Acara dan Liturgi Natal

PARTORDING NI ULAON NATAL

HKI RESORT KHUSUS

SEI SEMAYANG

Thema:

Gabe Parholong Ma Hamu Tu Ganup Jolma

(Johannes 15: 14 – 15)

HKI RESORT KHUSUS SEI SEMAYANG

TAHUN 2019

I.     Hata Parhorasan sian Protokol

II.    Pagalak lilin: huhut marende BE. 47: 1, 4

·          Di na saborngin i do binsar Panondang di tondinta i/ Padaohon saluhut na simpar, lao patiurhon sasude/ Sondangon ni Panondang on, muse sandok portibi on

·          Dibahen i sai marsinondang ma baen haporseaonmi/ Padenggan jala sai patorang roham ro di parangemi/ Paboa na marguna do Panondang na ro i di ho

Na Pagalak Lilin:                                                                                   (jongjong saluhutna)

a.     Parjamita

b.     Sintua Sektor

c.     Mewakili Pengurus Sektor

d.     Mewakili Ama Sektor

e.     Mewakili Ina Sektor

f.      Mewakili Anak Sekolah Minggu Sektor

g.     Parjabu

III.     IBADAH

Hatorangan: Ls: Liturgis; R: Ruas Huria

Pamujion – Votum                                                                                               (jongjong saluhutna)

Ls  :  Puji hamu ma goar ni Jahowa, mamujimuji ma hamu, ale naposo ni Jahowa! Hamu angka na jongjong di bagasan joro ni Jahowa, di angka alaman ni bagas ni Debatanta

R    :  puji hamu ma Jahowa, ai pardenggan basa do Jahowa, endehon hamu ma goarNa ai hasudungan do Ibana. Ai anggo ahu, tangkas do huboto, tung na timbul do jahowa, jala Tuhanta i mangatasi sude angka debata sileban.

Ls  :  Ale Jahowa, ro di salelenglelngna do goarMu, ai marsundutsundut do parningotanMu ale Jahowa

R    :  (mangendehon Reff. BE. 57) hasangapon di Debata, dame dame ma di jolma/ las ni roha ni Debata hajolmaon muse

Ls  :  Marhitehite Goar ni Debata Ama, dohot Goar ni AnakNa Tuhan Jesus Kristus dohot Tondi Parbadia. Na manompa langit dohot tano on. Dipasaor ma dameNa tu tondinta, amen.

R    :  Ale Jesus Tuhannami, bereng hami na dison. pinarmahanMi do hami saluhutna na dison. Sai asi rohaM di hami, sai pangolu hami on. Amen.                            (hundul)

Marende BE. 44: 1

·          Hamuna na porsea i, sai tomu Tuhan Jesus i pahehe rohamuna/ jonok do ari pesta ni saluhut huriaNa i, ima hatutubuNa/ ipe, hehe ma hamuna baen pantunna lao manjanghon/ na manopot hajolmaon.

Introitus – Tangiang

Ls  :  Ai nunga tubu di hita * sada posoposo dilehon tu hita sada Anak, pampe tu ** abarana do sogot harajaon, jala bahenonna goarna: Sipartahi * Halongangan, ** siulubalang ni Debata, Ama saleleng ni lelengna, Raja ni hadameon. Bahen hagaganda ni harajaon dohot * hadameon na so marujung di * habangsa ni si Daud dohot di harajaonna i, pahothon dohot patoguhon marhitehite patik dohot hatigoran, olat nion ro di salelenglelengna.

R    :  O ale Raja Hadameon, sai ro ma Ho tu hami. Hami na sai manghasiholi parsaoran dohot Ho. Paimbaru rohanami asa jumpang di hami hadameon. Uluhon rohanami ai manghorhon ganda silaniroha do i di ngolunami

Ls  :  martangiang ma hita. Ale Jahowa, Debata jala Amanami. Pujipujian, hasangapon dohot hamuliaon ma hupasahat hami tu adopanMu na badia i. Tatap ma hami angka na pungu on di na manghalashon haroro ni Raja Hadameon, ima Sipartahi Halongangan, Siulubalang ni Debata, Ama. Ibana do hataridaan ni holong na sasintongna, ima na pataridahon Holong ni rohaM tu hami jolma na mardosa, asa jumpang di hami parsaoran na marsihaholongan, jala parsaoran di bagasan holon ni rohaM. Paima ro tingkina ima parsaoran rap dohot angka na badia di habangsaM na marmulia i, dibagasan Jesus Kristus, ima Immanuel dohot Raja na huhalashon hami sadari on, amen.

Marende BE. 45: 1, 3

·          Hosianna Anak ni, Raja David ro tu hita/ Baen ture dalanNa i, asa bongot tu rohanta/ Baen ma gabagaba i, di Tuhanta na ro i.

·          Hosianna Raja ni hadameon Ulubalang/ Nasa na binoanMi dame dohot hasonangan/ Hami na hinophoMi do nampuna i sude

Liturgi Parmulaan: Sude Dakdanak na ro sian na So Singkola sahat tu SMA/ sederajat asa ro ma mandok liturgina be.

Marende BE. Suplemen 569: 1

·          O Debata tung longang do rohanku, molo hubereng na tinompaMi/ saluhut bintang, hilap dohot ronggur manghatindanghon hasangaponMi/ marende au, TUHAN mamuji Ho o Debata sangap do Ho/ marende au TUHAN mamuji Ho, o Debata sangap do Ho

Liturgi I: Panompaon

1.     Molo binereng dompak langit di borngin ni ari, adong ma bintang na marhilophilop. Mansai uli jala dame situtu idaon gabe dohot roha dame marnidasa. Molo ro manogot ni ari, idaon ma binsar mataniari mamboan sondangna paboahon naung manogot ari jala di na sundut muse ibana paboahon naung borngin. Sipata ro ma udan mambahen lambok saluhutna. Hamu angka dongan, ise do na binoto hamu mambahen asa adong sisongon i?

2.     Molo nirimangrimangan parngoluan on. Sian na tubu hita di portibi on, dungi magodang ma. Marsiajar mangalangka, marsiajar manghatai, sahat ma tu tingki saonari. Adong do hita naung matua, adong na poso, adong na dakdanak. Molo nirimangrimangan angka dongan, boi do holan gogo ni sipangaon manang ala ni siadongan boi sahat hita tu tingki saonari? Hosa, hahipason, parsaoran, hagogoon dohot roha na pantas sian dia do dapotta i, jala ise do na sumarihon i tu hita?

3.     Angka suansuanan mamparbuehon angka na di ibana. Gabe angka na niula sinur angka na pinahan. Taruli hagabeon dohot parhorasan ma angka jolma di ngoluna. Angka partigatiga dapot angka silaniroha sian na partigatigaonna, angka parhauma dapotan silasniroha sian haumana, angka pangula, angka pande, angka siboan sigilingiling dapotan silasniroha sian na niulana nang songon i na mangula di pamarenta sude angka pangula jala parhobas dapotan silaniroha sian saluhutna i. Antong sian gogonta do i dapotta angka dongan? Ise do na jumadihon jala parrohon angka silaniroha i angka dongan?

4.     Ro galumbang, ro alogo, udan potir, angka sillam dohot ronggur. Na gogo do i saluhutna jala boi manegai angka na di humaliangna. Ise do tahe mambahen saluhutna i? Adong do na umgogo sian angka galumbang nang alogo dohot udan potir nang songon i angka sillam dohot ronggur? Molo adong ise ma i angka dongan?

5.     Tano hapeakhan jala mangalehon mangan angka gilokgilok dohot angka na tinompa ditoru dohot di atas ni tano. Aek mangalehon mangan angka dengke dohot angka na tionmpa di aek, jala jolma dapotan hangoluan marhite parbue ni tano nang angka na di bagasan aek. Ai ise do mula ni saluhutna na masa on?

6.     Marmula do na uli marbona do na denggan, marmula do angka na uli jala marbona do saluhut angka na denggan. Boto ma ale angka dongan! Di mulana i nunga adong hata i, jala marhite Hata i, ditompa dimulanimulana ditompa Jahowa do langit dohot tano on. Jala ditompa do nasa na uli jala denggan. Dame do sude na tinompa, jolma i pe mardame dohot dirina, nang dohot humaliangna. Marhasonangan jolma i rap dohot angka na tinompa.

7.     Jahowa do mula ni saluhutna i angka dongan. Ibana ma Debata Panompa saluhut angka na denggan jala singkop do sude na tinompa i. Marhasonangan do jolma i rap dohot angka saluhut angka tinompa. Suansuanan marlasniroha patuduhon parbuena, angka pahanpahanan marlasniroha mangalului siallangonna. Uli na i tahe molo jumpang sisongon i di tingki sadari on.

Koor :

Marende BE. Suplemen 575: 1

·          Puji ma Debata na songkal, pasangap ma goarNa/ Puji ma angka rura dohot lung, angka dolok na timbo/ Dohot hasak ni galumbang sude mamuji Ho/ Langit i na mansai hembang bintang i Na mansai torang ombun i na mansai saksak Pasangaphon Ho o Debata/ Tung so olo tading au, lao mamuji Ho Tuhan/ Nasa gogo bahenonku, lao pasangaphon Ho/ Ro di ujungni ngolungku, sai pujionku Ho

Liturgi II: Mula ni Dosa

1.     Hamu angka dongan, mansai uli jala singkop situtu do sude angka na dijadihon Jahowa, jala naeng ma angka na nitompana mian di hasonangan rap marparsaoran dohot Debata. Alai dia ma tahe, sai busisaon do sibolis molo marhasonangan hita jala tonggi parsaoranta dohot Debata. Dibahen sibolis do ragam dalan boha ma asa sega parsaoran na denggan i di jolma dohot Debata na Manompa i. Antong sian dia do mula ni sibolis?

2.     Sibolis i, ima surusuran na maralo dompak Debata. Surusuruan na tinompa ni Jahowa alai ndang olo unduk di aturan na masa hombar tu na pinatikhon Debata. Diuhum Debata do surusuruan i, jala dang dapot hasonangan be sibolis i ala mansai susa do hadirionna nang pe sonang di hapataronna. Boto ma angka dongan, portibi on ima ampuna ni Debata jala saluhut angka na tinompa ni Jahowa, Debatanta ingkon do marguru tu Ibana saluhutna. Sude nunga diaturhon asa atur saluhutna. Alai molo na so olo diatur jala mian di aturan i, nda tung dapot hasonangan disi.

3.     Ro do sibolis i na mian di rupa ni ulok. Ulok do na umbisuk sian nasa na manggulmit di ladang, angka na jinadihon ni Debata Jahowa alai laos marhite ulok i do na dipangke sibolis i manegai parsaoran jolma dohot Debata i, asa dialo jolma tona manang hataNa na Badia i.

4.     Dirimpu parhunihan hape pargadongan, dirimpu parsaulian hape hamagoan. Ido na masa tu jolma na parjolo i. Mansai tonggi angka elaela ni sibolis pangagoi i boha ma asa diulahon jolma angka na maralo tu naung pinatikhon Jahowa tu nasida. Dibagabahon Jahowa do hangoluan tu jolma i, alai hasonangan parsatongkinan na dibagabagahon sibolis i do dihalomohon jolma i. Dangol nai ngolum i ale jolma. Tumagon do hape hasonangan parsatongkinan na marhapatean tu hamagoan dohot hamatean do dipillitho sian hangoluan na sian Jahowa.

5.     Alai dia ma tahe, roha na manolsoli pe ndang jumpang di ngolu ni jolma i. Sai pasintongsintonghon diri do jolma i, jala mansalahon angka na asing. Ibana do na mambahen gabe mardosa ahu, manang huulahon dosa i, ninna. Ise na mardosa manang na mangulahon dosa ingkon do hona uhum. Jala ndang dapot hasonangan ni roha dohot hasonangan tondi di angka siulahon dosa, jala dang boi sipardosa mian di inganan habadiaon ni Jahowa.

6.     Mate do jolma i dung dipangan parbue na dipatikhon Jahowa asa unang dipangan i? Ido. Tutu do mate jolma i. Mate di partondion, mate di parsaoran na denggan i. Dipalao do jolma i sian porlak na gok las ni roha, porlak na jumpang hadameon dohot angka na denggan, so jo jadi masa disi angka iluilu; porlak na gok haulion na sian Jahowa. Masuk ma jolma i tu porlak na gok hasusaan, gok iluilu dohot arsak; porlak na masa parmusuon dohot parbadaan; porang, porlak na na di bagasna dang dapot hasonangan ni roha dohot tondi. Godang elaela mangalehon hasonangan ni daging alai hamagoan tu tondi.

7.     Aha be jambarmu ale jolma? Hamatean jala hamagoan ma jambarmu. Dilehon do patik hangoluan tu ho, alai hamagoanmu do dipillit ho marhite na mangulahon dosa i. Dilehon na denggan tu ho, alai ndang tarjalom holan manggohi na di roham dohot di pingkiranmu sandiri.

Marende BE. 61: 2 – 3

·          Tung godang do dosa pangunjunan pe/ Mangarsahi hita paima mate be, mangarsahi hita paima mate be

·          Na so tarhatahon hamagoan i/ Aut so tubu Jesus Sipalua i, aut so tubu Jesus Sipalua i

Liturgi III: Panghorhon Ni Dosa

1.     Amang tahe, nang pe nunga hona rimasan ni Jahowa jolma i ala ni pardosaonna alai ndang na gabe manolsoli jolma jala naeng mulak tu Jahowa. Lam do tahe hajahaton na masa. Lam torop jolma i lam tu deakna dosa i.

2.     Jadi ninna Jahowa ma: Ndang be uhum on ni Tondingku jolma i di haliluonnasida, ai roha daging do ibana, jala saratus duapulu taon na ma umurna. Adong ma uju i angka Nepilim (pandobo) di tano on. Ai dung ditopot angka anak ni Debata angka boru ni jolma, adong ma huhut tubunasida, i ma angka na begu, angka baoa na tarbarita sian na robi.

3.     Alai dung diida Jahowa, nunga lam deak hajahaton ni jolma di tano on, jala sai na jat na ma sude tubutubu dohot pingkiran ni rohanasida gonup ari. Jadi disolsoli Jahowa ma rohana, ala tinompana i jolma di tano on, jala lungun rohana. Panolsolion ni Jahowa ima lungun ni rohaNa boasa ma tumagon hamagoan dohot hamatean i tumagon diulahon jolma sian hangoluan na dipatupa Jahowa tu jolma i?

4.     Dung i ninna Jahowa ma: Ripashononku ma sian tano on jolma na hutompa i, ro di pinahan dohot na manjirir, ro di pidong angka na martongatonga langit, ai nunga husolsoli bagingku ala na hutompa i nasida.

5.     Ai mangkaholongi dirina ma jolma disi, impolan di perak, parhata manggang, parroha haginjangon, angka panginsahi, na so mangoloi natorasna, na so marningot lagu, angka na tois; angka na so marroha holong, pangoseose, panihasnihasi, na so umboto mangorom, parmurukmuruk, na so marholong ni roha di na denggan;

6.     Nang tung sura mangolu ibana dua ribu taon lelengna, hape ndang diida anggo na denggan i, nda sada do hapatean ni saluhutna? Saluhut hangaluton ni jolma sumarihon pamanganna do, hape ndang sombu anggo rohana binahen ni. Ai aha do hasurungan ni halak na pistar sian halak na oto? Aha gunana di halak na dangol ia diboto mardalan di adopan ni halak na mangolu? Tagonan do parnidaan ni mata, sian roha na monsong mardondami; hata na oto do nang i jala pangeahion di alogo sambing.

7.     Manang beha pe pangalaho ni jolma, nunga tibu hian targoar goarna i, jala binoto jolma hian do ibana, jala ndang tarbahensa mardabudabu dohot Debata, na gumogo situtu sian ibana. Ai molo godang hatahata, na paganda jea do i; tung aha ma laba ni jolma sian i? Tung ise umbotosa manang aha na denggan di jolma i bahen hangoluanna saleleng di ariari ni ngoluna, * angka na laho salpu songon halinu? Ise tahe tarbahen * pabotohon tu jolma i manang aha na masa di hasiangan on ia dung salpu iban

8.     angka parjehe, parroha na neang, sipaburnang diri, holongan di hisap ni daging asa di Debata.  Parrumang hadaulaton do nasida; alai hagogoonna i ndang dapot di nasida. Pasiding ma angka sisongon i! Angka sisongon i do na olo manisipi tu jabu ni halak, mandormai roha ni angka boruboru, naung sorat binahen ni dosa, angka na nielaela ni ragam ni hahisapon, angka na tongtong marguru, alai matua so sahat nasida mananda hasintongan i:

Koor

Marende BE. Suplemen 598: 1, 3

·          Bege ende ni suruan, sangap ma di Tuhan i,/ Nunga tubu Sipalua Raja Sipardame i,/ Dipadame Debatanta do diriNa tu pardosa/ Nunga tubu Kristus i di huta Betlehem i./ Ende ni suruani, sangap ma di Tuhan i.

·          Jesus Raja Hadameon sondang hatigoran i./ Panondang ni hangoluan di saluhut jolma i./ Dirumari do diriNa lao manobus manisia/ Asa unang mate be ala ni dosana be./ Ende ni Suruan i, sangap ma di Tuhan i.

Liturgi IV: Bagabaga Haroro ni SIpalua

1.     Mansai holong situtu do Jahowa marnida jolma na ditompa tumiru rupaNa tudos tu pangalahoNa i. Nang pe naung terrimas Jahowa marnida angka hajahaton manang dosa angka ni niula dohot dipingkiri jolma, alai tung na so tarbunihon do holon ni rohaNa. Diungkap do tingki parasinorahon tu jolma i, boha ma asa mulak ma jolma i tu hangoluan, jala asa unang marisuang angka ngolu ni jolma i di ngoluna be.

2.     Dipillit Jahowa do angka panurirang laho mambaritahon taringot haroro ni Sipalua, asa unang be hamagoan ujung ni jolma i, alai ingkon do mulak muse songon panompaon na parjolo i, ima mulak tu tumiru ni Jahowa Debata, tudos tu pangalaho ni Jahowa Debata.

3.     Ro do hata ni Jahowa marhite panurirangNa si Jesaya asa dipaboa tu angka jolma manang bangso na hinaholonganna mandok: Ndang dope sae hamu pauruuruhon jolma, dohot do Debatangku naeng lojaanmuna. Dibahen i apala Tuhan i sandiri ma mangalehon sada * tanda di hamu: ** Ida ma, gabegabean ma sada namarbaju, jala tumubuhon sada anak, jala bahenonna ma goarna: * Immanuel.

4.     Mantega dohot situak ni loba panganonna, paima diboto mambolongkon na jat, jala mamillit na denggan. Ai * tagan so diboto dakdanak i dope mambolongkon na jat, jala mamillit na denggan, * tarulang ma tano i na nirajaan ni na dua raja hinabiaranmu i. Boha do rohanta manomunomu haroro ni Immanuel i angka dongan?

5.     Laos didok do muse: Bangso na mardalani di bagasan haholomon marnida sada panondang na bolon. Binsar do sada panondang di angka na mangingani tano linggoman ni hamatean. Ai nunga tubu di hita * sada posoposo dilehon tu hita sada Anak, pampe tu ** abarana do sogot harajaon, jala bahenonna goarna: Sipartahi * Halongangan, ** siulubalang ni Debata, Ama saleleng ni lelengna, Raja ni hadameon.

6.     Bahen hagaganda ni harajaon dohot * hadameon na so marujung di * habangsa ni si Daud dohot di harajaonna i, pahothon dohot patoguhon marhitehite patik dohot hatigoran, olat nion ro di salelenglelengna.” Boto ma angka dongan, nda tung disangkapi Jahowa jolma i ditompa asa hamagoan manang hamatean ujung ni ngoluna manang hapatean ni ngoluna.

7.     Panurirang Sakaria mandok: Mariaia situtu ma ho, ale boru Sion, marolopolop ma ho ale boru Jerusalem! Ida ma, na ro ma rajam tumopot ho, partigor ibana jala siparmonang; na serep do rohana jala marsihundul di halode dohot di anak ni halode inaina. Beta hita parsidohot di parolopolopon dohot di hariaon ni angka ni asian ni Jahowa.

Marende BE Suplemen 591: 1, 3

·          Boru Sion las roham, las roham Jerusalem./ Ai na ro do Raja mi, padamehon ho tongtong/ Boru sion las roham las roham Jerusalem.

·          Hosianna ro ma Ho! Masuk Ho tu rohangkon,/ Baen mardame tondingkon lao manjangkon haroroM,/ Anak Daud ro ma Ho! Masuk Ho tu rohangkon

Liturgi V: Haroro ni Sipalua

1.     Nunga rap hita mambege angka dongan taringot haroro ni Sipalua i, ima Immanuel. Alai boha do partording ni masa angka dongan? Na tubu do Sipalua i di bagas ni na gok hamoraon manang sian ripe na gok arta?

2.     Nda tung di bagasan parripeon na mora manang sian keluarga na harajaon ibana tubu angka dongan. Alai ro do ibana dibagasan haserepon. Tubu sian sada na marbaju na margoar si Maria, naung gabegabean sian Tondi Parbadia.

3.     Bege ma angka dongan asa hupaboa partording ni haroro ni Sipalua i. Di paonombulanhon naung dapotan hangoluan si Elisabeth naung hol i, ima jolma ni malim Sakaria ro ma surusuran na margoar Gabariel mandapothon na marbaju na margoar si Maria. Ndada sian sangkapsangkap manang pangulahon ni jolma hatutubu ni Immanuel i angka dongan, alai dapotan tua do si Maria i, ndang marhasotan.

4.     Didok surusuruan i ma tu na marbaju i, ima si Maria mandok: : Tabi di ho, na niasian! Didongani Tuhan i ma ho! Alai tarsongot do si Maria umbege hata i, ninna rohana do, parsantabian dia do i ulaning? Jala didok surusuruan i ma tu si Maria: Unang ho mabiar, ale Maria; ai dapotan asi ni roha do ho di Debata!

5.     Gabegabean ma ho, tubuan anak ma ho; Jesus ma bahenonmu Goarna! Balga ma Ibana muse, goaron do Ibana Anak ni Natumimbul i; lehonon ni Tuhan Debata do tu Ibana habangsa ni si Daud, amana i. Rajaanna do pomparan ni si Jakkob salelenglelengna, jala ndang marhaujungan harajaonna i.

6.     Didok si Maria ma mandok surusuruan i: Songon dia ma pangalaho ni i, ai so adong hutanda baoa. Jadi dialusi surusuruan i ma nasida: Songgopan ni Tondi Parbadia ma ho jala linggoman ni hagogoon ni Natumimbul i do ho; ala ni i na badia do dohonon na tubu i, Anak ni Debata. Ia si Elisabet, sisolhotmi na sai tua i, naung digoar na hol, marhangoluan anak do; paonombulanhon ma nuaeng.

7.     Ai ndang adong na so tarpatupa Debata. Gabe didok si Maria ma: Naposo ni Tuhan i do ahu. Sai saut ma tu ahu songon na nidokmi! Dung i ditadingkon surusuruan i ma nasida. Di tingki i ma borhat si Maria dipahatop ma laho tu dolok, tu huta Juda. Bagas ni si Sakarias do dibongoti, ditabi ma si Elisabet.

8.     Umbege tabi ni si Maria i si Elisabet manggunjal ma posoposo di bagasan bortianna, jadi gok Tondi Parbadia ma si Elisabet. Laos marsoara na gogo ma ibana, dijouhon ma: Dapotan pasupasu do ho di tongatonga ni angka ina; dapotan pasupasu do na pinarorotmi!

9.     Marhua ma pola ro ina ni Tuhanki manopot ahu on! Ai disi dapot pinggolhu soara ni tabimi, manggunjal do posoposo i di siubeonku, sian las ni rohana. Martua ma ho, ala dihaporseai ho, ingkon tulus na tinonahon ni Tuhan i tu ho! Gabe didok si Maria ma: Dipatimbul rohangku do Tuhan i

Marende BE. 54: 1, 3

·          Sonang ni bornginna i uju ro Jesus i/ Sonang modom do halak sude holan dua na dungo dope/ Mangingani AnakNa Jesus Tuhanta i

·          Godang ni tua disi di na ro Jesus i/ Tung malua pardosa muse, sian hamagoanna sude/ Ala ro Sipangolu Jesus Tuhanta i.

Liturgi VI: Hatutubu ni Jesus

1.     Angka dongan, jumpang ma tingkina di na ro Sipalua i. Uju di panggomgomion ni Kaisar Agustus ingkon suraton do nasa jolma di huta hatubuanna. Umbahen i do borhat ma si Josep rap dohot si Maria tu bona pasogit ni si Josep. Uju i ndang marhasohotan dope si Josep tu si Maria, jala tarjalo si Josep do na masa tu si Maria dung ro surusuran Gabariel patoranghon tu si Josep aha na masa tu si Maria marhite pangungkapon di nipina.

2.     Alai di na jumpang ma tingkina na gok hangoluanna, dilului do inganan laho maradi asa adong inganan hapeahan hatutubu ni Jesus, Sipalua i. Hinorhon ni na ro parenta sian Kaesar Agustus asa mulak tu bona pasogitna be, torop ma jolma ro tu Bethlehem sian ragam luat. Jala gok ma bagas laho maradi

3.     Adong do inganan di hami ala naung gok tingkina ibana laho manubuhon anak? Ninna si Josep tu nampunasa bagas. “Nunga gok, jala dang adong be inganan na asing, tu sadaan ma hamu laho dang adong be” didok nampunasa bagas i. Na so ditanda halak on do hape ise na tinulakna i, jala ise do na naeng tubu i.

4.     Adong do sada nampuna bagas alai ndang adong be kamar songon inganan hapeahan laho modom songon na asing. Alai adong do sada bara, inganan angka birubiru. Laos disi ma inganan di na laho manubuhon anak si Maria i. Inganan na bau, jala ndang tama nian inganan i gabe ingnan hatubuan ni Immanuel ima Sipalua i.

5.     Ale angka dongan, bara ni pinahan i ima gombaran ngolum ale angka dongan. Gok gabus, hosom, elat, late, dohot teal. Alai ro Jesus, ima Immanuel manang Sipalua i laho paturehon ngolum. Nunga tubu be Jesus i, jala marolopolop ma hita di haroroNa i.

6.     Jadi adong ma marborngin di ladang na disini angka parmahan, mangingani pinahannasida. Jadi didapothon sada surusuruan ma nasida, jala marsinondang ma sangap ni Tuhan i humaliang nasida, gabe mabiar situtu ma. Alai didok surusuruan i ma tu nasida: Unang mabiar hamu; ai barita halalas ni roha godang do huboan tu hamuna, parsaulian ni sandok bangso i.

7.     Ai naung tubu do di hamu saborngin on, di huta ni si Daud, Sipalua i, i ma Kristus, Tuhan i! On ma partinandaan di hamu: Posoposo do dapotonmuna, na binorhos peak di panggagatan. Jala tompu ma adong dongan ni surusuruan i torop angka parangan parbanua ginjang, dipuji nasida do Debata, mandok: Hasangapon ma di Debata di ginjang, dame ma di tano on, di angka jolma halomoan i.

Marende BE Suplemen No. 616: 1

·          Uli na i di borngin na badia humirdop-hirdop do bintang disi./ Di borngin i, do tubu Sipalua Di panggagatan di Betlehem i,/ Portibi on dangol gok haholomon marnida sondang ni Tuhantai./ Uli na i marende do suruan diborngin i do tubu Kristus i/ Di borngin i do tubu Kristus i.

Jamita

Marende BE. 62: 1........                                                        Pelean

·          Halalas ni roha godang, na hubaritahon on./ Nunga tubu Sipalua di hita jolma on./ Hasangapon di Debata, laos dame, dame, dame ma di jolma/ Lomo ni roha ni Debata do hita jolma on.

·          Ai saborngin on do binsar bintang di na holom i./ Sumondangi hagolapon, na di rohanta i./ Hasangapon di Debata, laos dame, dame, dame ma di jolma/ Lomo ni roha ni Debata do hita jolma on.

·          Tuhan Jesus hadomuan, na disuru Debata/ Na pasaehon sude dosa di dolok Golgata./ Hasangapon di Debata, laos dame, dame, dame ma di jolma/ Lomo ni roha ni Debata do hita jolma on.

·          Halalas ni roha godang sai songgopi rohangkon/ Asa dohot au ummalo mamuji goarMi/ Hasangapon di Debata, laos dame, dame, dame ma di jolma./ Lomo ni roha ni Debata do hita jolma on.

Tangiang Pelean – Ale Amanami – Pasupasu

IV.            HATA HUHUASI DOHOT ULAON NA MANGIHUT NIATURHON MA HOMBAR TU NAUNG

NIATURHON GANUP SEKTOR