MINGGU, 09 APRIL 2012
MINGGU PASKAH II
Johannes 20: 19 – 23 (Epistel: Heber 9: 11-20)
CPdt. Daniel Bonardo Pane, S.Th.
Patujolo
Ganup taon do halak Kristen di sandok portibi on merayakan ari Haheheon ni Jesus Kristus sian hamatean, na ginoaran ni Paskah. Paskah marlapatan do i “Peristiwa Haluaon” ( Peristiwa kebebasan, kelepasan)”. Di padan na robi, manang di halak Jahudi, pesta paskah ima pesta haluaon: ima sada peristiwa haluaon ni angka ompunasida na haruar sian parhatobanon di Mesir. Molo taida di 2 Musa 12, dipajojor do songon dia do partording ni ulaon paskah di halak Israel uju di parhatobanon halak Mesir dope nasida jala songon dia do ulaon ni Jahowa di na lao paluarhon manang paluahon bangsao i sian parhatobanon. Ingkon tangkas do botoonta, na patupahon haluaon i ndada jolma, alai Jahowa sandiri do na patupahon haluaon i, bangso Israel holan na mangulahon dia do na didok sipatupaon ni Jahowa tu nasida.
Johannes 20: 19 – 23, ima bagian na patoluhon na mamaritahon haheheon ni Jesus Kristus. Aha do pardomuan ni haheheon ni Kristus tu ulaon Paskah? haheheon ni Kristus toho ma terjadi di masa ni Paskah di halak Jahudi. Ala ni i, haheheon ni Jesus Kristus ima sada hapapatar ni ulaon haluaon na pinatupa Jahowa di bagasan diri ni Jesus, na mamboan haluaon. Nang pe Jesus manaon na parsitaonon na borat jala sahat tu hamatean, alai ndang na marujung hangoluan ni Jesus di hamateanNa. Hehe do Ibana sian hamatean, jala manaek tu surgo, hundul di siamun ni Jahowa, Debata na marsuru Ibana. Haheheon i patubuhon haluaon tu ganup halak na manghaporseai Ibana. Haluaon sian dia do dipatupa? Tangkas ma ta ihuihuthon hatorangan ni turpuk on.
Hatorangan ni Turpuk
Molo taida turpuk jamita on, dipatorang do situasi na masa di tingki Jesus patuduhon diriNa tu siseanNa (Judas Iskariot, ndang dohot be bilangan ni sisean ala nunga mate ibana) dohot angka parompuan na sai jotjot satia mangihuthon Jesus. Situasi na dipatorang diturpuk on, ima di sada inganan (boi ma tadok jabu na tertutup rapat). Ndung mate Jesus, mansai habot situtu do rohanasida, jala mabiar situtu jala tahuton do angka sisean-Na ala pangaleleon na masa tu nasida sian angka soldadu na naeng manangkup nasida. Pola do martabuni nasida di sada inganan jala disi ma nasida martangiang. Jala dihatiha i, nunga tarbarita be na so adong be bangke ni Jesus di tanoman i. Jala tubu ma tuduhan na manudu angka sisean i do na manangko bangke ni Jesus i jala ditabunihon di sada inganan. Hape molo secara pingkiran, songon dia do angka sisean boi mangguling batu na manutup tanoman i sekejap mata, ala mansai borat situtu do batu i, jala dijaga angka soldadu do tanoman ni Jesus i (ida: Mat. 27: 62-66); tuduhan ni tubu do sian angka malim, dung disisipi angka malim i angka soldadu na manjaga tanoman i asa didok “tagan tarpodom hami, ro do angka siseanNa bornginna i manangko” (ida: Mat. 28: 11 – 15). Umbahen i, mansai tahuton do angka sisean i, pola martabuni nasida di sada inganan.
Andorang dipatudu Jesus diriNa tu angka sisean i, nunga dipatudu Jesus hian diriNa tu Maria Magdalena (parumpuan na pinalua ni Jesus sian tondi na jahat (Luk.8: 2) Joh.20: 11-18; Mark. 16: 9-11), tu angka dua siseanNa na naeng tu Emaus (Luk.24: 13-36; Mark. 16: 12-13), dung i pe tu sude siseanNa (Joh.20: 19-23; Mark. 16: 14-18; Luk. 24:36-49)
Di ayat 19 dipaboa do tingkina (waktunya) ima “di bot ari, di ari parjolo dung salpu ari Sabbat”. Marasing do pargantian ni ari di halak Jahudi. Molo biasana, pergantian ari masa do i di pukul 00.00 (24.00). alai molo di halak Jahudi, pergantian ari terjadi di pukul 18.00 (pukul 6 sore). Contohna, molo dihita hari Sabtu pukul, 18.00, tetap do i tadok ari Sabtu, alai molo di halak Jahudi nunga ari Minggu be i. Ido na didok “bot ari” (malam). Berarti, kebangkitan Yesus tepat ma i di ari Minggu, setelah hari Sabbat (Sabbat di nasida dipamasa di hari Sabtu), dan tepat di situasi Paskah (songon na dipatorang di ginjang). Molo taida di ayat 1, nang pe tingki na sarupa disurathon di tingki na ro si Maria Magdalena tu tanoman i, alai peristiwa i, ndang masa sekaligus. Jala boi do dohonon, saminggu holangna tingki na di ayat 1 tu ayat 19 on.
Di hatiha i, marpungu do disi angka sisean di sada inganan na naung sordak angka pintuna (pintu tertutup rapat/ terkunci betul), ala biar ni rohanasida mida halak Jahudi. Biar ni rohanasida ima ala ndang adong be uluan di nasida, jala ala angka hata na so tutu maradophon nasida sian angka malim. Molo mabiar, jala tahuton, secara psikologis marlapatan ndang dapot sonang ni roha. Halak na mabiar, parngoluanna pe na boi sibuseaon, ndang dapot sonang manang roha na dame, jala halak na digohi biar, pasti ndang hea tulus angka sihobasonna di ganup panghobasionna, jala halak na mabiar dapot di ibana hagaleon, tung na so margogo be ibana mangulahon ulaonna, jala ndang adong be pingkiran na denggan dohot jernih ala biar ni rohana.
Di situasi biar i, ro ma Jesus jongjong tu tongatonganasida, jala mandok: “Dame ma di hamu!” Hata “dame” ima kata kunci na menjadi alus dibiar nasida. Dame i ma na boi pamagohon biar. Dame na pinasahat Jesus ndada holan dame secara fisik, alai dame di pingkiran, jala dame di roha nang di partondion. Dung didok sisongon i, “dipatuduhon Jesus do tanganNa dohot andoraNa tu nasida” (ay. 20). Na patuduhun, Ibana do Jesus, uluan jala gurunasida na naung mate, ditanom, jala tutu ma Ibana Jesus na hehe sian hamatean, Ama na marsuru Ibana, jala jumpang ma hata naung dihatahonNa dohot angka hata naung dihatahon angka parpesalmen, panurirang dohot di buku ni si Musa taringot Ibana (Luk. 24: 44-47). Jala dipatuduhon Jesus diri-Na tu angka sisean, ima di na lao mangalo angka hata na so tutu taringot Ibana sian angka malim.
Dungi i di ayat 21, diulahi Jesus do mandok hata: “Dame ma di hamu!”. Pandonghonan na paduahali on, ima songon sada penegasan lao mambalongkon biar ni roha manang tahuton ni angka sisean. Jala pandonghonan na paduahali on diihuti tu parsuruan. Lapatanna, roha na dame, pingkiran na dame dohot tondi na dame, ima sada modal utama di na lao pararathon barita na uli taringot Ibana, na naung tubu, manghobasi, mate, ditanom jala na hehe, jala na manaek tu Surgo, jala pararathon barita las ni roha dohot barita dame na sian Jahowa, ima barita haluaon jala hamuliaon tu sandok na tinompa di portibi on (pat. Mark. 16: 15). Barita las ni roha, manang barita hadameon i, ima barita na mamparbuehon parsaoran na dame secara pribadi, dongan humaliang lumobi parsaoran dohot Debata i. Ndang dipaloas Jesus angka siseanNa pararathon hata i, manang gabe sitindangi-Na di bagasan biar manang tahuton.
Di ayat 22, disurathon do “mangombushon”. Hata mangombushon ima mambalongkon na patut dibalongkon sian pribadi ganup sisean, laos dilehonma haimbaruon. Aha na dibalongkon jala aha haimbaruon i? Na dibalongkon ima biar, hatahuton, egois. Jala haimbaruon i ima, dame, habaranion, di na laho gabe parbarita na uli manang gabe sitindangiNa. Bangko manang parange angka sisean na leleng i pe nunga dibalongkon. Na jolo nasida holan jolma na biasa, na pogos, na disisihon, na gok biar manang ganggu, nuaeng gabe jolma na barani jala nunga torop be halak na manangihon hata manang sitindangina. Marlapatan ma i, haheheon ni Kristus ima sada manghorhon haimbaruon ni parngoluan. Angka bangko manang parange ni jolma na so marpardomuan tu na dihalomohon Jahowa dibalongkon, jala manjangkon haimbaruon di parange, jala haimbaruon di parngoluan (new attitude and new life)
Ingkon diboto do, angka sisean i ndada ala gogo manang pingkiranna sandiri boi gabe parbarita na uli manang sitindangi Kristus. Adong do na margogoihon nasida ima, Tondi Parbadia (ay. 22). Ingkon parjolo sahali do nasida manjalo jala manjanghon Tondi Parbadia di ngolunasida, baru pe boi nasida gabe parbarita nauli manang gabe sitindangi Kristus.
Aha do lapatan ni ayat 23 on? Ingkon manat do hita mangalapati di ayat 23 on. Ise do na marhuaso manesa dosa menetapkan dosa? Holan Jahowa sandiri do na marhuaso manesa dosa manang menetapkan dosa. Dipatupa Jahowa do hasesaan ni dosa marhitehite jolma na pinillit-Na manang jolama na ni minyakhi (yang diurapi). Jala di ayat 23 on, dipillit Jesus do angka siseaanNa parhitean patupaon hasesaan ni dosa ndung nasida diminyahi (diurapi) di bagasan Tondi Parbadia. Marhitehite gogo sian Tondi Parbadia jala huaso sian Jahowa marhitehite Jesus Kristus, marhuaso do hita patupahon hasesaan ni dosa tu jolma na naung manolsoli situtu angka dosana jala naeng mangihuthon Jesus Kristus sian nasa ias ni rohana. Alai molo tu jolma na so olo manolsoli dosana, jala holan na sai tongtong mangulahon hajahaton di parngoluanna, marhitehite gogo sian Tondi Parbadia, jala huaso sian Jahowa marhitehite Jesus Kristus, marhuaso do hita mandok: “hot do dosana”. Ingkon ditekankan GOGO SIAN TONDI PARBADIA JALA HUASO SIAN JAHOWA MARHITEHITE JESUS KRISTUS.
Refleksi
Sahat tu tingki on, nang pe ganup taon halak Kristen mamestahon ari haheheon ni Kristus sian na mate, sai jotjot do hita songon angka sisean ni Kristus na parjolo i, andorang so dipatuduhon Jesus diriNa tu nasida. Nunga ganup taon manangihon barita haheheon ni Jesus Kristus manaluhon dosa dohot hamatean, alai jotjot do hita digohi biar manang tahuton. Godang ma gabe tubu parsahiton ni fisik nang partondion ala ni biar manang tahuton i. Jamita on pasahathon hata ni Jesus: “Dame ma di hamu!” Mardame rohanta, mardame tondinta, mardame parsaoranta mardame tu Debata. Di Pesta Paskah on, nunga dipalua hita sian hatahuton ala dosa, nang hamatean, jala hatahuton gabe parbarita na uli manang gabe sitindangi Kristus di ganup parngoluanta.
Di pesta paskah on, adong parsuruon ni Jesus tu hita ima gabe sitindangiNa di humaliangta. Molo gabe sitindangi do hita, ingot ma ndang boi tapangasahon hamoraon, hapistaran, nang hagogoon. Alai mangasahon pamillithion ni Kristus tu hita gabe siseanNa jala sitindangiNa. Di tongos Ibana do Tondi Parbadia margogoihon hita gabe sitindangiNa dohot na manuturi di na lao marbarita na uli dohot sitindangiNa.
Selamat Paskah! dan Selamat Gabe Sitindangi Kristus!
Unang hamu mabiar ai Ahu do donganmuna !
Jala Dame ma di hamu!
Tidak ada komentar:
Posting Komentar