JAMITA, 02 JUNI 2013

BAHAN JAMITA

MINGGU, 02 JUNI 2013

MINGGU I DUNG TRINITATIS

Ev. Jeremia 9: 22 – 25 (Ep. 2 Korint 10: 12 – 18)

Pdt. Daniel Bonardo Pane, S.Th.

Patujolo

            Ganup jolma tontu naeng do ditanda torop halak songon na paboahon adong na andul ditanda sian halak na asing di humaliangna. Molo didok pe holan goarna, nunga pintor ditanda torop halak, manang molo didok ulaonna, pintor ditanda jolma ise do na didok disi. Jala ragam do dalan ni jolma mambahen dirina asa torop jolma mananda ibana, isarana, marhite ulaon na denggan na binahenna, marhite hapistaranna, hamoraonna, dohot ragam na asing, nang pe adong pigapiga jolma na ditanda torop halak alani hajahatonna. Alai turpuk jamita on dang na paboahon panandaion ala ulaon na jahat na binahenna, alai angka siadonganna na boi mambahen ginjang ni roha di ibana. Gabe ditengatengahon ma na adong diibana songon halobianna sian na asing, israna habisukhon, hagogoon dohot hamoraon. Boi do hinorhon ni i gabe songon tuan ma ibana tu na asing na mangido pangurupion tu ibana marhite habisukhon manang hagogoon dohot hamoraon na adong di ibana. Gabe tubu ma hata na mandok ”molo so ala ni au, dang boi songon on denggan ngoluna”; ”ala ni au ma asa boi denggan ulaon i”; dohot na asing. Jala adong muse ma jolma ala sai diurupi donganna na bisuk manang na mora dohot na gogo i, gabe dipartuan ma i jala gabe boi ma songon sada hatoban di dongan i, manang aha didok donganna i, gabe dioloi ala utang budi di pangurupionna i.

            Laos songon i do na diadopi bangso Israel di tingki hapanurirangon ni si Jeremia di turpuk on. Andorang so masuk di ayat on, pola do mangandung si Jeremia ala sange ni roha mago ni bangso Israel (ay. 1 – 5); dohot angka uhuman na masa tu Jerusalem (6 – 21). Laos di turpuk jamita on ma dipataridahon si Jeremia taringot hasongkalon ni Jahowa martimbanghon angka parbinotoan, hagogoon, dohot hamoraon ni portibi on. Jala tung na so patut do angka jolma patengatengahon dirina di adopan ni Jahowa.

            Masa do di hatiha i angka parungkilon manang haporsuhon ni bangso i, alai lam mandao do bangso i sian na dihalomohon Jahowa. Dang adong be haundukhon ni bangso i tu hata ni Jahowa. Raja dohot angka pangomgomi bangso i nunga marhaposan tu angka habisukhon, dohot hagogoon dohot hamoraon ni bangso na boi mangurupi nasida malua sian angka parungkilon dohot haporsuhon na diadopi, tarlumobi sian parporangan. Umpos do bangso i tu angka hagogoon ni parporangan na bangso i. Gabe unduk ma bangso Israel tu bangso na mangurupi ibana, laos manang aha na didok bangso na mangurupi i, ingkon do diulahon sahat tu na manomba angka debata ni bangso na mangurupi bangso i.

Hatorangan ni Turpuk

            Marhite jamita on, dipabotohon si Jeremia do taringot paruhuman ni Jahowa tu sude bangso na di portibi on. Jahowa sandiri ma na papatarhon taringot habonaron dohot uhum-Na tu saluhut bangso, bangso Israel dohot tu bangso parbegu. Jala dang adong be na boi patengatengahon hagogoon manang hamoraon manang habisukhonna marnida hasongkalan ni Jahowa. Sude angka mata marnida jala mananda Jahowa dohot hasongkalon ni Jahowa, na so boi dipatudos manang aha.

            Di ayat 22 mansai tangkas do disoarahon si Jeremia asa unang adong na patengatengahon habisukhon, hagogoon dohot hamoraonna. Habisukhon, hagogoon dohot hamoraon parsatongkinan do di portibi on. Ganup jolma tontu do naeng bisuk, margogo, dohot mamora, alai boi do ala ni i gabe mambahen ginjang rohana, naeng mamuji diri, jala naeng ma nian ganup jolma sai marsigantung tu ibana, jala gabe tuan. Boi do ala ni habisukhon, hagogoon, dohot hamoraon ni sasahalak gabe mambahen marsilomolomo ibana tu na mangido pangurupion marhite i, jala ingkon unduk tu ibana. Songon i do bangso Israel uju mangido pangurupi bangso na gogo hatiha i. Gabe so adong be haundukhon tu hata ni Jahowa, jala gabe umoloan tu bangso na mangurupi Israel sian Jahowa. Hata on pe paingothon bangso Israel na sai tongtong mandok dirina bangso na pinillit ni Jahowa jala na hinaholongan ni Jahowa, hape dang mangulahon jala dang unduk tu hata ni Jahowa. Laos adong muse ma na naeng mambahen lomo ni roha ni Jahowa alai marhitehite angka habisukhon, hagogoon dohot hamoraon sambing na manghorhon ginjang ni roha, dohot mamuji diri asa ditanda jolma ibana. Hape dang dihalomohon Jahowa na sisongon i.

            Jadi aha nama bahenon? Dialusi ma di ayat 23 ”marroha jala na mananda Jahowa” mamuji diri ima marroha jala na mananda ise do Jahowa, parasi roha na manghajongjonghon uhum dohot hatigoran. Ido na dihalomohon ni Jahowa. Hata ”marroha jala mananda Jahowa” pabotohon adong roha unduk jala serep dohot toruk ni roha di adopan ni Jahowa, jala mambahen Jahowa gabe haporusanna. Jahowa, Debata na parasiroha na sumurung, na pajongjonghon uhum dohot hatigoran. Ganup bangso hona uhum ni Debata hombar tu uhum dohot hatigoran ni Jahowa sandiri. Ala ni i, martua ma jolma na mambahen Jahowa gabe haposanna, jala na olo unduk di angka hata manang na dihalomohon Jahowa. Jolma na songon i ma na nihalomohon Jahowa. Laos dipatangkas si Jeremia, na Jahowa sandiri na mandok i saluhutna tu ibana, jala ibana manorushon tu bangso i. Molo Jahowa na mandok, manjadi do saluhutna, jala tulus do saluhutna hombar tu na disangkaphon ni Jahowa sandiri.

            Ayat 24 – 25 ima panurirangon ni si Jeremia taringot paruhuman na pinatupa ni Jahowa. Jahowa, Debata sandiri marlulu dompak saluhut bangso. Dang adong bangso na holip sian adopan ni Jahowa. Dipabotohon do di ayat i bangso Misir, Jahudi, Edom, Amon, Moab, na ginorbang, angka na maringan di halongonan na patuduhon bangso na adong di portibi on, bangso na gogo dohot bangso na gale. Jahowa sandiri patupahon paruhuman jala pamasaon uhum, hamagoan manang haluaon. Di patorang pe taringot parsunaton di turpuk on na patuduhon nunga songon formalitas nama sunat i diulahon. Sunat di halak Jahudi molo diida sian lapatanna, ima tanda ni haundukhon (obidiance) taringot angka tona manang hata ni Jahowa. Marasing do parsunaton na ni ulaon di halak non-Israel manang non-Jahudi sian na niulahon Israel manang Jahudi. Molo di halak Israel manang Jahudi, dibungka sian si Abraham na patuduhon parpadananna dohot Jahowa jala haundukhon ni si Abraham na ditorushon tu angka gomparanna marhite tanda sunat naung diulahon Israel.

Hahonaan ni Turpuk

            Jamita on mansosoihon sude halak na diportibi on, tarlumobi halak Kristen asa tangkas mananda Jahowa marhite Jesus Kristus mual ni hapistaran, gogo dohot hamoraon. Molo naung tatanda do Jahowa, Debata mual ni nasa na denggan, parasiroha na sumurung, na manongtong saleleng ni lelengna, jala na manghajongjonghon uhum dohot hatigoran di tano on, boasa be hita sai mangasahon habisukhon, hagogoon dohot hamoraon na adong di portibi on, na olo salpu jala na olo mago. Antong aha ma na patut ditengatengahon ni jolma maradophon Jahowa so ingkon unduk tu hata ni Jahowa.

            Molo naung tatanda do tangkas Jahowa, Debata na manongtong i, angka jolma pe ingkon do boi paradehon diri, jala boi mamangke na adong di ibana isarana habisukhon, hagogoon, dohot hamoraon i laho parrohon hadameon dohot hademakhon jala parrohon hadameon sian Debata tu portibi on manang di humaliangna. Dang tapangke be i gabe mambahen susah angka donganna, tarlumobi keluargana.

            Marhite turpuk jamita on, diondolhon do tu na manjaha turpuk on roha pangoloion dohot roha unduk maradophon hata ni Jahowa do ulaon ni angka jolma na dihalomohon ni Jahowa. Ai sude jolma dohot bangso hona uhum ni Jahowa di ari paruhuman songon naung ditontuhon Jahowa sandiri tingkina. Alai martua ma jolma na hot jala satia ro disaleleng ni lelengna. Balongkon ma angka ulaon na boi mambahen hita dao sian Jahowa (sunat rohani) jala unang holan patupahon ruhutruhut parugamoon alai dang diboto dia do lapatanna dohot dang boi manghangoluhonhon. Amen.

                                           

Jamita Hananaek ni Jesus, 09 Mei 2013

BAHAN JAMITA

KAMIS, 09 MEI 2013

PARNINGOTAN HANANAEK NI JESUS KRISTUS TU SURGO

Ev.: Ulaon ni Apostel 1: 6 – 14 (Ep.: Markus 16: 14 – 20)

Pdt. Daniel Bonardo Pane, S.Th.

HANANAEK NI JESUS PATOGUHON ROHA GABE SITINDANGI

Patujolo

            Mansai lungun do panghilalaan molo marsirang dohot na hinaholongan. Molo borhat sada ianakhon na dihaholongi tu pangarantoan, tontu parjolo sahali lungun situtu do panghilalaan ni natorasna, tarlumobi molo marsirang ala disirang ni hamatean na tahaholongi tontu mansai lungun situtu do panghilalaanta. Boi do tadok songon i do lungun ni angka sisean ni Jesus dohot na sai tongtong mangihuthon Ibana uju di portibi on dope Ibana, lungun di partinadinghon ni Jesus di nasida, na manaek Jesus tu Surgo.

            Ragam do angka pandokhan taringot na dihilala angka sisean ni Jesus dohot na mangihuthon Ibana, isarana:

-         Lungun manang lungun ni roha. Malungun di parsirangan ni daging dohot mudar. Dang rap be Jesus di nasida, lungun ni roha nasida di na laho Jesus manadinghon nasida.

-         Mabiar. Adong do panghilalan mabiar ni angka sisean ala nunga laho be gurunasida, manang uluannasida. Tung ise be na manguluhonnasida manang na gabe paniroi di nasida, tarlumobi mangadopi angka pamarenta Rom hatiha i, dohot angka sintua ni malim na mansogohon Jesus.

-         Longang. Longang do angka sisean dohot angka na mangihuthon Jesus hatiha hananaekNa marnida na hinsat Jesus. Dipanotnoti nasida do Jesus na manaek tu Surgo.

Alai porlu do botoonta mansai tangkas taringot hananaek ni Jesus Kristus tu surgo, dang na laho manadinghon angka siseanna manang angka na mangihuthon Ibana. Alai hananaek ni Jesus ima sada ulaon na ingkon masa di Ibana songon naung disangkapi Jahowa, Ama na marsuru Ibana. Nang pe manaek tu Surgo Ibana, alai na ro do Ibana muse songon na diida angka sisean i uju i, ima hamuliaon naung dijalo Jesus sian Ama na marsuru Ibana.

Marhite turpuk jamita on mansai tangkas do botoonta taringot tona na pinasahat Jesus tu angka siseanNa hatiha i, jala tona i sahat do tu sadari on jala ditingki di jaha pe turpuk on sahat jumpang songon na pinarbagabagaNa taringot haroroNa muse. Jala dibagabagahon Jesus do pangurupi angka na porsea di Ibana asa gabe sitindangi sian Jerusalem sahat tu ujung ni tano on. Tondi on ma na papatarhon pandonganionNa di angka na porsea di Ibana. Nang pe marsirang sian sibuk dohot mudar, alai dilehon do Tondi na so sian portibi on, alai Tondi Parbadia na sian na sun badia, ima sian Ama (ida Joh. 14: 16).

Hatorangan ni turpuk

            Buku Ulaon ni Apostel ima udut ni na buku na sinurathon ni si Lukas, sahalak pangobati uju i, alai gabe sitindangi do ibana marhite si Paulus. Disurathon si Lukas pe buku on tu si Teopilus (Theophilus – Yang dikasihi TUHAN, Hasian/ Haholongan ni Debata) asa diboto jala ditanda si Teopilus do barita taringot Jesus Kristus, sian hatutubuanNa sahat tu hamateanNa, jala manaek tu surgo (Lukas 1 – 24); jala di buku on disurathon si Lukas muse sian na manaek Jesus tu surgo dohot angka pardalanan dohot ulaon ni angka apostel di huria na parjolo i (Ul. Apostel 1 – 28).

            Andorang so turpuk jamita on, mansai tangkas do dibaritahon si Lukas taringot ulaon dohot panghobasion ni Jesus dung mulak mangolu Ibana sian na mate (ay.3) ima patandaphon diriNa naung mangolu tu angka na marnida Ibana marhitehite lan tanda lelengna 40 ari, jala mangajari do Ibana taringot Harajaon ni Debata. Jala di tingki na domu Ibana dohot angka siseanNa, dipatihi ma, na so jadi meret nasida sian Jerusalem, so jolo dipaima bagabaga ni Ama i na binegenasida sian Ibana (Luk. 24: 49; Joh. 15: 26). Laos Tondi do na didihonhon tu nasida. Jala Tondi i do na margogoihon nasida gabe sitindangi taringot Jesus Kristus.

            Pandidion ni Tondi songon na naeng pinasahat ni Jesus ima mangalehon:

-         Ngolu na imbaru. Ngolu na imbaru marlapatan mambalongkon angka bangkobangko dohot parange na so marpardomuan tu hata ni Jahowa. Dang tolap gogo ni jolma i laho mandapot ngolu na imbaru so marhite pandidion Tondi songon na didihon ni Jesus.

-         Hamubaon i roha, ima adong panindangion gabe siula hata ni Jahowa di bagasan ngoluna. Mananggalhon sude angka hisaphisap dohot hagiot ni dagingna, jala manghasiholi hata dohot parsaoran rap dohot Jahowa di ngoluna.

-         Hiras ni roha. Dang adong be biar disi, dang adong be bohaboha on di bagasan ngoluna nang pe ragam angka na masa di ngoluna, jala marpos ni roha. Jala sude na i ima dibagasan pangoloion tu angka hata ni Jahowa dohot mangulahon gabe sitindangi taringot barita na uli (Jesus Kristus).

-         Haradeon diri digomgomi Tondi i. Molo nunga didihon Tondi, marlapatan ma i paiashon diri nang roha.   Dang be olo dirajai manang digomgomi hagiot ni daging na naeng pasonanghon dirina, alai rade digomgomi manang dirajai jala ditiroi marhite Tondi laho mangulahon lomo ni roha ni Jahowa jala na boi mambahen sonang dohot las roha ni Jahowa. Dirinta ndang be nampuna hita, alai nampuna ni Debata.

            Alai maol dope antusan ni angka sisean i taringot harajaon ni Debata songon na dipabotohon Jesus, nang pe leleng nasida raphon Jesus. Dirimpunasida do harajaon na pinabotohon Jesus ima sada harajaon songon harajaon na di portibi on na boi mangalehon hademakhon dohot hadameon jala na boi paluahon bangso i sian panggomgomion ni huaso Rom; harajaon na imbaru songon na dihalunguhon bangso i. Laos i do na pinangido angka sisean i di ay. 6 asa pintor dipajongjong Jesus ma harajaon songon naung dipabotohon Jesus tu nasida, jala dipangido nasida do asa dipajongjong saonari. Ay. 6 on do na manggombarhon ganup jolma na sai olo manontuhon angka ulaon ni Jahowa, Debatanta marhite angka pangidoan dohot pingkiran. Ingkon boi do tangkas botoonta, dang mangula Jahowa hombar tu na pinangido jolma manang dibatasi pingkiran ni jolma, alai saluhutna guru tu Jahowa, Debata Pargogo na so hatudosan i saluhutna.

            Jala dialusi Jesus do sisean i di ay. 7, dang boi jolma na manontuhon andigan manang ombasna. Ama i sandiri do na mambuhul andigan masa i jala guru di huasoNa sambing do saluhutna. Laos on ma alus tu angka jolma na sai olo paboahon andigan do ro ajal ni hasiangan on songon naung masa di pigapiga tingki na salpu, na boi mambahen jolma i ganggu, jala patupahon angka ulaon na so marlapatan na marhaujungan tu na so marlapatan dohot kekecewaan. Dang saguru tu jolma jala tu angka naung dipikirhon manang diramal ragam jolma taringot angka na masa dohot haroro ni Harajaon na naung dibaritahon Jesus, alai guru di huaso ni Ama sambing. Alus ni Jesus on laho paingothon asa unang tarlalap angka sisean dohot na porsea tu Ibana paimahon haroro ni Harajaon i gabe so mangula, alai alus ni Jesus on ima panjouan asa RADE/ DUNGO, paimahon haroro ni Harajaon i marhitehite angka pangulahonon di portibi on.

            Molo manat talapati taringot sungkunsungkun sisean i taringot tingki hajongjongan ni harajaon i (ay.6), adong do disi songon pangidoan asa malua jala dang be mabiar angka sisean i maradophon panggomgomi uju i, jala asa patar ma na jongjong do muse harajaon si David na imbaru sian Pinompar ni si David songon panghirimon ni bangso i marhite angka naung disuriranghon angka panurirang di padan na robi. Harajaon na boi mambahen hadameon dohot hamonangan di Israel songon naung masa di Isarael uju si David gabe rajanasida.

            Diboto Jesus do na dihalungunhonnasida i, jala dialusi do marhitehite bagabaga taringot hagogoon ni Tondi Parbadia, songon naung dibagabagahon Jesus uju so mate dope Ibana. Tondi Parbadia i ma na margogoihon asa unang mabiarjala asa togu paimahon haroro ni Harjaon i, jala marhiras ni roha angka sisean dohot angka na porsea gabe sitindangi taringot holong ni Debata marhite Jesus Kristus, taringot hapapatar ni harajaon ni Debata marhite Jesus Kristus, paima ojak harajaon i ditingki naung ditontuhon Jahowa sandiri; papatarhon holong ni Jahowa, Debata, Ama na manongtong salelengna marhite Jesus Kristus; jala papatarhon tung na so adong be sisombaon dungkon ni Jahowa marhite Jesus Kristus; jala papatarhon Jesus do dalan, hangoluan, dohot hasintongan jala na so adong na sahat tu Ama i so marhite Ibana; papatarhon sude na marhosa manghatindanghon Jesus i Tuhan, jala sude ulu ni tot marsomba Ibana dang tu angka ragam ni huaso dohot hagogoon na di portibi on; pabotohon angka pangajarion na denggan songon naung diajarhon Jesus tu nasida; mambaritahon taon parasiroha on dohot barita na uli; marhite i, lam tu toropna ma angka na porsea di Jesus Kristus, jala mandapot haluaon, ndada holan tu halak Jahudi alai sahat tu ujung ni tano on, nang sude angka na marhosa dohot tu nasa na tinompa (Mark. 16: 15).

            Di ayat 9 – 10 ima pasirangan ni Jesus dohot nasida. Tarhisat ma Jesus jala dipanotnoti angka siesean i dohot na mangihuthon Ibana uju i, sahat tu diholipi ombun i Ibana. Panotnotionnasida on boi ma songon tanda:

-         Halongangan. Longang do nasida marnida na masa tu Jesus uju i, songon na so masuk tu pingkiran boasa boi masa songon i. Longang nasida marnida tarhinsat ni Jesus sahat tu diholipi ombun Jesus songon tanda hamuliaon dohot hasangapon dohot angka haulion sian surgo. Longang do nasida di angka haulion dohot hamuliaon na dijalo Jesus marhite hananaekna tu Surgo.

-         Hananaek ni Jesus ima laho pataridahon songon dia hamuliaon na didapot si Elia uju manaek ibana tu surgo songon na diida si Elisa, siseana.

-         Hananek ni Jesus ima sada hamuliaon surgo, laos di bagasan hamuliaon ni do muse ro Ibana di marsogot. Tingki marsogot on dang adong jolma na mamboto andigan ala guru tu Jahowa, Ama i do saluhutna, na ringkot ima rade dohot dungo hita paimahon tingki i.

-         Laos hananek ni Jesus i mangalehon sada panghirimon na mansai uli taringot hamuliaon ni Jesus na naeng dipapatar di tingki haroroNa muse, jala ido na ingkon masa tu ganup jolma na hot satia sahat ro di ujungna di bagasan haporseaon, dang dibagasan biar manang ganggu ni roha.

Di na tinuluthon nasida dope Jesus na laho i tu ginjang, nunga jongjong di lambungnasida 2 halak parulos na marlinanglinang, ima angka pardisurgo manang surusuran (ay.10). Dang diboto sisean dohot siihuthon Jesus uju i naung jongjong surusuran ala tarlalap do nasida marnida haulion ni langit di na hinsat Jesus tu surgo di bagasan hamuliaon. Surusuruan on laho padungohon asa unang lalap di angka haulion na diida nasida. On ma na paboahon halak Kristen (siihuthon Kristus) dang boi tarlalap di angka haulion na diida so mardongan ulaon. Godang do angka pangajarion na boi mambahen angka jolma gabe lalap marnida dohot mangarimangrimangi angka haulion ni surgo dang mardonganhon pangulahon, on ma na didokna haporseaon so mardonganhon ulaon. Dipaingot surusuran i do angka sisean i dohot na siihuthon Jesus uju i asa unang lalap nasida marnida saluhutna i, jala dipahot do panghirimon na ro do Ibana sogot, songon na niidanasida Ibana laho dompak banua ginjang (ay. 11). Ayat 11 on ma padungohon angka na porsea di Kristus asa mangarade jala dungo sian angka parlalapan, lalap di haulion, lalap di sitaonan, na boi mambahen lupa laho manguduti ulaon tona ni Jesus, ima gabe sitindangi Kristus marhite barita na uli nang pambahenan. Jala di bagasan hamuliaon do Jesus hinsat tu banua ginjang, jala di bagasan hamuliaon do muse Ibana ro marsogot, di tingki na ditontuhon Jahowa sandiri andigan tingki i masa. Di ayat 11 marlapatan do asa angka sisean dohot siihuthon Kristus hatiha i dang mananggalhon angka ragam sitaonon na naeng diadopannasida, jala alai ingkon do diadopi jala monang maralohon paraloan sian portibi on marhite haporseaonnasida.

Di ayat 12 tangkas do dipabotohon na mulak do nasida tu Jerusalem, sian dolok Jetun na jonok tu Jerusalem; na hadalanan di ari Sabbat do daona. Angka sisean dohot siihuthon Jesus hatiha i, mulak laho mangulahon tona na pinasahat ni Jesus Kristus, ima manghatindanghon barita taringot Jesus Kristus. Nasida mulak tu Jerusalem di tongatonga ni angka ragam ni sitaonon manang haporsuhon na naeng masa tu nasida sian angka jolma na so manjanghon Jesus. Nasida ma songon birubiru na disuru Jesus tu tongatonga ni angka babiat (Lukas 10: 3). Molo secara psikologis adong do dope mian di nasida roha biar, ganggu, gamang ala dang adong be uluan di nasida, alai marhitehite bagabaga ni Jesus tu nasida boi ma gabe pahothon haporseaonnasida jala panghirimon. Hananaek ni Jesus tu Surgo ndang na manggotap manang patubuhon panghirimon angka sisean i, alai pahothon panghirimonnasida songon naung diida nasida.

Di bagasan panghirimon dohot hatoguon haporseaon ni, dang na gabe marserak angka na porsea i songon anak ni manuk na hamagoan indukna. Alai marpungu ma nasida di sada inganannasida (ay. 13). Angka sisean na sampulusada i marpungu jala mandatdati martangiang sian sada ni rohanasida, rap dohot angka parompuan dohot si Maria, ina ni Jesus dohot angka anggi ni Jesus (ay. 14). Torop do angka na bisuk mandok anggi dison ima angka jolma na torop na sai tongtong mangihuthon Jesus uju di portibi on dope Jesus, jala nasida ma muse na mandongani jala mangurupi angka apostel laho marbarita na uli. Sai didatdati nasida do laho martangiang. Tangiang do gogonasida, martangiang sian sada ni rohanasida di tongatonga ni angka hamaolon dohot parsorion na naeng songgop tu nasida gabe sitindangi. Parange na songon on ma na ingkon diulahon angka siihuthon Kristus sahat tu sadari on. Angka na didok ni jolma na porsea ima jolma na martangiang, jala pasahathon pangidoan tu Ama i. Halak na martangiang ndada halak na so, dang adong pangulaonhon (pasiv attitude); alai halak na martangiang ima halak na margogo laho mangadopi ragam ni angka na masa di ngoluna. Halak na martangiang ima halak na mangakuhon jala marhatopothon hagaleonna tu adopan ni Jahowa jala rade laho dipargogoi Jahowa asa margogo ibana. Halak na martangiang marlapatan rade marsada di bagasan hahomion ni Jahowa, jala di bagasan hahomion i dipasahat ma pangidoan jala rade laho dipargogoi jala ditiroi Jahowa di ngoluna. Martangiang do nasida sian sada ni rohanasida paimahon hajujumpang ni bagabaga ni Jesus i.

Refleksi Teologis

            Di tingki sadari on ragam dope hasusaan dohot parsorion ni angka Kristen, tarlumobi angka sitindangi Kristus. Ise do sitindangi Kristus sadari on? Ima sandok halak na mananda jala na porsea tu pangajarion ni Jesus Kristus, jala Jesus Kristus do dalan, hangoluan, jala hasintongan, jala parhitean manopot Ama i. Halak naung tardidi dibagasan Goar ni Debata Ama, Anak, dohot Tondi Parbadia, jala naung mandapot barita na uli taringot holong ni Jahowa marhite Kristus ido gabe sitindangi. Ndang adong be alus, dang parsidohot au disi; manang ndang hubotoboto i, manang dang adong tingki. Gabe sitindangi marhite hata nang pambahenan didia pe maringanan.

Sahat tu sadari on ragam dope hamaolon dohot parsorion gabe sitindangi taringot Kritus. Songon na masa di pigapiga ari na salpu, na disegai gareja/ huria HKBP Setu, dohot di luat na asing pe, sada tanda na adong dope na manulak barita taringot Kritus jala na manghosomi Kristus di luat i. Alai taingot ma hata ni Jesus uju di portibi on dope Ibana “Molo dihosomi portibi on hamu, boto hamu ma, naung jumolo Ahu dihosomi. Aut na sian portibi on  hamu, haholongan ni portibi on do donganna. Alai ndang sian portibi on hamu. Ahu do tahe mamillit hamu sian portibi on; ala ni i do umbahen na dihosomi portibi on hamu” (Joh. 15: 18 – 19). Hata ni Jesus on ma na paingothon hita na dihosomi portibi on do angka sitindangi Kristus, jala angka na porsea ima angka naung dipillit sian portibi on, jala dang na gabe talu manang sarombang dohot portibi on. Molo sian pardagingon marnida angka na masa taringot sitindangi Kristus na sai tongtong dibagasan hasusaan manang sitaonon, tontu do sungkunsungkun do roha, didia do Kristus i? Na ditadingkon do angka sitindangiNa mangadopi angka na masa i? Boasa dipasombu Kristus angka sitindangiNa manaon ragam ni sitaonon sian portibi on?

Marhite jamita on hananaek ni Jesus on, dilehon do bagabaga tu hita taringot pandidihon Tondi Parbadia. Tondi Parbadia i ma annon na mangalehon ngolu na imbaru, manang marhiras ni roha, dang ganggu be, jala sai tongtong manghirim di angka na denggan naung pinatupa Jahowa marhite Jesus Kristus. Orang Percaya tidak pernah diajarkan untuk lari dari setiap masalah di dunia ini atau berbagai kemelut atau tantangan, tetapi orang Kristen diharuskan untuk tetap setia dalam iman dengan menghadapi setiap kemelut atau tantangan yang dihadapi, sehingga orang Kristen dikenal dengan orang yang menang, bukan orang yang kalah sebelum bertanding.

Marhite jamita on adong do 3 tona na boi patoguhon ganup huriamanang halak Kristen marhiras ni roha gabe sitindangi Kristus:

1. Jesus ro do muse di ari marsogot. Dibagabagahon do haroro ni Jesus songon hananaekNa tu banua ginjang, songon i do Ibana muse ro di ari sogot. Dibagasan hamuliaon do Ibana manaek tu banua ginjang, jala di bagasan hamuliaon do Ibana muse ro. Ndada hamuliaon ni portibi on di patuduhon, alai hamuliaon Jahowa do diojakhon, ima haoojak ni Harajaon ni Debata. Haroro ni Jesus di ari marsogot, dang be laho tubu jala mate muse, alai haroroNa gabe sada panguhum na bolon,  manguhumi halak na mangolu dohot na mate. Ise na manabur na denggan uju di ngoluna, ingkon manggotil na denggan do muse sian Jesus Kristus di bagasan hamuliaonNa. Andigan ro ari i? Jahowa, Ama i sambing do manontuhon.
2. Unang marnaloja hita mangalului jala manghasiholi Jahowa marhite Jesus Kristus. Di ragam ni angka na masa di ngolu on, las ni roha dohot arsak ni roha, unang mansadi manang marnaloja hita mangalului jala manghasiholi Jahowa marhite Jesus Kristus. Marlapatan do on, unang marnaloja hita marparsoran dohot hahomion ni Jahowa marhite tangiang, dohot manjaha buku na badia (Bibel) ai disi do pangajarion hangoluan jala taringot sangkap ni Jahowa sian panompaon ro di ujung ni tingki di tano on. Marhite parsaoran di Gareja, dohot di parsaoran ni halak Kristen. Sadari on, ndang boi be ganup huria na mandok, hurianami do na sintong; pangajarionnami do na sintong, na boi patubuhon hosom, dohot parbolatbolatan. Huria na songon i ima huria na so gabe sitindangi Kristus, alai huria na sahombar tu portibi on. Huria sadari on ingkon boi songon angka sisean dohot angka na porsea na parjolo i rap martangiang sian sada ni roha; rap marsitiopan tangan; rap pauliulihon; jala rap patoguhon gabe sitindangi Kristus; sahat di haroroNa na paduahalion di bagasan hasangapon.
3. Dilehon Jahowa do Pangurupi. Hananaek ni Jesus tu banua ginjang, dang na laho manadinghon angka na porsea di Ibana, jala ndang na pasombuhon angka halak na porsea jala sitindangi Ibana songon anak ni manuk na hamagoan indukna, na boi mambahen marserak angka na porsea i so marpanghirimon manang di bagasan hatahuton. Adong do bagabaga ni Jesus Kristus uju so mate dope Ibana jala uju na naeng manaek Ibana, ima Tondi Parbadia. Jesus mandok: “jala pangidoonHu ma tu Ama i, asa dilehon tu hamu sada Pangondian na asing, asa i mandongani hamu salelengna i”. (Joh. 14: 16). Pangondian na asing i ima Tondi na so sian portibi on, alai sian Jahowa, Ama na marsuru Ibana. Ido na mangondingi, manuturi, jala mampargogoi ganup angka na porsea di Ibana. Marlapatan ma i, sai tongtong do hape halak na porsea jala sitindangi diramoti jala didongani ni di ganup rumang na masa di ngoluna. Jesus Raja dohot Ulu ni Huria i, sai tongtong do manggomgomi jala manguluhon Huria i marhitehite Tondi Parbadia. Songon panjanghonon ni angka na porsea na parjolo i, songon i ma antong hita manjanghon Tondi Parbadia di ganup ngolunta, keluarga, mardongansaripe, mardongansahuta, dohot na maraleale. Unang ma bonsa jala mabiar rohanta gabe sitindangi Kristus di ngolunta.

Hananaek ni Jesus Kristus, Patoguhon hita gabe sitindangi Ibana

Gabe sitindangi Kristus  ma ganup na Porsea di Ibana, jala paimahon 

hamuliaon ni Jahowa patar di ngolunta.

Amen.

Jamita/ Khotbah, 10 Maret 2013

BAHAN JAMITA

MINGGU LETARE

10 Maret 2013

Ev: Lukas 15: 11 – 32; Ep: Psalmen 63: 1 – 8 

Pdt. Daniel Bonardo Pane, S.Th.

Mulak Ma Hamu Tu Debata

Ama Parasi Roha Na Sumurung

Patujolo

Nunga jotjot turpuk on dijamitahon di ulaon ni haKristenon manang punguan Kristen, jala nunga adong na mambahen songon peran hombar tu turpuk on. Alai mansai maol dope jolma manghangoluhon taringot tona na pinasahat di turpuk on. Dipatandahon di turpuk on, na adong sada ama na satia paimahon ianakhonna mulak. Nang pe laho ianakhonna i, jala ndang patut taruli be tu angka ugasan na di jabu i be, ala nunga dipasuda angka upana, jala na so patut hian be taruli di basabasa, alai ala asi ni roha ni amana, mago do saluhutna angka pangalaho ni ianakhonna, jala dilehon do lumobi sian na so dipingkiranna hian.

            Songon ama i ma umpama tu Debata dibahen Jesus. Mansai satia do Debata paimahon hita, angka na jolma na sai jotjot marpangalaho jat di adopan ni Debata, na taruli hamatean hian jala dang taruli be tu tumpal hangoluan i, alai ala asi ni roha ni Ama i, gabe taruli ma hita hangoluan i. Jala patar do i di bagasan diri ni Jesus, singkatta manaon hamatean salelenglelengna, asa taruli hita tu hangoluan, laos i ma boi hita marhiras ni roha manopot Ama i. Sai mulak, sai mulak, ho parjalang i.

Hatorangan

Turpuk Jamita on ima umpama ni Jesus taringot sahalak ama na satia tongtong manghaholongi ianakhonna. Mula ni turpuk on, ro do sianggian manjalo sinamot manang tohap na sian arta ni amangna. Somal do i di halak Israel, molo adong ianakhon di sada keluarga, apalagi keluarga na mora, adong do parsagi ni arta tu ianakhonna i. Laos ido na masa di turupuk on, nang pe amana i dang marujung ngolu dope. Laos dilehon amana i ma tohap ni sianggian i tu ianakhon sianggianna i.

Dungi, digadis anak sianggian ma parbagiannna i, jala laho ma ibana mangaranto tu luat na dao. (ay. 13). Dipasuda ma disi tuhor ni parbagianna i, dipansuasaehon tu angka hisap-hisap ni dagingna (berfoya-foya), gabe suda ma sude jala pogos ma ibana jala anturaparon. Masa muse ma haleon potir di luat i, diluui ibana ma ulaonna asa boi mangan. Molo tabereng di ay 15, gabe marmahan babi do ibana, na patuduhon ia anak sianggian i tu ruar ni Israel do ibana mangaranto, ai molo di bangso Israel dang adong halak marmahan babi. (haram do babi di halak Israel). Tung mansai porsuk di ditaon ibana disi, pola do disangkapi ibana mangallang ampas ni indahan ni babi  i, alai tong dang adong na mangalehonsa tu ibana (ay. 16). Sada parngoluon na mansai kontras, molo dipatudoshon tu tabo ni parngoluonna uju di bagas ni amana na jolo, lomona mangan dohot modom, dang adong na hurang di ngoluna. Hape nuaeng dihilala ibana ma hinaporsuk ni ngolu na manjo-anjo di luat ni halak.

Alani haporsuhon i, gabe tubu ma rohana mulak tu jabu ni amana, alai ndang dihirim ibana be songon sahalak ianakkon na berhak di bagas dohot arta ni amana, alai gabe anak gajian nama dihirim rohana di bagas ni amana i (ay. 19). Di bangso Israel, naginoaran halak gajian tung mansai na lea do i, tumagon dope gabe naposo (budak atau hamba) sian halak gajian. Ai molo naposo, dirajumi dope i songon bagian ni keluarga ni induk somang, alai molo halak gajian ndong dianggap nasida songon i. Alai molo tung pe songon i, naung rade do ibana manjalo asal ma boi mangan.  Alai, molo tajaha di ay. 20…du, di luar dugaan do panjangkonon ni amana i tu ibana, pintor ditomu, dihaol jala diumma amana i do ibana. Jala dipatupa ma pesta penyambutan na mansai balga ala nil as ni rohana, jala didok “Ai naung mate do anakkon gabe mangolu; naung mago ibana, gabe jumpang muse.”.

Ndang na so diboto amana i pangalahona, dohot angka arta naung suda dipansuasaehon ibana, alai ala holong ni rohana tu anak na i, gabe dihukkupi i do angka pangalaho ni anakna na so hasea i. Ai nungga mansai leleng amana i paima-imahon hamumulak ni anak nai. Jala ala ni las ni rohana dilehon ma tu ibana ulos na dumenggan songon symbol ni hasangapon, tintin tu  tanganna songon symbol ni hak dohot huaso, dohot sipatu tu patna songon symbol ni par-ianakhon-on.

Refleksi - Teologis

• Molo tabereng konteks ni umpama on, Amana i, ima gombaran ni Debata, Ama parholong roha i, jala anak sianggian i ndanda holan na manggombarhon angka pardosa, na mandao sian lomo ni roha ni Jahowa, jala na mangulahon na disogohon Jahowa, jala angka na sai holan marpanghusandean tu dirina dohot gogona dohot artana sambing. Jala songon halak pardosa na mansuasaehon angka silehon-lehon ni Debata dibagasan ngoluna, dipangke i laho mangoloi angka hisap-hisap ni portibion, gabe mago ma ibana jala madabu tu haporsuhon. Alai na rade do Debata manjangkon hita dibagasan las ni roha, molo olo hita mulak tu Ibana. Alai ndada holan i, molo mangida muse tu parsitaonon ni si anggian boi do i manggombarhon angka halak na pogos, na mapitung, na pangpang, na anturaparon, na huliton, rakayat jelata, dna. (Na digoari angka halak Parise dohot Siboto surat do nasida halak pardosa ), Angka sijalo beo, halak sileban (kafir). Ima angka halak na targoar kaum marjinal, alai gumodang do sian nasida na dijangkon Debata marhite anakNa Jesus Kristus. Diboto Debata do nasida angka pardosa, diboto Debata do boha ngoluna nasida na sai mangoloi hisap-hisap ni portibion. Alai, taida ma balga ni holongNa i do na manghukkupi saluhutna i. Marhite holong ni Debata na so hatudosan i, gabe olo manjangkon angka halak pardosa.
• Sada bangko sian jolma na tinompa ni Debata ima ndang olo mahap rohana (puas), sai na hurang gok do tongtong di ngoluna. Dimulana i, sonang do jolma i manjalo na pinatupa dohot na niaturhon ni Debata, alai ro ma sibolis i manggoit roha ni jolma i, gabe manggunjal ma rohana. Gabe tubu ma pangarimangrimangion di rohana, molo boi do dos dohot Debata, boasa ndang niulahon. Ima sibonsiri umbahen na gabe memberontak jolma i tu Debata gabe madabu tu bagasan dosa. Bangko ni jolma na parjolo i, sai turunhon do tongtong tu pinomparna mambahen jolma i ndang marna mahap rohana di ngolu on. Lalap sai hurangan, hurang gok jala hurang singkop. Nang pe nian nunga tung godang pasupasu ni Debata na jinalona, sai tongtong dope hurang gok jala hurang singkop. Ala ni ido, umbahen na sai loja marsiadu tongtong jolma i manjalahi di ngoluna, anggiat tung gok jala singkop nian, hape sai didusdus mangadu tu jolo, sai tong ndang mar na sahat jala ndang mar na singkop. Tangkas do i di soarahon di Poda ni Raja Samolo 27 : 20 [  Parbeguan dohot banua toru ndang olo mahap, mata ni jolma pe, ndang olo marmahapmahap. Jadi sian mulana pe, ndang na olo mahap anggo hajolmaon on, nang di sinamot, di pangkat, di jabatan, hamoraon dohot nang na asing. Tangkas do sisongon i di dok Parjamita 5 : 9 ]  Manang ise na holong roha di perak, ndang olo marnamahap di perak, jala manang ise * na holong roha di hamoraon ndang tagamon gabe parsaulianna. Nang i hata oto do i. (Siapa mencintai uang tidak akan puas dengan uang, dan siapa mencintai kekayaan tidak akan puas dengan penghasilannya. Ini pun sia-sia.)
• Suang songon i do bangko ni sianggian i, ndang olo mahap rohana. Anggo mangihuthon paretongan ni deba halak, nunga sonang ngoluna, terpenuhi sude angka pangidoanna ala sahalak na mora jala na sangap do natorasna. Alai ndang songon i anggo roha ni anak sianggian i. Nang pe naung gok mangihuthon roha ni torop halak, alai anggo ibana, hurang gok dope. Adong sada na sungkot di bagasan rohana, ndang ibana mangarajai angka artanai, ndang boi ibana palahohon hombar tu lomo ni rohana ai rap dope ibana dohot amana. Jadi hurang di ibana kebebasan laho mengelola sandiri angka sinamotna hombar tu lomo ni rohana.
• Songon jolma na parjolo i, aut sugari sabam rohana manjalo jala mangoloi na niaturhon ni Debata, ndang dabuhonon ni Debata uhum tu ibana. Dang dohonon ni Debata “Ingkon hir hodokmu manganhon sipanganonmu............”. Molo tongtong ibana mian di Debata, diparade Debata do nasa na ringkot di ngoluna, gabe sonang ma ibana jala mangolu di adopan ni Debata. Alai ala ketidakpuasan, gabe tubu ma pemberontakan , jala laos ima na mamboan jolma i tu Penderitaan saleleng ngoluna paima mulak ibana gabe tano. Pemberontakan na i ndang didasari oleh pemahaman dohot pengertian na jelas, alai semata-mata ala keinginan sesaat tanpa pemikiran yang mendalam. Didok rohana, asa boi ma saluhutna patupaonhu hombar tu lomo ni rohana, ndang adong perhitungan untung dohot rugina. Asa boi nian bebas mangihuthon lomona, dipangido anak sianggian i ma tohapna. Jala dung dijalo ibana tohapna i, songon dasor ni pemberontakan  i, ndang ala ni kematangan berfikir dohot rencana naung denggan, pintor jalo do digadis ibana nasa na adong di ibana jala dipasuda hombar tu lomo ni rohana. Ndang adong perhitungan akan masa depan dohot angka na naeng siulahononhon tu joloan on, ala na manggohi rohana ima, nunga bebas au, boi ma guru dok ni rohana patupaonna, ai nunga ibana be mangarajai arta i.
• Akibat ni saluhutna ima “Parsorion”. Pengambilan keputusan na so didasari perhitungan dan pertimbagan yang matang, akan mendatangkan penderitaan, apalagi molo na nionjar ni keinginan ingin bebas dan berkuasa sepenuhnya tanpa tahu arah dan tujuan dari kehidupan. Keputusan ala ni keinginan sesaat dohot ala ni keserakahan selalu marhapatean tu hasusaan. Ndang holan di portibi on, sahat do nang di banua ginjang sogot. Epesus 5 : 5 didok do  “Ai boto jala ingot hamu ma: Anggo di harajaon ni Kristus dohot Debata, ndang adong siteanon ni parmainan manang parhodar, manang parroha na ahut; ai sioloi na so Debata do i.”. Jadi parsorion ala ni keinginan sesaat dohot keserakahan manongtong do i mamungka sian portibi on sahat tu harajaon ni Debata ai ndang partohap be angka sisongon i di Harajaon ni Debata.
• Tangkas do joujou ni Tuhan i “Ro ma hamu tu Ahu, hamu angka na loja jala na sorat, asa hupasonang hamu (Mateus 11 : 28). Ndang diklasifikasi Debata joujouNa i tu hajolmaon. Ndang holan na loja jala sorat ala ni panggosagosa ni portibion, penindasan dohot pemerasan. Joujou i marlangku do tu sude jolma na loja jala na sorat ala ni manang aha pe na mambahen ibana loja jala sorat. Termasuk tu anak sianggian i, na loja jala sorat ala ni hagiot ni rohana. Dilehon Debata do tingki tu hita asa ro hita mandapothon Debata, patolhashon jala maningganghon saluhut na sorat di ngolunta. Dibagabagahon Debata do naeng marhasonangan ma ngolu ni jolma i di adopan ni Debata. Ndang dihalomohon Debata marhasusaan ngolu ni jolma na tinompaNa i, naeng ma nian marhasonangan, ala ni ido, rade Debata manarihon ngolunta asal ma olo ro tu joloNa pasahathon saluhut na hinolsohon ni rohana (1 Petrus 5 : 7). Ndang sordak dope pintu i, di buha dope tu ganup jolma na olo ro jala na manolsoli dosana. Mulak manadinghon hasalaan dohot hahurangan, mangeahi hangoluan dohot hasonangan na pinarade ni Debat di ngoluna, asal ma rade ibana manjalo dohot mensyukuri na pinasahat ni Debata. Adong sada kepastian, ima sarihonon ni Debata do ngoluna.
• Dung mulak anak sianggian i, ndang sungkunsungkun dibahen amana i laho manjanghon harorona, alai panghaolon dohot pangummaon do (hatop di tomu, dihaol jala di umma). Dibagasan tindakan i, tangkas tarida, nunga lelang dimaafhon amana i hasalaan ni anaknai. Ndang sai pompom di bagasan rohana hasalaan na pinatupa ni anak na sianggian i. Ido na mambahen amana i mampu manghaol dohot mangumma anakna i. Alai laos disi do hagogoon ni “Pelukan dan Ciuman” itu. Pangalaho ni amana i menghancurkan ketakutan na mian di diri ni anakhonna i, jala ndang holan i, laos dihancurhon pangalaho ni amana i do kesombongan dohot keangkuhan di diri ni ianakhonna i.
• Di na martahi anak sianggian i mulak tu bagas ni amana, tercermin dope suatu keangkuhan dohot kesombongan di bagasan dirina. Merasa yakin dope ibana, di na mulak mandapothon amana, dia akan diterima nang pe statusna berbeda sian anak gabe anak gajian, alai na pasti akan diterima. Nang pe naung tangkas diongkuhon, naung sala ibana, alai sai mian dope saotiknari keangkuhan dohot pembenaran ni pangalahona. Ndang bulus dope ditanggali ibana angka na roa i sian dirina laho mandapothon amana i, sai naeng dope ibana mangaturhon keinginanna tu amana hape nunga di pihak na marsala ibana. Ndang bulus dope dipasahat ibana dirina tu amana i.
• Alai saluhut keangkuhan dohot pembenaran diri ni anak sianggian i, dihancurkan oleh pelukan dan ciuman sian amana i. Dung di haol jala di umma, ndang mampu be mungkap pamangan ni anak sianggian i laho mangido status tu amana i, kecuali holan pengakuan jala penyerahan diri. Holan on na ma na mampu didok ibana “Amang, na mardosa do ahu tu banua ginjang nang dompak ho; ndang tama be ahu goaron anakmu.” Ndang margogo be pamangan ni anak sianggian i laho mandok “Bahen ma ahu songon anak gajianmu sada”. Ndang margogo be anak sianggian i laho mangido posisi di tengah pelukan dan ciuman ni amana i. Saluhutna diruntuhkan jala saluhut dipasahat hibul tu ama i, aha na naeng pamasaonna tu anakhonna i. Di pelukan dan cium ni amana i, nunga berserah diri penuh be anakna i taringot tu nanaeng pamasaon tu ibana.
• Pelukan dan ciuman na pinatupa ni amana i, umbagas sian kata maaf. Pelukan dan ciuman mempunyai kekuatan yang dasyat na boi menghancurkan keegoisan, kesombongan dohot ginjang ni roha. Pelukan dan ciuman menghancurkan bangko ni jolma i gabe sepenuhnya berserah tu Debata jala rade manjalo manang aha pe na naeng pamasaon ni Debata di ngoluna. Ima barita las ni roha na  di hita di tingki on, Debata Parasiroha Parholong roha na sumurung i, olo manjangkon hita, na manalpuhon saluhut dosanta, manomu-nomu hita jala mamboan hita bongot tu parsaoran na badia di harajaonNa i, jala dibasa-basahon tu hita jambar haluaon marhite na dijangkon hita gabe anakNa. Asal ma olo hita manolsoli dosanta jala mulak tu dalanNa na gok dame dohot las ni roha i. Ai pardenggan basa jala parasi roha do Debata, songon asi ni amaama tu angka anakna asi ni roha ni Jahowa di angka na mangkabiari Ibana. (Psalm. 103:13). AMEN !

(dibantu dengan beberapa sumber yang telah tersedia)

Bahan Jamita/ Khotbah, 27 Januari 2013

BAHAN JAMITA

MINGGU SEPTUAGESIMA

MINGGU, 27 JANUARI 2013

Pdt. Daniel Bonardo Pane, S.Th.

EV: LUKAS 4: 14 – 21 EP: NEHEMIA 8: 1 – 10

LAS MA ROHAM, NUNGA RO SIPALUA HO

I. Patujo

            Ganup jolma na dibagasan parungkilon atau sitaonon na dokdok, nang hona gosagosa sian na asing pasti do manghirim adong sasahalak na boi paluahon ibana sian saluhutna i. Laos domu ma songon na didok ni Aristoteles, „ganup jolma dihirim do jumpang las ni roha dohot hasonangan tu dirina“. Alani i, na dibagasan parungkilon, manang sitaonon dohot pangosagosaion manghirim do taruli las ni roha dohot hasonangan asa jumpang na dihirimna i, nang marhite haroro ni sipalua na boi paluahonna.

            Songon i jolma na di turpuk jamita on, dihasiholi nasida do haroro ni Mesias, Sipalua songon naung disuriranghon angka panurirang di padan na robi. Panghirimon ni jolma di turpuk on ima songon sahalak raja na boi mangusir angka panggosagosa nasida, jala paluahon nasida sian angka parsitaonon na mansai borat dihilala nasida, nang sian segi pajak na timbo, huaso ni malim na so patuduhon hamalimonna, dohot hagiot ni angka panggomgom na mambahen hansit angka na digomgomionna. Ise do Mesias i? Songon na dihirim nasida? Torop halak Kristen na mandok, Jesus. Alai molo halak Jahudi di tingki i manulak Jesus do Sipalua songon na dihirim nasida. Dihirim nasida do Sipalua i ima sian horong na sangap, keluarga na mamora, jala na gogo, jala sian horong ni angka Raja. Marhite turpuk jamita on tangkas do dipabotohon na jumpang do na dihirim bangso i marhite patandahon diri Jesus songon na tarsurat di padan na robi.

II. Hatorangan Nas

            Molo manat tajaha turpuk jamita on, andorang so ayat jamita on di mula ni bindu 4 on dipabotohon na Gok Tondi do Jesus. Hagogok ni tondi i, patar ma i ditingki tardidi Jesus di batang aek Jordan, laos adong do soara na memproklamirkan Jesus gabe Anak ni Debata, jala na dihalomohon Debata do Ibana. On ma na pabotohon Jesus ma na didok songon naung disuriranghon angka panurirang ni Debata di Padan na robi, taringot haroro ni Sipalua, ima Mesias. Dibagasan Gok Tondi i Jesus, monang ma Jesus mangalo pangunjunan na pinatupa ni sibolis.

            Dung monang Jesus manaluhon i, jala dipargogoi Tondi i, ro ma Jesus tu Galilea. Jala disi ma Ibana parjolo sahali mangajari taringot haluaon na naeng pinatupa Debata marhite Ibana. Mambege pengajarion i Jesus, dipujipuji jolma do Ibana na manangihon pangajarionNa (ay. 14 – 15). Dung i, ro ma ibana tu huta hatubuanNa, ima huta Nassaret. Songon hasomalan na masa di huta i, ganup ari Sabbat marpungu do angka halak Jahudi di Sinagoge, laho manangihon pangajarion na pinasahat angka pangajari marhite Patik dohot pustaha Padan na robi (ay. 16). Boasa pintor disuru Jesus pasahathon pangajarion i? Molo ahu marpandapot sian pigapiga pendapat ni angka pande bisuk huta Nassaret berkisar 23 KM sian laut Galilea. Marlapatan ma i, pangajarion ni Jesus sahat do tu huta hatubuan ni Jesus, ima Nassaret, jala kemungkinan besar nunga diboto parNassaret taringot pangajarion ni Jesus. Ido na umbahen nasida pe naeng taruli tu pangajarion ni Jesus songon na dibege nasida sian Galilea.

            Dung i, disuru ma Jesus laho pasahathon pangajarion di ari i, jala dilehon ma tu Ibana pustaha ni panurirang Jesaya. Dung i dijaha Jesus ma na tarsurat di pustaha i. barita na dipasahat Jesus marhite na manjaha turpuk ni pustaha i, ima taringot Sipalua na dipaimaima halak Jahudi, ima na boi paluahon nasida sian parungkilon manang parsitaonon na mansai hansit.

            Tangkas do parjolo sahali Sipalua i ima halak naung disonggopi ni Tondi ni Jahowa, jala na dimiahan na marlapatan adong pabangkiton. Ise na pabangkiton? Ima Jahowa, marlapatan Jahowa sandiri do na pabangkithon Jesus marhite na songgop Tondi na tu Ibana, laos Jesus i ma Naposo ni Jahowa (Eved YHWH) naung disuriranghon angka panurirang. Ibana ma na dipabangkit Jahowa laho:

1. Mamboan Barita na Uli (evangelium). Barita na Uli ima barita las ni roha, Barita na sian Jahowa sandiri. Marlapatan ma i, sian Jahowa sandiri do ro barita na uli i ima mual ni las ni roha. Evangelium on dipasahat/ didaratkan tu halak na pogos. Halak na pogos didok dison ima halak na marsitaonon, sengsara, na marungkil na dokdok, na so marpanghirimon. Jala Barita Uli ima barita hamonangan,  na patubuhon muse panghirimon dohot patoguhon haporseaon tu Jahowa.
2. Mambaritahon tu angka na tarhurung asa malua. Na tarhurung didok dison ima tarhurung di hatahuton, tarhurung di hagangguon, tarhurung di hagiot dohot hisap ni daging, tarhurung di ganggu ni roha, tarhurung di dosa, situasi na manosak, jala na terikat tu hasomalan na so marpardomuan tu hata ni Jahowa. Asa malua nasida, taruli ngolu na imbaru, las ni roha.
3. Tu angka mapitung asa marnida, mapitung tu hata ni Jahowa ala ni hagiot ni daging, mapitung tu lomo ni roha ni Jahowa ala naeng mandapot hasonangan na rumar sian portibi on, mapitung marnida sondang ni Jahowa ala hagolapon manghophopi ibana. Jala dipalua ma nasida, gabe boi ma tangkas marnida sondang ni Jahowa jala dia do na dihalomohon ni Jahowa tu nasida. Tangkas ma ditanda ise do Jahowa, Debata Israel. Jala ise do Sipalua, Mesias i.
4. Paluahon angka na ginosagosa. On ma situasi ketidaknyamanan. Ginosagosa ni pamarenta mangkus di hisap ni dagingna na mambahen susah angka jolma na ginomgomanna. Ginosagosa ala ni situasi ekonomi, ginosagosa ala ni biar ni roha, na patubuhon sahit jala na boi mambahen jolma i magopo haporseaonna.
5. Mamaritahon taon parasirohaon ni TUHAN i. Taon parasian tudos ma i taon Jobel (3 Musa 25), ima partingkian sude utang tarsesa, mulak ma tano dohot jabu ni angka na pogos, angka hatoban pe dipalua gabe sahalak na malua. Ima panghirimon na mansai balga di halak Jahudi di hatiha i, sude hatoban ditobus, di Padan na Imbaru ima hagogok ni Padan na robi, marhite diri ni Jesus, nunga ditobus be jolma na sai manghirim tu Jahowa, ditobus sian angka hamatean saleleng ni lelengna ala ni dosa, gabe taruli tu hangoluan na so ra suda.

Laos ido na didok Jesus, Jumpang do saluhutna i di bagasan diriNa. Pataridahon/ memproklamirkan ibana ma Sipalua i, manang Mesias i naung leleng dipaimaima jala dihirim angka bangso i (ay. 21). Nang pe di udut ni turpuk on, ditulak nasida do Jesus, ala nasida mamereng latarbelakang ni Jesus sian keluarga na pogos, songon dia boi gabe Sipalua manang Mesias (ida muse penjelasan di patujolo, songon dia Mesias na dihirim nasida i).

III. Refleksi – Teologis

• Sahat ma evangelium on tu hita saluhutna, tarlumobi tu angka na marhosa jala na sai tongtong manghirim tu Jahowa. Porlu tasadari, partingkian nuaeng, ndada holan jolma na marungkil manang na dokdok parsitaononna, dohot do angka pahanpahanan, tano, dohot portibi on pe tong do marungkil manang marsitaonon ala ni hisaphisap dohot hagiot ni jolma na so boi dirajai.  Jala Jahowa sandiri do na pasahathon evangelium on marhite Jesus Kristus, barita hamonanganta.
• Songon i do nang Kristus, Ibana ma evangelium na sian Jahowa i, evangelium na mangalehon las ni roha dohot pangapulion jala barita hamonangan tu sude jolma. Jala marhite Jesus Kristus ma tadapot barita las ni roha. Nunga ro be Sipalua i, jangkon ma Ibana tu bagasan rohanta, Silehon panghirimon na mangolu. Jahowa sandiri do na patupahon haluaon marhite Jesus Kristus. Ala ni i, minggu Septuagesima on dipaingot do hamonanganta di ari haheheon ni Kristus, hamonanganta malua sian angka utang ni dosa dohot hamatean, jala ido pahothon hita manghaporseaon tu Ibana.
• Unang so di hita barita on, alai tapasahat ma tu donganta na so taruli jala na so mananda dope Sipalua i (agen of freedom). Asa sude jolma di humaliangta, mandapot jala taruli haluaon. Nang pe adong jolma jala torop jolma na manulak, alai taingot be ma, dang na ditulak Jahowa hita molo olo ro hita tu Ibana. Amen.

Khotbah/ Jamita, 03 Februari 2013

BAHAN JAMITA MINGGU MINGGU SEXAGESIMA

03 Februari 2013

Ev. Jeremiah 1: 4 – 10; Ep. Mateus 10: 5 – 15 

Pdt. Daniel Bonardo Pane, S.Th.

JANGKON JALA HANGOLUHON 

MA PANJOUON NI JAHOWA

Patujolo

            Boha do hita molo disuru paingothon angka panggomgomion manang atasanta na mangulahon na hasalaan, manang na mangulahon na so hombar tu naniaturhon? Pasti do ragam do alus taringot tusi, adong do na mabiar, mabiar ditekan oleh atasan, mabiar mago pangkat, laos adong muse mandok, marhua dipaingot, ai diboto do aha na niulahonna, laos adong muse na marhiras ni roha laho paingothonna, jala siap manjangkon aha na masa tu ibana molo dipaingot. Boi do ala kedudukan/ status sosial mago hasintongan. Dohot do huria berperan dibagasan status sosial i, na boi mambahen mago hasintongan ala nunga torop be huria dang be marhiras ni roha laho manghatindanghon soara hapanurirangon di tongatonga humaliangna, na mambehen menak manang demak na palsu angka ruas na, menak manang demak di parsitaononnasida.

            Molo diadophon tu turpuk jamita on, tarjou do si Jeremia gabe panurirang di habajaronna. Pasahathon hata sipaingot, dohot paruhuman tu panggomgom na di bangsona dohot tu jolma na dibangsona. Nunga gok be angka dosanasida maradophon Jahowa, sai diulahon bangso i do angka na so dihalomohon Jahowa, umpos ni roha tu koalisi politik sian tu Jahowa, dohot ragam ni dosa na diulahonnasida. Toho do adong disi angka malim dohot angka panurirang, alai hamalimon dohot hapanurirangonnasida pe dang hombar be tu ulaonnasida laho pasahathon tona dohot hata ni Jahowa, alai gabe ulaon na mambahen las ni roha angka panggomgomi di angka hajahaton na binahennasida, ima na didok malim dohot panurirang pargapgap.

            Jahowa sandiri do na padirihon panurirang na sintong sian ragam ni parngoluanna. Adong do dipillit Jahowa sian sahalak partani, malim, anak ni malim, dohot na asingna. Marlapatan ma i, pamillit dohot padirihon sahalak panurirang, Jahowa sandiri do na padirihon laos Ibana do na manjadihon sasahalak gabe panurirang, jala saguru tu Ibana do panurirang na dipillit.

Hatorangan ni turpuk

            Ayat 4 – 5       

Marhite turpuk jamita on, dipabotohon tu hita taringot panjouon dohot pabangkithon si Jeremia gabe sahalak panurirang tu bangso marhitehite panghataioanna tu Jahowa (ay. 4-5). Di ayat 5 tangkas didok taringot pamillithon ni Jahowa tu ibana. Nunga ditanda jala nunga dijadihon gabe panurirang tagan so dijadihon dope ibana di bortian; jala diparbadiai laho mangulahon sada ulaon na mansai ringkot tagan so tubu ibana. Diparbadia i marlapatan dikhususkan, adong ulaon khusus, ulaon naung ditontuhon Jahowa sandiri. Jala dipabangkit ibana gabe panurirang tu angka bangso. Sian ayat 5 on tangkas do hapanurirangon ni si Jeremia ndada holan tu bangso Juda, alai dohot do tu sude bangso. Sian turpuk on tangkas do dipabotohon ndang tubu sian sangkap ni Jeremia na gabe panurirang, alai sian sangkap ni Jahowa sambing na so pola diboto si Jeremia hian andorang so dijou ibana. Adong 3 hal proses si Jeremia gabe panurirang ima: Pamillithon/ panandaion; Pabadiahon; pabangkithon. Jala sude proses i Jahowa sandiri do na mangulahon.

            Songon na dipatorang di patujolo ni jamita on, mansai ragam do angka hajahaton na niulahon bangsa Juda dohot angka bangso na marhuaso uju i. Dung marujung pamarentaon ni si Josia, nunga balik be bangso Juda gabe marhaposan tu huaso ni politik, gogo ni porang, jala dang marningot be nasida haundukhon tu Jahowa, jala ragam ma disi angka anggukangguk ni hasintongan na naung mapeol.

           

            Ayat 6 – 8

Di ayat 6 tangkas do adong keberatan  ni si Jeremia taringot tu panjouonna. Tangkas do dibahen si Jeremia habajaronna jala na so malo ibana mandok hata na naeng sihatahonna gabe alasan menolak panjouon ni Jahowa. sarupa ma tu alus ni si Musa taringot panjouonna laho paluahon halak Heber sian parhatobanon di tano Misir (2 Musa 4: 10). Alai sude alus na pinasahat si Jeremia nang si Musa ndang na gabe pangambati tu angka ulaon dohot sangkap ni Jahowa.

            Alus na pinasahat ni si Jeremia patuduhon hahurangan jala hagaleonna gabe panurirang. Alai sude na pinasahat si Jeremia dang dijalo Jahowa. Tarida do sian alus ni Jahowa di ayat 7 – 8. Ima na patuduhon ndang marhitehite gogo ni si Jeremia laho mangulahon hapanurirangonna, jala angka hata na dihatahon si Jeremia ndang na tubu sian Ibana, alai sian Jahowa sandiri do. Dihabajaron, somal do adong biar ni roha, boha do panjanghonon ni jolma tu ibana dohot hata Jahowa na pinasahatna, jala olo gabe ditangkup, diburai angka halak na sogo ala dipaingot si Jeremia marhite hata Jahowa, jala olo gabe hamagoan hosa. Alai ro do alus ni Jahowa tu si Jeremia, na paposhon rohana, „unang ho mabiar maradophon nasida, ai sai Ahu do donganmu, paluahon ho“ (ay. 8). Rap dohot hata ni Jahowa di ayat 8 on Jeremia rap ma dohot angka ompung ni Israel naung manjalo hata patoguhon songon si Jakob (1 Musa 28: 15), Musa (2 Musa 3: 12); si Joshua (Josua 1: 5); Gideon (Panguhum 6: 16) dohot na asing. Jala ha on sahat ma tu si Jeremia (Jer. 1: 8, 19; 15: 20) jala tu halak Israel (Jer. 30: 11). Hata manang padan ni Jahowa on ima mual ni panghirimon tu naung tarpillit gabe panurirang ni Jahowa, na mangadopi ragam parungkilon dohot parsorion na hansit jala parir ala ulaon panurirangon na hombar tu na diaturhon Jahowa.

            Ayat 9 – 10

Di ayat 9 tangkas do dipabotohon songon dia Jahowa mamparbohali si Jeremia gabe sahalak panurirang-Na. Dipabotohon do Jahowa patoltolhon tangan-Na, jala manjama pamanganna. Ayat on pabotohon andorang so borhat si Jeremia laho manurirangi parjolo sahali do diparbadiai jala dibohali pamanganna laho manghatahon hata ni Jahowa. Tudos ma i tu si panjouon ni si Jesaya gabe sahalak panurirang. Laos ayat on ma na patangkashon ia sahalak panurirang ima dalan ni Jahowa pasahathon hataNa (mitra, rekan Allah dalam menyampaikan firman atau kehendak Allah kepada umat/ lebih khas disebut penyambung lidah Allah), jala ayat on pabotohon taringot hadirion ni si Jeremia songon sahalak jolma alai panghataionna hombar tu hata dohot sangkap ni Jahowa.

            Dung i dilehon Jahowa ma hataNa tu pamangan ni si Jeremia. Hombar tu 5 Musa 18: 18 songon i do na masa tu si Jeremia sandiri. Dilehon Jahowa do angka hataNa na naeng dipasahat si Jeremia jala on ma na pamagohon alus ni si Jeremia taringot tu hagaleon manang hahuranganna, na so mamboto hata na patut sihatahonna. Alai Jahowa sandiri do na mambohali si Jeremia angka hata dia do na pinasahat si Jeremia.

            Songon na dipatorang di ginjang, adong do tujuan pasti, ni si Jeremia gabe sahalak panurirang. Dung dilehon Jahowa hata-Na tu pamangan si Jeremia pintor dipasahat Jahowa do angka aha do na naeng jala ingkon diulahon si Jeremia “mangaranapi angka bangso dohot angka harajaon, laho mangurati dohot maniaphon, mangago dohot mangaloha, paulihon dohot manuan.  Molo manat talapati ulaon ni si Jeremia adong do 2 inti ulaon na diulaon si Jeremia (tugas yang berkelanjutan) ima “mangarumpakhon” dohot “paulihon”. Jala on ma na hasisingkop angka ulaon hapanurirangon ni si Jeremia ima, paboahon uhum, panghirimon. Disuriranghon si Jeremia do aha do uhum ni Jahowa tu bangso i, alai dang so disi, alai diuduti do lao paulihon tanda ni holong-Na.

            Tontu mansai ulaon na maol do ulaon i molo diida sian hajolmaon. Songon dia do sahalak na bajar paingothon panggomgom, angka raja, jala paboahon paruhuman tu bangso i? Olo do ra didok halak na loakhon manang na gila. Apalagi di hatiha i adong muse ma angka panurirang pargapgap na mandok dirina panurirang ni Jahowa hape sasintongna panurirang na mambahen dame jala las roha ni raja i asa dapotan diibana hauntungan tu dirina. Jala panurirang pargapgap on sai mandok dame..dame...alai dang adong dame na mian disi.

Aplikasi – Teologis

Saluhut hatorangan taringot panjouon ni si Jeremia, dipatuduhon do adong panghataion na mansai jonok songon sahalak ama manang dongan. On ma na pataridahon hajonokhon ni Jahowa tu si Jeremia. Nang pe di tingki panghataion ni si Jeremia tu Jahowa, dipabotohon si Jeremia do hagaleon dohot hahurangan ni si Jeremia gabe sahalak panurirang. Alai sude na i ndang boi mangambati angka sangkap ulaon haluaon na pinatupa ni Jahowa. Hombar ma tu lapatanna goar ni Jeremia (Timbul do Jahowa), patuduhon hatimbulon ni Jahowa na so boi diambati angka hagaleon dohot hahurangan ni jolma. Manang aha pe ragam angka hagaleon dohot hahuranganta, tapaloas ma Jahowa mangula dibagasan ngolunta asa marhite i, asa sude hagelon dohot hahuranganta i diumpat Jahowa. Marhite jamita on dipabotohon do mansai tangkas, Jahowa digombarhon sahalak na mananda tangkas mamparbadiai, jala na pabangkithon si Jeremia gabe panurirang. Ndada sangkap ni si Jeremia jala ndada siang tubu ni rohana gabe panurirang, alai sian sangkap Jahowa sambing do saluhutna. Jahowa sandiri na manangkapi laos Jahowa do na manuturi, jala mandongani si Jeremia mangulahon na dipinasahat Jahowa tu ibana.

            Sadarion, sahat ma panjouon ni Jahowa tu hita na tardok sahalak Kristen (siihuthon Jesus Kritus). Adong do 3 ulaon ni halak Kristen ima gabe malim, panurirang dohot raja. Sada sian ulaon i ima panurirang, na marlapatan papatarhon sangkap dohot hata ni Jahowa tu liat portibi on. Lapatanna, ndada holan ulaon ni Pandita laho pararathon hata ni Jahowa, alai sude saluhut na tardok dirina Kristen. Molo boi do hita rimangi aha do sangkap ni Jahowa di bagasan ngolunta? Ganup halak Kristen sadar atau tidak sadar parsidohot do mengambil bagian di panjouon ni Jahowa, songon halak naung ditanda jala diparbaidai marhite panobusion di bagasan Jesus Kristus, nunga parsidohot hita laho pararathon hata ni Jahowa (patudos Efesus 2: 10).

            Menyadari sebagai pelaku mengabarkan firman TUHAN, Ido na mandasor hita asa sahat hita singkop mangulahon saluhutna. Panjouon ni Jahowa ima patupahon ulaon haluaon na disangkapi Jahowa. Ise halak Kristen na so mamboto aha do ulaonna gabe sahalak Kristen, ima jolma na dangol situtu diportibi on. Tudos ma i diboto do ibana jolma, alai dang diboto aha do tujuan manang lapatanna ibana mangolu.

            Molo au marnida jala mangalapati na masa tingki on, halak Kristen ndang na manulak panjouon ni Jahowa, alai halak Kristen sai tongtong do menghindari manang menunda panjouon ni Jahoawa dengan alasan, “ndang mampu”, “maol jala dokdok ni ulaon i” jala adong ma mabiar ala ni sada alasan, “pangkat”, “hasangapon”, dohot na asing. Tongtong dipangke Jahowa jolma laho patuduhon sangkap-Na. Ndang na so tolap Debata patupahon sandiri, alai asa patar do marhite jolma naung dipillit-Na huaso dohot asi ni roha ni Jahowa. Jala jolma na martua situtu do hita molo parsidohot hita taruli diulaon papatarhon jala patuluhon sangkap ni Jahowa di portibi on.  

            Marhite turpuk jamita on, adong do hata apulapul na sian Jahowa: “unang ho mabiar maradophon nasida, ai sai Ahu do donganmu, paluahon ho”. Alani i, di sude hagaleonta dohot hahuranganta i, tapasahat tu Jahowa mardongan pos ni roha asa tung margogo hita patupahon sangkap ni Jahowa di ngolunta. Laho papatarhon uhum ni Jahowa jala papatarhon asi ni roha-Na. Jahowa do donganku, tung ise alongki? Molo Jahowa tabaen donganta, tung na tahutan be hita?

            Alani i, diragam ni angka parsorion dahot hatahuton, dohot ragam ni angka sahit na songgop dohot na asing, tapasahat ma tu Jahowa. Ai diapuli do hita, asa unang be mabiar. Nang pe hamatean na ingkon tabolos, taingot ma ai Jahowa do tongtong donganta saleleng ni lelengna. Jangkon jala hangoluhon ma panjouon ni Jahowa tu hita. Amen.