BAHAN JAMITA MINGGU PALMARUM, 20 MARET 2016; LUKAS 19: 28 - 40

BAHAN JAMITA

MINGGU PALMARUM

Minggu, 20 Maret 2016

Ev.: Lukas 19: 28 – 40; Ep.: Jesaya 50: 4 – 9a; S.Patik: Parjamita 5: 1

oleh: Pdt. Daniel Bonardo Pane, S.Th.

MAROLOPOLOP JALA MARLAS NI ROHA MA HAMU MANJANGHON RAJA I!

Patujolo

            Molo ro sada na naeng uluan di sada luat pintor marsuraksurak pasangaphon ibana. Angka hata las ni roha do dihatahon angka na marlomo ni roha i alai tu angka na so lomo roha sai dibahen do ragam sibahenon laho pasohon suraksurak ni jolma i. Diparade angka na marholong roha i ma sipatupahon laho manjanghon na naeng uluan i. Songon i do na masa di turpuk jamita minggu on. Marsuraksurak angka halak pangisi ni Jerusalem di na manomunomu manang manjanghon Jesus bongot tu Jerusalem. Marsuraksurak do nasida mamuji Debata di na manjanghon Jesus, sahalak na naeng dipabangkit ni bangso i gabe uluan manang Raja; Raja na boi paluahon bangso i siang panggomgomion ni harajaon ni Rom; Raja naung dibagabagahon angka panurirang ni bangso i; Raja siboan dame. Sude panagamon ni bangso i di Jesus holan na ringkot di ngolu portibi on do saluhutna. Alai lobi sian i do na pinatupa ni Jesus tu nasida nang tu halak na porsea.

Hatorangan ni Turpuk

            Turpuk jamita minggu on ima sada pardalanan ni Jesus andorang so sahat tingki habernithonna di hau pinarsilang i. Dung sidung Jesus mangajari di bagas ni si Sakeus ima di huta Jeriko, hehe ma Ibana laho nangkok tu Jerusalem. Molo sian Jeriko tu Jerusalem ingkon boluson ni Jesus do dohot angka siseanNa ima huta Betpage dohot huta Betania. Dung sahat Jesus tu dolok Jetun disuru ma 2 sian angka siseanNa i laho mambuat sada anak ni halode (ay. 28 – 29). Ndang pola dipaboa ise do 2 sisean na disuru Jesus, nang songon i di barita ni si Mateus 21: 1 – 9; Markus 11: 1 – 10; dohot Johannes 12: 12 – 16. Ndang pola hita fokus ise do sidua halak i, alai na ringkot aha do na suruan ni Jesus tu nasida i?

            Disuru Jesus do laho mambuat anak ni halode na so dung dihunduli halak (keledai muda yang belum pernah ditunggangi orang). Halode ima sada alat transportasi na pinangke ni halak Jahudi songon singkat ni hoda. Halode ima sada hataridaan pardamean na jotjot dipangke angka malim jala angka raja. Marasing do sian hoda na jotjot dipangke halak harajaon na gogo na paboahon hagogoon di haparporangan di harajaon i. Dipangke Jesus  halode paboahon ndang na paboahon porang Jesus tu halak Jahudi tarlumobi harajaon ni Rom uju i, alai paboahon dame. Marhite Jesus naek jala hundul di atas ni halode paboahon, Ibana ma tutu Raja ni hadameon, Raja na mamboan dame, tarlumobi Ibana ma na tutu padamehon hita jolma na lea tu Jahowa, Ama na sangap jala na marmulia i. Dibahen Jesus pe hadameon ndada marhitehite porang, alai lambok dohot haserepon do dipataridahon Ibana laho patupahon dame i. Dipangke Jesus pe anak ni halode na so dung dihunduli halak marlapatan Ibana do jala holan Ibana do na boi patupahon dame dohot haimbaruon tu ngolu ni angka na joujou tu Ibana mangido dame dohot haluaon na sasintongna. Jala tung na so adong halak na boi uju i nang songon i di ari marsogot na boi patupahon songon na binahen ni Jesus i.

            Disuuru Jesus do siseanNa na dua i laho marhari anak ni halode i. Ndang na marsuru manangko Jesus tu siseanNa i, alai pola do dibohali Jesus angka siseanNa i aha do hata na patut sihatahonnasida i tu nampuna anak halode i molo tung disungkun nampuna anak halode i. Alus na ingkon pasahathon ni sisean na dua i ima “ringkot do i di Tuhan i”.  Ringkot do anak ni halode di nampuna anak halode i, alai ala dung diboto ibana na ringkot do di Jesus ingkon pangkeon anak ni halode i dilehon ma i. Nunga pola sar barita taringot Jesus dohot huaso nang tanda halongangan dohot pangajarionNa tu saluhut luat Jerusalem, jala pasti do naung sahat barita taringot Jesus tu nampuna anak ni halode on Sian on botoonta mansai tangkas do ditanda nampuna anak halode i ise do Tuhan na didok angka sisean i, ima Jesus. Dungi borhat ma sisean na dua i laos jumpang ma songon naung nidok ni Jesus i (ay.31- 34). Laos diboan ma tu Jesus, dipeakhon ma ulos ni angka sisean i tu atas ni halode i jala dipahundul ma Jesus tu ginjangna (ay. 35). Jumpang ma songon naung disuriranghon panurirang Zakharia taringot haroro ni Sipalua, ima Raja dame (Zakaria 9: 9). Sude na binahen ni angka sisean i ima songon pambahenan tu angka Raja. Ala dipangantusion ni angka sisean nang angka na torop Jesus nama Raja, Raja na naeng pajongjonghon harajaonNa di portibi on songon harajaon ni Rom nang songon harajaon ni si Daud na jolo i. Panandaion nasida nang pambahenannasida tu Jesus holan na di portibi on do saluhutna. Ndang apala tangkas jala andap panandaionnasida harajaon na naeng dipajongjong Jesus i.

            Torop do halak namanjanghon haroroNa i, marsuraksurak jala marolopolop torop jolma i nang mamuji Jahowa, Debata. Dipahembang be do angka ulosnasida songon manjanghon angka na sangap nang angka Raja. Marsoara na gogo ma angka na torop i siala angkanaung niida angka na torop i sude angka pambahenan naung dibahen Jesus. Marende ma nasida songon ende ni parolopolopon ni parpsalmen songon hataridaan bangso ni Jahowa, Debata (Psalmen 118: 26) nang songon ende ni surusuruan uju na tubu Jesus di bara ni pinahan, di huta Betlehem (Luk. 2: 14). Sude hata ende na diendehon natorop ima ende parolopolopon dohot ende hamuliaon di Jahowa, Debata. Pinasupasu ma Raja na ro marhitehite goar ni TUHAN (goar ni Jahowa). Raja na ro sian Jahowa, Debata na manongtong di hasangapon, gogo nang manongtong di hadironNa. Raja na mamboan hatigoran dohot hasintongan ni uhum, jala na mamboan dame dohot pos ni roha tu halak na ginomgomanna. Hata “dame do di surgo, hasangpon di ginjang” na mandok na hurangan dame na di surgo alai hata ni ende olopolop on ima pamujion tu Jahowa, Debata na mian di Surgo, jala sian Jahowa do haroroan ni Dame tu portibi on dohot haluaon. Ende hamualiateon di dame na binuan ni Raja i sian harajaon na sun timbul i.

            Alai halak parise deba sian na torop mandok tu Jesus “orai ma antong angka siseanMi, Guru”. Adong do na ringkot sijagaon ni halak parise on asing ni sogo ni roha ni angka parise tu Jesus. Mabiar do angka parise molo olopolop ni angka natorop i sahat ma tarbege barita tu pamarenta harajaon ni Rom gabe lam susah ma dibahen parngoluan ni halak Jahudi. Tarlumobi angka lumbalumba taringot haroroan ni sahalak Raja sian Pinompar ni si Daud songon naung disuriranghon angka panurirang. Molo ditaringoti taringot Raja sian pinompar ni si Daud ancaman do i tu angka harajaon ni saluhut bangso tarlumobi harajaon ni Rom. Dohot do angka raja dohot na sangap ndang manghalomohon haroro ni Raja sian Pinompar ni si Daud ala dirimpu do naeng manggantihon harajaon dohot hasangapon di portibi on (ay. 39).           Songon i do na masa di tingki saonari, torop do angka jolma mangorai halak Kristen nang halak na porsea mangendehon olopolop pamujion. Torop do Huria disegai, ditutup, nang diorai patubegehon ende pujipujian. Torop dope halak Kristen nang halak na porsea sipsip marende dohot martangiang asa unang disusai angka halak na mansogohon Jesus Kristus. Sai hasintongan ni ugamona i do dibahen dasor tu ugamo ni halak.

            Alai dialusi Jesus ma, “Aut mauhom nasida, joujou ma angka batu”. Alus ni Jesus on paboahon na tingkos jala na patut do sude angka na nihatahon angka sisean nang songon i na torop i. Molo pe ingkon hohom nasida, alai molo batu sai dihatahon do songon na nihatahon ni angka natorop i. Marhite angka ende dohot joujou ni natorop i nang angka sisean i andap ma dipaboahon na tutu do Jesus Raja songon naung dipaimaima bangso i. Molo pe angka na porsea i hohom manang sip na manghatindanghon Jesus i do Sipalua na tutu angka batu ingkon do mansoarahon i. Molo idaonta di tingki sude parsitaonon ni Jesus sian na ditangkup sahat di na laho mate, manghohom do sude angka sisean, nang angka natorop i pe manghohom mamuji Jahowa nang manghatindanghon na tutu do Jesus i Anak ni Debata dohot na tutu do Jesus Mesias. Alai molo batu dohot na di tano on dohot do manghatindanghon Jesus i na tutu do Anak ni Debata marhite na humuntal tano i, jala marigat ma dohot angka batu mamak na masa uju hamamte ni Jesus (Mateus 27: 51).

Hahonaan ni Turpuk

            Nang hita angka na porsea di tingki sadari on. Di minggu Palmarum sadari on sai las ma rohanta di na manjanghon Jesus, na serep roha i jala Siboan dame. Itajanghon ma Jesus di roha, di keluarga, nang di pingkiranta asa disuan di rohanta, di pingkiranta nang di ngolu ni keluarganta be dame na sintong, jala dame na tutu i. Sai unang be mian na marsihosoman manang na marningot angka hasalahon nang hahurangan ni angka donganta ala hita pe ndang diingot Jahowa angka hasalahanta marhite panobusionNa di bagasan Jesus Kristus. Sai unang ma muse marpandokhan “mardomu di tano na rara”, alai mardomu ma di bagasan Debata. Jahowa, Debata na sangap jala na marmulia i olo mardomu tu hita na lea jala na ramun on hinorhon ni dosa dohot pangalaosionta di hataNa. Boasa ma hita ndang boi mardomu roha tu pingkiranta? Hita na marhahamaranggi? Hita na marhulahula marboru? Hita na maraleale? Hinorhon ni haginjangon ni roha do umbahen maol jumpang dame dohot pardomuan di saluhutna. Molo na tutu do hita naung mardomu jala mardame dohot Jahowa marhite Jesus Kristus, otomatis do i ingkon rade hita mardame dohot mardomu roha dohot pingkiran, ama dohot ina, na marnatoras tu ianakhonna, na marhahaanggi, marhulahula marboru, maraleale nang tu sude jolma dohot na tinompa. Dame dohot pardomuan na binuan ni Jesus ima haimbaruon tu hangoluan. Itajouhon jala itaolophon ma Jesus Raja Dame i mian di roha, pingkiran, di keluarga, nang di parsahutaon dohot diparalealeon.

            Molo naung mardame jala mardomu boi ma hita marsoarahon na gogo ende dohot olopolop na manghantindahon Jesus i do Hangoluan dohot haluaon. Unang ma so manang hohom hita manghantindanghon i saluhutna molo pe ro sibolis i laho manghohom pamanganta laho mamuji dohot mangolophon Debata. Ndang na hurangan Debata nang Jesus Kristus di angka pujian, alai ganup naung pinalua ingkon do mamuji Ibana di ngoluna. Sipata ro do sibolis marhite sada ugamo, angka punguan, nang angka na masa laho pasohon jolma i mamuji Debata. Huria na dibangkar, halak Kristen na dilele sahat tu hamatean ni daging, nang ragam na binahen ni sibolis sai unang ma mansohot hita majouhon Jesus i Sipalua ni ngolunta be. Molo pe manghohom sude angka jolma mangolophon Debata, portibi on pe boi do mangolophon dohot mamuji Jahowa. Pangolophon dohot pamujion tu Jahowa parrohon haluaon tu jolma i. Antong lam itagogohon ma pasangaphon Ibana na sun badia i. Amen.

Angka Ende:

1. 15: 1 = 3
2. 171: 1 – 2
3. 435: 1 – 2  
4. 758: 1 + 3
5. 774: 1.....
6. 363: 13 – 14
7. 435: 1.....

BAHAN JAMITA/ KHOTBAH MINGGU JUDIKA, 13 MARET 2016: JESAYA 43: 16 - 21

BAHAN JAMITA

MINGGU JUDIKA

Minggu, 13 Maret 2016

Ev.: Jesaya 43: 16 – 21; Ep.: Johannes 12: 1 – 8; S. Patik: Heber 12: 12 – 13

Oleh: Pdt. Daniel Bonardo Pane, S.Th.

BARITAHON MA HABALGAON NI PAMBAHENAN NI JAHOWA!

Patujolo

            Molo nunga jumpang sada partingkian mamilit uluan di sada daerah manang sada luat torop do angka bagabaga haimbaruon na dibagabagahon asa tertarik jolma laho mamillit ibana. Alai dung tarpilit jala monang ibana, tutu do haimbaruon diboan alai haimbaruon na lam tu roana ndang tu na dengganna. Kecewa ma tubu, laos halak na mamillit i do muse na naeng mandabuhon sian posisina i. Ndang holan na naeng uluan sisongon i, torop do angka jolma manang sada punguan na mansoarahon haimbaruhon dohot haluaon alai holan mambuat goar manang mambuat simpatik ni jolma. Aha do hadomuanna tu turpuk jamita on? Tangkas ma itapaihutihut hatorangan ni turpuk jamita on.

Hatorangan ni Turpuk

            Nunga malengse be bagas joro na di Sion, ima inganan parsombaan ni halak Israel tu Jahowa. Nunga malengse be Jerusalem, huta na gok dame muba gabe huta na gok andungandung. Torop do halak Israel gabe tarbuang tu Babel, nang songon i tu Misir. Adong muse pangantusion naung somal molo marporang sada bangso maralohon sada bangso dohot do debatanai marporang, laos marudut muse molo talu do sada bangso maradophon bangso na monang marlapatan ma i dohot do talu debata na bangso na talu i maradophon debata ni bangso na monang i. Molo diparadophon tu na masa di bangso Israel naung talu maradophon bangso Babel, marlapatan ma i talu do ianggo Debata ni Israel maradophon debata ni Babel. Mangguhi be ma halak Israel hinorhon ni na hansit naung niae bangso i, ndang adong be panghirimon molo marnida na masa i (boi idaonta di Ende Andung si Jeremia; Psalmen 137). Didia do Jahowa, Debata ni halak Israel i? Na tutu do Jahowa talu maradophon Marduk ima debata ni Babel?

            Ro ma Panurirang ni Jahowa, Debata ni Israel mamboan sada barita manang bagabaga na mansai uli tu bangso Israel. Jala bagabaga on pabaoahon tung na so marlapatan hasomalaan nang pangantusion ni portibi on maradophon hadirian ni Jahowa, Debata ni Israel i. Laos dibungkuhon do sude bagabaga i saluhutna di buku Jesaya 40 – 55 na goaron bungku Jesaya na paduahon (Deutro Jesaya). Laos dibungku Jesaya na paduahon on paboahon ia Jahowa, Debata ni halak Israel ima Debata na mangolu jala manongtong, gok hagogoon na so hasuhatan manang hadodoan. Unduk  jala marsomba do sude angka debata ni angka bangso di toru pat ni Jahowa, jala Jahowa mangatasi sude debata di portibi on (Psalmen 97: 7).

            Di turpuk jamita on ima sada tingting manang barita taringot angka pambahenan ni Jahowa di na laho paluahon bangso Israel i sian sitaonon ni bangso i, jala paulihon muse ngolu ni bangso i. Di ayat 15 tangkas do dipaboahon “Ahu do Jahowa, na badiamuna i, sitompa Israel, Rajamuna i”, ima sada pandohan hatongtongan manang hagogoon ni Jahowa na so boi ditaluhon Marduk, ima debata ni Babel i. Jahowa do pargogo na so hatudosan, jala guru tu Ibana do saluhut angka na adong. Jahowa, Debata na so boi dipatudos tu angka debata na asing. Debata na paluahon bangso Israel sian Misir ndang alani haulion manang rupa ni bangso i, alai holan ala guru tu Jahowa sambing do. Jahowa do Raja, na manggomgomi jala mangondihon bangso i jala Ama na manongtong di bangso i. Gok hasatiaonNa dohot angka tanda halongangan jadijadian ni tanganNa. Marmulia jala marsangap ma Ibana saleleng ni lelengna.

            Di ayat 16 – 17 dipaingot muse bangso i di angka naung binahen ni Jahowa maradophon angka ompunasida uju dipaharuar Jahowa bangso i sian parhatobanon ni Misir. Mardalan do bangso i mamolus laut rara (2 Musa 14: 16 – 31) jala disiaphon do angka parangan ni Misir di na laho mangalele jala manangkup muse bangso i. Pidom do bangso i songon sombu naung mintop. Bangso Misir, ditanda do na jolo i bangso na bolon jala na margogo di parbinotoan di parporangan, hape satongkin do gogonasida i jala ndang marlapatan maradophon gogo ni Jahowa, Debata ni Israel. Malua do bangso Israel i mamolus rura hamatean taruli tu haluaon dohot hangoluan uju i. Sude angka na masa di angka ompu ni bangso Israel uju haruar sian Misir ima angka pambahenan ni Jahowa sandiri.  

            Antong unang be paingotingot hamu angka masa na jolo, jala unang be pingkiri hamu angka na robi (ay. 18). Adong na bisuk mandok: pengalaman adalah guru yang terbaik. Tutu do na didok na bisuk i, marhite angka na masa di ari na salpu boi ma idaonta didia do na humurang jala na ingkon dipauli asa tu partingkian sisaonari dohot di tingki na naeng ro. Alai jotjot do jolma i gabe tarpodom di angka na humurang di ari na salpu i jala maol laho hehe manguduti ngolu sisaonari dohot na naeng ro. Diboto do naung mardosa alai ndang olo ro tu Jahowa asa disesa dosana, gabe mago ma tohapna di hangoluan na sintong i. Molo pe diingot naung salpu i, denggan ma i alai ndang na gabe boi gabe dasor manang pondaasi tu hangoluan sisaonari tarlumobi di ngolu na naeng ro.

            Ayat 19 – 20, adong ma haimbaruon na naeng dipatupa Jahowa, Debata ni Isael sandiri do na patupahon haimbaru on. Gok olopolop dohot ganda las ni roha masa di inganan i. Ndang tarhapalang las ni roha na adong disi, gok haimbaruon jala gok hadengganon na masa disi. Tung na so jadi adong na hurangan di tingki i. Songon panogonoguon ni Jahowa di angka ompu ni bangso Israel haruar sian parhatobanon ni Misir songon i do nang na naeng bahenon ni Jahowa di Israel haruar sian sitaononnasida. Mamereng inganan Babel tu Kanaan (tano Israel) ingkon do mamolus halongonan (padang gurun) jala mamolus tano bangkalbangkal. Nang pe songon i pardalanan ni bangso i laho mulak mandapothon tano halungunhonnasida i sai donganon ni Jahowa do nasida, jala disarinhon nasa na ringkot di ngolunasida. Songon pangaramotion dohot panogunogoun ni Jahowa tu angka ompu ni bangso Israel, songon do muse pandonganionna nang panogunoguonNa tu bangso i dung malua sian tingki habuangon i. Marnida i saluhutna pasangaphon ni angka binatang di ladang nang angka gompul (serigala) dohot angka pidong unto ma Jahowa ala dilehon aek di halongonan, angka batang aek di tano bangkalbangkal, jala mangalehon minum bangsoKu na dipinillitNa i. Sude angka na tinompa marlas ni roha jala pasangaphon Jahowa, silehon hangoluan. Ndada holan Israel na gabe mandapot asiasi dohot pandonganion ni Jahowa, alai marhite Israel dibereng angka bangso sipelebegu ma i dohot angka binatang nang sude na tinompa mandapot asiasi dohot pandonganion ni Jahowa.  Sude angka na tinompa ni Jahowa marolopolop mandai jala mananda angka pambahenan ni Jahowa di ngoluna. Disi ma gok las ni roha jala ndang tarhapalangan angka las ni roha i. Di las ni roha i, marsiadu ma angka jolma ro laho marsomba tu Jahowa Debata, haroroan ni hangoluan dohot hatuaon. Jahowa sandiri do na mangalehon minum bangso na pinillitNa, lapatanna Jahowa sandiri na mangalehon hangoluan nang haluaon dohot hatuaon tu bangso na pinillitNa, ima Israel sandiri. Sian i marharoroan ma bangso na asing parsidohot marDebatahon Jahowa gabe goaron ma ibana Israel proselit.

            Bangso na pinillit ni Jahowa i do na mambaritahon hamuliaonNa marsogot. Mambaritahon angka pambahenan ni Jahowa di ngoluna nang pangaramotion ni Jahowa di ngoluna. Mamaritahon asi ni rohaNa i. Nang pe naung jotjot bangso Israel ndang be manangihon hata ni Jahowa marhite angka panurirang uju so tarbuang bangso i, alai sai tong do ndang tartabunihonNa asi dohot holong ni rohaNa i. Nang pe tarrimas Jahowa alai mulak lambok do muse Ibana. Mansai basa situtu do Jahowa. Ndang tarhasuhatan angka basa dohot holongNa i tu hita. Antong sai itabaritahon ma angka asi ni rohaNa i tu angka donganta songon bangso Israel mambaritahon saluhutna i tu angka bangso sipelebegu di humaliangna.

Hahonaan ni Turpuk

            Boha do hahonaan ni turpuk jamita on tu hita? Ditingtinghon manang dibaritahon panurirang on pe bagabaga haluaon ndang na asa simpatik manang mambuat goar sian baritana i. Ndang na gabe laho tu hauntungon tu dirina asa gabe uluan ibana. Dijou Jahowa do angka panurirangNa tu angka jolma na pinarhamaolNa na mian di tongatonga ragam angka hasusaan manang haporsuhon laho maningtinghon manang mambaritahon sada barita las ni roha, barita olopolop barita bagabaga di asi dohot holong ni roha ni Jahowa na marpanghorhon tu haluaon dohot hatuaon. Sude barita i ima barita hatuaon dohot haluaon ni jolma na pinarhamaolNa. Marhite turpuk jamita on, dipaingot do hita angka na marungkil manang manaon na bernit hita di portibi on asa itahangoluhon ma pangaramotion ni TUHAN i di ngolunta be. Sai ramotanNa jala iringiringonNa do pardalanan ni ngolunta be, jala tung na so dipasombu do hita di saluhutna i. Jamita on ima pataridahon asi dohot holong ni roha ni Jahowa tu angka bangso na pinarhamaolNa nang tu hita saluhutna angka na satia tu Ibana. Saluhutna i ima angka basabasa ni Jahowa sambing do. Torop do jolma mandok basa do TUHAN i, alai ndang dihangoluhon basabasa ni TUHAN i. Sai neang do ibana di basabasa i. Mardosa saonari, dungi mangido hasesaaan dungi diulanghon muse mardosa jala mangido hasesaan ni dosa laos songon i ma satorusna, ima na pataridahon neang ni roha di basabasa ni TUHAN i.

            Di minggu Judika, na marlapatan luluhon ma ahu ale Jahowa (hakimilah aku ya TUHAN, berilah keadilan kepadaku ya TUHAN) ima sada pangidoan manang tangiang angka na manghangoluhon pangaramotion dohot pandonganion ni Jahowa di ragam hinahansit dohot hinabernit ni sitaonon di portibi on. Di hata Judika on dipaandap do tu hita di uhum dohot asi nang holong ni roha ni TUHAN i. Uhum hinorhon ni dosa dohot pangaloison di hata ni Jahowa jala dipatupa pe peruhuman tu angka na niasianNa hinorhon ni asi dohot holong ni rohaNa. Nang pe diuhum alai ndang ditadinghon hita diparuhuman i alai si diramoti. Ndang na gabe marujung tu paruhuman ngolu ni angka na manolsoli dosana jala na joujou tu Jahowa, alai marudut do tu haimbaron na ingkon adopanna. Haimbaruon na gok las ni roha dohot olopolop jala mangendehon angka hasangpon dohot hamuliaon ni Jahowa.     Di minggu Judika on dipaingot do hita di pangaramotion ni Jahowa tu angka pinarhamaolNa. Gabe halak na pinarhamaol ni Jahowa do hita marhitehite panobusionNa di bagasan Jesus Kristus i. Marhite goar ni Minggu Judika dohot di turpuk jamita on dipaingot do muse hita di bagabaga ni Jahowa tu hita di Jesaya 46: 4: “sahat ro di hatutuamu sai tongtong do Ahu, jala ro di na ubanon sai Ahu do mangusung hamu. Ahu do mambahensa na sai laon, Ahu do mangompa, ahu do mangabing jala Ahu paluahon nuaeng”. Ima bagabaga Jahowa tu hita angka na pinarhamaolNa marhite Jesus Kristus di ragam angka panosak dohot parungkilon nang angka sitaonon di portibi on. Sai unang ma itapangido asa moru parungkilon nang sitaonon di portibi on, alai mangido ma hita di TUHAN, “sai ramoti jala sai dongani ma ahu ale Amang di ragam sitaononhon, jala pamonang ahu, asa malua ahu sitaonon on dibagasan haimbaruon na gok las ni roha”.

Ndang na gabe so disi, alai marudut do muse laho mambaritahon saluhut denggan basa ni TUHAN dohot pangaramotion ni Jahowa i tu angka humaliangta be. Unang be sai hata manggang dohot hata gabus nang angka hata na hansitta be itapatubegehon, alai angka barita pambahenan ni Jahowa ma na ingkon itapatubegehon tu angka donganta. Anggiat marhite baritanta i, gabe parsidohot nasida taruli di haluaon dohot las ni roha na sumurung i. Amen.

Angka Ende

1. 15: 1 + 4 +8
2. 677: 1 + 4
3. 443: 1 + 3
4. 769: 1 – 2
5. 767: 1.....
6. 268: 1 – 2
7. 519: 1.....