BAHAN JAMITA EVANGELIUM MINGGU XII DUNG TRINITATIS, 27 AGUSTUS 2023: 2 SAMUEL 7: 25 - 29

 BAHAN JAMITA EVANGELIUM
MINGGU XII DUNG TRINITATIS
Minggu, 27 AGUSTUS 2023
2 SAMUEL 7: 25 – 29

PANGHATINDANGION BAGABAGA HALUAON NA SIAN JAHOWA

Pdt. Daniel Bonardo Pane, M.Th.

Patujolo

            Horas ma tu hita saluhutna! Dame dohot asi ni roha na sian Jahowa Debata, na sumurung sian saluhutna angka roha dohot saluhut pangantusion ni jolma ima na tongtong mangaramoti jala manggohi hita saluhutna, amen. Ra, hea do hita mandapot bagabaga sian jolma na asing. Tontu bagabaga i ima angka panghirimon na manghorhon las ni roha, pangomoan dohot na boi pasonang roha. Hata bagabaga jotjot do dipasahat sasahalak na naeng gabe uluan, caleg manang na gabe partogi di sada luat. Dipasahat do bagabaga dalan asa ditanda halak ibana; dalan menarik hati dan perhatian halak dipillit jala pasauthon sangkapna i. Torop jolma boi mandok jala mambahen bagabagana, alai ndang songon toropna jolma boi pasauthon sude angka na binagabagahonna i. holan dapot na niluluanna, dung hundul ibana di hundulanna na sangap i ndang ingot be ibana di bagabagana i, jala ndang ingot tu jolma na manangihon bagabaga i. tubu ma pandelean dohot kekecewaan sian angka naung manangihon jala mandapot bagabaga i.

            Jamita minggu XII dung Trinitatis on ima tangiang ni raja Daud taringot bagabaga Jahowa Debata na sahat tu Ibana. Bagabaga na sahat tu si Daud ima bagabaga taringot sipalua manang panggomgom na marharoroan sian pomparanna. Asa lam tu antus hita mangantusi taringot tangiang ni si Daud na marpardomuan tu bagabaga ni Debata tu ibana, masuk ma hita tu hatorangan ni turpuk jamita on.

 

Hatorangan ni Turpuk

            Buku II Samuel ima udut ni buku I Samuel na manaringoti taringot panggomgomion ni raja Daud sian luat Judah (tungkan dangsina ni Israel (ida II Sam. 1 – 4)) sahat tu saluhut bangso Israel na sampulu dua marga (Israel Utara dohot Israel Dangsina (ida II Sam. 5 – 24)). Sian hatorangan i boi ma anutsanta buku II Samuel on pabotohon taringot sejarah harajaon ni Israel dungkon gabe raja ibana taon 1010 – 970 andorang so tubu Jesus Kristus na disurathon sada kelompok teolog Israel na digoari kelompok deutronomis.[1]

            Dungkon gabe raja si Daud manggomgom saluhut Israel (utara dohot dangsina) dipanghilalahon ibana do pandonganion, pangaramotion, dohot keberpihakan  ni Jahowa Debata di ngoluna sandiri. Jahowa Debata do na mamillit jala na manotophon si Daud marhite si Samuel gabe raja gumomgom Israel singkat ni si Saul (1 Sam. 16: 1 – 13). Ndada holan na mamillit jala manotophon Jahowa tu si Daud, dohot do na mandongani, mangaramoti jala paluahon si Daud sian ragam angka na jat na dipatupa angka bangso humaliang Israel (1 Sam. 17: 42 – 58; 1 Sam 30 – 31)  dohot si Saul na so manghalomohon si Daud gabe raja gumomgom Israel (I Sam. 19: 1 – 7; 20: 24 – 34; 26: 1 – 12) sahat tu punsu ni harajaonna manggomgom saluhut marga Israel.

            Nang pe nunga sahat tu punsu harajaonna adong dope na hurang dipanghilalahon ibana, songon na hurang singkop harajaonna manggomgom Israel jala patuduhon habalgaon dohot hamuliaon harajaon Israel rea di sandok Israel dohot di sandok bangso humaliang Israel. Na hurang ima ndang ojak jala ndang jongjong dope bagas joro di harajaonna. Jala marsangkap ma si Daud laho pajongjong bagas joro, jala dipabotohon ma sangkapna i tu panurirang Natan (2 Sam. 7: 1 – 3). Molo hasomalan bangso Timur Dekat Kuno (Ancient Near East) mansai ringkot do hajongjongon bagas joro di sada harajaon. Ndada holan inganan parsaorannasida laho patupahon parsombaon tu debata na disomba jala dihaporseai alai hataridaan dohot hapapataron hagogoon, hamuliaon, hasangapon ni debata na disomba. Molo dipaadop tu Israel, Bagas Joro ima hataradiaan dohot hapapatar ni hagogoon, hamuliaon, dohot hasangapon ni Jahowa Debata dohot hapapatar na mian do Jahowa di tongatonga harajaon ni Israel. Tutu do andorang so jongjong bagas joro i, nunga dipajongjong bagas parlapelapean inganan habadiaon ni Jahowa Debata na digoaranna undungundung habadiaon ni Jahowa (tabernakel) inganan parpunguan Israel. Di tabernakel i adong do bilut inganan na sun badia, ima inaganan parmianan poti parasian (tabut perjanjian) na marisihon replika batu na tarsurat Torah, manna dohot tungkot ni si Aron. Ima hataridaan Jahowa sandiri na mian rap dohot bangso Israel jala manggomgom saluhut Israel.

            Tung mansai uli situtu do sangkap ni si Daud on molo hombar tu hadirionna dohot marnida hamuliaon harajaon ni Israel na ginomgomanna dohot dipanghatindanghononna taringot tu pangaramotion, pandonganion dohot haluaon na dipatupa Jahowa sandiri tu ibana. Nunga patut nian dipajongjong si Daud sada bagas na timbo jala bagas joro na bidang jala na balga na gabe inganan parmianan ni Jahowa. Jolma do marsangkapi dalanna, alai Jahowa do na patontuhon dalanna dohot patulushon lomo ni rohaNa. Ndang ditolopi Jahowa sangkap ni si Daud laho pajongjong bagas joro i (2 Sam. 7: 4 – 16). Nang pe disundati Jahowa sangkap ni si Daud marhite panurirang Natan alai dipasahat do bagabaga ni Jahowa Debata tu ibana, ndada holan tu ibana sahat do tu pinomparna di na manggom Israel (ida 2 Sam. 7: 4 – 16 patudos tu 1 Sam. 16: 11 – 13; 2 Sam. 8: 6, 14; Psalm. 89: 27). Ndung dipasahat si Natan saluhut na nihatahon Jahowa taringot na so jadi si Daud pajongjong bagas joro di Jahowa jala taringot bagabaga pandonganion, pangaramotion dohot haluaon na dipatupa Jahowa tu si Daud sahat tu pinomparna, masuk ma ibana tu bilutna martangian (2 Sam. 7: 17).

            Di partangianganna i jumolo ma dirujiruji si Daud hadirionna dohot mangarimangi parulaonna boasa tung disundati Jahowa sangkap na denggan na disangkapi si Daud laho pajongjonghon bagas joro i, jala tung aha ma keistimewaan hadirionna umbahen pola ingkon jaloonna bagabaga pangaramotion, pandonganion dohot haluaon na pinatupa Jahowa tu ibana sahat tu pinomparna (2 Sam. 7: 18 – 21). Dung dirujiruji si Daud hadirionna jala dirimangi taringot parulaonna i tubu ma panghatindanghononna taringot hatimbulon hagogoon, hasangapon dohot hamuliaon ni Jahowa Debata ni Israel mangatasi saluhut hagogoon, hasangapon dohot hamuliaon ni saluhut debata na disomba sude bangso di sude inganan dohot di sude tingki. Hagogoon, hasangapon dohot hamuliaon ni Jahowa na so boi disuhat marhite ruang, bilut dohot saluhut nasa na adong di portibi on. Jahowa do na mamillit jala manodo Israel gabe bangsoNa jala Jahowa sandiri do na manotophon Ibana gabe Debata ni Israel (2 Musa 6: 7; 3 Musa 26: 12; Psalmen 57: 7). Laos dihatindanghon si Daud ma saluhut pambahenan ni Jahowa na patuduhon gogo dohot hasangaponNa na so hatudosan na manaluhon gogo dohot hasangapon debata ni Misir marhite na pinalua Israel sian parhatobanon Misir (ida 2 Sam. 7: 23 – 24 patudos 2 Musa 15; 5 Musa 3 – 4).

            Antong ale Jahowa Debata! Sai pahot ma hata naung pinarbagabagaMi taringot tu naposoMon dohot tu pinoparna (ay. 25). Hata on martudutudu tu bagabaga manang padan naung nihatahon Jahowa hian tu si Daud marhite si Natan. Alai molo ndang marhasatiaon si Daud dohot pomparan ni si Daud di saluhut aturan dohot uhum ni Jahowa, na so jadi masa angka bagabaga songon na dipabotohon si Natan i. Sada sian bagabaga na nihataan ni si Natan ima taringot haroro ni mesias na sian pomparan ni si Daud. Mesias ima na nimiakhan ni Jahowa jala na digohi Jahowa marhite TondiNa. Sahalak na saluhut hadirionna digohi hasintongan dohot hatigoran uhum ni Jahowa Debata. Laos i do na gabe merasa terharu si Daud manjanghon bagabaga i (pat. Ay. 26 – 28). Ala naung sahat do bagabaga i tu si Daud marpangidoan ma si Daud sada hot ma ibana dohot pinomparna di hasintongan dohot hatigoran patik dohot uhum ni Jahowa, jala na so jadi pinomparna madabu tu ulaon na maralo tu hasintongan dohot hatigoran patik dohot uhum ni Jahowa (ay. 29).

 

Hahonaan ni Turpuk

            Boha do nuaeng panghatindanghononta taringot pandonganion, pangaramotion dohot angka haluaon ni Jahowa naung masa di ngolunta saluhutna? Aha do na boi bahenonta songon na hataridaan panghatindanghonon i asa saluhut jolma na asing marnida dahot manangihon panghatindanghonon i. didongani, diramoti, disarihon do ngolunta on di ragam angka na masa di hasiangan on. uju marsahit dipasupasu do angka obat, sipanganon dohot siinumon na diparsaulihon manghorhon hahipason; uju adong na tahirim, diparbisuki jala diramoti do hita di saluhutna i marhite angka ulaonta asa dapot na niluluan jumpa na nihirim; disarihon do ngolunta di angka sipanganon dohot siinumon songon i angka silasniroha asa boi hita denggan mulaulaon di ganup hauma, di ladang, di kantor, di partigatigaan dohot di saluhut ingananta mangula na denggan hombar tu profesinta ganup. Asa marhite angka naung ulaonta i dalan ni Jahowa manarihon na ringkot di ngolunta. Songon i di saluhut angka pasupasu naung itajalo na so tarpajojor saluhutna ala ni godangna. Aut sugari dipajojor saluhut pasupasu, angka panarihonon ni Jahowa di ngolunta sian na tubu hita di hasiangan on sahat tu sadari on dang siat portibi on ingananna.

            Manang dung dapot na niluluan, dung marhahipason, dung dapot angka na pinarsinta gabe mandao ibana sian Jahowa, jala didok rohana ala ni gogona, hamaloon dohot hadirionna umbahen boi ima taruli di angka pansamotan dohot na denggan di ngoluna. Manang molo dang hombar tu na tapaido manang suhar sian na tahirim gabe dalanta mandele manang mandok na so sintong uhum ni Debata di ngolunta. Boha do panandion dohot panghatindanghononta di saluhut pambahenan ni Jahowa? On do na gabe renungan di ngolunta marhite jamita on.

            Bagabaga pangaramotion, pandonganion dohot haluaon na sian Jahowa ndada holan tu si Abraham, si Ishak, si Jakob dohot ndada holan tu si Daud. Marudut do bagabaga i tu partingkian si saonari, tu sundut sisaonari sahat ro disalelengnilelengna. Molo marhasatiaon do hita tu Ibana, marhasatiaon sahat ro di ujung ni ngolunta saut ma bagabaga i tu hita. Marhasatiaon di na mangulahon hatigoran dohot hasintongan patik dohot uhum ni Jahowa di ngolunta; burju di angka ngolu marhadaulaton na sintong jala na so tupa be adong ganggu ni roha di panarihonon dohot di pandonganion ni Jahowa di ngolunta. Marmulia jala marsangap ma Jahowa marhite panghatindanghonta di bagabaga haluaon na naung dipatupa jala na naeng sipatuoan ni Jahowa muse di ngolunta, amen.

 

---

[1] Kelompok Deutronomis merupakan sebutan yang diberikan kepada para teolog penafsir kitab Taurat (Kejadian, Keluaran, Imamat dan Bilangan) yang kemudian membuat menuliskan ulang empat kitab Taurat tersebut yang disebut dengan kitab Ulangan. Kemudian menuliskan ulang mengenai sejarah Israel setelah Israel sampai ke tanah Kanaan sampai kepada kehancuran Israelpai ke tanah Kanaan sampai kepada kehancuran kerajaan Israel (kitab Yosua, Hakim – hakim, I dan II Samuel, I dan II Raja-raja, I dan II Tawarikh). Kelompok Deutronomis menekankan mengenai otoritas atau pemerintahan Allah terhadap Israel baik pada masa pra monarkhi, monarkhi sampai kehancuran monarkhi Israel. Pada buku II Samuel kelompok Deutronomis menggunakan beberapa sumber yang ada sebelumnya termasuk sumber Natan (2 Sam. 12) dan Gad (2 Sam. 24) ketika mereka menjadi nabi pada saat pemerintahan Daud.

BAHAN JAMITA EPISTEL MINGGU XII DUNG TRINITATIS, 27 AGUSTUS 2023; MARUKUS 8: 27 - 30

 BAHAN JAMITA EPISTEL
MINGGU XII DUNG TRINITATIS
Minggu, 27 AGUSTUS 2023
MARKUS 8: 27 – 30
 

PANGHATINDANGHONON NA TUTU DO JESUS I MESIAS MANANG SIPALUA!

Pdt. Daniel Bonardo Pane, M.Th.

Patujolo

            Horas! parhorasan Trinitatis ma sian ahu panurat tu hamu saluhutna. Autsugari ro sungkunsungku tu hita, ise do Jesus di ngolum? Jala boha do panandaionmu taringot Jesus na tahaporseai? Goar ni Jesus ndang na gabe hata na imbaru di parngoluan on. torop do jolma mananda Jesus Kristus jala manghaporseai Jesus Kristus hombar tu haringkotan ni ngoluna, holan andul sian haringkot ni ngoluna ditadinghon ma Jesus Kristus i; adong do na mananda Jesus Kristus jala dihatindanghon do siihuthon Jesus Kristus ibana alai anggo roha dohot pingkirianna ndada tu Jesus Kristus. Jesus Kristus na ditanda dohot na dihatindanghonna holan sebatas pangantusion ni ugamo. Nang pe adong do pigapiga jolma na margoar Jesus, isarana Jesus Navas, Gabriel Jesus, Juan Jesus, Jesus Manuel Corona dohot lan na asing, alai ndang na gabe Mesias manang Sipalua nasida, songon Jesus Kristus, Anak ni Debata; Hata ni Jahowa naung gabe daging jala saor tu jolma.

            Anggo turpuk jamita on ima sungkunsungkun ni Jesus ima panangkasionNas taringot ise do Ibana sian panandaion ni torop jolma, jala ise do Ibana hombar tu panandaion ni angka sisean. Sungkunsungkun on patubuhon panghatindangion taringot hadirion ni Jesus Kristus, ima Mesias manang Kristus naung dibagabagahon jala naung disuriranghon angka panurirang di Padan Na Robi. Boha do panandaion ni torop jolma taringot Jesus Kristus, jala boha do panandaion ni angka Sisean taringot Jesus Kristus? asa lam tu antusna panandaionta taringot Jesus Kristus, masuk ma hita tu hatorangan ni turpuk.

 

Hatorangan ni Turpuk

            Panurat buku Markus on ima si Markus, sahalak Jahudi na mian di Rom rap dohot si Petrus. Molo goar hajahudionna ima si Johannes jala goar ni haromawionna ima Markus. Somal do di hatiha i sasahalak margoar dua habangsaon isarana Paulus: molo di Jahudi digoari Saulus jala di Romawi digoari Paulus; Dorkas: molo di Jahudi ima Tabita alai molo di Gorik didok Dorkas (Ulaon ni angka apostel 9: 36). Parasingan ni goar on boi do patuduhon ibana sahalak Jahudi alai mian di luar Jerusalem; manang sahalak Jahudi na mangula di pamarentaon na manggomgom uju i. Sian pangantusion on boi ma antusan digoari pe si Markus ima surat na dipasahat tu halak Jahudi na mian di Rom manang di luar huta Jerusalem dohot tu halak na so Jahudi asa taruli nasida di panandaion na tangkas jala na sintong taringot Jesus na dibaritahon angka apostel.

            Evangelium Markus on disurathon hirahira taon 55 – 65 Masehi, ima partingkian na mansai dokdok jala na gok sitaonon diadopi angka apostel dohot angka na porsea. Sitaonon na diadopan marhaororan do sian si Nero na mambahen na so uhum tu sude halak Kristen na mian di gomgomanna songon i pasahathon hata na so tutu maradophon halak Kristen asa tung marutang hosa halak Kristen. Ido umbahen dipaluar ma patik asa dilele, ditangkup, dihurung jala ingkon dibahen hansitan saluhut halak Kristen songon i angka apostel. Alai saluhut na masa i ndang na boi pasohon manang mangorui hiras ni roha angka apostel mambaritahon Jesus Kristus, Anak ni Debata Jahowa ima saluhut parngoluan ni Jesus Krsitus uju na mian dope Jesus i di portibi on, nang pe sai adong do deba halak Kristen mananggalhon haporseaona asa malua ibana sian sitaonon dohot parungkilon na pinamasa si Nero tu nasida. Di sitaonon na mansai hansit i lam marhiras ni roha ma angka apostel laho mambaritahon barita hamuabon ni roha; barita haluaon ima barita ni Jesus Kristus asa lam tu toropna angka na porsea jala manghatindanghon tutu do Jesus Kristus ima Tuhan (bdk. Pilippi 2: 11) sian Jerusalem sahat tu luat tano on (ida. Mat. 28: 19; Luk. 24: 47; Ul. Apostel 1: 8).

            Sahat ma barita na uli i tu huta Rom (ibukota kerajaan Romawi) na dibaritahon si Simon Petrus. Di tingki pambaritahonon i ma disurathon si Markus angka na binarithon si Petrus i dalan laho mangapuli, mampargogoihon jala patoguhon haporseaon ni halak Kristen di na mamolus ragam na masa di hasiangon on. Deba sian barita na dibaritahon jala na diajarhon si Petrus tu si Markus ima taringot panandaion na tangkas taringot hadirion ni Jesus Kristus i sandiri. Laos i ma jamita di minggunta sadari on.

            Di tonga pardalanan ni Jesus rap dohot angka sisean i ima mardonokhon Kaesarea Pillipi, ro do sungksunsungkun Jesus tu angka siseanNa: ise do Ahu didok halak? (ay. 27). Sungkunsungkun on ndada na laho manguji angka sisean taringot ise do hadirion ni Jesus di angka jolma, ala nunga tung godang angka tanda halonganan na binahen ni Jesus songon na niida angka sisean; tung godang manangihon pangajarion ni Jesus taringot harajaon ni Debata, taringot ngolu na marhadaulaton songon i habaranion ni Jesus pasingothon angka malim asa saluhut angka malim mangulahon ulaon hamalimon i di bagasan hasintongan dohot hatigoran ni Jahowa Debata. Laos dialusi angka sisean i ma Ibana: adong mandok: si Johannes pandidi, na deba mandok si Elia, manang sahalak sian angka panurirang i do (ay. 28). sude pandapot na gabe alus ni angka sisean ima panandaion di pardagingon, panandaion na hombar pingkiran dohot na nihirim nasida ima taringot haluaonnasida sian panggomgomion harajaon ni Rom.

            Marhite alus ni sisean di ay. 29 on torop do jolma na mananda Jesus songon panurirang bolon songon na panurirang naung adong di padan na robi isarana: Elia. Sahalak panurirang na boi papitahon ngolu hadaulaton ni halak Israel maradophon parsombaon tu Ba’al jala panurirang naung disuriranghon si Maleakhi (ida Mal. 3: 23). Sahalak panurirang na barani pasingothon si Ahab, raja Israel (Samaria) ala ni pengaruh Isebel, halak Sidon manang Penesia songon i dohot parsombaon tu Ba’al, debata ni Sidon manang Penesia, songon i nang angka tanda halonganan na hea masa dipatupa Jahowa marhite si Elia isarana: taringot sagusagu dohot miak ni sahalak ina na mabalu di Sarpat dohot na pangoluhon anak sasadasana (1 Raja. 17). Manang songon si Johannes pandidi na barani pasingothon si Herodes (Luk. 3: 19) dohot mambaritahon barita hamubaon ni roha tu halak Jahudi di sunge Jordan. Panandaion dohot panghirimon sisongon i do panandaion dohot panghirimon torop halak tu Jesus Kristus. Elia dohot Johannes ima sitotas dalan (pembuka jalan, perintis) dalan tu Mesias manang Sipalua songon naung dipasuriranghon angka panurirang di padan na robi, ndang sahat dope panandaion nasida na tutu do Jesus i Mesias manang Sipalua, ima hagogok ni panurirangon angka panurirang manang hataridaan songon na dibaritahon ni si Johannes (ida Mark. 1: 7 – 8).

            Udutna, di ay. 29 diulakhon Jesus manungkun paduahaliion tu siseanna na mandok: “Ia hamu, ise ma Ahu didok hamu?” sungkunsungkun paduahon on marasing do sian sungkunsungkun na parjolo. Disungkunsungkun paduahonon ima panandaion na tangkas angka sisean taringot Jesus, Gurunasida. Jala dialusi si Petrus ma mandok: “Kristus (hata Heber: Mesias) i do Ho!” (patudos Mat. 16: 16; Luk. 9: 20). Alus ni si Petrus on ima alus na tegas jala dang adong ganggu manang alus na asal ima alus ni si Petrus i. Hata Kristus di pangantusion ni halak Jahudi ima sahalak na nimiakhan marhite miak na hushus jala sahalak na istimewa. Keisimewaan ni mesias manang Kristus di halak Jahudi ima taringot ulaonna dohot parsuruon na hushus. Somal do di halak Jahudi angka malim mamiakhi sahalak na ditodo, dipillit laos pabotohon ibana ma mesias. Mesias di pangantusion ni Jahudi ima sahalak na gabe raja manang malim jala pangusean miak na hushus di simanjujung sasahalak ima hataridaan hagogok ni Tondi ni Jahowa di ibana. Ndada miak i mambahen sasahalak gabe istimewa alai Tondi ni Jahowa na niusehon tu ibana. Ala ni i, molo naung digohi Tondi ni Jahowa, tontu saluhut parngoluonna dohot parulaonna ima mangulahon saluhut ulaon na gabe halomoan i Debata.

                Marasing do hamesiason ni Jesus sian pangantusion hamesiason na niantusi halak Jahudi. Ndada marhite jolma Jesus dipapatarhon gabe mesias, ndada halak na mamillit manang manodo dohot mangusehon miak tu simanjujung ni Jesus, jala ndada jolma na manotophon (melantik atau mengangkat) Jesus gabe mesias. Alai Jahowa Debata, Ama ni Jesus Krsitus. Ndada aek na nididihon si Johannes pandidi gabe pengesahan hamesiason ni Jesus jala papatarhon hagogok ni Tondi Jahowa di bagasan Jesus Kristus, alai Jahowa Debata, Ama ni Jesus Kristus i do, ndada sian hajolmaon ni si Johannes maningtinghon na tutu do Jesus Anak ni Debata alai Jahowa Debata i sandiri do (Luk. 3: 22; Mark. 1: 11). Tutu do Jesus ima Kristus manang Mesias, alai ndada songon pangantusion ni halak Jahudi hamesiason ni Jesus, ima na gabe raja jala sipalua halak Jahudi sian panggomgomion harajaon ni Rom jala paluahon halak Israel sian penjajahan ni harajaon ni Rom. Ndada laho manggohi na piningkiran ni halak Jahudi hamesiason ni Jesus, lobi sian i tahe ima paluahon saluhut jolma sian parhatobanon dohot penjajahan dosa dohot hamatean na jorbut i; ndada laho pajongjonghon harajaon songon harajaon na adong di portibi on anggo hamesiason ni Jesus, alai pajongjonghon harajaon ni Jahowa Debata manaluhon saluhut harajaon na adong di hasiangan on; ndada papatarhon raja songon hasomalan Jahudi na singkop di alat parporanganna, alai papatarhon na tutu do Jesus, Raja ni saluhut raja, jala Tuhan di saluhut angka tuhan, na manggomgom sian na manongtong sahat ro di na manongtong. Jesus Kristus ima hagogok ni na nihatahon ni si Johannes, na gabe Panggomgom jala Panguhum na sintong (Mark. 1: 7 – 8).

                Dipopai Jesus do angka sisean asa unang pintor dipaboaboa tu torop jolma. Ndang dapot dope tingkina tarjalo jolma i Jesus gabe mesias manang Kristus hombar tu sangkap haluaon na disangkapi Jahowa Debata. Molo pe tarbarita Jesus na tutu Mesias manang Kristus pangantusion dohot panandaion na hombar tu pardagingon do. tarlumobi na ingkon manaon sitaonon na porsuk, pola mate tarsilang alai hehe do di ari patoluhon.

 

Hahonaan ni Turpuk

                Di minggu XII dung Trinitatis on, boha do panandaion dohot panghatindangionta taringot Jesus, Anak ni Debata? Autsugari disungkun: “tutu do hita mananda Jesus i?” Adong na mandok, hutanda hami do! ai molo so hutanda hami boha do hami manghatahon taringot Ibana? Alai molo diuduti muse sungkunsungkun, molo na ditanda do Jesus i, boha do panandaionta taringot Ibana? Torop do jolma mananda taringot Jesus songon:

1.       Pangobati/ dokter: halak na marsahit do ro tu dokter, ima gombaran ni jolma na mangalului, joujou, olo ro tu Jesus manang pasahathon dirina tu Jesus holan di tingki haringkotna. Molo masa parsahiton, sitaonon, parungkilon manang ragam panaritaan disi do ibana naeng ro tu Jesus. Laos marpadan: O Jesus, asi rohaM, pamalum ma ahu, urupi ahu, palua ma ahu. molo malum jala malua do au sian sahithon, molo malua au sian sitaonon dohot parungkilon on lam jonok ma ahu tu Ho, ringgas ma ahu mandohoti parmingguon manang partangiangan. Alai molo lam posi do na niaena i dilului do dalan na asing na boi paluahon ibana sian i sude. Molo malua sitaonon, parsahitonna disi ma ibana ndang ro be tu Jesus jala dang diingot be padanna i, dung hipas jala malua sian sitaonon dohot parungkilon laho do tu mall, tu pantai, liburan, tu lapo, huria i pe dang diingot songon i nang partangiangan na dipatupa.

2.       Tokoh manang sahalak na terkenal: ima halak na holan mananda taringot ni Jesus songon panandaionna tu sahalak tokoh manang halak na ditanda torop jolma. Isarana Ir. H. Joko Widodo, molo didok: ditanda hamu do ibana? Pintor ro do alus: hutanda do ibana. Walikota Solo, Gubernur DKI, jala Presiden na papituhon di Indonesia on. Toho do jala sintong do alus i. Panandaionta taringot Jesus: Tubu sian si Maria na gabegabean sian Tondi Parbadia; Mesias; na boi pangoluhon naung mate; na mate di hau pinarsilang; na mulak mangolu di ari patoluhon; manaek tu surgo...dna. Alai holan parbinotoan do i panandaionna ala na niajarhon angka pangajari; jamita na dibege; ninna tu ninna.... dna. Tung so adong sihol rohana laho rap marsaor dohot Jesus Kristus marhite parmingguon, partangiangan, manangihon hataNa, jala na pasahathon dirina hibul tu Jesus Kristus.

3.       Sahalak ahli ekonomi manang multi tasking person: ima halak na mambahen Jesus i holan laho manggohi na ringkot ni ngoluna nang dagingna. Isarana: molo na mananda Jesus naeng ma mamora, marpangkat, dapot hundulan di hasangapon. Ido umbahen molo masa  partingkian mamillit caleg manang calon uluan manang partogi di sada luat na so hea ro tu Huria pintor tompu ro do ibana tu Huria asa ditangianghon jala dipillit, dilehon ma hepengna gabe hamauliateonna tu huria songon ingotingot tu ruas i. Molo talu ibana, pintor di sogo rohana tu huria i jala ndang hea be ro tu parmingguon manang tu partangiangan. Songon i do molo monang pe ibana, pintor dang ingot be ibana na marhuria dohot na marTuhan Jesus.

4.       Ahli sullap, ima halak na mangantusi Jesus disi dipangido na ringkot tu Jesus, disi ma nian pintor rade. “bimsalabim” na dipangido di tangiangna ingkon masa songon na dipangido i jala pintor hatop ma masa. Molo so masa, didok ma pargabus jala gabe mandele.

 

Boha do hita nuaeng mananda Jesus i gabe Kristus manang Mesias? Di Minggu XII dung Trinitatis patandahon hita taringot Jesus ima Kristus manang Mesias. Ndang na gabe paluahon jolma i sian hapogoson di pardagingon manang di arta, ndang na holan paluahon jolma i sian sitaononna. Alai di ginjang saluhutna: dipalua do hita sian angka hagiot dosa dohot ihotihot ni dosa dohot hamatean salelengna. Panandaionta taringot Jesus ingkon sahat do tu manghatindanghon nang panghangoluhonhon taringot Jesus. Manghaposi Ibana, jala pasahathon hadirionna gabe ampuna ni Tuhan Jesus. Manang aha pe na masa di parngoluan on na so tupa jumpa pandeleon di panghobasionna manang di ulaonna na denggan i. Ala Jesus i do na gabe pangondingan manang partanobatoan jala na so tupa meret asi ni roha dohot bagabaga i sian hita molo marsihohot hita manghaposi Tuhan Jesus i. Marsangap ma Jahowa. Amen.

 

BAHAN JAMITA EVANGELIUM MINGGU OKULI, 12 MARET 2023: MAZMUR/ PSALMEN 95: 1 - 11

 BAHAN JAMITA EVANGELIUM
MINGGU OKULI
Minggu, 12 Maret 2023
PSALMEN 95: 1 – 11

MANOMBA DEBATA SIAN NASA ROHA

Pdt. Daniel Bonardo Pane, M.Th.

Patujolo

            Horas! Somba ma Jahowa Debatanta, amen haleluya! Sitompa langit dohot tano on ro di isina, amen haleluya! Beta hita marsinggang di joloNa, amen Haleluya. Ala ni denggan ni basaNa tu hita, amen Haleluya. Nda tama endehononta patuduhon parsombaon dohot pamujionta tu Jahowa disiala saluhut angka pambahenanNa di ngolunta sian na sorang hita tu portibi on sahat tu sadari on. Ragam do naung itabolus di hasiangan on alai tung na so hea dipasombu Jahowa hita punjung mangadopi dohot mamolus saluhutna i. Turpuk jamita minggu on manaringot parsombaonta tu Jahowa, Debata na sun badia. Parsombaon na songon dia do na ditaringoti turpuk jamita on? ai ndang na saluhut parsombaon hape gabe dihalomohon Jahowa sian hita? Asa antus mangalusi saluhutna i, masuk ma hita tu hatorangan ni turpuk

 

Hatorangan Ni Turpuk

            Turpuk jamita on ima ende ni parpsalmen na masoarahon panjouon asa marsomba tu Jahowa Debata. Dipanghilalahon parpsalmen on do gogo manang huaso ni Jahowa nang pangaramotion ni Jahowa di ngoluna. Di ayat 1 – 2 disosohon do asa mangendehon Jahowa jala mangolophon Partanobatoan ni hatuaon. Marende ima ulaon na pabotohon na di bagasan rohana marhite nada asa halak na mambege, mamboto jala mangantusi dia do lapatan manang tona na dipasahat marhite ende i. Mangendehon Jahowa jala mangolophon partanobatoan ni hatuaon ima sada panindangion na mansai bagas taringot parsaoran jala panandaionna tu Jahowa, Debatana. Hata mangendehon Jahowa ingkon do hata na haruar sian ateatena jala na manghatindanghon pandonganion ni Jahowa di ngoluna. Jala marhite i halak na mambege manang na manangihon hata ni ende i mangantusi tona ni hata ni ende i jala marhite i lam ditanda nasida ma Jahowa, Debata.

            Aha do alana umbahen parpsalmen mangolophon Jahowa? Diparhatopot parpsalmen do taringot huaso dohot gogo ni Jahowa, Debata na dihaporseana. Di ayat 3 – 5 dibaritahon do ulaon ni Jahowa, Debata na manompa saluhut nasa na denggan sian na so adong gabe adong. Jahowa do nampuna saluhut jala na mangatasi angka debata na adong di portibi on. Torop do angka debata na di portibi on tarlumobi uju panurat ni turpuk on na ganup bangso adong do debatana jala bangso i mambahen debatana hombar tu na ringkot di bidang ni ngolunasida. Molo bidang partanian adong ma debata na hombar tusi, songon i do di bidang na asing. Jala dibahen nasida do debata i hombar tu na dihaporluhonnasida. Alai anggo Jahowa ima Debata ima Debata na so ditompa tangan ni jolma jala Debata na so dibahen hombar tu pingkiran ni jolma. Jahowa, Debata do nampuna jolma i dohot na tinompana, jala sude debata na dibahen angka jolma adong di toruNa. Guru di Jahowa do punsu ni angka dolok na marpardomuan tu inganan ni angka panombaon sude angka bangso tu debatana. Tutu ma Jahowa do Debata Pargogo na so hatudosan, jala Ibana do Raja nasa na tinompaNa, jala guru tu Ibana do saluhutna.

            Molo songon i do gogo ni Jahowa, Debata mansai tama ma hita manungkap dohot marsomba, marsinggang tu jolo ni Debata na manompa hita. Ibana do Debatanta jala hita ma bangso pinarmahanNa, jala birubiru ni tanganNa. Sadari on, aut ditangihon nian soaraNa i! Hata “sadari on” paboahon unang be marnalemba, unang be gok sidalian, unang be mandok haduan ma i, manang jolo adong tingki. Sadari on, ima partingkian saonari (segera) manangihon pangontangna, manangihon panjounNa marhite saluhut hata dohot pambahenanNa. Parmahan na di tanganna adong tungkot dohot linsinglinsing asa sude angka na pinarmahanNa ndang adong na mandao manang lari sian na dihalomohon ni Jahowa. Ndang dihalomohon Jahowa angka na pinarmahanNa mago alai sai dilului jala diajar do angka na pinarmahanNa i asa hot jala mian di panggomgomanNa. Nang pe mansai maol do diantusi dilapatai torop jolma taringot Jahowa na gabe parmahan di ngoluna di ragam na masa di ngoluna.

            Parpsalmen paingothon angka pangalaho ni halak Heber/ Israel na mansai tangkang uju di Meriba songon ari uju masa pangunjunan di halongonan. Pangalaho na masa di Meriba boi do itaida di 2 Musa 17: 1 – 7 na manggombarhon parange na so mandok mauliate di sude pambahenan ni Jahowa di ngolunasida. Parange na so adong pos ni roha di pandonganion dohot panarihonon ni Jahowa di ngoluna. Sai jotjot do roha biar, holso dohot parange na sai marungutungut. Parange ni hatoban na so mananda haluaon jala ndang mangalapati pandonganion manang parmahanion ni Jahowa ni ngoluna. Parange ni hatoban na mansai tonggi di parhatobanon na marhapatean tu hamagoan, jala ndang sahat tu hapatean ni tano na niuarihon Jahowa tu nasida. Dang adong na sahat sundut na haluar sian parhatobanon ni Misir hinorhon ni pangalaho manang parangenasida na sai marungutungut jala ndang adong roha na unduk tu Jahowa asing ni si Josua dohot si Kaleb (ida 4 Musa 14: 29 – 30). Hinorhon ni ungutungut jala ganggu ni roha boi do mambahen jolma i ndang be tangkas manghilalahon pangaramotion dohot panarihonon ni Jahowa di ngoluna. Laos tubu ma parange na holan menuntut.

 

 

Refleksi – Teologi

            Adong do na mansai ringkot siputihon sian turpuk jamita on:

1. Turpuk Jamita on manosohon hita asa sai tongtong hita marhatopothon gogo manang huaso ni Jahowa na mangatasi saluhutna. Debata na so ditompa pingkiran ni jolma, alai Debata na manompa jolma.
2. Itahangoluhon ma pangaramotion dohot panarihon ni Jahowa di ngolunta. Molo aut sugari boi itabilangi sude pambahenan dohot panarihon ni Jahowa Debata di ngolunta, ra ndang hasuhatan jala ndang tarhabilangan saluhutna. Ndang tarasam sude denggan basa ni Jahowa. Molo songon i, tama ma nian hibul dirinta manomba Ibana. Marsomba tu Jahowa ndang boi malua i sian mamelehon hibul dirina gabe ampuna ni Debata, jala mangudut tu parange na unduk di hata ni Debata.
3. Mansai tonggi dame do panghilalan molo boi dipanghilalahon pandonganion dohot panarihon ni Jahowa di ngolunta. Disarihon do ngolunta boi marhosa saonari, dohot ragam pasupasu ni Jahowa. Antong, boasa be adong mian holso, hatahuton mandalanhon ngolu, jala na sai jotjot menuntut na boi mambahen hita ndang sahat tu inganan na naung niuarihon ni Jahowa marhite Jesus Kristus tu angka na satia.
4. Minggu Okuli ima minggu na manjou hita asa mangaranap tu Jahowa Debata (ida Psalmen 121). Mangaranap tu Jahowa tontu adong na ditundalhon. Aha do na ringkot ditundalhon uju mangaranap hita tu Jahowa. Ima bangkobangko na jat, parmusuon, neang ni roha, hadatuon, parungutunguton, hansit ni roha, dohot angka saluhut ulaon na so dihalomohon ni Jahowa (patudos 2 Timoteus 3).
5. Mangaranap tu Jahowa ingkon do sian nasa roha. Marhite panatapon i adong ma parsombaon. Manatap tu Jahowa, Debata na badia jala pargogo na so hatudosan. Sian Jahowa do ro pangurupion dohot haluaon tu hita. Halak na sai tongtong mangaranap tu Jahowa ima halak na marposniroha tu Jahowa, manghirim di angka pambahenanNa na denggan i, marhasatiaon mangulahon na denggan dohot mangurupi angka na gale nang na hurangan. Dapotan gogo dohot tua ma ganup jolma na sai mangaranap tu Jahowa di ngoluna. Amen.

BAHAN JAMITA EPISTEL MINGGU OKULI, 12 MARET 2023: JOHANNES 4: 20 - 26

 BAHAN JAMITA EPISTEL
MINGGU  OKULI
Minggu, 12 Maret 2023
JOHANES 4: 20 – 26

MANOMBA DEBATA SIAN NASA ROHA

Pdt. Daniel Bonardo Pane, M.Th.

Patujolo

            Sude do hita tontu hea mangendehon Buku Ende No. 223: 1: “husomba ho Tuhan, tangihon au. sangkapMu ma tongtong pasaut tu au. Lam ganda bahenon i holong ni rohangki. Sai lam gandai, holong tu Ho”. Boha do hita patuduhon parsombaonta tu Debata, unang gabe marisuang parsombaonta tu Ibana ala ndang apala antus pangantusionta taringot parsombaon na songon dia do na dihalomohon ni Debata sian hita. Torop do halak mangantusi molo nunga dipatupa parmingguon, didohoti partangiangan, dipatupa ragam ulaon ni huria, jala dilehon pe saluhut artana dohot gogona tu huria dang pintor boi dohonon naung dihalomohon Debata saluhutna i gabe parsombaonna tu Debata. Anggo pangantusion ni halak Jahudi, parsomobaonnasida do na tutu jala na sintong tu Debata ala diulahonnasida saluhut ruhutruhut ni parugamoon ni Jahudi na masa di nasida. Diantusi nasida do parsombaon na sintong di Debata molo diulahon di bagas joro na adong di Jerusalem, jala halak na marsomba tu Debata na so di Jerusalem ndang na tutu jala ndang dihalomohon Debata. Masa ma haginjangon ni roha partondion (kesombongan rohani) halak Jahudi.

Hombar tusi do turpuk jamita epistel di minggu on. Ima rangkaian panghataion ni Jesus rap dohot parompuan Samaria. Samaria ima huta na disogohon halak Jahudi, jala dipantanghon Jahudi do jonok, pajumpang manang manghatai dohot halak Samaria. Sai diantusi halak Jahudi do anggo halak Samaria ima halak pardosa jala na so jadi parsidohot tu sangkap haluaon na pinatupa ni Jahowa. Marhite parjumpangan dohot panghation ni Jesus rap dohot parompuan Samaria i, diajarhon Jesus do taringot parsombaon na tutu dohot na sintong jala na dihalomohon ni Debata. Asa lam antus hita mangatusi taringot parsombaon i, masuk ma hita tu hatorangan ni turpuk

 

Hatorangan ni turpuk

             Borhat ma Jesus sian luat Judea tu luat Galilea jala ingkon mamolus luat Samaria (Joh. 4: 3 – 4). Dao ni luat Judea tu Galilea hurang lobi 200 km. Adong do nian dalan na asing sian Judea tu Galilea so pola mamolus luat Samaria. Alai anggo turpuk jamita on dibolus Jesus do luat Samaria on. Molo dipaadop parmusuon na masa di halak Jahudi tu halak Samaria tontu gabe sihataan ma na binahen ni Jesus on di angka halak Jahudi, boasa ingkon dibolus ibana huta i? Sahat ma Jesus tu luat Samaria ima di huta Sikar, huta na mardonokhon ladang na nilehon ni si Jakob tu si Josep anakna i (ida. 1 Musa 48: 22 patudos tu Jos. 24: 32).

            Adong ma di huta i sada sumur ni si Jakob (ay. 6) laos disi ma Jesus maradi naung loja sian pardalanan. Hundul ma Ibana di lambung ni sumur i, tar di hos ni ari ma i (tepat di jam 12 siang, di mana kondisi cuaca di wilayah tersebut sangatlah panas). Pajumpang ma Jesus dohot parompuan Samaria na naeng mambuat mual sian sumur i, laos dipangido Jesus ma mual sian parompuan i. Tontu songgot manang sungkunsungkun do roha ni parompuan Samaria i, boasa ma Jesus halak Jahudi mangido mual sian parompuan na sian Samaria, ima apala musu ni halak Jahudi? (ida Joh. 4: 7 – 9). Somal do nian molo halak Samaria marpungu di sumur Jakob i laho mambuat mual di manogot ni ari asa unang mohopan, jala laos di inganan i ma nasida marsaor huhut manghatahatai taringot na ringkot di nasida. Hape anggo parompuan di turpuk on borhat do tu sumur i di hos ni ari, di na so adong dijumpang ibana angka jolma. Tontu adong do na naeng dipabotohon turpuk jamita on taringot ise do parompuan na nidok di turpuk jamita on. Molo dijaha sude na tarsurat di turpuk jamita on (Joh. 4: 1 - 42) tontu idaonta ma anggo parompuan i diantusi do sahalak sipardosa. Parompuan on nunga lima hali mardongansaripe tu lima baoa, jala baoa na di ibana i nuaeng ndang dongannsaripe i dohononna (ay. 17 – 18). Gabe dipapulik jolma di humaliang ma ibana jala ndang adong na mangantoi ibana. Molo borhat do ibana di manogot ni ari mangalap mual di sumur i, gabe sihataan, dipasiding jala gabe dipaila do ibana. Ido umbahen na borhat parompuan i pukul 12 di hos ni ari, jala na pasti dang adong sahalak na jumpang na disi.             Marhite turpuk jamita on, Jesus manghatahatai dohot parompuan pardosa di sumur Jakob. Sai berusaha do parompuan i manghuphupi hadirionna tu Jesus, hape nunga tangkas ditanda Jesus ibana. Laos marhite panandaion ni Jesus di ibana umbahen tangkas ma panandiaonna taringot Jesus marhite pandohanna: “Tuan, panurirang do Ho huida” (ay. 19). Dung ditanda ibana Jesus i, barani ma parompuan i pabotohon holsona ima taringot parsombaon tu Debata dohot taringot mesias, naung dipabagabagahon panurirang di padan na robi.

            Didok ma di ay. 20 taringot parsombaon na somal naung diulahon angka ompunasida, ima di atas dolok Samaria (ida 5 Musa 12: 5 dohot Psalmen 122), hape halak Jahudi mandok ingkon Jerusalem do inganan parsombaon tu Debata. Dolok na nidok ay. 20 ima dolok Gerizim (ida 5 Musa 11: 29; Jos. 8: 33; Panguhum 9).[1] Hata ni parompuan on marharoroan sian perasaan keingintahuannya taringot inganan parsombaon na sintong jala na dihalomohon ni Debata. Mansai ringkot do peranan ni bagas joro (inganan parsombaon) di partingkian Padan na robi dohot Padan na imbaru, ndada holan inganan parpunguan manang parsaoran laho mamuji Debata na disomba jala dipuji bangso i. Bagas joro ima hataridaan parmianan ni Debata di tongatonganasida, hataridaan ni pangaramotion ni Debata. Ido umbahen ditaringoti didia do inganan partangiangan na sintong na marpardomuan taringot didia do hasintongan parmianan ni Debata di Jerusalem do manang di dolok Germizi, ala panurirang do didok rohana Jesus i (ay. 19).

            Dung i didok Jesus ma tu parompuan i di ay. 21 - 24: “porsea ma ho di Ahu inang”. Alus ni Jesus on mangalehon pangantusion na tontu dohot panandaiaon na sintong taringot Jesus. Ndada holan panurirang Ibana songon na di roha ni parompuan i, alai Ibana do tahe dalan, hangoluan jala hasintongan asa tung antus parompuan i mangatusi Jahowa Debata, ndada Debata na dibatasi holan di sada inganan, ndang na dibatasi rupa marhite angka ganaganaan na dibahen ugamo na asing, ndada dibatasi suhatsuhat ni pangantusion manang hasomalan na masa, ndada dibatasi angka aturan na dipamasa angka panggomgom portibi on. Andul sian i do saluhutna jala mangatasi saluhutna do hadirion ni Debata. Singkop situtu do hadirion ni Jahowa ima hamuliaonNa, huasoNa, panggomgomionNa dohot saluhut angka haluan na binahenNa di bagasan Jesus Kristus. i do umbahen didok Jesus: “porsea ma ho di Ahu inang”. Ndada holan gabe sada panurirang haroro ni Jesus tu portibi on, alai marhite Ibana do patar do hadirion ni Debata.

            Na ro ma tingkina, gabe ndang pola be dolok an manang Jerusalem partangiangan tu Ama i (ay. 21). Ama na nidokna dison ima Jahowa (YHWH: Debata Panompa langit dohot tano on, huaso dohot harajaonNa mangatasi saluhut huaso dohot harajaon na adong di hasiangan on; na manggomgom sian hatongtongon sahat tu hatongtongon). “Disomba hamu do na so binotomuna; huboto hami do na husomba hami, ai bangso Jahudi do haroroan i haluaon” (ay. 22).  Sekilas pandang Yesus mengkritik dan menegor sistem peribadahan yang dilakukan oleh orang Samaria. Dipatupa halak Samaria partangiangan di dolok Germizi alai ndang apala tangkas ditanda jala dibotonasida taringot hadirion ni Debata na disomba nasida. Ala holan hasomalan sambing do diulahonnasida parsombaonnasida i. Dipahombar muse tu angka naung masa di halak Samaria naung masa kawin campur tu bangso na so mardebatahon Jahowa.[2] Hata ni Jesus di ay. 22 dipahombar ma tu Jes. 2: 3 ima taringot Sion dohot Jerusalem na gabe hapatean parsombaon ni sude bangso. Marrongoman ma angka bangso ro sian luatnasida nangkok ma tu dolok Sion dohot Jerusalem jala sian i ma didapotnasida pangajarion, uhum dohot hasintongan ni Jahowa Debata, jala i do na dipeop halak Jahudi sahat tu partingkian ni Jesus di turpuk jamita on.

            Di ay. 23 didok: “alai na ro ma tingkina jala nunga ro i nuaeng.” Hata “alai” marlapatan marasing manang maralo tu naung dihatai na salpu (ay. 22). Ro ma tingkina jala nunga ro i nuaeng. Hata i, pabotohon na ro ma tingkina jala nunga ro tingkina dang be dibatasi inganan (dolok Gerizim manang Jerusalem) inganan parmianan ni Jahowa Debata mangaramoti bangsoNa. Halak na martangiang tu Jahowa, Debata ima halak na mian di bagasan Tondi dohot hasintongan ima angka partangiang na tutu tu Jahowa Debata jala songon i dipangido Ama i sian angka sipartangiang. Tondi do anggo Debata (hata Gorik didok: pneuma ho Theos) (patudos tu 1 Musa 1: 2) na marlapatan anggo Jahowa Debata ima Debata na mangolu, na marnida, manangihon jala na patupahon haluan tu sude angka na tinompa. Tondi do Jahowa Debata na so boi dipenjara atau dibatasi holan di sada inganan di sada rupa. Tondi do Jahowa Debata na manggohi saluhut inganan na adong di portibi on, Tondi do Jahowa Debata na manggohi roha dohot pingkiran, Tondi do Jahowa Debata na manggohi saluhut angka na masa. Jala halak sipartangiang ingkon do martangiang di bagasan tondi dohot hasintongan (hata Gorik didok: aletheia). Hasintongan na didokna dison ima hasintongan ni Jahowa Debata, ndada hasintongan ni jolma manang hasintongan na adong di portibi on. Hasintongan ni Debata ima hadirion ni Jahowa, Debata Pargogo na so hatudosan, hataridaan pamarentaon (pemerintahan) ni Jahowa, asi ni roha dohot holong ni roha ni Jahowa.

            Dung didok Jesus di ay. 21 – 24, didok parompuan i mandok Jesus: huboto do, na naeng ro Mesias na margoar Kristus, ia dung ro Ibana, baritahononna do saluhutna i tu hami (ay. 25). Padan taringot haroro ni mesias sahat do tu halak Samaria. Marlapatan ndada holan tu halak Jahudi taringot haroro ni mesias, sahat do tu halak Samaria jala tu sude bangso. Pangantusion halak Israel (Samaria dohot Jahudi) mesias ima sahalak na nimiakhan (diurapi dengan minyak yang khusus, minyak yang khas) gabe sahalak raja, panurirang, manang malim di bagasan ulaon naung ditontuhon tu ibana. Mesias naung dibagabagahon di padan na robi ima sahalak na boi paluahon Israel (Samaria dohot Jahudi) sian panggomgomion ni bangso na manggosagosa parngoluannasida (dalam hal ini adalah kerajaan Romawi) jala sahalak na pinillit ni Jahowa gabe pardengganan parsaoran (padamehon) Samaria dohot Jahudi.

Dung i  didok Jesus ma tu parompuan i: “Ahu do i, na manghatai dohot ho” (ay. 26). Alus ni Jesus di ay. 26 on ima penegasan taringot hadirionNa. Ibana ma Mesias naung dibagabagahon angka panurirang di padan na robi. Hamesiason ni Jesus ndada hombar tu pangantusion ni halak Jahudi manang Samaria. Lobi sian pangantusion ni halak Jahudi dohot Samaria taringot hamesiashon ni Jesus. Jesus i do Mesias. Ibana do dalan i, Ibana do hasintongan i, Ibana do hangoluan. Ndang adong na boi sahat tu Ama i (ima Jahowa) ia so marhite Jesus Kristus (patudos Johannes 14: 6). Jesus do Mesias na paluahon jolma i sian parhatobanon ni dosa dohot soropna ima hamatean salelenglelengna; Jesus do Mesias na padamehon jolma i dohot Debata Ama songon i padamehon jolma dohot donganna jolma; jala Jesus do hagogok ni hadirion dohot sangkap haluaon ni Jahowa Debata.

 

Hahonaan ni Turpuk

            Masuk ma hita tu Minggu Okuli na marlapatan sai tongtong mangaranapi matangku tu Jahowa. Mangaranap do hita mangido asi ni roha dohot holong ni roha tu Jahowa. Marhite turpuk jamita on dipaingot do hita taringot pangaranapionta tu Jahowa songon hataridaan parsombaonta Jahowa. Mangaranap mangido panumpahion ni Jahowa di ngolunta, di na mamolus ragam angka naung dohot na naeng masa di ngolunta ganup. Sai ditumpahi Jahowa ma hita gogo, habisukhon dohot pangantusion na tangkas taringot saluhut pambahenan ni Jahowa di ngolunta. Di minggu okuli on dipaingot do hita tu ende Psalmen 121: 1: “sai mangaranapi do matangku dompak angka dolok: sian dia do ulaning ro pangurupion tu ahu? Laos dialusi di ay. 2: “sian Jahowa Sitompa langit dohot tano on sambing ro pangurupion ianggo tu ahu.

            Marhite turpuk jamita epistol di minggu Okuli on diajarhon do hita ndang tu dolok be hita mangaranap alai tu Jahowa Debatanta do naung patar hadirionna singkop di bagasan Jesus Kristus. mangaranap mangido pangurupion dohot panumpahion di saluhut ingananta be. Mangaranap do hita tu Jahowa Debata mangidohon pandonganion, gogo, bisuk, pangantusion songon i nang angka na denggan sian Jahowa Debatanta, asa didongani, dipargogoi, diparbisuki hita di parngoluanta. Pangaranapionta tu Jahowa ndang na dibatasi di sada tempat, di sada rupa ala dang terbatas anggo Jahowa Debatanta. Hata on ndang na mandok asa ndang ringkot hita borhat tu gareja manang tu parsaoran partangiangan Kristen; ndang na mandok asa padoahon diri sian parsaoran. Alai turpuk jamita on mangajarhon tu hita hadirion ni Jahowa na manggohi saluhut inganan di sude inganan dohot tingki.

            Pangaranapionta tu Jahowa dos do lapatanna i tu parsombaonta tu Jahowa di bagasan Jesus Kristus. Parsombaonta tu Jahowa naeng ma sian nasa roha, unang mardua ni roha, jala unang ganggu. Parsombaonta tu Jahowa Debata ingkon do di bagasan Tondi dohot hasintongan. Margabus do jolma molo didok di bagasan hasintongan do ibana martangiang hape angka gabus, hata manggang dohot hata parbolatbolatan do haruar sian pamanganna; margabus do jolma molo didok martangiang di bagasan hasintongan molo dibaen do angka na so uhum tu angka donganna na gale, jala ndang diharingkothon uhum na sintong; margabus do jolma molo didok martangiang di bagasan hasintongan alai ndang olo ibana marasiniroha tu angka na hurangan. Ala ni i, songon hataridaan parsombaonta na sintong, di bagasan hasintongan ingkon boi do patar manang tarida marhite panghataionta manghantindanghon hasintongan, hatoguan ni uhum, pangurupion, ulaon parasinirohan, jala marsiadu laho patupahon angka na dengan. I do parsombaon na dihalomohon ni Jahowa sian hita. Pos ma rohanta sai diparbisuhi Jahowa ma hita laho patupahon parsombaon na tutu manang na sintong. Amen.

 

---

[1] Sedikit penjelasan mengenai pertikaian tempat ibadah orang Samaria dengan Yahudi. Kelompok Yahudi dipahami yaitu mereka yang tetap memegang teguh Hukum Taurat dan ikut terbuang ke wilayah kerajaan Babel selama masa pembuangan. Orang Yahudi memandang orang samaria sebagai orang pendosa, yang tidak layak menerima keselamatan dari Allah. Orang Yahudi dipahami sebagai bangsa yang layak disebut umat Allah sebab mereka memegang teguh Hukum Taurat dan perayaan hari besar agama mereka. Berbeda dengan orang Samaria, di mana mereka yang tetap tinggal di Samaria dan telah melakukan kawin campur. Mereka tidak lagi merayakan perayaan agama mereka seperti Paskah. Itulah sebabnya sesudah kembalinya orang Israel dari tanah pembuangan mereka dan kembali ke Yerusalem, mereka sangat yakin bahwa merekalah yang mewarisi janji keselamatan yang diwartakan oleh nabi – nabi pembuangan, dan kondisi mereka pun dipulihkan melalui pembangunan kembali bait suci di Yerusalem. Yerusalem yang dipahami sebagai tempat kediaman Allah hanya boleh dipakai oleh orang Yahudi dan ibadah yang benar adalah ketika ibadah itu dilakukan di Yerusalem karena Allah berdiam di sana. Sedangkan bagi orang Samaria, mereka tidak mengakui Yerusalem sebagai tempat ibadah utama, melainkan mendirikan bait suci yang menjadi pusat peribadahan mereka di dekat Gunung Gerizim. Gunung Gerizim mereka anggap sebagai tempat suci pilihan Allah dan di situlah mereka menyelenggarakan ibadah mereka sendiri. Sebagai kitab suci, mereka hanya mengakui Taurat Musa yang disadur sedikit sesuai keyakinan mereka, yang disebut sebagai "Taurat Samaria". Sedangkan kitab – kitab lainnya tidak diakui mereka sebagai kitab suci. Taurat Samaria disusun kurang lebih pada abad II atau I sM dan pada kitab itulah berisi legitimasi betapa pentingnya gunung Gerizim atau Sikhem sebagai tempat ibadah dan mereka pun menolak Yersusalem sebagai tempat peribadahan yang benar.

[2] Catatan: pernikahan pada zaman Perjanjian Lama dan Perjanjian Baru tidak hanya penyatuan dua pribadi (laki – laki dan perempuan), tetapi juga berhubungan dengan agama atau kepercayaan yang masing – masing. Artinya jika seorang dari bangsa A dengan agama A menikah dengan seorang dari bangsa B dengan agama B maka seorang dari bangsa A tersebut harus ikut menyembah dengan apa yang disembah oleh bangsa B, demikianlah sebaliknya. Jika dihubungkan dengan Samaria yang telah melakukan pernikahan campur maka Samaria ikut dalam penyembahan allah yang disembah oleh bangsa asing. Hal ini dikenal dengan istilah sinkritisme. Maka YHWH disandingkan dengan Ba’al atau Asyera atau dewa yang lain (bdk. 2 Raj. 17: 29 – 30). Itulah sebabnya Yesus mengatakan: kamu menyembah kepada yang tidak kamu kenal.

Bahan Jamita Minggu I Dung Epiphanias: Mateus 3: 13 - 17

 BAHAN JAMITA

MINGGU I DUNG EPIPHANIAS

Minggu, 08 Januari 2023

Ev. Mateus 3: 13 – 17; Ep. Psalmen 29: 1 – 11; S. Patik: 2 Petrus 3: 17 – 18

 

PANDIDION NI JESUS DI SUNGE JORDAN

oleh: Pdt. Daniel Bonardo Pane, M.Th.

Patujolo

            Horas!!! Ala suasana taon baru dope sahat tu tingki on, pasahathonnami ma tu hamu amanami dohot inanami nang saluhut ruas ni huria: selamat taon baru ma tu hita saluhutna. Manghirim ma hita di hatuaon, di panumpahion dohot pasupasu na sian Jahowa Debata, Ama na manongtong di bagasan Jesus Kristus, amen. Di minggu tanggal 8 Januari on masuk ma hita di minggu I dung Epiphanias ala di tanggal 06 Januari do Epiphanias i masa. hata epiphanias ingkon do dipajolo dohot hata Theophany asa singkop pangantusionta haroroanna sian hata gorik na mandok Theophany epiphany na marlapatan hataridaan manang hapapataran ni Debata marhite na adong di portibion, isarana molo sian pangantusian padan na robi ima hapapataran manang hataridaan ni Debata marhite surusuranna di bagasan api na marnalanala di ramba (2 Mus. 3: 2); dipapatar Debata do hadirionNa marhite goarNa: “Ahu nuaeng Ahu sogot” (2 Mus. 3: 14) laos didok: “Jahowa”, Debata ni ompumuna .... i do goarHu ro di salelenglelengna” (2 Mus. 3: 15); Dipapatar Jahowa do hadirionNa marhite ombun dohot patikNa na sampulu i (2 Mus. 19: 16 – 20: 17); dipapatar Jahowa do hadirionNa marhite pangungkapon na masa tu si Jesaya (Jes. 6: 1 – 7), pangungkapon na masa tu si Daniel (Dan. 12: 5 – 13) dohot lan angka na asing na masa di pambaritaan padan na robi. Saluhut hapapataran manang hataridaan ni Jahowa ima patuduhon huaso dohot hahomionNa na so hatudosan, jala marhite huaso dohot saluhut hahomionNa ima hangoluan dohot hatuaon ni Israel, na marDebatahon Jahowa.

            Di pambaritaan padan na imbaru on, dipapatar Jahowa Debata do hadirionNa secara unik dan sangat unik martimbanghon hapapataronna di padan na robi. Dipadan na imbaru on dipapatar Jahowa do hadirionNa songon sada hubungan Ama tu ianakhon. Jahowa do Ama jala Jesus Kristus ima Anak. Boha do ha-Anakhon ni Jesus dohot ha-Amaon ni Jahowa songon na dibaritahon si jamita di minggu sadari on? asa dapot alusna, masuk ma hita tu hatorangan ni Turpuk.

 

Hatorangan ni Turpuk

            Ianggo buku ni si Mateus on ima barita na uli na digurithon si Mateus, jala buku ni si Mateus on ma na umganjang sian tolu buku evangelium na asing (Markus, Lukas dohot Johannes). Si Mateus ima sada sian sisean ni Jesus Kristus na dijou gabe siihuthon Ibana. Andorang so gabe sisean ni Jesus ibana (ima si Mateus) mangula do si Mateus gabe sahalak sijalo beo, ima sada karejo na disogohon halak Jahudi ala dipangantusionasida anggo halak si jalo beo ima horong ni harajaon ni Rom, ima harajaon na menjajah luat Palestina (dohot ma disi luhutan ni luat Israel). Disurathon si Mateus pe barita na uli on ima di na laho mambaritahon taringot Jesus Kristus ima sahalak Jahudi, na mangihuthon hasomalan adat Jahudi jala na mangula di tongatonga halak Jahudi. Sian on botoonta disurathon si Mateus pe surathon ditujuhon do tu halak Jahudi na gabe Kristen dohot halak Jahudi na so jadi Kristen dope asa marhite i marbinoto nasida ise do Jesus naung diparsilanghon halak Jahudi dohot angka sibotosurat ni halak Jahudi i. alai ndang mansohot sangkap haluaon na pinatupa ni Jahowa naung patar di bagasan Jesus Kristus, AnakNa. Ima haluaon ndada dilehon holan tu halak Jahudi alai dilehon tu sude bangso (hata Heber. goyim; hata Gorik: ethne).

            Mateus 3 on dibuhai ma taringot pandidion na pinatupa ni si Johanes pandidi. Ianggo si Johannes pandidi ima ianakhon ni malim Sakarias dohot si Elisabet, ima sisolhot ni si Maria (ida Luk. 1: 36). Tung mansai barani do si Johannes marjamita taringot panguhuman ni Jahowa Debata tu halak Jahudi di sunge Jordan, laos marhite jamitana i do dibaritahon barita hamubaon ni roha. Marroan do halak tumangihon jamita ni si Johannes jala deba sian natorop i rade dididi si Johannes. Hal na imbaru do na masa di sunge Jordan marhite jamita ni si Johannes pandidi i ala sunge Jordan di halak Jahudi diantusi do sunge na boi pamalumhon sahit songon na dipatupa si Elisa tu Naaman (ida 2 Raja. 5: 8 – 14). Mansai longang do torop jolma di na umbege jamita i ala na menggugah roha ni halak na mangihon. Dirimpu natorop i do si Johannes pandidi ima Kristus na dipaima bangso i songon naung disuriranghon angka panurirang di padan na robi (ida Luk. 3: 15).

            Uju na marjamita si Johannes, ro ma Jesus manopot Ibana. Ndada si Johannes Sipalua i manang Kristus i. Ibana do siungkap dalan manang sitotas dalan ni Sipalua i, na paradehon dalan tu Jahowa. dijamitahon si Johannes do asa marhamubaon angka jolma i ai nunga jonok Harajaon ni Debata. Molo didok nunga jonok marlapatan nunga naeng ro jala jonok nama haroroNa. Harajaon ni Debata na songon dia do na nidok ni si Johannes dison ima Jesus Kristus. haroroni Jesus Kristus papatarhon Harajaon ni Jahowa Debata. Jesus ima Hata ni Jahowa naung gabe jolma jala saor tu angka jolma. Jesus ma hasisingkop ni hapapatar dohot hataridaan ni Jahowa Debata sian saluhut angka hapapatar dohot hataridaan ni Jahowa na masa di padan na robi. Dia do harajaon i?

            On ma: dipatandahon si Johannes do hadirionna sandiri tu angka na manangihon jamitana. Ndang olo ibana mamangke partingkian i manangko kedudukan ni Jesus na gabe Kristus manang Sipalua nang pe adong kesempatan ibana mandok na ibana do Kristus i. ditanda do dirina sandiri na holan suruan ni Jahowa Debata paradehon inganan, mangungkap dalan tu Sipalua i, ima Jesus Kristus. Boi do idaonta di ay. 14 turpuk jamita on: “ahu do nian patut didionMu, hape Ho ro mandapothon ahu”. Pandidion ni Jesus Kristus ndada dos songon pandidion ni angka na tardidi dibahen si Johannes ima hamubaon ni roha jala na manolsoli dosa. Jala dialusi Jesus do di ay. 15: “songon i ma jolo, ai tama do tapajongjong nasa hatigoran”. Hata “songon i ma jolo” marlapatan angka na masa i, masa ma jolo alai anggo nuaeng jongjong ma hatigoran i (Gorik: dikaiosune di hata Heber didok Sedeq). aha do angka na masa i? ima uhum naung mapeol jala na so tigor be uhum na masa. angka malim na manghobasi di bagas joro i pe nunga mangulahon uhum na so tigor (patudos tu Luk. 15). Ndada hatigoran ni jolma na naeng dipatandahon di turpuk on, alai hatigoran ni Jahowa Debata. Hatigoran i boi do diterjamahkan gabe haluaon na pinatupa ni Jahowa marhite uhumNa dohot holongNa.

            Sunge Jordan ima sunge na mansai toru jala disi do Jesus didihon si Johannes. Pandidion ni Jesus di sunge Jordan ima songon hataridaan na dipatutoru Jesus do hadirionNa di toru ni saluhut asa marhite i dipatimbo Jahowa ma Ibana sian na saluhut asa saluhut ulu ni tot marsomba tu Ibana (pat. Pilipi 2: 8, 11); hataridaan ni pangoloionNa tu sangkap ni Jahowa Debata. Nunga diboto Jesus aha do na ingkon masa diadopanNa, jala rade do Ibana manaon saluhutna nang pe ingkon sahat tu mate di hau pinarsilang ima panguhuman na mansai toru hian manang panguhuman na mansai jorbut uju i. rade do Jesus manjalo i saluhutna ala pangoloionNa tu Jahowa, Ama na marsuru Ibana; marhite na dipatutoru diriNa dohot na jumpang roha pangolionNa tu sangkap haluaon na dipatupa Jahowa Debata di bagasan diriNa (ima Jesus Kristus) mungkap ma langit jala songgop ma Tondi ni Debata marrupahon pidong darapati. Mungkap langit ima martudutudu tu hata pangungkapon (istilah pewahyuan) ima sada na masa na so boi diida angka natorop alai na boi diida halak naung mandapot pangungkapon. Ise do na boi marnida? Ima si Johannes pandidi dohot Jesus i sandiri. Alai na mijur Tondi Parbadia marhite pidong darapati dohot soara na manghuling sian banua ginjang boi do diida jala ditangihon angka jolma na diinganan i.

            Pidong darapati ima hataridaan hadirion ni Jesus na lidang (tulus). Darapati ima sada simbol hadameon jala dipangke do i gabe pelean hadameon. Molo masa parmusuon, dipangke do darapati laho pabotohon tu angka jolma nunga mardame be nasida na marmusu i. molo dipangke do pangantusion i, nunga di ungkap Jahowa be hadameon tu angka jolma. Ndang talup jolma i mardame tu Jahowa Debata marhite dirina sandiri, laos dilehon pe saluhut artana dohot dirina dang boi jolma i padamehon dirina tu Jahowa. alai Jahowa Debata do manungkap dalan hadameon asa denggan muse parsaoran ni Jahowa tu jolma naung sega i ala ni dosa. Parsaoran na dame na di bagasna adong hasintongan dohot hatigoran ni uhum. Ndang masa be parporangan manang parmusuon alai na masa ima dame (hata Gorik didok: irene). Laos adong ma soara na mandok: “on do Anak-Hu, halomoan ni rohang-Hu do Ibana” (ay. 17).

            Marhite soara on dipataridahon do hasadaon ni Jahowa, Debata na gabe Ama dohot Jesus ima na gabe Anak. Hasadaon na nidokna dison ima ha-Debataon ni Jesus Kristus. Ai Debata do Jahowa, Ama ni Jesus Kristus, alani i do Jesus Kristus ima Debata ala Anak ni Debata do Ibana. Dang boi tarsirang ama dohot anak ai sada do nasida. Ndang adong mantan ama manang mantan anak. Ha-Anakhon dohot ha-Amaon na dipatudu dison ima ndada hombar tu pangantusion pardagingon (biologi) alai hombar tu pangantusion na sian Debata do (divine understanding/ divine wisdom). Ndada jolma na melantik Jesus i gabe Anak ni Debata manang na gabe Debata, ndada sian konsili dohot sidang ni angka halak Kristen na mambehen Jesus gabe Anak ni Debata manang gabe Debata, alai Jahowa Debata sandiri do na paboahon, pabotohon (memproklamirkan, announcement) Jesus do AnakNa jala Jahowa do Ama. Jahowa do Nampuna Hata na gabe daging i, jala Saor tu Jahowa do Hata i jala hataridaan ni Jahowa do Jesus Kristus, Debata na gabe jolma. Hubungan ni Ama tu Anak ima:

1.       Ama na mangondihon Anak jala na so jadi tandinghononNa Anak i (pat. Mat. 27: 46)

2.       Anak ima na mangoli hata ni AmaNa, unduk di parsuruon ni AmaNa (pat. Joh. 17)

3.       Hasadaon ni Ama dohot Anak. Molo dipasangap Anak i dos do i na pasangaphon Ama i, molo ditulak do Anak i dos do i na manulak Ama na marsuru Anak i (ida Luk. 10: 16)

 

Hahonaan ni Turpuk

            Adong do 3 poin na ringkot sipahusorhusoranta marhite turpuk jamita on:

1.       Pandidion na masa tu Jesus Kristus ima patandahon haserepon dohot na olo ibana patutoru diri tu angka saluhut. Ala ni i tama situtu do hita angka naung dididi di bagasan Goar ni Debata Ama, Anak-Na Tuhan Jesus Kristus dohot Tondi Parbadia ingkon patutoru diri tu adopan ni Jahowa Debata. Molo tung adong pe di hita sinamot manang pangkat, hamaloon dohot saluhut na adong di dirinta; molo pe olo hita mangalehon deba sian artanta i jala boi hita mambahen angka na denggan di bagasan huria manang di humaliang unang ma mantat ginjang ni roha di siala ni saluhutna. Unang ma gabe olo hita dipardebatahon jolma ala na olo hita mangurupi. Molo lam adong di hita sinamot lam naek pangkat jala lam ganda siadonganmu lam paserep ma rohanta jala lam tapatutoru ma dirinta tu adopan ni Jahowa.

2.       Marhite pandidion ni Jesus Kristus pabotohon haoloon. Boha pe borat ni na naeng siporsanonhon tu Ibana pola sahat tu na mate di hau pinarsilang dioloi do i, jala unduk do Ibana manaon saluhutna i. Hita angka naung dididi di bagasan Goar ni Debata Ama, Anak-Na Tuhan Jesus Kristus dohot Tondi Parbadia, unang be olo hita mangoloi hisaphisap ni daging dohot portibi na olo salpu on; unang be olo hita dielaela sibolis pangago i. Lam unduk ma hita tu Debata, taoloi ma patik dohot hataNa ai i do hangoluan dohot haluanta. Tutu mansai borat jala dokdok do saluhutna i, alai ingot ma hita dipanjou ni Jesus Kristus: “ro ma hamu ta Ahu hamu angka na loja jala na sorat asa hupasonang hamuna!” (Mat. 11: 28).

3.       Marhite pandidion ni Jesus Kristus papatarhon hadamean dohot hadengganon. Antong Hita angka naung dididi di bagasan Goar ni Debata Ama, Anak-Na Tuhan Jesus Kristus dohot Tondi Parbadia mardame ma jala marsijalangan ma. Nunga ungkap be hadamean i, nunga ungkap pe hadenggan ni parsaoran i. antong mardame ma hita tu angka keluarga, sisolhot, hombar jabu; itapadenggan ma parsaoran i. molo masa na so marsipangkulingan, marsipangkulingan ma di bagasan dame, jala marsisalpuan ma di angka na humurang. Alai itaingot ma ndada sian hadirionta i masa alai na jumolo do Jahowa Debata mangungkap dameNa na sumurung i tu hita asa boi patupaonta hadameon i.

4.       Marhite pandidion ni Jesus Krsitus paboahon na tutu do Jesus Kristus, Anak ni Jahowa Debata, jala halomoan ni rohaNa. Antong Hita angka naung dididi di bagasan Goar ni Debata Ama, Anak-Na Tuhan Jesus Kristus dohot Tondi Parbadia nunga parsidohot be hita gabe Anak ni Debata di bagasan Goar ni Jesus Kristus umbahen na boi hita manjou ale Abba manang Ale Amang tu Jahowa Debata (ida Rom 8: 15; Gal. 4: 6). Antong songon Anak hita, itaoloi ma hata dohot parsuruon ni Debata tu hita marhite angka ulaon naung dipasahatna tu hita. Taulahon ma saluhut angka ulaonta na denggan ni di tongatonga huria, pamarentaon, dohot humaliang ima tanda haoloanta songon sada anak na mangoloi natorasna. Amen.

Angka Ende:

1.       75: 1, 4

2.       72: 1, 5

3.       213: 2, 4

4.       117: 1, 4

5.       476: 1....

6.       71: 3, 6

7.       753: 1.....