Khotbah/ Jamita, 03 Februari 2013

BAHAN JAMITA MINGGU MINGGU SEXAGESIMA

03 Februari 2013

Ev. Jeremiah 1: 4 – 10; Ep. Mateus 10: 5 – 15 

Pdt. Daniel Bonardo Pane, S.Th.

JANGKON JALA HANGOLUHON 

MA PANJOUON NI JAHOWA

Patujolo

            Boha do hita molo disuru paingothon angka panggomgomion manang atasanta na mangulahon na hasalaan, manang na mangulahon na so hombar tu naniaturhon? Pasti do ragam do alus taringot tusi, adong do na mabiar, mabiar ditekan oleh atasan, mabiar mago pangkat, laos adong muse mandok, marhua dipaingot, ai diboto do aha na niulahonna, laos adong muse na marhiras ni roha laho paingothonna, jala siap manjangkon aha na masa tu ibana molo dipaingot. Boi do ala kedudukan/ status sosial mago hasintongan. Dohot do huria berperan dibagasan status sosial i, na boi mambahen mago hasintongan ala nunga torop be huria dang be marhiras ni roha laho manghatindanghon soara hapanurirangon di tongatonga humaliangna, na mambehen menak manang demak na palsu angka ruas na, menak manang demak di parsitaononnasida.

            Molo diadophon tu turpuk jamita on, tarjou do si Jeremia gabe panurirang di habajaronna. Pasahathon hata sipaingot, dohot paruhuman tu panggomgom na di bangsona dohot tu jolma na dibangsona. Nunga gok be angka dosanasida maradophon Jahowa, sai diulahon bangso i do angka na so dihalomohon Jahowa, umpos ni roha tu koalisi politik sian tu Jahowa, dohot ragam ni dosa na diulahonnasida. Toho do adong disi angka malim dohot angka panurirang, alai hamalimon dohot hapanurirangonnasida pe dang hombar be tu ulaonnasida laho pasahathon tona dohot hata ni Jahowa, alai gabe ulaon na mambahen las ni roha angka panggomgomi di angka hajahaton na binahennasida, ima na didok malim dohot panurirang pargapgap.

            Jahowa sandiri do na padirihon panurirang na sintong sian ragam ni parngoluanna. Adong do dipillit Jahowa sian sahalak partani, malim, anak ni malim, dohot na asingna. Marlapatan ma i, pamillit dohot padirihon sahalak panurirang, Jahowa sandiri do na padirihon laos Ibana do na manjadihon sasahalak gabe panurirang, jala saguru tu Ibana do panurirang na dipillit.

Hatorangan ni turpuk

            Ayat 4 – 5       

Marhite turpuk jamita on, dipabotohon tu hita taringot panjouon dohot pabangkithon si Jeremia gabe sahalak panurirang tu bangso marhitehite panghataioanna tu Jahowa (ay. 4-5). Di ayat 5 tangkas didok taringot pamillithon ni Jahowa tu ibana. Nunga ditanda jala nunga dijadihon gabe panurirang tagan so dijadihon dope ibana di bortian; jala diparbadiai laho mangulahon sada ulaon na mansai ringkot tagan so tubu ibana. Diparbadia i marlapatan dikhususkan, adong ulaon khusus, ulaon naung ditontuhon Jahowa sandiri. Jala dipabangkit ibana gabe panurirang tu angka bangso. Sian ayat 5 on tangkas do hapanurirangon ni si Jeremia ndada holan tu bangso Juda, alai dohot do tu sude bangso. Sian turpuk on tangkas do dipabotohon ndang tubu sian sangkap ni Jeremia na gabe panurirang, alai sian sangkap ni Jahowa sambing na so pola diboto si Jeremia hian andorang so dijou ibana. Adong 3 hal proses si Jeremia gabe panurirang ima: Pamillithon/ panandaion; Pabadiahon; pabangkithon. Jala sude proses i Jahowa sandiri do na mangulahon.

            Songon na dipatorang di patujolo ni jamita on, mansai ragam do angka hajahaton na niulahon bangsa Juda dohot angka bangso na marhuaso uju i. Dung marujung pamarentaon ni si Josia, nunga balik be bangso Juda gabe marhaposan tu huaso ni politik, gogo ni porang, jala dang marningot be nasida haundukhon tu Jahowa, jala ragam ma disi angka anggukangguk ni hasintongan na naung mapeol.

           

            Ayat 6 – 8

Di ayat 6 tangkas do adong keberatan  ni si Jeremia taringot tu panjouonna. Tangkas do dibahen si Jeremia habajaronna jala na so malo ibana mandok hata na naeng sihatahonna gabe alasan menolak panjouon ni Jahowa. sarupa ma tu alus ni si Musa taringot panjouonna laho paluahon halak Heber sian parhatobanon di tano Misir (2 Musa 4: 10). Alai sude alus na pinasahat si Jeremia nang si Musa ndang na gabe pangambati tu angka ulaon dohot sangkap ni Jahowa.

            Alus na pinasahat ni si Jeremia patuduhon hahurangan jala hagaleonna gabe panurirang. Alai sude na pinasahat si Jeremia dang dijalo Jahowa. Tarida do sian alus ni Jahowa di ayat 7 – 8. Ima na patuduhon ndang marhitehite gogo ni si Jeremia laho mangulahon hapanurirangonna, jala angka hata na dihatahon si Jeremia ndang na tubu sian Ibana, alai sian Jahowa sandiri do. Dihabajaron, somal do adong biar ni roha, boha do panjanghonon ni jolma tu ibana dohot hata Jahowa na pinasahatna, jala olo gabe ditangkup, diburai angka halak na sogo ala dipaingot si Jeremia marhite hata Jahowa, jala olo gabe hamagoan hosa. Alai ro do alus ni Jahowa tu si Jeremia, na paposhon rohana, „unang ho mabiar maradophon nasida, ai sai Ahu do donganmu, paluahon ho“ (ay. 8). Rap dohot hata ni Jahowa di ayat 8 on Jeremia rap ma dohot angka ompung ni Israel naung manjalo hata patoguhon songon si Jakob (1 Musa 28: 15), Musa (2 Musa 3: 12); si Joshua (Josua 1: 5); Gideon (Panguhum 6: 16) dohot na asing. Jala ha on sahat ma tu si Jeremia (Jer. 1: 8, 19; 15: 20) jala tu halak Israel (Jer. 30: 11). Hata manang padan ni Jahowa on ima mual ni panghirimon tu naung tarpillit gabe panurirang ni Jahowa, na mangadopi ragam parungkilon dohot parsorion na hansit jala parir ala ulaon panurirangon na hombar tu na diaturhon Jahowa.

            Ayat 9 – 10

Di ayat 9 tangkas do dipabotohon songon dia Jahowa mamparbohali si Jeremia gabe sahalak panurirang-Na. Dipabotohon do Jahowa patoltolhon tangan-Na, jala manjama pamanganna. Ayat on pabotohon andorang so borhat si Jeremia laho manurirangi parjolo sahali do diparbadiai jala dibohali pamanganna laho manghatahon hata ni Jahowa. Tudos ma i tu si panjouon ni si Jesaya gabe sahalak panurirang. Laos ayat on ma na patangkashon ia sahalak panurirang ima dalan ni Jahowa pasahathon hataNa (mitra, rekan Allah dalam menyampaikan firman atau kehendak Allah kepada umat/ lebih khas disebut penyambung lidah Allah), jala ayat on pabotohon taringot hadirion ni si Jeremia songon sahalak jolma alai panghataionna hombar tu hata dohot sangkap ni Jahowa.

            Dung i dilehon Jahowa ma hataNa tu pamangan ni si Jeremia. Hombar tu 5 Musa 18: 18 songon i do na masa tu si Jeremia sandiri. Dilehon Jahowa do angka hataNa na naeng dipasahat si Jeremia jala on ma na pamagohon alus ni si Jeremia taringot tu hagaleon manang hahuranganna, na so mamboto hata na patut sihatahonna. Alai Jahowa sandiri do na mambohali si Jeremia angka hata dia do na pinasahat si Jeremia.

            Songon na dipatorang di ginjang, adong do tujuan pasti, ni si Jeremia gabe sahalak panurirang. Dung dilehon Jahowa hata-Na tu pamangan si Jeremia pintor dipasahat Jahowa do angka aha do na naeng jala ingkon diulahon si Jeremia “mangaranapi angka bangso dohot angka harajaon, laho mangurati dohot maniaphon, mangago dohot mangaloha, paulihon dohot manuan.  Molo manat talapati ulaon ni si Jeremia adong do 2 inti ulaon na diulaon si Jeremia (tugas yang berkelanjutan) ima “mangarumpakhon” dohot “paulihon”. Jala on ma na hasisingkop angka ulaon hapanurirangon ni si Jeremia ima, paboahon uhum, panghirimon. Disuriranghon si Jeremia do aha do uhum ni Jahowa tu bangso i, alai dang so disi, alai diuduti do lao paulihon tanda ni holong-Na.

            Tontu mansai ulaon na maol do ulaon i molo diida sian hajolmaon. Songon dia do sahalak na bajar paingothon panggomgom, angka raja, jala paboahon paruhuman tu bangso i? Olo do ra didok halak na loakhon manang na gila. Apalagi di hatiha i adong muse ma angka panurirang pargapgap na mandok dirina panurirang ni Jahowa hape sasintongna panurirang na mambahen dame jala las roha ni raja i asa dapotan diibana hauntungan tu dirina. Jala panurirang pargapgap on sai mandok dame..dame...alai dang adong dame na mian disi.

Aplikasi – Teologis

Saluhut hatorangan taringot panjouon ni si Jeremia, dipatuduhon do adong panghataion na mansai jonok songon sahalak ama manang dongan. On ma na pataridahon hajonokhon ni Jahowa tu si Jeremia. Nang pe di tingki panghataion ni si Jeremia tu Jahowa, dipabotohon si Jeremia do hagaleon dohot hahurangan ni si Jeremia gabe sahalak panurirang. Alai sude na i ndang boi mangambati angka sangkap ulaon haluaon na pinatupa ni Jahowa. Hombar ma tu lapatanna goar ni Jeremia (Timbul do Jahowa), patuduhon hatimbulon ni Jahowa na so boi diambati angka hagaleon dohot hahurangan ni jolma. Manang aha pe ragam angka hagaleon dohot hahuranganta, tapaloas ma Jahowa mangula dibagasan ngolunta asa marhite i, asa sude hagelon dohot hahuranganta i diumpat Jahowa. Marhite jamita on dipabotohon do mansai tangkas, Jahowa digombarhon sahalak na mananda tangkas mamparbadiai, jala na pabangkithon si Jeremia gabe panurirang. Ndada sangkap ni si Jeremia jala ndada siang tubu ni rohana gabe panurirang, alai sian sangkap Jahowa sambing do saluhutna. Jahowa sandiri na manangkapi laos Jahowa do na manuturi, jala mandongani si Jeremia mangulahon na dipinasahat Jahowa tu ibana.

            Sadarion, sahat ma panjouon ni Jahowa tu hita na tardok sahalak Kristen (siihuthon Jesus Kritus). Adong do 3 ulaon ni halak Kristen ima gabe malim, panurirang dohot raja. Sada sian ulaon i ima panurirang, na marlapatan papatarhon sangkap dohot hata ni Jahowa tu liat portibi on. Lapatanna, ndada holan ulaon ni Pandita laho pararathon hata ni Jahowa, alai sude saluhut na tardok dirina Kristen. Molo boi do hita rimangi aha do sangkap ni Jahowa di bagasan ngolunta? Ganup halak Kristen sadar atau tidak sadar parsidohot do mengambil bagian di panjouon ni Jahowa, songon halak naung ditanda jala diparbaidai marhite panobusion di bagasan Jesus Kristus, nunga parsidohot hita laho pararathon hata ni Jahowa (patudos Efesus 2: 10).

            Menyadari sebagai pelaku mengabarkan firman TUHAN, Ido na mandasor hita asa sahat hita singkop mangulahon saluhutna. Panjouon ni Jahowa ima patupahon ulaon haluaon na disangkapi Jahowa. Ise halak Kristen na so mamboto aha do ulaonna gabe sahalak Kristen, ima jolma na dangol situtu diportibi on. Tudos ma i diboto do ibana jolma, alai dang diboto aha do tujuan manang lapatanna ibana mangolu.

            Molo au marnida jala mangalapati na masa tingki on, halak Kristen ndang na manulak panjouon ni Jahowa, alai halak Kristen sai tongtong do menghindari manang menunda panjouon ni Jahoawa dengan alasan, “ndang mampu”, “maol jala dokdok ni ulaon i” jala adong ma mabiar ala ni sada alasan, “pangkat”, “hasangapon”, dohot na asing. Tongtong dipangke Jahowa jolma laho patuduhon sangkap-Na. Ndang na so tolap Debata patupahon sandiri, alai asa patar do marhite jolma naung dipillit-Na huaso dohot asi ni roha ni Jahowa. Jala jolma na martua situtu do hita molo parsidohot hita taruli diulaon papatarhon jala patuluhon sangkap ni Jahowa di portibi on.  

            Marhite turpuk jamita on, adong do hata apulapul na sian Jahowa: “unang ho mabiar maradophon nasida, ai sai Ahu do donganmu, paluahon ho”. Alani i, di sude hagaleonta dohot hahuranganta i, tapasahat tu Jahowa mardongan pos ni roha asa tung margogo hita patupahon sangkap ni Jahowa di ngolunta. Laho papatarhon uhum ni Jahowa jala papatarhon asi ni roha-Na. Jahowa do donganku, tung ise alongki? Molo Jahowa tabaen donganta, tung na tahutan be hita?

            Alani i, diragam ni angka parsorion dahot hatahuton, dohot ragam ni angka sahit na songgop dohot na asing, tapasahat ma tu Jahowa. Ai diapuli do hita, asa unang be mabiar. Nang pe hamatean na ingkon tabolos, taingot ma ai Jahowa do tongtong donganta saleleng ni lelengna. Jangkon jala hangoluhon ma panjouon ni Jahowa tu hita. Amen.