Bahan Jamita Minggu Miserikordias Domini, Minggu, 10 April 2016; Pangungkapon (Wahyu) 5: 11 - 14

BAHAN JAMITA

MINGGU MISERIKORDIAS DOMINI

Minggu, 10 April 2016

Ev.: Pangungkapon 5: 11 – 14; Ep.: Psalmen 30: 2 – 13; S. Patik: 1 Timoteus 6: 12

Oleh: Pdt. Daniel Bonardo Pane, S.Th.

HASANGAPON DOHOT HAMULIAON MA DI ANAK NI BIRUBIRU NI DEBATA!

Patujolo

            Minggu Miserikordias Domini, ima minggu paduahon dung sidung ari haheheon ni Jesus Kristus naung pamonanghon hita angka na porsea sian sorop ni hamatean. Di Minggu Miserikordias Domini on disosohon do hita asa mangendehon angka asi ni roha ni Jahowa nang angka ulaon haluaon (karya keselamatan) na pinatupa ni Jahowa marhitehite Jesus Kristus, ima Anak ni Birubiru ni Debata. Aha do pardomuan ni Jesus gabe didok Anak ni Birubiru ni Debata? Jala aha ma na boi siputihononta songon tona ni turpuk jamita di minggu Miserikordias Domini on? Tangkas ma itapaihutihut hatorangan ni turpuk on.

Hatorangan ni Turpuk

      Ia bungku Pangungkapon on ima sada bungku na marisihon ragam angka pangungkapon (apokalipsis; penyingkapan) na masa tu si Johannes, ima sada sian 12 apostel naung dipillit Jesus. Pangungkapon on masa uju di pulau Patmos do si Johannes. Pulau patmos sada inganan na gabe tanda parniahapan na hansit di halak Kristen binahen ni harajon na so mananda Jesus Kristus, jala tanda parungkilon bolon ni halak na satia di haporseaonna. Marhite pangungkapon on, diungkap Debata parnidaan ni si Johannes di tongatonga parniahapan na mansai hasit dihilala halak Kristen jala pangungkapon on laho marnida angka na naeng masa jala na pasti ingkon masa di sada ari. Ndang pola dipaboa jala dipabotohon andigan masa sude angka na niida si Johannes di pangungkapon on, alai na ringkot ima angka naung niida i, pasti do ingkon masa saluhutna hombar tu sangkap ni Debata. Marhite bungku Pangungkapon on lam paandaphon tu angka na porsea taringot ari ni TUHAN, ima ari haluaon tu angka na porsea jala ari ni hasusuda ni angka pardosa dohot angka parjahat. Barita taringot haroro ni ari ni TUHAN ima barita na dihabiari (berita ancaman) tu panggomgomion ni Rom uju pamarentaon ni Kaisar Titus Flavius Caesar Domitianus Augustus (Kaesar Titus Flavius Domitianus/ Kaesar Domitianus) (taon 81 – 96 Masehi), ima kaesar na mandok dirina tuhan jala debata ni sude angka bangso na ginonggomanna. Molo sian segi politik dohot ekonomi uju ginomgoman Kaesar Domitianus on mansai maju do harajaon Rom, jala mansai sihabiaran ni angka harajaon humaliangna do harajao ni Rom. Laos ido lam mambahen ginjang roha ni kaesar i jala lam marsilomolomo laho manggosagosa halak Kristen na so olo marsomba tu ibana.di segi parugamoon di bahen do patik asa sude jolma na ginomgomanna ingkon marsomba tu ibana songon panombaonnasida di debata,  jala sude jolma na adong di luat ginonggomanna ingkon mardebatahon jala martuhanhon kaesar i. Alai halak Kristen godang do na so olo unduk di patik ni kaesar i, ido umbahen mansai sogo do rohana mida halak Kristen angka na satia i ala so olo marsomba tu ibana , gabe sai dilele jala sai disusai do ngolu ni angka halak Kristen sahat tung ingkon hamagoan hosa.

            Adong do na mansai ringkot na naeng dipasahat di bungku pangungkapon on, ima:

1. Gok hasusaan dohot gok hajahaton do portibi on, jala angka jolma pe gok do hajahaton di bagasan rohana. Hinrhon ni hajahaton i gabe mambahen marsingkor manang na ingkon marsitaonon na dokdok do halak Kristen tarlumobi halak Kristen na satia sahat tu hamatean ni hosa.
2. Jesus ima Tuhan, jala Ibana sandiri do na pasaehon jala pataluhon sude angka parhuaso jala angka jolma di sude angka gogo dohot huaso, Ibana sandiri do sude na pataluhon sude angka kaesar nang panggomgom na mangalo Jahowa Debata marhite na mambahen susa angka halak Kristen na satia i.
3. Ndang marisuang hasatiaon ni angka na porsea jala na satia i. Jaloonnasida do tumpal hamonangaon manang tumpal hasatiaonnasida na binasabahon Jahowa, Debata tu nasida. Molo pe halak Krsiten na satia i ingkon manaon di pardagingon jala mate di pardagingon alai molo di ari na balga i, ari ni TUHAN marolopolop do nasida ai masuhannasida nama hangoluan saleleng ni lelengna na so boi lehonon ni portibi on.

Turpuk jamita on sada sian parnidaan manang pangungkapon na masa tu si Johannes taringot Jesus Kristus, ima na gabe Anak Birubiru ni Debata. Hata Anak Birubiru ni Debata ima sada pandohoan di bagian liturgi ni haKristenon na parjolo i. Boasa gabe Anak Birubiru? Di Johannes 1: 29, adong do panghatindanghon si Johannes pandidi (ndada si Johannes Apostel) na mandok: on do Birubiru ni Debata na mamorsan dosa ni portibi on”. Aha do na boi idaonta sian birubiru na mambahen gabe dipatudos Jesus Kristus tu Anak ni Birubiru ni Debata. Birubiru jotjot do i dipangke halak Jahudi gabe pelean na ummarga na pinasahat tu Jahowa di bagas joro. Mangalapati birubiru di parugamoon ni Jahudi ndang tarsirang i sian ibadah manang hadaulaton marhite pelean ni bangso i di bagas joro. Birubiru jotjot do dipangke gabe pelean pardamean manang pelean hasesaan ni dosa na pinasahat na patandahon naung mardame hita dohot Jahowa jala nunga sesa dosa i. Tolap do holan birubiru i gabe sada kepastian hasesaan ni dosa? Molo godang dipasahat birubiru na mokmok i gabe pelean, boi do i dohonon naung godang dosana disesa? Molo itajaha Jesaya 1: 11 dohot di Amos 5: 21 – 22, idaonta ma tung na so boi do otomatis godang ni pelean birubiru i gabe godang sesa dosa i manang mardame tu Debata. Antong aha nama pelehononhon na boi gabe pelean ni pardamean dohot hasesaan ni dosa? Dipatuduhon Debata do asi ni rohaNa i marhitehite Jesus Kristus, Ibana ma gabe Anak Birubiru ni Debata na talup padamehon jolma i tu Debata jala pasesahon dosa ni jolma i. Anak Birubiru, ima sada hataridaan na so mardosa alai ingkon manaon manang gabe pelean hinorhon ni dosa. Tung na so adong do haruar sian pamanganNa hata bura tu na manganlisingi dohot na mamastap Ibana, dipelehon do diriNa gabe pelean pardamean tu Debata Ama i. Gombaran Anak ni Birubiru ni Debata didasarhon do i sian Jesaya 53: 7, ima taringot Naposo ni Jahowa (hamba TUHAN), na paboahon na serep jala na unduk do Ibana manaon angka pambahenan ni jolma i tu Ibana humonghop hita pardosa asa malua jolma i sian dosa jala boi mardame dohot Debata, Ama i, Mual ni hangoluan na so ra suda.

Di ayat 11 turpuk jamita on mamereng ma si Johannes ma marhite pangungakapon na masa tu ibana laos dibege ma songon soara ni torop surusuruan humaliang, nang soara ni angka parngolu i dohot angka sintua i, jala marloksaloksa jala marriburibu toropna. Alai molo itaida andorang so ayat 11 turpuk jamita on ima di ayat 1 – 10, boi do idaonta ianggo na masa na niida si Johannes ima sada ulaon parolopolopon ni angka na daulat jala na satia, jala adong ulaon peribadahan di inganan i. Marolopolop jala mariaria angka na niidana i di sada inganan na mansai sangap jala na marmulia, inganan na so pinauli ni tangan manang pingkiran ni jolma; inganan ni angka na porsea jala na satia di ujungna. Marolopolop do natorop i huhut marsomba di jolo ni Anak ni Birubiru ni Debata, ima Jesus Kristus. Di tanganNa ma bungku pustaha na marsahap i, laos unduk be angka natorop i huhut marsomba laos mangendehon ende hamuliaon ni pardisurgo (doxologi) mangendehon angka asi ni roha ni Debata marhitehite Jesus, Anak Birubiru ni Debata.

Laos di bege si Johannes ma muse ende hamuliaon ni pardisurgo dohot angka natorop i mangendehon hamuliaon ni Anak ni Birubiru ni Debata (ay. 12 - 13). “Na tama” na mandok holan Ibana do na tama jala ndang adong na boi na ditano on nang angka pardisurgo na boi patupahon songon naung dibahen Ama i marhite Jesus Kristus. Ndang adong be na pantas asing ni Ibana, Anak ni Debata i. Nang pe so dihatahon ende hamuliaon on ndang na moru sangap jala hamuliaon ni Ama i dohot Anak i, alai ganup jolma naung dipalua jala naung ditobus ingkon mangendehon ende hamuliaon on na patuduhon las ni roha jala panghatindanghon angka pambahenan ni Jahowa na so hasuhatan jala na so tarhatahon.  Hamoraon, hagogoon, dohot hapistaran nang sahala dohot hamuliaon dohot hasangapon nang pujipujian paboahon hasisingkop ni Jesus Kristus i di hamuliaonNa i, tung na so adong be na hurang. Jala sude angka hagogoon dohot hasangapon na diportibi on adong do i di toru pat ni Anak ni Birubiru i, na paboahon tung na so tolap do portibi on mambahen dos huasona dohot gogona mardapohon Jesus Kristus i. Laos di ayat 14 disimpuli do di bindu 5 on hata “Amen”, na paboahon “sai tibu ma ro” sai ro ma” jala “toho do hasahatanna i sudena” laos manungkap ma huhut marsomba di adopan na Sun Badia i.

Hahonaan ni Turpuk

            Aut husungkun, naung itaparhatopot do di ngoluta on angka naung pinalua manang halak dipadame do hita tu Ama i marhtie Jesus Kristus? Torop dope halak Kristen ganggu dope dirina naung tutu do ibana naung mardame dohot Ama i jala parsidohot do ibana di hasesaan ni dosa naung pinatupa Ama i marhite Jesus Kristus. Ganup jolma naung marhatopot dosana jala mangido asi ni roha tu Ama i marhitehite Anak Birubiru ni Debata, parsidohot do ibana di hasesaan dosa dohot di haluaon i. Alai unang ma di bagasan neang ni roha manjalo basabasa asi ni roha ni Ama i. Lam taruli hita asi ni roha, lam martambatamba ma las ni rohanta jala lam unduk ma hita marsomba tu Ibana na Badia i.

            Antong itaendehon ma asi ni roha ni Jahowa angka naung sahat tu hita, nang pe ingkon itabolus ragam haporsuhon dohot hasusaan ni ngolu on. Marhite asi ni roha i, ido na paposhon jala margogoihon hita di hasatiaon di bagasan haporseaon na pita dohot na polin tu Ibana. Itaingot ma tung na so jadi marisuang haberniton dohot sitaonon ni angka na porsea huhut na satia i, ai parsidohot do hita di punguan na marloksaloksa i mangolophon hamuliaon angka pambahenen ni Ama i marhite Jesus Kristus. Songon hataridaan ni halak na mangolophon asi ni roha ni Jahowa i dingolunta, itaeahi jala itapaune ma sude angka parangenta di ngolunta on. Gabe marparange na marsomba hita di Jahowa marhitehite rade hita manangihon hataNa jala mangulahon hataNa i di ngolunta na gok hasusaaon on. Marsangap ma Ama i marhite Jesus Kristus, Anak Birubiru ni Debata na manesa dosa ni portibi on. Amen.

Usulan ni Ende Huria

1. 9: 1 – 3
2. 425: 1 – 2
3. 169: 1 + 3
4. 213: 1 + 3
5. 467: 1......
6. 223: 1 + 3
7. 227: 1.....