Bahan Jamita/ Khotbah, 27 Januari 2013

BAHAN JAMITA

MINGGU SEPTUAGESIMA

MINGGU, 27 JANUARI 2013

Pdt. Daniel Bonardo Pane, S.Th.

EV: LUKAS 4: 14 – 21 EP: NEHEMIA 8: 1 – 10

LAS MA ROHAM, NUNGA RO SIPALUA HO

I. Patujo

            Ganup jolma na dibagasan parungkilon atau sitaonon na dokdok, nang hona gosagosa sian na asing pasti do manghirim adong sasahalak na boi paluahon ibana sian saluhutna i. Laos domu ma songon na didok ni Aristoteles, „ganup jolma dihirim do jumpang las ni roha dohot hasonangan tu dirina“. Alani i, na dibagasan parungkilon, manang sitaonon dohot pangosagosaion manghirim do taruli las ni roha dohot hasonangan asa jumpang na dihirimna i, nang marhite haroro ni sipalua na boi paluahonna.

            Songon i jolma na di turpuk jamita on, dihasiholi nasida do haroro ni Mesias, Sipalua songon naung disuriranghon angka panurirang di padan na robi. Panghirimon ni jolma di turpuk on ima songon sahalak raja na boi mangusir angka panggosagosa nasida, jala paluahon nasida sian angka parsitaonon na mansai borat dihilala nasida, nang sian segi pajak na timbo, huaso ni malim na so patuduhon hamalimonna, dohot hagiot ni angka panggomgom na mambahen hansit angka na digomgomionna. Ise do Mesias i? Songon na dihirim nasida? Torop halak Kristen na mandok, Jesus. Alai molo halak Jahudi di tingki i manulak Jesus do Sipalua songon na dihirim nasida. Dihirim nasida do Sipalua i ima sian horong na sangap, keluarga na mamora, jala na gogo, jala sian horong ni angka Raja. Marhite turpuk jamita on tangkas do dipabotohon na jumpang do na dihirim bangso i marhite patandahon diri Jesus songon na tarsurat di padan na robi.

II. Hatorangan Nas

            Molo manat tajaha turpuk jamita on, andorang so ayat jamita on di mula ni bindu 4 on dipabotohon na Gok Tondi do Jesus. Hagogok ni tondi i, patar ma i ditingki tardidi Jesus di batang aek Jordan, laos adong do soara na memproklamirkan Jesus gabe Anak ni Debata, jala na dihalomohon Debata do Ibana. On ma na pabotohon Jesus ma na didok songon naung disuriranghon angka panurirang ni Debata di Padan na robi, taringot haroro ni Sipalua, ima Mesias. Dibagasan Gok Tondi i Jesus, monang ma Jesus mangalo pangunjunan na pinatupa ni sibolis.

            Dung monang Jesus manaluhon i, jala dipargogoi Tondi i, ro ma Jesus tu Galilea. Jala disi ma Ibana parjolo sahali mangajari taringot haluaon na naeng pinatupa Debata marhite Ibana. Mambege pengajarion i Jesus, dipujipuji jolma do Ibana na manangihon pangajarionNa (ay. 14 – 15). Dung i, ro ma ibana tu huta hatubuanNa, ima huta Nassaret. Songon hasomalan na masa di huta i, ganup ari Sabbat marpungu do angka halak Jahudi di Sinagoge, laho manangihon pangajarion na pinasahat angka pangajari marhite Patik dohot pustaha Padan na robi (ay. 16). Boasa pintor disuru Jesus pasahathon pangajarion i? Molo ahu marpandapot sian pigapiga pendapat ni angka pande bisuk huta Nassaret berkisar 23 KM sian laut Galilea. Marlapatan ma i, pangajarion ni Jesus sahat do tu huta hatubuan ni Jesus, ima Nassaret, jala kemungkinan besar nunga diboto parNassaret taringot pangajarion ni Jesus. Ido na umbahen nasida pe naeng taruli tu pangajarion ni Jesus songon na dibege nasida sian Galilea.

            Dung i, disuru ma Jesus laho pasahathon pangajarion di ari i, jala dilehon ma tu Ibana pustaha ni panurirang Jesaya. Dung i dijaha Jesus ma na tarsurat di pustaha i. barita na dipasahat Jesus marhite na manjaha turpuk ni pustaha i, ima taringot Sipalua na dipaimaima halak Jahudi, ima na boi paluahon nasida sian parungkilon manang parsitaonon na mansai hansit.

            Tangkas do parjolo sahali Sipalua i ima halak naung disonggopi ni Tondi ni Jahowa, jala na dimiahan na marlapatan adong pabangkiton. Ise na pabangkiton? Ima Jahowa, marlapatan Jahowa sandiri do na pabangkithon Jesus marhite na songgop Tondi na tu Ibana, laos Jesus i ma Naposo ni Jahowa (Eved YHWH) naung disuriranghon angka panurirang. Ibana ma na dipabangkit Jahowa laho:

1. Mamboan Barita na Uli (evangelium). Barita na Uli ima barita las ni roha, Barita na sian Jahowa sandiri. Marlapatan ma i, sian Jahowa sandiri do ro barita na uli i ima mual ni las ni roha. Evangelium on dipasahat/ didaratkan tu halak na pogos. Halak na pogos didok dison ima halak na marsitaonon, sengsara, na marungkil na dokdok, na so marpanghirimon. Jala Barita Uli ima barita hamonangan,  na patubuhon muse panghirimon dohot patoguhon haporseaon tu Jahowa.
2. Mambaritahon tu angka na tarhurung asa malua. Na tarhurung didok dison ima tarhurung di hatahuton, tarhurung di hagangguon, tarhurung di hagiot dohot hisap ni daging, tarhurung di ganggu ni roha, tarhurung di dosa, situasi na manosak, jala na terikat tu hasomalan na so marpardomuan tu hata ni Jahowa. Asa malua nasida, taruli ngolu na imbaru, las ni roha.
3. Tu angka mapitung asa marnida, mapitung tu hata ni Jahowa ala ni hagiot ni daging, mapitung tu lomo ni roha ni Jahowa ala naeng mandapot hasonangan na rumar sian portibi on, mapitung marnida sondang ni Jahowa ala hagolapon manghophopi ibana. Jala dipalua ma nasida, gabe boi ma tangkas marnida sondang ni Jahowa jala dia do na dihalomohon ni Jahowa tu nasida. Tangkas ma ditanda ise do Jahowa, Debata Israel. Jala ise do Sipalua, Mesias i.
4. Paluahon angka na ginosagosa. On ma situasi ketidaknyamanan. Ginosagosa ni pamarenta mangkus di hisap ni dagingna na mambahen susah angka jolma na ginomgomanna. Ginosagosa ala ni situasi ekonomi, ginosagosa ala ni biar ni roha, na patubuhon sahit jala na boi mambahen jolma i magopo haporseaonna.
5. Mamaritahon taon parasirohaon ni TUHAN i. Taon parasian tudos ma i taon Jobel (3 Musa 25), ima partingkian sude utang tarsesa, mulak ma tano dohot jabu ni angka na pogos, angka hatoban pe dipalua gabe sahalak na malua. Ima panghirimon na mansai balga di halak Jahudi di hatiha i, sude hatoban ditobus, di Padan na Imbaru ima hagogok ni Padan na robi, marhite diri ni Jesus, nunga ditobus be jolma na sai manghirim tu Jahowa, ditobus sian angka hamatean saleleng ni lelengna ala ni dosa, gabe taruli tu hangoluan na so ra suda.

Laos ido na didok Jesus, Jumpang do saluhutna i di bagasan diriNa. Pataridahon/ memproklamirkan ibana ma Sipalua i, manang Mesias i naung leleng dipaimaima jala dihirim angka bangso i (ay. 21). Nang pe di udut ni turpuk on, ditulak nasida do Jesus, ala nasida mamereng latarbelakang ni Jesus sian keluarga na pogos, songon dia boi gabe Sipalua manang Mesias (ida muse penjelasan di patujolo, songon dia Mesias na dihirim nasida i).

III. Refleksi – Teologis

• Sahat ma evangelium on tu hita saluhutna, tarlumobi tu angka na marhosa jala na sai tongtong manghirim tu Jahowa. Porlu tasadari, partingkian nuaeng, ndada holan jolma na marungkil manang na dokdok parsitaononna, dohot do angka pahanpahanan, tano, dohot portibi on pe tong do marungkil manang marsitaonon ala ni hisaphisap dohot hagiot ni jolma na so boi dirajai.  Jala Jahowa sandiri do na pasahathon evangelium on marhite Jesus Kristus, barita hamonanganta.
• Songon i do nang Kristus, Ibana ma evangelium na sian Jahowa i, evangelium na mangalehon las ni roha dohot pangapulion jala barita hamonangan tu sude jolma. Jala marhite Jesus Kristus ma tadapot barita las ni roha. Nunga ro be Sipalua i, jangkon ma Ibana tu bagasan rohanta, Silehon panghirimon na mangolu. Jahowa sandiri do na patupahon haluaon marhite Jesus Kristus. Ala ni i, minggu Septuagesima on dipaingot do hamonanganta di ari haheheon ni Kristus, hamonanganta malua sian angka utang ni dosa dohot hamatean, jala ido pahothon hita manghaporseaon tu Ibana.
• Unang so di hita barita on, alai tapasahat ma tu donganta na so taruli jala na so mananda dope Sipalua i (agen of freedom). Asa sude jolma di humaliangta, mandapot jala taruli haluaon. Nang pe adong jolma jala torop jolma na manulak, alai taingot be ma, dang na ditulak Jahowa hita molo olo ro hita tu Ibana. Amen.