Bahan Jamita/ Khotbah Jumat Agung, 03 April 2015

BAHAN JAMITA

JUM’AT AGUNG

PARNINGOTAN HAMAMATE NI JESUS KRISTUS

Ev.: Rom 11: 33 – 12: 8; Ep.: Jesaya 52: 13 – 53: 12; S.Patik: 1 Petrus 5: 8 – 10

Jum’at, 03 April 2015

Patujolo

            Cogito ergo sum, sada pandohan sian sahalak na bisuk na margoar Rene Descartes na pabotohon na ringkot mamingkiri saluhutna na masa di portibi on. Marhite pingkiran ma boi dilapati taringot hasintongan manang hatigoran. Hinorhon ni i, ditopa ma ganup jolma laho mangasahon pingkiranna sandiri manang marhaujungan tu pingkiran (logical stressing/ logical-centris) mangalapati taringot ngoluna, molo so siat tu pingkiranna sai jotjotan do i didok na so sintong, manang na magic, dongeng, cerita fiktif  ala so tarjalo tu pingkiran.

Saluhutna ingkon boi tarjalo pingkiran (logika), jala dilapati hombar tu pingkiran ni jolma. Sude jolma marsiadu tu hasintongan na piningkiranna, jala pasintonghon na pingkiranna. Pingkiran paboahon ise do hita sasintongna, jala pabotohon songon dia do hita. Antong, boha do hita mangalapati angka naung dipatupa Jahowa dohot sangkap ni Jahowa di ngolunta? Hinorhon ni hamajuon ni jolma mamangke pingkiranna, naeng di jolma i mangalapati saluhutna i hombar tu pingkiranna sandiri, molo so tarjalo pingkiranna didok ma i ndang na tutu manang ndang na sintong. Marhite turpuk jamita on diajarhon jala dipodahon do tu hita angka na porsea di tingki saonari boha do hita mangalapati saluhut pambahenan dohot sangkap ni Jahowa marhite Jesus Kristus di pardalanan ni ngolunta. Itapaihutihut ma hatorangan ni turpuk jamita on.

Nuaeng, nunga torop be jolma naung gabe antipati maradaphon halak Kristen. Sikap antipati on boi idaonta 2 ragamna: (i) radical antiphaty: ima parange antipati na manggosagosa jala na pasiaksiakhon halak Kristen marhitehite fisik. (ii) silent antiphaty: ima parange antipati na mambahen panggosagosaon manang pasiaksiakhon marhite psikologis, dohot angka aturanaturan na mambahen susa halak Kristen. Jala nunga torop be halak Kristen sandiri naung apatis taringot tu haKristenon. Nunga mardosdos diida taringot haKristenon, boi ma i sian dongan Kristen (marhite angka parange ni halak Kristen na sai tongtong ro mandohoti parmingguon manang parhuriaon na so suman manang dang dos songon di haKristenon), manang sian na masa tu ngoluna (mangalapati haKristenon holan tu hasonangan di ngoluna).

            Hatorangan ni Turpuk

            Nuaeng marhite turpuk jamita on Apostel Paulus “menantang” angka jolma na mangasahon hapistaran manang pingkiranna laho mangalapati angka sangkap dohot ulaon ni Jahowa, Debatanta marhite Jesus Kristus. Di ayat 33 turpuk jamita on, tangkas do dihatindanghon si Paulus taringot hamoraon dohot hapistaran, Debata na so hasigatan angka uhumNa jala na so habogasan do angka dalanNa. Torop do angka na bisuk naeng mangalapati jala patoranghon taringot Debata alai na hombar tu pingkiranna, jala dapot ma hapatean taringot Debata hombar tu pingkiranna. Jala jotjot do masa i molo masa panghataion (diskusi) teologi na mambahen Debata gabe objek, hape na ringkot ima mambahen Debata do na gabe Subjek. Tung na so boi do jolma i manghatahon taringot Jahowa, Debata molo so Jahowa sandiri patandahon manang paboahon hadirionNa tu jolma i. Dison, Jahowa, Debata gabe subjek teologi taringot hamoraonNa, habisukhonNa, dohot parbinotoanNa jala saluhutna i patar do i marhite sangkap haluaon na pinatupa ni Jahowa. Sude pambahenan ni Jahowa dohot sangkapNa tung na so boi dodoan manang hasuhatan saluhut sangkap manang dalan ni Jahowa nang angka hamoraon dohot habisuhonNa. Tung songon dia pe timbo ni hapistaran dohot hamaloon ni jolma di portibi on, tung na so boi do mambatasi manang mandodo sude angka hapistaran dohot parbinotoan manang habisuhon ni Jahowa marhite angka sangkap manang ulaon na pinatupa ni Jahowa, Debata. Boi do idaonta di Jesaya 55: 8 – 9 taringot angka sangkap haluaon ni Jahowa, ima na boi dohonon hapistaran dohot hamoraon ni Jahowa. Hamoraon dohot parbinotoan ni jolma boi dietong manang diukur godangna dohot adong do suhatsuhat ni parbinotoanna.

            Hombar tu naung disurathon, molo so Jahowa sandiri na paboahon taringot sangkap manang hadirionNa, tung na so boi do jolma i mangalapati dohot manigati saluhut pambahenan nang sangkap ni Jahowa. Tung ise na umboto roha ni Tuhan i? jala ise manuturi Ibana? (ay. 34). Ayat on paingothon hita di Jesaya 40: 13 – 14 taringot tu habisuhon dohot hapistaran ni Jahowa di ragam sangkapNa, ndang pola ringkot di Jahowa panuturi, manang paniroi di sangkapNa ala so adong na boi tuk tusi. Ibana do mula jala na manompa saluhut hombar tu sangkap jala guru tu Ibana do saluhutna. Andorang so adong dope jolma, nunga adong Ibana. Ibana ma Debata na so ditompa sian pingkiran, sangkap manang parbinotoan dohot gogo ni jolma. Tung so tardodo do saluhut angka pingkiran dohot sangkap ni Jahowa, hasangapon ma di Ibana salelengNa hinorhon ni angka pambahenanNa i (ay. 35 – 36)..

            Di ayat 1, “diapoi Apostel Paulus do halak Kristen na di Rom marhitehite asi ni roha ni Debata”. Paulus mangasahon asi ni roha ni Debata do mangapoi halak Kristen, ndada alani hamaloon, hapistaran, manang parbinotoanna, alai marhitehite asi ni roha ni Debata.[1] Pasahat ma dagingmuna[2] bahen pelean[3] na mangolu, na badia, na hinalomohon ni Debata; ima hadaulaton ni na marroha[4]. Hata ni si Paulus on mangapoi huria Kristen na di Rom asa pasahathon hadirionna (tubuh, jiwa, roh) gabe pelean na mangolu. Adong lapatan haundukhon na polin tu Debata, ima mian dibagasan hata nang aturan ni Debata, , pelean na marasing sian angka pelean na dipele tu debata sileban (ida 1 Korint 8: 1 – 11).  Ai ido hadaulaton na marroha manang hadaulaton (peribadahan, kepatuhan) tu Debata Jahowa, ala ampuna-Na do hita marhite Jesus Kristus.

            Antong molo songon i, ingkon adong do hasurungan ngolu ni halak Kristen sian halak na so Kristen. Alani i, Paulus mandok: unang gabe sarombang[5] dohot portibi[6], gabe imbaru, jala ido na tau manimbangi lomo ni roha ni Debata, ima na uli, na hinaloshonna dohot na sun denggan (ay. 2). Di ayat 2 on Paulus mansai tegas mangapoi asa unang gabe dos halak Kristen tu portibi on, portibi na gok roha na mangalo tu hata ni Debata. Alai gabe imbaru marhitehite ngolu na imbaru[7] dung muba pingkiranmuna.[8] Ndada rupa manang pardagingon na siubaon, alai pingkiran (mind set) tu harajaon dohot hamuliaon ni Debata na manongtong. Asa tau manimbangi[9] lomo ni roha ni Debata, ima na uli, na hinalashonna dohot na sun denggan. Manimbangi lomo ni roha ni Debata ima marhitehite hata dohot angka pambahenan ni Debata di tonga ragam angka na masa di portibi on. Marhite ayat on Paulus mangapoi halak Kristen tu parpunguan Kristen songon sada huria (bukan satu pribadi), sada pamatang ni Kristus asa rap marsipodaan, marsiapulan, marsituturan mangadopi angka na masa hombar tu hata ni Debata. Hata ni Debata ndada songon bungku ni uhum (kitab hukum), alai patandahon dalan hangoluan, hasintongan, daohot hatigoran asa boi masuk tu hangoluan i.

             Diulahi si Paulus do mula ni ayat 3 on sian ayat 1, marhite asi ni roha ni Debata do ibana mangapoi huria i. laos dipaingot asa unang torbang dirajumi hamu dirimu, lobi sian na patut, alai intap ni na tama ma parrohaonmuna. Marhite ayat on Paulus manosohon asa huria i boi mangarajumi dirina (menguasai diri), ganup marguru tu godang ni haporseaon na tinurpukhon ni Debata[10] tu ibana. Godang ni haporseaon dison ndada songon pangantusionta piga godang tu sada an, piga godang tu sada on. Alai tu aha na boi tolap dibahen angka na denggan hombar tu Debata di tongatonga ni parsaoranna, gabe pasupasu tu humaliangna, jala ndada mambahen susa angka donganna.

            Ayat 4 – 8 ima hatorangan udutni ayat 3 taringot parsaoran ni huria i songon pamatang ni Kristus, torop do ruasna. Pola do digombarhon si Paulus huria i, songon pamatang ni jolma, sada do pamatang (tubuh/ Yun: soma) alai ragam do ruasna hombar tu na boi diula ruas i. Tung na so tolap do mata manendang, manang maniop, tung na so tolap do sipareon laho manjama, manang marpingkir, ala nunga adong tugas na be hombar tu na boi bahenonna, alai ingkon do gabe pelean na mangolu saluhutna i tu Jahowa, manang gabe sada tanda haundukhon mian di bagasan aturan manang hata ni Debata.

Hahonaan ni Turpuk

            Sahat ma hita tu hahonaan ni turpuk jamita on di Jum’at Agung, parningotan hamamate ni Jesus Kristus. Jotjot do hita patupahon parningotan on, jala ragam do na binahen ni halak Kristen patupahon parningotan on. Hamamate ni Jesus Kristus mamboan hita tu parubahan dohot haimbaruon. Perubahan dohot haimbaruon di pola pikir, panghataion, parange. Hamoraon, hapistaran dohot parbinotoan ni Jahowa na so tardodo i mangalehon hita pos ni roha, haluaon, dohot hangoluan.

            Antong, itapasahat ma pelean na tutu, ima sude hadirionta (tubuh, jiwa, roh) gabe ginomgoman ni Jahowa, marparange ma hita songon halak naung dipaimbaru marhitehite Jesus Kristus, jala na gok Tondi Parbadia di ngolunta. Unang be dos antong parangenta sian parange ni portibi on, manang unang umjorbut parangenta sian portibion. Mansai lungun do roha molo adong mandok, “jolma dope hita, di portibi dope hita mian”, na boi mempersilahkan asa mangulahon dosa, manang mempersilahkan secara sengaja atau tidak mangoloi hisaphisap ni daging gabe lupa manang gabe maralo tu na dihalomohn ni Debata. Jahowa, Debatanta marhite Jesus Kristus tidak mentolerir atau memaklumi parange manang pola pikir na sisongon i. Ngolu ni haKristenon ima ngolu na marhasurungan. Marhasurungan do asi ni roha ni Jahowa tu na niasianNa sian halak na so niasiaNa, antong hita pe ingkon marhasurungan do parangenta nang pe mian hita di portibi on. Hita naung ditobus marhite Jesus Kristus, boi ma dohonon halak pardisurgo (orang sorgawi, warga sorgawi) na mian di portibi on, asa boi idaon ni jolma na asing taringot haKristenonta, jala boi ma tarjou nasida. Sikap apatis mannag antipati marganti gabe sikap panombaon na polin tu Debata Jahowa.

            Ngolu ni haKristenon ima ngolu parsaoran dibagasan sada pamatang ni Kristus. Sada do pamatang alai torop do ruasna. Ruas na boi mangulahon angka ulaonna hombar tu tolap na boi diula. Alai unang ma gabe patubuhon ginjang ni roha partondion (kosombongan rohani), alai gabe pelean na tutu ma i songon tanda hamauliateon ni rohanta, jala parsombaonta tu Debata, na mamintori hita marhite Jesus Kristus. Gabe sada ma ruas ni huria i di bagasan pamatang ni Kristus. Itaulahon ma nasa ulaon na boi itaula di ragam angka profesi di bagasan roha na serep, jala di bagasan hadaulaton (peribadahan) na marroha. Hadaulaton ndada na di ari minggu, manang di huria, alai ngolunta pe ima dalan hadaulaotn (hidup ini adalah ibadah). Hadaulaton na polin pasahathon dirina gabe ampuna ni Debata Jahowa, marhite Jesus Kristus. Itapelehn ma pelean na tutu jala na tama ima haundukhononta tu Ibana na mamaumasu hita jala na paluahon hita marhite Jesus Kristus. Amen.

Ginurithon: Pdt. Daniel Bonardo Pane, S.Th.

Usulan ni Ende:

• 11: 1 – 3
• 412: 1 – 2
• 83: 1 + 4
• 84: 1 + 3
• 86: 1...........
• 88: 1..........

---

[1] Bahasa Yunani : των οικτιρμων (ton oiktirmon)(belas kasihan, rasa kasihan) = sesuatu pengangkatan dari sesuatu yang tidak dianggap, hina menjadi yang dikasihi. Bukan karena perbuatan atau apa yang diberikan dari yang dikasihi, tetapi inisiatif yang mengasihi. Dalam hal ini yang mengasihi adalah Allah, Bapa melalui Yesus Kristus.

[2] Dalam bahasa asli disebutkan dengan kata  ta. sw,mata  (ta somata), yang berarti tubuh. Bukan dikatakan daging (sarx = sax). Tubuh mencakup 3 bagian penting: Tubuh, jiwa, dan roh. Bagian ini disebutkan dengan istilah pandangan Trikhotomi. Pandangan trikhotomi marupakan andangan ini berdasarkan pada pengertian bahwa, Allah menciptakan manusia, dengan memberikan tiga unsur utama di dalam diri manusia yaitu tubuh, jiwa dan roh. Sebagaimana juga dalam pandangan para filsuf Yunani, memandang bahwa tubuh, jiwa dan roh adalah satu kesatuan, yang ada dalam manusia yang hidup.

[3] Persembahan dalam bahasa Yunani: parasth,shte( (parastesete) yang dituntut pengabdian kepada seorang raja, dan penyerahan secara totalitas kepada seorang raja. Ada sikap bagaikan seorang hamba terhadap tuannya.

[4] Dalam bahasa Yunani disebutkan: logikh: (logike) yang berarti sejati, yang sesungguhnya,

[5] Dalam bahasa Yunani: summorfo,nesqe yang berarti sepola, serupa betul

[6] Tidak dikatakan dengan kata kosmoV, tetapi menggunakan kata aiwn (aion), yang bararti dunia yang penuh dengan keberdosaan, hawa nafsu, sikap yang menentang perintah Allah.

[7] Hidup yang telah dipenuhi oleh Roh Kudus, hidup yang  telah ditebus.

[8] Pikiran atau pola pikir menentukan apa tujuan hidup manusia itu. Pola pikir orang Kristen adalah perintah dan aturan Allah menuju kemuliaan Kerajaan Allah, sedangkan pola pikir dunia (aion) adalah kehormatan, kekayaan dan kerajaan dunia yang bersifat fana (tidak kekal), yang pada kenyataan nyata dalam perbuatan atau perilaku hidup.

[9][9] Yunani:  dokima,zhte  (kata dasar: dokima,zein) yang berarti memeriksa, menguji

[10] Yang berarti talenta, atau kemampuan atau kelebihan yang dimiliki dan dapat dirasakan oleh masyarakat sekitar atau persekutuan menjadi berkat. Tidak menimbulkan kesombongan, tetapi menimbulkan kerendahatian, dan ketaatan serta pengabdian kepada Allah.