BAHAN JAMITA EVANGELIUM MINGGU OKULI, 12 MARET 2023: MAZMUR/ PSALMEN 95: 1 - 11

 BAHAN JAMITA EVANGELIUM
MINGGU OKULI
Minggu, 12 Maret 2023
PSALMEN 95: 1 – 11

MANOMBA DEBATA SIAN NASA ROHA

Pdt. Daniel Bonardo Pane, M.Th.

Patujolo

            Horas! Somba ma Jahowa Debatanta, amen haleluya! Sitompa langit dohot tano on ro di isina, amen haleluya! Beta hita marsinggang di joloNa, amen Haleluya. Ala ni denggan ni basaNa tu hita, amen Haleluya. Nda tama endehononta patuduhon parsombaon dohot pamujionta tu Jahowa disiala saluhut angka pambahenanNa di ngolunta sian na sorang hita tu portibi on sahat tu sadari on. Ragam do naung itabolus di hasiangan on alai tung na so hea dipasombu Jahowa hita punjung mangadopi dohot mamolus saluhutna i. Turpuk jamita minggu on manaringot parsombaonta tu Jahowa, Debata na sun badia. Parsombaon na songon dia do na ditaringoti turpuk jamita on? ai ndang na saluhut parsombaon hape gabe dihalomohon Jahowa sian hita? Asa antus mangalusi saluhutna i, masuk ma hita tu hatorangan ni turpuk

 

Hatorangan Ni Turpuk

            Turpuk jamita on ima ende ni parpsalmen na masoarahon panjouon asa marsomba tu Jahowa Debata. Dipanghilalahon parpsalmen on do gogo manang huaso ni Jahowa nang pangaramotion ni Jahowa di ngoluna. Di ayat 1 – 2 disosohon do asa mangendehon Jahowa jala mangolophon Partanobatoan ni hatuaon. Marende ima ulaon na pabotohon na di bagasan rohana marhite nada asa halak na mambege, mamboto jala mangantusi dia do lapatan manang tona na dipasahat marhite ende i. Mangendehon Jahowa jala mangolophon partanobatoan ni hatuaon ima sada panindangion na mansai bagas taringot parsaoran jala panandaionna tu Jahowa, Debatana. Hata mangendehon Jahowa ingkon do hata na haruar sian ateatena jala na manghatindanghon pandonganion ni Jahowa di ngoluna. Jala marhite i halak na mambege manang na manangihon hata ni ende i mangantusi tona ni hata ni ende i jala marhite i lam ditanda nasida ma Jahowa, Debata.

            Aha do alana umbahen parpsalmen mangolophon Jahowa? Diparhatopot parpsalmen do taringot huaso dohot gogo ni Jahowa, Debata na dihaporseana. Di ayat 3 – 5 dibaritahon do ulaon ni Jahowa, Debata na manompa saluhut nasa na denggan sian na so adong gabe adong. Jahowa do nampuna saluhut jala na mangatasi angka debata na adong di portibi on. Torop do angka debata na di portibi on tarlumobi uju panurat ni turpuk on na ganup bangso adong do debatana jala bangso i mambahen debatana hombar tu na ringkot di bidang ni ngolunasida. Molo bidang partanian adong ma debata na hombar tusi, songon i do di bidang na asing. Jala dibahen nasida do debata i hombar tu na dihaporluhonnasida. Alai anggo Jahowa ima Debata ima Debata na so ditompa tangan ni jolma jala Debata na so dibahen hombar tu pingkiran ni jolma. Jahowa, Debata do nampuna jolma i dohot na tinompana, jala sude debata na dibahen angka jolma adong di toruNa. Guru di Jahowa do punsu ni angka dolok na marpardomuan tu inganan ni angka panombaon sude angka bangso tu debatana. Tutu ma Jahowa do Debata Pargogo na so hatudosan, jala Ibana do Raja nasa na tinompaNa, jala guru tu Ibana do saluhutna.

            Molo songon i do gogo ni Jahowa, Debata mansai tama ma hita manungkap dohot marsomba, marsinggang tu jolo ni Debata na manompa hita. Ibana do Debatanta jala hita ma bangso pinarmahanNa, jala birubiru ni tanganNa. Sadari on, aut ditangihon nian soaraNa i! Hata “sadari on” paboahon unang be marnalemba, unang be gok sidalian, unang be mandok haduan ma i, manang jolo adong tingki. Sadari on, ima partingkian saonari (segera) manangihon pangontangna, manangihon panjounNa marhite saluhut hata dohot pambahenanNa. Parmahan na di tanganna adong tungkot dohot linsinglinsing asa sude angka na pinarmahanNa ndang adong na mandao manang lari sian na dihalomohon ni Jahowa. Ndang dihalomohon Jahowa angka na pinarmahanNa mago alai sai dilului jala diajar do angka na pinarmahanNa i asa hot jala mian di panggomgomanNa. Nang pe mansai maol do diantusi dilapatai torop jolma taringot Jahowa na gabe parmahan di ngoluna di ragam na masa di ngoluna.

            Parpsalmen paingothon angka pangalaho ni halak Heber/ Israel na mansai tangkang uju di Meriba songon ari uju masa pangunjunan di halongonan. Pangalaho na masa di Meriba boi do itaida di 2 Musa 17: 1 – 7 na manggombarhon parange na so mandok mauliate di sude pambahenan ni Jahowa di ngolunasida. Parange na so adong pos ni roha di pandonganion dohot panarihonon ni Jahowa di ngoluna. Sai jotjot do roha biar, holso dohot parange na sai marungutungut. Parange ni hatoban na so mananda haluaon jala ndang mangalapati pandonganion manang parmahanion ni Jahowa ni ngoluna. Parange ni hatoban na mansai tonggi di parhatobanon na marhapatean tu hamagoan, jala ndang sahat tu hapatean ni tano na niuarihon Jahowa tu nasida. Dang adong na sahat sundut na haluar sian parhatobanon ni Misir hinorhon ni pangalaho manang parangenasida na sai marungutungut jala ndang adong roha na unduk tu Jahowa asing ni si Josua dohot si Kaleb (ida 4 Musa 14: 29 – 30). Hinorhon ni ungutungut jala ganggu ni roha boi do mambahen jolma i ndang be tangkas manghilalahon pangaramotion dohot panarihonon ni Jahowa di ngoluna. Laos tubu ma parange na holan menuntut.

 

 

Refleksi – Teologi

            Adong do na mansai ringkot siputihon sian turpuk jamita on:

1. Turpuk Jamita on manosohon hita asa sai tongtong hita marhatopothon gogo manang huaso ni Jahowa na mangatasi saluhutna. Debata na so ditompa pingkiran ni jolma, alai Debata na manompa jolma.
2. Itahangoluhon ma pangaramotion dohot panarihon ni Jahowa di ngolunta. Molo aut sugari boi itabilangi sude pambahenan dohot panarihon ni Jahowa Debata di ngolunta, ra ndang hasuhatan jala ndang tarhabilangan saluhutna. Ndang tarasam sude denggan basa ni Jahowa. Molo songon i, tama ma nian hibul dirinta manomba Ibana. Marsomba tu Jahowa ndang boi malua i sian mamelehon hibul dirina gabe ampuna ni Debata, jala mangudut tu parange na unduk di hata ni Debata.
3. Mansai tonggi dame do panghilalan molo boi dipanghilalahon pandonganion dohot panarihon ni Jahowa di ngolunta. Disarihon do ngolunta boi marhosa saonari, dohot ragam pasupasu ni Jahowa. Antong, boasa be adong mian holso, hatahuton mandalanhon ngolu, jala na sai jotjot menuntut na boi mambahen hita ndang sahat tu inganan na naung niuarihon ni Jahowa marhite Jesus Kristus tu angka na satia.
4. Minggu Okuli ima minggu na manjou hita asa mangaranap tu Jahowa Debata (ida Psalmen 121). Mangaranap tu Jahowa tontu adong na ditundalhon. Aha do na ringkot ditundalhon uju mangaranap hita tu Jahowa. Ima bangkobangko na jat, parmusuon, neang ni roha, hadatuon, parungutunguton, hansit ni roha, dohot angka saluhut ulaon na so dihalomohon ni Jahowa (patudos 2 Timoteus 3).
5. Mangaranap tu Jahowa ingkon do sian nasa roha. Marhite panatapon i adong ma parsombaon. Manatap tu Jahowa, Debata na badia jala pargogo na so hatudosan. Sian Jahowa do ro pangurupion dohot haluaon tu hita. Halak na sai tongtong mangaranap tu Jahowa ima halak na marposniroha tu Jahowa, manghirim di angka pambahenanNa na denggan i, marhasatiaon mangulahon na denggan dohot mangurupi angka na gale nang na hurangan. Dapotan gogo dohot tua ma ganup jolma na sai mangaranap tu Jahowa di ngoluna. Amen.