Bahan Jamita/ Khotbah Minggu Letare, 22 Maret 2020; Mazmur/ Psalmen 69: 30 - 37

BAHAN JAMITA MINGGU LETARE

MINGGU, 22 Maret 2020

EV. PSALMEN 69: 30 – 37

MARLAS NI ROHA DI BAGASAN TUHAN

Oleh: Pdt. Daniel Bonardo Pane, S.Th.

Patujolo – Sibonsiri

            Horas!!! Masuk ma hita di minggu Letare, ima sada minggu laho manosoi manang manjou hita asa marlasniroha. Ragam do dalan ni jolma laho mandapot las ni roha i, jala ragam do alus ni jolma taringot aha do suhatsuhat las ni roha angka jolma. Aha do na mambahen asa las rohanta? Tontu ragam do alus tusi, adong mandok ala manonton film komedi boi ibana marlasniroha ala mengkel ibana; adong na mandok si godang arta i do na las rohana; na deba mandok hapogoson ndang boi mangambat jolma i marlasniroha. Sungkunsungkun nuaeng ima: boi dope hita marlasniroha? Di ragam angka na masa di hasiangan on, masa pangalaho na boi mambahen lungun roha nang panghilalaan ala ni ngolu ni ianakhon na so marningot be laho pasangaphon natorasna, masa parporangan, lalo, dohot lan na asing. Las ni roha ndang boi dilapati na boi mengkel manang na so adong sitaononna. Alai bagas sian na masa i pe ingkon do marlasniroha.

            Ianggo turpuk jamita minggu on, ima sada ende sian raja Daud uju manggomgom dope ibana gabe sada raja bangso Israel na sampuludua marga i (uju si Daud gabe raja sada dope bangso Israel na sampuludua marga i di sada panggomgomi). Molo sada raja, pangantusion na deba mandok: na mora, na sangap jala sude na dihalomohonna ingkon masa nang pe alo di roha; marsilomolomo; dohot lan penilaian na asing. Alai nda tung ala ni hamoraon, hasangapon, manang huaso harajaon ibana marlasniroha di turpuk jamita on, jala nda tung so adong parsoalan manang parsorionna umbahen sundat laho marlasniroha. Tutu do si Daud Raja ni Israel (sian dolok Hebron sahat tu saluhut Israel taon 1010 – 970 andorang so tubu Kristus). Laos di pangke do ende ni si Daud gabe apulapul di halak Israel mian di habuangon Babel.

            Antong aha do dalanna si Daud boi  patupahon sada ende las ni rohana molo so ala ni arta manang ngoluna na gok haulion ni harajaonna? On ma na ringkot sigatonta taringot ende las ni roha ni Daud di turpuk jamita minggu Letare on. Ala ni i, masuk ma hita tu hatorangan ni turpuk jamita.

Hatorangan ni Turpuk

            Turpuk jamita on ima sada ende ni raja Daud uju manggomgomi harajaon ni Israel ibana. Disurathon raja Daud do endena on, uju na masa parsorion dohot sitaonon na mansai dokdok parngoluonna. Pola do digombarhon parngoluonna na masa i songon di ayat 2 – 5 turpuk jamita on. Dipatorang do aha jala boha do sitaonon na masa di ibana. Torop angka musu, ima angka bangso na naeng manjajah harajaon ni Israel songon angka na masa andorang so si Daud gabe raja. Tutu do nian Daud marpasaoran na mansai jonok tu Debata marhite pardalanan ni partondionna nang pardagingon ni ngoluna. Alai nang pe songon i na so jadi ndang songgop angka sitaonon tu Daud di ngoluna. Alai molo manat hita mangalapati turpuk jamita on, songon na paboahon parsorion ni sada bangso, ima bangso Juda di naung sega bangso i. Jala marhite sian i, botoonta dipangke do ende ni raja Daud on na patubuhon panghirimon manang paingothon angka halak Juda taringot huaso dohot gogo ni Jahowa na so boi ditaluhon angka pardebataon na di tano on nang pe ingkon diadopi bangso i sitaonon i. Jala sitaonon ni bangso i martudutudu ma tu partingkian Babel.

            Aha do panghorhon ni sitaonon na masa tu si Daud umbahen na gabe ende ni si Daud on dipangke manang dipapungu jala diendehon angka malim Israel di habuangon Babel? Sitaonon manang parungkilon na masa tu ibana ndang na gabe mamparhorhon gabe gale ibana di na mar-Debatahon Jahowa. Haporsuhon manang sitaonon na masa tu ibana gabe sada barita na uli di humaliangna. Alai naeng ma botoonta ai ndada hinorhon ni hajahatonna si Daud marsitaonon. Marsitaonon do ibana di na mar-Debatahon Jahowa. Di pangantusion na masa uju di harajaon i, marpardomuan do na nisomba tu gogo ni harajaon. Molo dipangke pangantusion sisongon i, na marlapatan ma i ianggo si Daud sai dihagogohon do mampartahanhon harajaonna, jala marpardomuan do i tu mampartahanhon Jahowa gabe Debatana. Tontu godang do angka bangso naeng manaluhon jala manegai harajaon ni Israel jala hombar tu pangantusion i, na parsidohot do debata ni angka bangso i laho manaluhon manang manegai Jahowa, ima Debata ni Israel i. Ndang na so margogo Jahowa pintor paluahon si Daud sian sitaononna i, jala pintor pamagohon sude angka musuna i. Alai naeng do sitaonon ni si Daud i, gabe barita na uli tu humaliangna, jala asa boi ma marnida angka bangso humaliang boha do hasatiaon ni si Daud nang pe masa parsorion i.

            Marhite na masa di si Daud, boi ibana mambaritahon taringot Jahowa, Debata na hinarporseaonna i. Ay. 6 – 29, ima pambaritahon ni si Daud taringot Jahowa na ni haporseaonna. Ibana Debata na sai tongtong satia di ganup na masa di angka na manghaposi Ibana. Sai dapotan tua do ganup jolma manang bangso na marhaposan tu Jahowa, alai halak manang bangso na so mar-Debatahon Jahowa marhapatean do i tu hamatean jala hamagoan. Jahowa, paruhum na tigor na mangalehon upa tu ganup jolma. Jahowa, Ibana do na martumpalhon hamonangan tu jolma na sai tongtong maimaima haluaon na sian Ibana. Ibana do na paloashon halak na marhaposan tu Ibana mangadopi angka na pinamasamasa parjahat. Hata paloashon ndada marlapatan manadinghon manang pasombuhon. Hata paloashon marlapatan, nang pe masa angka hasusaan dohot parsorion manang angka hajahaton na disangkapsangkap parjahat i tu angka na marhaposan tu Jahowa, alai dilehon Jahowa ma do hagogoon, diramoti jala tongtong diondihon do halak na marhaposan i, jala di ujungna mago ma parjahat i rap dohot sangkapsangkapna, alai molo halak na marhaposan dapotan tumpal hamonangan.

            Molo songon i do hape panindangion ni si Daud taringot Jahowa, Debata na hinaporseaonna i aha be sidalianna laho mandele manang mandate? Ndang adong be. Alai lam andap panandaionnna jala panindangionna taringot Jahowa dohot hagogoon nang hasangapon dohot pangurupionNa lam margogo raja Daud jala lam disoarahon ibana panghirimonna taringot ngoluna i. Dihirim raja Daud do hatimbolon ni hatuaon ni Jahowa i do na gabe hatuaonna jala dipatimbul Jahowa do ibana sian angka bangso manang halak humaliangna tarlumobi angka musuna i. Panghirimonna i do lam mambahen ibana marhiras ni roha dohot marlasniroha di ngoluna (ay. 30). Pujipujian dohot ende hasangapon ni Jahowa ma na haruar sian pamangan dohot roha ni si Daud di sitaononna i (ay. 31). Pamujion marlapatan marhatopothon jala panindangion taringot gogo manang parbue ni ulaon na nipuji. Turpuk jamita on, tangkas do ianggo sipujion ima Jahowa, Debata. Jala pamujion i dipasahat si Daud marhite ende songon na disurathon ibana di turpuk jamita on. Marhite endena i do dipasangap si Daud Jahowa, Debata i. Sangap na so adong na boi disarupahon tu sangap na adong di portibi on. Sangap na dibagasna hamuliaon. Hamuliaon ni Jahowa na manghuphupi saluhut tano nang angka sude na tinompa. Di bagasan hasangapon dohot hamuliaon i do idaon huaso ni Jahowa na so hatudosan i, jala na manongtong.

Jala lomoan ma roha ni Jahowa di saluhutna i sian angka pelean na ummarga situtu na dipelehon angka jolma dohot angka bangso tu debatanasida nang songon i pelean na dipelehon Israel tu Jahowa (ay. 32). Ayat 32 on ndang na mandok na so pola be marpelean manang ndang mandok na so arga sude pelean na dipasahat angka jolma manang bangso na marhaporusan tu Jahowa. Ringkot situtu do hita pasahathon pelenta songon tanda hamauliateon ni rohanta tu Ibana. Ndada na hurangan Jahowa umbahen na marpelean angka jolma na marhaposan tu Ibana. Jala ingkon pelean na tama situtu do pasahathonta. Alai pelean na dipasahat i ndada holan naung dilehon i (isarana uju i: lombu, birubiru, jonggi nang pelean parbue na ni ula) alai pambahenan dohot hadirion na polin dohot na diri na hibul laho unduk, jala tongtong mangulahon angka lomo ni roha ni Debata nang pe masa sitaonon di ngoluna, ido na umlomoan roha ni Jahowa.

Diida angka na dangol ma saluhutna i gabe las ma rohanasida, jala tarulima ma nasida hiras ni roha dohot las ni roha laho mandapothon Jahowa Debata na marlapatan gabe parsidohot ma angka na marsitaonon angka na dangol taruli hatuaon dohot las ni roha i marhite parsidohot nasida marDebatahon Jahowa. Nang songon i angka na pogos, dohot angka na nidok angka halak na so marlapatan di humaliang (para kaum marginal: orang miskin, perempuan, budak, orang berpenyakitan, orang berdosa dan lain sebagainya)(ay. 33 – 34). Sude angka na marsak dohot na loja manang angka na gale hinorhon ni panosak na masa di hasiangan on. Diida, ditangihon jala marroan ma saluhutna asa parsidohot dihatuaon na dipamasa Jahowa tu angka na marDebatahon Ibana jala na sai mian di pangondianan nang pe parsorion i masa. Ndang ditulak Jahowa manang ise na ro tu Ibana, alai dapotan tua do jolma manang bangso i ala ni i. Ditatap jala ditangihon Jahowa do sude angka anggukangguk manang sitaonon na masa tu bangsoNa (bdk. 2 Musa 6).

Dohot do langit dohot tano on mamuji Jahowa Debata i, angka laut pe ro ro di nasa na manginsir di bagasan angka i (ay. 35). Ayat 35 on ima songon sada kritik tu angka jolma dohot bangso na sai marsomba tu langit, tano (angka gogo na adong di atas dohot di toru ni tano) dohot angka laut. Saluhutna angka na disomba angka jolma manang bangso parbegu ingkon parsidohot laho mamuji Jahowa, Debata i. Ndang marhagogoon i saluhutna di adopan ni Jahowa, jala parsidohot do nasida mamuji jala manghirim di panumpahion ni Jahowa. Di bagasan hagogoon na so hatudosan i ma Jahowa laho manupahi Sion jala paulihon angka huta Juda (ay. 36). Ayat 36 on ma na gabe panghirimon manang na dihalunguhon bangso Juda di ngolunasida. Dolok Sion dolok hapeahan ni Bagas Joro, ima inangan parsaoran ni bangso i tu Jahowa. Ndada holan i, alai bagas joro ima sada identitas ni bangso i na marpardomuan tu identitas Debata ni bangso i. Pangantusion uju i molo bagas joro ima identitas hagogoon debata na nisomba nasida. Alai ianggo Jahowa ndang boi dilapati hombar tu suhatsuhat pingkiran ni jolma. Ndang boi suhatsuhat ni pingkiran manang pangantusion dohot angka partingkian manang di ganup inganan taringot Jahowa, Debata ni Israel. Di HagogoonNa na so hatudosan i jala na so hasuhatan i sai tongtong do mangula Jahowa laho paulihon huta Juda, paulakhon hadirion ni bangso i gabe bangso na gogo ala pargogo na so hatudosan do Debata nasida. Ndada holan Juda alai dohot do sude marga ni Israel. Molo pe Juda didok di ayat 36 on martudutudu do tu dinasti Daud. Jala dung jumpang tingki songon na nihirim bangso i, marroan ma sude angka pinompar ni Israel jala angka na manghaholoongi Goar ni Jahowa maringanan disi. Huta naung pinauli i. Marolopolop ma angka pinompar ni Israel, marlas ni roha ma angka na marnida hagogoon ni Jahowa marrongoman ma ro mangolophon na binahen ni Jahowa tu bangso na pinillitNa i.

Hahohonaan ni Turpuk

            Joujou marlasniroha di tongtonga ragam angka sitaonon manang parungkilon tontu mansai maol tarjalo roha. Tarlumboi molo didok, las ma roham ale amang/ inang manang ale angka dongan molo tung ditaon ho sitaonon na masa tu ho nuaeng. Alai ingkon boi do jumolo itarajumi dirinta taringot boasa ro sitaonon manang parungkilon i. Ai ala ni mangulahon na sintong manang pajongjonghon hatigoran do hita marsitaonon; marsitaonon manang marungkil ala ni parsirangan sibuk dohot mudar tu keluarga manang sisolhon naung marujung ngoluna; marsitaonon manang marungkil ala ni sahit; manang ala ni hajahaton manang jungkat ni rohanta do hita marsitaonon manang marungkil. Molo tung ala ni hajahaton manang ala ni jungkat ni rohanta do hita marungkil manang marsitaonon tung aha ma hatuaon na dapot sian i? Molo pe tung ala ni i, patut do antong manolsoli rohanta asa anggiat marhite asi dohot holong ni Jahowa marparmuati rohaNa jala taruli hita di hasesaan ni dosa, laos disi ma jumpang hatuaonta molo taruli hita di hasesaan ni dosa i.

            Songon ende ni si Daud di turpuk jamita, songon i ma hita mangendehon ende las ni rohanta molo tung madabu manang masa angka parsorion manang sitaonon nang pe na mansai dokdok situtu masa angka i sude. Boha asa boi jumpang sisongon i? Molo sai holan manatap do hita di parsoalan manang parungkilon na masa i, tontu ndang boi hita mar-Letare na marlapatan marlasniroha. Alai molo manatap do hita di Jahowa, Debata tontu disi ma las ni roha i jumpang. Unang dok roham: uee tahe Tuhan, dokdok nai sitaonon on, manang borat situtu parungkilon on ndang margogo ahu, manang aha do upa ni haporseaonku asing ni sitaonon on? Dohot angka hata na asing. Alai ingkon boi do dohononta di roha: Nda tung talu ahu ala ni parsorion manang sitaononkon ai adong do Jahowa Debata na mandongani jala na margogoihon ahu. Nang pe marrongoman sitaonon i ro, lam dokdok angka parsorion disi ma lam hupanghilalahon gogo ni Jahowa Debatangku. Didok di Filippi 4: 13: “saluhutna do tarpatupa ahu marhitehite Ibana na margogoihon ahu”. Ingkon boi do hita manghatindanghon sisongoni asa boi hita mar-Letare songon goar ni minggunta sadari on. Jala jumpang ma di partingkian, idaonta ma angka haluaon na pinatupa ni Jahowa na paluahon hita sian saluhutna i. Ndada holan hita, alai angka jolma pe marnida saluhutna i jala marroan ma nasida parsidohot marlasniroha di bagasan Goar ni na Suntimbul i. Amen.