BAHAN JAMITA EPISTEL MINGGU XII DUNG TRINITATIS, 27 AGUSTUS 2023; MARUKUS 8: 27 - 30

 BAHAN JAMITA EPISTEL
MINGGU XII DUNG TRINITATIS
Minggu, 27 AGUSTUS 2023
MARKUS 8: 27 – 30
 

PANGHATINDANGHONON NA TUTU DO JESUS I MESIAS MANANG SIPALUA!

Pdt. Daniel Bonardo Pane, M.Th.

Patujolo

            Horas! parhorasan Trinitatis ma sian ahu panurat tu hamu saluhutna. Autsugari ro sungkunsungku tu hita, ise do Jesus di ngolum? Jala boha do panandaionmu taringot Jesus na tahaporseai? Goar ni Jesus ndang na gabe hata na imbaru di parngoluan on. torop do jolma mananda Jesus Kristus jala manghaporseai Jesus Kristus hombar tu haringkotan ni ngoluna, holan andul sian haringkot ni ngoluna ditadinghon ma Jesus Kristus i; adong do na mananda Jesus Kristus jala dihatindanghon do siihuthon Jesus Kristus ibana alai anggo roha dohot pingkirianna ndada tu Jesus Kristus. Jesus Kristus na ditanda dohot na dihatindanghonna holan sebatas pangantusion ni ugamo. Nang pe adong do pigapiga jolma na margoar Jesus, isarana Jesus Navas, Gabriel Jesus, Juan Jesus, Jesus Manuel Corona dohot lan na asing, alai ndang na gabe Mesias manang Sipalua nasida, songon Jesus Kristus, Anak ni Debata; Hata ni Jahowa naung gabe daging jala saor tu jolma.

            Anggo turpuk jamita on ima sungkunsungkun ni Jesus ima panangkasionNas taringot ise do Ibana sian panandaion ni torop jolma, jala ise do Ibana hombar tu panandaion ni angka sisean. Sungkunsungkun on patubuhon panghatindangion taringot hadirion ni Jesus Kristus, ima Mesias manang Kristus naung dibagabagahon jala naung disuriranghon angka panurirang di Padan Na Robi. Boha do panandaion ni torop jolma taringot Jesus Kristus, jala boha do panandaion ni angka Sisean taringot Jesus Kristus? asa lam tu antusna panandaionta taringot Jesus Kristus, masuk ma hita tu hatorangan ni turpuk.

 

Hatorangan ni Turpuk

            Panurat buku Markus on ima si Markus, sahalak Jahudi na mian di Rom rap dohot si Petrus. Molo goar hajahudionna ima si Johannes jala goar ni haromawionna ima Markus. Somal do di hatiha i sasahalak margoar dua habangsaon isarana Paulus: molo di Jahudi digoari Saulus jala di Romawi digoari Paulus; Dorkas: molo di Jahudi ima Tabita alai molo di Gorik didok Dorkas (Ulaon ni angka apostel 9: 36). Parasingan ni goar on boi do patuduhon ibana sahalak Jahudi alai mian di luar Jerusalem; manang sahalak Jahudi na mangula di pamarentaon na manggomgom uju i. Sian pangantusion on boi ma antusan digoari pe si Markus ima surat na dipasahat tu halak Jahudi na mian di Rom manang di luar huta Jerusalem dohot tu halak na so Jahudi asa taruli nasida di panandaion na tangkas jala na sintong taringot Jesus na dibaritahon angka apostel.

            Evangelium Markus on disurathon hirahira taon 55 – 65 Masehi, ima partingkian na mansai dokdok jala na gok sitaonon diadopi angka apostel dohot angka na porsea. Sitaonon na diadopan marhaororan do sian si Nero na mambahen na so uhum tu sude halak Kristen na mian di gomgomanna songon i pasahathon hata na so tutu maradophon halak Kristen asa tung marutang hosa halak Kristen. Ido umbahen dipaluar ma patik asa dilele, ditangkup, dihurung jala ingkon dibahen hansitan saluhut halak Kristen songon i angka apostel. Alai saluhut na masa i ndang na boi pasohon manang mangorui hiras ni roha angka apostel mambaritahon Jesus Kristus, Anak ni Debata Jahowa ima saluhut parngoluan ni Jesus Krsitus uju na mian dope Jesus i di portibi on, nang pe sai adong do deba halak Kristen mananggalhon haporseaona asa malua ibana sian sitaonon dohot parungkilon na pinamasa si Nero tu nasida. Di sitaonon na mansai hansit i lam marhiras ni roha ma angka apostel laho mambaritahon barita hamuabon ni roha; barita haluaon ima barita ni Jesus Kristus asa lam tu toropna angka na porsea jala manghatindanghon tutu do Jesus Kristus ima Tuhan (bdk. Pilippi 2: 11) sian Jerusalem sahat tu luat tano on (ida. Mat. 28: 19; Luk. 24: 47; Ul. Apostel 1: 8).

            Sahat ma barita na uli i tu huta Rom (ibukota kerajaan Romawi) na dibaritahon si Simon Petrus. Di tingki pambaritahonon i ma disurathon si Markus angka na binarithon si Petrus i dalan laho mangapuli, mampargogoihon jala patoguhon haporseaon ni halak Kristen di na mamolus ragam na masa di hasiangon on. Deba sian barita na dibaritahon jala na diajarhon si Petrus tu si Markus ima taringot panandaion na tangkas taringot hadirion ni Jesus Kristus i sandiri. Laos i ma jamita di minggunta sadari on.

            Di tonga pardalanan ni Jesus rap dohot angka sisean i ima mardonokhon Kaesarea Pillipi, ro do sungksunsungkun Jesus tu angka siseanNa: ise do Ahu didok halak? (ay. 27). Sungkunsungkun on ndada na laho manguji angka sisean taringot ise do hadirion ni Jesus di angka jolma, ala nunga tung godang angka tanda halonganan na binahen ni Jesus songon na niida angka sisean; tung godang manangihon pangajarion ni Jesus taringot harajaon ni Debata, taringot ngolu na marhadaulaton songon i habaranion ni Jesus pasingothon angka malim asa saluhut angka malim mangulahon ulaon hamalimon i di bagasan hasintongan dohot hatigoran ni Jahowa Debata. Laos dialusi angka sisean i ma Ibana: adong mandok: si Johannes pandidi, na deba mandok si Elia, manang sahalak sian angka panurirang i do (ay. 28). sude pandapot na gabe alus ni angka sisean ima panandaion di pardagingon, panandaion na hombar pingkiran dohot na nihirim nasida ima taringot haluaonnasida sian panggomgomion harajaon ni Rom.

            Marhite alus ni sisean di ay. 29 on torop do jolma na mananda Jesus songon panurirang bolon songon na panurirang naung adong di padan na robi isarana: Elia. Sahalak panurirang na boi papitahon ngolu hadaulaton ni halak Israel maradophon parsombaon tu Ba’al jala panurirang naung disuriranghon si Maleakhi (ida Mal. 3: 23). Sahalak panurirang na barani pasingothon si Ahab, raja Israel (Samaria) ala ni pengaruh Isebel, halak Sidon manang Penesia songon i dohot parsombaon tu Ba’al, debata ni Sidon manang Penesia, songon i nang angka tanda halonganan na hea masa dipatupa Jahowa marhite si Elia isarana: taringot sagusagu dohot miak ni sahalak ina na mabalu di Sarpat dohot na pangoluhon anak sasadasana (1 Raja. 17). Manang songon si Johannes pandidi na barani pasingothon si Herodes (Luk. 3: 19) dohot mambaritahon barita hamubaon ni roha tu halak Jahudi di sunge Jordan. Panandaion dohot panghirimon sisongon i do panandaion dohot panghirimon torop halak tu Jesus Kristus. Elia dohot Johannes ima sitotas dalan (pembuka jalan, perintis) dalan tu Mesias manang Sipalua songon naung dipasuriranghon angka panurirang di padan na robi, ndang sahat dope panandaion nasida na tutu do Jesus i Mesias manang Sipalua, ima hagogok ni panurirangon angka panurirang manang hataridaan songon na dibaritahon ni si Johannes (ida Mark. 1: 7 – 8).

            Udutna, di ay. 29 diulakhon Jesus manungkun paduahaliion tu siseanna na mandok: “Ia hamu, ise ma Ahu didok hamu?” sungkunsungkun paduahon on marasing do sian sungkunsungkun na parjolo. Disungkunsungkun paduahonon ima panandaion na tangkas angka sisean taringot Jesus, Gurunasida. Jala dialusi si Petrus ma mandok: “Kristus (hata Heber: Mesias) i do Ho!” (patudos Mat. 16: 16; Luk. 9: 20). Alus ni si Petrus on ima alus na tegas jala dang adong ganggu manang alus na asal ima alus ni si Petrus i. Hata Kristus di pangantusion ni halak Jahudi ima sahalak na nimiakhan marhite miak na hushus jala sahalak na istimewa. Keisimewaan ni mesias manang Kristus di halak Jahudi ima taringot ulaonna dohot parsuruon na hushus. Somal do di halak Jahudi angka malim mamiakhi sahalak na ditodo, dipillit laos pabotohon ibana ma mesias. Mesias di pangantusion ni Jahudi ima sahalak na gabe raja manang malim jala pangusean miak na hushus di simanjujung sasahalak ima hataridaan hagogok ni Tondi ni Jahowa di ibana. Ndada miak i mambahen sasahalak gabe istimewa alai Tondi ni Jahowa na niusehon tu ibana. Ala ni i, molo naung digohi Tondi ni Jahowa, tontu saluhut parngoluonna dohot parulaonna ima mangulahon saluhut ulaon na gabe halomoan i Debata.

                Marasing do hamesiason ni Jesus sian pangantusion hamesiason na niantusi halak Jahudi. Ndada marhite jolma Jesus dipapatarhon gabe mesias, ndada halak na mamillit manang manodo dohot mangusehon miak tu simanjujung ni Jesus, jala ndada jolma na manotophon (melantik atau mengangkat) Jesus gabe mesias. Alai Jahowa Debata, Ama ni Jesus Krsitus. Ndada aek na nididihon si Johannes pandidi gabe pengesahan hamesiason ni Jesus jala papatarhon hagogok ni Tondi Jahowa di bagasan Jesus Kristus, alai Jahowa Debata, Ama ni Jesus Kristus i do, ndada sian hajolmaon ni si Johannes maningtinghon na tutu do Jesus Anak ni Debata alai Jahowa Debata i sandiri do (Luk. 3: 22; Mark. 1: 11). Tutu do Jesus ima Kristus manang Mesias, alai ndada songon pangantusion ni halak Jahudi hamesiason ni Jesus, ima na gabe raja jala sipalua halak Jahudi sian panggomgomion harajaon ni Rom jala paluahon halak Israel sian penjajahan ni harajaon ni Rom. Ndada laho manggohi na piningkiran ni halak Jahudi hamesiason ni Jesus, lobi sian i tahe ima paluahon saluhut jolma sian parhatobanon dohot penjajahan dosa dohot hamatean na jorbut i; ndada laho pajongjonghon harajaon songon harajaon na adong di portibi on anggo hamesiason ni Jesus, alai pajongjonghon harajaon ni Jahowa Debata manaluhon saluhut harajaon na adong di hasiangan on; ndada papatarhon raja songon hasomalan Jahudi na singkop di alat parporanganna, alai papatarhon na tutu do Jesus, Raja ni saluhut raja, jala Tuhan di saluhut angka tuhan, na manggomgom sian na manongtong sahat ro di na manongtong. Jesus Kristus ima hagogok ni na nihatahon ni si Johannes, na gabe Panggomgom jala Panguhum na sintong (Mark. 1: 7 – 8).

                Dipopai Jesus do angka sisean asa unang pintor dipaboaboa tu torop jolma. Ndang dapot dope tingkina tarjalo jolma i Jesus gabe mesias manang Kristus hombar tu sangkap haluaon na disangkapi Jahowa Debata. Molo pe tarbarita Jesus na tutu Mesias manang Kristus pangantusion dohot panandaion na hombar tu pardagingon do. tarlumobi na ingkon manaon sitaonon na porsuk, pola mate tarsilang alai hehe do di ari patoluhon.

 

Hahonaan ni Turpuk

                Di minggu XII dung Trinitatis on, boha do panandaion dohot panghatindangionta taringot Jesus, Anak ni Debata? Autsugari disungkun: “tutu do hita mananda Jesus i?” Adong na mandok, hutanda hami do! ai molo so hutanda hami boha do hami manghatahon taringot Ibana? Alai molo diuduti muse sungkunsungkun, molo na ditanda do Jesus i, boha do panandaionta taringot Ibana? Torop do jolma mananda taringot Jesus songon:

1.       Pangobati/ dokter: halak na marsahit do ro tu dokter, ima gombaran ni jolma na mangalului, joujou, olo ro tu Jesus manang pasahathon dirina tu Jesus holan di tingki haringkotna. Molo masa parsahiton, sitaonon, parungkilon manang ragam panaritaan disi do ibana naeng ro tu Jesus. Laos marpadan: O Jesus, asi rohaM, pamalum ma ahu, urupi ahu, palua ma ahu. molo malum jala malua do au sian sahithon, molo malua au sian sitaonon dohot parungkilon on lam jonok ma ahu tu Ho, ringgas ma ahu mandohoti parmingguon manang partangiangan. Alai molo lam posi do na niaena i dilului do dalan na asing na boi paluahon ibana sian i sude. Molo malua sitaonon, parsahitonna disi ma ibana ndang ro be tu Jesus jala dang diingot be padanna i, dung hipas jala malua sian sitaonon dohot parungkilon laho do tu mall, tu pantai, liburan, tu lapo, huria i pe dang diingot songon i nang partangiangan na dipatupa.

2.       Tokoh manang sahalak na terkenal: ima halak na holan mananda taringot ni Jesus songon panandaionna tu sahalak tokoh manang halak na ditanda torop jolma. Isarana Ir. H. Joko Widodo, molo didok: ditanda hamu do ibana? Pintor ro do alus: hutanda do ibana. Walikota Solo, Gubernur DKI, jala Presiden na papituhon di Indonesia on. Toho do jala sintong do alus i. Panandaionta taringot Jesus: Tubu sian si Maria na gabegabean sian Tondi Parbadia; Mesias; na boi pangoluhon naung mate; na mate di hau pinarsilang; na mulak mangolu di ari patoluhon; manaek tu surgo...dna. Alai holan parbinotoan do i panandaionna ala na niajarhon angka pangajari; jamita na dibege; ninna tu ninna.... dna. Tung so adong sihol rohana laho rap marsaor dohot Jesus Kristus marhite parmingguon, partangiangan, manangihon hataNa, jala na pasahathon dirina hibul tu Jesus Kristus.

3.       Sahalak ahli ekonomi manang multi tasking person: ima halak na mambahen Jesus i holan laho manggohi na ringkot ni ngoluna nang dagingna. Isarana: molo na mananda Jesus naeng ma mamora, marpangkat, dapot hundulan di hasangapon. Ido umbahen molo masa  partingkian mamillit caleg manang calon uluan manang partogi di sada luat na so hea ro tu Huria pintor tompu ro do ibana tu Huria asa ditangianghon jala dipillit, dilehon ma hepengna gabe hamauliateonna tu huria songon ingotingot tu ruas i. Molo talu ibana, pintor di sogo rohana tu huria i jala ndang hea be ro tu parmingguon manang tu partangiangan. Songon i do molo monang pe ibana, pintor dang ingot be ibana na marhuria dohot na marTuhan Jesus.

4.       Ahli sullap, ima halak na mangantusi Jesus disi dipangido na ringkot tu Jesus, disi ma nian pintor rade. “bimsalabim” na dipangido di tangiangna ingkon masa songon na dipangido i jala pintor hatop ma masa. Molo so masa, didok ma pargabus jala gabe mandele.

 

Boha do hita nuaeng mananda Jesus i gabe Kristus manang Mesias? Di Minggu XII dung Trinitatis patandahon hita taringot Jesus ima Kristus manang Mesias. Ndang na gabe paluahon jolma i sian hapogoson di pardagingon manang di arta, ndang na holan paluahon jolma i sian sitaononna. Alai di ginjang saluhutna: dipalua do hita sian angka hagiot dosa dohot ihotihot ni dosa dohot hamatean salelengna. Panandaionta taringot Jesus ingkon sahat do tu manghatindanghon nang panghangoluhonhon taringot Jesus. Manghaposi Ibana, jala pasahathon hadirionna gabe ampuna ni Tuhan Jesus. Manang aha pe na masa di parngoluan on na so tupa jumpa pandeleon di panghobasionna manang di ulaonna na denggan i. Ala Jesus i do na gabe pangondingan manang partanobatoan jala na so tupa meret asi ni roha dohot bagabaga i sian hita molo marsihohot hita manghaposi Tuhan Jesus i. Marsangap ma Jahowa. Amen.