Bahan Jamita Minggu V Dung Ephipanias, 05 Februari 2017/ 1 Korint. 2: 6 - 16

BAHAN JAMITA

MINGGU V DUNG EPHIPANIAS

Minggu, 5 Februari 2017

Nas : 1 Korint 2: 6 – 16

SAI TARULI MA HITA HABISUHON NA SIAN DEBATA!

Patujolo

            Ndang boi gabusanta molo lam martamba taon lam martamba do nang hamajuon na masa. Sipata ndang tarhabilangan be hamaujon naung adong itaadopi be di parngoluonta. Jala ragam do panghorhonon ni hamajuon on, boi do lam mambahen malo angka jolma, laos boi do lam mambahen maoto jolma i; boi do mambahen jolma i lam marsihaholongan, laos boi do mambahen lam ngali holong i; boi do mambahen jolma i lam sonang di ngoluna laos boi do lam mambahen susa ngoluna dohot ragam panghorhon na asing. Tutu do nian, lam parbue ni hamaloon dohot habisuhon ni jolma do na mambahen hamajuon na masa sinuaeng. Antong boha nama hita di hamajuon na masa songon sinuaeng? On ma na naeng sipatorangon hombar tu turpuk jamita apala di minggu sadari on.

Hatorangan ni Turpuk

            Huta Korint, ima sada huta na mansai sompit jala adong disi pelabuhan di tungkan purba (timur) dohot di pastima (barat). Ragam do na jumpang disi, israna ragam angka parbinotoan, ragam angka na bisuk, ragam nang hasomalan dohot ragam di parngoluon. Huta Korint ima sada huta na di harajaon Rom uju i na maju jala mamora. Torop do angka debata sileban na disomba halak Korint uju na masa di turpuk jamita on, isarana debata Afrodite (dewi cinta), sian na marsomba debata sisongon i godang halak Korint na holan manggohi hagiot ni dagingna jala ndang ditanda ise be donganna (terjadi perkawinan laki-laki dengan laki-laki begitu juga perempuan dengan perempuan) laos na marragam be angka na bisuk na mangalapati angka na masa on jala na naeng masa holan mangasahon parbinotoan manang habisuhonna be.

            Di turpuk jamita on dipaboa do adong do mual ni habisuhon: ima habisuhon na sian Debata dohot habisuhon na sian portibi on. Habisuhon na sian Debata ima habisuhon na dibagasanna adong hatigoran dohot hasintongan taringot ngoluna dohot ngolu partondionna dung salpu angka na niidana dohot na binegena; alai molo habisuhon na sian portibi on, ima habisuhon na laho mangalapati boha do ngolu di portibi on alai ndang sahat ibana mangantusi tudia do hapatean ni ngoluna. Sai marsigantung do ibana tu manang aha na masa.

            Hombar tu pangantusion ni angka na bisuk, ianggo surat ni si Paulus on digurithon di na marsiala do na torop masa angka parhapistaran jala na marhaposan tu parbinotoan dohot habisuhanna laho mangalapati boha do haporseaon di haKristenon. Torop do na ndang manghalamohon pangajarion ni si Paulus hinorhon ndang hombar tu pangantusion dohot parbinotoan ni jolma; sai dirimpu songon dongeng manang barita na so toho sude angka pangajarion ni si Paulus. Sai mandok angka parbinotoanna be jolma i taringot lapatan ni ngolu on, jala ndang binoto tudia do sitondongon ni angka halak na di Korint tarlumobi angka huria na di luat Korint.

            Ido umbahen di turpuk jamita minggu on si Paulus paboahon parasingan ni habisuhon ni jolma maradophon habisuhon na sian Debata. Dia do parasingna? Molo habisuhon ni jolma ima marhororoan sian angka pangantusion dohot pengalaman na niida, nibege jala dijama ni tangan. Ido umbahen na marsuhatsuhat do saluhut angka habisuhon ni angka jolma. Ndang boi gabusanta na ringkot do jolma i marbisuk jala malo nang angka ianakhon pe diparsinta do asa malo jala marbisuk. Molo bisuk sian angka na pistar dohot na sian portibi on na olo salpu do saluhutna ala martingki be saluhutna portibi on nang angka hagiotna dohot lan ni haportibion (bdk. Ay. 6). Jala habisuhon ni Debata na simo jala na buni, naung dipaojak hian sian mula ni mulana bahen hasangapon (ay. 7). Ditompa Debata do angka na tinompaNa i mansai uli jala denggan; laos dipeakhon do angka na tinompaNa i tu angka inganan naung ditontuhon Jahowa angka ingananna be. Dipapatar Debata do holongNa i tu hita marhite Jesus Kristus laho mamboan habisuhon na sian Surgo tu portibi on asa unang sai holan na holom angka ngolu ni jolma, alai torang ma marhite na nilehon Jahowa tu angka na porsea i lam mananda jala mangantusi saluhut angka sangkap ni Debata di ngoluna. Alai ndang ditanda jolma na sai manghaposi habisuhon na di portibion marnida saluhut sangkap ni Debata di ngoluna, ido umbahon na gabe diparsilangkonna Tuhan na Marsangap i, ima Jesus Kristus (ay. 8).

Tubu sungkunsungkun, boha mananda habisuhon na sian Debata? Itaingot ma, na so tolap pangantusionta jala pingkiranta mananda tangkas taringot habisuhon na sian Debata. Alai tama hita mandok mauliate tu Jahowa Debatanta ala olo do Ibana sandiri paboahon habisuhon na sian Banua Ginjang. Marhite hadirion dohot pangajarioan ni Tuhan Jesus Kristus dipapatar jala diajarhon do tu hita habisuhon na sian Banua Ginjang. Nunga manaek Jesus tu Surgo laho paradehon sada inganan na mansai uli jala sonang.

Alai tung na so jadi marujung hita laho mangantusi taringot habisuhon na sian Banua Ginjang. Dipapatar Debata do muse habisuhon i marhite sian Tondi Parbadia (ay. 9), ai sude do didodo Tondi i, ro di angka hasimoon ni Debata. Tondi Parbadia ima Tondi Pangajari, Tondi hasintongan jala holan marhite Tondi Parbadia do hita mangantusi saluhut hasimoon ni Debata nang angka pambahenanNa marhite Jesus Kristus. Tondi ni hajolmaon ndang na boi sahat mangantusi sude hasimoon ni Debata di ngolunta, alai holan marhite Tondi na Sian Debata do. Tondi Parbadia on ima Tondi na dibagasanNa patar hadirion ni Debata (Roh Kudus memiliki hakekat atau substansi Allah karena Ia adalah berasal dan milik Allah yang Maha Kudus). Tutu do ianggo tondi na di jolma i sian Debata do, alai tondi ni jolma na sian Debata i nunga digohi angka gogo dohot hisaphisap ni sibolis nang angka hagiot ni dagingna. Gabe taringot tu hajolmaon do na diantusi angka tondi ni hajolmaon, alai ianggo Tondi Parbadia ndang holan na dihajolmaon alai diuduti do laho mangantusi jala manghangoluhon angka ulaon ni Debata di ngolunta on, laos marhite Tondi Parbadia na sian Debata i do boi hita mananda jala manimbangi angka partondion mangihuthon ruhut ni tondi (ay. 10 – 13). Dia do ruhut ni tondi i? boi do antusanta ruhut ni tondi marhite 1 Korint 12: 1 – 11.

Alai ndang na boi tarjaloon ni hajolmaon ianggo Tondi na sian Debata ala haotoon do i di rohana (ay.14) alai boi do jolma i mananda Tondi Parbadia i, ai holan marhite partondion (kerohanian) do hita boi mananda i (ay. 15). Aut sugari angka jolma boi mananda roha ni Debata, pasti do dohot do ibana mangajari Debata. Songon jolma na mamboto jala mananda roha ni donganna jolma, pasti do sai diajari do donganna i songon dia boi tulus angka na disangkapi dohot dapot na ni luluanna. marhite Tondi Parbadia i mangajari hita mananda habisuhon ni Debata jala marhite i dapot ma roha ni Kristus na ingkon itahangoluhon di ngolunta on (ay. 16).

Hahonaan ni Turpuk

            Molo jumpang tingki menerima raport ni ianakhon, pintor hatop do hita marnida nilai na nidapot ianakhon sian singkolana. Aut sugari disungkun, nilai mata pelajaran do na idaonta jumolo? Ra, torop do natoras ndang jumolo marnida nilai agamana, pintor nilai Matematika, dohot mata pelajaran na asing. Adong do natoras tarrimas manang muruk molo nilai agama ni ianakhonna 5 manang 6 manang ditoru ni 5? Alai molo nilai matematika manang nilai pelajaran na asing nilai 5 manang 6 pintor ro do rimas? Turpuk jamita on ndang na mangorai malo jala marbisuk ianakon, naeng ma malo jala marbisuk sude ianakhonta. Alai unang ma lupa hita ringkot do ianakhon dohot angka natoras nang sude halak Kristen tongtong ma marbisuk di partondion.

            Marhite Minggu parpudi Minggu Ephipanias di taon 2017 on dipapatar do tu hita taringot habisuhon na sian Debata marhite Jesus Kristus jala diuduti marhite Tondi Parbadia, Tondi na sian Debata Jahowa asa mananda hita hapatean jala lapatan ni ngolunta. Tutu do di hamajuon ni partingkian sinuaeng ndang boi tartading halak Kristen di hamajuon sinuaeng, alai unang ma gabe tading hita taruli habisuhon na sian Banua Ginjang marhite Tondi Parbadia. Songon halak naung mananda habisuhon na sian Banua Ginjang, marparange ma hita songon parange na digohi Tondi ni Debata songon Jesus Kristus, Anak ni Debata, Nabadia. Marparange ma hita songon parange ni Jesus Kristus ai Ibana do habisuhon na sian Banua Ginjang i, jala Jesus Kristus hasisingkop ni holong dohot asi ni roha ni Debata na pinatupaNa laho mamboan haluaon dohot las ni roha tu hita. Amen.