BAHAN JAMITA EPISTEL
MINGGU JUBILATE
Minggu, 08 Mei 2022
1 Rajaraja 17: 17 – 24
HUASO NI JAHOWA NA PANGOLUHON
Pdt. Daniel Bonardo Pane, S.Th.
Patujolo
Horas! Anggiat ma di bagasan hahipason
dohot pangaramotion ni Jahowa Debata hita di na manjaha bahan jamita on. Amen.
Molo didok taon Jobel, ima sada partingkian na mansa las roha di halak Israel,
ala marningot do hita di sude pambahenan ni Jahowa tu bangso i. Pambahenan ni
Jahowa ima hangoluan dohot haluaon di bangso manang na di halak na niasianNa.
Diulahon halak Israel do taon Jobel 50 taohn sahali (sekali dalam 50 taon),
agak andul manang marasing sian perayaan angka huria na patupahon pesta
Jubeleium sahali sataon. Molo didok jubeleium diulahon ma sahali ganup
50 taon, jala disi dang adong be boban manang sipingkiron angka ruas, ndang
adong be disi mangido panumpahion. Molo marpesta jubeleium huria ingkon do
manghatindanghon asi ni roha ni Debata dohot pamabahenan ni Jahowa marhite:
patupahon panumpahion manang pangurupion tu angka na pogos, tu angka na
hurangan, mandulo manang manangianghon angka na marsahit, mandulo jala
manangianghon na tarhurung asa marhambaon (molo tung ala ni hajahaton ibana
tarhurung), dohot angka ulaon parasinirohaon na asing. Molo marjubeleium
huria i ndang adong be parmusumusuhon manang parbolatbolaton, ingkon patupahon
hadameon do saluhutna, parhaladona nang songon i ruasna.
Jamita Epistel di minggu
Jubilate ima taringot huaso ni Jahowa Debata marhite si Elia. Marhite huaso ni
Jahowa i, patupahon halongangan tu sada na mabalu di Sarpat. Huaso na songon
dia do na pinatupa ni Jahowa marhite si Elia jala boha do panghorhon ni huaso i
di ngolu ni ina na mabalu i dohot di hita sinuaeng? Tangkas ma itapaihutihut
hatorangan songon i hahonaan ni turpuk jamita on.
Hatorangan ni Turpuk
Ndang adong na tontu taringot
ise do panurat buku 1 Rajaraja on. Molo dijaha buku 1 Rajaraja on ima taringot
harajaon ni bangso Israel andorang so marujung ngolu raja Daud sahat tu angka
na masa tu harajaon ni Israel tingki si Salomo jala na masa dung tarbagi harajaon
Israel ima Israel Utara (Efraim) dohot Israel Dangsina (selatan)
(Yehuda). Taon andorang si Salomo gabe raja Israel singkat ni amana si Daud
sahat taon na tarbagi harajaon i dohot ragam angka na masa dung tarbagi harajao
mansai dao, i do umbahen ndang adong na boi mambahen pandapot na tontu taringot
ise do panurat buku 1 rajaraja on.
Turpuk jamita epistel on
ima panghobasion ni panurirang Elia tu sada parompuan na mabalu di Sarfat. Panurirang
Elia ima sada panurirang na dijou jala dipabangkit Jahowa gabe sada panurirang
di harajaon Israel Utara (Efraim) uju panggomion si Ahab, Ahazia dohot Yoram di
abad IX andorang so tubu Kristus. Dipabangkit Jahowa do angka panurirang
tingki pamarentaon (monarkhi) harajaon Israel. Ulaon ni panurirang on
ima laho pabotohon sude angka hata ni Jahowa tu raja dohot tu sandok pangisi ni
harajaon Israel saluhutna (utara dohot dangsina), pabotohon panurirangon
taringot haluaon, dohot panguhuman na naeng sipamasaon Jahowa tu harajaon
Israel, songon i nang laho pasingothon raja molo diulahon raja i angka na jat
manang ulaon na maralo tu lomo ni roha ni Jahowa (patudos ma panurirang Nathan
na pasingothon raja Daud uju na diparjolma ibana si Betsyeba na so sian
dalanna). Songon i nang si Elia, halak Tisbi, saian halak paisolat di Gilead
sada panurirang mansai barani pasingothon raja Ahab do jolmana si Isebel asa
unang madabu tu parsombaon tu debata ni si Isebel, ima Ba’al songon i nang
parsombaon tu Asyera.
Ragam do tanda halongangan
na pinatupa ni Jahowa, Debata marhite si Elia na patuduhon huaso dohot
hamuliaon ni Jahowa na mangatasi sude angka pardebataon sileban di sude inganan
dohot di sude tingki songon i nang Ba’al dohot Asyera, songon i nang di turpuk
jamita on. Huta Sarpat ima huta na metmet di Pinisia – Tirus, 13 km tungkan
dangsina luat Sidon. Disuriranghon si Elia do taringot haroro ni logo ni ari
ranggapuri masa tu sude luat na ginomgoman ni si Ahab (1 Rajaraja 17: 1 – 6),
raja ni Efraim i. Nunga tung angka ulaon na jat diulahon si Ahab uju di
panggomionna tarlumbi na olo ibana manangihon hata ni si Isebel, jolma na i na
mambahen so uhum tu halak na ginomgomanna. Boi ma dohonon sada uhum do na ro
sian Jahowa, Debata na masa logo ni ari ranggapuri i. Tontu masa ma haraparon, angka
parbue tano pe nunga koring jala mate, mual pe nunga marsik, maol ma jumpang
sipanganon na naeng dipangan. Sahat ma na masa i tu Sarpat. Di Sarpat adong ma
sada na mabalu na so pola dipabotohon ise goarna. Sahalak na mabalu na mansai
pogos jala na so adong be na laho sipanganonna be dungkon dipangan sagusagu na
tading dope. Molo dung dipangan sagusagu i, suda ma sagusagu i, laos mate ma
ibana rap dohot anak sasadana i (ida 1 Rajaraja 17: 12). Nang pe masa paruhuman
sian Jahowa tu luat i, alai ndang sundat IBANA patuduhon huaso dohot
hamuliaonNa di na manarihon sipanganon tu na mangulahon hataNa, songon ina na
mabalu on. Diulahon na mabalu i ma sude angka na dihatahon si Elia asa
diulahon, jala diida ibana ma tanda halongangan na binahen ni Jahowa marhite si
Elia. Itak manang sagusagu na otik i, ndang marnasuda, jala miak na di bagasan
guriguri i ndang jadi marsik, paima jumpang ari haroro ni udan tongoson ni
Jahowa tu sisik ni tano on (1 Rajaraja 17: 14, 16).
Dungkon masa sasudena i (1 Rajaraja 17: 7 – 16),
marsahit ma anak ni parompuan na mabalu i, jala pasang situtu sahitna laos tos
hosana (ay. 17). Tontu tung mansai lungun jala marsak situtu roha ni parompuan
i di na masa i, jala diarsakhi ibana do haroro ni si Elia na dirimpu ibana ala
ni haroro ni si Elia di na laho patupahon uhum ni dosana gabe marujung ngolu
anak sasasda i. Tarida do i sian pandohan andungna: “aha parsaoranhu tu ho, ale
halak ni Debata? Rupa do ho tu ahu laho pasingohothon dosangku dohot mamunu
anakhi?.” Molo sian psikologi boi do dang diantusi halak mandok
sidohononna ala ni lungun dohot arsak ni rohana, hata lungun jala hata arsak do
dihatahonna. Songon i do ma na masa tu parompuan na mabalu di huta sarpat i. I
dope diida ibana halongangan na pinatupa Jahowa marhite si Elia, alai dungkon
diadopi ibana anakhonna naung monding, pintor lupa do ibana halongangan i.
Di ay. 19, didok si Elia ma mandok tu parompuan i:
“boan tuson anakmi” laos di boan ma tu bilut parginjang laos dipapeak ma tu
podomanna. Di ay. 20, martangiang ma si Elia tu Jahowa: “o ale Jahowa,
Debatangku! Tung dohot ma parompuan na mabalu on sorangnhi marhinamago
bahenonMu laho mamunu anakna?” Memang sekilas molo dijaha tangiang ni si
Elia on seolah – olah do dohot si Elia ”menyalahkan”
Jahowa. Hata: “O ale Jahowa, Debatangku!” Na patuduhon parsoaran ni panuriang i
dohot Jahowa, ima Debata na mamillit ibana gabe panuriang; adong
panghatindanghon na tutu do Jahowa Debatana, jala na so jadi holang parsaoranna
tu Jahowa; adong panghatindanghon taringot huaso dohot hamuliaon ni Jahowa na
mangatasi saluhut, jala na ampuna hosa hangoluan. Jahowa do Debata na manompa
jolma i, na mangulushon hosa hangoluan jolma i gabe martondi mangolu jolma i
(patf. 1 Musa 2: 7). Hata “Tung dohot ma parompuan na mabalu on sorangnhi
marhinamago bahenonMu laho mamunu anakna?” ima soara ni panurirang na
parsidohot manghilalahon songon panghilalaan ina na mabalu i, jala dison ma si
Elia mangidohon asi ni roha ni Jahowa tu parompuan i. Sai marpanatap ma nian
Jahowa mida parompuan i na mangoloi jala mangulahon sude angka na nihatahon ni
si Elia (patudos tu Psalmen 4: 4).
Dung sidung si Elia martangiang, dipabustang ma
ibana tolu hali di ginjang ni dakdanak i, huhut joujou tu Jahowa: ale Jahowa
Debatangku, ua paulak ma hosa ni dakdanak on tu bagasan ibana (ay. 21). Agak
maol do tarjalo roha metode na dibahen ni si Elia di na laho mangido asi
ni roha ni Jahowa marhite paulakhon hosa i tu bagasan dakdanak i. Ragam do
dalan na binahen ni Jahowa di na laho patupahon dohot patudauhon huaso dohot
gogoNa. Saguru tu IBANA do saluhut hosa hangoluan, ai sian IBANA do hosa
hangoluan, na sian IBANA mulak ma tu IBANA. Jahowa Debata do nampunasa hosa
hangoluan ni ganup angka jolma. Tutu ma na masa i, ditangihon Jahowa do soara
ni si Elia, jala gabe mulak hosa ni dakdanak i tu ibana laos mangolu ma
dakdanak i (ay. 22). Ai na mangolu pe dakdanak i ndada ala gogo dohot huaso ni
si Elia, parhitean do ianggo si Elia. Huaso dohot gogo ni Jahowa do na
patupahon haheheon jala saguru tu Jahowa Debata do ganup hosa hangoluan on, ala
IBANA do parmulaan ni saluhut angka mulamula, jala IBANA do hatongtongon
saleleng ni lelengna.
Dung i, diboan ma dakdanak i tu natorasna (ay.
23). Masa ma halongangan muse di bagas ni parompuan na mabalu di huta sarpat i.
Dung diida ibana halongangan marhite sagusagu na so olo suda dohot miak na so
ra marsik, masa ma halongangan bolon, halongangan na so boi diulahon angka
debata sileban songon na disomba si Isebel (Ba’al dohot Asyerah). Ndang
hapalang las ni roha parompuan i, dipapujipuji ibana taringot huaso dohot gogo
ni Jahowa Debata na masa tu dirina dohot di ngolu ni ianakhonna marhite haroro
ni si Elia (ay. 24). Haroro ni si Elia, ndada na laho patuduhon hadirionNa,
alai pabotohon huaso dohot gogo ni Jahowa na mangatasi saluhut angka huaso na
adong di ganup tingki dohot di sude inganan.
Hahonaan ni Turpuk
Jo hamatean, dida soropmi? Jo hamatean
didia hamonanganmi (1Kor. 15: 55) on ma sada las ni roha halak Kristen naung
dipamonang Jesus Kristus sian jorbut dohot sorop ni hamatean i marhite
haheheonNa. Haheheon ni Jesus Kristus, ima haheheon jala hangoluan saleleng ni
lelengna do diboan jala ditumpalhon tu angka ganup jolma na satia tu Jahowa
Debata di bagasan Jesus Kristus. Las ni rohanta di sude angka pambahenan ni
Jahowa mamboan haluaon dohot hangoluan naung patar jala singkop di bagasan hadirion
ni Jesus Kristus, Tuhanta i.
Adong do 2 mutiha na
mansai arga siputihonta marhite turpuk
jamita on
1. Sian si Elia, diajarhon do hita taringot
hardeonta gabe parhitean ni Jahowa papatarhon taringot huaso dohot gogo ni
Jahowa di parngoluonta be. Ndang pola ingkon songon na binahen ni si Elia gabe
parhitean ni Jahowa, Debatanta. Lehononta ma dirinta dohot ngolunta gabe
sihatindanghon huaso dohot gogo ni Jahowa. Ragam do dalanna di na mangulahon i,
boi do i marhite hatanta na gok hasintongan dohot hatigoran, dang jumpang
parhata manggang, parhata gabus, parhata pamolamola, parhata metmet jala
parhata na gok tahitahi na jat; boi do marhite pangulahon na manghangoluhon
hata ni Jahowa Debata di bagasan Jesus Krsitus, mangurupi angka na gale dohot
na di bagasan hasusaan, mangharingkothon hadameon, hatigoran dohot sintong ni
uhum dohot angka ulaon na nihalomohon ni Jahowa; marhite pingkiran ima na
marsangkap haulion dohot hatigoran ma disangkapi, ahama na boi hademakhon dohot
togu ni parsaoran na marhuria dohot na sahuta i ma nian dipingkiranna, sai
angka tahitahi na denggan ma manggohi pingkiranna. Alai ingot ma hita, ndang
boi tarulaonta saluhutna i molo itapangasahon do gogonta, hamaloonta dohot sude
angka siadonganta. Holan Jahowa Debatanta di bagasan Jesus Kristus do na boi
patauhon hita jala mampargogoihon hita mangulahon saluhutna i. Marsinggang jala
martangiang ma mangido gogo sian JAHOWA Debatanta, Pargogo na so hatudosan i.
2. Sian Parompuan na mabalu. Di ragam angka
sitaonon na masa, sipata sai tubu do partontangan taringot haporseaonta tu
Jahowa Debata maradaphon angka sitaonon na masa. Boha do tahe tutu, “ai uhum ni
Debata do na masa tu ahu, umbahen pola hupanghilalahon songon on? Hansit na i,
jala nunga sibaranhu hape ingkon hutaon sisongon on” didok na deba. Nuaeng
marhite turpuk jamita on dipaingot do hita taringot panarihonon ni Jahowa
Debata tu angka haholongan jala na niasianna. Sai disarihon, jala didongani
Jahowa do hita di sitaonon saluhutna i, asa tung marnida hita habalgaon dohot
hatimbulon huaso dohot gogo ni Jahowa Debata na pamonanghon hita di sitaonon i.
Masa ma parolopolopon dohot lasniroha di ngolunta. Ngolu na marhaposan tu
Jahowa Debata jala marbenget ni roha ndada marsuru hita asa holan na hundul
manang holan na peak paimahon angka tanda halongangan i masa di jolonta. Ngolu
na marsitutu, jala hobas mangulahon angka ulaonna di bagasan panghirimon na
togu, i do na ingkon siulahononta songon halak na niasian ni Jahowa Debatanta.
Amen. Pasupasu hataMi
Digurithon: Pdt. Daniel Bonardo Pane, S.Th
(Pandita ni HKI na marsingkola lanjut)
Tidak ada komentar:
Posting Komentar