Bahan Jamita/Khotbah Malam Nata. (Christmas Eve), 24 Desember 2016: Yesaya 9: 2 - 7

BAHAN JAMITA

MALAM NATAL (CHRISTMAS EVE)

Sabtu, 24 Desember 2016

Ev.: Jesaya 9: 2 – 7; Ep.: Titus 2: 11 – 14; S.Patik: Galatia 6: 1

IDA MA, NA RO MA RAJA SIPARDAME I

Oleh: Pdt. Daniel Bonardo Pane, S.Th.

Patujolo

            Selamat Natal ma tu hita saluhutna! Natal ima ujung ni ujung ni minggu Advent ala naung ro naung dibagabagahon i, manang naung dipaimaima. Ise do na dipaima? Ima Mesias manang Kristus, jala ise do Mesias manang Kristus i? ima Jesus, ima posoposo naung ditubuhon si Maria naung gabegabean sian Tondi Parbadia andorang so habubuhan. Alai marasing do pangantusion ni torop halak di na laho mangalapati Mesias manang Kristus i, torop do jolma holan mangalapati ianggo Mesias manang Kristus, ima sahalak Sipalua, na boi paluahon angka na tartaban, na tarhurung tarlumobi angka na ginosagosa ni sada bangso, jala sahalak na gabe Raja jala na pajongjonghon sada harajaon na imbaru. Molo songon i do pangantusionna taringot Mesias, marlapatan holan laho paluahon di pardagingon do na didokna disi, alai nda tung haluaon di partondionna. Antong, aha do na boi idaonta jala aha do na boi italapati taringot Mesias manang Kristus i? antong masuk ma hita tu hatorangan ni turpuk.

Hatorangan ni Turpuk

            Ndung marujung Raja Usia, Raja ni Juda jongjong ma Raja Jotam (742 – 735 sM), sahalak raja na barani laho mangalo angka harajaon na maralohon harajaon Asyur. Diulahon raja Jotam pe sisongon i martujuan do laho patuduhon hadirion ni harajaon ni Juda, na so pola gabe negara boneka ni harajaon ni na gogo na gabe donganna maralohon harajaon Asyur, jala barani do ibana mangalo angka panombaon ni angka ganaganaan di harajaonna i. unduk do ibana di hata ni Jahowa uju panggomgomionna sahat di ujung ni ngoluna. Dung monding raja Jotam, dipabangkit ma si Ahas, ima anak ni Jotam gabe sahalak raja manggomgomi Juda (735 – 715 sM). Sai tongtong do sai diela raja Pekah, ima Raja na raja Ahas asa sada nasida rap dohot harajaon Siria na ginomgom raja Rezin maralohon harajaon Asyur na ginomgom Tiglet Pileser, alai ndang olo raja Ahas mangoloi. Jala dibahen raja Ahas ma hasadaan manang parsaoran tu harajaon Asyur laho maralohon Israel Utara dohot Siria, nang pe nunga pola dipodai si Jesaya asa unang mangido pangurupion si Ahas tu harajaon na asing. Holan tu Debata Jahowa ma ibana mangido pangurupion. Alai hinorhon ni panosak ni hadirion ni harajaon ni Juda, ndang adong be dalan na asing di roha ni si Ahas asing ni mangido pangurupion tu Asyur (2 Rajaraja 16: 7 – 9).

            Dung sada harajaon Juda dohot Asyur maralohon Siria dohot Efraim (Israel utara) gok do sitaonon ni halak na daulat di Juda hatiha i. Tarlumobi di parugamoonnasida. Masa ma roha na tahuton hinorhon ni na masa nama porang. Sude harajaon di humaliang Juda mangasohon gogo ni sinjata parporangannasida be nang songon i Juda, jala Juda ingkon mambayar upeti tu Asyur. Molo diparugamoon, gabe masuk do debata ni Asyur na ingkon disomba halak Juda (hombar tu hasomalan hatiha i, molo adong sada bangso mangido pangurupion tu sada bangso manang harajaon na gogo, na marlapatan do i na dohot do debata ni bangso na mangido pangurupion i dohot mangido pangurupion tu debata ni bangso na gogo i, jala halak na ginomgoman i pe ingkon marsomba tu debata ni bangso na gogo i). tubu ma panombaon tu debata ni sileban di Bagas Joro ni Juda. Dang adong be haundukhon ni si Ahas tu Debata Jahowa, umbiaran do ibana tu Asyur sian tu Jahowa Debata.

            Ditongatonga ni na masa i, ro do panurirang Jesaya manuriranghon taringot haroro ni sahalak Mesias. Molo idaonta di ayat 1 dipaboahon do na ro do sada panondang bolon, laho manondangi tano linggoman ni hamatean. Tano linggoman ni hamatean na nidokna dison ima bangso Juda, bangso naung dao sian dalan ni Jahowa. Marnida sada panondang bolon, ima na ro nama sada Raja na boi paluahon Juda sian Asyur dohot sian na masa hatiha i. panondang na bolon ima sada panghirimon na balga situtu taringot hinadenggan ni bangso Juda uju raja Daud.

            Ay. 2 – 3, Jahowa na mamboan halalas ni roha godang jala marlas ni roha di jolo ni bohiNa songon las ni roha ni jolma di gotilon dohot di na marbagi tabantaban. Jala mamonggolhon auga na ampe tu ibana (Mesias i) dohot batahi ni abarana dohot linsinglinsing ni na mangadu ibana songon uju di ari Midian. Ayt. 3 on paingothon hita uju na masa di lembah Yizreel (Panguhum 6 – 8). Bangso Midian na mambahen sitaonon tu halak Israel uju i, talu do binahen ni Jahowa marhite panguhumNa. Hagogoon ni angka sinjata dohot ulos na marsapu mudar, gabe sipanganon ni api, na mandok gabe melengse jala sega do saluhutna songon sirabun na so marlapatan be. Songon dia pe gogo ni sinjata ni sada bangso manang harajaon dohot gogo ni angka pasukan porang, gabe suda do i saluhutna songon sirabun na so marlapatan (ay. 4).

            Ay. 5 – 6, ima taringot haroro ni Mesias manang Kristus i. songon na digombarhon di ayat on sahalak Raja margoar: Sipartahi Halonganan, Siulubalang ni Debata, Ama salelenglelengna, Raja Hadameon.

-          Sipartahi Halongangan, patuduhon ianggo Mesias manang Kristus na naeng ro i ima dua parange manang pangalaho ni Debata dohot jolma, martudutudu do on tu Hata ni Debata songon sada hakekat ni Debata jala paboahon pangalaho ni Debata na gabe jolma, jala mian di tongatonga jolma di portibi on. Ibana na gabe Sipartahi na mangajarhon angka na ni halomohon ni Debata jala pangajarionna i mamboan halongangan bolon tu na umbegesa, jala tubu ma las ni roha nang ngolu na imbaru. Jala pangajarionna on mangatasi sude pangajarion dohot habisuhon na adong di portibi on.

-          Siulubalang ni Debata, martudutudu tu huaso ni Debata di bagasan hadirion ni Mesias i jala na so hatudosan ni sude gogo harajaon na adong diportibi on. Ibana ma na manaluhon saluhut bangso, jala ndang adong sada harajaon pe na manahan jongjong di adopanNa, ai Jahowa Debata do donganNa. Marhite pangajarionNa na gok halonganan i do Ibana manaluhon sude angka harajaon di portibi on.

-          Ama Saleleng ni Lelengna, paboahon hatongtongon ni harajaonNa jala tung na so jadi marujung ianggo harajaonNa i. gabe panggomgom do Ibana marhite holong ni roha, songon holong ni Ama tu ianakhonna. Mansai sonang do sude na ginomgomanNa jala taruli las ni roha situtu.

-          Raja Hadameon, marhite hata on songon na maralo tu sistem ni sude harajaon na mangasahon gogo ni sinjata porangna be, jala na sai manghirim parporangan laho pabidanghon harajaonna. Mesias dison ndang na songon pangantusion ni torop jolma, alai Mesias dison mamboan hadameon, dame na sumurung. Hadameon ni daging dohot tondi, roha dohot pingkiran.

Jala di haroro ni Mesias i pahothon manang patoguhon harajaonNa marhitehite patik dohot hatigoran. Mesias na papatarhon hamuliaon ni Jahowa di na ginomgomanNa. Patik ni Debata na dibagasna adong haholongan, jala disi adong hatigoran ni Debata. Marhite i ma Mesias manggomgom mamboan dame dohot las ni roha. Tutu do on, hamuruhon ni Jahowa Zebaot patupahon sisongon i. Rimas Jahowa marnida angka pangalaho ni Juda di panggomgomion ni si Ahas, alai pangarimasanNa i, ndada gabe hamagoan, alai gabe tu pardengganan do dipatupa.

Ayat 7 paboahon ndada holan tu Juda hasahaton ni hata on, alai tu sude Israel (digombarhon Jakob), Juda dohot Efraim (Israel utara). Sude harajaon taruli di haroro ni Mesias sahat tu liat portibi on. Molo dipaihutihut pardalanan ni bangso Juda dohot Israel dung mate si Ahas jala manggomgom ma si Hiskia adong ma paraloan tu halak Asyur jala Siria dohot Efraim (Israel Utara) nunga talu jala masuk tu jajahan ni Asyur. Dipatupa si Hiskia do haimbaruon ni harajaon alai ianggo di parugamoon ndang dohot dipaimbaru si Hiskia. Sahat ma tu raja Josia, na tongtong mangihuthon na binahen ni ompuna (Hiskia), na barani mangalaho Asyur. Ndang holan di politik alai dohot di parugamoon, jala dibahen si Josia do Patik ni Jahowa gabe uhum (Undang-undang/ hukum dasar) ni harajaonna marhite na dijumpangna sada gulungan ni buku ni si Musa (boi idaonta di 5 Musa = Deutronomy). Molo itapaihut hatorangan on, ai tu si Hiskia manang si Josia do na didok Mesias songon di ay. 5 – 6? Boi do dohonon, ido. Alai ndang na gabe nasida ujung ni panghirimon ni Mesias i, sahat ro di haroro ni Jesus Kristus ido ujung ni Panghirimon ni Mesias sahat tu sadari on sahat tu haroroNa na paduahalihon.

Hahonaan ni Turpuk

            Adong do pigapiga hahonaan ni turpuk jamita sadari on:

1. Ganup jolma naung jumolo digohi roha biar jala na holang mamingkiri harajaon ni portibi on, ndang adong be di ibana ingot di angka patik dohot singotsingot ni Jahowa tu dirina. Angka pangajarion ni Jahowa pe ndang adong be ditangihon. Antong di na mandalani ngolu on pe, unang ma gabe roha biar na manggohi ngolunta, alai molo pe mabiar hita, ingkon pir ma tondinta di saluhutna asa boi hita mananda jala manangihon na hinalomohon ni Jahowa tu hita.
2. Na ro ma Raja Dame. Marhite Natal, ndang be mangasahon gogo hita, mangasahon hansit ni roha, jala mangasahon hadirionta na boi patubuhon parbadaan dohot parsalisihan. Na ro ma Raja Dame, asa mardame hita tu Jahowa jala mardame tu angka saluhut manisia tarlumboi mardame tu sude angka na tinompa. Raja Dame on mamboan las ni roha dohot gogo di parsaoran ni Anak ni Debata.
3. Itaehai ma denggan marhite na mambalongkon hosom, teal, elat, dohot late marhite las ni rohanta naung ro Kristus manang Mesias i, ima Jesus Kristus naung tubu di bara ni pinahan, Betlehem mamboan las ni roha tu ganup jolma na manjangkon Ibana. Sangap.sangap.sangap ma di Debata, dame ma di tano on. Amen.

Usul Ende:

1. 48: 1 – 3
2. 56: 2 – 3
3. 49: 1  - 2
4. 54: 1 – 3
5. 53: 1 + 5
6. 62: 1......