BAHAN JAMITA
MALAM NATAL (CHRISTMAS EVE)
Jum’at, 24 Desember 2021
Ev.: Psalmen 147: 1 – 11; Ep.: Mateus 1: 18 – 23
ENDEHON HAMU MA HAMULIAON NI JAHOWA!
Oleh: Pdt. Daniel Bonardo Pane, S.Th.
Patujolo
Selamat malam natal ma di hita saluhutna. Haleluya...
haleluya.. nunga tubu be Jesus Kristus. Haleluya... haleluya... nunga patar be
hatimbulon pambahenan ni Jahowa di ngolu ni angka jolma dohot sude na tinompa.
Pambahenan ni Jahowa na papatarhon hamuliaonNa na gabe haluaon jala gok
halongangan bolon do sude angka pambahenan ni Jahowa na sun timbul i mangatasi
saluhut hagogoon dohot hamuliaon di sude inganan, nang tingki. Tama situtu do pangiarhon
ni saluhut bangso nang sude angka na tinompa ende pujipujian mamuji Jahowa.
Jala sude nasa ulu ni tot marsomba tu adopanNa na gok habadiaon dohot
hamulioanNa i. Laos di ulaon borngin Natal sadari on, diarahon do asa
parsidohot hita mangendehon hamuliaon ni Jahowa, mangendehon ende pujipujian ni
GoarNa na sun timbul i. Asa ampit do pangantusionta taringot ende na
pinabotohon di tupuk on, masuk ma hita tu hatorangan ni turpuk.
Hatorangan ni Turpuk
Anggo buku Psalmen ima sada buku na
marisihon ragam angka tangiang, pangajarion, pamujion dohot panghatindanghon
haporseaon ni ragam panurat di ragam partingkianna be. Anggo Psalmen 147 dang
pola patar disurathon ise do panurat ende pujipujian on. Deba angka na bisuk
mandok si Daud do panurat ni psalmen 147 on ala borhat sian Psalmen 145, laos
udut ni ende Psalmen 145 anggo Psalmen
147. Na deba muse mandok ndang si Daud na manurathon Psalmen 147 on ala
martudutudu do ende on tu las ni roha bangso Israel dung malua sian rimas ni
Jahowa marhite habuangon ni bangso i. marolopolop ma bangso i manghalashon
haluaon na pinatupa ni Jahowa tu Israel, bangso na niasianNa i. Ndang pola
bagas hita ingkon mamboto taringot ise do panurat ni ende on. Alai na mansai
ringkot nian botoonta anggo Psalmen 147 on disurathon sahalak na daulat, jala
marhite ende on do ibana manghatindanghon haporseaonna dohot panandaionna tu
Jahowa Debata. Dihatindanghon ibana haporseaonna dohot panghatindanghononna
taringot hagogoon dohot pambahenan ni Jahowa Debata na gok hamulioan dohot
hasangapon i.
Dipungka do Psalmen 147 on marhite
hata: “Haleluya”. Laos marhite pamuhaion on do diantusi ma Psalmen 147 on ima
sada ende Hallel. Haleluya marharoroan ma sian hata Heber ima Haleluyah (Hy"“ Wll.h;î). Hata Haleluyah marharoroan sian dua hata: “Hallelu” dohot “Yah”. Hata
Hallelu ima kata kerja untuk merujuk kepada sesorang (personal/ tunggal)
na marlapatan “puji ma”, dung i hata “Yah” na martudutudu tu Jahowa (di halak
Heber didok YHWH (YAHWEH)). Sian i botoonta anggo Haleluyah marlapatan: “Puji
ma Jahowa”. Dang boi dilapati hata Haleluya “puji ma Debata”, ala marragam
bangso ragam do Debatana, molo pe Haleluya on dilapati: “puji ma Debata”, ingkon
do martudutudu tu Jahowa, Debata ni Israel. Debata ni si Abraham, Ishak dohot
Jakob. Hata Haleluya holan tu JAHOWA sandiri do sipuji on. I do umbahen molo
halak na mar-Haleluya ima halak na mamuji Jahowa. Jala pamujion i marudut do tu
hadaulaton (peribadahan/ haundukhon) tu Jahowa. Unang ma pamanganta
mandok Haleluya, alai molo pingkiranta jala rohanta dang tu Jahowa alai tu gogo
ni portibi on. Mamuji Jahowa dituntut do pamerengonta manang parnidaonta
songon nang rohanta ingkon hibul tu Jahowa.
Ai denggan do endehonon Debatanta ai hasudungan do
Ibana tama pujipujian (ay. 1). Alamat ni ende on ima tu Debatanta, ima JAHOWA,
Debata ni Israel. Molo didok denggan marlapatan do i ulaon na marguna do, jala
marlapatan diulahon. Ragam do ende dipangke di Padan na robi. Adong do ende
andung (lamentation), ima sada ende taringot andung hinorhon ni
haberniton dohot na hansit na niae manang na dihilala sahalak na daulat.
Marhite ende andung on ma dipabotohon taringot hinahansit jala hinabernit dohot
dokdok ni sitaonon na songgop di ngolu ni sahalak na daulat jala marningot
dohot mangidohon asi ni roha dohot pangurupion ni Jahowa nang songon i pambahen
ni Jahowa laho margogoihon, mandongani jala paluahon ibana sian na masa i (ima
Ende Andung Jeremia, Psalmen 41 – 42). Adong do ende panolsolion ni dosa ima na
sada ende na marisihon taringot panolsolion ni sasahalak naung dipinsang Jahowa
marhite naposoNa hinorhon ni dosa na binahenna i, disolsoli ma dosana i, jala
dipangido ma asa tung unang diuhum Jahowa manang ditabunihon Jahowa bohiNa
maradophon ibana, mangidohon hasesaan ni dosa sian Jahowa na tuk manesa dosa (Psalemn
51) dohot ende na asing. Alai molo turpuk jamita on ima mansohon asa mangendehon
ende pujipujian tu Jahowa Debatanta. Aha do alana umbahen pola hita mengendehon
ende pujipujian tu Jahowa Debatanta? Ala Ibana do pauli Jerusalem, jala
papunguhon halak Israel angka na mampar i (ay. 2). Ayat on martudutudu tu
haluaon na masa tu halak Israel rea (Israel Raya). Jerusalem naung sega
binahen ni harajaon ni Babel, dipauli Jahowa marhite Cyrus/ Koresy na paloashon
halak Israel saluhutna mulak tu bona pasogitnasida, jala sude halak Israel na
tarbuang sian sude luat mulak ma tu Israel. Jahowa do paulakhon hasangapon ni
Israel.
Ibana do na pasabam angka parroha na bojok jala
dililiti angka bugangnasida (ay. 3). Nunga tung hansit jala bernit na tinaon ni
halak Israel uju masa habungan Babel i (nang pe deba adong do halak Israel
na hundul di hundulan harajaon ni Babel, isarana Daniel dohot 3 donganna). Haberniton
ni halak Israel ndada ala na hansit dihilala nasida di luat Babel manang di
luat na asing, alai hinabernitonnasida ima di naung sega hadirionnasida songon
sada bangso na bolon, bangso na marDebatahon Jahowa nunga malengese be
saluhutna. Tung so adong be na boi sihirimon laho mulak jala paulihon angka
naung sega i hinorhon ni parporangan na masa uju Nebukadnesar raja Babel
maralohon harajaon ni Juda. Hansit na dihilala i ima songon sada bugang ni
pamatang na mansai hansit. Dililit Jahowa ma bungang i marhitehite naung talu
harajaon ni Babel maralohon Persia. Marsuraksurak bangso i mulak tu bonapasogit
nasida. Marolopolop jala mariaria ma nasida. Ndang dihilala be bungang i, ima
hinaberniton i.
Ay. 4 – 6 ima mambaritahon taringot hasongkalan ni
Jahowa dohot hasintongan ni uhum ni Jahowa. Jahowa do na manompa angka bintang
jala na manjouhon goar nasida (bdk. 1 Musa 1: 16 – 18). Di Padan na Robi adong
do goar ni bintang, isarana bintang Orion (bintang pemburu) (Job 38: 29
– 31); bintang poriama, bintang sidongdong, bintang hala (Job 9: 9; Jesaya 13:
10; Jesaya 14: 12; Amos 5: 8); bintang maratur (Jesaya 3: 22) dohot lan na
asing. Pangantusion bintang di padan na robi ima: parangan di langit (tentara
langit) (ida 5 Musa 17: 3; Jer. 33: 22); panggomgom ni bangso (Dan 8: 10);
pabotohon hahomion jala habalgaon pambahenan ni Jahowa (Psalmen 8: 4; Jes 40:
25) dohot pangantusion na asing. ay 4 turpuk on ima na gabe kritik tu
bangso na porsea tu gogo ni langit parlangitan songon i marsomba tu bintang di
langit (bdk. Amos 5: 26; Jer. 8: 2). Paingothon ndang na gabe sisombaon bintang
dohot angka na adong di langit, ai na tinompa Jahowa do nasida jala marisuang
do jolma na marsomba tu bintang na di langit. Jahowa do manggomgom angka
bintang jala marsomba tu adopanna do sude angka bintang jala sude parangan na
adong di langit (pat. Psalmen 148: 2 – 5). Jahowa do Raja na marmulia na
manggomgom saluhutna jala sintong do angka uhumNa. Ndang tardodo angka
pangantusion na adong di portibi on ianggo parbinotoan ni Jahowa, ndang tuk
pangantusion ni jolma laho mambatasi parbinotoan ni Jahowa (bdk. Jesaya 55: 8).
Ala ni i unang adong na paginjanghon diri dohot mangasahon parbinotoanna laho
mamuji Jahowa. Unang ma mangasahon hamaloona molo pe laho marsomba tu Jahowa.
Molo pe adong hamaloon dohot parbinotoan pangkeon ma i mangulahon na denggan.
Dengganan do mangulahon angka na denggan unang tumagon na jat. Jahowa sandiri
do na paluahon angka na nirupa marhite naposo na pinillitNa i (pat. Psalmen 4:
4).
Ay. 7 ima sosososo asa mamuji Jahowa marhitehite
uninguningan mangendehon ende hamauliateon hinorhon ni sude angka pambahenan ni
Jahowa na gok halongangan bolon. Ende las ni roha, ende parolopolopon dipangiar
patuduhon las ni roha di sude angka pambahenan ni Jahowa. Uninguningan ima sada
alat musik tradisional di halak Batak, molo di hata Heber didok marhite hasapi
(rAN*kib.=
bekhinnor), alat na dipangke
si Daud laho mamuji Jahowa, jala na dipangke halak Israel laho mamuji Jahowa.
Turpuk on paboahon tu hita asa itapuji Jahowa marhite budayanta, alat musik budayanta.
unang pola dipinjam budaya na asing laho mamuji Jahowa. Aha pe budayanta,
bahasa, alat musik itapangke ma laho mamuji Jahowa. Jahowa do na manarihon sude
angka na tinompaNa i (ay. 8 – 9). Ndada holan na manompa Jahowa di angka na
tinompaNa i, alai disarihon jala diparmudumudu, diparorot Jahowa do saluhutna
songon i angka jolma (bdk. Psalmen 104: 14 – 35).
Ndang dihalomohon Jahowa gogo ni hoda jala ndang
lomo roana mida haehae ni baoa (ay. 10). Ayat on pabotohon tung na so
hinalomohon Jahowa do gogo ni porang jala bangso na mangasahon botohonna. Molo
pe adong bangso na laho marporang dompak bangso na pinillit ni Jahowa, Jahowa
sandiri do na marporang dompak bangso i (pat. 2 Musa 14: 14). Hadameon,
hademakhon, jala hasonangan di bagasan hasintongan dohot hatigoran do do na
nihalomohon ni Jahowa masa tu bangsoNa. Dihalomohon Jahowa Debata do angka na
manghabiari Ibana, angka na manghalungunhon asi ni rohaNa i (ay. 11 bdk. Mikha
7: 7).
Refleksi
Teologis
Barita Natal ima barita taringot habalgaon,
hahomion dohot barita hamuliaon ni Jahowa Debatanta. Dipatupa Jahowa Debata do
angka pambahenanNa na gok hahomion dohot na marmulia i marhitehite Jesus
Kristus naung tubu di bara ni pinahan, di huta Betlehem. Di hatutubuNa i,
marende do angka surusuruan dohot parangan na di surgo mamuji Jahowa Debata, Gloria
in excelsis Deo, ende hamulioan ni Jahowa, ende hasangapon di Jahowa.
Hatutubu ni Jesus patubuhon las ni roha dohot parolopolopon tu sude angka
bangso dohot sude na tinompa. Marhite hatutubu ni Jesus Kristus patar ma holong
ni roha ni Jahowa tu na tinompaNa i. hatutubu ni Jesus pabotohon haserepon ni
roha, situasi tenang dan damai laos on ma na binoan Jesus Kristus
patuduhon haserepon ni rohaNa, Anak Sasada ni Jahowa Debata, Panondang na so ra
mintop jala Raja hadameon.
Alai ndang sude jolma na olo
marolopolop marhitehite hatutubu ni Jesus laos marsangkap do ibana laho mamunu
Jesus, ala biar ni rohana Jesus manggantihon ibana gabe raja (isarana Herodes).
Dang sundat haluaon dohot parolopolopon i molo pe ndang sude jolma manjalo
parolopolopon i. boha do hita nuaeng? Songon si Herodes i do nuaeng hita na so
tarjalo roha parolopolopon i hinorhon ni rimas, pangiburuon, tahitahi na jat,
hosom, dohot angka ulaon na jat na mian dope di pingkiran dohot di
parngoluonta?
Marhite jamita on, diarahon do hita
asa parsidohot hita mar”Haleluya” mamuji Jahowa Debata na songkal jala na
marmulia. Molo mar”haleluya” tarida ma i sian ngolu na roha dohot pingkiranna
holan tu Jahowa, manghalungunhon haluaon dohot pambahenan ni Jahowa Debata di
ngoluna huhut na mangaradoit angka hata manang patikNa. Nunga tubu be Jesus
Kristus, ima Hata ni Jahowa na gabe daging, saor tu jolma. Marhitehite
hatutubuNa pamagohon angka biar ni roha manang hatahuton laho mandalani ngolu
on. Ndang jumpang be biar manang bohaboha on di ngoluna. Togu ibana manghirim
dihaporseonNa jala marhasatiaon mangulahon lomo ni rohaNa. Molo songon i do
ngolunta, porsea ma hita haholongan ni Jahowa ma hita jala gabe hasianNa ma
hita. Unang so diboto hamu, marhasurungan do dibahen Jahowa angka hasianNa,
matua ditangihon Jahowa do molo tajou Ibana (bdk. Psalmen 4:4). Antong, tasomba
ma Ibana naung tubu i, tasomba ma Ibana Raja na Hadameon. Rap ma hita
mangendehon ende hamuliaon ni Jahowa Debata songon ende pardisurgo i. itaendehon
ma Jahowa marhite adatta sandiri, alat musikta sandiri dohot pakean adatta.
Marolopolop ma ita manghalashon Raja na serep jala sipardame i. Amen. Haleluya
Ginurithon ni: Pdt. Daniel Bonardo Pane, S.Th.
Pandita
ni HKI na marsingkola muse
Tidak ada komentar:
Posting Komentar