DANIEL PANE

SELAMAT DATANG DAN MENIKMATI YANG TELAH DISAJIKAN

Rabu, 12 Februari 2014

BAHAN JAMITA MINGGU SEXAGESIMA, 23 Februari 2014



BAHAN JAMITA
MINGGU SEXAGESIMA
Minggu, 23 Februari 2014
Ev.: Psalmen 119: 33 – 40; Ep.: 1 Korint 13: 10 – 13 (13); S.Patik: Parjamita 12: 13

by. Pdt. Daniel Bonardo Pane, S.Th.

HANGOLUHON MA PATIK DOHOT ATURAN NI JAHOWA!

Patujolo
            Nunga maol be jumpangan jolma sadari on na olo manangihon jala mangulahon poda manang aturan tarlumobi tu poda manang aturan ni Jahowa. Molo hirahira ndang mamboan hauntungan manang ndang hombar tu na dihagiothonna pintor dialo do poda dohot aturan i. Nunga torop be jolma holan mangalului hasonangan tu dirinan nang pe maralo di angka aturan naung diaturhon manang poda na naung dipodahon. Jala molo boi di torop jolma saonari on, unang pola adong be aturan manang poda asa bebas sebebasna, na marhapatean tu jolma barbar, jala gabe marlomolomo hombar tu na dihalomohonna ma jolma i jala gabe jolma na so maraturan be.
            Alai marasing do molo na diturpuk on, sahalak na daulat na sai tongtong manghasiholi dohot manghalungunhon jala manghangoluhon angka poda dohot aturan ni Jahowa, Debata na disomba. Mansai ringkot dope di ibana di angka poda manang aturan ni Jahowa.

Hatorangan turpuk
            Psalmen 119, ima bindu na umtorop ayat di bagasan, pola sahat 176 ayat isina. Turpuk jamita on ima ponggol na palimahon sian 22 ponggol di bindu on. Psalmen 119 marisihon do taringot tu panghilalaan ni sahalak na daulat marsaor tu angka hata dohot patik ni Jahowa. Dihilala parpsalmen on do mansai marhuaso do angka patik dohot aturan ni Jahowa di ngoluna. Ndang dipanghilalaanna songon na tarhurung manang gabe sompit panghilalaanna hinorhon ni patik dohot aturan ni Jahowa. Halak na unduk di angka patik dohot aturan ni Jahowa ima halak na rade mangalehon dirina dirahut uhum dohot aturan, jala rade ditopa hombar songon dia na dihalomohon na nampuna patik dohot aturan i. Ala Jahowa do na ampuna patik dohot aturan i, marlapatan halak na unduk di angka patik dohot aturan ni Jahowa ima hala na rade ditopa gabe hombar tu na dihalomohon Jahowa di ibana.  
Di tongatonga ni torop halak na so olo be mian di rahut dohot patik ni Jahowa, sahalak na daulat manuarahon taringot patik dohot aturan ni Jahowa na mansai dihalungunhonna. Boi do itaida pardaulatanna hombar tu na tarsurat di bindu 119 on. Ndang na na gabe dos be ibana sian angka jolma na so manghangoluhon manang olo mian di patik dohot aturan ni Debata. Sai na mauas do ibana di angka poda taringot dalan ni angka aturan ni Jahowa asa di radoti ro di ujungna (ay. 33). Ndang na asal mauas di angka aturan ni Jahowa i ibana, alai marudut do tu mangaradoti ro di ujungna na marlapatan sahat ro saleleng ibana mangolu. Sian on tangkas do boi idaonta na adong haradeon ni dirina asa unduk di angka patik dohot aturan ni Jahowa.
Mansai maol do mananda dia do aturan manang patik ni Jahowa, songon i do nang mangalapati aturan dohot patik i. Tung songon dia do malo manang bisuk ni jolma di portibi on ndang boi mangalapati aturan dohot patik i so ingkon Jahowa sandiri na patoranghon saluhutna marhite angka jolma na sinuruna. Alani di ayat 34 boi idaonta pangidoan ni halak na daulat on asa diparrohai ibana laho mangaradoti patikNa i, jala dihajonjonghon sian nasa roha. Jala sai diparnonohon ma tu ibana dalam balobung ni angka tona ni Debata, ai lomo do rohana disi (ay. 35). Ngolu ni parpsalmen on ima ngolu na manghalomohon angka patik ni Jahowa. Patik ni Jahowa i ma na mangajar jala patandahon angka hasalaan na diula ibana, jala marhite i boi ma muse mulak tu aturan. Aturan ni Jahowa i, ima paingothon taringot dalan na naeng silangkahononna dohot ulaon na naeng diulahononna.
Patik dohot aturan ni Jahowa patuduhon tudia do arah ngolu ni halak na manghasiholi patik dohot aturan i. alai ingkon ingot do hita, tu angka na pinalua do patik dohot aturan ni Jahowa, ndada tu halak na diparhatoban (songon turpuk jamita di Minggu, 16 Februari 2014 na salpu) na martuduhon hapatean ni ngoluna. Antong sai tusi ma dipaeleng roha ni halak na daulat di turpuk on, unang tu parhilangon (penipuan).
Adong do pandohan na mandok: “mata do mula ni dosa” (bdk. Mateus 6: 22 – 23). Molo na denggan do diida mata denggan do nang rohana di bagasan, molo hisar do mata tiur ma sude dagingna. Alai molo roa do matami, holom ma sude dagingmu. Parpsalmen di turpuk on pe mangidohon sai dipasalpu ma angka matana, unang marnida na so gabeak (hal yang hampa/ hal yang tidak berguna) ima na martudu tu pangulahon ni jolma na so marlapatan ala na sai holan mangalului hasonanganna na holan mangasahon gogo, parbinotoan, arta dohot lan na asing; jala na martudu tu ganup jolma na sai loja manguduti ngoluna alai ndang boi manghilala tonggi ni na niulana hinorhon i lojana i, sahat tu na matena pe ibana sai tongtong marnaloja alai ndang mandai parbue ni halojaonna i ima horong ni na so gabeak. Marhite aturan dohot patikNa i dapotan ngolu ma jolma na mian di ruhut dohot aturan ni Jahowa (ay. 37) (ida Jamita di Minggu, 16 Februari 2014).
Togu do sude patik dohot aturan ni Debata, jala na so tupa sega sada sian patik dohot aturan ni Jahowa. Songon i do bagabaga ni Jahowa tu angka halak na manghabiari Ibana di ngoluna (ay. 38). Marhite patik dohot aturan ni Jahowa na togu jala na hot, unang be adong holsoan taringot uhum dohot hatigoran ni Jahowa ala denggan do angka uhum ni Jahowa (ay. 39). Jala marhitehite hatigoran i mangolu ma jolma na mian jala na manghalungunhon angka patik dohot aturan ni Jahowa (ay. 40).


Refleksi Teologis
            Adong do na boi diputik sian hatoran ni turpuk on tu ngoluta sadari on:
  1. Ditonga ragam sipingkiron saonari dohot di ragam na masa di portibi on ingkon boi do rade ngolunta ditopa hombar tu hata ni lomo ni roha ni Jahowa, Debata marhite hata dohot aturan ni Jahowa na mian di bagasan Jesus Kristus unang ma gabe portibi on manopa ngolunta.
  2. Sai itasiholi ma patik dohot aturan ni Jahowa, ai ido hangoluan.
  3. Unang be paeleng roham dohot mata marnida angka na so marlapatan di portibi on (na so gabeak), alai paeleng ma roham tu angka aturan dohot patik ni Debata.
  4. Matua ditatap Jahowa do ganup halak na sai tongtong marsihohot manghalungunhon patik dohot aturan ni Jahowa, ai di bagasan i do adong bagabaga tu hangoluan dohot pos ni roha laho manguduti pardalanan ni ngoluna.
  5. Ulahon jala lapatima sude patik dohot uhum ni Debata, ndada mangasahon gogo, parbinotoan, manang arta dohot lan na asing, alai pangasahon ma Jahowa.  amen.



Angka Ende Minggu
  1. 303 : 1 – 3
  2. 425: 1 – 2
  3. 190: 1 – 2
  4. 25:   1 – 2
  5. 28:   1.....
  6. 277: 1, 3
  7. 30: 1......


             

Tidak ada komentar:

Posting Komentar