BAHAN JAMITA EVANGELIUM, MINGGU REMINISCERE. MINGGU, 01 MARET 2026; JOHANNES 3: 1 - 17

 BAHAN JAMITA EVANGELIUM

MINGGU REMINISCERE

Minggu, 01 Maret 2026

Johannes 3: 1 – 17

 

BALGA DO HOLONG NI DEBATA TU PORTIBI ON

Oleh. Pdt. Daniel Bonardo Pane, M.Th.

Patujolo

            Nuaeng masuk ma hita di minggu Reminiscere na marlapatan sai ingot ma angka denggan basa manang holong dohot asi ni rohaM. Minggu Reminiscere on ima tangiangta marpangidoan sai ingot ma ale Debata angka holong ni roha dohot asi ni rohaM, ima tangiang mangido haluaon dohot hangoluan sian Jahowa. Sai unang ma dihalupahon manang dipasombu Debata hita di angka sitaonon dohot manaon na hansit di ngolu on, sai. Aut sugari marbilangbilang hita di saluhut asi ni roha ni Jahowa di ngolunta, ra dang hasiatan portibi on mambilangi saluhutna i. Antong di minggu sadari on, aha do na naeng putihononta hata ni Debata marhite panghataion ni Jesus Kristus tu si Nikodemus. Antong itapaihutihut ma hatorangan ni turpuk jamita on.

 

Hatorangan ni Turpuk

            Molo idaonta na masa (sejarah) di turpuk jamita on ima sada partingkian di na tongtong dope sai tarpaimaima halak Jahudi taringot haroro ni Mesias na boi paluahon bangso i sian harajaon ni Rom. Pangantusion ni halak Jahudi holan pangantusion di haluaon di bidang harajaon ni portibi on, ndada mangalapi taringot Mesias i marhite haporseaonna. Haroro dohot na binahen ni Jesus tu Bagas Joro di Jerusalem mambahen torop jolma longang jala naeng tangkas ma ditanda ise do Jesus i sasintongna? Ai na tutu do Ibana Mesias songon naung leleng dipaima halak Jahudi i, manang dang.

            Sai na adong do tutu na marsogo ni roha molo adong sahalak na mambahen perubahan na ture jala na denggan parngoluon tarlumobi ture partondion, jala sai adong do nian na manghalashon di saluhutna. Sada horong na mansogohon Jesus ala hasintongan dohot hatigoran na tutu na dijamitahonNa dohot tanda halonganan na binahen ni Jesus ima horong Parise. Sai dilului do dalan boha asa ditangkup Jesus. Alai sahalak sian horong ni Parise na naeng tangkas mananda Jesus dohot na manghalashon sude jamita, pangajarion dohot na naeng bagas mananda Jesus hinorhon tanda halongangan na binahenNa ima si Nikodemus (ay. 1).

            Ro do si Nikodemus bornginborngin manopot Jesus (ay. 2) boi dohonon na ro si Nikodemus bornginborngin boi do dilapati asa unang diida angka donganna parise ibana pajumpang dohot Jesus. Diparhatopot si Nikodemus do taringot hadirion ni Jesus marhite angka naung niidana dohot naung binegena i. jala dialusi Jesus do hatana i marhite pangajarionNa taringot Harajaon ni Debata, hombar naung jotjot dijamitahon angka parjamita tarlumobi angka parise. Boha do tutu Harajaon ni Debata i? sarupa do i songon angka harajaon dohot huaso na di portibi on? Marnida harajaon ni Debata marlapatan do i mangantusi jala tangkas mangantusi taringot Harajaon ni Debata. Boha do hita mangantusi taringot Harajaon ni Debata i? Marhite alus ni Jesus di ayt. 3 on tangkas do dipabotohon ingkon adong do tubu di ngolu na imbaru.

            Pangantusion ni si Nikodemus taringot tubu di ngolu na imbaru marasing do dohot na naeng niajarhon ni Jesus tu ibana. Boi do idaonta pangantusionna i hombar tu pamingkirionna (ay.4). ndada na gabe pamingkiran dohot pangantusion ni jolma i dipangke mangalapati taringot tubu di ngolu na imbaru, alai lobi sian pangantusion ni jolma i do dipatupa Jahowa dalan asa tangkas jolma i marnida jala mananda dohot mangantusi tangkas taringot Harajaon ni Debata. Aha do sipatupaon? Ndada sian jolma i na patupahon i alai Jahowa sandiri do na patupahon i, siala na so tolap do gogo dohot pangantusion dohot pingkiran ni jolma i patupahon i. “tubu sian aek dohot sian Tondi” martudutudu do i tu hamubaon dohot haiason ni ngolu maradophon Jahowa Debata. Aek dison ndada aek na litok dohot asal aek, alai aek na nidok dison ima aek na tio (air murni dan bersih) na dipangke laho paiashon jala mambahen ias angka na kotor tarlumobi aek na tio mambalongkon angka na kotor di pamatang nang di partondion. Aek di turpuk on ima sada meterai/ tanda sah hita gabe anak dohot ampuna ni Jahowa Debata (marhite pandidion na badia). Tondi dison ima Tondi Parbadia, Tondi pangapuli, Tondi paniroi, dohot Tondi na mangondihon halak na satia tu Jahowa, Ama i. tubu di sian Tondi ima tubu di ngolu na gok haimbaruon, ias sian dosa dohot sian pingkirian na jahat.

            Molo itaida ayat 6 – 7, tanda do adong paraloan ni daging dohot Tondi. Daging na so martondi dohonon do i gabe bangke, molo tondi ndang mardaging dohonon ma i begu. Tudia do lapatan ni ayt. 6 – 7 i? lapatan ni ayt. 6 – 7 ima panghorhononna. Daging mangkorhon do i tu parbue ni daging (hombar tu Galatia 5: 19 – 21), ianggo Tondi manghorhon parbue ni tondi (Galatia 5: 22 – 23). Ringkot do hita ngolu ni pardaging on? Tontu ringkot do i, alai ndada ngolu pardaging on manontuhon ngolu partondion, alai ngolu partondion do na ingkon mangajari hita taringot ngolu pardaging on. Jolma na tubu sian Tondi, parbue ni tondi jala soara ni Tondi i do na ditangihonsa.

            Songon dia tarpajadi i? i do na gabe sungkunsungkun si Nikodemus tu Jesus (ay. 9). Ndang na mangunjungi si Nikodemus di sungkunsungkunna on, alai naeng do lam tangkas antusanna taringot na niidana jala taruli di ibana hangoluan na imbaru. Dialusi Jesus ma sungkunsungkunna i di ayat. 10 – 13. Alus ni Jesus di ayat 10 – 13 i mambungka pingkiran dohot haporseaon ni si Nikodemus taringot Ibana, Na ro sian banua ginjang laho paboahon taringot angka na di banua ginjang. Angka na sian banua ginjang ima paboahon Harajaon dohot hatongtongon ni Jahowa, jala paboahon ianggo tano dohot harajaonna na olo salpu do saluhutna. Ndang adong na mamboto tangkas taringot angka na di banua ginjang i, holan Jesus Kristus do ima dalanta lam mananda angka na dibanua ginjang marhite jamitaNa dohot pangajarionNa tarlumboi angka pambahenanNa i.

            Lam tangkas muse pangajarion ni Jesus tu si Nikodemus taringot angka na banua ginjang i ima marhite naung dibahen si Musa na patimbohon ulok di halongonan (4 Musa 21: 4 – 9) songon i do naeng patimboonna Anak ni Jolma i. hata on martudutudu taringot na naeng masa tu Jesus, na dipatimbo Ibana di hau pinarsilang mamboan sada haimbaruon marhite hamamateNa di hau pinarsilang i. jala ganup jolma tu Ibana, Jesus , Anak ni Jolma i dohot ma ibana tubu di ngolu na imbaru jala marhite Ibana tangkas ma idaonta Harajaon ni Debata, ima Harajaon ni holong dohot asi ni roha jala disi jumpang ma hangoluan na situtu. Ima hangoluan na so ra suda (ay. 14 – 15). Di na ro Jesus, Anak ni Debata ndada laho mamboan paruhuman tu angka pardosa, alai mamboan hangoluan na salelengna asa unang mate jolma i di bagasan dosana be, alai taruli ma di hamubaon ni roha, jala disi ma dapot hangoluan na saleleng ni lelengna (ay. 16 – 7). Porsea do hita disi? Haporseaon dison ndada holan di hata, alai ingkon dipatuduhon do marhitehite haringgasonna mangoloi jala manghangoluhon panghophopionNa marhite parange na denggan dohot di panombaon. Ha-Anakhon ni Jesus dison ndada haanakhon di pardagingon, alai dipatuduhon do songon ama tu anakna, na holong roha ni ama tu anakhonna jala anakhon na mangoloi amana, jala ha-Anakhon na dipatuduhon Jesus dison paboahon na sian Ama i do Ibana.

 

Hahonaan ni Turpuk

            Nunga tangkas dipatorang di hatorangan ni turpuk on taringot boha do panandaionta taringot Harajaon ni Debata? Ingkon ringkot do hape hamubaon ni roha. Tutu do hita mangolu di pardagingan on, jala jolma na mangolu ingkon mardaging do. Alai ndang na gabe daging on dohot hagiotna na mangarajai ngolunta tarlumbi hita angka naung porsea di Jesus Kristus. Manjangkon Jesus di ngolunta marlapatan do i manjangkon haimbaruon di ngoluna. Itaingot ma angka dongan, mansai balga do asi ni roha ni Jahowa tu angka jolma na tinompaNa i, ndada holan tu jolma dohot do portibi on taruli di asi ni roha ni Jahowa i. antong boha do hita manjangkon asi ni roha i? nunga patar be holong ni Jahowa tu hita nang tu portibi on di naung mate Jesus jala mulak mangolu muse di ari patoluhon, papatarhon haluaonta dohot hangoluanta. Ndang di portibi on hapatean ni ngolunta, autsugari di portibi on hapateanna marisuang do haporseaonta dohot angka hasatiaonta nang halojaonta ala marujung do saluhutna jala olo salpu do. Alai hapateanta ima na di Banua Ginjang, Surgo Sambulo ni tondinta.

   Nunga tung tangkas tapanghilalahon dohot taboto songon dia balga ni holong ni roha ni Debata tu hita. hinorhon holong ni roha dohot asi ni roha ni Debata na patar jala na masa di bagasan Jesus Kristus. Jesus Kristus do tanda holong ni roha ni Debata na balga i, na gabe panondang jala Sipalua di ngolunta. Jesus Kristus do dalan, hasintongan dohot hangoluan. Torop do di portibi on laho patandahon hita dalan hangoluan dohot hasintongan i, alai ndang adong na boi sahat patandahon jala mamboan hita tu hangoluan dohot hasintongan na tutu i. Holan marhite Jesus do boi idaonta tangkas Harajaon ni Debata, dohot hangoluan na sasintongNa, ngolu na manongtong. Itajangkon ma Ibana di ngolunta be asa taruli hita di hangoluan na manongtong i, amen.

 

BAHAN HATORANGAN EPISTEL MINGGU SEXAGESIMA: MINGGU, 08 FEBRUARI 2026; EFESUS/ EPESUS 1: 3 - 10

 

BAHAN HATORANGAN EPISTEL
 MINGGU SEXAGESIMA
MINGGU, 08 FEBRUARI 2026
EPESUS 1: 3 – 10

DIPASUPASU ASA GABE PASUPASU

Oleh: Pdt. Daniel Bonardo Pane, M.Th.

Patujolo

              Horas ma di hamu saluhutna! Autsura adong sipilliton, dia do na tapillit sian na dua on: hamoraon manang hapogoson? Torop do jolma mamillit hamoraon nang pe sai adong deba jolma mamillit hapogoson. Di hata ende “alusi ahu” ianggo hamoraon ima sada sian ragam na pinarsinta ni halak batak. Boasa hita naeng mamora? Somalna do di pangantusion ni angka jolma sahalak na mamora ima sahalak na tarpasupasu ngoluna jala halak na sangap, nampuna hata, jala sitangitangihon do ianggo hatana, jala nampuna huaso; alai ianggo halak na pogos haleaon do i dietong, jotjot do tu panggadisan, ndang pola sai ditangihon torop jolma ianggo hatana jala ndang adong huasona di humaliang. Naeng do hita mamora jala dapotan pansamotan di ngolunta; Dao ma sian ngolunta hapogoson manang hahurangan. Adong do hata ni halak batak songon on: simbora gukguk duldul otik; mamora hita luhut sumurung au otik. Hata ni halak batak on paboahon hirim do nian roha asa sude dongan, dohot humaliangta mamora jala dapot parsaulian alai naeng ma nian sumurung hamoranta otik sian na asing. Unang nian dos, alai naeng ma lobian sian angka na asing. Ragam do ulaon na diulahon angka jolma asa mamora ibana, isarana padot di angka ulaonna (maradi pe ibana ndang sanga), adong na manungkun datu dohot mangido pasupasu sian tondi ni naung mate songon i nang mamangke gogo ni sibolis na boi mambahen mamora.

              Adong do halak na mora alai ginjang do rohana, ingkon sitangihonon ni jolma hatana jala lomolomo ni rohana do na ingkon saut. Parange na sisongon on ma na manghorhon hasesega manang persoalan di sada punguan. Alai ndang sude na mora na songon i. adong do deba halak na mora parroha na serep, na olo mangurupi na hurangan jala mampanghorhon hadameon dohot hademakhon do hamoraonna i tu humaliang. Turpuk jamita epistelta sadari on ima sosososo ni apostel Paulus tu ruas ni huria na adong huta Epesus asa marningot nasida di angka basabasa ni Debata di ngolunasida na manghorhon hamoraon di parbinotoan, di sinamot, jala naeng ma marudut tu panghorhonon hamoraon di partondion. Asa lam tu antusna hita mangantusi turpuk jamita on, masuk ma hita tu hatorangan ni turpuk.

 

Hatorangan ni Turpuk

              Ia huta Epesus ima sada sian torop huta na maju di harajaon ni Rom, huta na adong di pesisir Ionia di Selçuk sinuaeng digoari propinsi İzmir, Turki. Si Paulus manurathon suratna on mandapothon huria na di huta Epesus uju di hurungan ibana, ala dibege ibana halak Epesus naung Kristen tongtong dope madabu tu ulaon manang hasomalan na maralo tu hata ni Debata, isarana manomba ganaganaan ni halak Junani, jala debata na digana halak Epesus margoar Artemis. Tongtong dope disomba jala dihaporseai halak Kristen na di huta Epesus anggo Artemis, ima debata na mangalehon hagaburon (kesuburan) dohot hagabeon na mangalehon hamoraon dohot hasangapon tu halak Epesus, jala parsidohot do deba sian nasida na olo marsomba tu kesar. Hinorhon ni i do disurathon si Paulus suratna on laho mangapoi, mamodai dohot manosoi halak Kristen na di huta Epesus mangolu jala marparange di bagasan Jesus Kristus. Marhite suratna on, si Paulus mangondolhn taringot sangkat ni Debata asa saluhut na tinompa songon i nang halak Kristen marhasadaon di bagasan Jesus Krsitus na gabe uluan (pat. Ep. 1: 10).

              Torop do halak Kristen na di huta Epesus na mamora di parartaon dohot mamora di parbinotoan taringot tu parngoluon. Alai hamoraon i manghorhon hasesega punguan ni ruas huria i. Mangahut tu dirina sandiri do hamoraon i dipangke. Tutu do tung mansai ringkot hamoraon di parartaon dohot di parbinotoan alai adong dope hamoraon na tung mansai ringkot adong di hita, ima mamora di partondion. Hamoraon di partondion ndada marharoroan i sian portibi on, jala na so boi tuhoron manang binuat sian portibi on ala ndang tuk sude hamoraon dohot haulion ni portibi on laho manuhor manang mandapot hamoraon di partondion; na so boi do tangkoon manang segaon ni jolma ianggo hamoraon ni partondion on. Hamoraon partondion marharoroan sian pasupasu partondion na sian banua ginjang, di bagasan Jesus Kristus. Hamoraon partondion ima harajaon ni Debata naung patar di bagasan Jesus Kristus. Mateus 6: 33 didok: “Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna!”. Alani i, tung mansai ringkot situtu do jumolo mangalului harajaon ni Debata na gabe bona ni pasupasu partondion na manghorhon hamoraon ni partondion di ngolunta. pasupasu partondion tarida do i sian parange na mamparbuehon parbue Tondi (Gal. 5: 22); pasupasu partondion ima parange ni Jesus Kristus na gabe tiruonta sipardame, parholong di saluhutna nang pe adong jolma na mangarsahi jala mambahen na jat tu hita alai ingkon boi ma tahaholongi ibana jala na so jadi mambaloshon na jat alo ni na jat; gogo dohot pos ni roha di panghirimon nang pe ingkon mamolus hasusaan di ngolu on; hasesaan ni dosa dohot haluaon na pinatupa ni Debata di bagasan Jesus Kristus; dohot teantanan na manongtong ima hangoluan dohot olopolop na manongtong di habangsaNa.

              Alani i do tama do pujionta Jahowa Debata, Ama ni Tuhanta Jesus Kristus na mangalehon tu hita ragam pasupasu partondion sian banua ginjang di bagasan Jesus Kristus (ay. 3). Jahowa Debata do mual ni pasupasu banua ginjang. Lehonon ni Jahowa Debata do pasupasu partondion i ndada manghorhon hasesega di punguan ni huria manang hatahuton/ mabiar ditangko manang dibuat jolma. Manghorhon hadengganon, hadameon dohot hasadaon do ianggo pasupasu partondion. Na olo mangajari, manuturi dohot maminsang halak di bagasan roha na serep, roha na lambok dohot manangianghonsa. Dilehon Jahowa pe pasupasu partondion tu hita ndada holan tu dirinta manang gabe so tu hita, alai naeng ma gabe pasupasu tu humaliangta. Ndada hinorhon silehonlehon di sinamot na gabe pasupasu alai na boi patupahon dame, mangajari, manuturi, manangianghon angka jolma na marhapatean tu hasadaon di bagasan Jesus Kristus.

              Naeng ma jumpang di parsaoran ni huria na di huta Epesus parange na badia jala so hasurahan di adopanNa i, di bagasan holong ni roha (ay. 4). Ndada sian hadirionta sandiri asa dilehon Debata, Anak-Na Tuhan Jesus Kristus na gabe Sipalua tu hita; ndada ala jala sian hadirionta do asa dipatupa Debata hasesaan ni dosa dohot haluaon tu hita. Alai tung holan ala asi ni rohaNa sambing do. Ima pamilliton na pinatupa ni Debata tu hita asa gabe ampunaNa do hita di bagasan Jesus Kristus na marparengehon parange na badia. Parange na badia jala na so hasurahan ima parange na so sarombang dohot parange ni portibi on, jala na so sarombang dohot parange ni jolma na so porsea jala na so mian di bagasan Jesus Kristus. Jumpang ma roha na togu manghaporseai jala na so jadi mandele di haporseaonna molo pe ro angka sitaonon; naeng ma jumpang roha na olo mangurupi donganna na gale dohot na hurangan; mamareahi hadameon, hasintongan dohot hatigoran di ngoluna; jumpang roha na manghaholongi donganna dohot musuna pe; na so jumpang roha na olo mambaloshon na jat alo ni na jat. Diihuthon manang di ula ma angka na denggan na manghorhon hasonangan di humaliang jala na tau gabe halomoan ni rohaNa (pat. Ay. 5 - 7).

              Dilehon Debata Ama, Anak dohot Tondi Parbadia pe pasupasu partondion, ndada na gabe marujung tu dirinta alai marudut do gabe pasupasu tu halak na asing. Dipillit jala ditodo do hita gabe anak ni Debata na marlapatan nunga gabe ampuna ni Debata do hita asa boi do tapatuduhon jala tapabotohon tu angka na torop habasaon dohot habasaron ni Debata di ngolunta, jala hita ma gabe parhitean ni Debata laho pasahthon pasupasu partondion songon naung dilehonNa jumolo tu hita. Lam torop ma halak na so porsea hian, gabe porsea; halak parjahat gabe disolsoli ma pangalahona laos marhamubaon ni roha; lam torop ma angka soara mamuji jala marhatopothon Jesus Kristus, Tuhan jala Sipalua jala nasa ulu ni tot marsomba tu Ibana. Laos i do na gabe hagogok ni tingkina, mandok: pasadahon di bagasan Krsitus i sasudena, na di banua ginjang dohot di atas tano on (ida ay. 8 – 10).

 

Hahonaan ni Turpuk

              Sahat ma pasupasu partondion tu hita hita di bagasan Jesus Kristus, Tuhan jala sipalua. Ragam pasupasu partondion naung tajalo jala naung sahat tu hita, angka parhalado dohot ruas ni huria. Pasupasu partondion na so boi disuhat sian godang ni sinamot, arta, timbo ni hasangapon. Pasupasu partondion naung sahat tu hita ima Jesus Kristus. Di bagasan diriNa do singkop dipatupa Debata haluaon tu hita, naung paluahon hita sian gomgoman ni dosa dohot soropna; maruli ma hita di hangoluan na so ra suda. Ndang margogo jala ndang marhuaso be dosa i di hadiron ni halak na porsea. Ala ni i ma unang be pasahat dirinta dohot ngolunta laho manggohi hagiot ni dosa, jala unang paloas ruas pamatangta gabe dalan mangulahon dosa. Gabe badia ma hita angka naung ditobus jala naung dipillit Debata di bagasan Jesus Kristus, na mamparangehon parange na denggan isarana gabe sipardame, siparholong, na olo manalpuhon angka na hasalaan; na olo pasingkophon angka na humurang jala i do na gabe pasupasu hita tu angka humaliangta.

              Tutu do nian tung mansai ringkot do tu hita hamoraon di sinamot, hamoraon di parbinotoan dohot di hasangapon na di portibi on alai unang lupa hita mangido dohot manghirim hamoraon di partondion. Molo pe adong di hita hamoraon di parartaon manang di sinamot; hamoraon di parbinotoan dohot di hasangapon naeng ma tapangke i gabe pasupasu tu humaliangta. Isarana mangurupi halak na pogos, mampargogoihon halak na dangol, mangapuli angka na marsak, mandaoni angka na marsahit, patupa hadameon dohot hademakhon dohot lan ulaon na denggan na asing na manghorhon hasadaon di bagasan Jesus Kristus. Ala ni i, las ma rohanta naung manjalo pasupasu na sian Debata alai ingkon botoonta do ndada na marujung pasupasu i tu hita, alai naeng ma marudut gabe pasupasu tu humaliangta na marhapatean tu hamuliaoni Debata. Amen.

BAHAN HATORANGAN JAMITA MINGGU SEXAGESIMA: MINGGU, 08 FEBRUARI 2026; 1 MUSA/ KEJADIAN 12: 1 - 5

 

BAHAN JAMITA
 MINGGU SEXAGESIMA
MINGGU, 08 FEBRUARI 2026
1 MUSA 12: 1 – 5

 DIPASUPASU ASA GABE PASUPASU

Oleh: Pdt. Daniel Bonardo Pane, M.Th.

Patujolo

              Parhorasan dohot panggabean ma di hamu amanami dohot inanami na hinaholongan di bagasan Jesus Kristus, Tuhan jala Sipalua. Di minggu sadari on, masuk ma hita minggu sexagesima na marlapatan onom pulu (60) ari andorang so jumpang ari paskah. Di minggu sexagesima diondolhon taringot pamillithon manang panjouon dohot haoloon na polin manggohi panjouon i. Panjouon na nidok di minggu sexagesima ima panjouon na marharoroan sian Jahowa. Molo manghatahon taringot pamiliton dohot panjouon marudut do i tu parsuruon laho manopot sitopoton manang mandok sidohonon. Ndang na gabe so manang maradi alai borhat dohot ulahon. Turpuk jamitanta sadari on, ima pamilitton dohot panjouon sahalak na margoar si Abram asa borhat ibana tu inganan sitopotonna hombar tu hata na binegena. Tung tangkas do idaonta adong bagabaga ni Jahowa Debata tu si Abram di panjouonNa i tu ibana. Asa lam tu antusna hita mangantusi turpuk jamita on, masuk ma hita tu hatorangan ni turpuk.

 

Hatorangan ni Turpuk

              Turpuk jamita on ima patujolo barita haborhatan ni si Abram sian Ur-kasdim tu tano Kanaan. Ur-kasdim, ima huta hatubuan ni si Abram dohot keluargna. Ragam do pandohan na bisuk mangalehon hatorangan taringot huta i. Adong do pande bisuk mandok ianggo huta Ur-Kasdim ima huta di Ur na maringanan Sumeria (nuaeng didok huta Tall al-Muqayyar manang Tall al-Mughair) hurang lobi 300 tungkan anggoni Baghdad, Mesopotamia tungkan dangsina na jonok tu sunge Euprat. Na deba muse mandok, ianggo Ur-kasdim ima Mesopotamia tungkan utara jonok tu Haran (Turki) hombar tu hadomuan halak Aram dohot Kasdim. Molo ugamo na dipeop halak Ur-kadim ima ugamo Polies na manomba tu torop ni ganaganaan. Sada sian torop ni ganaganaan na disomba halak Ur kasdim ima debata bulan na margoar debata Nanna na dihaporseai debata na mangaramoti dohot mangondihon halak Mesopotamia jala debata na mangarajai langit dohot pardalanan ni partingkian di portibi; dihaporseai halak Mesopotamia di partingkian i do anggo debata Nanna do mangalehon habornohon ni angka tano, inganan hangoluan angka suansuanan, pahanpahanan dohot jolma di atas ni tano. Molo tajaha Josua 24: 2 boi do botoonta ianggo si Tera, ama ni si Abram dohot si Nahor mangoloi angka debata sileban do nasida, molo dohot do ama ni si Abram manomba angka debata sileban, tontu si Abram pe dohot do mangulahon i. sian pigapiga referensi mandok, anggo keluarga si Tera ima keluarga na daulat manomba angka sisombaonna.

              Di sada partingkian na so hea ditagam si Abram, adong soara na binege si Abram mandok asa bungkas ibana sian huta hatubuanna tu tano na naeng sitopotonna. Sungkunsungkun, ai nunga ditanda si Abram na Jahowa do na manghatai dohot ibana? Molo taida di 2 Musa 6: 3 ndang dipapatar Jahowa dope goarNa Jahowa tu si Abram, alai dipapatar do diriNa ima Debata na sun hinagogo. Sungkunsungkun muse, antong boasa olo si Abram? Molo tarunut hatorangan taringot hadaulaton si Tera dohot si Abram, hinorhon ni hadaulatonna i do gabe dioloi. Boi do didok dioloi si Abram panjouon i hinorhon ni hadaulatonna do nang pe dang diboto ibana na Debata dia do na nioloanNa i. Alai adong na mansai ringkot idaonta di ayat 1 turpuk jamita on ima disuru Jahowa do asa bungkas si Abram sian tano hagodanganna dohot sian hatubuanna dohot sian baga ni amana tu tano sipatuduhononku tu ibana. Molo disuru bungkas marlapatan disuru laho, borhat jala ndang be mulak tusi. Asing luat manang bangso asing do hasomalanna songon i do nang debatana. Ganup luat manang bangso sai adong do debata na disomba hombar tu haporseaon ni luat manang bangso i. Molo adong soara na mandok “Bungkas ma ho sian tano hagodanganmu dohot sian hatubuanmu dohot sian bagas ni amam tu tano sipatuduhononku tu ho” marlapatan tadinghon ma hasomalanna dohot tadinghon debatana. Bungkas tu tano sipatuduhonon ni Debata, marlapatan masuk ma ibana tu hasombalan na imbaru jala ingkon manghaporseai debata na imbaru na marasing sian debatana hian. Tontu, na so jadi debata Nanna marsuru si Abram asa manadinghon ibana. Jala on na na naeng sidohonon di ayat 1 on ianggo hadaulaton dohot haoloon ni si Abram manggohi soara dohot parsuruon i ima hadaulaton dohot haoloon tu Debata na gumogo sian Nanna, ala debata Nanna holan manggomgom Ur kasdim dang sahat tu luat na asing. Debata na mangarajai lobi sian suhatsuhat ni sada luat manang bangso.

              Dang laho boti si Abram bungkas sian hutana, alai mardongan bagabaga do ibana borhat manopot luat manang bangso na naeng sitopotonna. Bagabaga i ima:

1. Hubahen do pe ho gabe bangso na bolon
2. PasupasuonKu angka na mamasumasu ho, jala toruonKu angka na mamurai ho
3. Dapotan pasupasu marhitehite ho saluhut angka bangso ni tano on.

 

a.     Gabe bangso na bolon

Tung ise ma si Abram umbahen na dapot bagabaga: “gabe bangso na bolon” ibana di bahen Jahowa Debata? Tung dapotan asi ni roha do si Abram marhite panjoun ni Jahowa ibana. Ganup luat manang bangso adong do panggomgom, nang pe uju na dijou Jahowa si Abram dang disurathon ise do panggomgom di ur-kasdim, jala adong do na mora asing ni keluarga si Abram. Di saluhut angka na mora dohot panggomgom di portibi on, dapotan asi ni roha do si Abram. Uju na dijou Jahowa si Abram asa bungkas sian huta hatubuanna, marumur ma ibana pitupulu lima taon, alai ndang adong dope tubuna marhite ripena, ima si Sara. Bagabaga “gabe bangso na bolon” tontu gabe sada asupan (ancaman) tu bangso na bolon di humaliang, isarana Misir, Kanaan, Kasdim dohot bangso na bolon na asing di humaliang. Boha do masa bagabaga ni Jahowa on tu si Abram, ibana pe disuru bungkas sian huta hatubuanna, jala ndang adong ianakhonna. Somalna do inakhon i na pabalgahon goar ni amana. Marhite turpuk jamita on pabotohon tu hita, ndada na marharoroan sian hadirion ni si Abram umbahen ibana gabe bangso na bolon, alai ala Debata na manjou ibana ima Jahowa, Debata na bolon situtu jala Debata na sun hinagogo. Habolonan bangso ni si Abram marharoroan sian Jahowa Debata. Jahowa Debata sandiri do na mambahen pinompar ni si Abram torop songon bintang di langit na so habilangan ala ni toropna. Saut ma bagabaga i, dungkon sorang ianakhonna si Ishak. Dapotan asi ni roha do muse si Abram dung marhasatiaon ibana mangulahon manang aha pe na nidok ni Jahowa Debata siulahon ibana. hasatiaon dohot hadaulaton ni si Abram, marsingkat ma goar ni si Abram gabe Abraham, asa ganup jolma na na marhasatiaon di haporseaonna dohot di hadaulatonna tu Jahowa Debata, goaron ma ibana pinompar ni si Abraham; jala dipillit Jahowa do ibana gabe ama ni saluhut angka na porsea hinorhon ni hasatiaonna jala hadaulatonna mangulahon dohot mangoloi parsuruon ni Jahowa Debata tu ibana.

 

b.     PasupasuonKu angka na mamasumasu ho, jala toruonKu angka na mamurai ho

Bagabaga na paduahon ima bagabaga pangaramotion dohot pandonganion ni Jahowa Debata tu si Abram. Ndada holan na mamillit manang marsuru si Abram asa bungkas sian Ur-kasdim, alai marudut do pamiliton dohot parsuruon i tu pangaramotion dohot pandonganion ni Jahowa Debata. Maol do panggomgom ni sada bangso manjalo halak na so tinandana masuk tu bangso na ginomgomanna, dietong do i musu manang matamata. Alani i, do boi do talapati na gabe sada hamaolon do tu si Abram laho manopot sada huta na so hea dope dibolus jala ingkon mangadopi ondamondam ni angka harajaon na binolusna. Molo talapati bagabaga ni Jahowa Debata tu si Abram, aha be harua dihabiari si Abram ondamondam ni angka panggomgom ni sada bangso. Jahowa do na mandongani dohot mangaramoti si Abram mangalangkahon simanjojakna manopot tano na naeng dipasahat Debata tu ibana. Jahowa Debata sandiri do na marporang dompak angka bangso na manjahati si Abram, Jahowa sandiri do na pamasaon haluaon dohot hangoluan tu si Abram, asal ma marsihohot si Abram manggohi parsuruon ni Jahowa tu ibana.

 

c.      Dapotan pasupasu marhitehite ho saluhut angka bangso ni tano on.

Tua na i jolma molo boi ibana dipillit Jahowa Debata gabe dalan pasupasu tu donganna jolma. Ndang na so pasupasu i tu si Abram, alai marhite ibana dapotan pasupasu ma angka bangso. Songon pardalanan ni aek sunge songon i do mabaor ni pasupasu ni Debata tu angka na sai manghaposi Jahowa Debata. Laos marpardomuan do goar ni si Abram marsingkat gabe Abraham asa ibana ma ama ni saluhut jolma na porsea manang na satia manggohi hata dohot lomo ni roha ni Debata di pardalanan ni ngoluna. Si Abram gabe gombaran jala gabe ama taringot tu hadaulaton, pangoloion na pollin songon hasatiaon. Diida jala ditatap angka bangso ma parange hadaulatonna, songon i nang pangoloionna nang songon i hasatiaonna asa parsidohot ma angka bangso taruli di pasupasu na sian Jahowa Debata.     

 

Debata Jahowa, na manjou si Abraham i asa bungkas sian Ur-kasdim, ima Debata na marningot sude angka bagabaga naung dibagabagahon i. Dilehon Jahowa pe bagabaga i, ima gabe hangoluan do tu si Abram. Jala marhite si Abram i dapotan ngolu angka bangso di tano on. Boi do sasintongna si Abram manulak panjouonna i alani hamoraonna di Ur kasdim; boi do ibana manulak panjouonna i ala ndang diboto ibana songon dia parngoluanna dohot keluargana di tano na naeng sidapotonna i. Alai hadaulaton dohot haoloon ni si Abram, paposhon rohana jala na so jadi jumpang ganggu ni roha di ibana laho mangulahon panjouon ni Debata tu ibana. Andorang so sahat ibana tu tano na dibagabagahon i, torop do angka na masa diadopi, isarana parporangan, dohot ragam do asupan (ancaman) sian bangso na asing diadopi ibana. Dibagasan hadaulaton dohot haoloon i do hataridaan haporseaonna ndang na gabe mandele ibana mandapothon tano naung dibagabagahon Jahowa hian tu ibana. Lam pos muse ma rohana di 3 bagabaga ni Debata i tu ibana. Marparbue do hadaulataon dohot haoloon ni si Abram i, ima di na sahat ibana di tano na dibagabagahon Jahowa i di ibana.

Sahat ma si Abram dohot ripena, si Sara nang songon i angka naposona tu tano i. Nda tung didapot ibana jabu na balga, jala na gabe uluan ibana di inganan i alai songon halak na leban do ibana disi. Undungundung  do diingani. Undungundung ima inganan parmianan na mamangke tenda. Boi do dipapinda hombar tudia lomo ni nampunasa. Ndang na gabe istana manang jabu na sian batu undungundung i, alai holan na holan tenda dohot amak di bagas ni undungundung i. Alai idaonta ma, di Ur kasdim mamora do si Abraham, alai ditadinghon do sudena i tumopot tano na dibagabagahon Jahowa, Debata i tu ibana.

 

Hahonaan ni Turpuk

              Di minggu sexagesima sadari on, dipabotohon do tu hita marhite jamita on taringot hadaulaton dohot pangoloion ni si Abram tu panjouon dohot parsuruon ni Jahowa Debata tu Ibana. dipaborhat Jahowa do si Abram mardongan tolu bagabaga na naeng sipamasaon ni Jahowa tu ibana. Hinorhon pangoloionna di panjouon dohot parsuruon ni Jahowa mardongan bagabaga i, dapotan pasupasu ma ibana sian Jahowa. Mangula do Jahowa papatarhon huasoNa nang pe mangatasi suhat pamingkiran ni jolma; lobi sian na hea tapingkiri pe taringot hinadenggan tu dirinta tarpatupa Jahowa Debata do saluhutna; saluhut na sahat tu suhatsuhat pingkiran ni jolma tarpatupa Jahowa Debata do, songon bagabaga tubuan anak ma si Sara, jolma ni si Abram. Molo hombar tu suhatsuhat pamingkiran ni angka jolma, boha do parsautna tubuan anak si Sara hape umurna pe nunga tung matua, jala ndang tarjalo pingkiran umur naung matua boi dope tubuan anak. Ido tutu, ndang adong na so tarpatupa Jahowa Debata. Songon i ma Jahowa pasauthon bagabagaNa tu si Abram taringot tu pangaramotion, panarihon dohot lan angka na asing.

              Turpuk jamita evangelium on mangajarhon tu hita taringot hadaulaton ni si Abram na tarida sian haoloon daohot haundukhon manggohi panjouon dohot parsuruon ni Jahowa. Mardongan bagabaga do si Abram do ibana borhat mangoloi parsuruon ni Debata, ima bagabaga pangaramotion, pandonganion dohot pasupasu. Ndada na gabe mansohot tu si Abram pasupasu i, alai marhitehite sian ibana dapotan pasupasu do angka bangso. Dipasupasu Jahowa Debata do si Abram asa boi gabe pasupasu ibana di humaliang. Hata on mangajarhon tu hita, nunga tahilala pangaramotion dohot pasupasu ni Jahowa di ngolunta, Debata na mamasumasu sude na jinama ni tangan, dilehon nang hahipason dohot lan angka silasniroha di ngolunta. anggo tahaparhatopot do anggo saluhut nasa na adong di ngolunta sadari on, ima pasupasu na sian Debata, naeng ma hita gabe pasupasu tu humaliangta marhite na olo hita gabe pasupasu tu humaliang. Ima marhite roha na olo mangurupi na ringkot siurupan, adomg roha na marpanarihon tu angka dongan na ringkot sisarihononhon. Debata ma na manarihon, Debata do na mamasumasu dohot mangalehon ganda ni dalan ni ngolu tu ngolunta be, amen.