DANIEL PANE

SELAMAT DATANG DAN MENIKMATI YANG TELAH DISAJIKAN

Kamis, 12 Juli 2012

Bahan Jamita 26 Agustus 2012


BAHAN JAMITA
MINGGU, 26 AGUSTUS 2012
 MINGGU XII DUNG TRINITATIS
PSALMEN 34: 15 – 22 (Epistel: Efesus 6: 10 – 20)
 Cal. Pdt. Daniel Bonardo Pane, S.Th.



Martua Ma Jolma Na Manghaposi Jahowa !
Patujolo
            Di parngoluan sadari on, ragam do naung tabege manang tatangihon ende sian ragam ni angka na masa manang tona na pinasahat di bagasan ende i. Adong do ende taringot holong, las ni roha, habot ni roha dohot na asing. Boi do diboto aha do lapatan manang tona manang aha na masa tu si pencipta  sian sada ende marhite angka hata na tarsurat di ende i.
            Songon i do turpuk jamita di tingki on. Sada ende sian parpsalmen na marisihon panosoion asa manghabiari Jahowa na tarida sian pos ni roha jala manghirim tu Jahowa. Manghabiari Jahowa ndang na marlapatan mabiar tu na boi patubuhon manang mangkorhon hamagoan manang hamatean (tarsongon manghabiari panangga, ulok, dohot angka na boi parrohon hamatean manang hamagoan). Mangkabiari Jahowa marlapatan adong haundukhon ni roho, saundukunduk na maradophon Jahowa dohot huasoNa. Unduk mangulahon angka na naung dipatikhon ni Jahowa tu ibana.

Hatorangan ni Turpuk
            Songon naung dipatorang taringot turpuk jamita on, ia turpuk on ima sada ende sosososo laho manghabiari Jahowa, Debata pargogo na so hatudosan jala na mangalehon hangoluan tu ganup jolma na manghaposi Ibana. Turpuk on ima udut ni ende pamujion ni si Daud marningot haluaonna sian angka musuna. Dihilala si Daud balga ni pandonganion dohot pangaramotion ni Jahowa di ngoluna maradophon angka musuna. Jala dison ma panindangion ni si Daud taringot huaso ni Jahowa tagan di tongatonga parungkilon maradophon si Abimelek. Dihajonjonghon si Daud do hinadenggan dohot hinauli dohot hinatonggina pangaramotion; denggan basa dohot panggomgomion ni Jahowa di ngoluna (ay. 1 – 9).
            Andorang so di turpuk on, disosoi do laho manghabiari Jahowa. Songon na dipatorang di patujolo, manghabiari Jahowa ndada songon manghabiari angka binatang buas. Alai manghabiari na didok dison ima marhaposan jala adong haserepon dohot haundukhon ni roha maradophon Jahowa. Unang ma dipangasahon gogona, sinamotna, manang pingkiranna, manang marginjang ni roha maradophon Jahowa. Jala adong roha na rade laho manangihon angka pangajarion tu hata ni Jahowa dohot mangulahon angka na denggan, jala na boi mangorom dila maradophon hajahaton, jala bibir maradophon pangkuling sipaotooto (ay. 10 – 14).
            Di ayat 15 adong do pangajarion laho sumurut sian hajahaton, jala mangulahon na denggan, mangalului hasonangan jala mampareaki i. Pasupasu na godang ima roha na sonang. Ganup jolma pasti do mangalului dalan asa boi pasonanghon roha. Di na laho mangalului manang mandapot hasonangan roha i, ragam do dipangke torop jolma dalan manang sangkapnasida, nang sude na i angka hajahaton. Mansai maol do luluan angka jolma na mangalului hasonangan ni roha marhitehite ulaon na denggan. Ulaon na denggan na didok dison ima ulaon na marpardomuan tu hata ni Jahowa nang marhitehite hata nang pambahenan. Mangulahaon na denggan na didok dison dohot do marlapatan laho mangorom angka hata nahaluar sian pamangan. Parungkilon na diadopi si Daud ima parungkilon sian hata na so tutu maradophon ibana sian jolma na mansogohon ibana. Boi do angka na jahat haluar sian pamangan songon i pe angka na denggan. Boi do mansai tangkas dipaingot si Daud di ayat 14, “sai dijaga ma dilam maradophon hajahaton, jala bibirmu maradaophon panghuling sipaotooto.
            Diparhatopot si Daud do di ayat 16-19 dipandonganion ni Jahowa tu angka na partigor. Partigor na didok dison ima partigor mangulahon angka na denggan jala manghagigihon angka hajahaton. Djala tangi do Jahowa di ganup angguknasida. Ayat 16 marlapatan do Jahowa ndang hea manadinghon jolma na marhaposan jala mangulahon na denggan punjung manaon angka sitaonon. Songon dia do dokdok ni Jahowa, anggukhon ma tu Jahowa manang marhaposan tu Ibana huhut manjugulhon laho mangulahon angka ulaon na denggan. Donok do Jahowa tu ganup jolma na bojok marroha, jala ditumahi do angka na pogos tondi (ay. 19) na marlapatan dipargogoi Jahowa do angka partigor dibagasan angka sitaononna. Margogo do jolma si partangiang dohot na marhaposan tu Jahowa ditongatonga parungkilonna.
            Di ayat 20 diparhatutu si Daud do lan manang ragam ni angka parniahapan ni partigor di portibi on. Laos on do na masa sahat tu sadari on. Godang do jolma manghosomi angka na mangulahon angka hatigoran (hatigoran na didok dison na marpardomuan tu lomo roha ni Jahowa ndang hatigoranna sandiri). Boasa? Ala jolma partigor patuduhon manang papatarhon angka pangalaho manang parange ni angka jolma na lipe tu na dihalomohon ni Jahowa. Jala ganup angka naung mamboto manang mananda hatigoran i, torop do na manabuni hatigoran i hinorhon ni biar manang adong na dijagana. Alai halak sisongon i, dang boi didok halak partigor. Nang pe lan manang ragam angka parniahapan ni angka partigor, Jahowa do mangaramoti holiholina sudena, ndang marponggol nanggo sada. Holiholi boi do marlapatan tu hatoguon manang hot. Berarti ayat 21 marlapatan molo Jahowa mandongani manang mangaramoti angka jolma partigor, tung na so olo be partigor i molengoleng haporseaonna.
            Di ayat 22 – 23, dipabotohon do, ai dang marisuang angka hosa ni partigor maradophon Jahowa. Marhapatean do angka parniahapan ni angka partigor tu hasonangan ni roha manang haluaon sian angka parniahapan tu las ni roha. Alai ngolu ni angka parjahat marhapatean do i hamagoan manang hasalpuon songong salpu ni portibi on molo jumpang tingkina.

Refleksi – Teologi
            Torop do jolma maol mangulahon ulaon hatigoran di portibi on, jala maol do jumpang angka jolma na mangulahon hatigoran. Marpardomuan do mangulahon hatigoran tu mangulahon na denggan. Ragam do angka alus na binahen ni angka jolma na sasintong na mangambati jolma i laho mangulahon angka hatigoran. Parungkilon ni angka partigor boi do marharoroan sian hata na tutu na pinasahat angka jolma tu ibana, na boi mambahen ibana songon marisuang jala ganggu laho manguduti ulaon hatigoran.
            Tung na so hea do dibagabagahon hasonangan na salelengna sian portibion tu angka jolma partigor, alai na dibagabagahon do las ni roha manang hasonangan salelengna sian Jahowa molo jumpang tingki naung ditontuhon Jahowa. Molo mansai hansit manang dokdok situtu parniahapan i, tongtong ma martangiang huhut pasahathon sude anka parniahapanna i huhut marpos ni roha.
            Ulahon ma ulaon hatigoran, nang pe torop jolma manghosomi ho ala ulaon hatigoran i jugulhon ma tongtong mangulahon hatigoran, ai ditatap Jahowa do ulaonmu na tigor i. Alualuhon ma angka parniahapanmu tu Jahowa huhut haposi ma Ibana. Ditatap do angka parngoluanmu huhut ditangihon do angka anggukanggukmu. Tongtong jala sahat ma i di hahajumpang ni tingkina. Ndang dipaloas Jahowa angka jolma partigor i punjung di parniahapanna.
            Halak na marhaposan tu Jahowa tontu do boi ibana manahan molo ro pe angka hata sian dila ni angka parjahat dohot bibir ni angka sipaotooto. Martua ma jolma molo dibahen Jahowa gabe haposanna jala manahan di ujungna. Ai ndang marisuang angka ulaon hatigoran i maradophon Jahowa molo dibagasan uduk dohot serep ni roha tu adopan Jahowa. Dipargogoi Jahowa ma hita laho manghagigihon angka hajahaton huhut laho manghangoluhon angka ulaon na denggan. Martua ma jolma na marhaposan tu Jahowa dibagasan ngoluna sahat ro di ujungna. Amen.



                         
           


Tidak ada komentar:

Poskan Komentar