TATA IBADAH MINGGu PABORHATHON IANAKHON NI HURIA
MANGADOPI UJIAN AKHIR & ujian NASIONAL
(keterangan: P: Paragenda; J: Jemaat; N: Na naeng ujian)
Votum
P : Marhitehite Goar ni Debata Ama, dohot AnakNa, Tuhan Jesus Kristus, dohot Goar ni Tondi Parbadia, na manompa langit dohot tano on, dipasaor ma dameNa tu tondinta be, Amen,
J : Ale Jesus Tuhannami Bereng hami na dison PinarmahanMi do hami Saluhutna na dison, Sai asi rohaM di hami Sai pangolu hami on. Amen.
P : Sai martua ma ganup na mangkabiari Jahowa na marparange di angka dalanNa i. Sai panganonmu do na niula ni tanganmu, martua ma ho jala sonang
N : sai ingot ma au ale Jahowa, ala asi ni rohaM. Jala pujionku do Ho saleleng ni ngolungku.
P : Martua ma jolma na marhaposan tu Jahowa, jala na mangalului Ibana saleleng ni ngoluna.
J : Amen.
Marende BE. 14: 1,3,5
Manjaha Ayat + Tangiang
P : Iale Jahowa, sai manumpak ma Ho! Iale Jahowa sai Ho ma mambahen manjadi! Pinasupasu ma na ro marhitehite Goar ni Jahowa
N : Martua ma bangso na umboto olopolop! Angka na marpangalaho di bagasan hatiuron ni bohiM, ale Jahowa. Sai marolopolop do nasida manipat ari marhitehite GoarMu, jala timbul do nasida hinorhon ni hatigoranMu.
J : Ala ni i do dipatimbo Debata Ibana jala dibasabasahon tu Ibana Goar na sumurung asa nasa goar, asa somba tu Goar ni jesus nasa ulu ni tot, na di banua ginjang i dohot na di tano, nang na di toru ni tano.
P : Martangiang ma hita.
J : Ale Jahowa, Debatanami, sai ramoti ma ahu ale Debata, ai marhaposan tu Ho do ahu.
N : Sai pabotohononmu do tu hami dalan hangoluan, sun ma las ni roha di adopan ni bohiM, angka hasudungan ni roha masa di siamunmu salelenglelengna.
P : Ale Jahowa, Debatanami. Pinuji jala marsangap ma Ho saleleng ni lelengNa ala nunga patar be holongMu tu hami marhitehite Jesus Kristus Tuhannami. Ibana ma Sitobus jala na padomuhon hami tu Ho.
J : Sai parohai ma hami, asa huingot jala huhangoluhon hami arga ni panobusionMu di hami marhitehite Jesus Kristus, jala boi hupatupa hami lomo ni rohaM.
N : Sai togutogu jala urupi ma hami angka anak dohot boru ni huriaM na naeng mangadopi ujian akhir manang ujian nasional di ganup parsiajarannami. Patogu jala papos rohanami tu Ho, asa dao hami sian angka ulaon na so hombar tu hasintongan manang na nilomohon ni rohaM.
P : Sai patongtong ma haporseaon dohot holong na nilehonMi tu hami, asa hupangke hami i laho pasangaphon dohot mangihuthon Ho di bagasan ngolunami. Amen. Didongani TUHAN Debata ma hita on saluhutna, Amen Haleluya
J : (mangendehon) Haleluya, Haleluya, Haleluya.
Singkat ni Patik
P : Singkat ni patik sadari on, ima na laho paborhathon ianakhon ta mangadopi ujian Akhir dohot ujian nasional, dibuat ma sian Poda 3: 5-9. (dung sidung dijaha) rap ma hita mangido gogo tu TUHAN Debata,
J : Ale TUHAN Debata, sai pargogoi ma hami mangulahon na hombar tu hataMi, Amen.
Marende BE. 30: 1-2
Manopoti dosa+Bagabaga
P : Ro ma hita tu adopan ni Debata, jala tatopoti ma angka dosanta tu Ibana
J : (mangendehon ½ suara BE. 432: 1 ) Sian hurungan ni dosangki ro au tu Ho,/ Ro au tu Ho. Tu haluaon di mudarMi Jesus au ro tu Ho/ Nasa rohangku malum, hipas, Gabe mamora, nang pe pogos,/ Sian jeangku ro au tu Ho, Jesus au ro tu Ho
P : Martangiang ma hita, Ale TUHAN Debata, Amanami Pargogo na so hatudosan!
J : na ro do hami nuaeng tu joloM manopoti saluhut dosanami, ala huparhatopot hami na jolma na mardosa do hami di adopanMu na badia i.
N : Jotjot do hami manimbil sian dalanMu na tigor i, jala hulaosi hami na nidok ni hataM. Jotjot do hami mangasahon jala marpanghusandean tu pingkiran manang gogonami sandiri.
P : asi ma rohaM di hami, ale TUHAN Debata, hombar tu denggan ni basaM. Sai unang paingotingot angka dosa ni hapoonnami dohot pangalaosionnami. Sai sesa ma saluhutna i ala ni anakMu Tuhan Jesus Kristus, Sipaluanami, Amen.
J : (mangendehon BE. 183: 1). Na jumpang na asi roha Di au naung mago i hian/ Tuhan Jesus parasi roha Di au na lilu na hinan/ Nuaeng hutanda Tuhanki/ Parasi roha bolon i . Parasi roha bolon i
P : Bagabaga ni Debata taringot tu hasesaan ni dosa. Martua ma manang ise naung sinesaan pangalaosionna, naung hinungkupan dosana. Martua ma jolma, ia so dijujur Jahowa tu ibana hajahaton. Hasangapon ma di Debata na di ginjang
J : Amen.
Marende BE. 184: 1+4
Epistel:
Marende BE. 149: 1+3
Manghatindanghon Haporseaon
P : Tahatindanghon ma haporseaonta, songon na dihatindanghon donganta sahaporseaon. Rap ma hita mandok.
P+J: Ahu porsea...d.u.
Marende BE. 464: 1........ (Pelean)
Jamita:
Marende BE. 182: 1-2
Tingting + Tangiang Tingting
Ulaon tu paborhathon angka ianakhon (Marende BE. 268: 1, 3)(di tingki marende rap jongjong ma na naeng mangadopi ujian di ingananna be)
P : Aha ma pinangido ni rohaM na naeng sipatupahon ni TUHAN Debatanta tu hamu?
N : Ale TUHAN Debata, Amanami. Ro do hami ianakhon ni huriaM na naeng mangadopi ujian akhir dohot ujian nasional di ari na mangihut. Mangido hami tu Ho ale TUHAN, asa ho ma antong na mamasumasu sude angka persiapan na naung dipersiaphonnami, jala mangaramoti huhut margogoihon hami di tingki ujian ni berlangsung.
P : Aha ma muse na pinangido ni rohaM na naeng sipatupahon ni TUHAN Debatanta tu hamu?
N : Ale TUHAN Debata, sian unduk ni rohanami mangido hami tu Ho, papos ma rohanami nang haporseaonnami tu Ho, jala padao ma hami sian sikap na so lomo ni rohaM, ima sikap curang, mencontek, dohot na asing, jala boi ma hami mandapot jala manghalashon parbue ni halojaonnami jala haporseaonnami tu Ho.
P : Haposi ma Jahowa sian nasa rohaM, jala pasahatma dalanmu dohot pingkiranmu tu Jahowa, asa Ibana na paturehon. Martangiang ma hita, Ale Debata Amanami, Pargogo na so hatudosan. Nunga mangido ianakhon ni huriaM na naeng mangadopi ujian akhir dohot ujian nasional di ari na mangihut. Tu Ho ma hupasahat hami nasida ale TUHAN, asa Ho ma na mamasumasu, mangaramoti jala margogoihonnasida di ujian ni. Asi ma rohaM, tangihon ma hami hombar asi ni rohaM. Marhitehite Jesus Kristus, Tuhannami.
N : Amen (hundul )
Marende BE. 437: 1....... (Pelean)
Tangiang Pelean + Ale Amanami + Pasupasu
SYALOM
SELAMAT UJIAN
Tidak ada komentar:
Posting Komentar