Jamita Minggu Pentakosta: Minggu, 23 Mei 2021: Johannes 16: 4b - 15.

 

BAHAN SERMON

MINGGU PENTAKOSTA

Minggu, 23 Mei 2021

Ev.: Johannes 16: 4b – 15; Ep.: Hesekiel 37: 11 – 14; S. Patik: Efesus 4: 30 – 32

 

TONDI PANGONDIAN NA SIAN JESUS MANGGOHI ANGKA NA PORSEA I!

Pdt. Daniel Bonardo Pane, S.Th.

Patujolo

            Horas! Masuhanta ma minggu Pentakosta na manghalashon parsaoran ni Jahowa Debatanta marhite TondiNa, ima Tondi Na badia. Ganup taon do halak Kristen manghalashon hasasaor ni Jahowa Debata marhite TondiNa i, alai aha do na boi parbue jala siputihononta marhite naung saor Tondi na Badia i tu hita? Ndada holan tu angka apostel di huria na parjolo i masa hasasaor ni Tondi Na Badia. Sahat tu sadari on pe saor do Tondi i tu hita jala ndang marimbar Tondi na saor ni angka apostel di huria na parjolo i sian Tondi na na saor tu hita nang pe marragam do rumang ni Tondi na badia i. Turpuk jamita di ulaon Minggu Pentakosta on ima taringot lumbalumba ni Tuhan Jesus tu angka sisesanNa andorang so jumpang Ibana manadinghon portibi on. Aha do hinaringkot ni Tondi Parbadia i tu angka siseanNa i pola ingkon dilumbahon Tuhan Jesus taringot haroro ni Tondi Parbadia? Asa antus pangantusionta taringot Tondi Parbadia, masuk ma hita tu hatorangan ni turpuk jamita on.

 

Hatorangan ni Turpuk

            Ragam do pangantusion ni na bisuk taringot Barita Na uli ni si Johannes on. adong na mandok si Johannes, ima sada sisean ni Jesus Kristus do na manurat turpuk on jala disurathon pe Barita na uli on ima laho patoguhon haporseaon taringot ise do Jesus na binaritahon ni angka apostel, jala ise do Jesus na hinaporseaonnasida i. Laos barita na uli on ma na gabe mangalo pangantusion angka horong gnostik nang songon i horong doketis. Ragam angka panggosagosa panggomgomi na masa tu halak Kristen uju i, pangaleleion dohot ragam na jat pe masa. Tontu godang do na so manahan ala na masa i. alai ingot ma hita, nunga dilumbahon Jesus hian aha do na masa tu angka sisesanNa dohot na porsea dung ditadinghon Ibana portibi on (ida Johannes 15: 18 – 27).

            Naeng ma nian marhasurungan angka sisesan dohot angka na porsea i Ibana di na mamolus angka na masa di parngoluan, jala asa unang gabe targasip na masa i (Johannes 16: 1 – 3) dilumbahon Jesus ma taringot tu Tondi Parbadia na naeng saor tu angka sisean dohot tu angka na porsea. Uju rap dope Jesus dohot angka sisean i, boi dope ndang pola dilumbahon Jesus taringot Tondi Parbadia i ala Jesus sandiri do hataridaan ni parsaoran ni Jahowa Debata, hata ni Debata na gabe daging jala na boi pangalualuan ni angka sisean molo tung adong hamaolon na masa. Nunga tung ragam tanda halonganan, pangajarion na binahen ni Jesus uju na rap dope nasida (ay. 4) na gabe bohal ni angka sisesan di na laho manguduti missi Harajaon ni Debata songon na binahen ni Jesus. Haroro ni Jesus tu portibi on ima mamboan missi harajaon ni Debata. Aha do ulaning missi harajaon ni Debata? Ima Missi haluon, missi hadameon dohot missi parsaoran (missi persaudaraan).

Nuaeng dipabotohon Jesus do taringot tu diriNa na naeng manadinghon angka sisean mulak tu Ama i (ay. 5). Mulak ma Ibana tu na marsuru Ibana ima Ama i, ise do Ama i ima Debata, ise do Debata na nidokna? Ima Jahowa, Debata sasadasa (bdk. 5 Musa 6: 4). Jesus ima hata ni Debata, na ro sian Debata jala na sian Debata mulak ma tu Debata (bdk. Parjamita 12: 7). Mambege di na laho nama Jesus mandinghon angka sisean tontu marsak situtu do angka sisean i taringot boha nama udutna nasida? Boi do dohononta panghilalahon ni angka sisean dung na didok Jesus di na laho Ibana. Marsak, songgot jala mansai dokdok do di angka sisean i (ay. 6). Alai ni arsak, dohot di songgot dohot dokdok i tung so adong do nasida manungkun tudia do Ho? Molo idaonta Joh. 13: 36, hea do si Petrus manungkun Jesus tudia do Ibana naeng laho? Jala di Joh. 14: 5, hea do disungkun si Tomas taringot tudia do Ibana laho, uju na pinabotohon Jesus tu angka siseanna di na laho Ibana. Alai anggo di turpuk jamita on, tung so adong be angka sisean i manungkun taringot tudia do Ibana laho? Ragam do pandapot ni angka na bisuk taringot na boasa dang disungkun angka sisean i? adong do na mandok: hinorhon ni dokdok ni panghilalaannasida, manang lungun ni roha ni angka sisean umbahen ndang pola disungkun tudia Ibana laho; boi do i tarjalo roha na dihilala angka sisean i. Guru na sai rap dohot nasida, Guru na mangajarhon taringot Harajaon ni Debata, na gabe tiruan di angka panghobasion dohot ulaonNa, nuaeng ingkon laho manadinghon nasida. Lungun do roha jala marsak situtu.

Diboto Jesus do na hinalala angka sisean i alai ndang na sundat sangkap haluaon ni Debata Jahowa ala ni panghilalahon ni angka sisean. Hamumulak Jesus pe tu Ama na marsuru Ibana ima sada sian sangkap haluaon na pinatupa ni Jahowa Debata di bagasan Jesus Kristus. Alai nang pe na ingkon ditadinghon Jesus angka sisean i, alai tung so jadi punjung nasida laho manguduti misi Harajaon ni Debata songon na binahen ni Jesus uju na rap dope nasida. Angka hamaolon, penolakan dohot pangaleleion do na masa di angka sisean i sian angka na mansogohon barita haluan na pinatupa Jahowa Debata di bagasan Jesus Kristus. Laos dilumbahon Jesus do taringot haroro ni Pangondian manopot nasida (ay. 7). Ise do pangondian i, ima Tondi Parbadia. Aha do ulaon ni Pangondian i di angka sisean? Ima pangajarion na tontu taringot dosa, hapintoran nang songon i taringot uhum (ay. 8). Dosa ima na so porsea di Jesus Kristus (ay. 9 bdk. Joh. 3: 18). Pangantusion na masa dosa ima ulaon na maralo tu patik manang uhum ni Debata Jahowa, upa na tinuhor ni dosa do tu hamatean (tanathos). Ndang adong dalan ni jolma laho paluahon dirina sian hamatean i, holan marhite jala dibagasan Jesus Kristus do haluan i masa, jala disi do hapintoran i. ndang ala ni gogonta, manang hadirionta alai tung ala asi ni roha ni Debata Jahowa na dibagasan Jesus Kristus do dipintori Debata hita sian dosa nang hamatean i.

Anggo hapintoran, ima na laho Ibana manopot Damang, jadi ndang be idaonnasida Jesus i (ay. 10). hamamate, haheheon, dohot hamumulakNa tu Ama patuduhon Jesus i ima hata ni Debata na gabe jolma, jala Ibana do hasintongan i (bdk. Joh. 14: 6). Marhite hamamateNa do gabe dapotan hangoluan angka jolma (bdk. Joh. 11: 50). Ndang be hape ala laho mangulahon patik boi dapot hapintoran manang haluan i, alai tung ala asi ni roha ni Jahowa sambing do. di na laho pe Jesus Kristus manadinghon portibi on ima hataridaan hapatean ni hapintoranta. Ndang portibi on hapatean alai di inganan naung pinarade Jesus Kristus do hapateanta, Surgo hasonangan, inganan na denggan i. molo taringot uhum ima naung hona uhum induk ni portibi on (ay. 11). ise do induk ni portibi na didokna dison? Ima sibolis. Sibolis do na mangela jolma i asa manulak haluaon na pinatupa ni Debata, jala mangela asa dilaosi jolma i patik ni Debata. Uhumon do angka sibolis dohot na na so manjanghon Jesus di rohana. Hamamate ni Jesus di hau pinarsilang ima hataridaan ni hasintongan uhum ni Debata Jahowa, papatarhon haluaon na pinatupaNa. Jala nunga diporsan Jesus be saluhutna i asa malua hita. Alai hamamatena masa do i sahali tu salelengnilelengna. HaroroNa paduahalion ndada laho mate paduahalion, alai papatarhon paruhuman na parpudi. Ise na satia di bagasan Jesus Kristus dapotna ma hangoluan saleleng ni lelengna, alai anggo parjahat hapariron si salelenglelengna do dapotna.

Godang dope na naeng sidohonon ni Jesus alai dang tarboan angka sisean i dope i saluhutna (ay. 12). Autsugari pe dihatohon Jesus angkan na naeng sidohonon ni Jesus ndang diantusi angka sisean i dope i, ala nang pe naung rap Jesus dohot angka sisean, alai sai adong dope pangantusion na sala ni angka sisean taringot ise do Jesus i. dung pe masa angka sitaonon, hamamate, haheheon dohot hananaek ni Jesus laos diuduti hasasaor ni Pangondian i, disi pe mangantusi nasida taringot Jesus dohot haluaon na pinatupa ni Jahowa di bagasan Jesus Kristus. Jala marhite pangantusion i nang songon di hiras ni roha angka sisean i barani nasida laho mambarita na uli, mambaritahon barita hamuabon ni roha, barita hapintoran nang paruhuman di ari sogot (ay. 13 – 14). Pangondian, ima Tondi Parbadia na dilumbalumbahon Jesus tu angka sisean patubuhon hiras ni roha mambarita na uli, jala na so jumpang biar dohot pandelean di bagasna. Marhite i ma mangantusi taringot mansoadahon diri, manuhuk silang jala hasatiaon laho mangulahon tona ni Jesus Kristus na ingkon siuduton ni angka sisean. Jala sude angka ulaon ni angka apostel marhite jala di bagasan Tondi Parbadia ima ulaon pasangaphon Debata. Jala disi tarida hasadaan ni Ama i, ima Jahowa dohot Anak i ima Jesus Kristus. Sada do haroroanNa ima sian Jahowa, Debata jala Ama saleleng ni lelengna (ay. 15).

 

Refeleksi Teologis

            Ringkot dope Pangondian i tu hita saluhutna? Tontu mansai ringkot situtu. Pangondian i do mambahen hita margogo mangodopi angka ragam sitaonon di ngolu on. Tondi Parbadia i ma na margogoihon hita marhiras ni roha laho mambaritahon barita hamubaon ni roha, barita hapintoran dohot uhum. Na so jadi ditabunihon barita i asa malua didok rohana sian sitaonon na masa di portibi on. alai marhite turpuk jamita on, adong do na ringkot siondolohonon na gabe sirimangrimangonta:

1.       Tarida do pangaramotion ni Jesus Kristus songon na nidokNa di Mateus 28: 20 marhite hasasor ni Tondi Parbadia. Tutu mansai dokdok jala borat situtu do laho manguduti ulaon parbaritanaulion songon parsuru ni Jesus tu angka sisean sahat tu tingki sadari on. ingkon do mansoadahon diri. Mansoadahon diri ima mansoadahon hagiot ni dagingna, hisaphisapna di na laho marbaritanauli. Unang ma sai jumpang di bagasan rohana alani hamaloon, haadonganna, manang hadirionna boi ibana marbarita na uli na gabe patubuhon haginjangonn ni rohana. Alai naeng ma nian di bagasan serep ni roha ibana mangulahon parbaritanaulion jala marhapatean tu Hasangapon ni Jahowa.

2.       Tondi Parbadia ima tondi na sian Jahowa Debata, na Pinangido ni Jesus sian Damang ima Jahowa (Joh. 14: 16 – 24). Molo didok Tondi na sian Jahowa marlapatan do anggo Tondi i sai na hinalomohon ni Jahowa do diulahon. Halak na sinonggopan ni Tondi Parbadia ima halak na mangulahon angka lomo ni roha ni Debata. Dao ma angka na nidokna na sinonggopan ni Tondi Parabdia ibana hape ngoluna holan laho mangalului mamon, sangap tu dirina, jala berorientasi tu posisi atau kedudukan tertentu.

3.       Adong do pigapiga huria na mandok: holan di huria on do adong Tondi Parbadia ala adong parhata tondi di nasida, jala di huria na asing dang adong Tondi Parbadia. Boha do parhata Tondi Parbadia na nidokna? Halak na digohi Tondi Parbadia ima halak na parhata lambok, parhata tigor, parhata dame, parhata tu hadengganon, parhata hasintongan. Nda tung haruar angka hata elat, hata hosom, hata paburnang diri dohot hata na jat na asing. Tondi Parbadia i pe mambahen jolma na sinonggopanna mangantusi aha do na nidokna, jala halak na mambege pe mangantusi (ida. Pentakosta di Ulaon ni Apostel 2). Roh Kudus tidak pernah menjebak manusia yang dipenuhinya untuk melakukan apa yang menjadi kehendak dirinya sendiri, atau menjebak si pendengar dengan hal yang tidak dimengerti. Tondi Parbadia ima Tondi pangantusion asa mangantusi do hita taringot sihataanta, siulaononta dohot dia do lomo ni roha ni Debata na ingkot siulahononta.

4.       Huria i pe ingkon digohi Tondi Parbadia. Molo digohi Tondi Parbadia do huria i (Pendeta, Sintua, Guru Huria, Bibelvrouw, Diakones, sude angka parhobas di huria dohot ruasna) marlapatan huria i ima huria na di bagas na ndang adong be parbolatbolatan, ndang adong jumpang parbadabadaon, dohot partahitahi na jat. Alai Huria i mian ma dame, holong ni roha, jumpang hasesaan ni dosa, marsipaunean. Sai digohi Tondi Parbadia ma sude Huria na adong di portibi on asa ganup ari Huria i boi mamparbuehon hasintongan, hatigoran, holong, parsaoran parhahamaringgion (hidup persaudaraan) dohot mambaritahon haluaon sahat tu saleleng ni lelengna.

5.       Tondi Parbadia ima Tondi na mangondihon angka na porsea i di ngolu na:

a.       Marhasatiaon dohot togu di bagasan haporseaon. Nang pe ingkon mangadopi sitaonon manang parungkilon, alai tung na so jadi mandele jala mandate ibana di bagasan haporseaonna

b.       Marhirasniroha mambaritahon Barita na uli ima barita hamubaon ni roha. Nang pe ditulak jala masa pengancaman sian angka na manulak Jesus Kristus alai ndang mansohot ibana laho mambaritahon Barita Na Uli.

c.       Marbisuk di angka hata dohot di ulaon, gabe tiruan na denggan nang di na mamangke angka hamajuon ni tekhnologi sinuaeng ingkon marbisuk hita mamangke i saluhutna asa unang gabe partuktukhan tu angka halak na asing.

d.       sai digohi angka ulaon na songon parbue ni Tondi (Galatia 5: 22 – 23). Amen.