Bahan Jamita Minggu XIX Dung Trinitatis, 26 Oktober 2014

BAHAN JAMITA

MNGGU XX DUNG TRINITATIS

Minggu, 26 Oktober 2014

Ev.: 1 Tessalonik 2: 1 – 8; Ep. Psalmen 1: 1 – 6; S. Patik. Mateus 7: 21

Pdt. Daniel Bonardo Pane, S.Th.

ULAHON MA MARBARITA NAULI!

Patujuolo

            Adong do haroronta tu portibi on mamboan panghorhonhon na denggan manang didia hita mian? Aha do na masa molo ro hita tu sada parsaoran manang sada luat? Unang ma nian adong halak mandok tu dirinta, sai tongka ma molo ro si “anu” tu luatta, manang domu tu parsaoranta”. Alai naeng ma sai tongtong sai dihasiholi jolma haroronta nang tu sada parsaoran manang sada huta. Dihasiholi angka jolma angka parangenta, angka hatanta, manang angka ulaonta. Alai ndada na gabe i saluhutna mambahen hita gabe paginjanghon rohanta di adopan angka dongan nang parsaoranta. Marhite i saluhutna boi ma idaonta boha do parsaoranta (relasi) di humaliangta.

            Antong, boha do marhite denggan ni parsaoran ni gabe dalan mamboan barita na uli, taringot hata ni Jahowa di parsaoranta. Marbarita na uli marhite pambahenan nang hata. Ingkon ingot do hita, parsaoran ni halak na porsea (parsaoran ni haKristenon) ima parsaoran marbarita na uli dohot parsaoran na manghobasi. Di bagasan parsaoran on ndang adong na naeng patengatengahon dirina. Songon parsaoran ni si Paulus tu halak na porsea di huta Tessalonik, na sai tongtong dihasiholi barita na uli na dibaritahon si Paulus. Boha do hadomuan i tu turpuk jamita on? Tangkas ma itapaihutihut hatorangan ni turpuk on.

Hatorangan ni Turpuk

            Huta Tessalonik ima huta na mansai maju di parngoluaan, manang di perekonomian. Huta on ma sada huta na mansai ringkot di harajaon ni Rom, na adong di Makedonia. Andorang so ro Barita na Uli, torop do halak Tessalonik na manomba tu ganaganaan, alai dung mian Barita na uli di huta i, jala lam torop do halak di huta i naung mananda jala mangantusi Barita na Uli, ima Barita taringot Kristus dohot haluaon i, torop ma halak di huta i manadinghon ganaganaan jala tardidi dung i gabe sada huria. Di tonga hararat ni Barita na Uli di huta Tessalonik on, torop do hamaolon manang parsorion na diadopi angka na porsea uju i. Hinorhon ni hamaolon manang parsorion na diadopi, torop do halak na naung porsea i gabe mandele, jala tubu ma sungkunsungkun, boha do ngolu ni halak na porsea di haroro ni Kristus na paduahon. Sungkunsungkun on martudutudu taringot marhapatean tu dia do ngolu ni angka na porsea di ari haroro ni Kristus i? Marhite surat ni si Paulus on, tangkas ma dialusi si Paulus taringot sungkunsungkun i (4: 13 – 18), jala marhitehite alus on, naeng ma rade angka na porsea i managam haroro ni Kristus na paduahalion i di bagasan hasatiaon di haporseaon (bindu 5). Apostel Paulus manurathon suratna on laho patoguhon haporseaon ni huria i, jala patangkashon taringot panandaion ni huria i tu Barita na uli dohot panghobasionna. Molo idaonta mula ni surat ni si Paulus tu huria Tessalonik on tangkas do botoonta parsaoran ni si Paulus tu haria i. Parsaoran na dirahut holong jala parsaoran marbarita na uli. Sai adong do roha na mansai masihol tu huria na di Tessalonik hinorhon ni parsaoran i.

            Molo idaonta di turpuk jamita on, di ayat 1 tangkas do dipaboahon si Paulus harorona marbarita na uli ima haroroan na so magopo. Torop do halak na mansogohon haroro ni Barita na uli marsaringar di luat i. Gabe tubu ma angka hata na so tutu taringot Barita na uli dohot panghobasion ni si Paulus, na boi mambahen mandele angka na porsea i di tonga ragam na masa. Alai tung na so magopo do haroro ni Apostel Paulus di luat i di tingki marbarita na uli, ala nang pe torop na mansogohon haroro ni Barita na uli, alai hot do Barita na uli marsaringar di luat i.

            Dipaboa si Paulus do angka na diadopanna uju marbarita na uli di luat Pilippi, na torop angka paraloan na ingkon adopanna nang marhitehite angka na bisuk, angka pamarenta (panggomgomion), nang angka na so manghalomohon haroro ni Barita na Uli di Pilippi. Nang pe songon ni na niadopanna, tung na so mansohot do ibana marbarita na uli. Tangkas do dihatindanghon si Paulus ai mangasahon Debata do angka apostel (angka parbaritanauli) asa marhiras ni roha manghatahon barita na uli sian Debata. Ndang alani habisuhon ni angka apostel, ndang alani gogo manang sinadongan na dipangasahon. Ai molo parbinotoan, gogo manang sinadongan dipangasahon, adong do hapuason ni saluhutna, alana adong do batas ni gogo, parbinotoan dohot sinadongan. Alai mangasahon Debata, ima mangasahon gogo dohot huaso na so tarbatas jala na so halompoan, ido mambahen angka apostel marhiras ni roha jala margogo mambaritahon barita na uli nang pe torop na mangambati.

            Parbaritanaulion ni angka apostel ndada songon angka na pistar manang angka malim ni ugamo na jotjot mamangke ulaonna i laho mangalului sangap dohot hamuliaon tu dirina, asa torop jolma na marlomo ni roha tu ibana, gabe ndang adong be haoloon mambaritahon hasitongan ni hata ni Debata. Ndada poda na lilu manang na marangkal angka apostel laho mangulahon parbaritanaulion i songon na didok ni angka na so manghalomohon barita na uli (ay. 3). Jala songon halak na tau di roha ni Debata do angka apostel i marbaritanauli. Gabe hasahatan ni barita na uli i, songon i do na dibaritahon nasida. Ndada songon angka na mambuat roha ni jolma, jala naeng ma tahe halomoan ni roha ni Debata na manigati roha ni angka apostel (ay. 4). Mansai tangkas do dipodahon apostel Paulus huria na di Tessalonik ndada na mambahen las ni roha angka jolma parbaritanaulionna nang pe lipe manang asa sonang jala tabo begeon ni jolma, alai ndang dihalomohon ni Debata. Lomo roha ni jolma manangihon jamita alai ndang alani hatigoran manang hasintongan ni Debata. Ai marbarita na uli pe angka apostel ndada laho patabotabohon sipareaon ni na manangihonsa, manang mambahen las roha na manangihonsa nang pe ndang sintong jala hombar tu halomohon ni Debata. Ulaon parbaritanaulion ni angka apostel ima ulaon paboahon haluaon dohot las ni roha na sian Debata hombar tu hasintongan dohot hatigoran ni Debata, jala ido na dihalomohon ni Debata di ngolu ni angka apostel nang angka na porsea di Jesus Kristus.

            Ai barani do si Paulus manghatindanghon na Debata sitindangi parbaritanaulionna (ay. 5), na paboahon ndang adong na buni ulaonnasida laho mangaup tu dirina angka apstel mabaritanauli. Ndang na gabe marhata lemeslemes, jala marbisukbisuk laho mambuat arta. Ndang na gabe diatur hata i semanis mungkin, alai busuk do dibagasna, manang diholipi hatigoran manang hasintongan asa dapotan pangomoan ibana. Halak sisongon i do na didok manggadis hata ni Debata laho mangaup hauntungan tu dirina. Ndang na manjalahi sangap angka apostel sian jolma nang portibi on, atik pe tarbahen angka apostel marhatongamon, ala apostel ni Kristus do nasida   (ay. 6). Marhite barita haluaon na diboan angka apostel, dohot barita hangoluan na sian Debata, ima taringot Kristus na mambahen jolma i mananda haluaon na sintong jala haluaon na so sian portibi on. Boi do nian angka apostel mandapot pujian dohot sangap sian angka jolma, alai ndang na gabe i tujuan ni angka apostel marbarita na uli. Ndada na mambaritahon hadirionna, alai mambaritahon Kristus. Ndada mambaritahon na sungkot di rohana, alai mambaritahon barita las ni roha dohot haluaon hombar tu hatigoran dohot hasintongan ni Debata. Tangkas do dipaboa si Paulus ai apostel ni Kristus do angka apostel i. Molo didok apostel ni Kristus na marlapatan ndada portibi on na gabe tuannasida, alai Kristus do. Molo didok apostel ni Kristus na marlapatan ndada sian portibi on dapot nasida tohonan ulaon marbaritanauli alai sian Jahowa marhite Jesus Kristus, jala dipertanggungjawabkan do i di ari Kristus na balga i. Molo didok apostel ni Kristus marlapatan ndada sian portibi on dapot nasida upa na ni ula angka apostel, alai sian Kristus do.

            Digombarhon si Paulus do parsaoran ni parbaritanauli tu ganup huria songon sahalak ina na pauliuli gellengna (ay. 7). Boha pe dohonon, natoras do na umbotoan aha na ringkot tu anakna uju hadakdakhon ni anakna i. Molo pangantusion hombar tu psikologi, umjonok do panggoara ni roha ni sahalak ina tu anakna sian amana, nang pe ndang na sude sisongon i. Ingkon basar do ina pauliuli angka anakna, songon ni nang angka apostel pauliuli huria i sian ragam na masa. Marhitehite ayat on dipatandahon si Paulus do ndang boi marsirang parsaoran ni huria sian barita na uli na binoan angka apostel, jala sian on do andap haholongan na polin tu angka huria i. Ndang hea natoras mangido biaya pagodanggodang anakhon tu anakhonna. Alai marlambas ni roha do ina manganjuanju angka hahurangan dohot hagaleon anakhonna, jala dilehon do nasa na boi dilehon asa denggan ngolu ni anakhonna. Songon i do nang angka apostel, ndang hea manghirim sadia ma arga ni barita na uli na sinaburhonnasida i.

Aplikasi Teologi

            Boha do haoonaan ni turpuk on di ngolu haparhaladoon manang ngolu marbaritanaulionta di tonga ragam na masa nuaeng. Tongtong do sai na adong punguan na mansogohon marsaringar barita na uli di humaliangna, jala ido na mambahen jongjong sada huria di sada luat. Turpuk jamita on mamodahon tu hita, asa hita angka parbaritanauli, angka parhalado dohot angka na porsea unang mansohot marbaritanauli hinorhon ragam na masa di ngolunta, jala marhite ragam na masa on lam marhiras ni roha ma hita marbaritanauli di humaliangta, alai ndada holan marbaritahon hita malo, alai ingkon do manghangoluhon barita na uli i di ngolunta. Ulaon ni ise do marbaritanauli? Ulaon ni ganup na porsea alai adong do ulaon panghobasion na nilehon tu sasahalak, ima ulaon partohonan.

            Turpuk jamita on pe mamodahon tu hita angka na porsea asa ngolunta pe unang ma ngolu na marlemeslemes, asa songon na godang na manghaholongi hita gabe tading na sintong manang ulaon na dihalomohn ni Debata. Unang ma mian ngolu na sai holan ma sai holan mambuat arta na olo sega di ngoluna gabe tading arta na manongtong jala na sumurung i. Sai itaulahon marbaritanauli, marbaritanauli marhitehite hata, pambahenan, parange, pingkiran. Jala unang gabe holan mangalului pujipujian, sangap, siadongan hita mangulahon na denggan di portibi on. Alai marhite ulaonta na denggan i boi paandaphon panandaion ni angka na porsea manang na so porsea i taringot Debata Jahowa marhite Jesus Kristus. Jala marhite i saluhutna, togu ma haporseaon ni angka na porsea jala na so porsea gabe porsea ma. Alai ingkon ingotonta ma, mangulahon na denggan i unang pangasahon gogo, siadongan, bisuk alai pangasahon ma pandonganion ni Debata di ngolum naung sumarihon na ringkot di ngolum. Amen.