Jamita Minggu XV Dung Trinitas, 08 September 2013

BAHAN JAMITA

MINGGU XV DUNG TRINITATIS

MINGGU, 08 SEPTEMBER 2013

EV. MATEUS 7: 15 – 23; EP. JOHANES 4: 31 – 42 (42)

Oleh: Pdt. Daniel Bonardo Pane, S.Th.

Parbuehon Ma Parbue Na Denggan!

Patujolo

            Nunga lam torop be angka jolma na mandok dirina Kristen, hape dang dipatuduhon marhite ngoluna songon sahalak Kristen. Torop do halak Kristen mandok naung mananda Jesus Kristus ima Tuhanna, alai panandaion i holan sebatas mamboto alai dang tangkas mananda. Dia do na patut siparesohon sasintongna?

            Panandaion di Tuhan Jesus, dang boi malua sian panombaon, jala panombaon dang boi malua sian manghaposi, jala manghaposi dang boi malua sian haundukhon, jala haudukhon on dang boi malua sian haoolaon mangulahon lomo ni roha ni Debata, Ama na marsuru Jesus Kristus. Nunga mansai torang jala tangkas halak Kristen mamboto taringot dia do lomo ni roha ni Debata, ima angka hata na tarsurat di bible. Marlapatan ma i, molo mananda Jesus Kristus, ingkon boi do sahat tu mangulaohon lomo ni roha ni Debata. Dang singkop panandaionta di Jesus Kristus molo so adong pangulahononhon. Laos on do na disuarahon ni Jesus Kristus tu angka siihuthon Ibana, nang pe ragam do alana boasa diihuthonnasida Jesus. Sianon ma tanda sasahalak i Kristen manang na dang marhitehite pangulahonna songon tanda parbue ni haporseaonna.

Hatorangan ni Turpuk

            Torop do nian halak na mangihuthon Jesus uju i, alai ragam do alana (latarbelakang) natorop i mangihuthon ibana; adong ma i holan marnida tanda halongangan na naeng di bahen Jesus songon naung dibahen Jesus di Galilea (ida Mateus 4: 23 – 25); adong na holan naeng mananda tangkas ise do sasintongna Jesus i; tertarik umbege hata na disuarahon Jesus; adong na mangantusi Jesus do na boi paluahon nasida sian gomgoman bangso Rom, jala na boi mangalehon haluaon na sasintongna (politik); jala adong muse mangihuthon Ibana holan mangalului didia do hasalaan na binahen ni Jesus.

            Turpuk jamita on ima udut ni jamita dolok ni Jesus Kristus (Mateus 5 – 7), ima jamita las ni roha; barita hatuaon tu halak na niasian Jahowa marhite hadirion ni Jesus Kristus. Jala turpuk jamita on ima sosososo asa manat, dungo taringot tu angka parpoda haliluon; panurirang pargapgap.

            Di tongatonga na masa di turpuk on, torop do halak Jahudi na manghasiholi haroro ni Mesias songon naung disuriranghon angka panurirang ni Jahowa tu nasida. Sai tongtong do nasida manghirim haluaon songon na pinarbaga angka panurirang Jahowa i. Alai di na masa i, torop jolma na mandok dirina panurirang manang naposo ni Jahowa, alai dang tutu ibana pasahathon dia do lomo ni roha ni Jahowa. Dame do didok nasida, alai dame hamaupon do na diboan; dipamenak nasida do angka natorop alai asa adong do dilehon tanda hasangapon sian raja, hape raja i pe manggosagosa halak na ginomgomanna. Pajak na timbo diampehon tu bangso Jahudi, alai sudena i tu parbagian tu pamarenta dohot angka sintua manang na mandok dirina naposo ni Jahowa. Jala godang do angka malim hatiha i, dang barani mandok hata ni Jahowa na sasintongna, holan hata asa tabo jala menak siparaeon ni angka raja, jala hatiha ni turpuk on sada jabatan di pamarentaon do molo hamalimon. Sai disoarahon do dame, alai asa adong do sihilhilon ni iponnasida (ida Mikha 2: 5).

            Hombar na masa i, nunga lam torop angka na pogos, jala na susa na masa i. angka malim i pe gabe papodomhon angka i, alai lao tu hamaupon. Dung dibege natorop i barita taringot Jesus, pintor torop do nasida naeng mananda taringot Jesus, alai holan sekedar mananda.

            Hombar tu na masa i ma disoarahon Jesus asa manat tu angka panurirang pargapgap; na manarupahon birubiru alai molo di rohana tung babiat panoro do (ay. 15). Pandohan on adong do angka parpoda na mamangke goar ni Tuhan Jesus alai naeng mangaup tu dirina do, mangalului hauntungon tu dirina; mangalului sangap; asa torop na mananda, hape sasintongna mamboan jolma na manangihon podana gabe tu hamaupon dohot hamagoan. Panurirang/ parjamita na didok dison ima parjamita na so barani manghatindanghon hasintongan ni Jahowa jala dia do na sasintongna na dihalomohon ni Jahowa diulahon jolma na niasianna. Holan angka hata na boi pasonanghon sebelah pihak na dianggap boi mambahen sonang ngoluna marhitehite hata nang pambahenan. Panurirang/ parjamita na didok dison boi do i tu parjamita/panurirang na so dos pangalahona songon na didokna dohot tohonanna. Pangalaho manang karakter ni panurirang dang boi dibereng sian songon dia pahean na di pangke (cover wearing); alai ngoluna siapari do berengon. Ai ido didok Jesus panurirang na manarupahon birubiru (sheep covering) alai rohana tung babiat panoro.

            Jala di ayat 16 – 20 on lam dipatangkas Jesus, sian parbuena do tandaon hauna/ bonana. Molo bona ni mangga, pasti do mangga parbuena, molo bona ni anggur, pasti do anggur parbuena. Parbue na didok dison ima pangulahonon manang parange. Dang holan angka parjamita manang panurirang alai tu sandok na mandok dirina porsea di Jesus Kristus. Molo tadok do hita siihuthon Jesus Kristus; marlapatan do i adong panombaon jala diuduti tu manghaposi – haundukhon – haoloon mangulahon jala mamparbuehon hata ni Jahowa naung disuarahon Jesus Kristus di ngoluna.

            Alai dang asal parbue, ingkon do parbue na denggan songon hataridaan hau na denggan. Hau na denggan ima haporseaon na togu, na tang. Molo denggan do hauna tanda do sian parbuena na denggan. Hau na denggan dang holan marlapatan bagak berengon, alai parbuena do berengon. Alai molo hau na so hasea, parbuena pe roa. Boha do parbue na roa? Ima pargutugutuon; pangarimason; ungutugut; manghatindanghon angka na so sasintongna; mambolabola parsaoran; dohot ragam ni parange hajahaton (Gal. 5: 20 – 21). Jala hau na so marparbuehon na denggan ima hau na ingkon sitabaon, jala bolong nama tu api. Parbue na denggan ima parbue ni tondi (Gal. 5: 22).

            Mambege jamita ni Jesus torop ma halak na tartarik di jamita ni Jesus jala manghatindanghon Jesus i gabe Tuhan. Alai dang na gabe so tusi. Jesus sandiri na mandok di ayat 21, “ndada saluhut halak, na mandok Ahu Tuhanna bogot tu harajaon banua ginjang i" pandohan on marlapatan dang sae holan manghatindanghon marhite pamangan manang hata na porsea jala mananda Jesus. Alai ingkon do diuduti dohot parange mangulahon lomo ni rohaNa na mamparbuehon parbue na denggan sian hau na denggan. Ido na diuduti “holan angka mangulahon lomo ni roha ni Damang na di banua ginjang i do”, songon naung dipatorang taringot panandaion di Tuhan Jesus.

            Laos dipatorang Jesus do taringot paruhuman na masa di ari parpudi di ayat 22 - 23. Ganup jolma manghatindanghon habonaronna dohot ulaon na denggan di ngoluna. Alai alus ni Jesus seolah-olah alo tu na dihirim marhite ulaonna i. Molo sepintas dijaha ayat 22 – 23 on olo do gabe lipe pangantusion, aha ma lapatanna mangulahon na denggan saleleng ni ngoluna hape tong do dang mandapot hangoluan salelengna i? Alai pandohan ni Jesus on dang na gabe mangambati laho mangulahon ulaon na denggan songon parbue ni haporseaonna. Alai unang ma dipangasahon ulaonna na denggan i. jala unang dibahen ulaon na denggan i holan laho mangalului hasangapon asa ditanda jolma ibana jolma na burju hape di balikna busuk do sasudena. Alai ala nionjar haporseaon ma ibana mangulahon na denggan. Holan Debata do na umboto aha do na mangonjar hita mangulahon na denggan, haporseaon do manang kepribadian sendiri do.

Aplikasi Teologi

            Marhite jamita on disosohon do asa bisuk halak Kristen marnida hamajuon na masa sadari on tarlumobi manangihon angka parjamita. Torop do nuaeng marroan angka parjamita, alai pargapgap do nasida. Dang barani mansoarahon hasintongan ni hata ni Jahowa ala adong na naeng buatonna sian ulaonna i. godang do sadari on parjamita bisnis, gabe ajang bisnis do jamitana, jala boi tuhoron jamita na. antong ganup parjamita, ditanda ma dirina asa unang didok parjamita pargapgap. Parjamita pargapgap na rupana songon birubir hape rohana tung babiat panoro do. Laos adong muse do parjamita na holan mandok do diboto, alai dang dohot mangulahon (jamita do parangem, parangem do jamita). So tung marisuang jamita i ala parange na so dos songon jamita.

Boha do hadirionta manghatindanghon dirinta gabe sahalak siihuthon Jesus Kristus. Marhite jamita on disosohon do dang ringkot holan manghatahon marhite pamangan gabe sahalak Kristen. Ingkon patar jala marparbue na denggan do marhite ulaon na denggan. Parbue na denggan dang parbue ni mangga na busuk molo niida sian langkatna, mansai uli jala menarik alai dung dipangan busuk do jala nunga marulat, alani i dibalongkon ma mangga na busuk i. songon i ma parngoluan ni halak siihuthon Kristus, dang boi holan monang di rupa marhite angka ibadah, haringgasonna alai ingkon patar do marhite pangulahonon lomo ni roha ni Debata do.

            Alai unang pangasahon ulaon na denggan laho mandapot hangoluan salelengna. Unang pangasahon ulaon na denggan holan laho mangalului sangap sian portibi on, manang adong na naeng sibuatonna marhite ulaon na denggan na niulana, jala molo masa do songon i pasti do kekecewaaan do na masa. Alai ingkon do na nionjar haporseaon na tang do mangulahon na denggan i. Holan Debata do na mamboto na nionjar aha do hita mangulahon na denggan, jala sian Ibana do tajalo upa ni i. Parbuehon ma parbue na denggan songon hataridaan haporseaon di Jesus Kristus. Amen.