BAHAN JAMITA EPISTEL: 1 KORINTUS 1: 4 - 9

 BAHAN JAMITA EPISTEL 
MINGGU MISERICORDIAS DOMINI 
MINGGU, 04 MEI 2025 
1 KORINTUS 1: 4 – 9 

AI NAUNG GABE MAMORA DO HAMU 

DI BAGSAN IBANA DI SALUHUTNA I

Pdt. Daniel Bonardo Pane, M.Th.

 Patujolo 

Parhorasan ma di hamu na hinaholongan di bagasan Tuhan Jesus Kristus. Marhite na husurathon on ma hupasahat hami Selamat ulang taon ma tu hurianta HKI na pa-98 taon. Nunga godang jala ragam naung dibolus hurianta HKI angka parngoluan mamungka sian 01 Mei 1927 sahat tu tingki on. Ndang tarpajojor jala ndang tarhabilangan sude angka pasupasu ni Jahowa Debata na tongtong manumpahi huria HKI (parhalado dohot ruasna) di ragam parngoluonna jala hombar tu hinaringkotna be. Ragam do hamaolon na niadopan ni angka natuatua na pajongjong hurianta HKI alai boi do i saluhutna disalpuhon jala dipasidung holan ala asi ni roha dohot denggan basa ni Jahowa Debata tu HKI. Molo pe didok HKI mardalan sian hapogoson alai ndang gabe pangambati tu hamajuon ni huria HKI sahat tu tingki on. Sada sian tolu na diparsinta angka jolma di hasiangan on ima hamoraon. Autsugari disungkun, olo do hita mamora? Tontu torop pe adong mandok olo. Molo hata ni natuatua mandok: simbora gukguk, duldul otik; mamora hita luhut, alai sumurung ma au saotik. Pandohan i boi do dilapati mamora ma saluhut parhalado dohot ruas ni HKI, alai sumurung ma di au, di hami, di hurianami di HKI nami otik sian saluhutna. Turpuk jamita sadari on ima di ari parolopolopon HKI naung gonop marumur 98 taon ima manaringoti hamoraon na ingkon adong di hita saluhutna. Hamoran na songon dia do na dipangido turpuk jamita on? Antong masuk ma hita tu hatorangan ni turpuk. 

Hatorangan ni Turpuk 

Ia luat Korint ima sada huta na mansai ribur jala torop angka partigatiga sian desa na ualu laho martigatiga di labuan huta Korint. Marpangkhorhon do hariburon dohot hatoropon i di ragam pangantusion manang parbinotoan sian angka na bisuk na binoan sian luatnasida be. Torop do halak Kristen di huta Korint on angka na mora manang siparadongan marhite jamita manang panghobasion ni si Paulus uju mian ibana di luat Korint. Dung borhat si Paulus manguduti panghobasionna, hinorhon ni ragam angka jolma na ro mamboan hasomalan, parbinotoanna be tu luat Korint masa ma parbolatbolatan di luat i. parbolatbolatan i marpanghorhon di hasesega parsaoran ni halak Kristen di huria i. Tutu do nian mamora nasida di siadongan, alai molo di parsaoran na denggan dohot di pangantusion taringot tu ulaon partondion ndang boi dope dohonon  nasida naung mamora. Umbege na masa i hirahira taon 53 – 56 disurathon si Paulus ma suratna on, na marisihon taringot pangajarion haKristenon ni halak Krsiten di luat i dohot angka parulaon ni halak Kristen. Dibuhai do turpuk jamita on (ima ay. 4) na patuduhon las ni roha ni si Paulus marnida hamajuon dohot lam torop halak na di huta Korint gabe Kristen. Ndada dietong si Paulus hinorhon ni jamita manang panghobasionna, alai holan ala asi ni roha ni Debata sambing do naung nilehonna di bagasan Jesus Krsitus. Di holan di bagasan Tuhan Jesus Kristus sandiri do mamora hita di saluhutna, di sandok hata nang di pangantusion (ay. 5). Mamora di saluhutna, ndang na martudutudu holan di sihumisik manang di siadongan. Alai hamoraon di saluhutna ima hamoraon di pangantusion dohot di parbinotoan taringot basabasa ni Debata di ngoluna. Mamora ma nasida di saluhutna. Na marlapatan mamora ma di pangantusion taringot Tuhan Jesus Kristus, mamora di angka pambahenan na denggan, mamora di angka poda dohot pangajarion na sintong, mamora di ragam silehonlehon, jala mamora di angka ulaon parasinirohaon songon na pinatupanasida laho mangurupi huria na pogos songon na masa di huria na di huta Jerusalem (ida ay. 5 – 6). Molo nunga mamora di saluhut marlapatan ma i na so masa be na hurang di ngolunasida. Tung mansai singkop do dihilala roha ni si Paulus di hamoraon ni huria na di Korint. Ndada holan mamora diparhepengon, di arta, di siadongan alai naeng ma mamora di partondion, mamora di parulaon na denggan. Marsihohot ma nian huria i di saluhut hamoraonnasida huhut maimaima di hapapatar ni Tuhan Jesus Kristus (ay. 7). Tontong ma nian mamora huria na di Korint di hamoraon partondion, mamora di angka ulaon parasinirohaon, mamora di angka pangajarion, poda dohot ragam pangantusion na tontu di hata ni Debata huhut maimaima di ari ni Tuhanta Jesus Kristus (ay. 8). Ari ni Tuhan martudutudu do tu ari haroroNa na paduahalion, ari di na ro Ibana di bagasan hamuliaon surgo, ari manang partingkian paruhuman na parpudi mamboan angka badiaNa tu hangoluan salelengnilelengna. Haposan do Debata naung manjou hita tu parsaoran dohot AnakNa Tuhan Jesus Kristus (ay. 9). Dipatupa Debata do haluaon tu ganup jolma di bagasan hadirion ni Tuhan Jesus Kristus. Ibana do na patupahon panobusion dohot hasesaan ni dosa tu ganup jolma (pat. Joh. 3: 16 – 17). Marhite panobusion dohot hasesaan ni dosa masa ma pardengganan parsaoran jolma tu Debata jala parsaoran jolma tu jolma. Ndang masa be parbolatbolaton, ndang masa be haguntuoron di huria. Alai ngolu parhahamaringgi on ma na masa disi, na marsipasingkopan di na humurang. Jala ido na gabe hatardiaan naung mamora di partondion dohot di ulaon parasinirohaon, ndada holan mamora di parartaon manang sinamot. 

Hahonaan ni Turpuk 

Di ulang tahun pa-98 taon HKI di tanggal 01 Mei 2025 taon on, dipabotohon do tu hita naung mamora do hita di bagasan Tuhanta, Tuhan Jesus Kristus. Autsugari tarimangrimangi pardalanan ni hurianta sian taon 1927 sahat 2025 on, nang pe ragam angka hamaolon na niadopan ni HKI alai na so jadi pasombuon ni Debata Jahowa punjung di manaon i. sai ditumpakhi Jahowa Debata do basabasa dohot asi ni rohaNa tu HKI umbahen sahat tu tingki on HKI hot jongjong laho patuduhon hamoraonNa di ganup panghobasion ni HKI di portibi on. Jotjot do didok HKI huria na metmet, huria na pogos alai molo nunga di bagasan Tuhan Jesus Kristus hita HKI ima huria na bolon jala mamora. Bolon jala mamora do HKI di ganup ulaon panghobasionNa. Dia ma hataridaan habolonon dohot hamoraon ni HKI? damang dohot dainang na hinaholongan, habolonon ni HKI ima Hata ni Debata, hamoraon ni HKI ima hamoraon di partondion dohot ulaon parasinirohaon. Ndada holan di balga ni gedung, godang ni sinamot, arta manang uang kas ni huria na patuduhon bolon manang mamora HKI. mamora ma HKI di pangantusion dohot habisukhon taringot Hata ni Debata dohot angka ulaon na hombar tu lomo ni roha ni Debata; mamora do HKI di angka ulaon parasinirohaon dohot di panumpahion di angka na hurangan (marhite PA. Zarfat dohot ulaon ulaon Diakonia), mamora do HKI di angka ulaon parbaritanaulion, mambaritahon habalgaon dohot hatimbulon ni Jahowa Debata (marhite ulaon Marturia), mamora do HKI di angka ulaon parsaoran tu Debata dohot dongan jolma na tongtong rap marsitumpahan di angka ulaon las ni roha dohot habot ni roha (marhite ulaon Koinonia) dohot lan hamoraon na so tarpajojor. Molo masa sisongon i, ndang be begeon barita masa parbolatbolaton di huria HKI, masa hagunturon dohot hasesega huria holan ala ni parhepengon; ndang masa be na so marsiantoan parhalado tu parhalado, manang parhalado tu ruas, manang ruas tu ruas; dohot lan ulaon na jat na asing. Manghorhon hadengganon do sude hamoraon na sian Debata ndang mardongan hangaluton dohot hasesega. Antong, hita sude ruas dohot parhalado ni huria HKI, tapaduhon ma na tutu do HKI ima huria na bolon dohot mamora. Ndada holan mamora di sinadongan, alai mamora di saluhut ulaon na denggan, amen.

BAHAN JAMITA EVANGELIUM: PSALMEN/ MAZMUR 47: 1 - 10

 BAHAN JAMITA EVANGELIUM
MINGGU MISERICORDIAS DOMINI 
 
PSALMEN 47:1-10 

AI NAUNG GABE MAMORA DO HAMU DI BAGSAN IBANA DI SALUHUTNA I 

Pdt. Daniel Bonardo Pane, M.Th. 

Patujolo

 Tabe dohot parhorasan ma di hamu saluhutna damang dohot dainang na hinaholongan di bagasan Tuhan Jesus Kristus. Di ari na uli di ari na denggan on, maarolopolop jala marlasniroha ma hita ala na tongtong do Jahowa Debata manggomgom dohot mangaramoti dohot manumpahi hita di saluhut angka ulaon na denggan songon i nang basabasa na nilehonNa di ngolunta. Ibana do Debata na hamuliaonNa mangatasi saluhut hamuliaon na adong di portibi on. Patut do marlasniroha dohot marolopolop hita saluhutna marningot di saluhut pambahenan dohot silehonlehon ni Debata tu hita. Ndang tarpajojor jala ndang tarhabilangan saluhut angka basabasa ni Debata di ngolunta. Turpuk jamita evangelium di minggu Miserikordias Domini manjou hita tongtong manghalashon dohot mangolophon sude angka pambahenan ni Jahowa di ngolunta. asa lam tu antusna hita mangantusi turpuk jamita on, masuk ma hita tu hatorangan ni turpuk. 

Hatorangan ni Turpuk

 Ia Psalmen 47 ima ende na marharoroan sian anak ni si Kora (ay. 1). Ise do si Kora dohot anakna jala aha do ulaonna di peribadahan halak Israel? Di Psalmen adong 7 ende (psalmen) na marharoroan sian anak ni si Kora ima Psalmen 42, 45, 46, 47, 48, 87 dohot 88. Di Padan Na Robi adong do 4 horong na margoar Kora. Na parjolo, ima na manguluhon halak Edom pinompar ni si Esau (1 Musa 36: 5, 14, 18; 1 Kron. 1: 35); na paduahon, ima uluan ni bangso Edom anak ni si Elipas (1 Mua 36: 16); na patoluhon, Korah ima anak ni Hebron (1 Kron. 2: 43); na paopathon ima Kora anak ni Jisar, sahalak malim sian pomparan ni Kehat horong ni Jisar (2 Musa 6: 21; 4 Musa 26: 9 – 11). Di partingkian si Musa dohot si Aron manguluhon Israel haruar sian parhatobanon Misir marpungu ma angka malim sian horong ni si Kora jongjong mangalo si Musa. Marpanghorhon do na binahennasida i patubuhon rimas ni Debata (boi do idaonta rimas ni Debata tu horong ni Kora di 4 musa 26: 9; 5 Musa 11: 6). Alai ndada sude horong ni si Kora na gabe mate hinorhon ni rimas ni Debata. Deba sian anak ni si Kora malua do sian rimas ni Debata na marulaon gabe parende di bagas joro. Nasida ma na mambahen, manguluhon ende pujipujian dohot hasangapon ni Debata di undungundung na badia dohot di bagas joro ima anak ni si Kora sian horong Kehat (2 Kron. 20: 19); adong ma anak ni si Kora na martugas gabe sijaga harbangan Israel (1 Kron. 9: 19; 26: 1). Ianggo turpuk jamita on ima marharoroan sian anak ni si Kora, na sian pomparan ni Kehat. Ia turpuk jamita espitel on, ima ende na jotjot dipangke di ulaon parsombaon (peribadahan) halak Israel. Somalna do andorang so masuk tu undungundung na badia manang andorang so dimuhai ulaon parsombaon, adong do diendehon sada ende pamujion, ende parolopolopon, ende hamuliaon ni Jahowa Debata. Marsuraksurak, martopaptopap, jala marsaringar ma soara ende olopolop, ende pamujion tu Jahowa Debata. Ende i digoari do predilium dung pe diendehon ende predilium mulaannasida ma parsombaon ni Israel tu Jahowa. Turpuk jamita evangelium sadari on mangondolhon taringot hahomion harajaon, huaso dohot hamuliaon ni Jahowa Debata, Raja di saluhut angka raja di tano on, Debata ni saluhut angka debata na disomba angka bangso. na so boi dipatudos manang aha hamoraon, hasangapon, hamuliaon dohot ha-Debataon ni Jahowa nang di sude luat, di sude partingkion dohot di saluhut na adong di tano on. Ingkon marsomba do nasa ulu ni tot jala sude angka dila marhatopothon habalgaon dohot hatimbulon ni Jahowa Debata na mangatasi saluhutna na adong di tano on. Ibana do na patut sipujion dohot sisombaon. Jahowa do Debata na marhuaso sian hatongtongon sahat tu hatongtongon. Guru di Ibana do saluhutna nasa na masa di portibi on, jala ampunaNa do saluhutna. Nang pe jongjong angka pangalo na mangalo maradophon Jahowa Debata, alai tarpatupa Debata do nasida gabe sidegedegeon ni patna (pat. Ay. 2 – 6). Tung na songkal do Jahowa Debata. Ndang tardodo jala ndang hasuhatan sude angka ulaonNa. Martua ma Israel dohot bangso na marDebatahon Jahowa. Martopaptopap tangan ma sude bangso, jolma mangendehon hamuliaon dohot hasangapon ni Jahowa Debata, marsoraksorak ma angka bangso mangendehon ende pujipujian dohot pangiarhon soara olopolop mangolophon Jahowa. fokus ni parsombaonta tu Jahowa Debata ima hasangapon, hamuliaon dohot hatimbulon ni Jahowa Debata na mangatasi saluhut harajaon dohot hadebataon di portibi on (pat. Ay. 7 – 10). Marhite asi ni roha dohot basabasa ni Jahowa do na mambahen Israel taruli di pasupasu dohot hamoraon sian harajaon dohot bangso di humaliangna. Hasangapon dohot hamuliaon ni Jahowa songgop ma tu  bangso Israel, asa sude bangso longang marnida hamoraon ni Israel, na so boi dipatudos hamoraon ni Israel martimbangkon sude hamoraon ni sude harajaon. Marroan ma angka bangso laho marsiajar tu Israel asa parsidohot taruli di hamoraon songon na adong di Israel. Ndada marharoroan sian hadirion ni Israel hamoraonnasida, alai holan asiniroha dohot basabasa ni Jahowa do tu nasida. 

Hahonaan ni Turpuk

 Miserikordias Domini, ima minggu na manjouo hita mangendehon asi ni roha dohot hatimbulon ni Jahowa Debata. Boi dope hita parsidohot mangendehon asi ni roha dohot hatimbulon ni Jahowa Debata molo masa angka parsorion dohot sitaonon di ngolunta? boi dope hita parsidohot mangendehon asi ni roha dohot hatimbulon ni Jahowa di partingkian sinuaeng? Parsorion dohot ragam na masa di hangoluan on unang ma nian mangambati hita parsidohot laho mangendehon hatimbulon dohot habalgaon ni harajaon, hasangapon dohot hamuliaon ni Jahowa Debata. Guru di Ibana do saluhut nasa na masa di tano on. Marhite asi ni roha dohot hatimbulonNa do tarpatupa Ibana do laho mangaramoti, paluahon dohot manarihon hita di angka na ringkot di parngoluan on. Ndang pasombuonNa hita punjung di ragam sitaonon na masa, Ibana do tahe na mangurupi, mangaramoti, na tongtong manarihon ngolunta asa boi hita manalpuhon sitaonon manang parsorion i. umbahen i ma unang tading hita parsidohot laho mangendehon dohot mangolophon asi ni roha dohot hatimbulon ni Jahowa Debata. Beta ma hita ruas dohot parhalado HKI mangendehon dohot mangolophon Jahowa, Raja dohot Debatanta. Tung marhasangapon ma hita molo boi hita rap mangendehon asi ni roha dohot hatimbulon ni Jahowa Debata, songon na niula angka anak ni si Kora (2 Kron. 20: 19). Nunga 98 taon HKI di tingki on, di na ragam angka siboluson naung dibolus Jahowa Debata do na tongtong mangaramoti huriaNa HKI. Hatahon hamu ma sama hamu angka ende psalmen, angka ende pujipujian dohot ende partondion; endehon jala puji hamu ma Tuhan i di bagasan rohamuna! Manongtong ma hamu mandok mauliate siala saluhutna tu Debata Ama, di bagasan Goar ni Tuhanta Jesus Kristus (Gal. 5: 19 – 20). Taolophon ma tongtong Jahowa Debata marhite soara ende dohot olopolopta, marmulia GoarNa marhite angka endenta, sangap ma di Ibana saleleng ni lelengna