Bahan Jamita Epistel Minggu Trinitatis, Heber/ Ibrani 11: 7 - 12

BAHAN JAMITA EPISTEL MINGGU TRINITATIS

Minggu, 16 Juni 2018

Heber 11: 7 – 12

MARHITE HAPORSEAON DO HITA MANANDA HALUAON I

Oleh: Pdt. Daniel Bonardo Pane, S.Th.

Sibonsiri

            Ise do na boi manontuhon godang manang otik haporseaon ni ganup jolma? Halak na jotjot pe ro tu parmingguon nda tung sada hasintongan umgodang haporseaonna sian na so hea marminggu, alai halak na godang haporseaonna ima halak na sai ingot mamuji TUHAN i di parsaoran ni halak Kristen nang di ganup minggu, manang parsaoran partangiangan na dipatupa di ganup jabu angka na manjabui. Tung ise do na mamboto godang manang otik haporseaon ni ganup jolma? Holan Jahowa, Debatanta dohot Amanta di bagasan Jesus Kristus do mamboto i saluhunta. Alai molo haporseaon i ingkon do marparbue, jala parbuena pe ima parbue na tonggi, unang ma na asom. Alai jumolo ma hita antus mangantusi, aha do haporseaon i? Haporseaon i ima: pos ni roha do i di angka sihirimon, jala pamotoan na tontu taringot tu na so niida. Jala hinorhon ni haporseaon do taantusi, naung marhitehite pandok ni Debata dipaojak angka hasiangan, asa sian na so tarida manjadi na tarida i (Heber 11: 1, 3).

            Alai tung aha ma na masa umbahen pola disurathon panurat buku Heber on taringot haporseaon i? pola dibaritahon taringot haporseaon ni angka natuatua na robi di Padan na Robi i, jala aha do na naeng didok panurat on tu na manjaha manang na manangihon jamita on? Asa dapot alusna, ringkot do nian botoonta taringot aha do na masa hatiha disurathon panurat Heber on.

            Ndang pola adong na tontu na mandok ise do panurat ni buku Heber on. Adong do deba mandok, si Paulus na manurathon buku Heber on, alai molo marnida hata ni turpuk buku Heber on, nda tung songon hata ni si Paulus di angka surat na sinurathonna. Adong muse na mandok si Barnabas, ima sahalak parbarita na uli (missionaris) dongan ni angka apostel ni Jesus laho mambarita na uli. Barnabas, sahalak Jahudi jala sian pomparan si Lepi (Ul. Apostel 4: 36). Ala anak ni sian marga Lepi ibana, tontu diboto si Barnabas do taringot parngoluon ni halak Israel uju andorang so habuangon, uju habuangon, jala uju malua sian habuaon. Jala laos adong do muse na mandok na si Lukas do panurat ni buku Heber on, ala hira sarupa do parhataonna di surat na dua i ima (Evangelium Lukas dohot Ulaon ni Apostel) tu surat ni Heber on. Alai tung na so adong na mamboto, na tangkas do diboto jala ditanda si Lukas taringot angka ompu ni halak Israel, ala si Lukas pe nda tung halak Jahudi ibana, alai halak Rom do. Jala adong muse ma na mandok si Apolos, ima sahalak Jahudi na tinggal di Alexandria jala naung gabe Kristen. Jala mansai malo do si Apolos on taringot Barita na Uli di Padan na Robi, jala diantusi do barita na uli i (ida Ulaon ni Apostel 18: 24). Mansai jonok do parsaoran ni si Apolos on tu si Timoteus (ida Heber 13: 23). Alai ndang adong na boi mambahen sada haputuson na tangkas ise do na manurathon surat tu halak Heber naung gabe Kristen hombar tu surat naung adong sinuaeng.

            Torop do angka na bisuk mandok, ia buku Heber on disurathon hirahira taon 60 – 62 M. Molo hatiha i, mansai torop do angka hamaolon na niadopan ni halak Kristen na parjolo i. Angka pangaleleion dohot ingkon marutang hosa angka jolma na satia i ala ni hasatiaonna di haporseaonna. Gok hinsakhinsak; dohot lan sitaonon na masa. Jala di partingkian i torop do halak Jahudi jala na marugamohon Jahudi gabe halak Kristen; jala ndang na gabe so ragam angka hata na so tutu dipasahat angka na mansogohon Jesus Kristus na sian horong Jahudi i sandiri tu halak Jahudi naung gabe Kristen i. Dipatubu ma pangajarion na lipe taringot hasomalon hajahudion i, boha asa mulak muse naung Kristen i gabe marugamo Jahudi muse. Marnida na masa i, torop do angka na mandele, jala ndang jumpang habengeton dohot haserepon mangadopi na hansit dohot parungkilon manang sitaonon i saluhutna. Laos torop do halak Jahudi naung gabe Kristen, alai sai diulahon dope hasomalan hajahudion na patubuhon: “hasomalan haJahudion do dohot angka na masa tu ompunasida uju di Padan na robi i do paandaphon hasintongan dohot hapintoran ni jolma i. Laos posisi ni si Musa, angka surusuruan dohot Tuhan Jesus mansai tangkas do dipabotohon panurat ni turpuk jamita on.” Nda tung umtimbo si Musa, sahalak uluan na mansai ringkot di pardalanan ngolu halak Israel uju mardalan dope di halongonan sian Tuhan Jesus Kristus sandiri, Anak ni Jahowa na Badia i.

Hatorangan ni Turpuk

            Nda tung adong gunana haporseaon molo so adong pangulahonhon. Di Jakobus 2: 17 didok: “Haporseaon i pe songon i do: Anggo so adong pangulaonna, naung mate do hadirionna.” Turpuk jamita sadari on, dibaritahon do angka na masa uju di angka ngolu ni na angka na porsea di padan na robi. Marparbue do haporseaon ni angka na porsea di padan na robi i, marhite haundukhon dohot pangoloion na polin sian hadirion ni angka na porsea i.

            Ayat 7

Dipabotohon do taringot si Noak (boi lam tangkas hita mangantusi ngolu ni si Noak di 1 Musa 6 – 9). Dung adong lumbalumba taringot rimas ni Jahowa na naeng masa tu portibi on, pintor dipauli si Noak do sada parau hombar tu naung niaturhon Debata Jahowa tu ibana. Torop do jolma uju i di humaliang huta ni si Noak mangengkeli si Noak dohot pangisi bagas ala ndang tarjalo pingkiran boha do jadina patupahon sada parao di sada dolok, dao sian laut, jala boha parjadina ro aek na sumar laos mangarimpashon angka jolma ala dao do tu ginjang inganannasida. Alai dibagasan habengeton do dohot haoloon na mansai polin do si Noak rap dohot ripena nang songon i 3 anak dohot 3 parumaenna laho mambahen parao hombar tu naung diaturhon Jahowa sibahenon ni si Noak. Marparbue do hape habengetonnasida i. Jala hangoluan do parbue ni habengetonna i. Aut sugari gabe mandele si Noak rap dohot ianakhonna nang sude pangisi ni bagasna laho patupahon parao i, tontu ndang adong nanggo sahalak na boi malua sian rimas ni Debata marhite aek na sumar i. Ido tutu, dapotan ngolu do hape ganup jolma na mangolu di bagasan habengeton dohot haserepon i. Nang pe torop jolma laho mambahen gale semangat haporseaonta, so tung gabe i mambahen hita ndang parsidohot di hangoluan na gok las ni roha i. 

            ayat 8 – 10,

Ima taringot si Abraham (boi do idaonta taringot na masa di parngoluan ni si Abraham di 1 Musa 12 – 25). Dijou Debata do ibana bungkas sian tano hatubuan dohot tano hagodanganna ima Ur-kasdim tumopot sada tano na so hea di dapothonna ima Kanaan. Ndang na so mamora si Abraham umbahen na olo ibana bungkas sian tano bona pasogitna dohot tano hagodanganna. Alai adong do 3 bagabaga ni Debata tu si Abraham na paposhon rohana bungkas sian tanona i. Aha do 3 bagabaga i? Boi do idaonta di 1 Musa 12: 2 – 3, ima:

·         Hubahen do pe ho gabe bangso na bolon

·         PasupasuonKu angka na mamasumasu ho, jala toruonKu angka na mamurai ho

·         Dapotan pasupasu marhitehite ho saluhut angka bangso ni tano on.

Nda tung songon bagabaga ni sasahalak caleg manang angka calon kepala daerah na sai adong mambagabagahon na denggan, hape dung dapot songon na niluluanna i, gabe lupa do ibana di bagabaga i jala patubuhon panolsolion di angka na porsea hian di bagabagana i.

Alai anggo Debata Jahowa, na manjou si Abraham i asa bungkas sian Ur-kasdim, ima Debata na marningot sude angka bagabaga naung dibagabagahon i. Dilehon Jahowa pe bagabaga i, ima gabe hangoluan do tu si Abraham. Jala marhite si Abraham i dapotan ngolu angka bangso di tano on. Boi do sasintongna si Abraham manulak panjouonna i alani hamoraonna di Ur-kasdim; boi do ibana manulak panjouonna i ala ndang diboto ibana songon dia parngoluanna dohot keluargana di tano na naeng sidapotonna i. Alai haporseaon ni si Abraham, paposhon rohana jala na so jadi jumpang ganggu ni roha di ibana laho mangulahon songon panjouon ni Debata tu ibana. Andorang so sahat ibana tu tano na dibagabagahon i, torop do angka na masa diadopi. Parporangan, dohot angka ancaman sian bangso na asing diadopi ibana do saluhutna. Dibagasan habengeton dohot hasereponna i songon hataridaan haporseaon i ndang na gabe mandele ibana mandapothon tano naung dibagabagahon Jahowa hian tu ibana. Lam pos muse ma rohana di 3 bagabaga ni Debata i tu ibana. Marparbue do habengeton dohot hasereponna ni si Abraham i, ima di na sahat ibana di tano na dibagabagahon Jahowa i di ibana.

Sahat ma si Abraham dohot ripena, si Sara nang songon i angka naposona tu tano i. Nda tung didapot ibana jabu na balga, jala na gabe uluan ibana di inganan i alai songon di tano ni na leban do ibana disi. Undungundung  do diingani. Undungundung ima inganan parmianan na mamangke tenda. Boi do dipapinda hombar tudia lomo ni nampunasa undungundung. Ndang na gabe istana manang jabu na sian batu undungundung i, alai holan na bermodalkan tenda dohot amak di bagas ni undungundung i. Alai idaonta ma, di Ur-kasdim mansai bagak do jabu ni si Abraham jala mamora, ditadinghon do sudena i tumopot tano na dibagabagahon Jahowa, Debata i tu ibana, songon halak naleban jala undungundung do inganan parmiananna rap dohot sude keluargana sude. Alai tung marbenget ni roha do si Abraham dohot sude keluargana di saluhutna, nang songon i si Isak anakna i dohot si Jakob, pahompuna i. Gabe gabe dohot do si Isak dohot si Jakob manean bagabaga ni Jahowa songon bagabaga ni Jahowa tu si Abraham. Disarihon Jahowa do parngoluannasida, na so jadi hurangan sipanganon dohot parabitonnasida di tano i.

Dipaimaima do huta na marojahan na hot, na pinandean jala na pinauli ni Debata. Nda tung mandok na di hasiangan on huta na didokna di ayat 10 on. Alai sada inganan na so boi diida mata, dijama tangan. Penulis kemungkinan dipengerahui oleh filsuf Plato (seorang Filsuf terkenal pada abad IV – III Sebelum Masehi) mengenai dunia ide, yang mengatakan bahwa apa yang kita lihat, apa yang kita sentuh, dan apa yang kita rasakan di dunia adalah tidak kekal, dan fana dan hanya gambaran kepada suatu situasi kekekalan. Namun ada satu situasi yang tidak bisa dilihat oleh mata dan tidak bisa disentuh oleh tangan dan tidak bisa dirasakan ketika kita masih di dunia ini. Tetapi ketika kita masuk ke situasi kekekalan itu, barulah itulah yang kekal dan yang bertahan dan dapat kita merasakan bagaimana kekekalan itu. Jala ido na naeng sipaimaon angka na porsea i. Nda tung na diportibi on hapatean ngolu ni angka jolma tarlumobi angka na porsea i. Alai marhapatean do ngolu ni angka na porsea i di hatongtongon, inganan na manongtong, inganan ni angka na badia dohot na satia ro di ujung ni ngoluna, jala dapotan hangoluan saleleng ni lelengna i. Alai anggo portibi on, na laho salpu jala ndang adong na boi boanon sian portibi on asing ni haporseaon i sandiri.

Ayat 11 – 12

Ima taringot habengeton dohot hasatiaon ni si Abraham rap dohot ripena si Sara na managam hagabean anak songon na dibagabagahon Jahowa tu nasida. Nunga mansai masihol nasida marnida parsaut ni bagabaga ni Jahowa i tu nasida. Ndang disi dibagabagahon pintor jumpa bagabaga i. Alai leleng do tingkina saut ma tubuan anak si Sara dung matua umur nasida. Tontu di parleleng ni tingki i, nunga naeng mandele jala nunga so adong be panghirimon di si Abraham dohot si Sara na boi tubuan anak si Sara, marnida umurnasida naung matua. Sai diparatarata Jahowa do bagabaga i marhite angka suruan ni Jahowa laho manopot nasida. Di na parataratahon i, gabe paposhon roha ni nasida na ingkon jumpang i saluhutna. Tutu do, jumpa ma songon na dibagabagahon ni Jahowa i. Di luar pamingkirion ni jolma dohot parbinotoan ni portibi on tubuan anak ma si Sara naung marumur siapuluh taon jala si Abraham saratus taon.

Mangula do Debata Jahowa pasauthon angka bagabagaNa i di luar pamingkiran ni jolma dohot parbinotoan manang hapistaran ni portibi on. Na marlapatan, ndang mangula Debata hombar tu pamingkiran ni jolma jala disuhat parbintoan ni portibi on. Di luar pingkiran ni jolma na sompit i, jala hapistaran manang parbinotoan ni portibi na otik i, saut do bagabaga i, jala dapotan las ni roha nama si Abraham dohot si Sara, lobian las ni roha ni jolma na gotilon dohot dapotan sere manang sinamot. Jala marhite habengeton dohot haserepon ni si Abraham dohot si Sara diganti Debata do goar ni Abram gabe si Abraham na marlapatan Ompu ni torop angka bangso jala si Sarai gabe si Sara na marlapatan Parompuan na tarpasupasu manang dapotan hamonangan.

Hahonaan (aplikasi)

            Boha do pardalanan ni haporseaonta si nuaeng angka sundut sisaonari? Sai hatophatop do hita mandate manang mandele molo songgop angka hasusaan manang parungkilon di ngolunta. Hatophatop menuntut tu Debata ala ni angka na denggan naung binahenna i. Marhite hatorangan ni turpuk jamita evangelium on adong do 5 poin siputikhononta, ima:

1. So tung olo hita mambahen haporseaonta i marsigantu tu angka hata ni jolma. Sai torop do hata ni jolma na patubuhon hansit ni roha tarlumobi mangulahon songon parbue ni haporseaon i. Isarana na masa tu si Noak. Sipata molo ringgas hita marminggu, sai didok: “pantang sai na badia hian do”, ringgas jala sian burju ni rohanta mangulahon na denggan sai didok : “na adong do na binuatna i umbahen dibahen sisongon i” laos adong muse ma tubu hata: “pantang so burju do i, hape na laho mangaup do”. Tontu molo marguru tu hata ni jolma do hita mangulahon ulaon parbue ni haporseaonta, na marlapatan do i na tu jolma i do itabahen debatanta, ndada Jahowa. Alai molo Jahowa do Debatanta, tontu ingkon marsigantu tu hataNa do hita di saluhut pardalanan ni ngolunta on. Marguru tu hataNa dohot lomo ni RohaNa, jala molo jumpang tingkina dapotan hangoluan do hita sian Debata Jahowa.
2. Berengonta ma si Abraham, na barani mangihuthon hata dohot lomo ni roha ni Debata Jahowa. Ndang adong dapot biar ni roha tu si Abraham laho mangulahon i; ndang adong ganggu ni roha. Alai jumpang ma pos ni roha. Pos ni roha on ima hataridaan haporseaon na tontu tu Debata Jahowa. Di pardalanan ngolu ni si Abraham ndang na gabe sonang sude, alai sai ro do angka na masa na so dihalomohonna. Sai ro do parungkilon na masa tu dirina. Alai nang pe songon i, idaonta do hasatiaon ni si Abraham i sahat tu ujung ni ngoluna. Boha do hita angka na porsea di partingkian sinuaeng? Gabe umbiar do hita tu na olo salpu on, jala alani i marsigantung hita tu na olo salpu on (ima portibi dohot hagiotna). Umbiar ma hita tu Debata Jahowa, ada parsidohot hita di bagabaga naung dibagabagahon ni Debata hian tu si Abraham.
3. Marparbue do panghirimon i. Mansai leleng si Abraham dohot si Sara paimahon asa jumpang tubuan anak si Sara. Sanga do naeng gale panghirimonnasida i, songon na mandok: ndang na hea masa be i. Alai marhite habengeton dohot haburjuon ni si Abraham dohot si Sara taringot tu bagabaga i, dapot ma songon na dihirim i, ima tubuan anak. Jala marhite haporseaon ni si Abraham dohot si Sara, gabe songon torop ni bintang dohot rihit ni laut torop ni pinompar ni si Abraham dohot si Sara. Molo parsidohot do hita di pinompar ni si Abraham dohot si Sara marhite haporseaonta dohot hasatiaonta tontu parsidohot do hita di bagabaga i.
4. Ndang mangula Debata hombar tu na piningkiran ni jolma jala hombar tu suhatsuhat na binahen ni parbinotoan ni portibi on. Sai mangula do Debata patupahon angka na denggan di ngolu ni torop jolma na satia tu ibana. Disarihon jala dilehon do angka na ringkot i di ngolu partondion dohot pardagingon ni jolma i. Marhapatean tu na denggan do saluhut angka pambahenan ni jolma di hasiangan on. 
5. Ndang na gabe si Noak, si Abraham, dohot si Sara tujuan jala ujung ni haporseaonta. Alai 3 tokoh di padan na robi on ima sada tiruan na ingkon sitirion ni angka na porsea. Tudia do tujuan jala ujung ni haporseaonta? Ima tu Jahowa Debata, dohot di AnakNa Tuhan Jesus Kristus dohot Tondi Parbadia. Jahowa, na singkop mian TondiNa na badia di hadirion ni Jesus Kristus dohot di Tondi Parbadia. Debata Na badia, Trinitatis: tolu rupa di bagasan sada Tondi, ima JAHOWA DEBATA. Ima tujuan ni haporseaonta dohot ujung ni haporseaon i. Sai porsea ma hita di Ibana, jala molo jumpa tingkina, jaloonta ma parbue ni haporseaon ni ima olopolop dohot hasonangan di inganan na manongtong i, na so pinauli tangan manang na dipandei ni jolma. Alai Jahowa sandiri do na mamandei. Amen.