BAHAN JAMITA
MINGGU
ADVENT IV
Minggu, 19
Desember 2021
Ev.: Jesaya
7: 10 – 16; Ep.: Rom 15: 7 – 13; S. Patik: Psalmen 24: 7 – 10
IMMANUEL:
DONGANTA MA DEBATA
Pdt. Daniel Bonardo Pane, S.Th.
Patujolo
Horas...!
masuk ma hita tu minggu advent na paopathon, jala on ma minggu Advent parpudi
di taon 2021 on. Di minggu adven IV on marojahan ma taringot ende ni si Maria (magnificant)
di naung dapotan tua ibana sian sude angka parompuan (ida Lukas 1: 46 – 55). Di
ende ni si Maria on dipatuduhon las ni rohaNa di naung manomunomu sahalak Raja
manang Mesias naung dibagabagahon ni Jahowa Debata marhite panurirang di Padan
Na Robi. Marendeende jala marlasniroha si Maria ala ditodo Jahowa Debata do
ibana, sahalak na marbaju (virgin/ perawan) inganan hatubuan Raja manang
Mesias na pinarbagabaga i. di naung ditodo Jahowa Debata si Maria gabe na
manubuhon Kristus/ Mesias i, jumpang jala gok ma songon na sinuriranghon ni
panurirang Jesaya di Jesaya 7: 14: “ida ma, gabegabean ma sada na marbaju, jala
tumubuhon sada anak, jala bahenanna ma goarna, Immanuel.” Laos on ma na gabe
jamita dohot ojahan ni Jamita di minggu Adven na paopathon on. Boha do pangalapation
ni Immanuel di konteks Jesaya songont turpuk jamita di minggu on? jala
aha do na boi putihononnta songon mutiha na arga di minggu Adven IV on? masuk
ma hita tu hatorangan ni turpuk jamita on.
Hatorangan
ni Turpuk
Jesaya
ima sahalak panurirang na dipillit Jahowa gabe sahalak panurirang uju di taon
hamamate ni raja Usia, raja Juda marhite pangungkapon na hasangapon dohot
habadiaon ni Jahowa na niida si Jesaya di Bagasjoro (ida Jesaya 6). Andorang so
hamamate ni si Usia, nunga mandapot pangungkapon si Jesaya, anak ni si Amos. Jala
di tingki si Usia, si Ahas dohot si Hiskia raja Juda masa ma pangungkapon tu si
Jesaya taringot aha na masa tu Juda dohot Jerusalem (bdk. Jesaya 1: 1). Jesaya
marlapatan: “Jahowa do na paluahon” manang “Jahowa do na patupahon haluaon”.
Haluaon na nidokna dison ima haluaon tu bangso Israel, haluaon sian biar ni
roha, ganggu ni roha maradophon ondamondam ni harajaon na bolon na hehe laho
maralo dompak Juda; jala haluaon sian dosa dohot sorop ni dosa ni bangso i. Jala
turpuk jamita on masuk ma tu horong proto Yesaya manang Yesaya I, panurirang
na manurirangi dompak Juda manang Jerusalem andorang so masa dope habuangon.
Dungkhon
hehe si Ahas gabe raja ni Juda dohot Jerusalem, lumlam ma angka pangalaho ni
bangso Juda. Ndang dapot hatigoran dohot hasintongan di adopan ni Jahowa
Debata. Nunga lam tu deakna ma dosa i jala nunga lam tu jorbutna angka
pangalaho ni jolma pangisi huta Juda manang Jerusalem. Umbiaran nama jolma i tu
gogo porang ni bangso na mangondam bangso i martimbanghon biar mida Jahowa. Dipuji
nasida do Jahowa alai anggo roha dohot pingkirannasida ndang tu Jahowa,
tangannasida na dipangke laho martangiang, laos tangan i do na patupahon na so
uhum tu halak na pogos jala na dangol, jala mangarupa halak na daulat. Dipelehonnasida
angka pelean situtungon marhite na pasahathon pelean na mokmok dalan laho
manesa dosanasida. Dirimpu halak Juda/ Jerusalem molo dipelehon pelean na
mokmok tu Jahowa, nunga sesa be angka dosanasida i, hape hagigion do di
adopannasida. Marende do nasida mamuji nasida, alai gok gabus dohot angka
tahitahi na jat di roha nang pingkiranna.
Ro
muse ma raja Israel Utara (Efraim) ima Pekah dohot raja Siria ima Rezin mandok
asa parsidohot ma Juda tu horongnasida, ima horong na maralo dopak Asyur. Nunga
pola didok si Jesaya asa unang mabiar si Ahas maradophon gogo ni bangso na so
marDebatahon Jahowa, jala unang olo mangihuthon tahitahi ni si Pekah dohot si
Rezin i. Alai dang ditangihon si Ahas na nidok ni si Jesaya, jala gabe
mardongan jala mangido pangurupion ma ibana tu Tiglat Pileser raja Asyur. Ndang
adong be pos ni roha tu Jahowa, biar nama na manggohi roha dohot pingkiran ni
si Ahas. Dung mardongan Juda dohot Asyur maralohon Efraim dohot Siria masa ma
sinkritisme, parsombaon tu Baal dohot Asyera masa ma di Juda. Disomba halak
Juda dohot Jerusalem do ianggo Jahowa alai huhut do disombanasida Baal dohot
Asyera, songon i nang hasomalan parugamoon ni Asyur pe gabe diulahon (songon
hatorangan di bahan jamita Minggu, 12 Desember 2021 na salpu). Angka malim
dohot sintua ni bangso i pe gabe panggunturi di bagasjoro jala dongan ni angka
panangko na mambuat hauntungan na so sian dalanna (korupsi, hukum dapat
diperjualbelikan).
Di na masa
i ma disuru Jahowa ma si Jesaya pasahathon panurirangon taringot uhum na masa
tu Jerusalem dohot Juda, jala dijouhon ma asa marhamubaon ni roha bangso i.
manadinghon dosanasida. Marburi ma nasida jala mangurasi dirinasida marhitehite
hata ni Jahowa. Marguru ma nasida mambahen na denggan, lului ma uhum, dipintori
ma na nirupa, dipatingkos ma uhum tu na sopot so marama, jala mangondi angka na
mabalu. Ido nian na dipangido Jahowa masa tu halak Juda manan Jerusalem, alai
ndang tarjalo roha ni raja Ahas dohot pangisi ni Juda dohot Jerusalem. Halak na
daulat jala na mandok hasintongan dohot hatigoaran ni uhum songon suga do i di
parsaorannasida.
Ise be na
boi paluahon bangso i sian dosanasida? Ise be na boi mamintori bangso Juda?
Pelean do manang endenasida? Ari rea bangso i do manang hasomalan
parugaomoonnasida? Ndang adong. Ndang boi ala ni pelean manang endenasida
manang na mangulahon ari rea dohot haringgason mangulahon parugamoon gabe
pintor nasida sian dosa jala malua sian parpior rimas dohot uhum ni Jahowa
Debata na naeng masa songon upa tinuhor ni dosa na binahennasida i. Holan
Jahowa Debata sambing ma patupahon haluaon tu bangso i, holan Jahowa Debata
sambing do na boi paluahon bangso i sian upa tinuhor ni dosa i. Jala ragam do
dalan ni Jahowa Debata laho pabotohon haluaon na naeng pamasaonNa. Isarana sai
marulakulak do si Jesaya manjou asa mulak ma saluhut pangisi ni Juda dohot
Jerusalem tu Jahowa, mulak manadinghon hajahatonnasida. Unang be sai marhaposan
tu gogo ni portibi on dohot gogo ni angka harajaon na asing. marhaposan ma tu
Jahowa jala ulahon hatigoran dohot hasintongan ni uhum, ido na naeng dipatupa
bangso i.
Dalan na
binahen ni Jahowa Debata laho patupahon haluaon i ima marhite bagabaga taringot
haroro ni Sipalua (Mesias/ Kristus) marhite sada na marbaju (virgin/
perawan), ima turpuk jamita sadari on. Ro ma hata ni Jahowa marhite si
Jesaya tu si Ahas, ima raja gumomgom Juda (ay. 10). Pangido hamu ma tanda di ho
sian Jahowa Debatam, pangido sian banua toru manang sian banua ginjang sahali
(ay. 11). Ayat 11 on ima songon sada kritik taringot na so pos be rohani
raja Ahas dohot na so porsea be si Ahas taringot gogo dohot huaso ni Jahowa na
boi paluahon bangso i sian ondamondam ni halak Siria, Efraim dohot Asyur jala
ondamondam angka harajaon na asing. Jahowa na marhuaso jala na marmulia di
banua ginjang dohot di banua toru, jala ndang adong huaso na boi dipados manang
na mangatasi huaso dohot hamuliaon ni Jahowa nang di banua ginjang, banua tonga
dohot di banua toru (pangantusion banua toru di padan na robi ima banua ni
angka naung mate). Molo jolma na marhuaso nuaeng di banua tonga, alai na so
adong be huasona maradophon banua toru. Alai Jahowa mangatasi saluhut angka
huaso nasa na adong di sude inganan dohot tingki. Tanda na naeng didok dison
ima pambahenan ni Jahowa na naeng niida si Ahas laho mangalusi jala manesa biar
dohot ganggu ni rohana i. Tanda na nidok di ay. 10 ima sada tanda taringot
pambahenan ni Jahowa na laho paluahon bangso i.
Alai
ditulak si Ahas ma na nidok ni si Jesaya i, jala ninna si Ahas ma: “ndang olo
ahu mangido, asa unang huunjuni Jahowa” (ay. 12). Tontu alus ni si Ahas on ala
ni biar ni rohana taringot na masa songon di Massa dohot Meriba uju na diunjuni
halak Israel Jahowa marhite si Musa di halongonan (2 Musa 17) na gabe torop
halak Israel hona rimas ni Jahowa ala na so porsea nasida taringot panarihonon
ni Jahowa, na sai ganggu di pardalanannasida. Marasing do hata “unjuni” di
Maleakhi 3: 10 tu na mangunjuni songon na masa di Massa – Meriba dohot di
turpuk jamita on. hata “unjuni” di Maleakhi 3: 10 ima ala ni porsea do bangso i
taringot panarihonon ni Jahowa di ngolunasida jala na so tupa ganggu taringot
pardalanan ni ngolu ni bangso i mian di uhum dohot di patik ni Jahowa. Molo na
masa di Massa – Meriba dohot di turpuk on ima ala na so porsea jala ganggu
rohanasida. Hape nunga tung ragam panarihonon dohot pangaramotion ni Jahowa tu
bangso Israel dohot Juda, hape dang porsea, ganggu dohot tahuton nasida
hinorhon ni ondamondam dohot hinorhon na masa di parngoluan ni bangso i, na boi
parrohon rimas dohot hamatean tu bangso i. Alai diuduti si Jesaya ma di ay. 13:
“ua tangihon hamu ma, ale pinompar ni si Daud! Ndang dope sae hamu paururuhon
jolma, dohot do Debatangku naeng lojaonmuna.” Dipaingot do taringot bagabaga ni
Jahowa tu si Daud dohot tu sude pinompar ni si Daud na gabe manggomgom bangso
na nipillit jala na niasianNa. Dipauruuru si Ahas do angka jolma na
ginomgomanna marhite angka uhum na boi dipapeol, mangarupa angka na pogos dohot
na gale, mamaksa mambayar upeti na mansai balga na mambahen angka na
pogos gabe lam tu pogosna, korupsi di angka inganan sahat tu bagas joro. Nuaeng
dohot do halojaonna Jahowa Debata marhite na panulakhononna di pangidoan na
pinasahat ni si Jesaya tu Ibana. Hata “halojaon” na dituduhon tu Jahowa
marlapatan tu penyangkalan dohot na so porsea be ibana tu gogo dohot
huaso ni Jahowa, Debata.
Alai nang
pe songon i, dang na sundat ulaon haluaon na pinatupa ni Jahowa nang pe ditulak
si Ahas haluaon i. ndang na sundat haluaon dipatupa Jahowa tu portibi on nang
pe ditulak portibi on haluaon i. Jahowa Debata sandiri do na patupahon sada
tanda haluaon marhite gabegabean sada na marbaju, jala tumubuhon sada anak,
jala bahenonna goarNa Immanuel (ay. 14). Ndang ala gogo ni jolma dohot angka
pambahenan ni jolma gabe ro haluaon i. alai Jahowa Debata sandiri do na
pamasahon haluaon i marhitehite angka so tuk dipingkiran ni jolma jala na so
tuk tu pangantusion ni jolma. Boha do sahalak na marbaju boi tubuhon anak molo
so marhite gogo ni jolma? Ndang hombar tu pingkiran ni jolma i Jahowa pamasaon
haluaon, jala ndang suhatsuhat ni pangantusion dohot pingkiran ni jolma na
jempek Jahowa pamasahon haluaon. Hata Immanuel na marlapatan donganta ma Debata
manang Debata di tongatonganta. Hata Immanuel on pabotohon taringot hadirion ni
Jahowa na mian di habadiaon dohot hamuliaonNa alai jonok do tu bangso na
niasianNa. Ibana na mian di tongatonganta. Molo Jahowa do di tongatonganta
marlapatan ma i ndang dao Ibana dohot hita. Jahowa sandiri do paluahon hita,
jala Ibana sandiri na marmudumudu ngolunta. Mentega dohot situak ni loba ma
panganonna, paima diboto mambolongkon na jat, jala mamillit na denggan (ay.
15). Mentega dohot situak ni loba ima sipanganon na somal dipangan angka
dakdanak na asing di luat i. ayat on pabotohon nang pe hatutubu ni Immanuel on
ima marhitehite huaso ni Jahowa Debata (divine power) alai anggo
hangoluanna songon hasomalan ni dakdanak na masa (ay. 17). Hagodanganna pe
songon dakdanak na asing, paima so jumpang tingkina Ibana gabe panguhum di sude
angka bangso. Ayat 16 – 17 marnida dakdanak i mangolu di hajolmaon, alai anggo
haroroanna ndada sian gogo ni jolma alai gogo ni Jahowa marhite Tondi na
songgop tu na marbaju i.
Hahonaan ni Turpuk
Jumpa
ma songon na diturpuk on marhite hatutubu ni Jesus Kristus. Jumpa ma na
tarsurat di Jesaya 7: 14 tu ngolu ni si Maria, sahalak na marbaju na
sinonggopan ni Tondi Parbadia ma ibana jala linggoman ni hagogoon ni Natumimbul
i do si Maria, ala ni i na badia do dohonon na tubu i, Anak ni Debata (ida
Lukas 1: 35 patudos tu Mateus 1: 22 – 23). Nunga tubu be Jesus Kristus, jala
hatutubuna songon hatutubu ni dakdanak pada umumnya, nang pe haroroan ni
Jesus Kristus ima huaso dohot hamuliaon ni Jahowa marhite Tondi Parbadia na songgop
tu si Maria. Ndang di tingki Pentakosta mula ni Tondi Parbadia adong songon na
masa di Ulaon ni Apostel 2, di parmulaan ni panompaon i pe nunga adong Tondi
Parbadia, ima Tondi ni Jahowa, Tondi na so sian portibi on ala Jahowa sandiri
do nampua Tondi i. Hatutubu ni Immanuel ndada holan pabotohon naung tubu sada
dakdanak songon partubu ni dakdanak na asing, alai pabotohon taringot habalgaon
dohot hahomion ni pambahen ni Jahowa Debata laho patupahon haluaon tu ganup
jolma dohot portibi on. Unang pangasahon pingkrianta dohot pangantusionta
taringot boha do parjadina masa songon na dibaritahon turpuk jamita on? boha do
parjadina sada na marbaju tubuhon anak molo so marhite gogo dohot ulaon ni
jolma songon na somal. Boto ma angka dongan, ndang pingkiranta jala ndang
suhatsuhat ni pingkiranta i dipangke Jahowa laho patupahon haluaon i (bdk.
Jesaya 55: 8 – 9).
Immanuel:
donganta ma Jahowa Debata. Marlapatan dang dao Ibana sian hita. IBANA mian rap
dohot hita di sitaononta dohot di ragam habernitonta. Laos on ma na paposhon
rohanta di na mandalani ngolu on. unang ganggu jala unang tahuton. Unang ma
ganggu di panarihonon ni Jahowa di ngolunta, unang ganggu di pangaramotionNa di
ngolunta. Unang tahuton. IBANA do nampuna hita. Molo di tongatongata do Jahowa
Debata ndang na mandok pasrah hita di ngolu on so mulaulaon, ndang na mandok pasrah
hita laho pasahathon boban pingkiranta tu IBANA, ndang mandok molo di
tongatonganta do Jahowa Debata ndang masa be sahit, parungkilon, haberniton
dohot sitaonon di ngolunta. Alai, anggo haroroNa di tongatonganta patubuhon
gogo na marimpotimpot dohot las ni roha, patuguhon panghirimon na tontu
taringot haluaon dohot panarihonon ni Jahowa di ngolunta. Gogo i do na mambahen
hita manahan, marbisuk, marbenget ni roha, jala manghamonanghon saluhut
haberniton, na hansit dohot sitaonon na masa. Panghirimon i do na lam mambahen
hiras rohanta di na mandalani ngolu on. dang ganggu jala pos situtu rohaNa di
Jahowa Debata na mangurupi jala na mandongani hita jala marhasatiaon laho
mangulahon angka na denggan. Molo mian do Jahowa Debata di tongatonganta boasa
be hita marhaporusan tu gogo ni portibi on. Jahowa di tongatonganta manjou hita
asa tatundalhon ma dosa, ditanggalhon ma bangkobangko dohot tahitahi na jat. Tinggalhon
jala tadinghon ma angka ulpuhan hadatuon, tanggalhon ma panjagaan ni daging
unang be olo hita dipahatoban sibolis pangago i.
Immanuel,
donganta do Debata manang di tongatonganta do Debata. Immanuel ima hataridaan
pambahenan ni Jahowa Debata, ima haluaon i. Unang ma tatulak haluaon i, unang
ma ditulak soara ni Tondi ni Debatanta i. Jesus Kristus, Ibana ma Immanuel i.
Saor tu jolma pardosa alai ndang na gabe pardosa Ibana. Saor do Ibana na so
tumanda dosa laho patupahon haluaon na sian Jahowa Debata. Ibana na manuktuk
pintu ni rohanta i asa mian Ibana di rohanta. Sadari on, di na binegemuna
soaraNa, unang ma papir hamu rohamuna songon nasida na tangkang i di ari
pangunjunan di halongonan i (Heber 3: 7 – 8). Amen.
Ginurithon:
Pdt. Daniel Bonardo Pane, S.Th.
Pandita ni
HKI na marsingkoa muse
Tidak ada komentar:
Posting Komentar