BAHAN JAMITA EVANGELIUM MINGGU, 03 SEPTEMBER 2023; 2 KORINTUS 8: 1 - 7

 BAHAN JAMITA

MINGGU XIII DUNG TRINITATIS

MINGGU, 03 SEPTEMBER 2023

EV.: 2 KORINT 8: 1 – 7; EP.: 2 KRONIKA 9: 1 – 8; PATIK

 

ULAHON MA ULAON PARASINIROHAON!

Pdt. Daniel Bonardo Pane, M.Th.

Patujolo

            Parhorasan ma di hamu saluhutna na hinaholongan di bagasan Jesus Kristus! Asi ni roha dohot dame na sian Debata Amanta, holong satia ni Tuhan Jesus Kristus dohot parsaoran ni Tondi Parbadia ma na tongtong mangaramoti jala mandongani hita saluhutna, amen.

            Sada sian 3 ulaon na ingkon sihobasan huria ima ulaon parasinirohaon manang na jotjot didok diakonia. Boi dope masa ulaon parasinirohaon di ganup huria di partingkian sisaonari? Tontu adong na mandok: “boi”, adong na mandok “marnida na masa” jala adong na mandok “maol” gariada iba hurangan boha ma mangurupi. Apostel Paulus marhite turpuk jamita on, naeng ma paingothon huria na adong di Korint asa unang lalap nasida holan laho mamingkirhon panghobasion na ringkot tu nasida sandiri, hape tading di ulaon parasinirohaon. Disosohon si Paulus do huriaon asa songon pangharingkthon huria i di angka panghobasion di huria songon i ma nang nasida mangharingkothon ulaon parasinirohan. Asa lam antus hita mangantusi turpuk jamita on, masuk ma hita tu hatorangan ni turpuk.

 

Hatorangan ni Turpuk

            2 Korint ima surat na paduahon na tinongos ni apostel Paulus tu huria na adong di huta Korint. Surat on disurathon si Paulus hirahira taon 53 – 56 Masehi uju di Makedonia ibana rap dohot si Titus. Ditongos apostel Paulus do suratna on laho mangalusi dohot mangalo angka parpoda haliluon na mangajarhon angka pangajarion na marasing taringot Jesus (adong ma disi horong: gnostik dohot dekotisme) dohot na mampartontanghon taringot haapostelon ni si Paulus di huta i. Umbahen i masa ma parsalisian, hagunturon dohot angka parbolatbolaton di huria i. Hinorhon ni i torop ma halak Kristen tarlumobi angka parhobas sumurut sian haringgasonna manghobasi huria i, godang na mandele jala manadinghon pangajarion na sintong i. Umbahen i ma marhite si Titus ditongos si Paulus suratna on.

            Dibuhai si Paulus do suratna na paduahon on pabotohon dirina apostel ni Jesus Kristus (avpo,stoloj Cristou/) sian lomo ni roha ni Debata (2 Korint 1: 1), na marlapatan nada sian roharoha ni si Paulus ibana gabe apostel, jala ndada sian lomo ni rohana. Alai sian lomo ni roha ni Debata do umbahen parsidohot ibana gabe apostel ni Jesus Kristus. Ayat 1 turpuk jamita on dipabotohon si Paulus do taringot asi ni roha ni Debata (ca,rin tou/ qeou/) tu angka huria na di Makedonia. Asi ni roha (ca,riV) marlapatan las ni roha, holong ni roha, pambahenan angka na denggan, pangaramotion dohot panumpahion. Hombar tusi naeng do dipabotohon si Paulus di ayat 1 on angka pambahenan na denggan, holong ni roha, pangaramotion dohot panumpahion ni Debata tu huria Makedonia. Huria Makedonia ima huria na adong di luat Makedonia, Junani, ima luat mula ni budaya/ tradisi helenisme jongjong uju kaisar Aleksander Agung. Huria na pogos jala mansai tertinggal alai ringgas patupahon pangurupion tu huria na adong di huta Jerusalem (pat. Rom. 15: 27). Hata huria na nidokna dison ima halak Kristen. Halak Kristen di huta Jerusalem ima huria na pogos jala na ringkot siurupon hinorhon ni angka pangaleleion dohot ragam angka haporsuhon na dibinahen halak Jahudi.

            Dibahen si Paulus do huria na di Makedonia gabe tiruan tu huria na di Korint taringot tu silehonlehon dohot haringgason patupahon panghobasion di huria. Nang pe huria na di Makedonia ima huria na pogos jala na mangadopi sitaonon manang haporsuhon godang, alai tung na so mansohot do nasida patupahon panghobasion dohot marsilehonlehon tu huria na hurangan. Hinapogosnasida do habasaon na lumobi. Asi ni roha ni Debata tu huria Makedonia mampanghorhon hamoraon di partondion (kaya dalam rohani). Hamoran partondion on ma na gabe hasurungan ni huria Makedonia. Tarida do habason na lumobi halak Makedonia ima las ni roha ni huria mangurupi angka huria na adong di Jerusalem dohot angka na hurangan. Ndada na lobiannasida umbahen na olo mangalehon, alai nang pe di bagasan hapogoson dohot hinahansit/ sitaonon na mansai dokdok masa tu huria i alai las ni roha ni huria i mangalehon (ay. 2 – 3). I do na gabe sitiruon tu huria i tu huria  na di Korint.

            Huria na di Makedonia (Junani tungkan utara) mangolu di hapogoson alai huria na di Korint mangolu do di ragam hamoraon. Huta Korint ima huta na mansai bidang jala na maju, torop angka ro tu luat i laho martigatiga jala marsiajar taringot bisnis, budaya dan pengetahuan. Asing ni konteks hapogoson, huria na di Makedonia ima huria na dipasiding (orang – orang yang terpinggirkan) jala sai dilele do ganup halak Kristen di luat i. alai tung so mansohot do huria i patupahon pangurupion dohot panghobasion justru sai didosak huria Makedonia do asa parsidohot nasida mangurupi angka na badia, ima halak Krsiten na mian di Jerusalem.. Marsiadu do nasida patupahon panghobasion di tongatonga ni huria. Ndang sumurut nang pe sitaonon masa di nasida (ay. 4). Ndang adong pamingkirion untung rugi patupahon panghobasion dohot pangurupion i. Boi ma idaonta di 2 Korint 4: 1 – 10 songon dia ringgas jala komitmen ni huria i patupahon panghobasion dohot pangurupion i. tung ala na nionjar asi ni roha ni Debata do ndada ala ni haboion dohot hadirion huria i.

            Gumodang sian na nihirim tarpatupa huria na di Makedonia mangurupi na badia i (ay. 5). Nang pe huria Makedonia burju patupahon panghobasion dohot marsilehonlehon alai ndada na gabe hurangan nasida di hapogosonna i, sebalikna, habasaonnaisa i mampanghorhon las ni roha dohot hatuaon sude na i na nionjar asi ni roha ni Debata do naung jumolo dipanghilalahon huria i. Pambahenan ni huria Makedonia on ma na patuduhon huria i na mamparsaoran (koinonia), marbaritanauli/ mampanghatindanghon (marturia) dohot marasiniroha (diakonia). Tubu ma parsaoran na uli, lam rarat ma parbaritanaulion jala lam ringgas ma mangulahon ulaon asi ni roha, ima parbue haluaon na diparbuehon huria Makedonia. Dipatupa huria Makedonia pe ulaon i ima songon peleanna dohot pambahenanna tu Tuhan Jesus Kristus (patudos Mat. 24: 40) jala marhite asi ni roha ni Debata parsidohot ma angka apostel manghilala panghobasion dohot pangurupion ni huria na di Makedonia i.

            Ido umbahen disuru/ diapoi ma si Titus asa ro ibana tu huria Korint asa songon na binahen ni si Titus di Makedonia songon i ma nang ibana patupahon ulaon parasinirohaon di huta Korint marhite manosohon jala mangapoi asa parsidohot ma huria Korint patupahon ulaon panghobasion dohot parasinirohaon (ay. 7). Unang be sai lalap di angka persoalan holan ala ni parbolatbolaton dohot ragam parpoda haliluon. Ringkot do nian pasiduhon jala manggotaphon angka parpoda haliluon i dohot parbolatbolatan i di huria i. Denggan ma huria mamparsaoran nasida tu nasida, unang be adong parbolatbolaton, rap marsijangkonan ma nasida. Alai dang boi so disi. ingkon boi dipatuduhon parbue hatuaon dohot haluaon marhite na ringgas patupahon panghobasion dohot parasinirohaon songon tanda na parsidohot do huria i (na di Korint) manjalo asi ni roha ni Debata.

            Di ay. 7 dipabothon si Paulus do hasurungan ni huria Korint. Ndada na mambuat roha si Paulus dison songon na binahen angka parjamita manang panurirang gapgap na sai olo mamuji na mora jala na sangap asa dapotan ibana sian na mora dohot na sangap i. Laho manosohon dohot mendedikasikan huria i mamangke hasurunganna i songon na binahen ni huria na di Makedonia. Hasurungan na dipabotohon si Paulus dison ima: di haporseaon, di hata, parbinotoan, di nasa haringgason, di pangholongion huria Korint tu si angka apostel dohot huria. Songon i ma nang hasurungan ni huria i patuaphon ulaon parasinirohaon. Sude hasurungan na pinabotohon si Paulus di ay. 7 ima parualon ni Tondi Parbadia (patudos tu 1 Korint 12). Hasurungan ni huria Korint taringot tu ulaon partondion (songon di 1 Korint 12) naeng ma dos balgana tu ulaon parasinirohaon tu huria na pogos jala na hurangan. Songon las ni roha dohot haringgason huria i patupaon ulaon panghobasion di huria i songon i ma nang nasida mangharinggashon patupahon pangurupion tu huria na hurangan. Na marlapatan ndada holan mangharingkothon habalgaon ni huriana sandiri (selfish ministry) alai naeng ma panghobasion tu luhutna (holistically ministry) songon na pinatupa huria Makedonia.

            Alai naeng ma dipatupa saluhutna i di bagasan haburjuon ni roha, ndada na songon paksaan (ay. 8). Disosohon si Paulus do naeng ma dos panghobasion ni huria i tu ulaon parasinirohaon marhite roha na olo mangurupi. Ndang be holan mangharingkothon huriana gabe tading mangharingkothon huria na asing tarlumobi di huria na asing. Molo pe boi diula ulaon parasinirohaon ndada patuduhon haboion dohot siadongon alai ala nionjar asi ni roha ni Debata do na manosohon hita patupahon ulaon parasinirohaon. Huria na digohi asi ni roha ni Debata naeng ma patupahon ulaon parasinirohaon.  

           

Hahonaan ni Turpuk

            Adong dope huria di partingkian on holan sibuk tu: persoalan na masa, boha ma asa bagak gedung ni huria, boha ma asa adong hepeng kas, boha ma asa godang ro hepeng, dohot lan angka na asing. Sadar atau tidak sadar, godang do huria na di hasiangan on madabu tu paham mamonisme, hedonisme na patuduhon keberhasilan ulaonna molo: adong pembangunan huria, gok saldo, naek sipalasroha, bagak parsaoran di huria hape laos tading tu ulaon parasinirohaon. Holan didok, lehon ma deba na di hita on mangurupi huria na asing, lehon ma deba na di hita mangurupi angka halak na hurangan, halak na sopot so marama sopot so marina, mangurupi angka na mauas jala na male, olo do berpikir dua kali hita patupahon i. jolo niida ma kas, jolo niida ma na masa dohot lan na asing.

            Marhite turpuk jamita on diajarhon do hita nuaeng naeng ma marsiadu laho patupahon ulaon parasinirohaon nang pe songon dia kondisi ni ngolunta manang huria na tahobasi. Ndada ingkon songon na binahen huria Makedonia na ingkon baheonta, molo tung boi pe songon i ndang na gabe ambaton. Nda tung gabe hurangan hita molo pe sian las ni rohanta hita olo mangurupi. Tahangoluhon ma ngolu parasinirohaon mangurupi angka donganta, huria na ringkot siurupon, na hurangan dohot na pogos, songon sada hataridaaan naung jumolo hita manjalo pasupasu dohot asi ni roha ni Debata hita.

            Alai molo pe hita patupahon ulaon parasinirohaon, unang ma ala ni paksaan ingkon sian las dohot ias ni roha ma. Apostel Paulus mandok disuratna: “ganup na nionjar ni rohana, unang sian muruk manang sian na so tarjua, ai dihaholongi Debata do na las roha mangalehon. Alai marhuaso do Debata mangusehon saluhut asiasi tu hamu, asa sandok tuk situtu di hamu jala marlobilobi hamu laho patupahon saluhut ulaon na denggan. hombar tu na tarsurat: "Na manaburi ibana, mangalehon tu angka na pogos; hot do hatigoranna i ro di salelenglelengna” (2 Korint 9: 7 – 9). Laos didok muse: “ Gabe dipasangap hamu Debata, ia dung tau hamu jumpang di ulaon parhobason on, ala ni pangoloion ni rohamuna, laho mangkatindangkon barita na uli na sian Kristus, dohot ala na buas pangantoionmuna di nasida dohot di dongan saluhutna” (2 Korint 9: 13). Hasangapon ma di Debata na di ginjang, amen.

 

BAHAN JAMITA EVANGELIUM MINGGU ADVEN I, 03 DESEMBER 2023: MARKUS 13: 24 - 37

 BAHAN JAMITA EVANGELIUM
MINGGU ADVENT I
Minggu, 03 Desember 2023
MARKUS 13: 24 – 37

JAGA JALA DUNGO MA HAMU MANOMUNOMU HARORO NI KRISTUS

Pdt Daniel Bonardo Pane, M.Th.

Patujolo

            Horas... jumolo ma hupasahat tu hamu sude parhalado dohot ruas ni huria tabe dohot parhorasan songon i nang hata: selamat taon baru huria ma di hamu saluhutna! Marasing do pamuhaion taon di huria dohot taon Masehi di ganup taon. Taon huria dimuhuai sian minggu Advent[1], anggo taon Masehi dimuhai ma sian 01 Januari. Jala sahalinai hupasahat ma tu hamu saluhutna: Selamat Advent, selamat taon baru huria ma di hamu saluhutna! Horas.. Horas. Horas.

            Turpuk jamita evangelium di taon baru huria jadala di minggu Adven I sadari on manaringoti taringot akhir zaman laos diuduti haroro ni Anak ni Jolma, mamboan haluaon dohot haimbaruon. Ndada songon haroroNa na parjolo haroroNa paduahalion. Ndada di laho mate be Ibana muse patupahon haluaon sian dosa dohot hamatean songon na parjolo i. haroroNa na paduahalion ndada laho gabe pelean panobusion dohot pardamean songon na parjolo i, alai gabe panguhum na tigor dohot na badia, laho papatarhon hamuliaon harajaon ni Jahowa dohot manggohi taringot hasusuda angka harajaon, hamuliaon, hasangapon dohot saluhut na masa di hasiangan on nang pasiaphon hagogoon, hamuliaon dohot hasangapon sude angka debata na disomba jolma. Asa lam antus hita mangantusi taringot haroro ni Anak ni jolma i songon na disurat di turpuk jamita on, masuk ma hita tu hatorangan ni turpuk.

 

Hatorangan ni Turpuk

            Evangelium Markus on ima na sinurat ni si Markus hirahira taon 64 – 67 M uju panggomgomion ni kaisar Lucius Domitius Ahenobarbus manang Nero Claudius Caesar Germanicus na jotjot ditanda kaisar Nero,[2] ima kaisar na mansai bringas jala na mambahen na so uhum tu halak Kristen di panggomgomionna. Di panggomgomion si Nero on ma apostel Simon Petrus pabotohon tu si Markus taringot Jesus Kristus ima taringot panghobasionNa, tanda halongangan na binahenNa, huasoNa, hamuliaonNa dohot pangajarionNa. Laos disurathon si Markus ma saluhutna i di bukuna on, jala digoari ma bukuna on Markus. Turpuk jamita on ima sada sian pangajarion ni Jesus taringot hapapataron harajaon, hasangapon dohot hamuliaon ni Jahowa Debata. Hapapataron harajaon dohot hamuliaon ni Jahowa ima hasalpuon dohot hasusuda saluhut hasangapon dohot hamuliaon nasa na adong di hasiangan on. hapapataron harajaon, hasangapon dohot hamuliaon ni Jahowa ima hapapatar ni partingkian panguhuman ni Jahowa na tigor jala na sintong i. Molo manghatahon taringot hatigoran dohot hasintongan ni uhum tontu manghorhon dua pangantusion: ima panguhumon (penghukuman/ punishment) dohot tumpal haluaon (kebebasan/ keselamatan).

Dung sidung Tuhan Jesus patupahon pangajarion na di bagas joro di Jerusalem (Mark. 13), borhat ma Ibana manadinghon bagas joro i. Laho borhat manadinghon bagas joro i, ro ma sahalak sian angka sisean mamuji haulion batu dohot tongam ni angka jabu na di huta i (ay.1). Tontu batu dohot angka jabu na nidokna dison martudutudu ma tu angka jabu na adong di humaliang bagas joro. angka jabu ni ise do na adong dihumaliang bagas joro? ima jabu harajaon ni si Pilatus, angka na mora (bangsawan), halak na sangap, na mangula di pamarentaon, dohot angka malim, songon i nang haulion dohot tongam ni bagas joro na di Jerusalem i. Alai dialusi Jesus ma: “diida ho do jabu angka na bolon on? ndang pasombuon nanggo dua batu martinditindi na so gargaronna” (ay. 2). Hata on martudutudu tu hasesega ni bagas i. Alus ni Jesus on maralo do tu hata pamujion na nidok ni sisean i (ay. 1). Haulion ni bagas na di humaliang bagas joro, di sada tingki sega jala gargar do saluhutna i. Ndang adong na hot jala marhaujungan do saluhutna na masa di hasiangan on. Alus ni Jesus taringot hasesega ni bagas i martudutudu do i tu ajal ni hasiangan on dohot haroro ni Anak ni Jolma na ro di bagasan hasangapon dohot hamuliaon ni Jahowa Debata, jala haroro ni Anak ni Jolma i manalpuhon hamuliaon, hasangapon dohot hatongamon saluhut nasa na adong di hasiangan on.

Jumpang ma ari i, dung salpu haporsuhon ondeng, mangholom ma mataniari jala ndang marsinondang be bulan, mardabuan ma angka bintang sian langit i jala humuntal ma angka hagogoon ni parlangitan (ay. 24 – 25). Haporsuhan dia do na nidokna dison? Ima angka na masa di Mark. 13: 3 – 23 isarana angka pangaleleon, panggosagosaion, pangalaho na so uhum, dohot ragam haporsuhon na marharoroan sian angka panggomgomion, angka malim, nang sian angka horong na so manjanghon manang na manulak Jesus gabe Sipalua (Kristus/ Mesias), angka na manghaholongi dirina, impolan di perak, parhata manggang, parroha haginjangon, angka panginsahi, na so marningot lagu, angka na tois, na so marroha holong, pangoseose, panihasnihas, na so umboto mangorom, parmurukmuruk, na so marholong ni roha di na denggan, parjehe, parroha na neang, sipaburnang diri, holongan di hisap ni daging asa di Debata, angka parrumang hadaulaton alai marpangalahon na so denggan (songon halak farisi).

Mangholom ma mataniari dohot bulan jala ndang be dipatuduhon haulion dohot hatongamon marhite sondangna ala nunga salpu be saluhutna. Martudutudu ma holom ni mataniari dohot bulan tu hagogoon dohot hasangapon bangso na mardebatahon mataniari (isarana Mesir, Roma, Yunani) dohot bulan (isarana Persia, Mesopotamia). Songon i nang bintang maraburan sian langit jala humuntal ma angka hagogoon ni parlangitan. Jumpa ma ajal ni hagogoon dohot haulion ni angka parangan ni langit ima angka bintang dohot sude angka na adong di langit. Saluhutna i martudutudu tu haulion dohot hasangapon saluhut nasa na adong di hasiangan, sude harajaon, hagiot dohot huasona. Laos songon i do bangso manang harajaon na mambahen bintang dohot sude angka na di langit gabe sisombaonna (isarana Persia, Yunani dohot Roma). Saluhutna i ingkon do marujung jala ndang adong na hot di angka harajaon dohot di hasangaponna i.

Idoanasida ma Anak ni jolma i ro marhitehite ombun, mantat hagogoon dohot hasangapon godang (ay. 26). Ise do Anak ni jolma na nidokna di turpuk on? ima Jesus Kristus. somal do hata “Anak ni Jolma” martudutudu tu sahalak naung dipillit jala naung ditotophon gabe panuriang manang mesias. Panjouon Anak ni jolma marpardomuan do i tu parsuruon ni Jahowa Debata tu Anak-Na, ima Jesus Kristus (pat. Joh. 3: 16 – 17); Hata ni Jahowa naung gabe jolma jala mian rap dohot jolma (pat. Joh. 1: 14). Panjouon Anak ni jolma tu Jesus ima pabotohon hajolmaon hata ni Debata naung gabe jolma, jala pabotohon partinaonan, hamamateNa dalan laho panobusion ni jolma sian dosa. Anak ni jolma martudutudu do tu hamulian ni Jesus di haroroNa, di tingki i ma dipapungu ma saluhut jolma dohot harajaon gabe sada marharajaon, ima harajaon ni Jahowa Debata.  Ro ma Anak ni Jolma i marhitehite ombun (hata Indonesia didok: awan – awan; molo hata Gorik: nefele; molo di hata Inggris: cloud). Pangantusion taringot ombun ima hureta ni Jahowa Debata pabotohon huaso dohot hamuliaonNa, jala haroroNa na gabe Raja di saluhut angka raja jala Debata di saluhut debata. Anak ni jolma, ima Jesus Kristus ro papatarhon huaso dohot harajaon, huaso dohot hamuliaon ni Jahowa jala Ibana gabe Raja ni saluhut angka raja. Ndang adong na boi dipatudos hagogoon dohot hasangapon na naeng dipapatar Jesus Kristus merhite haroroNa nang pe saluhut hagogoon dohot hasangapon saluhut angka na adong di sude inganan dohot tingki dipapungu ndang adong na boi dipatudos tu hagogoon dohot hasangapon ni Jahowa Debata marhite haroro ni Anak ni jolma. Dung masa haroroNa i, papunguonNa ma saluhut angka na pinillitna i sian desa na ualu, sian suhi ni tano sahat ro di suhi ni langit (ay. 27) ima na pabotohon saluhut jolma na mangolu dohot na mate songon i nang pardisurgo papunguanna do di adapon habangsa ni Anak ni jolma i. Ingkon somba do saluhut nasa ulu ni tot di adopan ni habangsa Anak ni jolma i.

Diumpahon Jesus saluhut na masa i marhite umpama hau ara[3] (ay. 28). Di Luk. 13: 6 – 9 ima umpama ni Jesus Kristus taringot hau ara na so marparbue. Tarida do hau sian parbuena, jala molo parbue tontu marharoroan do sian bona manang hau inganan parbuena. Molo hau ara ingkon do mamparbuehon ara (nang pe di partingkian sisaonari adong do hamajuon parbinotoan na boi sada suansuanan alai marragam parbuena na mamangke sistem cangkok). Ndada asal marparbue alai parbuena i pe ingkon do berkualitas, bermutu. Hau ara ima gombaran hadameon, pandumaan, parasinirohaon ni Jahowa Debata, jala hatoguon tontu parbuena ima parbue ingkon do patupahon holong, hadameon, ulaon parasinirohaon, tidak menindas, tidak mengeksploitasi jala togu di angka ulaon na denggan (ida Gal. 5: 22 – 23) mardongan panghirimon di saluhut panumpahion dohot pangurupion ni Debata di ngoluna. Ndang masa be ganggu dohot holsoan, ndang masa be parbadabadaon, hosom, pangiburuon dohot angka ulaon na suman tusi (Gal. 5: 19 – 21 patudos 2 Tim. 3: 2 – 8). Dipangke Tuhan Jesus do angka tanda na masa di hau ara i ima tanda taringot partingkian na masa. Ia dung martunasi punsuna jala rungkar bulungna, ima tanda naung jonok partaonan las (ay. 28). Hata on martudutudu tu angka na masa ima ragam sitaonon, ragam angka ulaon na jat, ragam angka pangoseose dohot mangulahon na so uhum, masa penindasan manang ketidakadilan ima angka pangalaho na masa tanda lam jonok nama ajal ni hasiangan on. molo masa sisongon saluhutna i, naung jonok hasonggopona (ay. 29), ima hasonggopon ajal ni hasiangan on dohot haroro ni Anak ni jolma i. Laos Tuhan Jesus mempertegas marhite hata: “situtu do hatangkon tu hamu: na so tupa bangso on, so jolo songgop sasudena i” (ay. 30).

Ndang adong na hot di hasiangan on jala marhaujungan do saluhutna nasa na adong di hasiangan on. hasangapon, haulion, hamuliaon songon i nang na hansit, sitaonon, siporsanon dohot huaso na jahat pe salpu do saluhut nasa na ro sian portibi on. Ndang adong na hot (ay. 31). Ndang adong na boi diboan nanggo sarihit pe huaso, sangap, arta, sihumisik, pangkat dohot saluhut na masa dohot na di ibana boi boanonna molo jumpang masa haroro ni Anak ni jolma i. alai anggo hatangKi ndang olo salpu. Ima hata ni Jahowa, Debata na marsangap jala marmulia. Hata ni Jahowa, ima na so marharoroan sian portibi, na so ditompa jala ndang boi dirampas manang dipaso angka hagogoon dohot huaso na adong di portibi on. Hata ni Jahowa marharoroan do i sian Jahowa, marhite Hata i do ditompa langit dohot tano ro di saluhut nasa na adong di hasiangan on, songon i angka na adong di langit (seluruh bima sakti). Hata ni Jahowa na marharoroan sian Jahowa na mian rap dohot Jahowa sian hatongtongon tu hatongtongon.

Sadihari do masa i saluhutna? Sungkunsungkun on tontu mengarahkan pangantusionta partingkian masa i saluhutna. Di hata Gorik adong 2 hata taringot partingkian ima: parjolo hata kronos, ima partingkian ni hajolmaon dohot hasiangan on. partingkian on ima partingkian na lam tu jonokna ari haujunganna. Lam martamba umur manang partingkian ni jolma di hasiangan on marlapatan lam jonok nama ajalna sian hasiangan on. Lam martamba umur ni portibi on marlapatan lam jonok ma ajal manang hasusuda partingkian ni portibi on. hata na paduahon ima kairos, ima partingkian ni Debata. Partingkian kairos on martudutudu do tu partingkian na so marhaujungan, na hot jala manongtong. Sadihari do masa i saluhutna? Ndang na gabe kronos manontuhon sadihari partingkianna, jala ndang boi disuhat partingkian (hata Gorik: horas (jam, waktu, tanggal, hari, bulan, tahun, abad)) di hasiangan on. alai Jahowa sandiri do na mambuhul sadihari masa partingkian i (kairos). Lam jonok ro ajal ni hasiangann on (kronos) lam jonok ma ari haroro ni Anak ni jolma (kairos) i.

Ise do na umbotosa masa partingkian haroro ni Anak ni jolma i? ndang adong na umbotosa, nang surusuruan na di banua ginjang (parangan pardisurgo) nang Anak i pe; holan Ama i! (ay. 32). Ayat on pabotohon hahomion ni Ama i ima Jahowa. Debata ni Israel, Debata pargogo na so hatudosan jala na so tarhadodoan saluhut sangkapNa. Jahowa, Debata na manongtong jala hasangaponNa i manggohi saluhut portibi on. Holan Jahowa na umbotosa ala di tanganNa do saluhut partingkian nasa na adong (kronos dohot kairos). Guru tu Ibana do saluhut partingkian na masa, jala guru tu Ibana do Hata na sian Ibana. Ayat on martudutudu ndang guru tu Hata i anggo nampunasa Hata, ingkon saguru tu nampuna Hata i do angka Hata na sian Ibana, marlapatan Jahowa do nampuna Hata, jala Jesus Kristus do Hata ni Jahowa. Ndang tarsirang Nampuna Hata sian Hata na nidokNa, ai hataridaan ni nampuna Hata do Hata na dihatahon. Ndang tarsirang Jahowa, Ama i sian Jesus Kristus, AnakNa, ai hataridaan ni Ama i do Jesus Kristus. ido umbahen didok, holan Ama i do na umbotosa!

Antong tagam ma hamu, dungo ma hamu ai ndang diboto hamu, manang sadihari tingkina i! (ay. 33). Ay. 33 on ndang na laho pabiarbiarhon alai parenta laho paradehon diri. Dungo ma hamu jala jaga situtu ndang patuduhon sihabiaran manang kewaspadaan yang besar. Aha do siparadeon jala aha do sipatupaon? Unang dok di bagasan roham, ingkon mangulahon na denggan ma ahu asa sahat au tu surgo, manang ingkon hulehon ma diringku dohot sude artangku tu angka na pogos asa sahat au tu surgo. Ndang ala ni pambahenan hita asa sahat hita tu surgo, manang tu hangoluan i. jala ndang na gabe tiket haburjuonta, ulaon na denggan dohot sipatupaonta i tu harajaon ni Debata. Antong aha do lapatanna hita mangulahon na denggan, manghaburjuhon pangajarion dohot ngolu marhadaulaton dohot patupahon na denggan i molo ndang boi pasahathon hita tu Surgo, ima harajaon ni Ama i? Jesus Kristus mandok: “Ahu do dalan i, Ahu do hasintongan, Ahu do hangoluan! Ndang adong na sahat tu Ama i anggo so marhite Ahu” (Yoh. 14: 6). Sian pandok ni Jesus i holan marhite jala di bagasan Jesus Kristus do hita boi sahat tu Ama i, ima Jahowa Debata dohot harajaonNa. Halak na porsea ima halak na mian di bagasan Jesus Kristus, antong halak na mian di bagasan Jesus Kristus ima halak na mamparbuehon hasintongan, hatigoran, uhum na sintong dohot na tigor, marhadaulaton na sintong, mangulahon parasinirohaon dohot nasa ulaon na denggan. Halak na porsea i ma hau ara jala angka ulaonna i ma parbue hau ara i.

Di ayat 34 dipangke Jesus umpama taringot halak na marhutasada na manadinghon jabuna, disagihon do huaso tu angka naposona, tu ganup siulaonna be, jala sijaga pintu i didokhon marjaga. Halak na dison ima Jahowa, Debata jala Panompa na so hatudosan. Jabu nanidokna dison ima portibi on (kosmos) dohot saluhut nasa na tinompa songon i nang angka planet dohot bima sakti na adong. Jahowa do nampuna i saluhutna. Disagihon do huaso tu naposoNa ima angka jolma na ditompa tumiru rupaNa (1 Musa 1: 27). Asa marhite huaso i boi ma jolma mamangke denggan, melestarikan dohot manjaga jabu i (portibi on). Naposo na nidokna dison ima angka malim, pamarenta, polisi, pangobati, pangajari, dohot angka ulaonna asing dilehon huaso hombar tu ulaon na siulahonna. Asa marhite ulaon i boi mamparbuehon parbue songon halak na mian di bagasan Jesus Kristus. Sijaga pintu ima parangan (polisi, tentara), panguhum (hakim, pengacara atau seorang yang mengerti hukum) ima halak na pajongjonghon uhum na tigor dohot na sintong, jala patoguhon uhum i tu saluhut jolma di hasiangan i. Antong dungo ma hamu, ai dang diboto sadihari ro tuan nampuna bagas i, manang bot ni ari manang di tonga borngin, manang di na martahuak manuk, manang di torang ni ari. So tung jumpangsa hamu modom, di na ro Ibana tompu! (ay. 35 – 36). Ayat on tontu ma laho mempertegas asa dungo ma angka na porsea  jala na manangihon hata i (ay. 37). Unang ma gabe tarpodom. Somalna halak na tarpodom ima halak na: maranganangan, na loja, na so mulaulaon. Halak naung tarpodom ndang diboto be aha na masa jala ndang diboto be aha siulahonna.

 

Hahonaan ni Turpuk

            Turpuk jamita on mangarimpun tolu hahonaan:

1.      Partingkian ni si Markus uju panggomgomion ni si Nero. turpuk on pabotohon anggo kaisar Nero dohot harajaonna ima harajaon na olo salpu. Molo pe uju i harajaon ni Rom di panggomgomion ni si Nero gabe harajaon na gogo, na tongam, sihabiaran angka harajaon di humaliangna, di sada tingki salpu jala gargaron ma harajaon i. salpu do harajaon i jala saluhut tahitahi dohot uloan na jahat i pe salpu. Martingki do tarida hasangapon dohot hagogoon harajaon ni si Nero jala ro ma tingkina sega ma harajaonna i marhite na bunuh diri si Nero di bagasan hasangapon dohot hamuliaon ni harajaonna na salpu i. ragam do angka pangalaho na jat dohot na bernit dibahen si Nero tu halak Kristen di sandok harajaon ni Rom tarlumobi na adong di huta Rom. Alai nang pe songon i, diajarhon jala disosoi do halak Kristen unang gabe mandele jala gale marhaporseaon jala hot di panghirimon tu Jahowa Debata. Haroro ni harajaon ni Debata nunga masa di padan na robi, di partingkian ni Jesus, di partingkian padan na imbaru dohot di tingki sinuaeng. Ia disi dipapatar Goar ni Jahowa, disi ma harajaon ni Debata patar. harajaonNa i manalpuhon harajaon na jat. Harajaon ni Jahowa do manaluhon jala manegai harajaon ni Misir; harajaon ni Jahowa do manaluhon jala manegai harajaon ni Babel; harajaon ni Jahowa do manaluhon nang harajaon ni Rom; jala harajaon ni Jahowa do manaluhon dohot manalpuhon saluhut harajaon na adong di portibi on. Harajaon ni Jahowa do manalpuhon, maniaphon, manegai harajaon na jahat, harajaon na lalim, harajaon na patupahon na so uhum tu na ginomgomanna. Harajaon ni Debata do harajaon dame, harajaon na adong di bagasna uhum na sintong. Harajaon ni Debata do manaluhon harajaon ni sibolis pangago dohot harajaon ni dosa na jorbut i marhite Jesus Kristus.

2.      Di partingkian sisaonari managam dope hita haroro dohot hapapatar ni harajaon ni Jahowa marhite haroro Anak ni jolma i, ima haroro ni Jesus Kristus na paduahalion. Ndada songon harorona na parjolo anggo haroroNa na paduahalion on. HaroroNa paduahalion ima gabe panguhum na tigor dohot na sintong, na ro ma Ibana manguhumi na mangolu dohot na mate. Antong aha do na boi siparedeonta andorang so masa dope haroro ni Jesus na paduahalion i? Hita na mangolu di tingki saonari, aha na boi siparadeon? Paradeon ni rohanta ima parbue ni haporseaonta, parbue na mian hita di bagasan Jesus Kristus. Halak na mian di bagasan Jesus Kristus ima halak na mamparbuehon parbue ulaon na denggan, marhadaulaton na sintong, pajongjonghon uhum na sintong, ulaon parasinirohaon dohot lan na asing.

3.      Unang be tarpodom jala tongtong ma dungo. Somal do molo dung sahat minggu Adven godang do halak Kristen dang be manghangoluhon paradehon diri marhite marhamubaon ni roha dohot ngolu na lam pajonokhon diri tu Jahowa. Torop do halak Kristen molo sahat di minggu Adven gabe gok sihobasan, gok sipingkiron gok sipatupaon, hape manghorhon halojaon, ungutungut, parsahiton, parbadaon, dohot angka ulaon na hombar tusi. Dihirim jala dipangidohon do di minggu Adven asa manghorhon hadameon, las ni roha, ulaon parasinirohaon, dohot hamubaeon ni roha lam tu denggan ni parsaoran na markeluarga, marhuria songon i na marsahuta dohot na maraleale. Dungo ma hita! Unang be lalap holan mangoloi hisap ni daging dohot hagiot ni portibi on. Dungo ma hita. Ai uju di hasianganon do hita boi paradehon diri. Hidup ini adalah kesempatan kita mempersiapkan diri menantikan Sukacita dan kemenangan dalam kerajaan Allah melalui buah iman dan buah Roh sebagai bentuk ibadah kita sesungguhnya di minggu adven. Salam Advent

---

[1] Dalam tahun liturgi gereja-gereja protestant (misalnya, HKI, HKBP, GKPI, dsb.) maupun gereja Katolik Roma, minggu Adven dijalankan selama 4 minggu. Setiap minggunya memiliki thema yang berbeda-beda, dimana thema-thema tersebut memiliki suatu dimensi eskatologis. Ada pun thema-thema yang dituliskan ialah: (1) Adven I yang memiliki thema Tuhan yang akan datang pada akhir zaman; (2) Adven II  yang memiliki thema pertobatan untuk menyongsong Tuhan; (3) Adven III yang memiliki thema kedatangan Tuhan di dunia ini sebagai penyelamat. (4) Adven IV yang memiliki thema sukacita menyongsong Tuhan (Pujian Maria).

[2] Kaisar Nero dengan nama lengkap Nero Claudius Caesar Augustus Germanicus merupakan kaisar yang sangat bengis dan kejam bahkan kaisar yang tidak memiliki hati manusia selama pemerintahannya. Tanggal 18 Juli 64 M Nero membakar kota Roma dan membuat tuduhan bahwa orang Krsiten yang telah membakarnya. Tuduhan ini membuat orang Kristen mengalami penindasan, tekanan, pengejaran, dan penangkapan. Orang Kristen diperhadapkan dengan binatang buas yang lapar, yang siap menerkam orang Kristen. Tidak ada tempat yang aman bagi orang Kristen pada masa pemerintahan Nero.

[3] Pohon ara (bhs. Latin: ficus carica) dikenal sebagai pohon dengan buah yang banyak manfaat baik kepada manusia maupun kepada hewan lainnya dapat tumbuh bahkan di tanah bebatuan. Pohon ara sering dihubungkan pada janji – janji Allah mengenai kemakmuran dan peringatan yang dipakai para nabi (Yer. 5: 17; Hos. 2: 12; Yoel 1: 7, 12; Hab. 3: 17). Pohon ara juga sering ditanam bersamaan dengan pokok anggur sebagai lambang kesejahteraan dan kemakmuran (1 Raj. 4: 25; Mi. 4: 4; Zak. 4: 10 bdk. 2 Raj. 18: 31; Yes. 36: 16). Pohon ara yang lambat buahnya membutuhkan jangka waktu tertentu untuk berbuah dan ketika pohon itu tidak berbuah maka akan ditebang sebagai lambang pemusnahan, tetapi ketika berbuah terlebih bersamaan dengan pokok anggur yang juga berbuah maka lambang perdamaian dan karunia Allah. Pohon ara adalah pohon yang kuat, rindang seperti yang dinaiki oleh Zakheus ketika ia hendak melihat Yesus.  

BAHAN JAMITA EPISTEL MINGGU ADVEN I, 03 DESEMBER 2023: PSALMEN/ MAZMUR 80: 1 - 8

 BAHAN JAMITA EPISTEL
MINGGU ADVENT I
Minggu, 03 Desember 2023
PSALMEN 80: 1 - 8
 

JAGA JALA DUNGO MA HAMU MANOMUNOMU HARORO NI KRISTUS

Pdt. Daniel Bonardo Pane, M.Th.

 

Patujolo

            Horas!!! Salam advent. Masuk ma hita di minggu Adven parjolo na dipataridahon na pagalakhon sabatang lilin sian opat lilin na jonjong di jolo. Jala di minggu Adven parjolo on disuarahon do taringot tu ajal ni hasiangan on dohot managam haroro ni Jesus Kristus na paduahalion, ima Sipalua! dung salpu angka harajaon, hasangapon dohot hamuliaon nasa na adong di hasiangan on. Managam haroro ni Jesus Kristus sai diadophon do dohot sitaonon, parungkilon dohot haporsuhon na masa di hasiangan on.

Tung ise be na boi paluahon ahu sian sitaonon dohot parungkilon na masa on? sadihari do salpu sitaonon, haporsuhon dohot parungkilon na masa on? tung na so margogo do Jahowa laho paluahon ahu sian sitaonon, parungkilon dohot haporsuhon on? tontu hea do tubu sungkunsungkun on di angka jolma na marsitaonon, na marungkil manang mangadopi haporsuhon bolon huhut na paimahon sadihari ma salpu saluhutna i. Turpuk jamita epistel on ima sada ende ni parpsalmen na marisihon sihirimon, panagamon ni parpsalmen managam haroro ni Sipalua, ima Mesias na paluahon ibana sian sitaonon dohot parungkilon na masa tu ibana. Aha do harua na masa tu ibana jala haluaon na songon dia do dihirim ibana marhite endena on? antong, masuk ma hita tu hatorangan ni turpuk asa boi taralus jala aha do na naeng sidohononna tu hita marhite ende psalmen on.

 

Hatorangan ni Turpuk

            Anggo Psalmen 80 on ima psalmen na marisihon ende sian si Asap (ay. 1). Asap ima anak ni si Berekhya pahompu ni si Simea, ima sahalak na malo di musik sian horong ni marga Lewi pomparan ni Gerson, ima malim uju Daud raja manggomgom harajaon bolon Israel. Asap manurathon 12 psalmen ima psalmen 50, 73 – 83 rap dohot si Heman dohot si Etan ima parende na marende di Bagas joro (ida 1 Kronika 25: 1 – 31; 2 Kronika 5: 12; 20: 14; 29: 13; 35: 15; Esra 2: 41; 3: 10; Neh. 7: 44; 11: 17; 12: 27 – 47). Sian hatorangan i boi ma idaonta anggo si Asap martugas ma uju Daud sahat tu Salomo manggomgom harajaon ni Israel na bolon. Ende na sian si Asap on dipangke do gabe ende hadaulaton (nyanyian liturgi) halak Judah na dijaha responsoria.

            Nang pe mangula si Asap gabe parmusik dohot panurat ende uju si Daud dohot si Salomo, alai disurathon ulang do ende na i  di uju Hiskia manggomgom Judah (hirahira taon 729 – 687 andorang so tubu Jesus) sahat tu Amon raja Judah (696 – 642 andorang so tubu Jesus). Sian partingkian on boi do idaonta psalmen on disurathon jala diendehon andorang so masa dope habuangon jala andorang so masa hasesega Yerusalem. Aha do na masa hatiha i? andorang so Hizkia gabe raja Judah masa do perang saudara Israel utara (na ginoaron Efraim manang Samaria) maralohon Israel dangsina (na ginoaron Judah) ima uju panggomgomion Yotam dohot Ahas manggomgom Judah. Uju i Israel Utara digomgomi raja Pekah mardongan dohot Siria na ginomgoman si Rezin maralohon Judah na mardongan dohot Asyur na ginomgoman ni si Tiglat-Pileser III dohot Salmaneser V. Talu manang salpu ma harajaon ni Israel Utara songon i harajaon ni Siria, jala Judah pe gabe negara boneka harajaon ni Asyur. Disi ma Judah gabe madabu tu dosa ala diulanasida ma angka na so uhum tu angka na pogos dohot na sopot so marama sopot so marina songon i nang angka na mabalu, Hatigoran ni uhum dipapeol, panguhum boi disisip (disuap), masa ma korupsi, pajak pe dipatimbo asa boi lehononna deba tu Asyur jala pasingkophon angka naung sega uju masa parporangon maralohon Israel Utara – Siria naung talu i. Songon i nang pardebataon na disomba, ala negara boneka  ni Asyur do harajaon ni Judah tontu halak Judah ingkon do parsidohot marsomba tu debata ni Asyur. Dang margogo be raja ni Judah maralo raja ni Asyur jala gabe songon hatoban ni raja Asyur do anggo raja Judah.

            Laos na masa i ma na naeng dialo si Hiskia dungkon hundul ibana gabe raja manggomgom Judah. Dipatupa si Hiskia do paraloanna maralohon Asyur, marhite na olo ibana rap dohot angka bangso na maralo tu Asyur isarana Mesir, jala disegai manang dirumpakhonna parsombaon ni Asyerah ima debata ni Asyur di dolok parsombaon Arad. Tontu patubuhon rimas ni Asyur do pangalaho ni Hiskia on jala na boi panghorhon lam tu hansitna angka sitaonon manang parungkilon na dipanghilalahon halak Judah. Mardongan ma Hiskia tu harajaon Misir maralohon Asyur, alai talu do nasida maralohon Asyur, uju Sanherib manggomgom Asyur. Dung masa i, lam tu hansitna ma masa tu halak Judah jala lam tu dangolna ma pambahenan ni Asyur tu. Dung marujung ngolu si Hiskia, nangkok ma si Manasye manggomgom Judah dung i diuduti ma si Amon. Uju manggomgom si Manasye dohot si Ammon di Judah lam tu lumlamna jala lam tu holomna na masa di harajaon i, lam marsilomolomo angka na mora dohot na sangap manggosagosa angka na pogos, na mabalu dohot na sopot so marama sopot so marina, lam tu hansitna ma partinaonan, dohot parungkilon na masa tu halak Judah na pogos, angka na mabalu dohot na sopot so marama dohot so marina. Hatigoran ni uhum lam tu peolna, angka panguhum pe disisip asa ndang manghonai uhum angka na mora dohot na sangap. Lobi sian na hea masa uju panggomgomion ni si Yotam dohot si Ahas na masa uju manggomgom si Manasye dohot si Amon. Angka ulaon hadaulataon pe dang diharingkoton be. Songon bangso na so adong raja manang parmahan ma Judah, songon anak ni manuk naung magoan indukna. Marserak jala lam tu gogona anggukanggukna mangalului pangurupion asa dipalua sian saluhut angka na masa i.

            Ayat 2

Di ayat 2 on adong tolu pandohan manang panjouon ni parpsalmen na pabotohon taringot hadirion ni Jahowa Debata, na gabe Parmahan dohot na badia: parjolo ale Siparmahan Israel! Parmahan na nidokna ima Jahowa Debata. Sekilas pandang hata Siparmahan Israel paingothon hita taringot ende ni si Daud taringot Jahowa na gabe Siparmahanna (ida Psalmen 23). Ise do Israel dison? Ndada bangso Israel na nidokna dison, alai si Jakob naung marganti goar gabe Israel dung masa parsiranggutan ni si Jakob di sumur Jabok (1 Musa 32: 23 – 32). Tung dipanghilalahon si Jakob do songon dia parmahanion ni Jahowa Debata di ngoluna uju mangulahon gabus ibana tu amana si Ishak; uju masa pelarianna ala biar ni rohana mida hahangna si Esau tu huta ni si Laban, tulangna laos na gabe simatuana; ragam do hinahansit dohot sitaonon ni si Jakob uju masa i saluhutna. Nang pe songon i, tung so tarbunihon do holong dohot panarihonon songon i nang parmahanion ni Jahowa di Ibana. Ndang na mandok na diampini Jahowa saluhut dosa dohot pangalaho na jat ni Jakob, alai ragam do dalan na binahen Debata dalan laho pasingothon, paingothon si Jakob di hasalahanna jala dalan ni Jahowa patuduhon hasintongan ni uhumNa dohot holong ni rohaNa tu si Jakob. Dipatorang jala dibaritahon si Jakob ma saluhut panghilalaonna di bagasan parmahanion ni Jahowa tu ianakhonna ima si Josep uju na mangaing anak ni si Josep ibana, laos mamasumasu dua ianakhon ni si Josep ima si Epraim dohot si Manasse (1 Musa 48). Tung mansai sonang jala na so tupa hurangan manang aha pe ibana mian di bagasan parmahanion ni Jahowa, Debata. Dipapos do rohana taringot tu panarihonon, pangondihonon, pangaramotion ni Jahowa di ngoluna, dao ma angka ganggu, biar ni roha songon i nang pandelean. Paduahon, Siadu Josep, songon birubiru. Martudutudu do on tu na masa tu si Josep uju na digadis angka hahangna ibana tu halak Misir. Ndang na dipasombu Jahowa si Josep punjung mangodopi angka hata na so tutu dohot pambahenan na so uhum sian inanta ni si Potifar di luat Misir. Jahowa sandiri do marmahani ngolu ni si Josep nang pe dihurung ibana holan ala ndang olo ibana mangoloi hagiot daging ni inanta ni si Potifar. Alai nang pe songon i, ndang mansohot pandonganion dohot parmahanion ni Jahowa tu si Josep. Diparbisukhi jala dilehon Jahowa tu si Josep parbinotoan jala pangantusion umbahen boi ibana pabotohon pangantusion taringot nipi ni si Parao. jala pangapation nipi i, pabotohon taringot pambahenan ni Jahowa sandiri do na patupahon haluaon tu halak Misir marhite si Josep. Na patoluhon Na marhabangsahon kerubim, na martudutudu tu habadiaon dohot hasangapon habangsa ni ni Jahowa Debata. Angka surusuruan Kerub martugas do i laho manjaga angka benda – benda na badia ni Debata. Somal do surusuruan Kerub dipapeakhon marhite ukiran kayu di inganan hapataron habadiaon harajaon dohot hasangapon ni Jahowa, isarana di poti parasian (tabut perjanjian).  

“Tangihon ma hami” (ha’^azînāh) ima sada pangidan ni sasahalak na mangidohon panatapon na hibul (fokus untuk mendengar, memberi hati untuk mendengarkan). Hata ha’^azînāh molo marharoroan sian sahalak na gale tu na gogo, sian na lea tu na sangap, sian jolma tu Debata ima mangidohon asi ni roha, mangidohon pangurupion dohot haluaon di konteks hagaleon, haleaon, hadosaon dohot sitaonon manang parungkilon. Halak na manangihon ima halak na mangolu. Antong panjouon “tangihon ma hami” ditujuhon do tu Jahowa, Debata na mangolu jala na marsangap na marsihundul di habangsaNa na gok hamuliaon. Tangihon ma hami, ima hata pangidoan halak Judah asa tung tangi, manatap ma Jahowa di alualu, di anggukangguk, holso dohot na masa di parngoluan ni halak Judah. Songon Jahowa na manatap jala manangihon joujou, anggukangguk halak Heber uju parhatobanon di Misir, jala panangihonon i marudut tu haluaon na pinatupaNa (ida 2 Musa 3: 7 – 8; 2 Musa 6: 5 – 7), songon i ma pangidoan halak Judah tangiangnasida di ay. 2 on

Ayat 3 – 8

Ima pangidoan manang tangiang ni halak Judah na naeng ditangihon Jahowa:

1.      Sungguli ma hagoonmu di jolo ni Epraim dohot Benjamin dohot Manasse, jala sai ro ma Ho mangurupi hami (ay. 3). Ayat on paingothon hita di 4 Musa 2: 17 – 22; 10: 21 – 24. Ima angka parangan na dipapungu hombar tu margana. parangan ni Efraim dohot Manasse ima paranagan na gumogo di angka bangso Israel Utara, jala parangan ni si Benjamin, siampudan ni si Jakob sian si Rahel (1 Musa 35: 16 – 20) jala marga na ummetmet na jotjot diperebutkan bangso Israel Selatan (Judah) dohot Israel Utara (pat. 1 Raj. 12: 20 – 21). Jahowa do na mampargogoihon jala pamonanghon parangan Efraim dohot Manasse songon i Benjamin maralohon angka bangso – bangso na marporang maradophon Israel.

2.      Ale Debata, sai pasuang ma hami, jala pasihar bohiM, asa malua hami (ay. 4). Ima sambutan jemaat na mangendehon psalmen on. Ende on ma marisihon pangidoan jala panghirimon asa dipasuang ma nasida jala dipasihar bohiNa asa malua nasida sian sitaonon, parungkilon dohot ragam haporsuhon na masa. dipasuang ma nasida (dipulihkan) mulak muse songon hataridaan bangso ni Jahowa, bangso na pinarmahan ni Jahowa, bangso na na pinillit Jahowa gabe bangso na papatarhon hamuliaon dohot huaso ni Jahowa na so hatudosan, manghirim di hasadaon ni bangso i songon na masa uju masa si Daud (bandingkan ay. 19; Ende Andung 5: 21; Jer. 31: 8). Sai marasiroha ma Jahowa marhite sondang ni bohiNa, jala angka musuna pe mabiar, tahuton jala munsat sian Judah. Molo masa songon i, malua ma nasida sian sitaonon, parungkilon dohot ragam angka haporsuhon.

3.      Ale Jahowa, Debata Zebaot, sadia leleng on marmusu tihus Ho mida tangiang ni bangsoM (ay. 5). Ayat on mempertegas pangidoan ni Judah mangidohon haluaon sesegera mungkin terjadi. Tung dipanghilalahon bangso Judah do na masa sitaonon, parungkilon dohot haporsuhon ima ala rimas ni Jahowa tu bangso Judah ala dang hombar be pangalaho dohot pambahenan ni bangso i tu na hinalomohon ni Jahowa. Dohot do bangso i ingkon marsomba debata ni Asyur ala daerah/ kerajaan jajahan ni Asyur do Judah. Molo pe dipagogonasida tangiang jala manganggukhi ndang na gabe i dalanna umbahen so rimas ni Jahowa. Tung hansit situtu bangso Judah i mida piarpiar rimas ni Jahowa marhite angka na pasombuonna masa hajahaton ni. “Jahowa, Debata Zebaot” (ay. 5, 8 dohot ay. 15) ima panghatindanghonon ni Judah taringot huaso, hamuliaon dohot gogo ni Jahowa na so hatudosan mangatasi jala manggohi saluhut nasa na adong di hasiangan on dohot sandok nasa na ditompa. Panghatindanhonon diadophon do tu na masa tu halak Judah ima bangso na so margogo be.

4.      Dipapanganhon Ho do tu nasida (Judah) roti iluilu, jala dipanginumhon Ho do tu nasida (Judah) iluilu martahutahu (ay.6), dibahen Ho do hami ripe badaan ni hombar hundulnami, jala sai dielesi angka musunami do hami (ay. 7). Dua ayat on gombaran sitaonon, na hansit dohot haporsuhon na dipanghilalahon Judah, molo pe saluhut na dipanghilalahon i dipasahat secara hiperbola na manggombarhon borat jala dokdok situtu hansitna na ditaonnasida i. sitaononna i gabe siparengkelon, gabe olok-olokan bangso humaliangna (ida Psalmen 79: 4). Somal do masa sisongon i molo sega sada bangso na gogo hian, gabe siparengkelon jala olok-olok do tu angka bangso na asing, khususnya musuna. Olok – olok on ima mangengkelhon nunga talu be Jahowa Debata ni Israel i tu debata ni Assyur, ima Asyerah. Ndang margogo be Jahowa mangurupi jala paluahon Judah sian angka na masa i.

5.      Dungi i dialusi ruas ma muse di ay. 8 songon di ay. 4, ditabahon ma Debata Zebaot ima panghatindanghonon ni hadirion ni Jahowa, Debata. Debata na pargogo na so hatudosan. Gogo dohot huasoNa mangatasi saluhut gogo dohot huaso nasa na adong di tano on di sude inganan dohot di sude tingki. Ibana na so talu maralohon Asyerah songon na niengkelhon bangso humaliang i. Jahowa do na paloashon masa saluhutna i, Jahowa do na patupahon pamalosan tu angka naung masa i, jala Jahowa sandiri do na manalpuhon saluhutna i. ima haluaon tu dihirim Judah marhite endena on.

 

 Hahonaan ni Turpuk

            Marhite hatorangan ni turpuk adong do 5 poin na gabe hahonaan ni turpuk jamita on:

1.      Sadari on ndang marhaujungan dope sitaonon, parungkilon dohot haporsuhon masa tu ganup jolma. Jala ndang adong nanggo sada jolma na so hea marsitaonon, marungkil manang manghilalahon na hansit na bernit dohot ragam haporsuhon na masa nang pe na masa ala na binahen ni jolma manang na binahenna sandiri. Molo pe adong jolma na mangasahon gogona, mangasahon siadonganna, mangasahon saluhut na di ibana mangadopi saluhutna, jala na asing mangasahon donganna na dianggap boi mangurupi ibana malua sian sitaonon, parungkilon manang haporsuhon na masa, jala adong muse na manghirim jala mangasahon Jahowa laho mangurupi jala paluahon ibana sian sitaonon, haporsuhon dohotn ragam parungkilon na dipanghilalahonna. Boha do hita di tingki saonari, halak na dia do hita molo masa sitaonon, parungkilon dohot haporsuhon na masa? na mangasahon gogo dohot siadongan manang hadirionna manang na mangasahon donganna manang portibi on manang mangasahon Jahowa Debata?

2.      Naeng ma hita mangasahon Jahowa Debata. Halak na mangasahon Jahowa ndang na mandok na holan hundul, modom ibana paimahon pangurupion dohot haluaon na pinatupa ni Jahowa. Halak na mangasahon Jahowa ima halak na tongtong manghirim di panumpahion, pangurupion dohot haluaon na sian Jahowa; halak na mangharinggashon manjaha, mamparsiajari, mamparhusorhusor laos manghulahon hata ni Jahowa. Dung i marparbue ma saluhutna i di angka ulaon parasinirohaon, ulaon parange na denggan songon parbue na manjaha, mamparsiajari, mampahusorhusor hata ni Jahowa.

3.      Unang ma mardosa hita molo songgop sitaonon, parungkilon dohot haporsuhon. Torop do halak na marsitaonon, marungkil dohot mangadopi haporsuhon gabe patubu dosa marhite: mencurigai seseorang menjadi dalang atau pelaku gabe marungkil, marsitaonon ibana; menyalahkan diri sendiri secara akut. Boi do itabahen sitaonon, parungkilon manang haporsuhon na masa gabe rujiruji taringot ulaon na salah naung diulahon. Molo masa i, tubu ma roha panolsolion jala roha na olo paubahon dirina. Dang be jumpang di rohana, na so marlapatan be ibana, manang na so mararga be hita. Marhite turpuk jamita on mangajarhon tu hita, molo pe marsitaonon, marungkil manang mangadopi haporsuhon na masa unang ma nian ala ni pangalahonta manang upa na binahenna sandiri. Molo pe masa sisongon i, marhamubaon ni roha jala unang be ulahon angka hajahaton i. naeng ma sitaonon, parungkilon dohot haporsuhon ala ni togu ni haporseaonta, ulaonta na sintong dohot na denggan. Nang pe sipata gabe siparengkelon do i sian angka jolma na so togu marhaporseaon ima jolma na so mardebatahon Jahowa.

4.      Adong do hata ni ende ni sian panbers mandok: haruskah hidupku terus begini dengan derita yang tiada akhir, ke manakah jalan yang harus kutempuh agar kubahagia, laos di reffrein didok “Aku tak sanggup lagi menerima derita ini, aku tak sanggup lagi menerima semuanya”. Marhite hata ni ende i boi do botoonta songon dia do hansit, borat jala bernit ni sitaonon na niadopanna jala hirahira na so margogo ibana di sitaonon na masa tu ibana. Tudia ma dalan sidalanon, tudia ma langka silangkahon asa boi malua sian sitaonon manang parungkilon na ragam haporsuhon na masa.

5.      Di minggu Adven I on paingothon hita taringot ajal ni hasiangan on, ajal ni hasangapon dohot hamuliaon na adong di portibi  on, ajal ni gogo dohot pangkat, ajal ni saluhut na masa dohot nasa na adong di portibi on. salpu do saluhutna nasa adong di hasiangan on. dang adong na hot. Alai anggo Jahowa, Debata Panompa jala Parasiroha dohot Pargogo na so hatudosan na hot ro di salelengna do. Ibana na ro laho mangurupi jala patupahon haluaon tu hita. Ibana na manalpuhon saluhut angka na masa di hasiangan on, jala papatarhon hatongtongon huaso dohot hamuliaon ni Jahowa. Di Ibana ma harajaon, hasangapon dohot hamuliaon sadari on, ro di saleleng ni lelengna, amen.

BAHAN JAMITA EVANGELIUM MINGGU XII DUNG TRINITATIS, 27 AGUSTUS 2023: 2 SAMUEL 7: 25 - 29

 BAHAN JAMITA EVANGELIUM
MINGGU XII DUNG TRINITATIS
Minggu, 27 AGUSTUS 2023
2 SAMUEL 7: 25 – 29

PANGHATINDANGION BAGABAGA HALUAON NA SIAN JAHOWA

Pdt. Daniel Bonardo Pane, M.Th.

Patujolo

            Horas ma tu hita saluhutna! Dame dohot asi ni roha na sian Jahowa Debata, na sumurung sian saluhutna angka roha dohot saluhut pangantusion ni jolma ima na tongtong mangaramoti jala manggohi hita saluhutna, amen. Ra, hea do hita mandapot bagabaga sian jolma na asing. Tontu bagabaga i ima angka panghirimon na manghorhon las ni roha, pangomoan dohot na boi pasonang roha. Hata bagabaga jotjot do dipasahat sasahalak na naeng gabe uluan, caleg manang na gabe partogi di sada luat. Dipasahat do bagabaga dalan asa ditanda halak ibana; dalan menarik hati dan perhatian halak dipillit jala pasauthon sangkapna i. Torop jolma boi mandok jala mambahen bagabagana, alai ndang songon toropna jolma boi pasauthon sude angka na binagabagahonna i. holan dapot na niluluanna, dung hundul ibana di hundulanna na sangap i ndang ingot be ibana di bagabagana i, jala ndang ingot tu jolma na manangihon bagabaga i. tubu ma pandelean dohot kekecewaan sian angka naung manangihon jala mandapot bagabaga i.

            Jamita minggu XII dung Trinitatis on ima tangiang ni raja Daud taringot bagabaga Jahowa Debata na sahat tu Ibana. Bagabaga na sahat tu si Daud ima bagabaga taringot sipalua manang panggomgom na marharoroan sian pomparanna. Asa lam tu antus hita mangantusi taringot tangiang ni si Daud na marpardomuan tu bagabaga ni Debata tu ibana, masuk ma hita tu hatorangan ni turpuk jamita on.

 

Hatorangan ni Turpuk

            Buku II Samuel ima udut ni buku I Samuel na manaringoti taringot panggomgomion ni raja Daud sian luat Judah (tungkan dangsina ni Israel (ida II Sam. 1 – 4)) sahat tu saluhut bangso Israel na sampulu dua marga (Israel Utara dohot Israel Dangsina (ida II Sam. 5 – 24)). Sian hatorangan i boi ma anutsanta buku II Samuel on pabotohon taringot sejarah harajaon ni Israel dungkon gabe raja ibana taon 1010 – 970 andorang so tubu Jesus Kristus na disurathon sada kelompok teolog Israel na digoari kelompok deutronomis.[1]

            Dungkon gabe raja si Daud manggomgom saluhut Israel (utara dohot dangsina) dipanghilalahon ibana do pandonganion, pangaramotion, dohot keberpihakan  ni Jahowa Debata di ngoluna sandiri. Jahowa Debata do na mamillit jala na manotophon si Daud marhite si Samuel gabe raja gumomgom Israel singkat ni si Saul (1 Sam. 16: 1 – 13). Ndada holan na mamillit jala manotophon Jahowa tu si Daud, dohot do na mandongani, mangaramoti jala paluahon si Daud sian ragam angka na jat na dipatupa angka bangso humaliang Israel (1 Sam. 17: 42 – 58; 1 Sam 30 – 31)  dohot si Saul na so manghalomohon si Daud gabe raja gumomgom Israel (I Sam. 19: 1 – 7; 20: 24 – 34; 26: 1 – 12) sahat tu punsu ni harajaonna manggomgom saluhut marga Israel.

            Nang pe nunga sahat tu punsu harajaonna adong dope na hurang dipanghilalahon ibana, songon na hurang singkop harajaonna manggomgom Israel jala patuduhon habalgaon dohot hamuliaon harajaon Israel rea di sandok Israel dohot di sandok bangso humaliang Israel. Na hurang ima ndang ojak jala ndang jongjong dope bagas joro di harajaonna. Jala marsangkap ma si Daud laho pajongjong bagas joro, jala dipabotohon ma sangkapna i tu panurirang Natan (2 Sam. 7: 1 – 3). Molo hasomalan bangso Timur Dekat Kuno (Ancient Near East) mansai ringkot do hajongjongon bagas joro di sada harajaon. Ndada holan inganan parsaorannasida laho patupahon parsombaon tu debata na disomba jala dihaporseai alai hataridaan dohot hapapataron hagogoon, hamuliaon, hasangapon ni debata na disomba. Molo dipaadop tu Israel, Bagas Joro ima hataradiaan dohot hapapatar ni hagogoon, hamuliaon, dohot hasangapon ni Jahowa Debata dohot hapapatar na mian do Jahowa di tongatonga harajaon ni Israel. Tutu do andorang so jongjong bagas joro i, nunga dipajongjong bagas parlapelapean inganan habadiaon ni Jahowa Debata na digoaranna undungundung habadiaon ni Jahowa (tabernakel) inganan parpunguan Israel. Di tabernakel i adong do bilut inganan na sun badia, ima inaganan parmianan poti parasian (tabut perjanjian) na marisihon replika batu na tarsurat Torah, manna dohot tungkot ni si Aron. Ima hataridaan Jahowa sandiri na mian rap dohot bangso Israel jala manggomgom saluhut Israel.

            Tung mansai uli situtu do sangkap ni si Daud on molo hombar tu hadirionna dohot marnida hamuliaon harajaon ni Israel na ginomgomanna dohot dipanghatindanghononna taringot tu pangaramotion, pandonganion dohot haluaon na dipatupa Jahowa sandiri tu ibana. Nunga patut nian dipajongjong si Daud sada bagas na timbo jala bagas joro na bidang jala na balga na gabe inganan parmianan ni Jahowa. Jolma do marsangkapi dalanna, alai Jahowa do na patontuhon dalanna dohot patulushon lomo ni rohaNa. Ndang ditolopi Jahowa sangkap ni si Daud laho pajongjong bagas joro i (2 Sam. 7: 4 – 16). Nang pe disundati Jahowa sangkap ni si Daud marhite panurirang Natan alai dipasahat do bagabaga ni Jahowa Debata tu ibana, ndada holan tu ibana sahat do tu pinomparna di na manggom Israel (ida 2 Sam. 7: 4 – 16 patudos tu 1 Sam. 16: 11 – 13; 2 Sam. 8: 6, 14; Psalm. 89: 27). Ndung dipasahat si Natan saluhut na nihatahon Jahowa taringot na so jadi si Daud pajongjong bagas joro di Jahowa jala taringot bagabaga pandonganion, pangaramotion dohot haluaon na dipatupa Jahowa tu si Daud sahat tu pinomparna, masuk ma ibana tu bilutna martangian (2 Sam. 7: 17).

            Di partangianganna i jumolo ma dirujiruji si Daud hadirionna dohot mangarimangi parulaonna boasa tung disundati Jahowa sangkap na denggan na disangkapi si Daud laho pajongjonghon bagas joro i, jala tung aha ma keistimewaan hadirionna umbahen pola ingkon jaloonna bagabaga pangaramotion, pandonganion dohot haluaon na pinatupa Jahowa tu ibana sahat tu pinomparna (2 Sam. 7: 18 – 21). Dung dirujiruji si Daud hadirionna jala dirimangi taringot parulaonna i tubu ma panghatindanghononna taringot hatimbulon hagogoon, hasangapon dohot hamuliaon ni Jahowa Debata ni Israel mangatasi saluhut hagogoon, hasangapon dohot hamuliaon ni saluhut debata na disomba sude bangso di sude inganan dohot di sude tingki. Hagogoon, hasangapon dohot hamuliaon ni Jahowa na so boi disuhat marhite ruang, bilut dohot saluhut nasa na adong di portibi on. Jahowa do na mamillit jala manodo Israel gabe bangsoNa jala Jahowa sandiri do na manotophon Ibana gabe Debata ni Israel (2 Musa 6: 7; 3 Musa 26: 12; Psalmen 57: 7). Laos dihatindanghon si Daud ma saluhut pambahenan ni Jahowa na patuduhon gogo dohot hasangaponNa na so hatudosan na manaluhon gogo dohot hasangapon debata ni Misir marhite na pinalua Israel sian parhatobanon Misir (ida 2 Sam. 7: 23 – 24 patudos 2 Musa 15; 5 Musa 3 – 4).

            Antong ale Jahowa Debata! Sai pahot ma hata naung pinarbagabagaMi taringot tu naposoMon dohot tu pinoparna (ay. 25). Hata on martudutudu tu bagabaga manang padan naung nihatahon Jahowa hian tu si Daud marhite si Natan. Alai molo ndang marhasatiaon si Daud dohot pomparan ni si Daud di saluhut aturan dohot uhum ni Jahowa, na so jadi masa angka bagabaga songon na dipabotohon si Natan i. Sada sian bagabaga na nihataan ni si Natan ima taringot haroro ni mesias na sian pomparan ni si Daud. Mesias ima na nimiakhan ni Jahowa jala na digohi Jahowa marhite TondiNa. Sahalak na saluhut hadirionna digohi hasintongan dohot hatigoran uhum ni Jahowa Debata. Laos i do na gabe merasa terharu si Daud manjanghon bagabaga i (pat. Ay. 26 – 28). Ala naung sahat do bagabaga i tu si Daud marpangidoan ma si Daud sada hot ma ibana dohot pinomparna di hasintongan dohot hatigoran patik dohot uhum ni Jahowa, jala na so jadi pinomparna madabu tu ulaon na maralo tu hasintongan dohot hatigoran patik dohot uhum ni Jahowa (ay. 29).

 

Hahonaan ni Turpuk

            Boha do nuaeng panghatindanghononta taringot pandonganion, pangaramotion dohot angka haluaon ni Jahowa naung masa di ngolunta saluhutna? Aha do na boi bahenonta songon na hataridaan panghatindanghonon i asa saluhut jolma na asing marnida dahot manangihon panghatindanghonon i. didongani, diramoti, disarihon do ngolunta on di ragam angka na masa di hasiangan on. uju marsahit dipasupasu do angka obat, sipanganon dohot siinumon na diparsaulihon manghorhon hahipason; uju adong na tahirim, diparbisuki jala diramoti do hita di saluhutna i marhite angka ulaonta asa dapot na niluluan jumpa na nihirim; disarihon do ngolunta di angka sipanganon dohot siinumon songon i angka silasniroha asa boi hita denggan mulaulaon di ganup hauma, di ladang, di kantor, di partigatigaan dohot di saluhut ingananta mangula na denggan hombar tu profesinta ganup. Asa marhite angka naung ulaonta i dalan ni Jahowa manarihon na ringkot di ngolunta. Songon i di saluhut angka pasupasu naung itajalo na so tarpajojor saluhutna ala ni godangna. Aut sugari dipajojor saluhut pasupasu, angka panarihonon ni Jahowa di ngolunta sian na tubu hita di hasiangan on sahat tu sadari on dang siat portibi on ingananna.

            Manang dung dapot na niluluan, dung marhahipason, dung dapot angka na pinarsinta gabe mandao ibana sian Jahowa, jala didok rohana ala ni gogona, hamaloon dohot hadirionna umbahen boi ima taruli di angka pansamotan dohot na denggan di ngoluna. Manang molo dang hombar tu na tapaido manang suhar sian na tahirim gabe dalanta mandele manang mandok na so sintong uhum ni Debata di ngolunta. Boha do panandion dohot panghatindanghononta di saluhut pambahenan ni Jahowa? On do na gabe renungan di ngolunta marhite jamita on.

            Bagabaga pangaramotion, pandonganion dohot haluaon na sian Jahowa ndada holan tu si Abraham, si Ishak, si Jakob dohot ndada holan tu si Daud. Marudut do bagabaga i tu partingkian si saonari, tu sundut sisaonari sahat ro disalelengnilelengna. Molo marhasatiaon do hita tu Ibana, marhasatiaon sahat ro di ujung ni ngolunta saut ma bagabaga i tu hita. Marhasatiaon di na mangulahon hatigoran dohot hasintongan patik dohot uhum ni Jahowa di ngolunta; burju di angka ngolu marhadaulaton na sintong jala na so tupa be adong ganggu ni roha di panarihonon dohot di pandonganion ni Jahowa di ngolunta. Marmulia jala marsangap ma Jahowa marhite panghatindanghonta di bagabaga haluaon na naung dipatupa jala na naeng sipatuoan ni Jahowa muse di ngolunta, amen.

 

---

[1] Kelompok Deutronomis merupakan sebutan yang diberikan kepada para teolog penafsir kitab Taurat (Kejadian, Keluaran, Imamat dan Bilangan) yang kemudian membuat menuliskan ulang empat kitab Taurat tersebut yang disebut dengan kitab Ulangan. Kemudian menuliskan ulang mengenai sejarah Israel setelah Israel sampai ke tanah Kanaan sampai kepada kehancuran Israelpai ke tanah Kanaan sampai kepada kehancuran kerajaan Israel (kitab Yosua, Hakim – hakim, I dan II Samuel, I dan II Raja-raja, I dan II Tawarikh). Kelompok Deutronomis menekankan mengenai otoritas atau pemerintahan Allah terhadap Israel baik pada masa pra monarkhi, monarkhi sampai kehancuran monarkhi Israel. Pada buku II Samuel kelompok Deutronomis menggunakan beberapa sumber yang ada sebelumnya termasuk sumber Natan (2 Sam. 12) dan Gad (2 Sam. 24) ketika mereka menjadi nabi pada saat pemerintahan Daud.

BAHAN JAMITA EPISTEL MINGGU XII DUNG TRINITATIS, 27 AGUSTUS 2023; MARUKUS 8: 27 - 30

 BAHAN JAMITA EPISTEL
MINGGU XII DUNG TRINITATIS
Minggu, 27 AGUSTUS 2023
MARKUS 8: 27 – 30
 

PANGHATINDANGHONON NA TUTU DO JESUS I MESIAS MANANG SIPALUA!

Pdt. Daniel Bonardo Pane, M.Th.

Patujolo

            Horas! parhorasan Trinitatis ma sian ahu panurat tu hamu saluhutna. Autsugari ro sungkunsungku tu hita, ise do Jesus di ngolum? Jala boha do panandaionmu taringot Jesus na tahaporseai? Goar ni Jesus ndang na gabe hata na imbaru di parngoluan on. torop do jolma mananda Jesus Kristus jala manghaporseai Jesus Kristus hombar tu haringkotan ni ngoluna, holan andul sian haringkot ni ngoluna ditadinghon ma Jesus Kristus i; adong do na mananda Jesus Kristus jala dihatindanghon do siihuthon Jesus Kristus ibana alai anggo roha dohot pingkirianna ndada tu Jesus Kristus. Jesus Kristus na ditanda dohot na dihatindanghonna holan sebatas pangantusion ni ugamo. Nang pe adong do pigapiga jolma na margoar Jesus, isarana Jesus Navas, Gabriel Jesus, Juan Jesus, Jesus Manuel Corona dohot lan na asing, alai ndang na gabe Mesias manang Sipalua nasida, songon Jesus Kristus, Anak ni Debata; Hata ni Jahowa naung gabe daging jala saor tu jolma.

            Anggo turpuk jamita on ima sungkunsungkun ni Jesus ima panangkasionNas taringot ise do Ibana sian panandaion ni torop jolma, jala ise do Ibana hombar tu panandaion ni angka sisean. Sungkunsungkun on patubuhon panghatindangion taringot hadirion ni Jesus Kristus, ima Mesias manang Kristus naung dibagabagahon jala naung disuriranghon angka panurirang di Padan Na Robi. Boha do panandaion ni torop jolma taringot Jesus Kristus, jala boha do panandaion ni angka Sisean taringot Jesus Kristus? asa lam tu antusna panandaionta taringot Jesus Kristus, masuk ma hita tu hatorangan ni turpuk.

 

Hatorangan ni Turpuk

            Panurat buku Markus on ima si Markus, sahalak Jahudi na mian di Rom rap dohot si Petrus. Molo goar hajahudionna ima si Johannes jala goar ni haromawionna ima Markus. Somal do di hatiha i sasahalak margoar dua habangsaon isarana Paulus: molo di Jahudi digoari Saulus jala di Romawi digoari Paulus; Dorkas: molo di Jahudi ima Tabita alai molo di Gorik didok Dorkas (Ulaon ni angka apostel 9: 36). Parasingan ni goar on boi do patuduhon ibana sahalak Jahudi alai mian di luar Jerusalem; manang sahalak Jahudi na mangula di pamarentaon na manggomgom uju i. Sian pangantusion on boi ma antusan digoari pe si Markus ima surat na dipasahat tu halak Jahudi na mian di Rom manang di luar huta Jerusalem dohot tu halak na so Jahudi asa taruli nasida di panandaion na tangkas jala na sintong taringot Jesus na dibaritahon angka apostel.

            Evangelium Markus on disurathon hirahira taon 55 – 65 Masehi, ima partingkian na mansai dokdok jala na gok sitaonon diadopi angka apostel dohot angka na porsea. Sitaonon na diadopan marhaororan do sian si Nero na mambahen na so uhum tu sude halak Kristen na mian di gomgomanna songon i pasahathon hata na so tutu maradophon halak Kristen asa tung marutang hosa halak Kristen. Ido umbahen dipaluar ma patik asa dilele, ditangkup, dihurung jala ingkon dibahen hansitan saluhut halak Kristen songon i angka apostel. Alai saluhut na masa i ndang na boi pasohon manang mangorui hiras ni roha angka apostel mambaritahon Jesus Kristus, Anak ni Debata Jahowa ima saluhut parngoluan ni Jesus Krsitus uju na mian dope Jesus i di portibi on, nang pe sai adong do deba halak Kristen mananggalhon haporseaona asa malua ibana sian sitaonon dohot parungkilon na pinamasa si Nero tu nasida. Di sitaonon na mansai hansit i lam marhiras ni roha ma angka apostel laho mambaritahon barita hamuabon ni roha; barita haluaon ima barita ni Jesus Kristus asa lam tu toropna angka na porsea jala manghatindanghon tutu do Jesus Kristus ima Tuhan (bdk. Pilippi 2: 11) sian Jerusalem sahat tu luat tano on (ida. Mat. 28: 19; Luk. 24: 47; Ul. Apostel 1: 8).

            Sahat ma barita na uli i tu huta Rom (ibukota kerajaan Romawi) na dibaritahon si Simon Petrus. Di tingki pambaritahonon i ma disurathon si Markus angka na binarithon si Petrus i dalan laho mangapuli, mampargogoihon jala patoguhon haporseaon ni halak Kristen di na mamolus ragam na masa di hasiangon on. Deba sian barita na dibaritahon jala na diajarhon si Petrus tu si Markus ima taringot panandaion na tangkas taringot hadirion ni Jesus Kristus i sandiri. Laos i ma jamita di minggunta sadari on.

            Di tonga pardalanan ni Jesus rap dohot angka sisean i ima mardonokhon Kaesarea Pillipi, ro do sungksunsungkun Jesus tu angka siseanNa: ise do Ahu didok halak? (ay. 27). Sungkunsungkun on ndada na laho manguji angka sisean taringot ise do hadirion ni Jesus di angka jolma, ala nunga tung godang angka tanda halonganan na binahen ni Jesus songon na niida angka sisean; tung godang manangihon pangajarion ni Jesus taringot harajaon ni Debata, taringot ngolu na marhadaulaton songon i habaranion ni Jesus pasingothon angka malim asa saluhut angka malim mangulahon ulaon hamalimon i di bagasan hasintongan dohot hatigoran ni Jahowa Debata. Laos dialusi angka sisean i ma Ibana: adong mandok: si Johannes pandidi, na deba mandok si Elia, manang sahalak sian angka panurirang i do (ay. 28). sude pandapot na gabe alus ni angka sisean ima panandaion di pardagingon, panandaion na hombar pingkiran dohot na nihirim nasida ima taringot haluaonnasida sian panggomgomion harajaon ni Rom.

            Marhite alus ni sisean di ay. 29 on torop do jolma na mananda Jesus songon panurirang bolon songon na panurirang naung adong di padan na robi isarana: Elia. Sahalak panurirang na boi papitahon ngolu hadaulaton ni halak Israel maradophon parsombaon tu Ba’al jala panurirang naung disuriranghon si Maleakhi (ida Mal. 3: 23). Sahalak panurirang na barani pasingothon si Ahab, raja Israel (Samaria) ala ni pengaruh Isebel, halak Sidon manang Penesia songon i dohot parsombaon tu Ba’al, debata ni Sidon manang Penesia, songon i nang angka tanda halonganan na hea masa dipatupa Jahowa marhite si Elia isarana: taringot sagusagu dohot miak ni sahalak ina na mabalu di Sarpat dohot na pangoluhon anak sasadasana (1 Raja. 17). Manang songon si Johannes pandidi na barani pasingothon si Herodes (Luk. 3: 19) dohot mambaritahon barita hamubaon ni roha tu halak Jahudi di sunge Jordan. Panandaion dohot panghirimon sisongon i do panandaion dohot panghirimon torop halak tu Jesus Kristus. Elia dohot Johannes ima sitotas dalan (pembuka jalan, perintis) dalan tu Mesias manang Sipalua songon naung dipasuriranghon angka panurirang di padan na robi, ndang sahat dope panandaion nasida na tutu do Jesus i Mesias manang Sipalua, ima hagogok ni panurirangon angka panurirang manang hataridaan songon na dibaritahon ni si Johannes (ida Mark. 1: 7 – 8).

            Udutna, di ay. 29 diulakhon Jesus manungkun paduahaliion tu siseanna na mandok: “Ia hamu, ise ma Ahu didok hamu?” sungkunsungkun paduahon on marasing do sian sungkunsungkun na parjolo. Disungkunsungkun paduahonon ima panandaion na tangkas angka sisean taringot Jesus, Gurunasida. Jala dialusi si Petrus ma mandok: “Kristus (hata Heber: Mesias) i do Ho!” (patudos Mat. 16: 16; Luk. 9: 20). Alus ni si Petrus on ima alus na tegas jala dang adong ganggu manang alus na asal ima alus ni si Petrus i. Hata Kristus di pangantusion ni halak Jahudi ima sahalak na nimiakhan marhite miak na hushus jala sahalak na istimewa. Keisimewaan ni mesias manang Kristus di halak Jahudi ima taringot ulaonna dohot parsuruon na hushus. Somal do di halak Jahudi angka malim mamiakhi sahalak na ditodo, dipillit laos pabotohon ibana ma mesias. Mesias di pangantusion ni Jahudi ima sahalak na gabe raja manang malim jala pangusean miak na hushus di simanjujung sasahalak ima hataridaan hagogok ni Tondi ni Jahowa di ibana. Ndada miak i mambahen sasahalak gabe istimewa alai Tondi ni Jahowa na niusehon tu ibana. Ala ni i, molo naung digohi Tondi ni Jahowa, tontu saluhut parngoluonna dohot parulaonna ima mangulahon saluhut ulaon na gabe halomoan i Debata.

                Marasing do hamesiason ni Jesus sian pangantusion hamesiason na niantusi halak Jahudi. Ndada marhite jolma Jesus dipapatarhon gabe mesias, ndada halak na mamillit manang manodo dohot mangusehon miak tu simanjujung ni Jesus, jala ndada jolma na manotophon (melantik atau mengangkat) Jesus gabe mesias. Alai Jahowa Debata, Ama ni Jesus Krsitus. Ndada aek na nididihon si Johannes pandidi gabe pengesahan hamesiason ni Jesus jala papatarhon hagogok ni Tondi Jahowa di bagasan Jesus Kristus, alai Jahowa Debata, Ama ni Jesus Kristus i do, ndada sian hajolmaon ni si Johannes maningtinghon na tutu do Jesus Anak ni Debata alai Jahowa Debata i sandiri do (Luk. 3: 22; Mark. 1: 11). Tutu do Jesus ima Kristus manang Mesias, alai ndada songon pangantusion ni halak Jahudi hamesiason ni Jesus, ima na gabe raja jala sipalua halak Jahudi sian panggomgomion harajaon ni Rom jala paluahon halak Israel sian penjajahan ni harajaon ni Rom. Ndada laho manggohi na piningkiran ni halak Jahudi hamesiason ni Jesus, lobi sian i tahe ima paluahon saluhut jolma sian parhatobanon dohot penjajahan dosa dohot hamatean na jorbut i; ndada laho pajongjonghon harajaon songon harajaon na adong di portibi on anggo hamesiason ni Jesus, alai pajongjonghon harajaon ni Jahowa Debata manaluhon saluhut harajaon na adong di hasiangan on; ndada papatarhon raja songon hasomalan Jahudi na singkop di alat parporanganna, alai papatarhon na tutu do Jesus, Raja ni saluhut raja, jala Tuhan di saluhut angka tuhan, na manggomgom sian na manongtong sahat ro di na manongtong. Jesus Kristus ima hagogok ni na nihatahon ni si Johannes, na gabe Panggomgom jala Panguhum na sintong (Mark. 1: 7 – 8).

                Dipopai Jesus do angka sisean asa unang pintor dipaboaboa tu torop jolma. Ndang dapot dope tingkina tarjalo jolma i Jesus gabe mesias manang Kristus hombar tu sangkap haluaon na disangkapi Jahowa Debata. Molo pe tarbarita Jesus na tutu Mesias manang Kristus pangantusion dohot panandaion na hombar tu pardagingon do. tarlumobi na ingkon manaon sitaonon na porsuk, pola mate tarsilang alai hehe do di ari patoluhon.

 

Hahonaan ni Turpuk

                Di minggu XII dung Trinitatis on, boha do panandaion dohot panghatindangionta taringot Jesus, Anak ni Debata? Autsugari disungkun: “tutu do hita mananda Jesus i?” Adong na mandok, hutanda hami do! ai molo so hutanda hami boha do hami manghatahon taringot Ibana? Alai molo diuduti muse sungkunsungkun, molo na ditanda do Jesus i, boha do panandaionta taringot Ibana? Torop do jolma mananda taringot Jesus songon:

1.       Pangobati/ dokter: halak na marsahit do ro tu dokter, ima gombaran ni jolma na mangalului, joujou, olo ro tu Jesus manang pasahathon dirina tu Jesus holan di tingki haringkotna. Molo masa parsahiton, sitaonon, parungkilon manang ragam panaritaan disi do ibana naeng ro tu Jesus. Laos marpadan: O Jesus, asi rohaM, pamalum ma ahu, urupi ahu, palua ma ahu. molo malum jala malua do au sian sahithon, molo malua au sian sitaonon dohot parungkilon on lam jonok ma ahu tu Ho, ringgas ma ahu mandohoti parmingguon manang partangiangan. Alai molo lam posi do na niaena i dilului do dalan na asing na boi paluahon ibana sian i sude. Molo malua sitaonon, parsahitonna disi ma ibana ndang ro be tu Jesus jala dang diingot be padanna i, dung hipas jala malua sian sitaonon dohot parungkilon laho do tu mall, tu pantai, liburan, tu lapo, huria i pe dang diingot songon i nang partangiangan na dipatupa.

2.       Tokoh manang sahalak na terkenal: ima halak na holan mananda taringot ni Jesus songon panandaionna tu sahalak tokoh manang halak na ditanda torop jolma. Isarana Ir. H. Joko Widodo, molo didok: ditanda hamu do ibana? Pintor ro do alus: hutanda do ibana. Walikota Solo, Gubernur DKI, jala Presiden na papituhon di Indonesia on. Toho do jala sintong do alus i. Panandaionta taringot Jesus: Tubu sian si Maria na gabegabean sian Tondi Parbadia; Mesias; na boi pangoluhon naung mate; na mate di hau pinarsilang; na mulak mangolu di ari patoluhon; manaek tu surgo...dna. Alai holan parbinotoan do i panandaionna ala na niajarhon angka pangajari; jamita na dibege; ninna tu ninna.... dna. Tung so adong sihol rohana laho rap marsaor dohot Jesus Kristus marhite parmingguon, partangiangan, manangihon hataNa, jala na pasahathon dirina hibul tu Jesus Kristus.

3.       Sahalak ahli ekonomi manang multi tasking person: ima halak na mambahen Jesus i holan laho manggohi na ringkot ni ngoluna nang dagingna. Isarana: molo na mananda Jesus naeng ma mamora, marpangkat, dapot hundulan di hasangapon. Ido umbahen molo masa  partingkian mamillit caleg manang calon uluan manang partogi di sada luat na so hea ro tu Huria pintor tompu ro do ibana tu Huria asa ditangianghon jala dipillit, dilehon ma hepengna gabe hamauliateonna tu huria songon ingotingot tu ruas i. Molo talu ibana, pintor di sogo rohana tu huria i jala ndang hea be ro tu parmingguon manang tu partangiangan. Songon i do molo monang pe ibana, pintor dang ingot be ibana na marhuria dohot na marTuhan Jesus.

4.       Ahli sullap, ima halak na mangantusi Jesus disi dipangido na ringkot tu Jesus, disi ma nian pintor rade. “bimsalabim” na dipangido di tangiangna ingkon masa songon na dipangido i jala pintor hatop ma masa. Molo so masa, didok ma pargabus jala gabe mandele.

 

Boha do hita nuaeng mananda Jesus i gabe Kristus manang Mesias? Di Minggu XII dung Trinitatis patandahon hita taringot Jesus ima Kristus manang Mesias. Ndang na gabe paluahon jolma i sian hapogoson di pardagingon manang di arta, ndang na holan paluahon jolma i sian sitaononna. Alai di ginjang saluhutna: dipalua do hita sian angka hagiot dosa dohot ihotihot ni dosa dohot hamatean salelengna. Panandaionta taringot Jesus ingkon sahat do tu manghatindanghon nang panghangoluhonhon taringot Jesus. Manghaposi Ibana, jala pasahathon hadirionna gabe ampuna ni Tuhan Jesus. Manang aha pe na masa di parngoluan on na so tupa jumpa pandeleon di panghobasionna manang di ulaonna na denggan i. Ala Jesus i do na gabe pangondingan manang partanobatoan jala na so tupa meret asi ni roha dohot bagabaga i sian hita molo marsihohot hita manghaposi Tuhan Jesus i. Marsangap ma Jahowa. Amen.