Jamita Epistel Minggu Estomihi, 26 Februari 2020 - Partangiangan

UNANG HO MABIAR, TANGIHON MA IBANA

Mateus 17: 1 – 13

Jamita Epistel Minggu, 23 Februari 2020

Patujolo

            Aut sugari disungkun tu ngolunta, piga leleng ma adong tingkinta marsaor rap dohot Jahowa marhite tangiang martimbangkon marsaor rap dohot angka dongan? Piga leleng ma adong tingkinta manghatai rap dohot Jahowa marhite tangiang martimbanghon angka ulaonta di ganup ari? Nunga torop be halak tarutama hala Kristen ariarina marhapatean tu halojaon, jala na boi patubuhon ungutungut, jala sai mangangguhi hinorhon ni hansit ni ngolu dohot loja ni ngoluna. 24 jom sadari tingkinta ganup ari, piga leleng ma tingki pasahathon diri tu Jahowa.

            Turpuk jamit on manosohon tu halak na satia tu Jahowa marhite Jesus Kristus, ringkot do adong tingki laho marsaor rap dohot Debata na Badia i, paluahon satongkin parungkilon manang sipingkiron di portibi on, jala pajumpang tu Ibana na sun Badia. Alai ndada na mandok asa halak Kristen lari sian parungkilon manang na masa di portibi on, alai boha do halak Kristen naung mananda jala manghilala hamuliaonni Debata marhite tangiang mangadopi ragam na masa di ngoluna; monang sahat ro di ujungna, jala taruli di tumpal na pinasahat tu na satia jala manahan ro di ujungna.

Hatorangan ni Turpuk

            Turpuk jamita on dipabotohon do Jesus rap dohot 3 siseanNa, Petrus (Kefas); Jakobus, Johannes nangkok tu dolok na timbo (ay. 1). Di ayat on dolok di pangantusionnasida uju i, ima inganan Na Sun Badia, inganan na dame jala sonang, dao sian ragam na masa, dao sian angka habisingon. Ayat on pabotohon Jesus rap dohot 3 siseanNa i ruar satongkin sian ulaon hasomalonna, ruar sian panghobasionna ganup ari asa martangiang. Jesus mamboan 3 siseanNa tu inganan na dame dohot sonang asa laho marnida hamuliaon ni Debata nang pe ndang diboto angka sisean ni angaka na naeng masa di dolok i. Alai hombar tu pangantusion na masa uju i, molo diboan tu dolok marlapatan do i mamboan mandongani Jesus laho martangiang, jala pajumpang tu Ibana Na Sun Badia (Jahowa Debata).

            Jesus martangiang. Di tingki na martangiang Jesus masa ma na so hea masa manang diida angka siseanna. Jesus singkop jala gok hamuliaon i Jahowa, Debata. BohiNa marsinondang songon mataniari (ay.2). Hamuliaon ni Debata na so marharoroan sian portibi on, alai na ro sian Ama i sandiri tu portibi on. Lapatanna, portibi on gabe inganan hasonggopan hamuliaon ni Jahowa, Debata na mamboan angka haimbaruon manang panghilalaan na marasing, isarana adong panghilalaan na dame dohot sonang..

            Di na ro hamuliaon ni Jahowa songon na niida angka sisean, diida angka sisean ma si Musa dohot si Elia (ay.3) ima dua halak na mansai bolon goarna di halak Israel. Musa dohot Elia ima tokoh haluaon Israel na maradu maradophon angka malim ni debata sileban patuduhon hagogoon ni na disombanasida (2 Musa 7: 8 – 13; 1 Rajaraja 18: 20 – 46). YHWH (Jahowa) marhite si Musa paluahon halak Heber (ima Israel nuaeng) ruar sian parhatobanon ni Mesir, jala marhite si Musa Jahowa papatarhon hamuliaonNa na mangudut tu mangalehon 10 patik (TORAH) dung gabe malua nasida (ida 2 Musa – 5 Musa). Alai Musa ndang sahat tu Kanaan.

            Elia ima tokoh haluaon ni Israel sian ugamo ni Fenesia. Uju i Israel Utara na diuluhon ni raja Ahab mambuat boru ni raja Sidon na sian Fenesia ima si Izebel, jala si Izebel mamboan na disombana tu Israel Utara (ugamo na manomba Ba’al). masa ma 2 panombaon ni Israel Utara, na mambahen halak Israel alang haporseaonna tu Jahowa, alang tu Ba’al.  Hamuliaon ni Jahowa patar ma marhite si Elia na maralo angka panurirang/ malim ugamo Ba’al marhite pangidoan haroro ni udan. Ujungna, angka panurirang Ba’al talu, jala nasida dibunu jala diponggol ulunasida i. Elia ima tokoh haluaon Israel na so mate. Ibana na manaek tu surgo di bagasan hamuliaon ni Jahowa jala diida si Elisa siseanna.

            Musa dohot Elia ima tokoh na mandapot hamuliaon ni Jahowa. Jala marhite nadua i, Jahowa papatarhon hamuliaonNa tu jolma humaliang, inganan hamuliaonNa i jala patuduhon Ibana do Debata, Pargogo na so hatudosan, manaluhon sude ragam hagogoon na masa di portibi on. Marhite turpuk on Musa dohot Elia manghatai tu Jesus. Alai turpuk on ndang paboahon aha do na dihatahonnasida disi. Molo itaida di Lukas 9: 28 – 36, panghataionnasida ima taringot angka na masa tu Jesus Kristus di Jerusalem jala ingkon masa do i hombar tu na disangkapi Jahowa, Ama i tu Ibana. Molo itaadophon tu andorang so turpuk on, adong ma hadomuanna, ima taringot na dipaboa Jesus do taringot parsitaononNa tu angka sisean.

            Marnida haulion hamuliaon ni Jahowa i, Petrus pintor mandapothon Jesus jala didok asa panjongjonghonna di inganan i 3 sopo (ay. 4), ima tu si Musa, tu si Elia dohot tu Jesus. Ndang diboto si Petrus dope nian lapatan na diidana i, alai boi do pandokhon on ni si Petrus asa hot ma nasida mian di inganan na uli i. GANUP DIPAPATAR JAHOWA HAMULIAONNA, NDADA ASA MIAN MANANG SO HALAK NA MANDAPOT HAMULIAON ALAI INGKON DO DIUDUTI TU PANURUON JALA NDANG NA SO. Dung didok si Petrus hatana i, tompu ma ro ombun manghuphupi nasida na di inganan i jala adong soara: “on ma Anak haholonganHu, tu Ibana do lomo rohangku, sai tangihon ma Ibana”. Hata on ima panuruon asa manangihon Ibana (ingkon adong do parange unduk dohot roha na olo mangoloi jala manangihon Ibana). Hata on paandaphon, Jesus tutu do Anak ni Jahowa, jala marhite Ibana sangkap haluaon ni Jolma sian hamataean alani dosanasida, alai torop do jolma ndada mananda jala manulak Ibana.

            Mambege suara i, mabiar do angka sisean i jala marsinggang manomba (ay.6). hamuliaon ni Jahowa marhite ombun i maboan hamuboan na masa tu angka sisean jala mamboan panandaion dirinasida maradophon hamuliaon ni Jahowa. Mabiar na didok dison, ndada mabiar alana marnida na ngeri. Mabiar dison marlapatan adong panandaion diri maradophon hamuliaon ni Jahowa i, jala tubu parange marsomba tu Ibana. Marnida na masa i, Jesus manuru nasida asa hehe jala unang mabiar (ay. 7). Panuruon on marlapatan na adong dope na ringkot sihobasan di ngolu on. Manuru asa mulak muse tu ragam angka panghobasion di ragam angka parange dohot na masa di ngolu on, mulak manghobasi torop halak na sai manghasiholi haroro ni Jesus laho marbarita na uli jala patupa halongangan. Dung i, ditaili nasida dompak ginjang, sasada Jesus nama dapot nasida disi (ay.8).

            Dung i, tuat ma nasida. Dipardalanannasida na tuat i, dipatihi Jesus do asa sude na diida angka sisean i na so jadi paboahon tu manang ise pe na ni idanasida, saleleng so hehe dope Anak ni Jolma i sian na mate (ay.9). Di pangantusionnasida, haroro ni si Elia ima haroro andorang so ro dope Mesias (hombar tu Maleakhi 4: 5). Elia na ro mamboan haimbaruon tu saluhutna (ay. 10). Jesus paandaphon Elia nunga ro, alai ndang ditanda jolma i ibana jala dibahen jolma i do tu ibana hombar tu giot ni roha ni jolma i. Hombar tu panurirangon ni Maleakhi i, haroro ni si Elia ima mangungkap dalan tu Mesias. Nunga patar be i di diri ni si Johannes pandidi. Hombar tu na dibahen jolma i tu Johannes pandidi, songon i do na naeng masa muse tu Anak ni Jolma i (ay. 11 – 13).

Refleksi – Theologi

            Na masa di Jesus on didok do i dohot hata “transfigurasi Jesus Kristus” na marlapatan adong hamuabaon na mansai tandap di Jesus Kristus. Boha do halak Kristen nuaeng na mandok jala marhatopothon dirina siihuthon Kristus? Adong do na boi siputikhonta na mansai ringkot itahangoluhon di ngolunta on:

1.     Adong ma nian tingki satongkin ruar sian angka ulaon ganup ari, parungkilon, jala adong tingki na dame. Ndang na mandok ruar saleleng na, alai ringkot do adong situasi na dame dipanghilalahon ditonga ulaon ganup ari di ngolu on.

2.     Di na dame i, disi ma tingki pajumpang tu Ibana na Sun Badia marhitehite tangiang. Hibul rohanta, tondinta pajumpang tu Ibana na Sun Badia i, Jahowa Debata di bagasan haporseaon di Jesus Kristus.

3.     Manghilalahon hamulioan ni Jahowa ndada ingkon songon na masa di turpuk on. Alai manghilalahon hamuliaon ni Jahowa ima adong hamubaoon na mansai andap di bagasan dirina. Hamubaon na manghorhon togu haporseaon, pos ni roha, dohot parange na unduk tu Ibana.

4.     Hamubaon na masa i, ndada asa mandok ruar saleleng na di ngolu siapari. Alai boha asa hamuliaon ni boi patar muse di ngolu siapari. Perubahan itu tidak mengajak untuk lari dari masalah, lari dari kehidupan yang nyata. Tetapi bagaimana orang yang menerima perubahan itu dapat melanjutkan kehidupannya dan memenangkan setiap masalah atau persoalan hidupnya.

5.     Ganup dipapatarhon Jahowa hamuliaonNa, disi ma adong panuruhon. Songon soara na dibege angka sisean: “tangihon ma Ibana”. Panuruhon laho manangihon jala unduk di hataNa. Hibul ngolunta ingkon ngolu na manangihon jala ngolu na unduk tu hataNa.

6.     Anak ni Jolma ingkon marsitaonon, mate jala hehe jala mandapot hamuliaonNa sian Jahowa, Ama na marsuru Ibana. Ibana na ditulak jolma jala marsilomo tu Ibana hombar tu giot ni dagingna. Molo songon i do na masa tu Anak ni Jolma i, hita pe angka siseanna ndang boi malua sian i. Hinorhon ni hatigoran dohot ulaon na denggan hombar tu hata ni Debata, gabe ditulak hita sian parsaoran. Marbisuk ma hita gabe halak siihuthon Kristus. Boha, boi do hita manahan manang gabe na so do hita? Turpuk jamita on paingothon hita: UNANG MABIAR: tangihon ma Ibana na hinorhon ni dosam jala paluahon ngolum sian hamatean gabe Ibana singkat na i saluhutna, jala saluhutna i sangkap haluaon do na pinatupaNa tu ngolum; tangihon ma Ibana na paluahon hosam dohot ngolum.

7.     Di minggu on, ganup halak Kristen (khususna Katolik dohot Huria Lutheran) masuk ma tu tingki-tingki parsitaonan ni Jesus (na didok masa pra-paskah) na dibungka sian Rabu Abu, 26 Februari 2020 on. Di ariari sitaonon i, ingkon boi itapelehon manang italehon tingkinta satongkin marsaor dohot Ama i marhite tangiang, marhuria, dohot angka punguan partangiangan, alai ndada holan di ari sitaonon i, alai ganup ari ma. marhite tingki pra-paskah on diadphon do hita mananda angka hagaleonta di sangkap haluaon ni Jahowa. Jala marhite i dipargogoi ma hita asa manahan hita di haporseonta di ragam ngolu on.