Bahan Jamita 22 September 2013; Minggu XVII Dung Trinitatis

BAHAN JAMITA

MINGGU XVII DUNG TRINITATIS

Minggu, 22 September 2013

Ev.: Ulaon ni Apostel 4: 23 – 31; Ep.: Psalmen 2: 1 – 9 (7); SP: Mateus 28: 18 – 20

MARHIRAS NI ROHA MA MARBARITA NA ULI 

SALELENG HO MANGOLU!

Patujulo

            Molo dirajumi ngolu haKristenonta sahat tu sadari on, aha ma naung tapatupa marhite parange nang hata asa boi martamba bilangan ni halak na porsea, manang na gabe batu partuktukhan do tu halak na asing. “ai dia do da Didok do nian halak Kristen, jala ringgas marminggu, alai sai tongtong do holan marbadai karejona-hatana pe dang denggan begeon; parhalado do nian di huria alai pangalahona umjorbut sian halak na so hea marminggu” dohot angka hata na asing na patuduhon kekesalan ni halak mamereng parange ni halak Kristen di humaliangna. Sipata olo do sogo roha ala hona tu dirina molo didok hata sisongon i alai boi do i gabe evaluasi di ngolu haKristen.

            Ngolu haKristenon ndada ngolu na holan tarida marhite rupa alai boi do idaon sian parbuena, ima parange. Ngolu haKristenon ima ngolu parbaritanaulion. Jala dang na gampang na gabe marbaritanauli, godang do angka tantangan jala tantangan na masai dokdok ima hagiot ni daging dohot portibi on. Tarlumobi di tongatonga hamajuon ragam angka na masa nuaeng nunga lam tu godang be angka tantangan na diadopi halak Kristen laho manghangoluhon parbaritanaulion di ngoluna.

            Hamaolon ndang marlapatan marujung; jala hamaolon ndang marlapatan so. Tuhan Jesus sandiri pe nunga pabotohon hamaolon ni sahalak parbaritanauli (Joh. 15: 18 – 27; Lukas 10: 1 – 12;12: 1 – 12, dna). Panjouon ni marbarita na uli songon ngolu haKristenon ima ulaon na mansai maol jala ndang na gampang, gok angka tihas, hatahata na so tutu dohot ragam na asing na boi mambahen gabe gale laho marbaritanauli jala gabe mandele “ba, didalani ma ngoluon” na patuduhon pandelean marbaritanauli.

Hatorangan ni Turpuk

            Ndung manaek Tuhan Jesus tu Surgo, mulak tu hamuliaon ni Jahowa, ragam ma angka hasusaaan dohot sitaonon na mansai dokdok na ingkon diadopan ni angka apostel laho marbarita na uli. Ro do hasusaan marhite angka pangaleleion ni pamarenta dohot angka malim ni ugamo di huta i. alai hasusaan i ndada alani hajahaton ni angka apostel; alai ala ni barita na pinasahat angka apostel, barita na uli ima barita taringot holong ni Jahowa marhite Jesus Kristus. Barita na pinasahat ni angka apostel gabe sisogo do angka panggomgomi dohot angka malim ni ugamo alana barita hasintongan na pinasahat nasida; jala barita panghirimon haroro ni Raja ni saluhut angka raja, jala na ro harajaon ni Debata marhite Jesus Kristus jala ganup jolma ingkon marsomba tu Ibana, dohot do nang sude raja marsomba tu Ibana. Pasti do maol dijangkon angka panggomgomi barita i ai dirimpu do suda nama harajaonna jala dang manggomgomi be ibana. Jala nunga lam tu otik be angka jolma manangihon jamita ni angka malim, ai parjamita pangotootoi do nasida (pat. Mat. 7: 15), jala dilului ma ragam dalan asa dapot hasalaan ni angka apostel jala boi ma ditangkup nasida.

            Umbege barita na pinasahat angka apostel (di turpuk on Petrus dohot Johannes) rimas ma angka malim jala ditangkup ma apostel i. Panangkup ni dua apostel i marlapatan asa so ma ulaon parbaritanaulion taringot Jesus; jala ancaman tu angka apostel na asing asa unang be diuduti parbaritanaulion i. Alai dang adong didapot angka malim hasalaan ni angka apostel i jala dang adong alus na boi manguhum nasida. Jala dipalua ma 2 apostel i (Ulaon ni Apostel 4: 1 – 22).

            Dung malua apostel i, didapothon ma angka dongannasida jala dibaritahon ma sude na nidok ni angka sintua ni malim dohot angka pangintuai tu nasida uju so malua dope nasida (ay. 23). Dipaboa pe na masa i, ndada laho mambahen mandele angka apostel na asing laho marbarita na uli, alai asa diboto do situasi na masa jala adong ma strategi na boi binahen laho marbaritanauli, jala adong ma hiras ni roha laho marbaritanauli tu tingki na mangihut. Marhite ayat on paboahon tu hita mansai ringkot do angka dongan sahaporseaon rap hundul jala manghatahon dohot manangihon taringot tu ngoluna nang pe hansit manang na las roha (sharing) tu donganna. Alai manat ma hita laho mangulahon i. ingkon boi do lam patoguhon haporseaon ni na umbege; jala unang patubuhon dosa tu na umbege i. Jala marhite i, boi ma angka dongan marguru tu pengalamanna manang mangelehon pangapulon manang gogo molo songgop parungkilon. Alai ingkon manat do muse marnida ise donganta manangihon pengalaman i. Sipata ala ni tulusta manghatahon gabe i do dibaen muse gabe alatna laho mandabuhon hita; jala laos olo muse pasahathon tu halak na asing (surat kabar berjalan).

            Umbege hata na dipasahat 2 apostel i, gabe joujou ma nasida tu Jahowa marhite tangiangnasida. Joujou on ima manaringoti angka bagabaga taringot hamaolon manang sitaonon na masa tu angka na miniahanNa (ay. 24 – 26; Psalmen 2: 1 – 2). Ndung dibotonasida bagabaga i ndang na gabe mambahen nasida so manang marujung manguduti ulaon parbaritanaulion, alai marhite naung dihaporseaon nasida di pangurupion ni Jahowa jala bagabaga ni Tuhan Jesus, na sai tongtong mangaramoti nasida rasirasa ro ajal ni hasiangan on. Laos marhite tangiang i do muse mangido hiras ni roha laho marbarita na uli, jala mangido asa disurdukhon ma tanganNa laho patupahon hahisaron ro di angka tanda dohot halongangan marhitehite Goar ni Jesus (ay. 27 – 30). Marhite tangiang on ma tanda jala boi antusan balga na i hiras ni roha nasida laho marbarita na uli; mambaritahon taringot holong ni roha ni Jahowa marhite Jesus Kristus nang pe ragam jala torop angka hamaolon na naeng diadopi nasida, sahat tu hamagoan hosa pe tong do marhiras ni roha nasida. Asa sude jolma somba holan tu Jahowa marhite Jesus Kristus sambing.

            Di tingki na masa i, humuntal ma inganan parpunguannasida jala gok Tondi Parbadia ma saluhutna, jala gabe marhiras ni roha ma nasida manghatahon hata ni Debata (ay. 31). Marhiras ni roha pe angka apostel ndada ala ni gogo, pingkiran, manang siadongannasida, alai holan ala gok Tondi Parbadia do nasida (ida Johanes 14: 15 – 31). Tondi Parbadia ndada laho mambahen gale jala mabiar laho marbarita na uli. Jala marnida jala mambege angka jamita manang ulaon ni angka apostel lam torop ma angka na porsea jala mangido asa tardidi. Laos sude ma disurathon si Lukas angka na masa di huria na parjolo i di na marbarita na uli, hombar tu na tinonahon ni Jesus di Mateus 28: 18 – 20.

Hahonaan ni Turpuk

            Sadari on nunga maol be tarida hasadaan ni angka halak Kristen laho marbarita na uli. Torop do halak Kristen maila manang mabiar laho marbarita na uli. Ingkon manat do hita mangalapati taringot marbarita na uli. Tuhan Jesus manuru angka siseanNa ndada laho gabe maragama Kristen, alai laho paboahon nunga ro be Jesus Kristus jala nunga patar be holong ni roha ni Jahowa marhite Jesus Kristus na padamehon Debata tu jolma. Padamehon na marlapatan, asa diida ganup jolma do naung binsar do panondang  jala tarjou ma nasida sian hagolapon. Nang pe ujungna nasida manghatindanghon porsea tu Tuhan Jesus jala tardidi gabe sahalak siihuthon Kristus.  Marbarita na uli ndada na martujuan asa torop ruas ni huria, alai asa torop halak na porsea tu Tuhan Jesus.

            Marbarita na uli ndada sae holan marhitehite pamangan alai ringkot do marhite parulaon manang parange. Songon na didok Pdt. Dr. Justin Sihombing, “jamitam do parange, parangem do jamita” na marlapatan ndang boi malua jamita sian parange. Alani i, songon halak naung dipalua jala targoar sahalak na Kristen (ndada holan tarsurat ugamo Kristen) parsidohot do hita gabe parbaritanauli.

            Adong do pigapiga hal na boi impola jamita minggu on ima:

1. Ulaon rap hundul jala manghatahon pengalaman ngoluna di pangaramotion ni Jesus (las ni roha manang arsak ni roha). Nunga maol be dapot ulaon na songon on. Nunga umgodang jala sibuk tu ulaonna jala gabe so adong be tingki manghatindanghon (bersaksi) di pangaramotion ni Jahowa jala nunga maol be manangihon kesaksian ni jolma, alai molo taringot hahurangan ni jolma na asing dohot margossip, boi do gabe lalap jala suda tingki so parbinoto.
2. Ulaon rap martangiang. Ulaon rap martangiang ima ulaon na ingkon adong hasadaan jala dos ni roha. Ulaon on pe nunga maol be jumpang. Nunga marsiboan ragamna be halak Kristen tarlumobi angka parhalado. Gabe masa marsiallangan roha na gabe ujungna marsigasipan ujungna bola ma huria manang parsaoran i. songon dia be boi lam torop halak na porsea molo holan na marbadai do halak Kristen songon i nang parhaladona? Boha do boi rap martangiang mangido pangurupion marbarita na uli marhite parange dohot hata molo marsiboan ragamna be, dang adong dos ni roha.
3. Unang ganggu hita marbarita na uli di portibi on. Ndada sian portibi on didapot bagabaga pangurupion dohot pangaramotion ni Jesus. Jesus sandiri do na paboahon sandiri “sai na donganangku do hamu ganup ari rasirasa ro ajal ni hasiangan on” (Mateus 28: 20). Jala nunga dibagabagahon Jesus sandiri Pangurupi songon tanda pandonganionNa marbarita na uli.
4. Unang pangasahon gogo marbaritanauli, alai Tondi Parbadia ma na margogoihon jala mambahen hiras ni roha marbarita na uli.
5. Dipargogi Jahowa ma hita gabe parbaritanauli di humaliangta, asa lam martamba jala torop halak na porsea tu Jesus Kristus. Amen.