Bahan Jamita Epistel Minggu Reminiscere, Johannes/ Yohanes 3: 1 - 17

BAHAN JAMITA EPISTEL

MINGGU REMINISCERE

Minggu, 12 Maret 2017

Nas Epistel: Johannes 3: 1 – 17

HANGOLUAN NA SITUTU DO TU NA MANJANGKON JESUS DI NGOLUNA

Oleh. Pdt. Daniel Bonardo Pane, S.Th.

Patujolo

            Nuaeng masuk ma hita di minggu Reminiscere na marlapatan naeng jonok nama sadar parningotan di asi ni roha ni Jahowa Debata na so boi dipatudos jala na so boi dipasuhat tu manang aha pe di portibi on. Di Minggu Reminiscere on dipapita do hita di angka asi ni roha naung itajalo di ngolunta be. Aut sugari marbilangbilang hita di saluhut asi ni roha ni Jahowa di ngolunta, ra dang hasiatan portibi on mambilangi saluhutna i. Antong di minggu sadari on, aha do na naeng putihononta hata ni Debata marhite panghataion ni Jesus Kristus tu si Nikodemus. Antong itapaihutihut ma hatorangan ni turpuk jamita on.

Hatorangan ni Turpuk

            Molo idaonta na masa (sejarah) di turpuk jamita on ima sada partingkian di na tongtong dope sai tarpaimaima halak Jahudi taringot haroro ni Mesias na boi paluahon bangso i sian harajaon ni Rom. Pangantusion ni halak Jahudi holan pangantusion di haluaon di bidang harajaon ni portibi on, ndada mangalapi taringot Mesias i marhite haporseaonna. Haroro dohot na binahen ni Jesus tu Bagas Joro di Jerusalem mambahen torop jolma longang jala naeng tangkas ma ditanda ise do Jesus i sasintongna? Ai na tutu do Ibana Mesias songon naung leleng dipaima halak Jahudi i, manang dang.

            Sai na adong do tutu na marsogo ni roha molo adong sahalak na mambahen perubahan na ture jala denggan parngoluon tarlumobi ture partondion, jala sai adong do nian na manghalashon di saluhutna. Sada horong na mansogohon angka na binahen ni Jesus taringot hasintongan dohot hatigoran na tutu marhite jamitaNa dohot tanda halonganan na binahen ni Jesus ima horong Parise. Sai dilului do dalan boha asa ditangkup Jesus. Alai sada sian horong ni Parise na naeng tangkas mananda Jesus ima si Nikodemus (ay. 1). Nikodemus ima sada sian horong Parise na tangkas marnida jala manangihon sude angka jamita dohot angka naung dibahen Jesus.

            Ro do si Nikodemus bornginborngin manopot Jesus (ay. 2) boi dohonon na ro si Nikodemus bornginborngin boi do dilapati asa unang diida angka donganna parise ibana pajumpang dohot Jesus. Diparhatopot si Nikodemus do taringot hadirion ni Jesus marhite angka naung niidana dohot naung binegena i. jala dialusi Jesus do hatana i marhite pangajarionNa taringot Harajaon ni Debata, hombar naung jotjot dijamitahon angka parjamita tarlumobi angka parise. Boha do tutu Harajaon ni Debata i? sarupa do i songon angka harajaon dohot huaso na di portibi on? Marnida harajaon ni Debata marlapatan do i mangantusi jala tangkas mangantusi taringot Harajaon ni Debata. Boha do hita mangantusi taringot Harajaon ni Debata i? Marhite alus ni Jesus di ayt. 3 on tangkas do dipabotohon ingkon adong do tubu di ngolu na imbaru.

            Pangantusion ni si Nikodemus taringot tubu di ngolu na imbaru marasing do dohot na naeng niajarhon ni Jesus tu ibana. Boi do idaonta pangantusionna i hombar tu pamingkirionna (ay.4). ndada na gabe pamingkiran dohot pangantusion ni jolma i dipangke mangalapati taringot tubu di ngolu na imbaru, alai lobi sian pangantusion ni jolma i do dipatupa Jahowa dalan asa tangkas jolma i marnida jala mananda dohot mangantusi tangkas taringot Harajaon ni Debata. Aha do sipatupaon? Ndada sian jolma i na patupahon i alai Jahowa sandiri do na patupahon i, siala na so tolap do gogo dohot pangantusion dohot pingkiran ni jolma i patupahon i. “tubu sian aek dohot sian Tondi” martudutudu do i tu hamubaon dohot haiason ni ngolu maradophon Jahowa Debata. Aek dison ndada aek na litok dohot asal aek, alai aek na nidok dison ima aek na tio (air murni dan bersih) na dipangke laho paiashon jala mambahen ias angka na kotor tarlumobi aek na tio mambalongkon angka na kotor di pamatang nang di partondion. Aek di turpuk on ima sada meterai/ tanda sah hita gabe anak dohot ampuna ni Jahowa Debata (marhite pandidion na badia). Tondi dison ima Tondi Parbadia, Tondi pangapuli, Tondi paniroi, dohot Tondi na mangondihon halak na satia tu Jahowa, Ama i. tubu di sian Tondi ima tubu di ngolu na gok haimbaruon, ias sian dosa dohot sian pingkirian na jahat.

            Molo itaida ayat 6 – 7, tanda do adong paraloan ni daging dohot Tondi. Daging na so martondi dohonon do i gabe bangke, molo tondi ndang mardaging dohonon ma i begu. Tudia do lapatan ni ayt. 6 – 7 i? lapatan ni ayt. 6 – 7 ima panghorhononna. Daging mangkorhon do i tu parbue ni daging (hombar tu Galatia 5: 19 – 21), ianggo Tondi manghorhon parbue ni tondi (Galatia 5: 22 – 23). Ringkot do hita ngolu ni pardaging on? Tontu ringkot do i, alai ndada ngolu pardaging on manontuhon ngolu partondion, alai ngolu partondion do na ingkon mangajari hita taringot ngolu pardaging on. Jolma na tubu sian Tondi, parbue ni tondi jala soara ni Tondi i do na ditangihonsa.

            Songon dia tarpajadi i? ido na gabe sungkunsungkun si Nikodemus tu Jesus (ay. 9). Ndang na mangunjungi si Nikodemus di sungkunsungkunna on, alai naeng do lam tangkas antusanna na niajarhon ni Jesus i jala taruli di ibana hangoluan na imbaru i. dialusi Jesus ma sungkunsungkunna i di ayat. 10 – 13. Alus ni Jesus di ayat 10 – 13 i mambungka pingkiran dohot haporseaon ni si Nikodemus taringot Ibana, Na ro sian banua ginjang laho paboahon taringot angka na di banua ginjang. Angka na di banua ginjang ima paboahon Harajaon dohot hatongtongon ni Jahowa, jala paboahon ianggo tano dohot harajaonna na olo salpu do saluhutna. Ndang adong na mamboto tangkas taringot angka na di banua ginjang i, holan Jesus Kristus do ima dalanta lam mananda angka na dibanua ginjang marhite jamitaNa dohot pangajarionNa tarlumboi angka pambahenanNa i.

            Lam tangkas muse pangajarion ni Jesus tu si Nikodemus taringot angka na banua ginjang i ima marhite naung dibahen si Musa na patimbohon ulok di halongonan (4 Musa 21: 4 – 9) songon i do naeng patimboonna Anak ni Jolma i. hata on martudutudu taringot na naeng masa tu Jesus, na dipatimbo Ibana di hau pinarsilang mamboan sada haimbaruon marhite hamamateNa di hau pinarsilang i. jala ganup jolma tu Ibana, Jesus , Anak ni Jolma i dohot ma ibana tubu di ngolu na imbaru jala marhite Ibana tangkas ma idaonta Harajaon ni Debata, ima Harajaon ni holong dohot asi ni roha jala disi jumpang ma hangoluan na situtu. Ima hangoluan na so ra suda (ay. 14 – 15).      Di na ro Jesus, Anak ni Debata ndada laho mamboan paruhuman tu angka pardosa, alai mamboan hangoluan na salelengna asa unang mate jolma i di bagasan dosana be, alai taruli ma di hamubaon ni roha, jala disi ma dapotna hangoluan na saleleng ni lelengna (ay. 16 – 7). Porsea do hita disi? Haporseaon dison ndada holan di hata, alai ingkon dipatuduhon do marhitehite haringgasonna mangoloi jala manghangoluhon panghophopionNa marhite parange na denggan dohot di panombaon. Ha-Anakhon ni Jesus dison ndada haanakhon di pardagingon, alai dipatuduhon do songon ama tu anakna, na holong roha ni ama tu anakhonna jala anakhon na mangoloi amana, jala ha-Anakhon na dipatuduhon Jesus dison paboahon na sian Ama i do Ibana.

Hahonaan ni Turpuk

            Nunga tangkas dipatorang di hatorangan ni turpuk on taringot boha do panandaionta taringot Harajaon ni Debata? Ingkon ringkot do hape hamubaon ni roha. Tutu do hita mangolu di pardagingan on, jala jolma na mangolu ingkon mardaging do. Alai ndang na gabe daging on dohot hagiotna na mangarajai ngolunta tarlumbi hita angka naung porsea di Jesus Kristus. Manjangkon Jesus di ngolunta marlapatan do i manjangkon haimbaruon di ngoluna. Itaingot ma angka dongan, mansai balga do asi ni roha ni Jahowa tu angka jolma na tinompaNa i, ndada holan tu jolma dohot do portibi on taruli di asi ni roha ni Jahowa i. antong boha do hita manjangkon asi ni roha i? nunga patar be holong ni Jahowa tu hita nang tu portibi on di naung mate Jesus jala mulak mangolu muse di ari patoluhon, papatarhon haluaonta dohot hangoluanta. Ndang di portibi on hapatean ni ngolunta, autsugari di portibi on hapateanna marisuang do haporseaonta dohot angka hasatiaonta nang halojaonta ala marujung do saluhutna jala olo salpu do. Alai hapateanta ima na di Banua Ginjang, Surgo Sambulo ni tondinta.

            Antong, di ngolu na di tano on, angka na itaida, na itabege jala na boi itajama unang ma marguru tu na olo salpu hita di ngolunta. Alai marguru ma hita di angka na di Banua Ginjang nang pe mangolu hita di tano on. Turpuk jamita on ndang na mandok ingkon hatop hita marujung sian taon on ala gok hasusaaan tano on, alai mandok tu hita asa tangkas do taringot na itahaporseaon i. ndang be sai mandok na so itaboto taringot Harajaon ni Debata, alai mandok jala manghangoluhon haporseaonta i nang pe ndang itaida, ndang itajama.

            Ndang tolap molo sai gogo, pingkiran dohot pangantusion ni jolma laho mangantusi saluhutna i, alai holan marhitehite Jesus Kristus do. Ndang adong be dalan na asing, nang angka sian horong dohot angka jolma na di portibion. Torop do di portibi on laho patandahon hita dalan hangoluan dohot hasintongan i, alai ndang adong na boi sahat patandahon jala mamboan hita tu hangoluan dohot hasintongan na tutu i. Holan marhite Jesus do boi idaonta tangkas Harajaon ni Debata, dohot hangoluan na sasintongNa, ngolu na manongtong. Itajangkon ma Ibana di ngolunta be asa taruli hita di hangoluan na manongtong i, amen.