BAHAN JAMITA
MINGGU PALMARUM
Minggu, 10 April 2022
Ev.: Psalmen 118: 19 – 29; Ep.: Mateus 21: 1 – 9;
S. Patik: 1 Petrus 4: 13
PINASUPASU MA NA RO MARHITEHITE GOAR NI JAHOWA!
(Pdt. Daniel Bonardo Pane, S.Th.)
Patujolo
Horas! Masuk ma hita di
Minggu Palmarum di minggu sadari on. Di Minggu Palmarum on marningot ma hita di
suraksurak ni angka jolma uju na ro Jesus mangebat tu Jerusalem. Torop angka
jolma na mansai las rohana jala marolopolop manomunomu Jesus Kristus, nang pe
di pangantusionnasida taringot Jesus ima sahalak na gabe Raja laho paluahon
halak Israel tarlumboi halak Jahudi sian panggomgomion ni bangso Rom. Boi do
idaonta olopolop ni natorop i di na manomunomu Jesus i marhite soara na mandok:
Hosanna! Pinanasupasu ma na ro marhite Goar ni Tuhan i, Raja ni Israel! (ida:
Johannes 12: 13 bdk: Mateus 21: 9, 15; Mark. 11: 9 – 10).
Di minggu palmarum sadari on, dibaritahon ma tu
hita taringot olopolop dohot las ni roha halak Israel manghalashon saluhut
angka pambahenan ni Jahowa tu bangso Israel. Las ni roha manghalashon haluaon
naung pinatupa ni Jahowa tu bangso i. Marsoara do angka halak Israel i marolopolop
mangendehon ende hasangapon dohot hagogoon ni Jahowa naung patar marhite
haluaon ni bangso i. Haluaon na songon dia do dipatupa Jahowa tu bangso Israel
i umbahen pola marsuraksurak jala marolopolop bangso i? boha do hadomuanna i tu
angka na masa i sisaonari? Boi dope hita marolopolop jala marsuraksurak songon
na masa di turpuk on? asa lam tu antus hita mangantusi turpuk jamita on, masuk
ma hita tu hatorangan ni turpuk.
Hatorangan Ni Turpuk
Masa habuangon ima masa na
mansai hansit dohot bernit na tinaon ni bangso Israel. Uju i ma masa hasesega
ni harajaon ni Israel. Bagas joro dohot tembok Jerusalem pe nunga sega
jala malengse (menjadi puing – puing batu). Dang adong be hataridaan ni
bangso i gabe sada bangso na tarpillit ni Jahowa. Tutu mansai marsak jala
marungkil situtu do bangso i di hamamasa i. Gabe i ma dalan ni bangso Babel
manginsahi halak Israel mandok: “didia do Debatam?” (Psalmen 42: 11).
Panginsahion i tubu hinorhon ni pangantusion na masa taringot parporangan ni
angka debata marhite parporangan angka harajaon. Molo talu do harajaon i
marlapatan talu ma debatana maralohon debata harajaon na monang i. Molo
pangantusion i do diboanhon tu harajaon/ bangso Israel, boi ma dohonon na talu
Jahowa, Debata ni Israel maralohon Marduk, debata ni Babel.
Molo marnida taringot
hasesega ni harajaon i, ra ndang adong be dalannna boi mulak bangso Israel i
gabe sada bangso.
Alai marhite panurirang Jesaya, Jahowa mandok tu halak Israel: “Ai ndada
pingkiranHu pingkiranHu pingkiranmuna i, jala ndada dalanmuna angka dalanHu
ninna Jahowa” (Jesaya 55: 8) na marlapatan ndang hombar pingkiran manang
pangantusion pingkiran ni jolma suhatsuhat pingkiran ni Jahowa, jala ndada
dalan pingkiran dohot pangantusion ni jolma dalan ni Jahowa laho patupahon
haluan tu bangso Israel. Dipatupa Jahowa haluaon bangso Israel sian Babel
marhite suruanNa ima raja Koresy (Cyrus), raja halak Persia. Talu ma harajaon
ni Babel maralohon harajaon ni Persia. Dung talu harajaon ni Babel i, dipaloas
raja Koresy (Cyrus) ma halak Israel na gabe tarbuang i mulak tu bona
pasogitnasida ima huta Israel. Ndang be gabe status na tartaban bangso i, alai
status na malua (status merdeka) nang pe gabe wilayah harajaon ni
Persia bangso Israel i. Nang pe naung malua bangso i sian status tartaban
jala sidung masa habuangon i, ndang apala singkop dope las ni roha ni halak
Israel naung mulak tu bona pasogitnasida. Adong dope na siparungkilonnasida ima
hajongjongan ni bagas joro. Dipaloas raja Koresy do halak Israel i laho
patuapahon ruhutruhut parugamoon ni halak Israel. dipilit ma si Esra laho
mangaturhon ruhutruhut parugamoon ni Israel, jala Nehemia gabe gubernur
wilayah Israel. Dipatupa nasida ma sangkap laho paulihon bagas joro naung
malengse i. Mansai ringkot situtu do hajongjongan ni bagas joro di sada bangso/
harajaon di partingkian Timur Dekat Kuno. Ndada holan hataridaan na
marugamo, alai hataridaan hajonjongan ni sada bangso (identias menjadi suatu
bangsa).
Dung sidung hajongjongan
ni bagas joro i, marolopolop ma bangso i jala dipatupa ma arakarakan
laho mamasuhi bagas joro i. Suraksurak, ende las ni roha dohot ende
parolopolopon ni halak Israel di arakarak i disurathon ma gabe sada
Psalmen, ima Psalmen 118 on. Lungun, sitaonon dohot parungkilon ni halak Israel
uju hamamasa habuangon ni Babel nunga gabe malum marhitehite hajongjongan ni
bagas joro. Hinsakhinsak na binahen ni harajaon Babel mandok: “didia do
Debatam” nunga so be marhitehite hajongjongan ni bagas joro na imbaru i. Jahowa
Debata mian do di tongatonga ni halak Israel jala mian di tongatonga bangso
Israel. Las roha bangso i di sude angka pambahenan ni Jahowa. Tarpatupa Jahowa
do las ni roha di bangso i di tongatonga kemustahilan ni halak Israel (ida
Psalmen 118: 1 -13)
Ayat 19 – 20: ungkap hamu
ma di ahu angka bahal ni hatigoran, asa hubongoti angka i laho mamuji Jahowa.
Ima sada ende laho mamasuhi bagas joro na imbaru i. On do bahal ni Jahowa,
bongotan ni angka partigor i sogot. Bahal na nidokna dison ima bagas joro na
imbaru. Inganan habongotan ni angka partigor ima halak na tongtong
manghalungunhon pambahenan ni Jahowa Debata, halak na tongtong satia marsomba
jala marhaposan tu Jahowa Debata, na tongtong mian dibagasan pangondianan ni Jahowa
Debata. Di bagas joro i ma halak Israel mangolophon sude pambahenan ni Jahowa
Debata, di bagas joro i ma halak Israel saparsaoran laho manangihon pangajarion
angka patik dohot hata ni Jahowa. Patik dohot hata ni Jahowa do palito dohot
tungkot di halak partigor (ida Psalmen 119). Tama ma nian mandok mauliate
bangso i di panangihonhon ni Jahowa tangiang dohot angka joujou nasida uju di
Babel, jala ima na gabe hatuaon i bangso i (ay. 21). Batu naung binolonghon ni
angka pande bagas, ima na jadi batu parsuhi (ay. 22). Ayat on martudutudu tu
halak hadirion ni bangso na digombarhon batu na ponsa jala gabe puingpuing
na kecil, dibolongkon ma i ala dianggap ndang marlapatan jala ndang
boi be pangkeon. Apa yang kecil di hadapan manusia dan dianggap tidak ada
arti, bisa jadi Allah memakainya untuk sesuatu yang lebih berarti untuk
pekerjaan yang sangat besar.
Ay. 23 ima
panghatindanghon halak Israel di saluhut angka pambahenan ni Jahowa na gok
halongangan. Pambahenan na gok halongangan ima sada pambahenan na mangatasi
saluhut suhatsuhat pangantusion dohot na di roha angka jolma. Ai dang hombar tu
suhatsuhat pangantusion ni jolma dipatupa Jahowa angka pambahenanNa. Diida
halak Israel do angka tanda halongangan na binahen ni Jahowa tu nasida uju mian
nasida di Babel (boi idaonta parbaritaon ni buku Daniel) sahat tu naung talu
harajaon ni Babel. Diida mata ni halak Israel do puingpuing ni bagas
joro dohot Jerusalem naung binolongkon i laos marhite i ma muse jongjong
haulion bagas joro na imbaru i. ai ndang adong na so tarpatupa Jahowa Debata.
Ari on do na jinadihon ni Jahowa, marolopolop ma jala marlas ni roha ma hita
disi. Iale Jahowa sai manumpak ma Ho! Iale Jahowa sai Ho ma mambahen manjadi!
(ay. 24 – 25). On ma na gabe tangiang halak Israel mangidohon saluhut panumpahion
ni Jahowa. Ai manghorhon las ni roha dohot hatuaon do sude panumpahion ni
Jahowa. Manghorhon olopolop jala dang mardongan hangaluton. Ndang marnaloja ganup
jolma naung taruli di panumpahion ni Jahowa, sai mandapot gogo na imbaru ganup
ari jala ganup tingki. Manjadi do angka ulaonna, manghorhon haulion tu saluhut
humaliangna.
Pinasupasu ma na ro
marhitehite goar ni Jahowa, hupasupasu hami ma hamu angka na sian bagas ni
Jahowa (ay. 26). Halak na ro marhitehite goar ni Jahowa ima halak na mamboan
Goar ni Jahowa. Manang didia Goar ni Jahowa dibaritahon, disi ma hajongjongan
huaso dohot haluaon na sian Jahowa Debata. Goar ni Jahowa, goar na badia sian
nasa goar ni angka debata na adong di saluhut inganan dohot tingki. Marhite
Goar ni Jahowa do huaso dohot hamuliaonNa na mangatasi saluhut huaso dohot
hamulioan angka pardebataon na disomba angka harajaon di sude inganan dohot
tingki. Ehyeh Esyer Ehyeh (Aku adalah Aku) pabotohon hadirion ni
Jahowa sian hatongtongon, na patupahon panompaon na gok halongangan i, huasoNa
na so hasuhatan jala ndang hadodoan bagas ni pambahenanNa. Halak na ro
marhitehite Goar ni Jahowa ima na mamboan jala patupahon hatuaon, hadameon, pos
ni roha. Ndang adong be ganggu ni roha di angka na manjanghon Goar ni Jahowa.
Sai mamasumasu ma saluhut jolma na manjanghon Goar ni Jahowa di rohana. Ay. 27
– 28 panghatindanghon dohot parbue ni panghatindanginon ni halak Israel na
dibagasna Goar ni Jahowa dibaritahon. Las ni roha i marudut tu pasahathon
pelean. Pelean na dipasahat ima pelean hamauliateon, pelean na mansai denggan
na dipasahat sian roha na ias. Ndang ala ni godang dohot nilai ni pelean i na
mansai ringkot, alai boha do roha i pasahathon pelean i songon sahalak naung
marnida jala manghilala saluhut angka pambahenan ni Jahowa na gok hamuliaon i.
Mandok mauliate ma hamu tu Jahowa ai pardengganbasa do Ibana, ai ro di
salelenglelengna do asi ni rohaNa.
Hahonaan ni Turpuk
Songon hata olopolop ni
halak Israel do olopolop ni halak Jahudi mangolophon haroro ni Jesus uju laho
mamasuhi huta Jeruselam Ibana. Boha do di tingki sisonari ngolu ni
haKristenonta diparadophon dohot ragam na masa. Adong ma na masa parporangan,
gareja na disorbu, gareja na lupa hadirionna (sai na adong do gareja dipangke
holan hinaringkot ni sasahalak na sangombas i) torop do nuaeng parhalado dohot
halak Kristen gabe batu partuktukhan di pangalahona be hinorhon ni
ketidakpuasan di partingkian sinuaeng. Nunga torop be Gareja dipangke ajang
kampanye, torop masa hagaoron dohot haributon jumpang di gareja. Nunga maol be
jumpang roha dame. Laos ro muse ma angka na antipati tu Jesus Kristus marhite
halak Kristen. Sude na masa i mambahen lam gale parngoluan. Deba mandok: Tudia
ma tondongonku asa unang huadopi na masa saluhutna i? tumagon ma ndang marugamo
alai olo mengurupi sian na maruagamo alai sai manusai, na so manatap jala na so
mangula Jahowa marnida saluhutna i umbahen masa saluhutna i? tubu ma ganggu ni
roha, pandelean jala mandate ma daging dohot tondi mamingkiri saluhutna i.
Nang pe masa saluhutna i,
unang ma gabe sumurut jala gabe so ende dohot soara olopolopta mangalophon
saluhut angka pambahenan ni Jahowa. Autsugari marbilangbilang hita di saluhut
angka pambahenan dohot panumpahion ni Jahowa di ngolunta, ra ndang tarhabilangan
saluhutna ala ni godangna, ndang tardodo ala ni bagasna. Tongon tahe denggan
basa ni Jahowa manggohi ngolunta di ragam angka hamaolon, dohot sitaonon na
masa di ngolu on. ido ringkot hita marsoarahon “hosanna” (ida Epistel Mateus
21: 1 – 9). Hosanna (sian hata Heber ‘HOSYI’AH NA‘ sian 2 pandokan YASHA na
marlapatan “palua” , NA na marlapatan “tangiang/ pangidoan”: Hosanna: Tangiang
na disurakhon na marisihon asa paluahonna; “Palua ma ahu”. Hata on dipasahat do
sahalak Raja manang tu na boi paluahonnasida. Dipasahat nasida ma hata i tu
Jesus, ala sian marga manang pinompar ni si Daud do Ibana. “Pinasupasu ma na ro
marhitehite goar ni TUHAN (YHWH; JAHOWA)” (ida. Psalmen 118: 25 – 26), sada
pandohan Pinasupasu ma na ro marhitehite Goar ni Na- manongtong i, Goar ni na
sun hinatimbul, jala tongtong di bagasan hata i adong pangidoan haluaon.
Sadari on torop do halak mangangguhi: “palua ma au
ale TUHAN”. Palua ma au ale TUHAN sian sitaonon na dokdok di tano on; palua ma
au ale TUHAN sian na hansit on; palua ma au TUHAN sian hapogoson, palua ma au
ale TUHAN sian rura ni linggoman ni hamatean on; dohot ragam na asing dope.
Nang pe adong do muse na jolma natorop na gale haporseaonna jala gabe
manadinghon haporseaonna mangadopi hamaolon manang na hansit di portibi on;
jala adong do na so mangido haluaon na sian TUHAN i jala dirina manang portibi
on ma dipangasahon (pangasaahon na olo salpu). Batu na dibolongkon angka pande
bagas, ima Jesus Kristus naung ditulak angka malim angka na mansogohon pangajarion
dohot angka na manulak barita hangoluan na binaritahon ni Jesus Kristus. Ibana
ma batu parsuhi hajongjongan sandok huria. Ibana ma na ro marhitehite Goar ni
Jahowa.
Di bagasan Jesus Kristus, Jahowa patupahon angka
halongangan na mansa bolon. Ndada holan halongangan na marhadomuan tu pamatang,
alai manghorhon na marhadomuan tu partodion. Marhite Jesus Kristus do Goar ni
Jahowa patupahon haluaon sian huaso dosa dohot patupahon hadengganon dohot
hadameon, hatuaon, nang songon i pos ni roha. Antong, unang be sumurut
haringgasonta mangolophon saluhut denggan basa dohot pambahenan ni Jahowa na
gok hasatiaon i. pasahat ma pelean hamauliateon na mansai denggan sian nasa
roha na denggan dohot las ni roha. Unang ma sian neang ni roha. Pasahat ma
pelean songon tanda las ni rohanta manghalashon saluhut panumpahion ni Jahowa
di ngolunta. Iale Jahowa sai manumpak ma Ho! Amen.
Usulan
ni Ende:
1.
581: 1 - 3
2.
425: 1 – 2
3.
452: 1, 3
4.
240: 1, 3
5.
28: 1....
6.
467: 2 – 3
7.
754: 1..........
Tidak ada komentar:
Posting Komentar