gender) do na martua? Mulak ma hita jumolo tu bahas Heber, hata na dipangke di hata Heber (’îsy) na marlapatan jolma, baoa, amanta. Alai molo dilapati di pangantusion umum (general translate) didok: jolma (manusia). Antong lapatan ni ay. 1 ima “martua ma ganup jolma” manang “tarpasupasu ma ganup jolma.” Hata “manghabiari Jahowa, na lomo roha situtu di angka patikNa” ima marlapatan marhangoluhon hadaulaton (hata marhadaulaton di hata Indonesia didok: “hidup beribadah” (avodah)). Ngolu na marhadaulaton ima ngolu na gok panombaon jala hibul rohana dohot pingkiranna laho mangoloi hata ni Jahowa; na sai manghalungunhon pangajarion ni Jahowa marhite patik dohot hataNa; mansai denggan parsaoranna tu Debata marhite tangiang; na so olo mangihuthon angka dalan ni parjahat dohot na olo dos parangena tu parjahat (bdk. Psalmen 1).

            Aha do tua (pasupasu) na nidapot angka na manghangoluhon ngolu hadaulaton, ima “sangap” (ay. 2). Sangap na songon dia do didok di turpuk jamita on? Sangap dison dilapati do perkasa, gagah, tidak akan pernah menjadi goyah (dari terjemahan bahasa Ibrani: ( rABæGI :gibor). Hata sangap dison marlapatan tongam, jala adong karisma na denggan di ngoluna. Dohot do sude angka pinomparna dapotan tua i. jala laos diuduti muse tu na mandapot pasupasu sundut ni angka partigor, ima angka pinompar na sai mian di ngolu na marhadaulaton i. Laos diuduti di hamoraon na marlobilobi na so boi habilangan di jabuna, jala hot do hatigoranna (kebijaksanaan) i ro di salelenglelengna (ay.3). ay. 3 on paboahon tung na so jadi hurangan manang aha sogot ngolu ni angka partigor manang ngolu ni halak na daulat marroha. Sai na taruli do di angka na denggan sian Jahowa, jala margogo do dagingna dohot tondina laho tongtong mangoloi Jahowa. Itaida ma ngolu ni si Abraham na sai tongtong manghangoluhon hadaulaton di adopan ni Jahowa. Jala binsar do di partigor i hatiuron di haholomon, tarondolhonsa ma angka hatana di paruhuman (ay. 4 – 5). Ay. 4 – 5 on mandok tu hita, na so jadi mardalan halak na marhadaulaton i di haholomon. Sai mangihut do hatiuron i di ibana, ido umbahen na so dapot biar ni roha di ngoluna laho mandalani angka ragam na masa di ngoluna. Sai dijugulhon do laho mangulahon na denggan, jala sai marbasabasa tu angka na hurangan. Sai binsar do panondang tu ngoluna sian Ibana pardengganbasa jala parasiroha jala na bonar, ima Jahowa Debatanta. Parangena manang hatana pe na so adong na gabe hinsahan. Sipujion do tongtong angka na niulana, ganup jolma na marnida jala na mangihon goarna dapotan las ni roha.

            Ay. 6 – 10 mangajari hita na so jadi tagamon humordit ibana salelenglelengna. Molo pe adong angka na mansogohon ibana jala mambahen na jat tu ibana, ndang pola mabiar ibana tusi. Molo pe adong na marsangkapsangkap laho mambahen na jat di ngoluna, ndang marguna i saluhutna, ala Jahowa do donganna. pos situtu do rohana na Debata tongtong mangaramoti jala marmudumudu ngolu partondion nang partondionna. Sai dapotan tua do ganup na daulat marroha di adopan ni Jahowa. Idaon ni angka parjahat i ma sogot. Sai hagitikonna, patungoripon ma iponna ni parjahat jala malengke ibana, matua lonong do pinangido ni angka parjahat. Di ay. 10 on dipodahon do ianggo dalan ni parjahat tu hamagoan di dirina dohot tu tondina do hapateanna, alai molo halak na tigor marroha jala na daulat marsinondang ma songon sondang ni mataniari. Taruli ma di humaliangna i sinondangna i.

Hahonaan ni Turpuk

            Ise ma hita na olo mandapot tua songon hatorangn ni turpuk i? ra torop do hita mandok, aut sugari ma nian di au ma tuana i. alai disungkun ma muse rade do hita tongtong manghangoluhon ngolu na marhadaulaton? Marasing be do alus tusi, ra adong na mandok: mamereng na masa ma, ai jolma dope hita, ai diportibi on dope hita, molo pangidoan rade ma nian alai boha bahenon umgogo do daging on dohot lan alus na asing.

            Di Minggu V Dung Ephipanias on ima Minggu Ephipanias na parpudi di taon 2017 on disosohon do hita asa daulat hita marroha di na mandalani taon 2017 on. Molo didok minggu Ephipanias marlapatan do i “nunga patar be Jahowa Debata i di bagasan Jesus Kristus”, ndang dao nunga saor tu hita. Di bagasan Jesus Kristus patar do idaonta songon dia panghaholongionNa tu angka na tinompaNa i. jala marhite Jesus Kristus andap ma panghangoluhonta di haundukhon dohot hasatiaon ni Jesus Kristus unduk di sude angka hata manang sangkap ni Debata di ngoluna. Sahat tu na adong na mansogohon Ibana, jala na manaon na porsuk dohot hamatean ndang haluar sian Ibana hata mandele. Sai hata apulapul dohot hata hangoluan do na haluar sian pamanganNa. Nang pe torop jolma na manulak Ibana sahat tu na diparsilangkon Ibana, sai lambok do soarana manghatahon hata hangoluan i.

            Sai songon i do na ingkon sipatupaonta di ngolunta. Marparange ma songon parange ni Kristus. Dijou jala dipalua hita sian gambo ni dosa tu haluaon na gok olopolop asa boi do hita tongtong suman tu Ibana, jala mulak songon panompaon na parjolo i, suman tu Debata. Antong di minggu Ephipanias na parpudi on, sai daulat ma rohanta di adaopan ni Debataala pos ma rohata sai na donganan ni Debata do hita laho mandalani ngolu taon 2017 on jala tung na so jadi humordit hita salangka pe ai Jahowa do donganta.