Horas Ma Hita Di Manomunomu Mingg Advent; Maranatha, Amen sai tibu ma ro ale Tuhan Jesus

Tu napinarsangapan.

            Sude Ruas dohot Parhalado na Hinaholongan

            di ganup Huria

            di tempat

            Asi ni roha ni Tuhanta Jesus Kristus; dohot holong na manongtong sian Jahowa, Debatanta, dohot parsaoran ni Tondi Parbadia ma mandongani hamu saluhutna.

            Selamat taon baru ni huria ma tu hita saluhutna. Taon baru ni Huria dipungka do i di Minggu Advent. Minggu Advent ima Minggu Parolopolopon di Panghirimon Haroro ni Jesus Kristus na paduahalion mamboan hangoluan na salelenglelengna tu na manahan ro di ujungna di haporseaonna; jala hapariron manang haporsuhon salelenglelengna tu na so manahan jala na so mian di Jesus Kristus, Tuhanta i. Sude taon Liturgi ni Huria (Advent – Trinitas) ima taon-taon panghirimon haroro ni Kristus na paduahalion na dipungka ni minggu panghirimon, ima di Minggu Advent on. Di HKI manang di Huria na asing pe adong do IV Minggu Advent dohot themana, ima:

1. Advent I dohot Thema: Tuhan na ro di tingki salpu ni nasa na di portibi dohot na tinompa (Akhir zaman), antong solsoli sude angka dosam di ari parasian on.
2. Advent II dohot Thema: hamubaon ni roha manjanghon haroro ni Tuhan.
3. Advent III dohot Thema: haroro ni Tuhan gabe Sipalua
4. Advent IV dohot Thema: Las ni roha manopot haroro ni Tuhan (Ende Pujian ni si Maria)

Torop do halak Kristen ndang mangalapati ganup Minggu Advent on, gabe mago ma panghirimon na masa di minggu i. Torop do halak Kristen mambahen minggu advent gabe minggu na gok sihobason di pardagingon (paradehon holan mangulahon natal dohot na hombar tusi) alai dang adong be tingki paradehon sihobason di partondion.

Torop do halak Kristen tarlumobi halak Kristen Batak na gabe marsahit di minggu-minggu Advent on, adong na marsahit mamingkiri pangidoan angka dakdanakna (sepatu baru; baju baru; dohot na asing); sahit kolestrol dohot gula (hinorhon ni masa marbinda; hinorhon ni angka kue dohot lan na asing) jala pangantusion Adven taringot minggu manjanghon tubu Tuhanta gabe marasing gabe tu butuhanta.

Antong, dia jala aha ma sihobason ganup ruas dohot parhalado ni hurianta??

Di ganup keluarga tanda do i sian angka gabagaba na dibaen di jabuna be (molo adong) jala adong haradeon marhitehite mangulahon partangiangan pribadi manang keluarga marhite angka ayat na marpardomuan di minggu i, adong tingki na hibul pasahathon diri dohot keluarga tu TUHAN jala paradehon diri tu parpuasaon. Puasa dison ndada songon na dilapati torop jolma. Puasa dison ima ulaon na menyisihkan deba sian na somal dipangke (isarana: molo na somal dipangke Rp. 50.000 / ari, alai selama minggu Advent boi ma dipangke holan Rp.25.000/ ari jala Rp.25.000 nai disimpan ma di sada inganan sahat tu tanggal 25 Desember. Molo nunga jumpang 25 Desember, dibungka ma inganan parsimpanan na deba i jala diulahon ma mangurupi halak na hurangan (bakti Natal); manang boi do mangalehon baju manang pahean na so boi be dipangke dirina alai boi dipangke halak na asing na hurangan pahean (alai sian ias jala las ni roha).

Molo di huria tanda do i marhite angka warna liturgi na violet (molo adong) na patuduhon harajaon (keagungan) ni TUHAN marhite angka ayat, tangiang, ende dohot jamita di huria i na patandahon jolma di angka dosa na binahenna jala gabe patubuhon roha na serep jala na mangido hasesaan ni dosa sian TUHAN marhite Jesus Kristus. Huria pe boi manosoi ganup ruas asa boi paradehon diri manjanghon haroro ni Jesus Kristus na paduahalion, dohot mangulahon bakti natal (roha mangurupi) tu na ringkot siurupon (nang di lingkungan ni huria manang di ruas ni huria i).

Jala marhite ulaon on, rap itatangianghon ma angka donganta korban porang, korban angka bencana alam, angka dakdanak na sopot so marama dohot so marina, na tarhurung hinorhon ni hatigoran, dohot pembela Hak Azasi Manusia, jala hadameon di luatta be dohot di hurianta, Lembaga Pelestarian Lingkungan Hidup, dohot lan na asing na marpardomuan tu bidang penataan sosial.

            Sai dipargogoi Tuhan ma hita mangulahon saluhutna na hombar tu paradeonta di Minggu Advent on. Sai anggiat ma itahangoluhon minggu advent on gabe hasangapon ni Jahowa marhite Jesus Kristus. 

Tabe Dohot Parhorasan

Pdt. Daniel Bonardo Pane, S.Th.