BAHAN
JAMITA
MINGGU
SEPTUAGESIMA
Minggu,
16 Februari 2014
Ev.: 5
Musa 30: 15 – 20; Ep.: 1 Korint 3: 1 – 9 (8 – 9); S.Patik: Poda 3: 11
by. Pdt. Daniel Bonardo Pane, S.Th.
MARHAPATEAN
TU HANGOLUAN DO GANUP NA MANGHAHOLONGI
JAHOWA
Patujolo
Molo disungkun tu dirinta
be, marhapatean tu dia ngolu sadari on? Torop do halak ndang mangantusi lapatan
ni sungkunsungkun on alana lapatan boasa ibana mangolu di portibi on pe dang
diboto. Adong do jolma mangolu tanpa hapatean ni ngolu na jelas, songon na
didok: eme na masak digagat ursa, i na masa, i na niula. Holan marnida na masa
jala mangihuthon na masa alai ndang mangalapati dia do na masa i. Jala marnida
na masa nuaeng nunga torop be angka dalan dibaen asa boi jolma i mandapot
hasonangan tu dirina nang pe dalan i adong marhapatean tu hangoluan jala adong
na marhapatean tu hamagoan.
Boha
do parngoluan ni halak Kristen saonari? Tong do masuk tu horong na so mamboto
marhapatean tu dia do ngoluna jala na so mamboto lapatan ni ngoluna? Halak
Kristen ima halak na mamboto marhapatean tu dia do ngoluna jala mangalapati
ngoluna sadari on dohot haduan. Jala halak Kristen pe ima bagian tatanan sosial na manghirim hasonangan
di ngoluna, alai manat mamillit dia do dalan silangkahononhon.
Hatorangan
ni Turpuk
Di pardalanan ni bangso
Israel di halongonan manopot tano Kanaan, ragam na na masa sibolusonnasida,
adong ma i parporangan, las ni ari, ngali ni ari alai na rumingkot ima manang
aha pe na masa tu bangso i, ndang hea ditadingkon Jahowa, Debata na paruarhon
nasida sian parhatobanon ni Misir; sai tongtong do didongani Debata nasida; sai
disarihon do dia na ringkot di bangso i. alai ala mental ni hatoban dope na songgop tu bangso i, ndang hea adong roha
mandok mauliate dohot hot satia tu Jahowa, Debata. Holan na marungutungut,
menuntut, alai ndang olo mian di angka ruhut dohot uhum ni Jahowa nasida.
Bangso na dihalomohon Jahowa ima bangso na olo unduk di angka ruhut dohot
uhumNa, ndada bangso na so maradat manang na so marruhut. Sude na i laho
manjaga habadiaon ni bangso i di parngoluannasida alana Jahowa, Debata na
paluahon jala mamillit nasida, ima Debata na badia.
Parange
ni hatoban do na sai jotjot menuntut jala na so adong roha na marhamauliateon
jala ndang adong roha manang parange na unduk. Ido na masa tu halak Israel
maradophon Jahowa, Debata na paruarhon nasida sian parhatobanon. Nang pe nunga
dipanghilalaonnasida songon dia do pangaramotion dohot pandonganion ni Jahowa
di ngolunasida, alai sai tongtong do sai adong roha na mangalo jala sai
mamillit ragam sipilliton na boi mambahen sonang jala sombu panghilalaanna,
isarana unduk jala manomba debata sileban. Sian on tangkas ma na so dilapati
nasida do haluaonnasida dohot pandonganion ni Jahowa. Jala nunga diida nasida
songon dia do rimas dohot paniaphon ni Jahowa maradophon bangso na maralohon
Israel. Dilehon Jahowa do patik-Na tu bangso i dung malua nasida asa
haluaonnasida i tongtong dirahut uhum manang patik ni Debata. Dihalomohon
Jahowa do bangso na pinillitNa di bagasan habadiaon, keteraturan, jala ndang marsilomolomo. Jala na so mangulahon sada
sian patik ima marhapatean tu hamatean dohot hamagoan. Patik i do barita na uli
jala patik i do hatuaon dohot hangoluan (bdk. Psalmen 119: 92, 143 – 145).
Turpuk
on ima udut ni hata poda ni si Musa laho mangaratarataon taringot pandonganion
dohot pangaramotion ni Jahowa marhite ragam na masa di pardalanan ni bangso i.
Jala dipapillithon ibana do pasupasu dohot torutoru tu bangso i, dia ma na
dipillit bangso i jala nadua i do na boi gabe hapatean ngolu ni bangso i (personal dohot kolektif) (ay. 15). Pasupasu na marhapatean tu hasonangan, masuk tu
tano naung niuarihon ni Jahowa, ima tano Kanaan na naeng dilehononNa tu nasida,
jala torutoru na marhapatean tu hamatean dohot hamagoan salelenglelengna, jala
na so masuk tu tano na niuarihon ni Jahowa i.
Molo
naeng mandapot na dihirim pasti do adong pangulahonon manang usaha laho mandapot i. Songon i do na
diturpuk on, adong do pangulahononhon na ingkon adong di ngolu bangso i, ima
manghaholongi Jahowa, Debata jala marparange di angka dalanNa, huhut
mangaradoti angka patikNa, angka aturanNa dohot uhumNa, asa pangoluonNa ho jala
patoroponNa ho, jala pasupasuon ni Jahowa, Debata ma ibana di tano sitopotonmu
nuaeng bahen partalianMu (ay. 16). Ayat on paratahon di 5 Musa 6: 5; 10: 12).
Turpuk on pabotohon dohot manosohon asa bangso na pinalua ni Jahowa i adong
haundukhon tu hata dohot patik manang uhum ni Jahowa, Debata. Tarida ma i sian
haundukhonna maradophon hata dohot patik ni Debata jala rade dirahut uhum dohot
patik ni Jahowa, Debata i. Ndada halak na dibagasan parhatobanon dirahut patik
dohot uhum ni Jahowa, alai halak na pinalua do; ndada tu hatoban dilehon patik
i, alai tu halak na naung pinalua do. Ala ni i, ndada hinorhon ni gogo manang
pambahenan malua jolma i, alai jumolo do dipalua jolma i asa pe adong roha na unduk
jala rade mamelehon dirina mangoloi patik dohot uhum ni Jahowa. Sian on,
tangkas do boi do tangkas dohonon halak na sai jotjot olo mangalo di angka
patik dohot uhum ni Jahowa, ima parange hatoban ma mian di ibana. Halak naung
pinalua do boi mangulahon na manghaholongi Jahowa songon sada alus naung
pinalua Jahowa ibana, dung i marhapatean ma tu pasupasu ni Jahowa na marudut.
Hata dipatorop na didok dison martudu
ma i tu angka torop jolma na marhite ibana gabe porsea jala unduk tu hata dohot
patik ni Jahowa, Debata (ndada na marlapatan tu angka pinompar di pardagingon (genealogis; keturunan secara daging),
alai pinompar di partondion (anak rohani)).
Jala pasupasuon ni Jahowa ngoluna di tano sitopotonna (Kanaan) nuaeng bahen
partalianmu, na marlapatan tu panarihononhon dohot pangaramotion ni Jahowa di
ngoluna.
Alai
molo tung sura marbalik roham, ndang olo ho manangihon, lam olo ho elaelaon
marsomba tu angka debata sileban dohot mangoloi i, ingkon mago situtu do ibana,
jala ndang tagamon leleng mangolu di tano sitopotonmu, dung taripar Jordan
bahen partalianna (ay. 17 – 18). Ganup na diula manang dipillit adong do
hapateanna, mangulahon jala unduk tu hata ni Jahowa marhapatean tu pasupasu
dohot torop ni hangoluan; alai na mangalo jala olo dielaela marsomba tu angka
debata sileban marhapatean tu hamagoan. Songon di ayat 17 – 18 on ma halak na
so olo unduk jala marbalik rohana tu angka elaela debata sileban jala ido
parange ni hatoban. Parange ni hatoban do na so olo unduk tu hata ni Jahowa
hinorhon ni tonggi ni gabe hatoban dipanghilalahon ibana, hape hamagoan do i
saluhutna. Sai dilului do ragam angka dalan nang pe maralo i tu na dihalomohon
ni Jahowa asa malua ibana jala sonang ibana.
Antong
nunga dipabotohon si Musa 2 sipilliton ni bangso i na gabe hapatean ni ngolu ni
bangso i: hangoluan manang hamatean; pasupasu manang torutoru. Jala disosoi si
Musa do asa dipillit bangso i hangoluan dohot pasupasu asa mangolu ho dohot
pinomparmu sogot (ay.19). Hata mangolu na didok ndada na marlapatan ganjang
umur di pardagingon alai boi mangalapati ngoluna di portibi on huhut na sai
tongtong disarihon huhut diramoti Jahowa ngoluna nang marhite hosa hangoluan,
hahipason, dohot roha na sonang. Jala di ayat 20 dipaduahalihon si Musa do na
ingkon diulahon bangso i asa dapotan hangoluan dohot pasupasu i. manghaholongi
Jahowa, Debatam jala manangihon soaraNa, jala marsilohot roham tu Ibana, ai
Ibana hangoluanmu hian dohot na paginjang umurmu, asa tongtong maringan di tano
naung diuarihon ni Jahowa hian ima tano Kanaan (ay. 20). Ayat 20 on pategashon
taringot hapatean ni ngolu ni jolma na manghaholongi Jahowa. Alai ndada holan
alani usaha i taruli hita tu hapatean hangoluan dohot pasupasu, alai jumolo do
hita naung manjalo haluaon na sian Jahowa. Alani i, usaha i ima alus jala hamauliateon
ni rohanta naung pinalua ni Jahowa sian hatoban gabe halak na malua.
Refleksi
Teologi
Boha do statusta di ngolu ni
portibi on? Status hatoban do manang status ni halak na malua? Hatoban dison
ima dibagasan “parhatobanon dosa”; halak na malua ima “halak naung pinalua sian
parhatobanon dosa”. Halak na mandok dirina halak naung pinalua alai sai olo
dope ibana diparhatobanon ni dosa, ima halak na sai mian dope parange ni
hatoban i. Ndang dilehon Jahowa bagabaga hangoluan dohot pasupasu tu halak hatoban,
alai jumolo do dipalua jolma i ipe dilehon (boi itaida songon dung malua do
bangso Israel sian parhatobanon ni Misir dung i dilehon ma patik, laos
dibagasan i do bagabaga i).
Molo
itadok do halak naung pinalua Jahowa do hita sian parhatobanan ni dosa marhite
Jesus Kristus taruli ma hita dibagabaga tu hangoluan dohot pasupasu. Alai boi
do hita mandapot bagabaga i songon hapatean ni ngolu ni halak naung pinalua ni
Jahowa. Di ragam na masa sadari on di pardalanan ni ngolunta nuaeng, dia do
sipillitonta na gabe hapatean ni ngolnta hangoluan manang hamatean; pasupasu
manang torutoru? Alai naeng ma nian hangoluan dohot pasupasu i itapillit di
pardalanan ni ngolunta.
Molo
di pardalanan ni Israel di turpuk on, ima pardalanan manopot tano na naung
niuarihon ni Jahowa hian tu ompunasida, si Abraham, si Isak dohot si Jakob.
Jala sadari on pardalanan ni halak Kristen (jolma na naung pinalua ni Jahowa
sian parhatobanon ni dosa marhite Jesus Kristus) ima pardalanan manopot huta na
uli, inganan ni angka na satia jala manahan di haundukhonna tu hata ni Debata,
inganan las ni roha, jala disi ma adong hangoluan saleleng ni lelengna (ganjang
ni umur). Jala pasupasuon ni Jahowa ima hosa hangoluan, dohot haluaon na
pinatupaNa jala silehon roha na sonang, dohot pasupasu na so boi dibatasi
marhitehite sinamot, pangkat dohot lan na asing.
Asa
marhapatean ngolunta tu hangoluan (ganjang ni umur) dohot ngolu na gok
pasupasu, ingkon do itahaholongi Jahowa, Debata marhite haundukhonta dohot
hasatiaonta tu Ibana na naung paluahon hita marhite Jesus Kristus.
Manghaholongi Jahowa, Debata ima ponggol na parjolo sian 2 ponggol patik rea
(Mat.22: 37). Manghaholongi Jahowa, Debata ndang boi malua sian panombaon dohot
komitmen na marsihohot jala solhot tu
Ibana. Manghaholongi Jahowa ndada boi marsatongatonga, alai sian nasa ateate,
sian nasa hosam, dohot sian roha. Lapatanna, manghaholongi Jahowa ima sada
hataridaan unduk dohot satia mian di rahut dohot patik ni Jahowa. Molo songon i
do mian di ngolunta boi ma hita mangalapati ngolunta, ima ngolu na unduk jala
satia laho mangulahon hata ni Jahowa, jala ngolu na gok hamauliateon di
ngoluna. Sai anggiat ma sai manongtong di bagasan ruhut dohot uhum ni Jahowa di
ngoluna asa marhapatean ngolunta on tu hangoluan jala pasupasu sian Jahowa.
Songon panutup, husurathon ma sada hata ni ende na
mandok, “nunga tangkas dibotoho na nidok ni TUHAN Jahowa Debatam, molo naeng
sonang jala mangolu ma ho tung pauba ma parange, tung sura so disarihon ho be,
manang naung balik roham sian TUHAN i, jala olo ho dielaela manomba debata
sileban. Alai ingot ma tu hamagoan do tu hamatean do jambarmi, dibahen i binsan
dilehon TUHAN i holong ni rohaNa i di ho. Pillit ma hangoluan i, sai pallit ma
na dumenggan i. asa mangolu ho muse, dohot pinomparmu sogot. Amen.
Digurithon: Pdt. Daniel Bonardo Pane, S.Th.
HKI Ressort Parparean
Angka Ende Huria:
- 9 : 1, 3, 5
- 417 : 1 – 2
- 210 : 1 + 2
- 253 : 1 – 2
- 202 : 1..........
- 262 : 1 + 5
- 258 : 1........
Tidak ada komentar:
Posting Komentar