Bahan Jamita Advent IV, 23 Desember 2012

BAHAN JAMITA

MINGGU, 23 DESEMBER 2012

MINGGU ADVENT IV

MIKHA 5: 1 – 5 (EPISTEL: LUKAS 1: 46 – 55)

oleh: Cal.Pdt.Daniel Bonardo Pane, S.Th.

PARADEHON DIRIM LAHO MANOMUNOMU RAJA I!

Patujolo

            Ragam do dalan ni Jahowa patupahon haluaon, jala torop do jolma maol masuk tu pingkiranna laho mamingkiri taringot dalan ni Jahowa patupahon sangkap-Na, ima sangkap haluaon. Jala nungnga pigapiga dipangke Jahowa parhitean laho patupahon angka haluaon. Isarana, manghatai Jahowa tu si Musa marhitehite api na songgop di duhutduhut, alai duhutduhut i dang adong na tarbangkar, sadari on, turpuk jamita on ima taringot hata ni Jahowa na patupahon haluaon marhitehite huta Bethlehem.

            Huta Bethelehem, ima huta na mansai metmet do di humaliangna, jala boi ma dohonon huta i ima huta na pogos, ala angka jolma na mian di huta i ima halak na berekonomi rendah manang menengah ke bawah. Alai pola do sian on ro Raja Dame, Raja si lehon uas ni angka jolma na marpanghirimon di hata ni Jahowa, jala na so olo mangalaosi angka uhum dohot hatigoran ni Jahowa. Sian bethlehem na metmet i do ro panggomgomion na manghabiari Jahowa jala panggomgomi.

            Dung masa paruhuman tu halak Israel dohot tu Judah, nungnga sai adong angka panurirang na mangalehon bagabaga Jahowa sandiri na paulihon ngolu ni bangso i (israna, deutro Yesaya, Yeremia, dohot na panurat ni turpuk on). Bagabaga on sada tanda do di ganup pangaramotion dohot pandongani on ni Jahowa tu bangso i. Marhite bagabaga i, ro ma sahalak Raja na boi pasombu uas ni na halungunhon bangso i. Laos on ma na disuriranghon ni panurirang di turpok on, taringot haroro ni sahalak Raja.

Hatorangan ni Turpuk.

            Ayat 1 – 3

            Ayat on mansai jotjot do dijamitahon manang dijaha on di ganup ulaon natal. Laos ayat on ma na tangkas patuduhon taringot haroro ni sahalak Raja na naeng manggomgomi bangso saluhut marga bangso Israel. Andorang so turpuk jamita on, nungnga dipabotohon panurirang on taringot hadameon na naeng dipatupa Jahowa tu Sion ima di ariari parpudi (Mi. 4: 1), jala sude bangso na di humaliangna marroan, jala Sion gabe inganan hadamean na manongtong (Mi. 4: 1 – 5). Di tingki maasa paruhuman tu bangso i, nungnga marserak be angka marga ni halak Israel, alai di ari haroro ni Raja i, mulak ma nasida muse jala ndada holan nasida, alai parsidohot do halak bangso na asing marnida angka hinabalga ni huaso ni Jahowa.

            Marhite ayat 1, dipabotohon do sian dia haroro ni Raja na pinarbaga tu nasida. Di ayat 2 tarida do dipasombu Jahowa do hapariron dohot na hansit i songgop tu bangso Israel. Alai di tongatonga na masa i, marsangkap do Jahowa laho paulihon bangso i marhithte haroro ni sahalak Raja gabe panggomgomi di bangso i, panggomgomi na so sian portibi on, alai marharoroan sian Jahowa sandiri. Jahowa sandiri do na pajongjonghon Raja i, ima na sian Bethlehem, bonapasogit ni si Daud. Raja i do na manggomgomi songon sahalak parmahan songon si Daud (Psalmen 78, 70, 72) jala marhuasa sahat tu sandok portibi on (ay. 3).

           

Ayat 4 – 5

            Di ayat 4 dipabotohon do Raja na dibagabagahon i ima Raja Dame. Raja na mangalehon hademakhon tu na ginomgomanna, jala bangso na naeng maralohon tu Raja i, jadi patindanghononNa ma angka pangalo na naeng mambahen alo tu bangso na ginomgoman Raja Dame i. Ganup bangso na maralohon tu bangso i, Raja i sandiri do maniaphon sian portibi on, jala paluahononNa ma ganup jolma na si tongtong digosagosa bangso na asing. Ayat on ma na patuduhon taruli hasonagan do ganup jolma na dibagasan panggomgomion ni Raja on. Raja Dame, na marlapatan ndang adong be disi biar manang hatahuton.

Hahonaan ni Turpuk

            Nungnga masuk be hita tu Minggu Adven IV. Nungnga boha pangaradeon ni dirinta manomunomu Raja Dame i? manang sai tongtong do hita disibuki angka ulaon rutinitas ni ngolunta? Jala nungnga godang be madabu tu salah pangantusion taringot Advent, na sasintongna mambahen ulaon taringot tubu Tuhanta, gabe alit tu tu butuhanta, dohot di angka pangantusion na asing. Molo pe hita nunga adong na mambahen angka gabagaba manang angka hiasan di jabu dohot di ganup huria, alai na umringkot ima rohanta dohot dirinta do manomunomu Kristus paduahalion.

            Olo do lalap jolma di minggu advent holan loja sambing paradehon ulaon Natal, jala umbahen i, gabe mago ma lapatan ni Advent i ma manosoi hita taringot haradeon ni dirinta manomunomu Kristus, ndada holan manomunomu ulaon Natal na naung disangkapi. Boi do hita marhite ulaon Natal hita mengenang jala paingothon panjangkonon ni angka jolma, ala ni kesibukan dohot ulaon rutinitas, gabe dang diboto haroroni Jesus tu portibi on, Raja Dame naung diparbagahon angka panurirang ni Jahowa. Na sai tongtong do hita dos songon halak na adong di Bethlehem na manulak hatutubuan ni Jesus di bagasna, jala laos dilehon do bara ni pinahan?

            Boha do rohanta manomu Kristus na paduahalihon i? na tong dope rohanta i tapelehon inganan parmianan ni Raja Dame songon bara ni pinahan? Taparade ma dirinta manjangkhon Raja i marhitehite roha na ias. Ndang umringkot bagak berengon sian luar hape sega do di bagasan. Taparade dirinta manjangkon Raja Dame i, Ibana ma na padamehon tondinta tu dirinta, padamehon ngolunta. Molo so dame do tondinta dohot ngolunta, aha ma na boi tulus taulahon di portibi on? Ibana ma padamehon natoras tu ianakhon, padamehon na mardongansaripe, padamehon na marhahamaranggi, na martutur dohot na maraleale

            Taparade ma dirinta dohot rohanta laho manjanghon Raja i, asa Ibana na manggomgomi ngolunta, ai taruli hasonangan dohot hagogoon do ganup jolma na di bagasan panggomgomionNa.

Selamat paradehon diri laho manjangkon Raja Dame i

Mardame ma tu Debata

Mardame ma tu tondim dohot tu dirim

Mardame ma tu donganmu

Paloas Raja i manggomgomi ngolunta