KHOTBAH PENTAKOSTA I, 27 MEI 2012

Roma 8: 22 – 27

Anak dohot Panghirimon

Patujolo

            Somal na do angka jolma manghirim. Jala panghirimon torop ni halak ima panghirimon na denggan tu dirina. Tung na so adong dope hujumpang sahat tu sadari on halak na manghirim na roa tu dirina, tontu do angka na denggan dihirim. Halak na manghirim patuduhon halak na nampuna visi jala optimis. Molo halak na manghirim, tontu adong do na ingkon sibahenonna asa jumpang songon na dihirimna i. Tudos ma i tu halak na memiliki visi, ingkon adong do misi na binahen asa jumpang visi i. On ma na pataridahon, molo panghirimon na mangolu i ndang na holan manghirim molo so diihuthon ulaon. Isarana, molo adong sahalak anak na manghirim (bercita-cita) gabe sahalak dokter, molo bermalas-malasan do ibana tontu do ndang jumpang songn na dihirimna i (cita-cita); alai molo ringgas do ibana mangulahon ulaonna na berhubungan tu na dihirimna i, tontu do jumpang ma songon na dihirimna i.

            Songon i do nang diturpuk ni jamita on, na patanakhon manang patanghon panghirimon ni huria na parjolo i nang songon i tu hita na manjaha turpuk on, taringot sihirimonna di bagasan haporseaonna. Molo manat tajaha turpuk on dimulai sian ayat 1, dipabotohon si Paulus do asa huria i mangolu di bagasan Tondi, jala Tondi mian di bagasan huria i. Laos i do na pataridahon, molo ibana mian di bagasan Tondi jala Tondi maringanan di ngoluna, ido anak ni Debata. Molo nunga mian Tondi i di bagasan ngoluna, marlapatan ma i jolma i unang be mangadop tu daging, jala marguru tu daging. Molo marguru tu daging do jolma i, mate ma ibana. Molo nunga mian Tondi i, marparange ma songon halak na ginohan ni Tondi jala marparbuehon parbue ni Tondi. Jala marhite olo ngolunta ditogihon Tondi, gabe patar ma hita gabe anak ni Debata (ay. 1 - 16).

            Tondi dia do na didok di turpuk on? Tondi na didok di turpuk on ima Tondi Parbadia, laos i do na dipestahon sude huria na adong di gulmit ni portibion. Pesta hasasaor ni Tondi Parbadia. Tondi na sian Jahowa. Hasasaor ni Tondi Parbadia, marlapatan jala papatarhon hasasaor ni Jahowa dohot hasasaor ni Jesus Kristus marhite Tondi na Badia na sian Jahowa, jala na pinabagabagahon ni Kristus andorang mate Ibana (Joh. 14).

Hatorangan ni turpuk

            Sahat ma tu hatorangan ni turpuk. Songon na pinatorang di patujolo, andorang Jesus mate Ibana dibagabagahon do Tondi Parbadia (Joh. 14: 16-24). Jala jumpang ma na pinarbaga-Na i marhitehite hasasaor ni Tondi Parbadia tu angka apostel dohot tu huria na parjolo i. Marhite hasasaor ni Tondi i, pataridahon na saor do Jahowa marhite Tondi-Na na badia ima na patubuhon hagogoon di halak na gale manang na maheu, apulapul tu halak na tariluilu, asa jumpang panghirimon ni halak na porsea di bagasan Kristus nang pe ingkon mangodopi haporsukhon manang parungkilon sian portibi on. Panghirimon ni halak Kristen iman panean di hangoluan saleleng ni lelengna.

            Diparhatopot si Paulus do parungkilon manang sitaonon i mansai dokdok situtu do gabe sahalak Kristen di masa i. di tongatonga na masa i, dipaingot ibana do status ni ha-anakhon. Halak na naung digohi Tondi jala tinogihon Tondi, ima anak ni Jahowa, na pataridahon hajonokhon ni hubungan tarsongon anak tu amana. Secara teologi, anak tu bapana jonok do. Anak dang mabiar tu amana, ala amana i parasiroha jala mamboto dia do na denggan tu ianakhonna, jala anak manghasaphon amana. Adong kedekatan na mansai uli. Songon i do hita maradophon Jahowa. Jahowa Amanta, Jesus gabe anak siahaan laos marhite Jesus hita diait gabe anak ni Jahowa, Debata na gogo i. Molo nunga anak hita, marlapatan ma i hita pe ingkon unduk do maradophon Jahowa, Amanta marhite Kristus. Molo unduk do hita tu Ibana, gabe panean ma hita.

            Ala mansai dokdok do sitaonon i ndang hea Jahowa selaku Ama manadinghon punjung hita songon anak-Na ala haporseaon dibagasan Kristus. Dilehon ma Tondi Parbadia saor, tu huria na parjolo i, jala sahat ma tu hita sadari on, sai tongtong do dilehon Jahowa Tondi na badia i laho margogoihon hita jala manogunogu hita tu panghirimon na mangolu i. Laos i do na tapestahon di pentakosta.

            Andorang di ayat 22 dipabotohon do dokdok ni sitaonon di portibi on jala huhut do dipabotohon taringot panghirimon: paluaon ni Jahowa ma na tinompa i sian pangadopan hamagoan, sahat tu haluaon hasangapon na di angka anak ni Debata (ay. 21). Saonari, sadihari do jumpang panghirimon i? Tung na so adong do jolma di portibi on na  mamboto sadihari do panghirimon i jumpang? Alai nang pe songon i, sai tongtong ma manghirim, jala na tahirim i tontu do na so taida dope, molo nunga taida ndang be panghirimon goarhon i. Sarupa ma songon sahalak anak na manghirim gabe sahalak dokter. Anak na manghirim gabe sahalak dokter ima halak na so dokter dope; molo nunga gabe dokter do ibana, ndang gabe sihirimon be dokter i. songon i do nang jolma di panghirimonna. Nang pe so diida, alai dapotan ma ibana di jumpang ni panghirmon i molo huhut dibagasan parulaon dohot tinogihon ni Tondi na badia i. (ay. 22-25).

            Songon naung dipatorang, ia parsitaonan ni huria na parjolo i mansai dokdok do jala boi do mambahen halak Kristen na parjolo i manang huria na parjolo i mandele manang gotap haporseaonna, dang manahan di parungkilon na diadopi. Jahowa songon sada Ama dang hea manadinghon anak-Na punjung di sitaononna. Dilehon do Tondi-Na na badia i laho mangurupi di hagaleon manang sitaonon, jala marhite Tondi i do manghondihon huhut mangajari/ marbisuki laho mangido pangidoan na tama huhut marhite hata na hinoihon na so tangkas hinatahon (bhs Indonesia: keluhan-keluhan yang tidak terucapkan) tu Jahowa, Amanta. Jahowa do umboto saluhutna, jala dipatupa Ibana do dia do na porlu di anak na hinaholongan-Na jala adong do siteanon ni ganup halak na boi manahan ro di ujungna.

Refleksi-Teologi

            Gagal menghasilkan ke-tidakada-an. Sesuatu yang gagal berarti tidak sampai atau tidak mendapatkan apa yang diharapkan. Jatuh, rumit atau gelombang, atau kekhawatiran bukanlah suatu kegagalan tetapi suatu proses untuk dapat bangkit untuk mendapatkan apa yang diharapkan atau yang dicita-citakan. Kecerobohan atau putus asa adalah kunci menuju kegagalan. On ma pandohan na mandok asa unang halak Kristen gagal mandapot siteanon ni halak Kristen na manahan ro di ujungna. Molo nunga jumpang na dihirim i, pasti do dang magopo angka hansit na ditaonna i di tingki andorang jumpang na nihirim i. Tarsongon sahalak ina naeng manubuhon anak/ boru buhabajuna. Ragam do sitaonon na diadopi di masa denggan pamatangna (hamil). Di tingki naeng manubuhon buhabajuna i, mansai hansit situtu do sitaononna. Alai dung diida ibana na nihirim i ima buhabajuna i, angka sahit na diadopi di tingki manubuhon, dang diingot be i, jala ndang marlapatan martimbangkon las ni rohana mandapot na ni hirimna.

            Songon i do hita di parngoluan on. Molo songgop do parsitaonan na dokdok manang na borat, unang pintor hatop mangalului gogo sian portibi on, manang mangasahon gogona sandiri. Adong do Jahowa, Ama pargogo jala parasiroha na so hatudosan. Pangido ma Tondi-Na i asa i margogoihon huhut mangajari huhut mamparbisuki hita di tongatonga parsitaonon i. Tondi i ma na margogoihon, mangapuli huhut na mangondihon hita mangido tu Ama i di tongatonga parsitaonon di ngolunta.

            Molo nunga songgopan ni Tondi Parbadia, parulaonta pe ingkon ma parulaon na marparbuehon parbue ni Tondi. Unang be marparange marguru tu hisaphisap ni daging dohot portibi on. Manahan ma ro diujungna, paima jumpang tingki panghirimon ni haporseaonta. Ulahon ma ulaon ni halak na mian Tondi parbadia. Unang asangi gogo manang sinadongan, alai loas ma Tondi na badia i mangaramoti margogoi, huhut manogu laho patanghon haporseaon dohot panghirimon i. Amen.