Bahan Jamita Epistel Minggu Letare, 26 Maret 2017, Efesus 5: 8 - 14

BAHAN JAMITA EPISTEL

MINGGU LETARE

Minggu, 26 Maret 2017

Nas: Epesus 5: 8 – 14

MARPARANGE HATIURON DO IANGGO PARANGE ANAK NI DEBATA
Oleh. Pdt. Daniel Bonardo Pane, S.Th.

Patujolo

            Andul do marasing na tiur sian na holom jala dang boi dipadomu. Nunga itaboto songon dia do na masa molo masa haholomon. Molo borngin tompu ma mintop palito (lampu) pasti do songgot roha jala pintor hatop hita mangalului korek api mana senter laho mangalului lilin manang samporong. Sian i botoonta molo so adong palito na pasti susah do ngolunta. Ndang adong na boi idaonta di jolo di hambirang manang di siamun. Mangalului siluluan pe ingkon manat so tung tartuktuk tu dinding. Alai molo nunga galak muse lampu patar ma saluhutna na adong di humaliangta. Antong aha do na boi hahonaanta tu turpuk jamita epistel di minggu Letare on? Andorang so masuk hita tu hahonaan ni turpuk, masuk ma jumolo hita tu hatorangan ni turpuk.

Hahonaan ni Turpuk

            Surat Epesus, ima sada surat na sinurathon ni si Paulus uju na tarhurung ibana. Tutu do nian nunga torop halak Epesus naung gabe porsea jala gabe Kristen uju i, alai ianggo pangalaho manang parange nasida, sai tongtong dope songon parange ni sipelebegu na pasahathon peleanna tu angka debata sileban ima tu Dewi Artemis (dewi kesuburan Yunani), jala torop angka parpoda haliluon na manulak pangajarion ni si Paulus taringot haluaon i, jala angka pangajari hajolmaon na naeng mambahen halak Kristen ganggu di haporseaonna dohot na gabe sursar punguan halak Kristen di huta Epesus. torop do halak Kristen do ianggo statusna alai pangalaho manang parangena ndang patuduhon Kristen.

            Mambege na masa i ditongos si Paulus ma suratna on laho mamodai huria Epesus asa unang be nian marparange nasida songon na tongtong mian di haholomon marhite na manomba angka debata sileban. Marparange ma di parange songon na dibagasan hatiuron. Hatiuron na manondangi haholomon. Nunga ojak hata ni Jahowa marhite jamita ni angka apostel na ro tu Epesus hata ni Jahowa i do hatiuron i asa mananda halak Epesus ise do Jahowa, Ama dohot Debata ni na porsea marhite Jesus Kristus, Tuhan i. mansai diondolhon si Paulus taringot Jesus Kristus, ima Anak ni Jahowa Debata naung ro mamboan hangoluan dohot haluaon tu portibi on. Tangkas do marhite surat ni si Paulus on dipaboa do asa unang ganggu be halak Kristen di Epesus taringot Jesus Kristus, na nihaporseaonna i.

            Molo idaonta turpuk jamita on sian ayat 1 – 7, tangkas do dipodai si Paulus halak Kristen di Epesus i asa naeng ma tanda halak Kristen i tutu ma halak Kristen, ndada holan marhite status alai tarida ma sian parange hatiuron na sian banua ginjang. Pola do di ayat 8 dipaingothon si Paulus halak Kristen di Epesus boha do ngolunasida andorang so masuk dope barita na uli di luat i. didok do: “ai na holom do hamu najolo”, hata ni si Paulus on ndang na mandok ndang na binsar mataniari di luat i umbahen holom. Alai na didok ni holom dison ima sada parngoluan na so tangkas umboto boha do ngoluna jala dia do hapatean ni ngoluna.

            Songon dia do lapatanta parange di na holom? Parange na holom ima parange na gok roha ganggu di ngoluna, gok biar, jala songon halak na mapitung na mandalani sada pardalanan na so mamboto lombang do na naeng dibollus manang dang. Sai dilului do manang aha na boi paluahon ibana sian haholomon i nang pe holan parsatongkinan do saluhutna i. disomba do angka na so patut sisombaon, sai marguru do tu na so tanda tangkas ise do parguruanna i, sai dihaposi do angka na so tangkas gabe haposan. Diulahon ulaonna alai ndang diboto lao tudia diulahon ulaonna i, masa ma laho haluar sian saluhutna i laho manggohi angka hisaphisap ni daging manang hapuason ni pingkiranna.

            Diuduti do di ayat 8: “alai tiur do anggo nuaeng di bagasan Tuhan i”, tiur na didok dison ima hata ni Debata, ima Barita Na uli, Barita hatiuron, Barita hangoluan, Barita las ni roha na manondangi pingkiran dohot pangantusion ni angka jolma na manjangkon Barita na uli i. Songon sada inganan hapeahan ni palito i, disondangi do humaliang ni palito i, marlapatan ma i molo itajangkon do panondang i di bagasan ngolunta, gabe ngolu na gok hatiuroan ma ngolunta on, jala gabe marparange hatiruon do ianggo parangenta. Songon dia do parange hatiuron? Ima parange naung mananda dia do na patut siulaon, tangkas ma ditanda na hinaporseaonna jala ndang adong be jumpa ganggu dohot biar ni roha di ngoluna. Gok olopolop jala mantap mangalangkahon silangkaonna ala nunga patar be idaonna.    Laos marparbue do hatiuron i ima habasaon dohot hatigoran dohot hasintongan, laos boi ma tangkas antusanta manang dia do lomo ni roha ni Tuhan i na ingkon ulaonta (ay. 9 – 10). Manangkasi marlapatan manat jala unang gorsogorso mangulahon angka ulaon di parngoluan on.

            Ndang na boi mardomu hatiuron tu na holom, ido umbahen unang ma gabe saor angka na mian di hatiuron tu na holom. Ayat 11 – 12 turpuk jamita on ndang na mandok asa mandao hita sian angka halak na mian dope di haholomon, jala holan di hita ringkot hatiuron i. alai ayat 11 – 12 on paboahon unang ma gabe dos pangalahonta naung manjangkon panondang jala na mian di hatiuron i dohot halak na sai mian dope di haholomon. Alai ingkon boi do hatiuron i itaboan laho manondangi torop halak na mian dope di haholomon. Marsinondang ma ngolunta dohot parangenta marhite sondang Barit hangoluan na ingkon boanonta muse laho manondangi ngolu ni angka donganta na mangharingkothon sondang ni Tuhan i.           Molo itaboan do sondang hatiuroan na adong di hita, patar ma saluhut angka na rundut di ngolu ni jolma i na ringkot paulihon. Jala tubu ma roha na hehe mandapothon mual hatiuron i, ima Jesus Kristus (ay. 13 – 14).

            Ayat. 15 – 18, sai tongtong do diulakhon si Paulus paingothon halak Kristen di Epesus asa manat mamereng angka na masa di hasiangan on. Unang ma pintor hatop mangoloi elaela angka haulion ni portibi on na boi mambahen hita mandele satia di haporseaonta. Molo naung tarjou hita halak Kristen ndang marlapatan i ndang na gabe marungkil ngolunta, alai molo naung tarjou hita gabe halak Krsiten marlapatan do i molo masa pe parungkilon dohot sitaonon margogo jala ndang ganggu be hita disi ala nunga rap hita dohot Jesus Kristus di hatiuron i.

Hahonaan ni Turpuk

            Lam maju partingkian lam torop do angka haulion dohot elaela na tonggi na binahen ni sibolis tu jolma i asa ditadinghon hatiuron i. godang angka parbarita manang pangajari na mambahen ganggu di haporseaon jala na mambahen jolma i gabe naeng manadinghon hatiuron i. antong aha nama sihobasanta di hasinangan on? Adong do pigapiga mutiha na boi putihononta marhite turpuk jamita on, ima:

1. Marhite Jesus Kristus, tarjou jala tarpillit do hita tu hatiuron na sian Ibana. Hatiuron na so ra mintop. Laos ido las ni rohanta songon goar ni Minggu Letare na marlapatan marlas ni roha. Molo nunga di hita hatiuron na sian Ibana, ndang adong be na ringkot sihabiaranta di na mandalani parngoluan on.
2. Molo nunga mian hatiuron i di ngolunta, ndang be marsidalian hita laho mangalului pangurupion manang panombaon tu angka ganaganaan na binahen ni jolma. Hatiuron i mamboan pos ni roha dohot semangat baru laho manguduti ngolunta di portibi on.

Di bagasan hatiuron i, itaboa ma hatiuron i tu angka donganta na mian dope di haholomon. Mamboan hatiuron i marhite angka parange hatiuoron ima habasaon, hasintongan dohot hatigoran. Laos marhite hatiuron i do na mambahen hita ndang dos be marparange di ngolu haholomon, alai marhite hatiuron i, gabe marsinondang ma panondang i di na holom, jala rap mian ma di hatiuron i, amen.