BAHAN
JAMITA
Minggu
XII Dung Trinitatis
Minggu,
30 Agustus 2020
Ev.:
5 Musa 18: 9 – 14; Ep.: Ulaon ni Apostel 19: 13 – 20; Patik: Patik I – X
UNANG ULAOHON ULAON HAHOLOMON I (OKULTISME)
Pdt. Daniel Bonardo Pane, S.Th.
Patujolo
Di
hamajuon partingkian sinuaeng torop dope halak na porsea tu ragam pangajarion
na sian ulaon hagolapon. Ragam ni angka panjaha taringot ngolu na naeng ro,
angka primbon, zodiak, ramalan nasib dohot ragam ulaon hagolapon
na asing. Nang pe sai didok nunga lam tu majuna partingkian sinuaeng marhite
lam torop angka pangantusion dohot hamajuon tekhnologi, alai sai adong
dope na manghaposi angka gogo ni ulaon hagolapon marhite na maniop partahanan
ni daging, parmanisan, manjalo sahala manang sumangot sian angka naung mate,
martondung, manitiari dohot na suman tusi. Boto hamu ma, dihagigihon Jahowa do
angka jolma na manghaposi jala mangulahon ulaon sisongon i. Laos ido turpuk
jamitanta di ari Minggu, 30 Agustus 2020 on asa unang be hita parsidohot di
angka ulaon okultisme manang ulaon na mangasahon angka gogo ni sibolis na adong
di portibi on. Asa boi lam antusan dia do pangajarion ni Jahowa marhite hataNa
di 5 Musa 18: 9 – 14 on, masuk ma hita tu hatorangan ni turpuk.
Hatorangan Ni Turpuk
Torop
do na bisuk mandok anggo buku 5 Musa on ima na ginurithon ni si Musa, alai
pangantusion angka na bisuk mandok ndang na gabe si Musa na manggurithon buku
on na marsiala do i di buku 5 Musa on disurathon taringot hamatean ni si Musa
(bindu 34), jala dang tarjalo pingkiran si Musa manurathon taringot hamateanna.
Molo manat hita manjaha 5 Musa 1: 1: “On do hata, angka na pinaboa ni si Musa
tu sandok Israel...”. tangkas do na so si Musa manurathon buku on, alai sahalak
na manusun angka hata/ jamita ni si Musa tu bangso Israel. Di hata na asing
didok buku on deutronomis sian hata Gorik deutrouomiou. Hata on
tubu sian pamarentaon ni si Josia marhite pamarentaonna patupahon reformasi
di pamarentaonna nang songon i reformasi parugamoon ni bangso i (taon
632 – 631 sM). Di ulaon reformasi parugamoon na pinatupa ni si Josia
didapot nasida ma sada buku na gabe aturan harajaon (undang – undang
pemerintahan) jala disusun ma denggan (diredaksikan) songon na adong
sinuaeng dibahen ma Deutronoumis (artinya: Kitab Ulangan Torah/ Kitab
Ulangan)
Dijamitahon
jala dihatahon si Musa do di buku 5 Musa on taringot aturan na ingkon diulahon
bangso Israel andorang so masuk manang dung masuk nasida tu tano Kanaan. Jala
ingkon mananda do bangso i di huaso dohot hagogoon ni Jahowa Debata na so jadi
boi dipatudos tu angka gogo pardebataon dohot partondungon na adong di
humaliang pardalanan ni bangso i. Andorang so malua dope halak Heber (dalam
pengertian suku disebut suku Ibrani, dan setelah dibebaskan atau dimerdekakan
dari perbudakan Mesir, suku Ibrani menjadi satu bangsa, yaitu bangsa Israel)
sian tano Misir masa do adong partontangan huaso ni Jahowa Debata maralohon
huaso debata harajaon ni bangso Misir
marhite tungkot ni si Aron na gabe ulok manaluhon ulok na sian tungkot ni angka
partondung harajaon ni Misir (ida 2 Musa 7) jala masa do pangantusion ni
parporangan angka debata (divine war) marhite angka suruan ni
pardebataon ni sada bangso. Dang boi malua parsombaon tu hagogoon ni harajaon
ni sada harajaon, jala molo pe marporang manang maralo sada bangso, ima
hataridaan ni parporangan ni debata harajaon i maralohon debata harajaon na
gabe alona i. Hadirion (identitas) bangso i tarida do i sian
parsombaonna jala ise na disomba dohot huaso na disombana i.
Turpuk
jamita on ima sada sian jamita/ hata na pinasahat si Musa tu bangso Israel
andorang so masuk dope bangso i tu tano Kanaan (ay. 9): “ia dung masuk ho tu
tano silehonon ni Jahowa Debatam.” Tano Kanaan, ndada ala ni gogo ni bangso i
umbahen na boi tolhas bangso i tu tano Kanaan, ndada ala ni parsaoran umbahen
gabe mian bangso Israel di tano Kanaan, alai tano na nilehon, ima Jahowa,
Debata ni Israel. Jahowa, ima Debata ni Israel, IBANA do na mangalehon tano i
gabe parmianan ni bangso Israel, tano na tarpasupasu inganan ni habaoran ni
susu dohot situakniloba (madu). Ndang jadi ho marsiajar mangulahon
maniru biasbias na niulahon ni angka bangso on (ima bangso na adong di
humaliangna dohot bangso naung dibolus nasida). Aha na masa?
1. Masa pabolushon anakna sian api (mempersembahkan
anak laki – laki atau perempuan sebagai korban). Molo balik hita tu ngolu ni si
Abraham ima na naeng pasahothon ibana anakna si Ishak gabe pelean situtungan tu
Jahowa (1 Musa 22), dung i si Jepta (Panguhum 11: 29 – 40) masa do pabolushon
anakna sian api nang pe konteks na dua i marasing. Molo si Abaraham, Jahowa do
marsuru ibana laho pasahathon si Ishak gabe pelean situtungon, alai anggo si
Jepta sian bagabagana tu Jahowa (nazar) tontu adong paraloan na mansai
tangkas masa sian pandohan ni si Musa. Pabolushon jolma sian api (pengorbanan
seseorang menjadi korban bakaran) ima hasomalan na dipangke humaliang bangso
Mesopotamia. Jala hasomolan i marudut do di tingki si Musa pasahathon hatana on
(ima bangso Penesia, Amon, Kanaan dipatupa bangso i do mamelehon jolma gabe
pelean situtungon tu Molokh/ Milkom, ima debata na disomba bangso na mangulahon
i). Sada sitioponta ima: dihagigihon Jahowa do masa angka pabolushon anakna
sian api (mempersembahkan anak (manusia) menjadi korban bakaran kepada dewa/
ilah yang disembah) (bdk. 3 Musa 18: 21), nang pe disuru Jahowa si Abraham mamelehon
anakna si Ishak gabe pelean situtungon, ima sada ujian na pinamasa Jahowa tu si
Abraham, jala sundat do masa si Abraham mambahen si Ishak gabe pelean
situtungon ala Jahowa sandiri do patuduhon singkat ni i ima anak birubiru.
Songon i do nang si Jepta, boruna i na ingkon dipelehon gabe pelean situtungon disingkat
ma i tu borhat tu atas dolok laho tumatangis taringot tu habajuonna jala sian i
gabe hidup membiara/ selibat/ pengabdian di kemah suci.
2. Parunding manang sijujur ari,
sitabasi ulok manang parsibalik mata, sibahen panutupi, partondung manang
manungkun begu ni na mate (ay. 10 – 11). Angka ulaon i torop do masa di
humaliang bangso Israel jala mandapot bagian di harajaon do halak songon i di
harajaon mamangke halak sisonon i (biasanya dipakai dalam hal: penasehat
raja, pengawal pribadi raja, pelindung kerajaan). Laos dison ma ingkon
adong do hatandion manang parasingan ni halak Israel sian angka bangso na di
humaliangna, jala tangkas dohot andap hadirionnasida (identitas) bangso
i na mardebatahon JAHOWA (YHWH).
Dihagigihon Jahowa do halak angka na mangulahon sisongon i
jala ulaon sisongon i biasbias situtu (kekejian) do i tu Jahowa, jala
Jahowa sandiri do na pabalihon na mangulahon songon i. Hata pabalihon (menghalau)
ima martudutudu tu pandonganion, pangondian jala na so tupa songgop angka panghorhon
ni huaso na mangulahon sisongon i tu bangso i ai Jahowa do pangondian ni bangso
i. Nang pe angka bangso na humaliangnasida mangulahon i, alai anggo bangso
Israel dang jadi mangulahon i (ay. 14). Laos marhite ay. 14 on ma tangkas dipaadap
anggo Israel, ima bangso na pinillit i na so jadi parsidohot di ulaon i ala
angka ulaon na marisuang do ulaon sisongon i, jala na so jadi boi hot
partahanan ala martingki be do saluhutna sude angka gogo nang huaso na dipangke
angka mangulahon ulaon haholomon manang hasipelebeguon. Alai anggo Jahowa,
Debata, manongtong do ianggo gogo dohot huasoNa jala na so marpasohotan.
Refleksi Teologi
Di hamajuon na
masa nuaeng tongtong dope adong ulaon haholomon (okultisme). Ragam do angka
ulaon okultisme na masa nuaeng, jala boi do i di rumang haKristenon,
isarana manitiari laho marulaon, jumolo binereng almanak, dia do hirahira ayat
na suman, nda sude ari do ari tarpasupasu? Na mambahen Bibel manang silang gabe
panangkal angka sorop ni ulaon hasipelebeguon. Adong muse na paloashon
pamatangna manang pamatang ni keluargana gabe inganan hasandaran (nang pe didok
laho mangubati). Malo do sibolis i mambahen lilu jolma i marhite na manuman
soara, panghataion ni angka keluarga naung monding boha ma asa porsea jolma i
na ro do tondi manang begu ni keluarga naung monding i asa jaloon ma pasupasu
jala sahala sian i.
Tarlumobi molo
adong keluarga na siarsiaron, jumolo do dijou datu laho pamalumhon keluargana
i. Molo so marnamalu, i pe dijou Parhalado/ Pandita manang baliksa. Boasa boi
siarsiaron? Ala adong do dalan ni sibolis i umbahen boi jolma i siarsiaron. Boi
do i marhite panjagaan ni daging (paitok, simbora, dohot na asing), adong
marhite luka batin/ tekanan psikologi. Sude na i ima dalan manang pintu
masuk ni sibolis laho manegai jolma i. Molo adong na manimpan angka ajiajian,
ingkon ro do muse ajiajian na umgogo laho pataluhon ajiajian na ditiop i, sahat
tu matena.
Laos marhite
turpuk jamita on ma hita dijamitahon asa unang dilehon rohanta tu angka ulaon
haholomon i (okultisme) molo so olo hita gabe biasbias di adopon ni
Jahowa. Ingot ma hita 1 Petrus 5: 8 – 9: “Torang ma rohamuna, dungo ma hamu; na
maotaot do alomuna, sibolis i, songon babiat na marauang, mangalului
sibondutonna. Gomos ma hamu mangalo ibana marhitehite haporseaon; ingot hamu
ma: Ndang tarbahen so songgop angka haporsuhon sisongon i, nang tu angka
hahaanggimuna na di portibi on.” Di turpuk jamita di Minggu, 23 Agustus 2020 na
salpu didok si Paulus do marhite suratna 1 Korint 6: 19 anggo dagingta on bagas
joro ni Tondi Parbadia, ndada inganan tondi manang begu manang inganan ni
sibolison. Antong, unang be hita talu hinorhon ni angka ulaon hasipelebeguon na
binahen ni jolma pe. Tongtong ma hita marhaporseaon jala manghaposi Jahowa, na
tongtong do Jahowa mamasumasu hita jala mangondingi hita sian angka sisongon i.
Amen.
Tidak ada komentar:
Posting Komentar