Bahan Jamita Epistel Minggu Kantate, 03 Mei 2026; 2 Tesalonika/ 2 Tessalonik 3: 1 - 12

BAHAN JAMITA EPISTEL
MINGGU KANTATE
OLOPOLOP HKI 99 TAON
MINGGU, 03 MEI 2026
2 TESALONIK 3: 1 – 12
 
MARENDE DO AHU TU JAHOWA

Pdt. Daniel Bonardo Pane, M.Th.

Patujolo

            Parhorasan ma di hamu amanami dohot inanami, ruas dohot parhalado ni huria HKI di ganup inganana be! Asi ni  roha dohot dame na sumurung sian saluhut na roha, ima na mangaramoti roha dohot ateatemuna di bagasan Jesus Kristus, Tuhan jala Sipalua, amen.

            Adong do hata na mandok: ndang adong hata na umuli begeon asing ni tangiang. Molo tajaha bibelta di Padan na robi dohto di padan na imbaru sai disuru do hita asa martangiang. Tung margogo situtu do tangiang ni angka na daulat, jala dapotan gogo do ibana marhitehite tangiangna songon i nang angka jolma na diondihon di tangiangna. Di hurianta adong do bagian ni liturgi tangiang pangondianon (ndada tangiang tingting). Tangiang pangondianon ima tangiang na mangondihon saluhut angka na porsea, mangondihon angka jolma asa margogo jala manahan di saluhut parsorion na masa, mangapuli angka na marsak jala mampargogoihon angka na gale. Alani i, sai didok do asa manongtong ma hita martangiang. Turpuk jamita epistel on, ima surat ni apostel Paulus na paduahon tu huria na di huta Tessalonik asa tongtong nasida martangiang huhut managam ari las ni roha, ari parolopolopon di na ro Jesus Kristus muse di ari parpudi. Molo tung jumpang ari i, marendeende ma hita mangolophon Jahowa di habangsaNa na badia. Asa lam ampit hita mangantusi turpuk jamita on na marpadomuan tu ojahan minggu, masuk ma hita tu hatorangan ni turpuk.

 

Hatorangan ni Turpuk

            Ia buku 2 Tesalonik ima surat na paduahon na sinurathon ni apostel Paulus tu huria Tessalonik. Huria Tessalonik, maringanan di huta Tessalonik, huta na ribur jala na balga. Huta Tessalonik ima na gabe ibukota haulion propinsi Junani (sebelumnya dikenal dengan kerajaan Makedonia) di harajaon Rom. Huta Tessalonik maringanan di tungkan utara ujung ni teluk Thermaikos, Junani. Si Paulus do na manurathon suratna on hirahira taon 48 – 51 M. Didapot si Paulus do barita taringot na masa di huria Tessalonik ima na adong parpoda haliluon na mangajarhon taringot haroro ni Tuhan (parousia) naung masa (ida 2 Tes. 2: 2), na mambahen ruas ni huria i didiaon (bingung) taringot hasisintong ni pangjarion i. Adong ma nasida paradehon dirina holan na dibagasna be holang na martangiang so mangula ulaonna be. Adong muse ma parange ni jolma i tidak mau tahu taringot haroro ni Tuhan, ndang taboto boha sintongna haroroNa i na ringkot ulaohon ma ulaon na holan manghorhon las ni roha di pamatang (muncul paham hedonisme, hidup berfoya - foya), jala holan mangahut tu haringkot ni parbue ni daging (pat. Gal. 5: 19 – 21). Ala ni i do disooi manang dipodahonh si Paulus huria na di Tessalonik asa unang madabu tu angka ulaon na maralo tu barita na uli. Tutu do Jesus Kristus na naeng ro, alai ndang taboto jala ndang adong jolma na boi manontuhon sadihari tingki manang arina. Alani i, rade ma hita managam haroroNa i marhite martangiang huhut mangulahon ulaonna. Ndang boi tarsirang martangiang dohot mangula ulaon.

            Di ayat 1 ddidok asa martangiang ma huria i huhut manangianghon hami. Ise do hami na dison? Ima apostel Paulus, Silas, Timoteus dohot angka parbarita na uli na asing na manongtong mangaringgashon ulaon parbaritanaulion tu angka bangso nang pe mangadapi hamaolon dohot sitaonon sahat tu na dipenjara dohot ingkon marutang hosa. Sai ditangianghon huria na di Tessalonik ma angka parbaritanauli asa unang so hata ni Tuhan. Lam diorai jala ditulak laho marbaritanauli, alai lam marlojong do hata ni Tuhan i marsaringar. Marhite tangiang ni huria i mangondihon angka parbaritanauli asa malua nasida sian halak na jengkel jala na jahat; ai ndang saluhutna olo porsea di baritanauli i jala ndang olo porsea di Jesus Kristus na gabe Tuhan jala Sipalua (ay. 2).

            Soso asa “martangiang” ima sosososo si Paulus tu huria di Tessalonik asa manang aha pe na masa di adopannasida ingkon manongtong ma nasida martangiang. Marhite tangiang do nasida mangidohon bisuk dohot pangantusion na laho manimbangi angka ragam pangajarion na masa, manirang dia do pangajarion na ingkon peoponnasida jala pangajarion na ingkon ditulak. Marhite na martangiang, taparhatopot na so margogo jala ndang jumpang bisuk dohot parbinotoan laho mangadopi ragam na masa di hasiangan on; na so tau gogo dohot hadirion gabe sipangasahon dohot na gabe pangondianan, alai Debata Ama, Anak dohot Tondi parbadia ma na ingkon sipangasahon, ai tau haposan do Ibana jala tau pangondianan ni angka na daulat marroha. Ai haposan do Debata, ibana do na patoguhon rohanta jala na mangaramoti hita maralohon na jahat dohot ragam parpoda haliluon i (ay. 3).

            Mardongan pos ni roha do si Paulus mamodai manang manosoi huria di Tessalonik na diulahonnasida do angka i sudena (ay. 4). Molo pe masa angka parpoda haliluon, alai hot do ianggo haporseaonnasida. Pos ni roha on marharoroan sian panandaiaon na tangkas si Paulus tu huria Tessalonik songon i nang huria Tessalonik tu si Paulus na manghorhon parsaoran na mansai ronsu. Di ayat 5, dipapos si Paulus do huria Tessalonik na togutoguon ni Tuhani rohanasida tu holong ni roha ni Debata dohot tu habengeton ni Kristus i (pat. Pilp. 2: 5 – 10). Holong ni roha tu Debata martudutudu tu parsombaon dohot pamelehon diri na hibul tu Debata, marparange songon Kristus (imatatio Christus) martudututudu tu parange na marpangoloion, marhabengeton marhasatiaon, na sumeahon ha-Debata-onNa gabe rupa hatoban na patuduhon haserepon ni roha laos di bagasan hasereponNa do dipatimbo Debata Ama Ibana sian saluhut angka Goar. Asa nasa ulu ni tot marsomba tu Ibana, jala nasa dila marhatopothon Jesus ima Tuhan jala Sipalua (pat. Pilp. 2: 11).

            Di ayat 6 – 12 ima pangajarion ni apostel Paulus tu huria na di Tessalonik asa gabe huria na maradat na sida. Pandohan “maradat” di turpuk on ima marparange na denggan jala tau tiruan; manghasomalhon mangulahon angka haulion di parsaoran huria nang songon i parsaoran di humaliang. Adong roha na martamue, roha holong dohot mangharingkothon pangurupion di angka dongan, roha marpanarihon dohot burju di angka ulaon na denggan. Unang ma songon halak na so maradat ima parange na so boi tiruan, sibahen hasesega di punguan huria, na manghorhon hagunturon di parsaoran na humaliang, marroha losok na so ulaulaon. Molo pe managam hita di ari haroro ni Tuhan Jesus Kristus di ari parpudi unang ma gabe songon halak na so maradat. Alai molo lam masihol hita di haroroNa i, lam tahaburjuhon ma mangulahon angka na denggan. Unang marlosok ni roha, padot ma di angka ulaon, hobas di angka sihobasan jala sude na i ingkon diulahon songon parbue ni tangiang.

           

Refleksi Teologi

Parbue ni haporseaon do angka ulaon na denggan, jala ingkon saurdot do haporseaon, tangiang dohot parulaon. Ndang boi hita manutup diri taringot aha na masa di hasiangan on, jala unang gabe tarlalap hita mangharingkothon na di portibi on gabe tading di angka hinaringkot ni ngolu partondion. Ganup jolma naung porsea di Jesus Kristus tangiang dohot ulaon ima na dua hal na mansai diharingkothon. Ndang boi na porsea i holan mangula so pola martangiang, manang holan na martangiang so ulaulaon.

Marhitehite ojahan jamita epistel di pesta olopolop HKI na pa-99 taon on, diajari do hita asa marende hita mangendehon hagogoon dohot hasangapon ni Debata; mangendehon saluhut denggan basa dohot asi ni roha ni Jahowa Debata naung patar di bagasan Jesus Kristus dohot parsaoran ni Tondi Parbadia. Mangendehon ende na imbaru ndada dilapati holan marende mardongan musik, alai marende mangendehon ende na imbaru ima ulaon na manghalashon dohot mangolophon sude pambahenan ni Debata di ngolunta marhite burju na martangiang dohot burju mangula di angka ulaonna na denggan i. Alani i, sude parhalado dohot ruas ni huria HKI na marlasniroha sadari on, adong do hata na mandok: ora et labora na marlapatan martangiang jala mangula. Tangianghon ma na naeng siulahononmu, ulahon naung ditangianhonon, jala tangianghon ma muse naung niula. Martangiang dohot mangula ima na ingkon siulahonon ni angka na porsea huhut mangaramoti dirina asa unang madabu tu ragam pangunjunan dohot manjamothon dirina asa unang madabu tu mangoloi hisaphisap ni daging; manimbangi saluhut angka pangajarion asa unang madabu tu pangajarion ni parpoda haliluon. Ramotan ni Debata ma hita di pardalanan ni ngolu on asa molo jumpang ari haroroNa na sangap i, dapotononNa ma hita hita so hasurahan, amen.

Bahan Jamita Minggu Kantate, 03 Mei 2026; Keluaran/ 2 Musa 15: 1 - 14

BAHAN JAMITA 
MINGGU KANTATE
OLOPOLOP HKI 99 TAON
MINGGU, 03 MEI 2026
2 MUSA 15: 1 – 14

MARENDE DO AHU TU JAHOWA
Pdt. Daniel Bonardo Pane, M.Th.

Patujolo

            Parhorasan ma di hamu amanami dohot inanami, sude ruas dohot parhalado ni huria na adong di portibi on, tarlumobi di sude ruas dohot parhalado HKI di ganup inganana be! Asi ni  roha dohot dame na sumurung sian saluhut na roha, ima na mangaramoti roha dohot ateatemuna di bagasan Jesus Kristus, Tuhan jala Sipalua, amen.

            Sada ulaon na so marujung do ianggo parendeon. Parjamiton, panurirangon dohot lan angka ulaon na di portibi on marujung do saluhutna. Alai anggo parendeon na so jadi marujung. Nang pe daging mate jala gabe malangke, alai anggo parendeon i murudut do di habangsa ni Debata. Dung di ari haroroNa di ari parpudi, dipahehe ma hita sian hamatean jala parsidohot ma hita di habangsaNa na gok hamuliaon dohot hasangapon marende, mangendehon habadiaon, hasangapon dohot hamuliaon ni Debata, mangendehon hatimbulon dohot habolonon ni Debata manggomgomi saluhut angka na tinompaNa (pat. Pangk. 5: 8 – 13; 15: 2 – 4). Alai andorang so sahat dope hita tu paraendeon di habangsa ni Debata na sangap i, marhite turpuk jamita evangelium on dipabotohon tu hita taringot sada ende ni si Musa, sahalak ulaula ni Jahowa Debata na papatarhon huaso dohot hagogoon ni Jahowa Debata na so hatudosan naung patar diida jala dipanghilalahon halak Israel na manghorhon haluaon Israel sian parhatobanon Misir jala na patariparhon halak Israel manaripari laut Teberau. Marhite hata ni ende on, tung tangkas do dibaritahon si Miriam hatimbulon dohot hagogoon ni Jahowa Debata na so adong hatudosanna. Asa lam tu antusna hita mangantusi turpuk jamita on, masuk ma hita tu hatorangan ni jamita.

 Hatorangan ni Jamita

            Di ayat 1 ima patujolo ende ni si Musa on. Didok: “marende ma ahu tu Jahowa, ai marmulia situtu do Ibana”. Tu Jahowa do dipasahat si Musa endena on, dipanghilalahon ibana do gogo dohot huaso ni Jahowa na so tupa adong gogo dohot huaso na boi dipatudos tu gogo dohot hauso ni Jahowa. Nang pe dihajugulhon si Parao laho patuduhon gogo dohot huaso debata na disombana, ima debata Ra alai ndang tolapsa manaluhon gogo dohot huaso ni Jahowa Debata. Jahowa do mangungkap dalan tariparan laut Teberau asa boi mardalan bangso Israel manaripari laut i. Laos dalan na diungkap i mamauphon si Parao dohot angka soldaduna na naeng manangkup muse halak Israel. Ndang adong gogo manang huaso manang aha pe jala sian debata na dia pe na boi manundati haluaon na pinatupa Jahowa. Patariparan laut Teberau i pataridahon pangaramotion dohot pangondianon ni Jahowa maradophon bangso Israel na gok halongangan bolon.

            Di ayat 2 didok: “Jahowa do hatogaonku dohot pujipujianku jala manjadi hatuaonku. Ibana do Debatangku...”. dipahartopot si Musa do tung na so margogo ibana laho patupahon angka ragam halongangan na binahenna di Misir, alai gogo Jahowa, Debata ni Israel i do na patupahon angka halongangan i marhite ibana, lapatanna papatarhon gogo dohot huaso ni Jahowa do si Musa laho patupahon halongangan di Misir. “Debata do haluaon manang hatuaonku”, hata on jotjot do dipangke di angka ende liturgi halak Israel na pabotohon ndang jumpang haluaon dohot hangoluan na marharoroan sian na asing; ndang adong gogo dohot huaso na boi patupahon haluaon songon na binahen ni Jahowa Debata, ala ni i, Jahowa do Debatangku!

            Didok di ayat 3: “Jahowa do Ulubalang bolon, Jahowa do GoarNa”. Di hata heber hata ulubalang didok mil^ekhāmāh na marlapatan pahlawan perang. Dihatindanghon si Musa do taringot parporangan na masa di harajaon Misir. Ndada parporangan pardagingon alai parporangan ha-Debata-on. Dipaloas Jahowa do si Parao patuduhon saluhut gogo ni debata Ra na dihaporseai halak Misir debata na gogo situtu do debata Ra. Ndang margogo hape hagogoon ni Ra debata Israel martimbanghon hagogoon ni Jahowa, Debata ni Israel. Ulubalang bolon do Debata, na tuk pataluhon sude hagogoon ni angka debata di tano on na patupahon sude halongangan bolon na so boi dibahen angka hagogoon ni angka debata sileban. Marhite hagogoon bolon i do malua Israel sian parhatobanan Misir jala boi nasida mardalan manaripar laut Teberau. Mannghorhon hamonangan do saluhut na binahen ni Jahowa, hamonangan maralahon parhatobanon, maralohon angka parange na so uhum na binahen ni halak Misir, monang maralohon parsorion dohot talitali ni halak Misir na mambahen mabugang daging ni halak Israel. Marhamonangan do halak Israel mamolus rura linggoman ni hamatean. “Jahowa do GoarNa”! Jahowa, Debata na naung adong, na mambahen adong sian na so adong; molo pe salpu saluhut angka na adong i, alai hot do Ibana jala manongtong, na so tupa salpu anggo Ibana dohot hataNa. Marhagogoon do GoarNa jala marhamuliaon, na badia do GoarNa.

            Dung haruar halak Israel jala naeng manadinghon luat Misir tarambat ma langkanasida ala patar diadopi nasida laut teberau na bagas hape sian pudi ro do soldadu Misir na niuluhon Parao Misir mardongan hurete hoda porang na marsangkap laho mamunu halak Israel. Mardalan halak Israel laho malua, hape hamatean do dijolona marhite laut teberau, mulak pe nasida tu pudi tong do hamatean na naeng masa marhite hureta hoda porang halak Misir na naeng mamunu. Mangalualu do si Musa mangido hagogoon ni Jahowa Debata mangido asi ni roha ni Debata asa tung dipalua halak Israel sian hamatean. Ditangihon Jahowa do alualuna i, laos disuru do si Musa manghindat tungkotna, jala patoltol tanganna tu atas laut, jala patolak, asa dibolus halak Israel tongatonga ni laut i, mardalan di na mahiang. Masa ma hagogoon ni Jahowa Debata marhite angka alogo na unduk di hataNa na gabe parangan ni Jahowa laho mamola laut i gabe tarbola. Mardalan ma halak Israel manaripar laut na bidang jala na bagas i. Diida si Parao dohot angka soldaduna na masa i, lam margogo ma nasida laho mangalele dohot mamunu halak Israel. Sahat ma si Parao dohot soldaduna di hatariparan ni halak Israel di tonga laut teberau, disuru Debata ma si Musa laho  patoltol ma tanganna tu atas laut, asa sumuang angka aek i lingkup tu halak Misir, tu angka huretana dohot tu angka parsihundulna. Hamatean dohot hamagoan ma na gabe jambar ni si Parao dohot soldaduna, jala na so tolap do ianggo gogo ni debatana paluahon dirina dohot soldaduna sian hamagoan na pinamasa Jahowa tu nasida. Marningot saluhut pambahenan ni Jahowa i do umbahen dihatahon si Musa marhite endena songon di ayat 4 – 10 turpuk jamita on.

            Tung ise ma songon Ho, ale Jahowa di tongatonga ni angka debata? Di ayat 11 – 14 ima panghatindangahon ni si Musa taringot tu hatimbulon, hasongkalan ni Jahowa Debata di tongatonga angka debata na disomba angka bangso na leban. Ganup bangso sai adong do debatana, jala hagogoon ni debata tarida do sian hagogoon ni bangso na maralahon bangso. Molo monang do bangso i, hataridaan hagogoon dohot hamuliaon ni debatana; alai hataluon ni sada bangso, hataridaan hagaleon dohot hataluon debata na disomba. Songon i do pangantusion ni angka bangso di partingkian na robi (pada kurun waktu sejarah Alkitab (ANET: Ancient Near East Time)). Di partingkian ANET, Bangso Misir, ditanda do bangso na bolon jala marhagogoon (istilah saat ini disebut: negara/bangsa super power) ima hataridaan debata “Ra” na disomba bangso i, ima debata na marhagogoon. Alai hagogoon ni debata Ra ndang boi paluahon si Parao dohot halak Misir sian hamagoan dohot paruhuman na dipamasa Jahowa tu nasida. Tung tu ise ma dipatudos hagogoon, hatimbulon dohot habadiaon ni Jahowa di tano on; di ganup inganan dohot di ganup tingki? Ndang adong! Jahowa, Debata sasada do! Dibege angka bangso ma Goar ni Jahowa, jala angka dotdot ma nasida hinorhon ni hasongakalan dohot hatimbulon Goar ni Jahowa. Haleluya!

 

Refleksi Teologi

            Sadari on, maroloolop ma HKI di siala toho di tanggal 01 Mei 2026
, gonop ma umur ni hurianta HKI marumur 99 taon, jala di taon 2027 tapestahon ma pesta Jubeleium II (Jubelium dirayakan 1 x 50 tahun, tidak setiap tahun atau sekali sepuluh tahun, melainkan setiap sekali lima puluh tahun). Tama situtu do sude hita: parhalado, parhobas di huria, ruas ni huria marlasniroha di saluhut pangaramotion ni Jahowa Debata di pardalanan ni hurianta sian na mamungka 01 Mei 1927 sahat tu 01 Mei 2026. Marhite buku on hupasahat hami: “selamat ulang taon tu HKI: panjang umurnya, sehat seluruh para pelayan dan jemaatnya, kuat imannya di dalam Tuhan.

            Autsugari marujiruji hita di saluhut pardalanan ni hurianta sian na mamungka sahat tu sadari on, tung godang situtu angka hamaolon na niadopi angka amanta dohot angka natorop na pajongjong hurianta on sian mamungka goar HCh.B, dung i na marganti goar tu HKI songon goar ni hurianta sadari on. Ditulak do hajongjongan HCh.B sian missi RMG, digoari do pambarontak dohot pangalo tu RMG. Alai ndang sumurut haringgason ni amanta dohot situan natorop laho papatarhon barita na uli, songon i nang patupahon haulion dohot haluaon tu bangso batak sian panggosagosa sibontarmata. Sahat tu pardalanan ni hurianta HKI sai tongtong do mangadopi ragam angka hamaolon dohot sipingkiron laho patupahon panghobasion huria. Alai di sude pardalanan ni ngolu ni HKI sada na ingkon siingotonta, na so jadi dipasombu Jahowa huriaNa punjung mangadopi i, alai marhite hagogoonNa dohot huasoNa na so tarasam dohot na so hatudosan.

            Marhitehite gogo dohot pangondion na sian Jahowa mamolus ragam angka na masa di hasiangan on, tama ma hita marende jala marlasniroha. Jahowa do ulubalang bolon di bangso na manghirim haluaon na pinatupaNa. Tama situtu do hita marendeende jala marolopolop di saluhut pambahenan ni Jahowa. Nang songon i ngolunta di hasiangan on. Godang do tutu siboluson di pardalanan ni ngolunta, alai marhagogoon do Jahowa patupa haluaon dohot pangaramotion tu ngolunta. Marolopolop ma hita jala marende, taendehon ma ende na imbaru sada manghalashon sude pambahenan ni Jahowa Debata di ngolunta, amen.

BAHAN JAMITA EPISTEL, JUM'AT AGUNG, 03 APRIL 2026: PSALMEN/ MAZMUR 22: 1 - 12

BAHAN JAMITA EPISTEL

JUM’AT AGUNG

Jum’at, 03 April 2026

PSALMEN 22: 1 – 12

TUTU DO JESUS I ANAK NI DEBATA!
Pdt. Daniel Bonardo Pane, M.Th.

Patujolo

            Parhorasan ma di hamu amanami dohot inanami na hinaholongan di bagasan Jesus Kristus, Tuhan jala Sipalua i! asi ni roha dohot dame na sumurung sian saluhutna angka roha, ima na mangaramoti roha dohot ateatenta di bagasan Jesus Kristus, amen.

            Adong do hata ni na bisuk mandok: homo socius na marlapatan ianggo jolma ima tinompa ni Debata na mangharingkothon parsaoran manang dongan (ciptaan Allah yang membutuhkan persekutuan atau teman). Hata on mandok tu hita: ndang boi jolma i mangolu sahalakna, ringkot do jolma i dongan. Dongan na boi martungkarpingkiran uju adong na maol sipingkiran; dongan na boi mangapuli uju masa arsak dohot sitaonon; dongan na boi maniroi uju masa haliluon di pingkiran; dongan na boi manungkoli uju masa hagaleon. Alai di hasiangan on masa do hata na mandok: godang do dongan uju adong di iba; alai molo so adong di iba, bolong ma pardonganon; godang do dongan na rap mengkel, alai ndang piga dongan na boi rap tangis. Turpuk jamita epistel on, ima sada andungandung ni parpsalmen na manghilalahon punjung na so mardongan uju masa sitaonon na mansai dokdok dohot bernit di ngoluna. Asa lam tu antusna hita mangantusi turpuk jamita epistel on, masuk ma hita tu hatorangan ni turpuk.

 

Hatorangan ni Turpuk

            Ia Psalmen 22 on ima anggukangguk na tung mansai bagas na dipasahat marhite tangiang taringot sitaonon manang hinahansit tarsongon na ditadinghon Debata panghilalaanna hinorhon ni hansitna manang bernitna. Jotjot do turpuk jamita epistel on dipahombar tu anggukangguk ni Tuhan Jesus Kristus uju di hau pinarsilang. Laos alani i do tubu do pangantusion ia anggukangguk on ima anggukangguk berdimensi mesianik, anggukangguk na dibagasna pabotohon taringot pambahenan ni Jahowa Debata laho patupahon haluaon nang pe ingkon jumolo mamolus sitaonon manang haberniton bolon.

            Sungkunsungkun, boasa ma tung dipaloas Jahowa masa hinahansit dohot hinabernit masa di parngoluon ni angka na manghaposi Ibana? pangidoan nian, molo jonok do parsaoran tu Debata, burju mangulahon patikNa, jala parroha na daulat unang ma nian adong parungkilon dohot sitaonon; marhasil ma nian angka niula jala lam ganda ma nang pansamotan. Alai, ndang boi hape pangidoanta i manontuhon taringot parngoluonta. Ingkon boluson do hape sitaonon dohot ragam hinabernit di tano on asa tung manghilala hita pandonganion dohot pangaramotion ni Jahowa Debata di ngolunta. Marhite sitaonon manang hinabernit na tapanghilalahon di portibi on manghorhon habengeton do i saluhutna, jala habengeton ni manghorhon panghirimon taringot haluaon dohot las ni roha singkat ni sitaonon na masa.

            Marhite turpuk jamita on, boi do idaonta taringot hinahansit panghilalaonna, punjung nama panghilalaonna songon na so mardongan. Ise do parpsalmen na nidok di turpuk on? Ima si Daud. Taboto do ra ise do si Daud, sahalak parmahan jala pardaging na metmet dohot na marniang, alai ibana do ditodo Jahowa Debata na gabe raja bangso Israel luhutan singkat ni raja Saul, ima simatua dolina. Gumodang do di psalmen on ende na manang tangiang na dipatupa si Daud songon patuduhon pengalaman iman-na, na tung mansai ronsu do parsaoranna dohot Jahowa Debata. Dipalu ibana do hasapi laho patubegehon hatimbulon dohot huaso ni Jahowa Debata dohot ragam halonganan na pinatupa. Alai di pardalanan ni ngoluna, ndang sude hape jolma manghalomohon molo songgop las ni roha di ngolu on. Sai adong angka jolma las rohana molo marsak hita, jala marsak rohana molo sonang rohanta. Hata na bisuk mandok di hata Indonesia: “kenallah kesetiaan sahabat dan temanmu ketika engkau berada dalam titik terendah, bukan ketika dirimu berada di titik atas”. Pandohan on adong do hadomuanna na mandok: boi do godang dongan molo masa las ni roha jala adong siadonganta, alai boi do mandao angka dongan molo masa di ngolunta hapogoson dohot sitaonon.

            Di ayat 1 – 3 adong anggukangguk sian si Daud mandok: “ale Debatangku, Debatangku! Boasa tadinghononMu ahu?” hata on ndada na pabotohon tu hita na dipasombu Debata si Daud punjung manaon sitaonon dohot hahansitanna. Alai anggukna i patuduhon tung mansai borat situtu sitaonon dohot parungkilon na masa di ngoluna. Torop do halak Israel mangolophon si Daud gabe raja uju monang si Daud maralahon si Goliat, alai holan masa ancaman sian si Saul laho mamunu si ibana, ndang adong sahalak na barani mangampini si Daud. Dilele rimas dohot sangkap pamunuan ni raja Saul do si Daud. Martabuni ma si Daud, sahat di na laho ibana tu Ziglag martabuni ala ni biarna. Dihatindanghon si Daud na sai joujou ibana mangido pangurupion sian Jahowa Debata. Marhite panghatindanghonon ni si Daud on tangkas dipabotohon tu hita holan tu Jahowa do ibana joujou mangido pangurupion dohot haluaon. Jahowa do na gabe haposan jala haporusanna. Ndada tu jolma manang tu gogo ni portib on ibana pasahathon pangidoanna on, alai tu Jahowa do; jala holan tu Jahowa do ibana marhuraja; sonang do panghilalaonna rap mian di pangondian ni Jahowa nang pe tung bernit situtu sitaononna.

            Di ay. 4 – 6, marningot do si Daud taringot songon dia pangaramotion, pandonganion dohot haluaon na pinatupa ni Jahowa tu angka ompuna. Marhite hatimbulon dohot hasongkalan ni gogo ni Jahowa malua do si Noah sian hamamasa aek na sumar; marhite hatimbulon dohot hasongkalan ni gogo ni Jahowa mangaramoti, mangondihon dohot paluahon si Abraham, Ishak dohot si Jakob di ragam hamamasa sitaonon di ngolunasida be; Uju di parhotabanon Misir, patar do hatimbulon dohot hasongkalan ni gogo ni Jahowa, paluahon halak Israel malua sian parhatobanon Misir; marhite hatimbulon dohot hasongkalan ni gogo ni Jahowa boi do halak Israel taripar sian laut Teberau; marhite hatimbulon dohot hasongkalan ni gogo ni Jahowa boi halak Israel sahat tu Kanaan mamolus ragam na masa di pardalanannasida dohot lan na masa na asing. Molo pe masa angka hagogotan, sitaonon manang haberniton di pardalanan ngolu angka ompuna, holan tu Jahowa do nasida joujou manang manganggukhi mangido pangarmotion dohot haluaon marhite hatimbulon dohot hasongkalan ni gogoNa.

            Di ayat 7 – 12 dipatudos si Daud na gea (cacing tanah) dirina na so mararga. Dileai jala diparengkeli angka na torop do ibana di na masa sitaonon dohot haberniton i. nang pe gea, alai na tinompa Jahowa do ibana. sude angka na tinompa mangaranap do tu Jahowa. Dipatudos si Daud dirina gea patuduhon hagaleonna dohot hasereponna. Tung na so margogo be si Daud jala na so tau hadirionna boi paluahon ibana sian ragam parsorion. Asing ni si Saul, bangso Palistin tung las situtu do rohanasida marnida sitaonon dohot haberniton ni si Daud ala naung ditaluhon si Daud ulubalang ni Palistin ima si Goliat.

            Alai ditongatonga panghilalaan ni si Daud i diparhatopot ibana do muse holan tu Jahowa do ibana marhaporusan, holan tu tu Jahowa do ibana mangalualu, joujou. Didok di Psalm. 50: 15 “jou ma Ahu jumpa di ari hagogotan, asa hupalua ho, asa dipuji ho Ahu”. Manjou Jahowa Debata jumpa di ari hagogotan marlapatan mangido hagogoon dohot manghirim ulaon haluaon na naeng sipatupaon ni Debata tu na manjou Ibana; patuduhon na ingkon maporus tu Jahowa do si Daud ala ndang adong na tuk gabe haporusanna di tano on.

 

Hahonaan ni Turpuk

            Turpuk jamita epistel di ari hamamate ni Tuhan Jesus Kristus sadari on, pabotohon hita taringot joujou ni sahalak tu Jahowa Debata di tongatonga sitaonon dohot habernitonna. Hata ni endenta BE. 806 ayat 1 didok: “Aha pe masa di ngolumon, Tuhan manjaga ho, holongNa do mangondihon ho, Tuhan manjaga ho. Tuhan manjaga ho, las pe roham marsak pe ho, Sai diramoti ho, Tuhan manjaga ho”. Songon i nang di ayat 3 didok: “Molo borat siporsanonmi, Tuhan manjaga ho,

Tung pe golap parnidaanmi, Tuhan manjaga ho. Tuhan manjaga ho, las pe roham marsak pe ho, Sai diramoti ho, Tuhan manjaga ho.” Molo masa borat ni sitaonon i, golap panghilalaanta di parngoluan on, jala songon na punjung panghilaanmu ingot ma Tuhan manjaga ho, Tuhan mandongani ho, jala Tuhan patupahon haluaon di ho nang pe ingkon jumolo tahilala ragam na hansit, amen.

 

Bahan Jamita/ Khotbah Evangelium: Jum'at Agung (Hari Peringatan Kematian Yesus Kristus): Mateus/ Matius 27: 45 - 56

 BAHAN JAMITA EVANGELIUM
 JUM’AT AGUNG
Jum’at, 03 April 2026
MATEUS 27: 45 – 56

TUTU DO JESUS  I  ANAK NI DEBATA!
Pdt. Daniel Bonardo Pane, M.Th.

Patujolo

            Parhorasan ma di hamu amanami dohot inanami, hahaanggi dohot pinaribot! Asi ni roha dohot dame na sumurung sian saluhutna angka roha, i ma na mangaramoti ateate dohot rohamuna di bagasan Jesus Kristus, Tuhanta i, amen.

            Hata ni endenta di BE. 412 ayat 1 didok: “ndi di dolok adui silang ni Tuhan i, sap mudar, sap tijur do i. Jesus mate disi, asa malum dibaen sude angka gondok roha i. Dibahen i, tung holong rohangki mida silang di Golgata i. Hupasolhot diringku tusi dompak Surgo pardalananki”. Tung balga situtu do holong ni Debata Jahowa tu portibi on, pola do dilehon AnakNa na sasada i tu portibi on manaon hinahansit, hinabernit dohot ragam sitaonon na binahen ni angka jolma sahat tu mate tarsilang Ibana. ndada ala ni hajahaton dohot ragam ulaon na jat jumpa di Ibana, alai tung songon i ma hansitna, parirna dohot dokdokna ditaon Tuhan Jesus asa boi do hita malua sian gomgoman ni dosa dohot soropna. Jesaya 53: 4 – 5 didok: Tongon do angka sahitta diusung Ibana, jala angka pardangolanta diporsan; alai anggo rohanta mandok: Debata do maminsang, mamungkul dohot pasipal ibana. Hape ala ni pangalaosinta ibana tartullang, binahen ni hajahatonta ibana mabugang. Ampe tu Ibana pinsangpinsang parhitean ni hasonanganta, jala binahen ni bugangna malum itahilala. Hata Ibana di Jesaya 53: 4 – 5 martudutudu do i tu Jesus Kristus. Ibana ma na rade manjalo saluhutna na masa tu dirina sahat tu na mabugang pamatangna, dijalo Ibana do haleaon, insahinsak, reherehe, tijur pe songon i tali dohot pastappastap ima dalan ni Debata patuduhon hatigoran ni uhumNa, asa malua hita sian gomgoman ni dosa dohot soropna. Ai sorop ni dosa do anggo hamatean (hata Indonesia: maut; hata Junani: thanatos) ima inganan paruhuman na parpudi na gok hinahansit dohot anggukangguk, masa laut api dohot barerang na so ra mintop jala ndang jumpang hangoluan dohot las ni roha songon na masa di Surgo. Ido nuaeng marningot hita di hatigoran uhum ni Debata dohot hapapatar ni holongNa di bagasan Jesus Kristus, Anak-Na na naung gabe jolma. Nang pe torop jolma na so manjanghon Ibana songon Anak ni Debata, alai anggo sahalak soldadu na so marharoroan sian Jahudi tubu panopotionna dung diida ibana sude na masa i. didok induk ni soldadu i ma: “tutu do on Anak ni Debata”. Asa lam antus hita mangantusi turpuk jamita on, masuk ma hita tu hatorangan ni turpuk.

 

Hatorangan ni Turpuk

            Ia panurat ni evangelium Mateus on ima apostel Mateus, sada sian sampuludua sisean manang apostel na pinillit ni Tuhan Jesus. Sahalak Jahudi do ianggo si Mateus na mamboto taringot haroro ni Mesias songon naung dibagabagahon manang naung disuriranghon angka panurirang di padan na robi. Andorang so gabe sisean manang apostel ibana, martugas do ibana gabe sijalo beo di halak Jahudi. Tung dihasogohon halak Jahudi do sijalo beo nang pe i sian bangsona ala diantusi halak Jahudi ianggo sahalak sijalo beo na parsidohot do i tu horong Rom na manggosa (menjajah) bangso Jahudi. Nang pe disogohon halak Jahudi si Mateus alai ndang na gabe sipangambati i di panjouon dohot pamillitonna gabe sisean manang apostel. Disurathon si Mateus do evangelium on laho pabotohon tu halak Jahudi, ia Jesus Kristus, halak naung direhe jala dibahen na so uhum sahat tu na mate tarsilang, tutu do Ibana Mesias manang Kristus, jala tutu do Ibana Anak ni Debata. Ndang adong be Mesias manang Kristus na naeng sipaimaon muse na gabe Sipalua ai nunga digohi jala singkop di bagasan hadirion ni Tuhan Jesus Kristus.

            Turpuk jamita evangelium sadari on ima pardalanan hinahansit, hinadokdok dohot hinabernit ni Tuhan Jesus uju na marlomolomo halak mambahen gogona laho mamusa, pasipal Tuhan Jesus. Songon dapotan tabantaban nama angka soldadu i patuduhon gogona marhite na mamastap, mangalinsingi Tuhan Jesus, songon i nang angka gasip dohot hata reherehe na ro sian halak Jahudi boha ma asa marutang hosa Tuhan Jesus ala ni i. Tung mabiar situtu do si Latus di ondamondam ni angka natorop mandok asa diparsilanghon Tuhan Jesus. Sahalak partigor jala na sintong, ingkon songon halakhalak ibana jala songon parjahat dipamasa tu ngoluna sahat tu na tarsilang. Dibahen ma hau silang na mansai borat i situhukhon ni Tuhan Jesus. Sipata tinggang do Ibana manuhuk dohot mamboan silang i ala ni borat ni hau silang i dohot hinorhon ni bungang naung mangontak di pamatangNa dohot di naung gale situtu pamatangna. Sahat ma Jesus Kristus tu Golgata, ingangan partanghurakhan jala di dolok golgata i ma dipajongjong Tuhan Jesus rap dohot silang na dipalohot tu Jesus Kristus. Di pungkul 9 manogot i ma, Jesus naung tarsilang i dipajongjong paadopadop halak na torop na sai mangaleai Jesus.

            Masa ma haholomon di hos ni ari sahat tu pungkul tolu. Hos ni ari na nidokna dison hirahira punkul 12 arian toho di hos ni ari i, masa do haholomon di inganan i. Partingkian hos ni ari di tonga ari, somalna do mohop situtu ari i jala angka jolma ndang adong na barani haruar sian bagasna be ala ni mohopna. Alai partingkian di na tarsilang on Jesus torop do angka jolma haruar sian bagasna, boi do dohonon ala ringkot naeng botoon jala diida nasida na masa tu Jesus Kristus. Ditaon torop angka jolma i do las ni ari manang mohop ni ari i boha ma saut diida jala dibotonasida taringot na masa i. adong do na marsuraksurak: “pasilanghon Ibana”; adong na mangarehei; adong na mamastap dohot mambahen angka lalu tangan tu Jesus Kristus na mamboan silang i sahat tu na tarsilang nang pe deba angka natorop adong na tumatangis jala marsak situtu ala marnida sitaonon dohot hapariron na masa tu Jesus.

            Di hos ni ari uju na tarsilang i Jesus masa ma haholomon (tiba-tiba terjadi kegelapan, tanpa ada indikasi sebelumnya). Deba angka na bisuk mandok ia haholomon i martudutudu tu hinalungun panghilalaan ni Tuhan Jesus manghilala dohot manuhuk saluhut na masa i tu Ibana. ndada ala ni hajahaton manang dosa na niulaNa. Jesus Kristus ma na gabe singkatta manuhuk dohot manghilala saluhutna i, asa taruli hita di haluaon sian gomgoman ni dosa dohot soropna; na bisuk na asing mandok ia haholomon i martudutudu tu hamamasa haholomon manghuphupi tano on. Nunga talu be na tiur i binahen na holom. Mengkel jala margak situtu do sibolis marnida na masa tu diri ni Jesus, songon halakhalak nama Ibana gantung tu langit dang tuk tu tano ndang sahat. Holan si Johannes do na so hot gabe sitindangi na masa tu Jesus sian na pinarsilang sahat tu hamamateNa rap dohot si Maria, ina ni Jesus, ianggo sisean na asing martabuni do jala mabiar jala pola gabe 3 hali si Petrus mamparsoadahon Jesus Kristus (nang pe udutna i, manolsoli ibana). Songon na so mardongan do diida jolma Jesus i di hau pinarsilang i, jala songon jolma na so margogo be tinggal paimahon hamamateNa.

            Sahat ma pungkul 3, dipangiar Jesus ma soaraNa, dianggukhon (berseru dengan kuat dan tegas) ma: Ale Debatangku, boasa tung tadingkononMu Ahu (hata heber: Eli, Eli lama sabachtani) (ay. 46). Anggukangguk on sarupa tu anggukangguk ni si raja Daud di Psalmen 22: 2. Anggukangguk on martudutudu tu hinahansit dohot hinabernit na tinaon ni si Daud songon i do hinahansit dohot hinabernit na dipanghilalahon Tuhan Jesus Kristus di hau silang. Ndang adong hata bura manang hata mamaloshon hamagoan haruar sian pamanganNa tu angka jolma na marsilomolomo tu Ibana, na patuduhon huaso dohot gogo ni botohonna laho mamastap maninju dohot pasipal ibana. Alai tahe tung lambok situtu do soaraNa mandok: ale Amang, mamparmuati ma rohaM mida nasida, ai ndang diboto nasida angka na binahennasida (pat. Luk. 23: 34).

            Dirimpu angka natorop i hata pandelean na haruar sian Jesus. Di na mandok anggukangguk i, dipangke Jesus do hata Heber, ima hata na so somal be dipangke halak Jahudi. Uju di partingkian ni Jesus, nunga marhata Aram be halak Jahudi. Laos alani i do dirimpu nasida na manjou si Elia do Jesus di anggukanggukNa i (ida ay. 47). Si Elia, sahalak panurirang na mansai sangap do i di halak Jahudi; panurirang na dipaima harorona muse (pat. Maleaki 3: 23 manang Maleakhi 4: 5) na martudutudu haroro ni ari ni TUHAN. Alai ndada si Elia na dijou Jesus di sitaonoNa i asa adong na mandongani Ibana. Nunga ditadinghon halak be Ibana, jolma natorop na sai mangihuthon Ibana, nuaeng nunga mandao. Di partingkian i ma haruar ma angguk bolon: Eli, Eli lama sabachtani na marlapatan: Debatangku, Debatangku, boasa tung tadingkononmu Ahu? Manganggukhi do Jesus Kristus di hajolmaon i tu Debata, ima AmaNa. Debata na disomba si Daud uju na manganggukhon ende on di Psalmen 22: 2, i ma Debata Ama, Jahowa. Marhite angguk ni Jesus on dipabotohon do tu hita, songon dia pe hansit jala bernit na niahapan ni Jesus tu Jahowa do Ibana joujou, Debata Ama. Ndada mangido pangurupion Jesus Kristus tu jolma manang tu gogo ni portibi on. Ndang tuk gogo ni jolma dohot gogo ni portibi on laho mangurupi Jesus di sitaononNa i. dipasahat do diriNa tu Ama i, na so jadi sirang Ibana sian Ama i. dipatuduhon Jesus do hadirionNa songon sada anak na mangido pangondion dohot pandonganion ni Ama. Pangondion dohot pandonganion ni Ama do gogo di angka ianakhon na mangadopi angka parsorion manang sitaonon; pandonganion dohot pangondioan ni Ama do gabe apulapul tu ianakhon asa unang mandele, jala disi adong pos ni roha.

            Na ditadinghon Debata do Jesus Kristus, umbahen na dianggukhon Ibana “ale DebatangKu, DebatangKu, boasa tung tadingkhononMu Ahu?” ndada na ditadinghon Debata Ama, Tuhanta Jesus i manaon na hansit dohot na bernit i. Alai naeng ma dipabotohon Jesus tu hita: ia Jesus, hata ni Debata na gabe daging; Jesus na tutu do Ibana Anak ni Debata na so jadi holang hadirionNa sian Debata Ama. Tung benget jala unduk situtu do Ibana manjalo dohot manaon saluhut angka na hansit dohot na bernit i asa saut sangkap haluaon dohot hangoluan tu jolma na tinompaNa. Marhite sude na masa i, patar ma holong ni Debata Sitolusada na badia i tu portibi on (bdk. Joh. 3: 16 – 17).

            Ndang marnasombu hagiot ni angka jolma i laho mangaleai Tuhan Jesus Kristus dohot manamba haparironNa, dibaen jolma i do tolong na dipalohot limut dibutongi tu asom. Nunga mabugang be pamatang ni Jesus, mangontakhi nama bungang i hona mataniari, manirisi nama mudarNa sian silang i, alai ditambai dope limut na dibutongi tu asom, mambaen lam mangontakhi jala lam maniak ma panghilaan ni Jesus. Ndang boi apala otik pe marhusor pamatang ni Jesus ala naung ditulang be tangan dohot simanjojakNa. Tarpaimaima do angka jolma na disi di haroro ni si Elia di na paluahon Ibana (ay. 49). Molo sian evangelium ni si Mateus on dibaritahon do na diulahi Jesus ma marsoara na gogo andorang so tos hosaNa, alai ndang dipaboa hata na haruar di soaraNa i. Molo taida di Lukas 23: 46 andorang tos hosaNa dipasahat Jesus do tondiNa tu AmaNa. Ndada tu portibi on pangalualuonNa; ndada tu gogo ni portibi on dipasahat Jesus tondiNa, alai tu Ama i do dipasahat. Dung dipasahat Jesus tondiNa, tos ma hosaNa (ay. 50).

            Hamamate ni Jesus boi do dohonon hamamate ni Debata? Daong! Hamamate ni Jesus Kristus patuduhon hamatean ni dosa dohot soropna. DagingNa (hata Yunani didok: sarks) do mate, daging ni pamatang ni hajolmaon ni Jesus Kristus do do na mate alai ianggo ha-Debata-onNa mangolu do. Marhite hamamate pamatang ni Jesus manghorhon hamonangan ni tondinta. Tuat do Ibana tu banua toru ni hamatean, tuat do Ibana tu kefanaan; tuat do Ibana sorop ni dosa. hatuatonNa, ndada laho pabotohon nunga talu Ibana tu sorop ni dosa; nunga talu Ibana tu kefanaan alai pabotohon hita nunga sidung (singkop) be sude haluaon i diula Ibana. Hamatean manang kefanaan ndang gabe hapatean ni angka na porsea, alai hangoluan saleleng ni lelengna dohot las ni roha di hangoluan sogot di harajaon ni Debata do hapateanta.

            Di satongkin i, maribak ma hirehire na di bagasjoro sian ginjang ro di toru, humuntal ma tano i, laos marigat ma dohot angka batu mamak. Mungkap angka tanoman, dung i hehe ma daging ni torop na badia angka na modom disi, laos ruar ma nasida sian angka tanoman i (ay. 51 – 53). Andorang so masa angka na masa di ay. 51, masa do habunion dohot parasingan ni habadiaon ni Debata tu jolma. Dibahen ma hirehire di bagas joro na dipahembang manghuphupi bilut na sun badia Bagas Joro, jala holan malim do na boi marnida haulion dohot hatongamon ni bilut i. di partingkian hamamate ni Jesus Kristus, ribak ma hirehire i sian ginjang ro di toru na pabotohon ndang adong be pemisahan ni malim dohot ruas laho marnida bilut na sun badia i songon hataridaan Debata na mian di tongatonga nasida, jala Debata na papatarhon harajaonNa di Bagas joro. Ndang adong be na boi mangambati dohot mangholangi hapapatar hamuliaon ni Debata na sun badia i tu jolma nang pe ala ni dosa. Alai marhite naung patar hamuliaon dohot hasangapon ni Debata ditanda jolma ma nian hadirionna na lea jala na mardosa, asa mulak ma Ibana manadinghon dosa i jala diunsat Debata ma jolma i sian haleaonna asa dohot parsinean di hasangapon dohot hamuliaonNa.

            Sada halongangan bolon do na masa di ay. 51 – 53 na so hea masa di hamamate ni jolma. Margogo situtu do hamamate ni Jesus Kristus na manghorhon halongangan bolon di portibi on; sian hatutubuNa sahat tu hamamateNa pe gok masa halongangan bolon. Ndang tartaon tano on hagogoon hamamate ni Jesus na bolon i, humuntal nama tano on jala ndang tartaon angka tanoman hamamate ni Jesus. Hamamate ni Jesus Kristus i do hatigoran dohot hasintongan ni Debata. Molo nunga dipajongjong Debata hatigoran dohot hasintonganNa, humuntal ma tano on. Di hatigoran dohot hasintongan i do tarida Harajaon ni Debata dohot tongam ni harajaonNa i (pat. Psalm 97: 1 – Psalm 99: 9).

            Diida induk ni soldadu i rap dohot angka donganna, na jumaga Jesus na masa saluhutna i laos ninna ma: “tutu do on Anak ni Debata”. Somal do molo di halak Rom, molo masa angka panguhuman tu parjahat na ingkon diuhum mate (marhite na dipasilanghon), dipillit do sahalak na gabe uluan panguhuman i (pimpinan untuk melaksanakan tugas atau mengeksekusi mati) sahat tu na mate parjahat i gantung di hau pinarsilang. On ma panindangion ni sahalak soldadu na so marharoroan na so sian Jahudi alai tubu panghatindanghon na mampartutuhon Jesus, Anak ni Debata.

            Panghatindanghonon induk soldadu on marharoro sian saluhut angka na masa naung niidana jala na so hea dope masa. Dipanghilalahon induk ni soldadu hamamate ni Tuhan Jesus di pinarsilang, tung mansai marasing sian angka hamamate ni angka torop naung tarsilang. Diida jala dibege induk soldadu on do saluhut na masa tu Tuhan Jesus dohot sude angka hata na nihatahonNa di hau pinarsilang i. ndang haruar sian pamangan ni Tuhan Jesus hata uhum manang torutoru nang pe tu na manjahati Ibana. alai hata holong, hata na mangondihon do haruar sian Ibana. songon i nang anggukanggukNa, ndada tu gogo ni portibi on Ibana mangalualu manang mangangguk; ndada tu si Latus, Jesus mangido haluaon manang mangurupi nang pe adong huaso ni si Pilatus laho paluahon Jesus sian uhum silang i. panghatindanghonon tutu do on Anak ni Debata pabotohon na tutu do Jesus i Anak ni Debata na sun timbul na marhagogoon sumurung sian angka gogo ni angka debata; ndang adong na boi manahan jongjong marnida hajongjongan Harajaon ni Debata, ima hatigoran dohot hasintongan uhumNa.

            Ha-Anak-hon Debata ni Tuhan Jesus ndada marharoroan sian jolma, alai marharoroan sian Debata sandiri na pinaboa surusuruan Gabariel tu si Maria (Luk. 1: 32), songon i nang soara na marharoroan sian langit na mandok: “Engkaulah Anak-Ku (Luk. 3: 22) manang “on do AnakKu...” (ida: Luk. 9: 35). Uju si Petrus manghatindanghon taringot ise do Jesus i (Mat. 16: 16), dialusi Jesus do ibana: “: ... ai ndada daging dohot mudar papatarhon i tu ho, Damang na di banua ginjang i do” (Mat. 16: 17). Molo dipaadophon tu panghatindanghon ni letnan on, boi ma taparhatopot ndada daging dohot mudar na papatarhon i tu ibana umbahen boi didok: “tutu do on Anak ni Debata” alai Damang na di banua ginjang i do. Ndada marharoroan sian daging dohot mudar panghatindanghonon ha-Anak-on Jesus, alai Debata sandiri do na papatarhon i marhite saluhut na masa naung niida jala naung dipanghilalahon ni letnan i.

 

Refleksi Teologi

            Nunga mate be Tuhan Jesus Kristus. Tung benget jala satia do Tuhan Jesus mangulahon dohot mangauhon sangkap haluaon na pinatupa ni Debata, Ama. Mabugang do pamatangNa, tiris nang mudar sian pamatangNa, pitpit nama simalolongna ala tinjutinju nang pastapastap angka jolma. Sude na hansit jala na parir na dipanghilalahon Tuhan Jesus, ima sasintongna jambar na ingkon masa tu ganup jolma na marhapatean tu hamagoan manang hamatean, na gabe sorop ni dosa manang upa na tinuhor ni dosana. Nda tuk gogo dohot hamoraon dohot sude hadirion ni jolma paluahon ibana sian sorop ni dosa dohot upa na tinuhor ni dosana. Ganup na mardosa ingkon do diuhum, jala ndang adong haluaon dohot hangoluan jambar ni jolma ala ni dosana i. Alai tung songon on do balga holong ni roha ni Debata, dilehon do AnakNa, Tuhan Jesus Kristus na gabe singkat ni jolma i manaon saluhut sorop ni dosa dohot hapatean upa na tinuhor ni dosana. Molo halak na so porsea marnida nunga talu Jesus jala ndang manahan; hamatean ni Jesus patuduhon nunga marhamonangan be dosa jala sibolis i pe monang. Alai anggo haporseaonta mandok: hamamate ni Tuhan Jesus patuduhon nunga talu be dosa dohot soropna, sibolis pe nunga talu. Nunga singkop diula Ibana haluaon dohot hangoluan tu ganup jolma na porsea. Nunga talu be dosa dohot soropna, ala ni i, unang be mulak hita tu gambo isop ni dosa holan angka na masa di hasiangan on.

            Marhite jamita on adong 3 na mansai ringkot putikhonon:

1.      Marbenget ni roha di ragam sitaonon. Tung so lomo roha ni sibolis molo marhamonangan hita maralohon dosa dohot soropna di bagasan Tuhan Jesus Kristus. Sai tongtong do mangula sibolis i mangelaela jolma i asa mulak muse tu gambo isop ni dosa marhite angka sitaonon dohot hamoraon ni portibi on. Ala ni i, molo pe borat sitaononta manang mamora hita di saluhut unang ma manghorhon dosa tu dirinta. Marbenget ni roha ma di ragam sitaonon, pangido ma gogo sian Debata asa margogo hita manaluhon elaela ni sibolis, pangago i.

2.      Debata Ama, Anak dohot Tondi Parbaia ma na gabe tongtong haporusanta jala tau haposan do Ibana mandongani hita. Adong do hata ni halak batak mandok: Tua na so taraithon, Soro ni ari na so tarhaishon; ima hata na pabotohon tu hita angka naung tinobus Jesus, na so boi holan las ni roha dohot parsaulion masa di parngoluonta jala na so boi do tahaishon molo ro soro ni ari di ngolunta. Manang aha pe na masa di ngolunta, sai tongtong ma hita marhaporusan Debata Ama, Anak dohot Tondi Parbadia. Ai na tau haposan do Ibana mandongani hita di saluhutna na masa i. unang marpanghunsandean hita tu gogo dohot hamoraon songon i nang haulion ni portibi on ala parsatongkinan do saluhutna. Marhaposan jala maporus ma hita tu Debatanta Sitolusada na badia. Ibana do na mangondihon hita hagogoon dohot apulapul dohot hapantason mangadopi ragam na masa di parngoluon.

3.      Gomos ma tatiop panindangionta dohot parhatopotonta paboa na tutu do Jesus, Anak ni Debata. Panindangion ha-Anak-on ni Jesus ndada marharoroan sian daging dohot mudar alai Tondi Parbadia do. Panindangion i ingkon do marudut tu manghaporseai dohot paundukhon diri tu Jesus Kristus, Anak ni Debata ala sude halongangan do sude na binahenNa. Panindangion dohot panghatopoton: “tutu do Jesus, Anak ni Debata” martudutu do tu ha-Debata-on ni Jesus nang pe rumang ni jolma taida na marhuaso dohot marhagogon manaluhon dosa dohot soropna. Dipatuduhon Jesus do holongNa na balga, rade do ibana diparsilanghon sahat tu na matena laho manobus jolma. Tiruan do binahenNa i tu angka na manghaporseai na “na tutu do Jesus Anak ni Debata”. Ha-Anak-on i manjou hita laho maniru hadirionNa, ima na manghaholongi, na manesa dosa dohot na so olo mambalos na jat alo ni na jat. Ha-Anak-on ni Debata ni Jesus Kristus ima hataridaan hadirionNa na tumimbul, na paposhon rohata taringot hangoluan dohot hamuliao na naeng lehononNa tu hita nang pe ingkon jumolo mangadopi ragam parungkilon dohot na hansit di parsorion ni ngolu on. Gomos ma maniop panindangion na tutu do Jesus, Anak ni Debata di parngoluonta huhut managam haluaon dohot hangoluan na naeng sipapataronNa di ari marsogot. Amen.

BAHAN JAMITA EVANGELIUM, MINGGU REMINISCERE. MINGGU, 01 MARET 2026; JOHANNES 3: 1 - 17

 BAHAN JAMITA EVANGELIUM

MINGGU REMINISCERE

Minggu, 01 Maret 2026

Johannes 3: 1 – 17

 

BALGA DO HOLONG NI DEBATA TU PORTIBI ON

Oleh. Pdt. Daniel Bonardo Pane, M.Th.

Patujolo

            Nuaeng masuk ma hita di minggu Reminiscere na marlapatan sai ingot ma angka denggan basa manang holong dohot asi ni rohaM. Minggu Reminiscere on ima tangiangta marpangidoan sai ingot ma ale Debata angka holong ni roha dohot asi ni rohaM, ima tangiang mangido haluaon dohot hangoluan sian Jahowa. Sai unang ma dihalupahon manang dipasombu Debata hita di angka sitaonon dohot manaon na hansit di ngolu on, sai. Aut sugari marbilangbilang hita di saluhut asi ni roha ni Jahowa di ngolunta, ra dang hasiatan portibi on mambilangi saluhutna i. Antong di minggu sadari on, aha do na naeng putihononta hata ni Debata marhite panghataion ni Jesus Kristus tu si Nikodemus. Antong itapaihutihut ma hatorangan ni turpuk jamita on.

 

Hatorangan ni Turpuk

            Molo idaonta na masa (sejarah) di turpuk jamita on ima sada partingkian di na tongtong dope sai tarpaimaima halak Jahudi taringot haroro ni Mesias na boi paluahon bangso i sian harajaon ni Rom. Pangantusion ni halak Jahudi holan pangantusion di haluaon di bidang harajaon ni portibi on, ndada mangalapi taringot Mesias i marhite haporseaonna. Haroro dohot na binahen ni Jesus tu Bagas Joro di Jerusalem mambahen torop jolma longang jala naeng tangkas ma ditanda ise do Jesus i sasintongna? Ai na tutu do Ibana Mesias songon naung leleng dipaima halak Jahudi i, manang dang.

            Sai na adong do tutu na marsogo ni roha molo adong sahalak na mambahen perubahan na ture jala na denggan parngoluon tarlumobi ture partondion, jala sai adong do nian na manghalashon di saluhutna. Sada horong na mansogohon Jesus ala hasintongan dohot hatigoran na tutu na dijamitahonNa dohot tanda halonganan na binahen ni Jesus ima horong Parise. Sai dilului do dalan boha asa ditangkup Jesus. Alai sahalak sian horong ni Parise na naeng tangkas mananda Jesus dohot na manghalashon sude jamita, pangajarion dohot na naeng bagas mananda Jesus hinorhon tanda halongangan na binahenNa ima si Nikodemus (ay. 1).

            Ro do si Nikodemus bornginborngin manopot Jesus (ay. 2) boi dohonon na ro si Nikodemus bornginborngin boi do dilapati asa unang diida angka donganna parise ibana pajumpang dohot Jesus. Diparhatopot si Nikodemus do taringot hadirion ni Jesus marhite angka naung niidana dohot naung binegena i. jala dialusi Jesus do hatana i marhite pangajarionNa taringot Harajaon ni Debata, hombar naung jotjot dijamitahon angka parjamita tarlumobi angka parise. Boha do tutu Harajaon ni Debata i? sarupa do i songon angka harajaon dohot huaso na di portibi on? Marnida harajaon ni Debata marlapatan do i mangantusi jala tangkas mangantusi taringot Harajaon ni Debata. Boha do hita mangantusi taringot Harajaon ni Debata i? Marhite alus ni Jesus di ayt. 3 on tangkas do dipabotohon ingkon adong do tubu di ngolu na imbaru.

            Pangantusion ni si Nikodemus taringot tubu di ngolu na imbaru marasing do dohot na naeng niajarhon ni Jesus tu ibana. Boi do idaonta pangantusionna i hombar tu pamingkirionna (ay.4). ndada na gabe pamingkiran dohot pangantusion ni jolma i dipangke mangalapati taringot tubu di ngolu na imbaru, alai lobi sian pangantusion ni jolma i do dipatupa Jahowa dalan asa tangkas jolma i marnida jala mananda dohot mangantusi tangkas taringot Harajaon ni Debata. Aha do sipatupaon? Ndada sian jolma i na patupahon i alai Jahowa sandiri do na patupahon i, siala na so tolap do gogo dohot pangantusion dohot pingkiran ni jolma i patupahon i. “tubu sian aek dohot sian Tondi” martudutudu do i tu hamubaon dohot haiason ni ngolu maradophon Jahowa Debata. Aek dison ndada aek na litok dohot asal aek, alai aek na nidok dison ima aek na tio (air murni dan bersih) na dipangke laho paiashon jala mambahen ias angka na kotor tarlumobi aek na tio mambalongkon angka na kotor di pamatang nang di partondion. Aek di turpuk on ima sada meterai/ tanda sah hita gabe anak dohot ampuna ni Jahowa Debata (marhite pandidion na badia). Tondi dison ima Tondi Parbadia, Tondi pangapuli, Tondi paniroi, dohot Tondi na mangondihon halak na satia tu Jahowa, Ama i. tubu di sian Tondi ima tubu di ngolu na gok haimbaruon, ias sian dosa dohot sian pingkirian na jahat.

            Molo itaida ayat 6 – 7, tanda do adong paraloan ni daging dohot Tondi. Daging na so martondi dohonon do i gabe bangke, molo tondi ndang mardaging dohonon ma i begu. Tudia do lapatan ni ayt. 6 – 7 i? lapatan ni ayt. 6 – 7 ima panghorhononna. Daging mangkorhon do i tu parbue ni daging (hombar tu Galatia 5: 19 – 21), ianggo Tondi manghorhon parbue ni tondi (Galatia 5: 22 – 23). Ringkot do hita ngolu ni pardaging on? Tontu ringkot do i, alai ndada ngolu pardaging on manontuhon ngolu partondion, alai ngolu partondion do na ingkon mangajari hita taringot ngolu pardaging on. Jolma na tubu sian Tondi, parbue ni tondi jala soara ni Tondi i do na ditangihonsa.

            Songon dia tarpajadi i? i do na gabe sungkunsungkun si Nikodemus tu Jesus (ay. 9). Ndang na mangunjungi si Nikodemus di sungkunsungkunna on, alai naeng do lam tangkas antusanna taringot na niidana jala taruli di ibana hangoluan na imbaru. Dialusi Jesus ma sungkunsungkunna i di ayat. 10 – 13. Alus ni Jesus di ayat 10 – 13 i mambungka pingkiran dohot haporseaon ni si Nikodemus taringot Ibana, Na ro sian banua ginjang laho paboahon taringot angka na di banua ginjang. Angka na sian banua ginjang ima paboahon Harajaon dohot hatongtongon ni Jahowa, jala paboahon ianggo tano dohot harajaonna na olo salpu do saluhutna. Ndang adong na mamboto tangkas taringot angka na di banua ginjang i, holan Jesus Kristus do ima dalanta lam mananda angka na dibanua ginjang marhite jamitaNa dohot pangajarionNa tarlumboi angka pambahenanNa i.

            Lam tangkas muse pangajarion ni Jesus tu si Nikodemus taringot angka na banua ginjang i ima marhite naung dibahen si Musa na patimbohon ulok di halongonan (4 Musa 21: 4 – 9) songon i do naeng patimboonna Anak ni Jolma i. hata on martudutudu taringot na naeng masa tu Jesus, na dipatimbo Ibana di hau pinarsilang mamboan sada haimbaruon marhite hamamateNa di hau pinarsilang i. jala ganup jolma tu Ibana, Jesus , Anak ni Jolma i dohot ma ibana tubu di ngolu na imbaru jala marhite Ibana tangkas ma idaonta Harajaon ni Debata, ima Harajaon ni holong dohot asi ni roha jala disi jumpang ma hangoluan na situtu. Ima hangoluan na so ra suda (ay. 14 – 15). Di na ro Jesus, Anak ni Debata ndada laho mamboan paruhuman tu angka pardosa, alai mamboan hangoluan na salelengna asa unang mate jolma i di bagasan dosana be, alai taruli ma di hamubaon ni roha, jala disi ma dapot hangoluan na saleleng ni lelengna (ay. 16 – 7). Porsea do hita disi? Haporseaon dison ndada holan di hata, alai ingkon dipatuduhon do marhitehite haringgasonna mangoloi jala manghangoluhon panghophopionNa marhite parange na denggan dohot di panombaon. Ha-Anakhon ni Jesus dison ndada haanakhon di pardagingon, alai dipatuduhon do songon ama tu anakna, na holong roha ni ama tu anakhonna jala anakhon na mangoloi amana, jala ha-Anakhon na dipatuduhon Jesus dison paboahon na sian Ama i do Ibana.

 

Hahonaan ni Turpuk

            Nunga tangkas dipatorang di hatorangan ni turpuk on taringot boha do panandaionta taringot Harajaon ni Debata? Ingkon ringkot do hape hamubaon ni roha. Tutu do hita mangolu di pardagingan on, jala jolma na mangolu ingkon mardaging do. Alai ndang na gabe daging on dohot hagiotna na mangarajai ngolunta tarlumbi hita angka naung porsea di Jesus Kristus. Manjangkon Jesus di ngolunta marlapatan do i manjangkon haimbaruon di ngoluna. Itaingot ma angka dongan, mansai balga do asi ni roha ni Jahowa tu angka jolma na tinompaNa i, ndada holan tu jolma dohot do portibi on taruli di asi ni roha ni Jahowa i. antong boha do hita manjangkon asi ni roha i? nunga patar be holong ni Jahowa tu hita nang tu portibi on di naung mate Jesus jala mulak mangolu muse di ari patoluhon, papatarhon haluaonta dohot hangoluanta. Ndang di portibi on hapatean ni ngolunta, autsugari di portibi on hapateanna marisuang do haporseaonta dohot angka hasatiaonta nang halojaonta ala marujung do saluhutna jala olo salpu do. Alai hapateanta ima na di Banua Ginjang, Surgo Sambulo ni tondinta.

   Nunga tung tangkas tapanghilalahon dohot taboto songon dia balga ni holong ni roha ni Debata tu hita. hinorhon holong ni roha dohot asi ni roha ni Debata na patar jala na masa di bagasan Jesus Kristus. Jesus Kristus do tanda holong ni roha ni Debata na balga i, na gabe panondang jala Sipalua di ngolunta. Jesus Kristus do dalan, hasintongan dohot hangoluan. Torop do di portibi on laho patandahon hita dalan hangoluan dohot hasintongan i, alai ndang adong na boi sahat patandahon jala mamboan hita tu hangoluan dohot hasintongan na tutu i. Holan marhite Jesus do boi idaonta tangkas Harajaon ni Debata, dohot hangoluan na sasintongNa, ngolu na manongtong. Itajangkon ma Ibana di ngolunta be asa taruli hita di hangoluan na manongtong i, amen.

 

BAHAN HATORANGAN EPISTEL MINGGU SEXAGESIMA: MINGGU, 08 FEBRUARI 2026; EFESUS/ EPESUS 1: 3 - 10

 

BAHAN HATORANGAN EPISTEL
 MINGGU SEXAGESIMA
MINGGU, 08 FEBRUARI 2026
EPESUS 1: 3 – 10

DIPASUPASU ASA GABE PASUPASU

Oleh: Pdt. Daniel Bonardo Pane, M.Th.

Patujolo

              Horas ma di hamu saluhutna! Autsura adong sipilliton, dia do na tapillit sian na dua on: hamoraon manang hapogoson? Torop do jolma mamillit hamoraon nang pe sai adong deba jolma mamillit hapogoson. Di hata ende “alusi ahu” ianggo hamoraon ima sada sian ragam na pinarsinta ni halak batak. Boasa hita naeng mamora? Somalna do di pangantusion ni angka jolma sahalak na mamora ima sahalak na tarpasupasu ngoluna jala halak na sangap, nampuna hata, jala sitangitangihon do ianggo hatana, jala nampuna huaso; alai ianggo halak na pogos haleaon do i dietong, jotjot do tu panggadisan, ndang pola sai ditangihon torop jolma ianggo hatana jala ndang adong huasona di humaliang. Naeng do hita mamora jala dapotan pansamotan di ngolunta; Dao ma sian ngolunta hapogoson manang hahurangan. Adong do hata ni halak batak songon on: simbora gukguk duldul otik; mamora hita luhut sumurung au otik. Hata ni halak batak on paboahon hirim do nian roha asa sude dongan, dohot humaliangta mamora jala dapot parsaulian alai naeng ma nian sumurung hamoranta otik sian na asing. Unang nian dos, alai naeng ma lobian sian angka na asing. Ragam do ulaon na diulahon angka jolma asa mamora ibana, isarana padot di angka ulaonna (maradi pe ibana ndang sanga), adong na manungkun datu dohot mangido pasupasu sian tondi ni naung mate songon i nang mamangke gogo ni sibolis na boi mambahen mamora.

              Adong do halak na mora alai ginjang do rohana, ingkon sitangihonon ni jolma hatana jala lomolomo ni rohana do na ingkon saut. Parange na sisongon on ma na manghorhon hasesega manang persoalan di sada punguan. Alai ndang sude na mora na songon i. adong do deba halak na mora parroha na serep, na olo mangurupi na hurangan jala mampanghorhon hadameon dohot hademakhon do hamoraonna i tu humaliang. Turpuk jamita epistelta sadari on ima sosososo ni apostel Paulus tu ruas ni huria na adong huta Epesus asa marningot nasida di angka basabasa ni Debata di ngolunasida na manghorhon hamoraon di parbinotoan, di sinamot, jala naeng ma marudut tu panghorhonon hamoraon di partondion. Asa lam tu antusna hita mangantusi turpuk jamita on, masuk ma hita tu hatorangan ni turpuk.

 

Hatorangan ni Turpuk

              Ia huta Epesus ima sada sian torop huta na maju di harajaon ni Rom, huta na adong di pesisir Ionia di Selçuk sinuaeng digoari propinsi İzmir, Turki. Si Paulus manurathon suratna on mandapothon huria na di huta Epesus uju di hurungan ibana, ala dibege ibana halak Epesus naung Kristen tongtong dope madabu tu ulaon manang hasomalan na maralo tu hata ni Debata, isarana manomba ganaganaan ni halak Junani, jala debata na digana halak Epesus margoar Artemis. Tongtong dope disomba jala dihaporseai halak Kristen na di huta Epesus anggo Artemis, ima debata na mangalehon hagaburon (kesuburan) dohot hagabeon na mangalehon hamoraon dohot hasangapon tu halak Epesus, jala parsidohot do deba sian nasida na olo marsomba tu kesar. Hinorhon ni i do disurathon si Paulus suratna on laho mangapoi, mamodai dohot manosoi halak Kristen na di huta Epesus mangolu jala marparange di bagasan Jesus Kristus. Marhite suratna on, si Paulus mangondolhn taringot sangkat ni Debata asa saluhut na tinompa songon i nang halak Kristen marhasadaon di bagasan Jesus Krsitus na gabe uluan (pat. Ep. 1: 10).

              Torop do halak Kristen na di huta Epesus na mamora di parartaon dohot mamora di parbinotoan taringot tu parngoluon. Alai hamoraon i manghorhon hasesega punguan ni ruas huria i. Mangahut tu dirina sandiri do hamoraon i dipangke. Tutu do tung mansai ringkot hamoraon di parartaon dohot di parbinotoan alai adong dope hamoraon na tung mansai ringkot adong di hita, ima mamora di partondion. Hamoraon di partondion ndada marharoroan i sian portibi on, jala na so boi tuhoron manang binuat sian portibi on ala ndang tuk sude hamoraon dohot haulion ni portibi on laho manuhor manang mandapot hamoraon di partondion; na so boi do tangkoon manang segaon ni jolma ianggo hamoraon ni partondion on. Hamoraon partondion marharoroan sian pasupasu partondion na sian banua ginjang, di bagasan Jesus Kristus. Hamoraon partondion ima harajaon ni Debata naung patar di bagasan Jesus Kristus. Mateus 6: 33 didok: “Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna!”. Alani i, tung mansai ringkot situtu do jumolo mangalului harajaon ni Debata na gabe bona ni pasupasu partondion na manghorhon hamoraon ni partondion di ngolunta. pasupasu partondion tarida do i sian parange na mamparbuehon parbue Tondi (Gal. 5: 22); pasupasu partondion ima parange ni Jesus Kristus na gabe tiruonta sipardame, parholong di saluhutna nang pe adong jolma na mangarsahi jala mambahen na jat tu hita alai ingkon boi ma tahaholongi ibana jala na so jadi mambaloshon na jat alo ni na jat; gogo dohot pos ni roha di panghirimon nang pe ingkon mamolus hasusaan di ngolu on; hasesaan ni dosa dohot haluaon na pinatupa ni Debata di bagasan Jesus Kristus; dohot teantanan na manongtong ima hangoluan dohot olopolop na manongtong di habangsaNa.

              Alani i do tama do pujionta Jahowa Debata, Ama ni Tuhanta Jesus Kristus na mangalehon tu hita ragam pasupasu partondion sian banua ginjang di bagasan Jesus Kristus (ay. 3). Jahowa Debata do mual ni pasupasu banua ginjang. Lehonon ni Jahowa Debata do pasupasu partondion i ndada manghorhon hasesega di punguan ni huria manang hatahuton/ mabiar ditangko manang dibuat jolma. Manghorhon hadengganon, hadameon dohot hasadaon do ianggo pasupasu partondion. Na olo mangajari, manuturi dohot maminsang halak di bagasan roha na serep, roha na lambok dohot manangianghonsa. Dilehon Jahowa pe pasupasu partondion tu hita ndada holan tu dirinta manang gabe so tu hita, alai naeng ma gabe pasupasu tu humaliangta. Ndada hinorhon silehonlehon di sinamot na gabe pasupasu alai na boi patupahon dame, mangajari, manuturi, manangianghon angka jolma na marhapatean tu hasadaon di bagasan Jesus Kristus.

              Naeng ma jumpang di parsaoran ni huria na di huta Epesus parange na badia jala so hasurahan di adopanNa i, di bagasan holong ni roha (ay. 4). Ndada sian hadirionta sandiri asa dilehon Debata, Anak-Na Tuhan Jesus Kristus na gabe Sipalua tu hita; ndada ala jala sian hadirionta do asa dipatupa Debata hasesaan ni dosa dohot haluaon tu hita. Alai tung holan ala asi ni rohaNa sambing do. Ima pamilliton na pinatupa ni Debata tu hita asa gabe ampunaNa do hita di bagasan Jesus Kristus na marparengehon parange na badia. Parange na badia jala na so hasurahan ima parange na so sarombang dohot parange ni portibi on, jala na so sarombang dohot parange ni jolma na so porsea jala na so mian di bagasan Jesus Kristus. Jumpang ma roha na togu manghaporseai jala na so jadi mandele di haporseaonna molo pe ro angka sitaonon; naeng ma jumpang roha na olo mangurupi donganna na gale dohot na hurangan; mamareahi hadameon, hasintongan dohot hatigoran di ngoluna; jumpang roha na manghaholongi donganna dohot musuna pe; na so jumpang roha na olo mambaloshon na jat alo ni na jat. Diihuthon manang di ula ma angka na denggan na manghorhon hasonangan di humaliang jala na tau gabe halomoan ni rohaNa (pat. Ay. 5 - 7).

              Dilehon Debata Ama, Anak dohot Tondi Parbadia pe pasupasu partondion, ndada na gabe marujung tu dirinta alai marudut do gabe pasupasu tu halak na asing. Dipillit jala ditodo do hita gabe anak ni Debata na marlapatan nunga gabe ampuna ni Debata do hita asa boi do tapatuduhon jala tapabotohon tu angka na torop habasaon dohot habasaron ni Debata di ngolunta, jala hita ma gabe parhitean ni Debata laho pasahthon pasupasu partondion songon naung dilehonNa jumolo tu hita. Lam torop ma halak na so porsea hian, gabe porsea; halak parjahat gabe disolsoli ma pangalahona laos marhamubaon ni roha; lam torop ma angka soara mamuji jala marhatopothon Jesus Kristus, Tuhan jala Sipalua jala nasa ulu ni tot marsomba tu Ibana. Laos i do na gabe hagogok ni tingkina, mandok: pasadahon di bagasan Krsitus i sasudena, na di banua ginjang dohot di atas tano on (ida ay. 8 – 10).

 

Hahonaan ni Turpuk

              Sahat ma pasupasu partondion tu hita hita di bagasan Jesus Kristus, Tuhan jala sipalua. Ragam pasupasu partondion naung tajalo jala naung sahat tu hita, angka parhalado dohot ruas ni huria. Pasupasu partondion na so boi disuhat sian godang ni sinamot, arta, timbo ni hasangapon. Pasupasu partondion naung sahat tu hita ima Jesus Kristus. Di bagasan diriNa do singkop dipatupa Debata haluaon tu hita, naung paluahon hita sian gomgoman ni dosa dohot soropna; maruli ma hita di hangoluan na so ra suda. Ndang margogo jala ndang marhuaso be dosa i di hadiron ni halak na porsea. Ala ni i ma unang be pasahat dirinta dohot ngolunta laho manggohi hagiot ni dosa, jala unang paloas ruas pamatangta gabe dalan mangulahon dosa. Gabe badia ma hita angka naung ditobus jala naung dipillit Debata di bagasan Jesus Kristus, na mamparangehon parange na denggan isarana gabe sipardame, siparholong, na olo manalpuhon angka na hasalaan; na olo pasingkophon angka na humurang jala i do na gabe pasupasu hita tu angka humaliangta.

              Tutu do nian tung mansai ringkot do tu hita hamoraon di sinamot, hamoraon di parbinotoan dohot di hasangapon na di portibi on alai unang lupa hita mangido dohot manghirim hamoraon di partondion. Molo pe adong di hita hamoraon di parartaon manang di sinamot; hamoraon di parbinotoan dohot di hasangapon naeng ma tapangke i gabe pasupasu tu humaliangta. Isarana mangurupi halak na pogos, mampargogoihon halak na dangol, mangapuli angka na marsak, mandaoni angka na marsahit, patupa hadameon dohot hademakhon dohot lan ulaon na denggan na asing na manghorhon hasadaon di bagasan Jesus Kristus. Ala ni i, las ma rohanta naung manjalo pasupasu na sian Debata alai ingkon botoonta do ndada na marujung pasupasu i tu hita, alai naeng ma marudut gabe pasupasu tu humaliangta na marhapatean tu hamuliaoni Debata. Amen.