bahan jamita Kamis Putih, 13 April 2017: Johannes/ Yohanes 13: 4 - 10

BAHAN JAMITA

ULAON KAMIS PUTIH

Kamis, 13 April 2017

Ep.: Jesaya 1: 16 – 18; Ev.: Johannes 13: 4 – 10; S.Patik: Pilippi 2: 5 – 7

DIBURI ASA IAS JALA RADE TU PARSURUON TU HASEREPON

Oleh: Pdt. Daniel Bonardo Pane, S.Th.

Patujolo

            Masuk ma hita tu ujung ni minggu passion, jala marsogot masukhanta ma sada parningotan na mansai badia ima parningotan haluaonta marhite hamamate ni Jesus Kristus na mamelehon diriNa humongkop hita asa gabe jolma manang bangso na malua hita sian hatobanon ni dosa. Alai andorang so masuk hita tu ari parningotan marsogot, idaonta ma panghobasion ni Jesus na parpudi andorang so ditangkup jala dijehei siseanNa Ibana di porlak Getsemane. Jala panghobasion ni Jesus andorang so ditangkup Ibana ima sada hapataron ni bagabaga haluaon na pasti marhite daging dohot mudarNa, laos ido na didokna Ulaon na Badia (ekaristi, last supper, holy communion). Marhite roti dohot anggur dipelehon Jesus do dagingNa dohot mudarNa asa togu haporseaonta, pos ni roha di na manghirim haluaon jala sada pangantusion jala haporseaon na tontu taringot hasesaan ni dosanta. Dung sidung ditotophon Jesus partording ni Ulaon na badia i, diuduti ma panghobasion na mamburi pat ni angka siseanNa. Aha do uli ni mangulahon mamburi pat di turpuk jamita on? Antong tangkas ma itapaihutihut hatorangan ni turpuk on.

Hatorangan ni Turpuk

            Evangelium ni si Johannes ima sada evangelium na sinurathon ni sahalak apostel ni Jesus Kristus ima si Johannes hirahira taon 70 Masehi, alai ndada si Johannes pandidi. Molo itaida isi ni evangelium ni si Johannes on, tangkas do idaonta ise do sasintongna Jesus i marhitehite pangajarionNa, dohot angka panghobasionNa. Dung manaek Jesus tu Surgo, torop do angka na porsea naung marnida langsung taringot angka pangajarion dohot lan tanda halongangan dohot sude panghobasion ni Jesus gabe mabiar jala martabuni asa unang ditangkup angka na manulak Jesus i. jala sai adong do na ganggu rohana ddi panandaionna di Jesus naung dihaporseaonna i. ido umbahen disurathon Apostel Johannes on ma turpuk on laho paandaphon haporseaon ni angka na porsea taringot pandaion dohot haporseaonnasida di Jesus Kristus.

            Sada sian panghobasion ni Jesus Kristus na ringkot idaonta ima ulaon na mamburi pat (bhs. Latin: mandatum; bhs. Inggris: maundy). Sian panghobasion on patar do songon dia do na ingkon diulahon angka sisean manang angka na porsea i molo pe jumpang pangaleleion dohot lan haporsuhon na asing na binahen ni jolma na so manjalo Kristus di ngoluna. Dipatupa Jesus do sada panghobasion na so adong disurathon di 3 evangelium na asing (Mateus, Markus, dohot Lukas) na patuduhon haserepon na tutu. Ulaon mamburi pat ima sada ulaon hasomalan ni halak Jahudi na manjangkhon tondongna, jala disuru do hatoban ni parjabu i laho mamburi pat ni tondongna i. ulaon on ima laho pasangaphon (menghormati) tondongna asa las roha ni tondongna i masuk tu jabuna. Jala sahalak hatoban ingkon do mamburi pat ni tuanna na ro sian pardalanan, jala ias do diburi songon tanda hatundukhon jala pangoloionna di tuanna i. Alai di turpuk jamita on, Jesus sandiri do na mamburi pat ni angka siseanNa, na sangap alai gabe mangulahon ulaon na so patut diulahon na sangap. Panghobasion na binahen ni Jesus dison ima sada hapataron haserepon na tutu (bdk. Pilippi 2: 5 – 7) na ingkon dihangoluhon ni angka na porsea manang angka sisean ni Kristus.

            Di ay. 4 tangkas do dipaboa na ditanggal Jesus ulosNa, ima sada sikap laho marhobas. Ulos tanda hasangapon ditanggalhon gabe sahalak parhobas. Diburi ma pat ni angka siseanNa, diapusi ma dohot basahan na tinapolhonNa i (ay. 5), songon na somal diulahon halak Jahudi laho mamburi pat. Sahat ma tu si Petrus, ndang na tolap panjaloon ni si Petrus molo diburi Jesus patna, ido umbahen didok: “tung Ho ma ale Tuhan mamburi pathu”? hata ni si Petrus on borhat do sian hasomalan ni halak Jahudi na parhobas (hatoban) na mamburi pat ni tuanna na patuduhon haundukhon tu tuanna i. tontu si Petrus dison naeng do manjaga sangap ni Jesus gabe tuan, tung na so jadi tuan mamburi pat siseanNa. Jala tung na so jadi ma Jesus mamburi pat ni si Petrus ala ni sangap ni Jesus di roha ni si Petrus. Alai ndang na diboto si Petrus nian dope aha do lapatan ni Jesus mangulahon sisongon i (ay. 6 – 7). Sai dijugulhon si Petrus do asa unang diburi Jesus patna (ay. 8). Sian on boi do idaonta na manjaga sangap ni Jesus do si Petrus umbahen na dibahen si Petrus sisongon i. alai dipinsang Jesus ma ibana, didok ma: “molo so burionHu ho, ndang partohap ho di Ahu”. Pinsangpinsang on mambahen si Petrus talu di hajugulhononna i. “ndang partohap ho di Ahu” ima sada bagabaga di hamuliaon na naeng sipataraon ni Jesus tu angka sisean alai ingkon manahan do angka sisean di ragam angka sitaonon na naeng ro tu nasida. Dung i ninna si Petrus ma: “Ale Tuhan, unang ma holan pathu, dohot ma tangan dohot ulungku” (ay. 8). Pangidoan ni si Petrus on asa ias ma nian ibana saluhutna na di ibana. Tangan ima na jotjot dipangke laho mangulahon ulaon, ulu jotjot dipangke laho mamingkiri ragam sipingkiran asa dohot ma ias songon pat naung diburi Jesus (ay. 9).

            Si Petrus mangalapati pambahenan ni Jesus holan marhitehite pardagingon ima ulu, tangan dohot pat. Alai dialusi Jesus do pangidoan ni si Petrus i marhitehite pangalapation di partondion (spiritual meaning/ arti rohani) taringot haiason. Haison sian sude angka dosa dohot angka ragam pingkiran dohot pangulahon na jat (ay. 10). Tanggal do sude na kotor ala naung ias diburi (dibahen do partandaan sian na mamburi pat). Boasa ma ndang ulu dohot tangan na diburi Jesus? Ala pat do sada bagian ni pamatang on na sai jotjot dipangke laho tudia do ngoluna tu na jat manang na denggan, jala pat do sai longkot angka orbuk na diboan sahat tu jabu. Marhite i boi antusanta di na mamburi pat Jesus tarida do sada pangantusion di partondion taringot sada pangalangkaion na ingkon ias ndang adong nanggo saotik na kotor na ingkon itaboan laho mambarita na uli. Nunga ias be angka sisean, alai ndang luhut nasida. Diboto Jesus do na adong sian angka sisean i na marsangkap laho manjehei Ibana ido didok “.... alai ndang luhut hamu” (ay. 11).

            Dung sidung diburi Jesus sude pat ni angka siseanNa i, dipangke ma muse ulosna, laos hundul ma. Dung i ditangkasi ma taringot naung binahenNa i (ay. 12). Jumolo ma dipaboa Jesus taringot hadirionNa (substansi dan hakekat) ise do Ibana. Digoari do Jesus Guru dohot Tuhan, jala ture do i saluhutna ai ido Ibana tutu (ay. 13). Panjouon di Guru dohot Tuhan ima panjouon na sangap jala na diparsangap. Panjouon Guru (Rabbi), hombar tu panghobasion ni Jesus na mangajari angka sisesanNa dohot jolma na torop laho mananda tangkas taringot Harajaon ni Debata. Pangajarion na gok halongangan mambahen angka na umbegesa manghilalahon pos ni roha dohot togu di panghirimon di Harajaon ni Debata nang pe ragam na ingkon dibolus di pardalanan ngoluna. Dipatuduhon Jesus do angka dia do na ingkon diulahon jala didalani angka na umbege pangajarionNa. Ndang adong habisukhon ni portibi on na boi dipatudos tu pangjarion ni Jesus. Panjouon di Tuhan (Heber: Adon; Gorik: Kurios, ima sian angka ragam tanda halongangan na binahenNa so boi masuk manang tuk dipingkiran ni jolma jala dibagasna adong huaso na mangatasi saluhut angka huaso na di portibi on, jala marhite panjouon on tangkas ma andong pangantusion gabe Raja, manang Panggomgom. Ai ido sansitongna Ibana.

            Asa molo Ibana, Tuhan jala Guru ni angka na porsea, tama ma hita mamburi pat. Ai sitiruon do dilehonNa tu hita asa itabahen songon naung dibahenNa i tu angka siseanNa (bdk. Ay. 14 – 15). Tiruan na binahen ni Jesus dison ima tiruan na serep marroha. Ditanggalhon do hasangaponNa jala disolukhon ma songon sada hatoban, alai ndada na gabe hatoban Ibana. Haserepon ni roha do na dipataridahon ni Jesus tu angka siseanNa dohot tu hita saluhutna naung manangihon jamita on. Ndang adong na patut dihaginjanghon, alai di haserephon do. Tangkas ma itaingot, tung na so moru do sangapta molo itapaserep do rohanta nang di angka donganta jolma tarlumobi di adopan ni Jahowa Debata.

Hahonaan ni Turpuk

            Adong do na boi putikhononta marhite hatorangan ni turpuk jamita on, ima:

1. Diburi Jesus pat ni angka sisean ima di partingkian ulaon Paskah, jala dung sidung ditotophon Jesus aturan ni Ulaon na Badia. Nunga diboto Jesus naung jonok nama tingkiNa, jala ndang sadia leleng nari rap Ibana dohot angka sisean i. andorang so jumpang tingki i, jumolo ma dipaias Jesus angka siseanNa i. dipaias sian angka ulaon dohot ragam parngoluannasida be angka na roa i, asa molo jumpang na tarsurat i, ias ma angka sisean mangadopi ragam angka na masa nang pe so rap be nasida dohot Jesus di pardaging on. Nuaeng sahat ma barita na uli on tu hita, ulaon na binahen ni Jesus ima ulaon na pataridahon basabasa (grace, anugerah) ni Debata na pasaehon sude angk ragam dosanta. Unang be nian hita naung ias italitokhi muse marhite angka dosa marhite hata, pingkiranta. Angka sisean dohot hita ingkon marsiburian pat, ai na mamburi pat adong do disi laho hasesaan ni dosa. Antong tama ma hita angka na porsea marsisea hasalaan manang dosa ni dongan jolma.
2. Ulaon mamburi pat na binahen ni Jesus pataridahon haiason di partondion (kebersihan rohani). Adong ma di bagasna haimbaruon di partondion na boi diparbuehon marhite dagingna. Alai ndada na gabe marguru tu daging dohot marguru tu habisuhon, alai marguru tu partondion naung ias i do mangulahon angka ulaon di pardagingon na mian di portibi on. Dung adong haimbaruon di partondion i, adong ma gogo jala tarpatupa do saluhut angka na denggan i di ngoluna.
3. Sian na mamburi pat andap ma idaonta sada tiruan na mansai maol diulahon angk jolma, ima haserepon ni roha. Jesus na sangap jala na marmulia rade do ibana mananggalhon saluhutna i laho paserephon rohaNa, alai tung na so jadi mago anggo sangap dohot hamuliaonNa i. alai ndang na gabe haserepon asa didegedege, alai haserepon ni roha na patuduhon holong ni roha. Antong angka na porsea jala na mandok dirina siihuthon Kristus, ingkon tama ma ibana paserephon rohana. Unang pola marnaloja hita manjaga hasangaponta, tarlumboi hasangapon ima sada sian angka sintasinta ni halak Batak. Tung na so jadi moru hasangaponta i molo serep do rohanta.
4. Ingkon tama ma hita rap paserephon roha ala nunga dibahen Jesus tiruan na ingkon ulaohonta. Sian i adong ma parange haoloon mangulahon angka hataNa. Nang pe marragam angka naung itabolus di hasiangan on alai sada na so boi lingkang sian ngolunta ima MANGOLOI HATA-NA. mangoloi hataNa, adong ma di bagasna pamelehon, ima pamelehon dirinta dohot sandok ngolunta tu Ibana. Ndang adong mian ngolu na mangoloi hsiap ni daging dohot portibi on, alai adong mangoloi hataNa.
5. Marhite na mamburi pat on idaonta ma haradeon laho disuru nang pe so rap be dohot Jesus sian pardagingon. Antong molo adong na mamburi pat, adong ma kepastian rade, siap laho mangulahon sada ulaon marbarita na uli, haradeon laho manuhuk silang, haradeon laho di hasatiaon sahat ro di na mate di bagasan Kristus.