BAHAN JAMITA
MINGGU VIII DUNG TRINITATIS
21 JULI 2013
Ep: 1 Johannes 3: 19 – 24
(23-24); Ev. Johannes 15: 9 – 17
Roha Na
Marsihaholongan
Hataridaan Ni Aleale Ni Kristus
Pdt. Daniel Bonardo Pane, S.Th.
Patujolo
Nunga
sai jotjot halak Kristen mambege taringot holong manang marsihaholongan. Alai
saluhutna holan pangantusion sambing, alai mansai maol do molo diulahon. Sada
na mambahen maol jolma marsihaholongan, tarlumobi manghaholongi musu ima na so
boi parjolo manghaholongi donganna manang musuna molo so adong haporluanna
manghaholongi (kasih dengan tujuan tertentu). Torop do halak manghaholongi
alai naeng adong do haporluanna alana dihaholongi.
Alai dang pola songon i holong na didok
Jesus di turpuk ni jamita on. Marsihaholongan ima sada hatandaan ni halak gabe
sisean ni Kristus. Marhite holong on ma na mangkangkam nasa patik dohot hata ni
panurirang. Apostel Paulus pe manurathon mansai ringkot do roha holong mian di
ganup halak na mandok dirina siihuthon Kristus. Tung so adong do marlapatan
lambok hata, manang pambahenan na tama, molo so adong holong di ibana (1 Kor.
13: 1-13). Alai ingkon tangkas do hita mangantusi boha do halak Kristen
mangulahon holong songon na diturpuk on?
Hatorangan ni Turpuk
Songon
halak na didok sisean ni Kristus (Kristen), marlapatan do i dang boi malua jala marsirang
sian na diihuthon, ima Kristus. Molo didok dang boi malua manang tarsirang,
rade ma ngolunta digohi hata dohot lomo ni roha ni Kristus (ida Johannes 15: 1
– 8).
Di ayat 9 – 10, dipatorang
Jesus do taringot holong ni roha ni Debata, Ama-Na, jala songon i ma holong ni
roha-Na di angka sisean na mangihuthon Ibana. Songon dia do holong ni roha ni
Debata? Holong ni roha ni Debata di Ibana, ima holong na margogoihon, manuturi
Jesus laho patupahon jala pasauthon lomo ni roha ni Debata, ima pangoluhon,
padamehon na manghorhon haluaon tu ganup halak na tarpillit gabe sisesan. Holong
na sisongon i ma na dilehon Jesus jala na ingkon mian di angka sisean.
Marlapatan do i, didok Jesus pe asa marsihaholongan, alai ingkon parjolo do
ibana mandapot holong na sian Debata marhite panjanghonna di Jesus Kristus di
rohana jala rade mian rap dohot Ibana. Mian rap dohot Jesus, marlapatan ma i
mian di bagasan holong ni rohaNa.
Boha do asa mian di
bagasan holong ni roha-Na? Ima mangaradoti angka patik (ay. 10). Songon naung
dipatorang di patujolo ni jamita on, holong ma mangkamkam jala pangarimpunan ni
patik (manghaholongi Debata, marhithite haundukhon dohot haradeon diri laho
diuluhon Debata marhite Jesus Kristus; dohot manghaholongi donganna, songon
hataridaan na manghaholongi Debata (Patudos 1 Johannes 4: 20)). Umbahen i ma
dihatahon Jesus tu angka sisean, asa diboto nasida do aha do na ingkon
diulahonnasida songon sahalak na mandok dirina sisean ni Kristus, jala ido
hasurungan ni ngolu halak na gabe siihuthon Kristus. Jala dang adong be alus ni
naung mandok dirina sisean ”dang adong tingki”; ”maol do i diulahon”; jala
”jolma dope hita, jala maol mangulahon i”. Torop do halak siihuthon Kristus
martabuni di hagaleonna na songon i gabe i ma na mangambat boi mangulahon lomo ni roha ni
Debata.
Mangaradoti patik ima
halalas ni roha, jala marhite mangulahon patik, gok ma las ni roha di angka na
mangulahon (martua ma halak na umpeop di hata ni Jahowa). Halalas ni roha na
didok dison, ndang na halalas ni roha songon na masa di portibi on (pesta pora,
dsb.) jala dang na mandok "molo mangulahon patik-Na gabe so adong be
sipingkiron manang haporsukhon manang sipingkiron". Alai gok las ni roha ima panghilalaan sonang mardongan panghilalan naung mandapot pasupasu sian Debata; dang ngolu na so, (hidup dinamis tidak statis); las ni roha naung
mananda huaso dohot hahomion ni Debata, na boi paposhon jala pasabamhon ngoluna
nang pe porsuk ditaonna di hasiangan on hinorhon ni mangulahon patik i.
Dia do patik na
didok dison? Ima “marsihaholongan hamu songon Ahu manghaholongi hamu”. Dibahen
Jesus do tiruan tu nasida songon dia do manghaholongi. Manghaholongi na so pola
marnida status, holong na pasegahon angka batasan na binahen ni jolma; holong
na manghangoluhon; manogunogu; jala na olo mangurupi. Patar ma holong ni Jesus
i marhite na disumeahon Jesus hosa-Na humongkop angka jolma na olo gabe
siihuthon Kristus, jala ido parholong ni roha na so halompoan (ay. 13). Molo diulahon angka sisean angka ulaon i,
donghononna ma ibana gabe aleale-Na. Panjouon aleale on ma udut ni las ni roha
di ayat 11.
Panjouon ni aleale ima
barita las ni roha jala hapapatar ni holong ni roha na mangalehon hangoluan.
Jesus, na Ibana do rupa ni Debata na singkop (Filp. 2: 6) alai ro do Ibana
manopot jolma na mardosa, jolma na ingkon mate ala ni pangalaosionna dihata ni
Debata, asa mangolu jolma i jala malua sian hamatean ala ni dosa, jala mandapot
hangoluan na saleleng ni lelengna. Panjouon ni aleale ima sada tanda, na ungkap
do di adopanta pintu manopot Debata silehon ganda las ni roha dohot panghirimon
na mangolu marhite angka bagabaga naung diparbagabaga Jesus taringot harajaon
ni Debata (ay. 14 – 15). Dang buni Harajaon ni Debata di angka na porsea di Ibana. Panjouon
aleale ima tanda rekonsiliasi (pemulihan)/ panobusion ganup jolma sian
parhatobanon ni dosa, tu haluaon dibagasan Kristus. Marhite on, Kristus songon
aleale na sumurung patuduhon holong ni roha dohot hasatiaon-Na tu Ama na
marsuru Ibana (ay. 12-13). Ndang songon aleale ni portibi on paralealeon ni
Jesus di angka na porsea di Ibana. marimbar do paralealeon ni Jesus sian
paralealeon na di portibi on. Paraleale di portibion godang aleale na holan
sonang, alai di tingki songgop hasusaan manang marsitaonon, mandao do
saluhutna, jala adong muse ma na sumeahon hosa ni alealena lao mangaup
hauntungan tu dirina (makan teman sendiri).
Alai dang na gabe jolma i
na mamillit, alai Jesus do mamilit nasida gabe alealena. Pamilittion on ditorushon
do tu manguduti ulaon panghobasion (missi
Kristus/ missi christi) jala asa marparbue. Pamillition ni Jesus ndada ala
ni pambahenan manang usaha ni jolma i sandiri, alai Kristus sandiri do na mamillit,
jala pamillition ni na ingkon do marparbue songon halak naung pinillit jala
naung targoaron aleale ni Kristus. Jala ditolhonhon Jesus do muse songon
hasurungan ni sisean songon aleale-Na ima ”Masihaholongan”.
Hahonaan ni turpuk
Ise
do halak na manghaholongi? Ima halak naung parjolo sahali mananda jala mandai
holong ni Jahowa Debata marhite Kristus Jesus. Lapatanna, Debata do parjolo
sahali mangholongi angka jolma, marhitehite Jesus ma patar holong ni roha ni
Debata na mamboan haluaon tu jolma. Laos ido haholongan i ma na naeng diulahon
halak naung mananda holong ni roha ni Debata marhite Jesus Kristus. Jala halak
naung mananda jala mandai holong ni roha Debata marhite Jesus Kristus, ingkon
do mangulahon manghaholongi Debata marhitehite haundukhon, hasatiaon di bagasan
holong ni Debata i dohot di angka patik-Na; jala holong tu angka donganna
jolma.songon hataridaan ni manghaholongi Debata.
Holong na marsihaholongan
on ma hasurungan ni halak Kristen sian na asing. Roha na marsihaholongan ndada
holan tu dongan na manghaholongi ibana, alai tu sude ganup jolma (Mat. 5:
45-48) ai ido na gabe hasurungan gabe aleale ni Kristus. Songon aleale ni
Kristus tama situtu do adong pangulahonhon jala ingkon adong do parbuena,
marhite parbue on ma tandaon ni halak hita aleale ni Kristus manang aleale ni
portibi on (tanda on do hau sian parbuena).
Parbue na dipangido ima
roha na marsihaholongan. Di tingki nuaeng ingkon patar do roha marsihaholongan
na tama hombar tu naung dipatuduhon Jesus. Torop do halak Kristen mandok dirina
aleale ni Kristus alai parbuena dang na patuduhon aleale ni Kristus alai
aleale ni portbion dohot aleale di dirina sandiri. Tanda do i sian ngoluna na
sai manggohi tu hagiot ni dagingna dohot tu hagiot ni portbi on; tubu ma
marsihosoman, marsiburaan, marsihataan, songon gabe dos do ibana tu portibi on. Rade ma hita mian rap
dohot Kristus asa boi tarbahen hita sude angka lomo ni rohana-Na. Ai dang adong
na boi tarbahen hita angka lomo ni roha-Na molo mandao manang marsirang do hita sian
Ibana. Amen.
