Bahan Jamita Minggu VIII Dung Trinitatis : 1 Rajaraja/ 1 Raja - raja 21: 1 - 16

BAHAN JAMITA

MINGGU VIII DUNG TRINITATIS

Minggu, 22 Juli 2018

Ev.: 1 Rajaraja 21: 1 – 16; Ep.: Kolose 4: 1 – 6; S.Patik: Rom 12 : 2

HATOMANON DO DALANTA MANGALO HISAP NI DAGING

Oleh: Pdt. Daniel Bonardo Pane, S.Th.

Patujolo

            Adong do hata na mandok: “ise do musu na mansai borat di ngolu ni ganup jolma? Holan sada do ima hisap ni daging”.  Hisap ni daging on do na dipangke sibolis pangago i asa mardosa jolma na parjolo i. Martumbur jala torop pe angka parjahat di hasiangan on; sega parsaoran na denggan i; tubu ragam parporangan; parbadaan; sega nang angka na ditompa Jahowa angka na denggan i holan laho manggohi angka hisap ni daging na so boi nirajaan. Ndang pola ringkot jala mago do asi ni roha manang holong holan ala ni hisap ni daging. Tarlumobi molo adong sada uluan di sada punguan, arisan, harajaon, pamarenta manang di huria molo so boi nirajaan hisap ni dagingna gabe sega do punguan, arisan, harajaon, manang ganup na niuluhononna. Songon turpuk jamita di minggu VIII dung Trinitatis on taringot sada raja na digohi hisap ni dagingna jala manghorhon do i tu ngolu ni jolma na di gomgomanna. Asa lam tu tangkasna hita mangantusi turpuk jamita on, masuk ma hita tu hatorangan ni turpuk.

Hatorangan ni Turpuk

            Turpuk jamita on ima taringot sada raja na manggomgom Israel Utara (dung marujung ngolu si Salomo, anak ni si Daud bola dua do harajaon Israel na bolon (Israel Raya) i gabe 2 harajaon hirahira taon 930 andorang so Kristus: (I) ima Israel Selatan na ni miani 3 marga Israel, Judah, Simeon dohot Benjamin jala raja na manggomgom Israel Selatan on ima sian pinompar ni Raja Daud ibukota Jerusalem; (II) ima Israel Utara na ni miani 9 marga Israel ima  Zebulun, Isakhar, Asyer, Naftali, Dan, Manasye, Efraim, Ruben dan Gad. Ibukotanya adalah Samaria. Raja na manggomgom di harajaon on ima sian ragam pinompar harajaon (ragam dinasti) na so sian pinompar ni si Daud. Sada hasadaan do 1 Rajaraja tu 2 Rajaraja na pabotohon taringot harajaon ni Israel dung salpu si Daud gabe Raja gumomgom Israel na bolon (Israel Raya) i sahat tu hasesega harajaon ni Juda dung jumolo sega harajaon ni Israel utara (Samaria). Marragam be do partingkian disurathon buku 1 Rajaraja dohot 2 Rajaraja hombar tu partingkian raja na manggomgom. Somal do molo sada harajaon sai adong do sekretaris harajaon nang pe ndang disurathon ise goarna, na martugas laho manurat aha na masa di harajaon i. Laos dipapungu ma songon na adong sisaonari uju partingkian habungan babel, asa marnida do halak Israel naung marserak i taringot pangalaho angka raja manang panggomgom Israel na ponsa i dohot pangalaho ni halak Israel na mansai maralo tu hata ni Jahowa jala mampanghorhon hasesega di raja i dohot di harajaon i.

            Turpuk jamita on ima taringot sahalak raja na sai mangapian mida porlak anggur ni sahalak na ginomgomanna, jala mansai susah do hadirionna ala ndang digohi pangidoanna. Raja i ima na margoar si Ahab anak ni si Omri. Ahab ima sada raja di Israel Utara na mangalap boru raja Etbaal sian harajaon Sidon, namargoar si Izebel. Ia na nampunasa porlak anggur i ima si Nabot sian Jisreel, tungkan nariti (barat daya) tao Galilea. Mansai holong do roha ni Jahowa tu si Nabot, ala sahalak na marsomba jala marDebatahon Jahowa do ibana di ngoluna. Boi do idoanta, songon dia rimas ni Jahowa tu si Ahab dohot ripena dung dibahen nasida angka na jat i masa tu si Nabot pola sahat tu na matena ibana. jala porlak anggur i jonok do i tu bagas harajaon (istana) ni raja Ahab i. ndang adong dipaboa sadia bidang manang ukuran porlak anggur i. alai molo manat itajaha turpuk jamita on, mansai bagak do porlak anggur on di roha ni si Ahab, ido umbahen na mansai holong do roha ni si Ahab asa gabe ampuna ni si Ahab. Pola do dilehon si Ahab singkat ni porlak anggur i na dumenggan tu si Nabot asal ma olo si Nabot mangalehon porlak anggurna i. alai ditulak si Nabot do i, ala mansai arga do di si Nabot tadingtading ni damangna. Angka dongan, molo itaida taringot tu ay. 1 – 3 turpuk jamita on, boi do itadapot mansai arga do di si Nabot tadingtading ni damangna nang pe boi didapot si Nabot na umdenggan sian porlak anggurna i tarlumobi molo raja mangido sipangidoan na so jadi juaon. Molo parngoluan ni halak Israel mansai arga do bona pasogitnasida, manang tano teantaenan. Adong do di nasida penilaian na mansai arga taringot tano teanteanan ala gombaran ni karakter parngoluannasida do i, lapatanna tano i berhubung tu kelanjutan hidup, keluarga dan kelajutan sistem kemasyarakatan atau adat. Ido umbahen ndang olo si Nabot manggadis porlak anggurna i nang pe raja Ahab na mangido jala dilehon si Ahab do singkatna na umdenggan sian i.

Di ayat 2 dipaboa do di na mulak si Ahab tu bagasan jabuna, pola gusar jala marmurukmuruk ibana ala hata ni si Nabot i, dipapeak tu podomanna, dipahusor bohina dompak dorpi pola ndang olo ibana mangan sagusagu. Tung mansai marsak situtu do si Ahab ala ndang dilehon si Nabot songon na dipangidona i, tarlumobi molo raja mangido sipangidoon alai ditulak maol do tarjalo roha ni raja i. didia ma sangap ni raja i molo ditulak pangidoanna? Manulak pangidoan ni sahalak uluan maralapatan do i ndang mangharingkothon sangap ni raja i tu dirina. Ro ma si Izebel halak Sidon i manopot ibana (ay. 5) laho . Ringkot do botoonta taringot si Izebel, sahalak boru raja Etbaal sian harajaon Sidon (Fenesia atau Saida di negara Libanon sisaonari) na marsomba tu debata sileban tu baal. Molo sahalak raja mangoli tu sada boru ni raja sian harajaon na asing, martujuan do i laho pahothon jala pagogohon gogo ni harajaonna i. jala marudut do i tu parugamoon, na marlapatan gabe dohot ma debata ni harajaon na asing i masuk tu parugamoon harajaonna i. songon si Ahab na mangoli dohot si Izebel sian parugamooan na marragam, gabe parsidohot ma ugamo ni si Izebel dohot debata ni si Izebel sombaon ni si Ahab dohot halak na ginomgoman ni si Ahab. Dipajongjong ma kuil  tu debata ni si Izebel, ima kuil Baal sian Tirus manang na didok: Melqart.

Dung i dipabotohon si Ahab ma aha na sungkot di bagasan rohana (ay. 6). Sian ay. 6 on tangkas do idaonta na marsigorgor do hape di bagasan roha ni si Ahab na ingkon di ibana ma porlak anggur si Nabot i. dung dipabotohon si Ahab na sungkot di rohana i, gabe dipatogar si Izebel ma si Ahab marhitehite bagabagana na mandok: pir ma tondim! Ahu pe mangalehon tu ho porlak anggur ni si Nabot, halak Jisreel i. denggan do na dibahen si Izebel tu amantana, jala ingkon songon i sahalak ripe na ingkon manungkoli jala manogari ripena do. Alai molo tahitahi ni si Izebel na so jadi masa di parripeon ni sahalak uluan manang partogi di sada luat manang inganan. Sangkap na roa jala sangkap na jat do na disangkapi ripe ni si Ahab i. molo itajaha Jakobus 4: 1 – 3, “Sian dia do angka parbadaon dohot parmusuon na di hamu? Nda sian hisaphisap, angka na maralo di bagasan angka ruasmuna! Na marsangkapi do rohamuna, alai ndang dapotan; na mambunu do hamu jala mangiburu, laos so taruli hamu. Na masialoan do hamu jala marmusu, so adong di hamu, ala so martangiang hamu. Na martangiang do hamu nian; alai ndang manjalo, ala sala tangiangmuna, ai naeng pansuasaehononmuna do i di bagasan hahisaponmuna.” Marsangkap do si Izebel laho mamunu si Nabot, holan asa manggohi hisaphisap ni si Ahab.

Di ayat 8 – 10, ima cara ni si Izebel asa saut songon na di rohana i. dipatubu do hata gapgap taringot si Nabot nampunasa porlak anggur i. sude diparade dohot denggan sahat tu ise na mangulahon laho mamunu pe nunga diparade. Ale angka dongan, halak na so boi mangarajai hisaphisap ni dagingna ingkon hisaphisap i do na mangarajai ibana mangulahon na jat, jala molo so dapot songon hisaphisap ni dangingna i, tubu ma hosom, pangiburuon, dohot angka ulaon na jat na asing laos adong ma na pintor stress, struk jala mate ma ibana di hisaphisapna i. songon na dibahen si Izebel di turpuk jamita on. Di ayat 11 – 16, saut ma songon na disangkapi si Izebel i asa manggohi hisaphisap ni si Ahab, amantana i. dipangke do goar ni Jahowa, Debata ni Israel di sangkap ni Izebel i boha asa lam muruk halak sintua dohot halak na raja angka na maringanan di bagasan huta i. mansai sangap jala badia do Goar ni Jahowa di halak Israel, na so boi diinsahi manang sai dipandok di angka na so ture dalanna. Laos ido dipangke si Izebel laho mamunu si Nabot. Molo dipangke si Izebel do goar ni debatana, ima si Melqart, pasti ndang jumpang songon na di rohana i. Sahalak partogi, alai ingkon hamagoan hosa na ginomgomanna asal ma dapot na di rohana. Sahalak uluan, alai ingkon mambahen marsingkor halak na so adong hasalaanna asal ma jumpang na di rohana. Mate ma si Nabot marhite na didangguri ibana pangke batu ala hata gapgap na dipatubuhon si Izebel tu ibana. Dapot ma songon na di roha ni si Ahab, nang pe ingkon marhite na jahat ibana mandapot i.

Dihalomohon Jahowa do na masa di sudena i? nda tung dihalomohon Jahowa masa sisongon i. marhite si Elia, panurirangna halak Tisbe i. di ayat 17 – 26, dipabotohon do hata ni Jahowa na ingkon sipasahathon ni si Elia taringot uhum na naeng masa tu si Ahab. Ndang hea Jahowa manghalomohon angka pambahenan na jat, nang angka siulahon hajungkingon. Ingkon hona toru ni Jahowa do angka siula na jat, jala ndang dapot hatuaon di ngoluna. Alai dung disolsoli si Ahab angka pambahenanna i, marpangulahi do roha ni Jahowa mida si Ahab, alai ndada sahat tu si Izebel dohot pinompar ni si Ahab ala dang adong roha manolsoli di nasida.

Hahonaan ni Turpuk

            Adong do na ringkot siputihononta marhite turpuk jamita on, ima:

1.      Thema minggunta di minggu VIII dung Trinitatis, dibahen do ojahan ima: “gabe partogi na sintong jala haposan”. Adong do falsafah ni halak batak taringot sahalak partogi, ima: parbahulbahul na bolon, paramak na so ra balunon, partataring na so ra mintop, parsangkalan na so ra mahiang, pamuro na so tumiop sihor, parmahan na so tumiop batahi, Singa mangalompoi, singa na so halompoan; hatorusan ni Debata, hatorusan ni sombaon, Tanduk so suharon, mataniari so dompakon, hatana na so jadi laosan, tona na so tupa juaon, Pangaitan ni sangap, pangahitan ni badia, sihorus na gurgur, siambai na longa, Paradat sijujung ni ninggor, paruhum sitingkos ni ari, sipalua na tarbeang, sitanggali na tartali dohot lan na asing. Alai tung na so jadi dapot saluhutna i di ngolu ni si Ahab. Hinorhon ni hisaphisap ni dagingna ingkon mabadabu ma ibana marhite ripena tu hajahataon sahat tu na ingkon mate jolma na ginomgomanna na so marsala, jala na so dapot hasaan di ibana.

2.      Si Nabot mangajarhon tu hita, arga ma itabahen tano teanteanan ni natuatua naung sahat tu hita na martudutudu tu bona pasogit. Unang olo hita hatophatop manggadis bona pasogitta tu jolma na ro. Molo masa songon i, mago ma tanonta jala ndang adong be artanta di bona pasogit i. tano bona pasogit berhubungan do i tu kelanjutan hidup, keluarga dan kelajutan sistem kemasyarakatan atau adat. Molo gabe ampuna ni halak do i, dang parjambar be hita di tanonta i.

3.      Adong do di hata ni Indonesia mandok: di balik kesuksesan seorang suami atau istri ada istri atau suami di dalamnya, di balik kehancuran seorang suami atau istri juga ada istri atau suami di dalamnya. Tutu do hata sisongon i. olo do ripe i mambahen angka partogi i gabe sangap, jala laos adong do ripe i mambahen angka partogi gabe marlea. Izebel sahalak ripe ni si Ahab nda tung mambahen sangap si Ahab, amantana gabe sada partogi. Alai Izebel sahalak ripe na mambahen si Ahab gabe parro rimas ni Jahowa tu dirina dohot di sude keluargana.

4.      Unang sai mangapian hita di arta ni donganta nang pe umbagak jala umuli na di jolma sian na di hita. Molo masa pe mangapian manat hita asa unang madabu tu mangoloi hisaphisap ni daging asa boi na di jolma i gabe di hita. Itapasabam ma na adong di hita, molo pe songon na hurang na adong di hita lam tu semangatna ma hita mangalului na ringkot i asa boi gok na hurang i. molo pe ndang dapot, unang itapasakhon dirinta ingkon gok na hurang i. molo masa sisongon i, masa ma hosom, parmusuhon, pangiburuon, jala sangkap na roa pe jumpang di bagasan ngoluna. Ndang adong dame di ngoluna alai sai hasusaan do jumpang di ibana. Lam dipingkiri jala lam dipingkiri sarupa ma i tu na parrohon sahit tu dirina sandiri.

5.      Unang patubu hata gapgap manang ulaon na jat holan asa saut na dibagasan rohanta be. Ndang sude angka na itasangkapi manang na itapangido ingkon saut manang jumpang ala so hita Tuhan i. itarajai be ma angka sangkapsangkap na roa i molo tung adong sangkap sisongon i di ngolunta. Molo adong sangkapta na so jumpang, ndang dapot na niluluan benget ma rohanta di na adong i di hita huhut lam itaharinggashon mangulahon ulaon na denggan i atik di sada tingki, dipatulus Tuhan sangkapta i manang dapat na italulu i, molo so di hita boi do i tu ianakhonta, nang tu keluarganta pe. Molo so jumpang be sisongon i, marlapatan ndang ringkot di ngolunta dope sangkapta i, alai holan di ringkot hisap ni dagingta do i. manat ma hita di angka sangkap manang pangidoanta sandiri, sangkap manang pangidoan tu ringkot ni ngolunta dohot keluarganta do i manang sangkap manang pangidoan hisaphisap ni dagingta.

6.      Didok di Psalmen 116: 15: “arga do di roha ni Jahowa hamamate ni angka na niasianna i”. ido pola gabe ditongos si Elia, Panurirang-Na laho paboahon angka toru ni Jahowa masa tu si Ahab dohot keluargana. Angka dongan, laho manggohi hisaphisap ni dagingta unang ma gabe korban halak na so marsala manang na so mamboto aha na masa. Sai unang ma jumpang di ngolunta na mandok: Segalanya di halalkan asalkan dapat apa yang dicitakan atau yang diinginkan atau diharapkan.

7.      Holan marhite hatomanon do hita boi mangalo hisaphisap ni daging manang manggotap pangalaho na jat manang na roa di ngolunta. Hatomanon (pengendalian diri/ self-controlling) do na mangajari hita taringot boha do manghamauliateon dohot manghasabamhon aha na adong di hita. Otik manang godang pe na adong di hita, tahamauliatehon ma i marhite mamangke saluhutna i tu angka na denggan. Sian dia do ro hatomanon, ima sian Tondi Parbadia, ala hatomanon ima sada sian parbue ni Tondi do i. antong, molo naeng do adong di hita hatomanon, ingkon jumolo do jumpang Tondi Parbadia di ngolunta be. Amen.

. 

Bahan Jamita Epistel Minggu VIII Dung Trinitatis - Kolose/ Kolosse 4: 1 - 6

BAHAN JAMITA EPISTEL

MINGGU VIII DUNG TRINITATIS

Minggu, 22 Juli 2018

Nas: Kolosse 4: 1 – 6

MANGOLU DI BAGASAN PARSAORAN NA DENGGAN I!
Oleh: Pdt. Daniel Bonardo Pane, S.Th.

Patujolo

            Aha do parbue ni haporseaonta naung mananda jala manghaporseai Jesus di ngolunta. Nda tung gabe dos manang sarupa hita parangenta dohot pangahataionta sian jolma na so manghaporseai manang na so manjanghon Jesus dope di bagasan ngoluna. Manghaporseai Jesus Kristus di parngoluan on, ndada holan manghaporseai taringot hadirionNa, alai marudut do taringot tu parsaoranta tu Ibana jala sian parsaoranta rap dohot Ibana (ima Jesus Kristus) diajari do hita taringot parsaoranta di humaliangta. Songon dia parsaoranta dohot Jesus tarida do i sian parsaoranta di humaliang. Parsaoran dohot Jesus Kristus, ima parsaoran na patubuhon hiras ni roha, las ni roha, dame, holong, lambok, serep jala marlambas ni roha na boi diida donganta marhite parangenta dohot hatanta. Ingkon jumolo do denggan parsaoranta tu Jesus Kristus asa denggan ma parsaoranta tu humaliang. Songon turpuk epistelta sadari on ima pangajarion manang poda ni si Paulus tu halak Kristen na mian di huta Kolosse taringot parsaoran ni ngolu nasida sama nasida dohot nasida tu humaliangnasida be (naung Kristen dohot na so Kristen dope) nang pe marasing be status sosial na masa. Asa lam tu ampit jala lam tu antusna hita mangalapati turpuk jamita on, masuk ma hita tu hatorangan ni turpuk.

Hatorangan ni Turpuk

            Luat Kolosse ima sada luat ginomgoman ni harajaon ni Rom. Molo sisaonari luat Kolosse on digoari ma Turki hirahira 15 km mardompakhon purba di rura Likus sian Laodikia. Mansai torop jala ragam do angka pangajarion na masa di inganan i na boi mambahen ganggu haporseaon ni angka halak Kristen taringot Jesus Kristus, dohot barita na uli songon na niajarhon si Paulus tu nasida marhite si Epafras (ida Kolose 1: 7, 8), ima dongan ni si Paulus laho pasahathon barita na uli dohot surat ni si Paulus songon na tarsurat nuaeng di turpuk jamita on. Uju na sahat surat on tu huria na di Kolosse, molo si Paulus tarihot do ibana (tarrante) ala ni barita na uli na binoanna i. tutu do ndang sude jolma na olo manjanghon barita na uli mian di ngoluna. Di bege si Paulus do angka ragam na masa di luat Kolosse on sian si Epafras on. Ragam do barita na dibege ibana. Adong do i taringot na angka parpoda haliluon (pengajar sesat) isarana angka kaum gnostik dohot boha do parsaoran na masa di luat i tarlumobi halak Kristen sama halak Kristen dohot di angka na asing. Tarlumobi taringot status sosial na masa di luat i ima taringot induk (tuan/ majikan) maradophon angka anak somang (naposona, pembantu, budak, pekerja).  Umbege na masa i, disurathon si Paulus ma suratna on songon sada jamita manang poda dohot pangajarion tu halak Kristen di luat Kolosse asa boi nasida marparange na denggan di parngoluannasida be nang pe sai adong halak na so manjanghon na denggan i.

            Ayat 1

            Hata induk dohot anak somang manang tuan dohot hatoban ima dua hata na marasing be status parngoluanna. Hata tuan (Yunani: kurios): ima sahalak na adong huasona marhite hepengna, pangkatna manang parbinotoanna tu halak na mangharinghothon ngolu, ulaon, manang parbinotoan sian dirina. Molo hata anak somang manang hatoban (Yunani: doulos): ima sahalak na mansai mangharinghothon ngolu, ulaon manang parbinotoan sian halak na boi mangalehon saluhutna i, na didokna tuan manang induk. Molo induk adong do hak-na  laho marsilomolomo tu anak somangna ala ampuna ni induk do anak somangna, jala anak somang ingkon adong do haundukhon na polin laho mangoloi indukna i nang pe ingkon na hansit pambahenan ni indukna i. sai dijaga anak somang i do boha do carana asa boi sonang roha ni indukna i, jala unang sanga muruk indukna i tu ibana asa unang dibolonghon indukna i ibana. Ido umbahen sai adong do begeonta barita na adong tuan menyiksa anak somangna, jala adong muse do na mate ala ni pambahenan ni indukna i. mauliate ma di Tuhanta dohot di pamarenta naung mambahen sada aturan manang uhum laho menjamin ngolu ni anak somang. Ise do induk dohot anak somang na didokna dison? Induk na dison ima saluhut induk na adong anak somang di jolona, tarlumobi diri ni si Filemon. Filemon ima halak na sangap sian luat Kolosse, jala torop do angka anak somang na mian di bagasna. Molo udut dijaha turpuk jamita on adong do digorahon si Paulus ima si Tikikus dohot si Onesimus, ima anak somang ni si Filemon na lintun mamboan arta ni si Filemon. Onesimus tartangkup ma di luat Rom, jala rap tarhurung dohot si Paulus. Di na rap tarhurung i nasida, dibege jala ditangihon si Onesimus ma pangajarion ni si Paulus na patubuhon hamubaon ni roha di si Onesimus (na so haposan hian gabe haposan jala haholongan ala ni hamubaon ni rohana) (ida Filemon 1: 10 – 11).

            “lehon hamu ma na tigor jala na tama tu angka anak somang”, ima sosososo ni si Paulus asa ganup induk ingkon do mamparateatehon jala mangulahon na denggan di ragam habasaon tu angka anak somangna. Maralo do sosososo ni si Paulus on tu sistem parhatobanon manang ha-anaksomang-on na masa uju i. tuan na olo mamparmuati rohana mida sala ni anak somangna. Onesimus, sahalak anak somang ni si Filemon naung mangulahon na jat di si Filemon. Nuaeng ditangkup jala dipenjara do si Onesimus. Pajumpang dohot si Paulus di penjara; mandapot pangajarion sian si Paulus taringot barita hangoluan; marhamubaon ma roha ni si Onesimus; disuru si Paulus do mulak muse si Onesimus asa mulak ma tu si Filemon, jala diparhatopot ma sude hasalaonna i asa marparmuati roha ni si Filemon di ibana.  Ayat 1 on ndang na mandok gabe dos ngolu ni anak somang dohot tuanna, jala gabe bebas situtu anak somang mangulahon lomo ni rohana sandiri nang pe maralo tu tuanna. Alai naeng ma nian masa parsaoran na denggan, na olo rap mamparateatehon angka na denggan di tuanna nang songon i di anak somangna. “adong do Tuhan nang di hamu di banua ginjang” hata on paingothon angka tuan i asa marningot adong do Tuhan, na marhuaso jala na so hasuhaton huasoNa. Molo di hata indonesia adong do hata na mandok: di atas langit masih ada langit na mandok asa serep ma di ngolu on ala adong do na umtimbo sian hita si nuaeng nang di ari na naeng ro. Tuhan na tongtong manarihon angka na ringkot di ngolunta, na mambasabasahon tu hita angka ragam na denggan.

            Ayat 2 – 4

            Di ayat 2 – 4 on disosohon si Paulus do angka induk rap dohot anak somangna martangiang. Na marlapatan ndada holan di parsaorannasida i na naeng dipadenggan, alai dohot do parsaorannasida tu Tuhan i marhite tangiang. Parsaoran na denggan di Tuhan i do dasor ni parsaoran na denggan di humaliangna. Manongtong ma Martangiang (Gorik: proseuche), dungo (Gorik: gregoreo) dohot mauliate (Gorik: eucharistia), ima 3 ulaon partondion (spiritual act) ni halak na porsea laho mangadopi ragam angka na masa di parngoluonna.

1. Martangiang (proseuche), ima ulaon olo mamungkap hadirionna laho pajumpang dohot Jahowa, Debata marhite Jesus Kristus. Di na mangungkap hadirionna i, di bagasan hatongamon jala roha na hormat manghatai dohot Jahowa, Debata na Sun Badia i. Mamuji hadirion-Na dohot manghamauliateon saluhut angka basabasa naung nilehon tu ngolunta; marudut ma laho manghatahon aha do na ringkot dihatahon sian roha na polin dohot na ias. Disi ma jolma i taruli hagogoon, dohot pangajarion na sian Debata marhite angka sangkap ni Jahowa na masa di parngoluonna.
2. Dungo (gregoreo), ima sada haradeon ni jolma naung martangiang mangadopi angka panosak ngolu on. Ndang olo ibana talu, mandele manang mandate molo pe songgop sitaonon i. margogo do ibana manimbangi angka ragam pangajarion dohot poda jala margogo mangalo angka ragam parpoda haliluon na mambahen ngoluna mandao sian Tuhan i.
3. Mauliate (eucharistia), ima manghalashon jala manghasabamhon manang aha na adong di ibana. Dipangke ma denggan jala dijamothon ma saluhut angka pasupasu jala basabasa naung dijalona sian Tuhan i. ndang masa ungutungut manang panaritaon di jolma na olo manghamauliateon na di ibana, alai baliksa do na jumpang: ima ngolu na gok semangat, tongtong mangulahon na denggan i, jala olo mangurupi angka na hurangan marhite sian na adong i.

Manongtong na marlapatan do i jugulhon, terus menerus tiada henti, Songon naung dipatorang di ginjang taringot na masa di luat Kolosse na torop angka parpoda haliluon dohot pangajari na boi mambahen ganggu angka na porsea i di haporseaonna dohot di Barita na uli naung dibegenasida, laos ragam angka na hinahansit naung diadopi angka apostel dohot parbarita na uli laho mambaritahon Barita na uli. Songon na masa tu si Paulus na tarhurung ibana hinorhon ni hasatiaonna mambaritahon barita na uli, ima barita hangoluan na sian Jesus Kristus. Manongtong ma angka na porsea marsitangiangan di ganup dongan halak na porsea na marlapatan rap marsigogoihon asa tung patar saluhutna angka hahomion ni Jahowa marhite Jesus Kristus songon naung dibaritahon angka apostel i.

            Ayat 5 – 6

            Nang pe ragam angka na masa di paralanan ni ngolu on alai unang ma sanga sega parsaoranta tu Jahowa Debata nang songon i parsaoranta tu donganta jolma. Nang pe torop na manjahati hita ala ni hatigoran dohot di hasintongan sai unang sumurut haringgasonta laho mangulahon dia do na nihalomohon ni Jahowa. Marpantas ni roha marparange, manimbangi ragam angka na masa di parngoluan on. Unang salah manimbangi na boi mambahen hita tu pandelean dohot ragam parange na so hinalomohon ni Jahowa. “parhaseang hamu ma tingki”, ima laho mamangke tingki na parsatongkinan on mangulahon angka ragam basabasa dohot na denggan. Molo idaonta do Efesus 5: 16 dohot di Kolose 4: 5 on dipodai manang dipopai si Paulus do asa ganup na porsea i mamparhaseang tingki (waktu, kesempatan hidup) laho mangulahon na denggan di bagasan parsaoran na denggan. Mangulahon na denggan dison ndada songon pangantusion na deba na mangalapati ulaon na denggan gabe sada pahala (tabungan, tiket masuk) panobusion di dosa jala laho tu Surgo. Alai mangulahon na denggan di turpuk jamita on ima hataridaan hita angka naung ditobus jala naung gabe na porsea ingkon tama do mangulahon na denggan, jala hataridaan na denggan do parsaoranta tu Jahowa Debatanta i.

            Mandok hata pe unang ma gabe ramos. Mandok hata pe ingkon lambok songon na siniraan na marlapatan sude hata na dihatahon naeng ma gabe hata na marimpola, hata tarpasupasu, hata hatuaon, na di bagasna ndang adong gasip dohot hata parmusumusuon, hata pargapgap, manang hata pamolamola. Asa sude na mambege hata i dapotan tua manang dapoatan pasupasu. Molo pe adong jolma na so manghalomohon i botoonta ma alus na patut tusi.

Hahonaan ni Turpuk

            Adong do 3 poin na mansai ringkot diputik marhite turpuk jamita on:

1.      Mangaradoti hatigoran jala mangulahon na denggan. Ganup jolma naung mandok dirina gabe halak Kristen ingon do mangaradoti hatigoran jala mangulahon na denggan. Mangaradoti hatigoran marlapan do i mangaradoti angka aturan dohot uhum ni Jahowa hombar tu ganup ulaonna be. Mangaradoti hatigoran jala mangulahon na denggan ima hataridaan ni holongta di angka tu Jahowa dohot tu humaliangna isarana: ripena, ianakhonna, angka na mian di bagasna, di huta, di balian manang di ganup inganan manang didia pe hita maringanan. Di parngoluan on ndang sude jolma gabe induk jala ndang sude na gabe anak somang. Molo induk pe hita (uluan di sada inganan parkarejoan, manager, supervisor, presiden, gubernur, bupati, camat, lurah, kepala desa, mandor) unang ma marsilomolomo hita songon na umhebat manang umgogo hita sian Tuhan i maradophon angka anak somangta (bawahan, manang pegawainta, manang parkarejonta). Rap ma mamingkiri dohot patupahon na denggan ma songon na uli parsaoran i. jala angka anak somang pe tung na so jadi marnalemba mangulahon ulaonna songon naung niaturhon indukna jala ndang angka anak somang mandemo indukna ala na denggan do na binahen ni indukna i tu ibana.

2.      Unang mansadi jala unang sumurut hita laho martangiang, jala tongtong ma dungo mardongan roha mauliate. 3 ulaon i (tangiang, dungo, mauliate) ima ulaon partondion na mansai ringkot diulahon halak na porsea i asa marbisuk jala dapotan roha na pantas na boi gabe gogo, bisuk, pangantusion dohot parbinotoan taringot angka sangkap manang dalan ni Jahowa na masa di pardalanan ni ngolunta be. Jala sian i dapotan semangat, hiras ni roha dohot las ni roha mandalani ragam na masa di ngolunta. Ndang adong jumpang parungutunguton, pandelean dohot mandate. Tulus do ibana mangulahon ulaonna na denggan i mardongan panghirimon di hahomion ni Jahowa na naeng sipataronNa di tingki na lehetna i.

3.      Itaparhaseang ma tingki na denggan on laho pasangaphon Jahowa marhite parualaon dohot hata na denggan. Mamparhaseang tingki ima mamangke tingkinta tu angka ulaon dohot panghataion na denggan. Dilehon Debata do hita tingki parasian sisaonari ndada laho mangulahon ragam ulaon hageduhon dohot hajahaton. Alai itapangke ma tingki on laho gabe pasupasu tu angka humaliangta. Sai dihasiholi jolma ma hadirionta na mamboan tua dohot las ni roha. Nang hata na haruar sian pamangan pe angka hata hatuaon, hata na marimpola jala hata pangajarion tu na denggan. Mamparhaseang tingki laho pasangaphon Goar ni Jahowa Debata ma ngolunta na jempek on asa tanda hita angka naung taruli di haluaon dohot di panobusion di bagasan Jesus Kristus. Amen.

                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                    

(

Jamita Minggu IV Dung Trinitatis, 24 Juni 2018: Psalmen/ Mazmur 104: 19 - 30

BAHAN JAMITA EVA NGELIUM

MINGGU IV DUNG TRINITATIS

MINGGU, 24 Juni 2018

Nas: Psalmen 104: 19 – 30

PUJI MA JAHOWA ALE TONDINGKU,

 ALA IBANA DO DEBATA NA SO HATUDOSAN HUASO JALA HAMULIAONNA

Oleh: Pdt. Daniel Bonardo Pane, S.Th.

Patujolo

            Hata pamujion jotjot do i marsaringar di ganup parmingguon jala parsombaonta tu Jahowa, Debatanta nang pe sipata sai itaendehon pamujionta alai ndang sahat hita na tontu laho mamuji Ibana. Godang do jolma manghatahon pamujion tu Jahowa holan tabotabo na mandok di pamangan (lips service) ala ndang adong panghangoluhononna jala panghorhononna di ngoluna sandiri. Mamuji Jahowa do pamanganna alai rohana ndang didapot pos ni roha laho manghaposi Jahowa. Ingkon tangkas do boasa ma itapuji Jahowa, Debatanta i jala aha do lapatan ni pamujionta na sai itadokhon i? Asa lam tangkas hita mangantusi di sungkunsungkun i, masuk ma hita tu hatorangan ni turpuk.

Hatorangan ni Turpuk

            Psalmen 104 on ima sada ende pamujion ni angka malim ni Israel na dipangke jala na niendehon uju masa habuangon Babel. Tutu do tahe nunga sega be bagas joro na di dolok Sion. Bagas joro songon sada hataridaan ni huaso ni na nisomba i ndang jongjong be alai nunga malengse. Hasesega ni Bagas Joro ni sada bangso na talu  ima hataridaan na so margogo do debata ni bangso i na talu i jala ndang adong be hataridaan ni bangso i gabe sada bangso. Ndang adong be panghirimon ni bangso i asa boi muse mulak bangso i gabe sada bangso songon andorang so masa dope habuangon. Ido hasomalan ni pangantusion ni bangso uju i. Songon i tu bangso Israel naung talu maralohon bangso Babel, jala nunga sega be huta Jerusalem dohot Bagas Joro di dolok Sion. Hasesega huta Jerusalem dohot Bagas Joro ima hataridaan na so adong be panghirimon ni bangso i mulak songon Israel uju Daud gabe Raja Israel. Jala molo dipaihutihut hasomalan ni pangantusion na masa uju i, marlapatan do i ianggo Jahowa, Debata ni Israel pe talu maralohon Marduk, debata ni Babel.

            Alai marhite Psalmen 104 on, ima gabe paponggolhon pangantusion sisongon i. Na so jadi gabe talu Jahowa, Debatanta maralohon Marduk, debata ni Babel. Marhite Psalmen 104 on tangkas do hamuliaon dohot huaso ni Jahowa na manjadihon saluhut angka na tinompa marhite huaso dohot hamuliaonNa. Huaso dohot hamuliaon ni Jahowa na dipaboa di Psalmen 104 ima sada huaso dohot hamuliaon na so adong hatudosonna nang di saluhut inganan, di saluhut tingki, dohot di saluhut angka na masa di portibi on. Ibana do na manompa angka langit parlangitan, jala saluhutna unduk do di sude parenta ni Jahowa. Guru tu Jahowa do angka na adong di hasiangan on. Bulan, mataniari, angka bintang dohot sude parlangitan (angka na disomba bangso sileban, isarana Mesir Babel) ima angka na tinompa Jahowa sandiri marhite hataNa na gok huaso dohot hamuliaon (Psalmen 104: 1 – 19). Di ay. 20 – 23 turpuk jamimta on dipatorang do guru tu Jahowa do sude angka partingkian na masa di hasiangan on. Ndada holan na manompa Jahowa, alai diuduti do tu manarihon angka na ringkot tu hangoluan na tinompaNa i. Na so jadi gabe hurangan manang rapar angka na tinompaNa i, ai disarihon do saluhut di hangoluanta on.

            Marhite angka sude angka na adong di hasiangan on, tung ise ma debata na boi dipatudos tu huaso dohot hamuliaonNa i? Nang angka aek dohot laut dohot sude angka binatang na balga dohot sude gulokgulok ndang adong na so dipaturehon Jahowa Debata i. Sude angka na tinompa i mangaranap tu Ibana songon tanda mangido asi ni roha dohot panarihon ni Jahowa di ngolu na tinompa i. Jala marlobilobi do panarihonon ni Jahowa di ngolu angka na tinompa i, ndang adong be sasintongna ngolu ni jolma i gabe ngolu na marhahurangan ala disarihon do marlobilobi hinaringkot di ngolunta be (ay. 24 – 28). Alai ro ma sibolis asa mangalo jolma di aturan dohot di hata ni Jahowa, ndang adong be haundukhon ni roha ni jolma i maradophon Jahowa na manompa ibana. Dung mardosa jolma i, sai hurangan ma torus jolma i, hurangan di hasangapon, sai hurangan di posisi, hurangan di arta dohot hurangann di sipanganon dohot di parabiton, ala nunga mapitung be mata ni jolma i di pasupasu dohot di panarihonon ni Jahowa di ngoluna.

            Nunga lupa be jolma i ise do dirina jala ise do Jahowa di diri ni jolma i? Mandao ma roha ni jolma i sian na manompa ibana. Sai dirimpu jolma i do molo didapotna angka haulion ni portibi on gabe dos ibana dohot Jahowa jala sai dibahen do angka na diportibi on gabe ganaganaanna jala dipardebatahon asa dapot angka na di roha ni jolma i, mandapot angka haulion ni portibi on. Hape molo ditabunihon Jahowa do bohiNa, holsoan ma hita (ay. 29). Hata manabuhin dison ima martudutudu tu rimas ni Jahowa tu angka na tinompaNa i. Pangarimason ni Jahowa ima hamagoan tu jolma na so adong be pardengganonna tu Jahowa, jala hasesega tu diri ni jolma sisongon i. Jahowa, ima silehon tondi hangoluan tu jolma i asa mangolu jolma i. Jala molo jumpang tingkina monding ma jolma i jala mulak tu orbuk ma jolma i, ima sian parpambutonna hian (Pat. 1 Musa 2: 7; 3: 19). Ay. 29 turpuk jamita on ima patandahon diri ni jolma i ise do sasintongna jolma i diadopan ni Jahowa. Holan orbuk do hape, na so marlapatan jala satongkin do hataridaanna. Molo ro alogo i pintor habang do orbuk i jala laos mago.

            Alai parasiroha do Jahowa lambat tarrimas jala gok asi ni roha do itadapot sian Ibana. Marhite holong ni rohaNa i dipaimbaru do rupa ni tano on, ima mulak gabe na masa songon panompaon na parjolo i (ay. 30). Ndang na gabe mulak hita uju panompaon na parjolo i. Alai marhite ay. 30 on gabe mulak ma parsaoranta na denggan i tu Jahowa. Laos on ma na gabe panghirimon di angka malim Israel tarlumobi bangso Israel taringot huaso ni Jahowa na laho patupahon haluaon di bangso i jala mulak ma nasida sian tano pambuangannasida i. Jala marhite hamumulaknasida i, gabe dipauli ma muse angka pasipasi ni hasesega ni huta Jerusalem dohot Bagas Joro ni Debata ima di dolok Sion.             Molo jumpang tingki sisongon i, humuntal ma angka bangso na sai mandok naung monang debatana maralohon Jahowa Debata ni Israel i. Ndang adong na manahan jongjong disi. Jala ganup na sai manghirim di haimbaruon na pinatupa ni Jahowa ingkon do marolopolop jala gok ende partondion pamujion tu Jahowa ma jumpang disi.

Hahonaan ni Turpuk

Ai ndang adong na boi dipatudos tu huaso dohot hamuliaon ni Jahowa. Angka bintang, mataniari, bulan, dohot angka na adong di parlangitan angka aek, laut nang angka binatang na jotjot disomba angka bangso sileban ala dirimpu gabe hangoluan ni bangso sileban i, ima parbue panompaon ni Jahowa. Jahowa do na manompa saluhutna i. Guru tu Jahowa do saluhutna i jala hombar tu naung niaturhon ni Jahowa do angka i mangula hombar tu ulaonna be.

            Boha do hita manghirim angka haimbaruon na naung jala na naeng dipatupa Jahowa di ngolunta? Tung aha ma na boi idaonta manang itadapot molo gabe holang do hita sian Jahowa Debata hinorhon ni hisaphisap ni pardagingon dohot hisaphisap ni portibi on? Nda tung itadapot hasonanga, molo pe hasonangan piga leleng ma boi itahilalahon i? Porang, parbadaan, parsalisian jala pandelean ma jumpang di jolma sisongon i. Sai marguru jala manungkun  tu angka gogo ni portibi on boha ma asa dapot songon hisaphisap ni daging dohot portibi on, jala jumpang ma ujungna, ndang adong dapot hinatabo parngoluan, mulak ma daging on gabe orbuk na so marlapatan, jala na so adong be hataridaanna.             Marhite haimbaruon na pinatupa ni Jahowa manjou hita asa unang be holang hita sian Jahowa Debata. Ditongos Jahowa do AnakNa Jesus Kristus pola mate tarsilang asa boi muse jumpang pardomuanta, parsaoranta na mansai denggan i rap dohot Jahowa. Nda tung portibi on na boi padomuhon hita tu Jahowa. Alai holan inisiatif ni Jahowa sandiri do na padamehon diriNa tu hita angka na tinompaNa i.

            Antong unang be hita olo diela jala dijujui laho manggohi hisaphisap ni daging on sahat tu marguru tu gogo ni portibi on. Mulak ma hita tu Jahowa ai nunga dipaimbaru be parsaoranta dohot Ibana, asa marlapatan ngolunta on. Molo nunga jumpang sisongon i, marolopolop ma hita mangendehon jala mansoarahon ende dohot soara pujipujian tu Jahowa. Ndang be holan tabotabo ni pamangan pamujion i, alai dohot ma tu gomos maniop parsaoran na denggan i marhite na unduk ibana di hata ni Jahowa, jala gomos di bagasan panghirimon na togu ro di saleleng ni lelengna. Amen. 

Bahan Jamita Epistel Minggu IV Dung Trinitatis: Kolosse/ Kolose 1: 15 - 23

MINGGU IV DUNG TRINITATIS

Minggu, 24 Juni 2018

Nas: Kolosse 1: 15 – 23

 MARHITE JALA DI BAGASAN JESUS KRITUS DO

ADONG PARDENGGANANTA TU JAHOWA

Oleh: Pdt. Daniel Bonardo Pane, S.Th.

 Patujolo

            Pasti hea do hita padengganhon angka na sursar. Sian i botoonta na so lomo hita marnida na sursar tarlumbi sursar parsaoran na markeluarga, mardongansahuta, maraleale dohot na marnegara nang na marhuria. Alai molo nunga denggan adong muse na pasursarhon gabe sogo do roha. Unang ma nian holan diparsaoranta tu na adong diportibi on sai itapadenggan alai parsaoranta tu Debata ndang itapadenggan. Aha do hahonaanna tu turpuk jamitanta sadari on, masuk ma hita di hatorangn ni turpuk.

Hatorangan ni Turpuk

            Huta Kolose, ima sada huta na maju di harajaon Rom. Huta on hirahira 18 km tungkan utara huria Laodikia, jonok tu dalan Efesus dohot sunge Efrat. Di tanda jala digoari do najolo huta Kolose on ima Frigia. Molo itaida di na masa haroro ni Tondi Parbadia, adong do halak na sian luat Frigia na mambege jamita godang ni si Petrus uju na saor Tondi Parbadia (boi idaonta Ulaon ni Apostel 2: 10). Huria Kolose ima sada huria na so si Paulus na pajongjonghon. Hombar tu na bisuk mandok si Epapras do na pajongjonghon huria na di Kolose. Si Epapras ma na mambaritahon barita hatiuron barita las ni roha tu halak Frigia (Kolose) (Kolose 1: 7).

            Alai adong hamaolon na masa di huta Kolose taringot na marbarita na uli. Ido umbahen dibaritahon si Epapras na masa on tu si Paulus asa boi nian diparmahani jala dijamitai si Paulus halak Kristen di Kolose marhite suratna. Ido umbahen disurathon si Paulus suratna on hirahira taon 57 – 59, uju dihurungan ma si Paulus di tingki i. aha do harua na masa? Nunga torop be angka pangajari sipaotooto na mambahen lilu ngolu haporseaon dohot partondion ni huria i. sai diajari pangajari sipaotooto i, asa singkop hadaulatonta, ingkon sombaonta do angka tondi ni naung mate, ima tondi ni angka natutua songon hataridaan na unduk hita na marnatuatua, dohot tondi na manggomgom portibi on (martudutudu tu gogo ni portibi). Mambege barita i, pintor disurathon si Paulus do surat parmahanionna tu huri Kolose songon naung adong sinuaeng, na mandok: Holan marhite Jesus Kristus do boi malua hita, ndada marhite panombaonta tu angka ragam tondi ni naung mate dohot tondi ni portibi on, jala Jahowa do na manompa portibi on, jala Ibana do na manggomgom isi ni portibi on, nda tung tondi ni portibi on.

            Marhite i, lam ganda ma panandaion di Debata, jala gabe margogo situtu hombar tu gogo ni hasangaponNa i, na manghorhon nasa habengeton dohot lambas ni roha, mardongan las ni roha. Panandaion di Debata, ima panandaion di holong dohot huasoNa na so hasuhatan jala na so hatudosan. Ibana do mual ni hangoluan jala mual ni hasesaan ni dosa na pinatupaNa marhite Jesus Kristus, AnakNa na Badia i. Panandaion di Debata ima panandaion taringot gogoNa na mangatasi saluhutna nasa na adong di portibi on. Guru di Ibana do na masa, nang pe salpu portibi on dohot angka hagiotna, alai molo Debata Jahowa, ima Ama na itatanda di bagasan Jesus Kristus hot ro di salelengna do ianggo harjaonNa, ima sihirimon angka na porsea jala na satia. Ima gogo hasangapon ni Debata Jahowa, Ama i. jala alani i do na itahirim di rura na gok hasusaan on, antong marbengetonxc dohot lambas ni roha, mardongan las ni roha mangadopi saluhutna i.

            Di ayat 12 dipodahon do angka na porsea di huta Kolose nang na manjaha turpuk on asa mandok mauliate tu Ama i, ima Debata Jahowa i. mandok mauliate ala naung patauhon hita manjalo tohap di bagasan hatiuron i, sitenanan ni angka na badia i. Adong do 2 na ringkot idaonta taringot hatiuron. Na parjolo, hatiuron marhite barita na uli na binaritahon angka apostel taringot tu hasesaan ni dosa, jala las ni roha di na manghirim di Harjaon ni Debata. Marhite hata ni Debata, patar ma saluhutna aha do na hinalomohon dohot na so dihalomohon ni Debata, jala aha do upa ni na so unduk di hata ni Debata jala na upa tu na unduk di hata ni Debata. Ndang adong be na marsidalian jala ndang adong na buni, ai patar do i di adopan ni Debata. Na paduahon,  hatiuron i ima harajonNa na gok las ni roha. Marsinondang ma hamuliaon ni Debata di harajaonNa, jala tung na so adong na boi jongjong marnida sondang hatiuron ni harajaon ni Debata i. marsaringar ma olopolop angka nabadia dohot angka na monang i mangendehon ende hamuliaon dohot hasangapon ni Debata. Di hatiuron na paduahon on martudutudu tu harajaonNa na naeng patar di ari haroro ni Kristus na paduahalihon, ima ari haheheon na balga sihirimon angka na badia. Na badia dison ima na burju rasirasa mate, burju mangulahon ulaon na denggan, burju di haporseaon, nang burju di panomboanna dohot haunudukhonna tu Debata, Jahowa, Ama ni Jesus Kristus.

            Di ayat 13 – 14 tangkas do dibaritahon ai nunga diroro sian gomgoman ni haholomon, ima ngolu na gok biar jala tahuton, ngolu na gok hosom, teal, elat late, ngolu na so mananda tudia do ujung ni ngoluna. Dipaunsat tu bagasan harajaon ni Anak, haholongan ni rohaNa, ima Jesus Kristus. Di bagasan Ibana do adong di hita haluaon i, ndada tung ala panombaon jala haundukhonta tu gogo dohot to ragam tondi ni portibi on. Hasesaan ni dosa na pinatupa Debata Jahowa marhite Jesus Kristus mamboan hangoluan dohot las ni roha, hiras ni roha mandalani ngoluna, mamboan dame, jala mananda tudia do ujung ni ngoluna, ima Surgo, inganan na sonang i.

            Di ayat 15 – 16, dibaritahon do Jesus Kristus do singkop hapapatar  ni Debata Jahowa na so tarida i, na parjolo tubu sian angka na tinompa, na parjolo adong sian angka ompungta dohot tondi ni portibi on. Ai Ibana do hata ni Debata naung gabe jolma. Ibana rap dohot Debata manompa angka na uli dohot na denggan i. na di banua ginjang, dohot di tano on. Marhite Ibana, ima hata ni Debata do manjadi saluhutna na di tano on dohot di banua ginjang, na tarida dohot na so tarida, angka habangsa, harajaon, angka gomgoman, dohot paruhuasoon. Molo marhite Ibana do i, marlapatan marhapatean tu Ibana ma saluhutna. Ibana ma na marhuaso jala na mangatasi salahutna i. Ibana ma na gabe panguhum di saluhutna. Marujung do saluhutna na di tano on, alai hot ro di saleleng ni lelengna do ianggo harajaonNa.

            Di ayat 17 – 20, ima mambaritahon Jesus Kristus do ulu ni daging, ima huria i, jala Ibana di jolo ni saluhutna jala saluhutna i do hot di bagasan Ibana. Ayat on paboahon sentral, puncak kehidupan, puncak tujuan hidup songon halak naung ditobus. Marhite jala di bagasan Ibana do patar panghirimon ni angka na porsea jala na satia i. jadi ndang be sai marguru laho manomba ragam panombaon ni tondi asa dapot haluaon ai ulaon na marisuang do i saluhutna. Jesus Kristus do parjolo tubu (Anak sulung) na hehe sian na mate na manghorhon haluaon ni angka jolma dohot na tinompa sian hamagoan dohot hamatean, jala na so tupa be mate Ibana. Marasing do sian angka naung hehe sian na mate, alai mate do muse. Alai Jesus Kristus naung mate jala hehe mamboan barita haheheon ni angka na satia dohot na porsea, nang pe mate di pardagingon alai taruli do di haheheon dohot hangoluan na so marujung di habangsaNa na gok hamuliaon i.

            Di ayat 21 – 23 dipaboa do taringot hadirionta naung mardosa na mambahen sega parsaoranta tu Jahowa Debatanta i. Laos marhite Jesus Kristus do padengganNa tu diriNa saluhutna, nang angka na di tano nang di banua ginjang, dung dipatupa dame marhitehite mudar na sian Silang i, marhitehite Ibana. Parsaoranta dohot Debata Jahowa naung sega binahen ni dosa ni jolma na parjolo i, marhite Jesus Kristus gabe denggan ma saluhutna. Boi ma hita ro mandapothon Ama i, ima mual ni hangoluan holan marhitehite Jesus Kristus. Laos diuduti ma parsaoran na markeluarga, na mardongan sahuta, na maraleale, dohot na marnegara nang songon i na marhuria. Marhite jala di bagasan Jesus Kristus i do taruli hita di haheheon. Ai na olo busuk do dagingta on jala malangke hulinghulingta on, jala malua sian sibuk pardaginon, idaonta ma Debata na manompa dohot na manobus hita, Ibana ma hatuaonta. Alai itaingot ma holan marhite jala di bagasan Jesus Kristus do i saluhutna masa.

Hahonaan ni turpuk

            Marhite hatorangan ni turpuk jamita naung disurathon adong do pigapiga na mansai ringkot putihononta na marpadomuan tu Minggu sadari on, ima:

·         Sahat tu sadari on, sai adong dope angka parguruan manang parpoda haliluon na mangajari tu hita asa marguru jala manungkun tu angka tondi na mate jala marsomba tusi. Laos didok do, ai suruan ni Debata do nasida, hape sipaotooto do nasida. Manjalo sahala, dohot mangido sumangot tu angka na mate, sada sian ulaon hasipelebeguon do i na laho mangido pasupasu dohot pangaramotion sian tondi na naung mate, jala diuduti muse tu panombaon. Unang lilu hita ala ni i. nunga sahat be barita nauli taringot Jesus Kristus tu hita, Ibana ma hatiuron na manondangi roha dohot pingkiranta.

·         Ise do na manompa hita jolma? Nda tung ompungta na manompa hita, nda tung angka tondi na mate na manompa hita, jala nda tung angka ragam sisombaon angka sipelebegu na manompa hita. Alai Jahowa Debata marhite Jesus Kristus (hata ni Debata na gabe daging) ido na manompa hita. Molo Ibana na manompa hita, marlapatan do i ampunaNa do hita. Ditompa do hita tumiru rupaNa tudos tu pangalahoNa, alai gabe sega do i hinorhon i dosa na niulahon jolma na parjolo i, gabe tu hamatean ma upa ni jolma i ala ni dosa. Alai patar do tarida holong ni Debata marhite Jesus Kristus, asa mulak muse jolma i tu hangoluan i. marhite jala di bagasan Jesus Kristus adong pardengganananta tu Ama i, Silehon tua dohot hangoluan i.

·         Na lao salpu do marsogot tano dohot angka hagiotna, alai molo Hata ni Debata tung na so jadi salpu. Na hot do Hata i, jala hangoluan do Hata i. boasa ma ingkon sai tu na olo salpu hita marguru manang itapelehon dirinta on hape marisuang do i ujungna. Di jou do hita tu hatongtongon di HarajaonNa i. molo sai tu portibi on do hita manghirim dohot tu angka gogo ni portibi on do hita manghirim jolma na dumangol hita.

·         Jesus Kristus ma itabahen manggohi dirinta dohot ngolunta. Dibagasan jala marhite Ibana do adong pardengganon, denggan muse parsaoranta tu Ama i, jala ndang pola be hita mabiar jongjong di adopan ni Debata Ama, mual ni ngolu dohot tua  jala ro mandapothon Ibana di bagasan jala marhite Ibana (Johannes 14: 6) nda tung adong dalan na asing.

·         Dungi i, dipadenggan ma parsaoranta na markeluarga, mardongansahuta, maraleale, na marnegara dohot na marhuria, huhut rap paimahon ari na mansai uli, ari gok las ni roha ima haroroNa na paduahalion i, masuk ma hita tu hatiuron na gok hamuliaon di HarajaonNa i. antong, songon naung jinou hita sian haholomon tu hatiuron, itaparangehon ma parange ni anak hatiuron di tongatonga ni ngolunta be, amen.