Jamita Hananaek ni Jesus, 09 Mei 2013

BAHAN JAMITA

KAMIS, 09 MEI 2013

PARNINGOTAN HANANAEK NI JESUS KRISTUS TU SURGO

Ev.: Ulaon ni Apostel 1: 6 – 14 (Ep.: Markus 16: 14 – 20)

Pdt. Daniel Bonardo Pane, S.Th.

HANANAEK NI JESUS PATOGUHON ROHA GABE SITINDANGI

Patujolo

            Mansai lungun do panghilalaan molo marsirang dohot na hinaholongan. Molo borhat sada ianakhon na dihaholongi tu pangarantoan, tontu parjolo sahali lungun situtu do panghilalaan ni natorasna, tarlumobi molo marsirang ala disirang ni hamatean na tahaholongi tontu mansai lungun situtu do panghilalaanta. Boi do tadok songon i do lungun ni angka sisean ni Jesus dohot na sai tongtong mangihuthon Ibana uju di portibi on dope Ibana, lungun di partinadinghon ni Jesus di nasida, na manaek Jesus tu Surgo.

            Ragam do angka pandokhan taringot na dihilala angka sisean ni Jesus dohot na mangihuthon Ibana, isarana:

-         Lungun manang lungun ni roha. Malungun di parsirangan ni daging dohot mudar. Dang rap be Jesus di nasida, lungun ni roha nasida di na laho Jesus manadinghon nasida.

-         Mabiar. Adong do panghilalan mabiar ni angka sisean ala nunga laho be gurunasida, manang uluannasida. Tung ise be na manguluhonnasida manang na gabe paniroi di nasida, tarlumobi mangadopi angka pamarenta Rom hatiha i, dohot angka sintua ni malim na mansogohon Jesus.

-         Longang. Longang do angka sisean dohot angka na mangihuthon Jesus hatiha hananaekNa marnida na hinsat Jesus. Dipanotnoti nasida do Jesus na manaek tu Surgo.

Alai porlu do botoonta mansai tangkas taringot hananaek ni Jesus Kristus tu surgo, dang na laho manadinghon angka siseanna manang angka na mangihuthon Ibana. Alai hananaek ni Jesus ima sada ulaon na ingkon masa di Ibana songon naung disangkapi Jahowa, Ama na marsuru Ibana. Nang pe manaek tu Surgo Ibana, alai na ro do Ibana muse songon na diida angka sisean i uju i, ima hamuliaon naung dijalo Jesus sian Ama na marsuru Ibana.

Marhite turpuk jamita on mansai tangkas do botoonta taringot tona na pinasahat Jesus tu angka siseanNa hatiha i, jala tona i sahat do tu sadari on jala ditingki di jaha pe turpuk on sahat jumpang songon na pinarbagabagaNa taringot haroroNa muse. Jala dibagabagahon Jesus do pangurupi angka na porsea di Ibana asa gabe sitindangi sian Jerusalem sahat tu ujung ni tano on. Tondi on ma na papatarhon pandonganionNa di angka na porsea di Ibana. Nang pe marsirang sian sibuk dohot mudar, alai dilehon do Tondi na so sian portibi on, alai Tondi Parbadia na sian na sun badia, ima sian Ama (ida Joh. 14: 16).

Hatorangan ni turpuk

            Buku Ulaon ni Apostel ima udut ni na buku na sinurathon ni si Lukas, sahalak pangobati uju i, alai gabe sitindangi do ibana marhite si Paulus. Disurathon si Lukas pe buku on tu si Teopilus (Theophilus – Yang dikasihi TUHAN, Hasian/ Haholongan ni Debata) asa diboto jala ditanda si Teopilus do barita taringot Jesus Kristus, sian hatutubuanNa sahat tu hamateanNa, jala manaek tu surgo (Lukas 1 – 24); jala di buku on disurathon si Lukas muse sian na manaek Jesus tu surgo dohot angka pardalanan dohot ulaon ni angka apostel di huria na parjolo i (Ul. Apostel 1 – 28).

            Andorang so turpuk jamita on, mansai tangkas do dibaritahon si Lukas taringot ulaon dohot panghobasion ni Jesus dung mulak mangolu Ibana sian na mate (ay.3) ima patandaphon diriNa naung mangolu tu angka na marnida Ibana marhitehite lan tanda lelengna 40 ari, jala mangajari do Ibana taringot Harajaon ni Debata. Jala di tingki na domu Ibana dohot angka siseanNa, dipatihi ma, na so jadi meret nasida sian Jerusalem, so jolo dipaima bagabaga ni Ama i na binegenasida sian Ibana (Luk. 24: 49; Joh. 15: 26). Laos Tondi do na didihonhon tu nasida. Jala Tondi i do na margogoihon nasida gabe sitindangi taringot Jesus Kristus.

            Pandidion ni Tondi songon na naeng pinasahat ni Jesus ima mangalehon:

-         Ngolu na imbaru. Ngolu na imbaru marlapatan mambalongkon angka bangkobangko dohot parange na so marpardomuan tu hata ni Jahowa. Dang tolap gogo ni jolma i laho mandapot ngolu na imbaru so marhite pandidion Tondi songon na didihon ni Jesus.

-         Hamubaon i roha, ima adong panindangion gabe siula hata ni Jahowa di bagasan ngoluna. Mananggalhon sude angka hisaphisap dohot hagiot ni dagingna, jala manghasiholi hata dohot parsaoran rap dohot Jahowa di ngoluna.

-         Hiras ni roha. Dang adong be biar disi, dang adong be bohaboha on di bagasan ngoluna nang pe ragam angka na masa di ngoluna, jala marpos ni roha. Jala sude na i ima dibagasan pangoloion tu angka hata ni Jahowa dohot mangulahon gabe sitindangi taringot barita na uli (Jesus Kristus).

-         Haradeon diri digomgomi Tondi i. Molo nunga didihon Tondi, marlapatan ma i paiashon diri nang roha.   Dang be olo dirajai manang digomgomi hagiot ni daging na naeng pasonanghon dirina, alai rade digomgomi manang dirajai jala ditiroi marhite Tondi laho mangulahon lomo ni roha ni Jahowa jala na boi mambahen sonang dohot las roha ni Jahowa. Dirinta ndang be nampuna hita, alai nampuna ni Debata.

            Alai maol dope antusan ni angka sisean i taringot harajaon ni Debata songon na dipabotohon Jesus, nang pe leleng nasida raphon Jesus. Dirimpunasida do harajaon na pinabotohon Jesus ima sada harajaon songon harajaon na di portibi on na boi mangalehon hademakhon dohot hadameon jala na boi paluahon bangso i sian panggomgomion ni huaso Rom; harajaon na imbaru songon na dihalunguhon bangso i. Laos i do na pinangido angka sisean i di ay. 6 asa pintor dipajongjong Jesus ma harajaon songon naung dipabotohon Jesus tu nasida, jala dipangido nasida do asa dipajongjong saonari. Ay. 6 on do na manggombarhon ganup jolma na sai olo manontuhon angka ulaon ni Jahowa, Debatanta marhite angka pangidoan dohot pingkiran. Ingkon boi do tangkas botoonta, dang mangula Jahowa hombar tu na pinangido jolma manang dibatasi pingkiran ni jolma, alai saluhutna guru tu Jahowa, Debata Pargogo na so hatudosan i saluhutna.

            Jala dialusi Jesus do sisean i di ay. 7, dang boi jolma na manontuhon andigan manang ombasna. Ama i sandiri do na mambuhul andigan masa i jala guru di huasoNa sambing do saluhutna. Laos on ma alus tu angka jolma na sai olo paboahon andigan do ro ajal ni hasiangan on songon naung masa di pigapiga tingki na salpu, na boi mambahen jolma i ganggu, jala patupahon angka ulaon na so marlapatan na marhaujungan tu na so marlapatan dohot kekecewaan. Dang saguru tu jolma jala tu angka naung dipikirhon manang diramal ragam jolma taringot angka na masa dohot haroro ni Harajaon na naung dibaritahon Jesus, alai guru di huaso ni Ama sambing. Alus ni Jesus on laho paingothon asa unang tarlalap angka sisean dohot na porsea tu Ibana paimahon haroro ni Harajaon i gabe so mangula, alai alus ni Jesus on ima panjouan asa RADE/ DUNGO, paimahon haroro ni Harajaon i marhitehite angka pangulahonon di portibi on.

            Molo manat talapati taringot sungkunsungkun sisean i taringot tingki hajongjongan ni harajaon i (ay.6), adong do disi songon pangidoan asa malua jala dang be mabiar angka sisean i maradophon panggomgomi uju i, jala asa patar ma na jongjong do muse harajaon si David na imbaru sian Pinompar ni si David songon panghirimon ni bangso i marhite angka naung disuriranghon angka panurirang di padan na robi. Harajaon na boi mambahen hadameon dohot hamonangan di Israel songon naung masa di Isarael uju si David gabe rajanasida.

            Diboto Jesus do na dihalungunhonnasida i, jala dialusi do marhitehite bagabaga taringot hagogoon ni Tondi Parbadia, songon naung dibagabagahon Jesus uju so mate dope Ibana. Tondi Parbadia i ma na margogoihon asa unang mabiarjala asa togu paimahon haroro ni Harjaon i, jala marhiras ni roha angka sisean dohot angka na porsea gabe sitindangi taringot holong ni Debata marhite Jesus Kristus, taringot hapapatar ni harajaon ni Debata marhite Jesus Kristus, paima ojak harajaon i ditingki naung ditontuhon Jahowa sandiri; papatarhon holong ni Jahowa, Debata, Ama na manongtong salelengna marhite Jesus Kristus; jala papatarhon tung na so adong be sisombaon dungkon ni Jahowa marhite Jesus Kristus; jala papatarhon Jesus do dalan, hangoluan, dohot hasintongan jala na so adong na sahat tu Ama i so marhite Ibana; papatarhon sude na marhosa manghatindanghon Jesus i Tuhan, jala sude ulu ni tot marsomba Ibana dang tu angka ragam ni huaso dohot hagogoon na di portibi on; pabotohon angka pangajarion na denggan songon naung diajarhon Jesus tu nasida; mambaritahon taon parasiroha on dohot barita na uli; marhite i, lam tu toropna ma angka na porsea di Jesus Kristus, jala mandapot haluaon, ndada holan tu halak Jahudi alai sahat tu ujung ni tano on, nang sude angka na marhosa dohot tu nasa na tinompa (Mark. 16: 15).

            Di ayat 9 – 10 ima pasirangan ni Jesus dohot nasida. Tarhisat ma Jesus jala dipanotnoti angka siesean i dohot na mangihuthon Ibana uju i, sahat tu diholipi ombun i Ibana. Panotnotionnasida on boi ma songon tanda:

-         Halongangan. Longang do nasida marnida na masa tu Jesus uju i, songon na so masuk tu pingkiran boasa boi masa songon i. Longang nasida marnida tarhinsat ni Jesus sahat tu diholipi ombun Jesus songon tanda hamuliaon dohot hasangapon dohot angka haulion sian surgo. Longang do nasida di angka haulion dohot hamuliaon na dijalo Jesus marhite hananaekna tu Surgo.

-         Hananaek ni Jesus ima laho pataridahon songon dia hamuliaon na didapot si Elia uju manaek ibana tu surgo songon na diida si Elisa, siseana.

-         Hananek ni Jesus ima sada hamuliaon surgo, laos di bagasan hamuliaon ni do muse ro Ibana di marsogot. Tingki marsogot on dang adong jolma na mamboto andigan ala guru tu Jahowa, Ama i do saluhutna, na ringkot ima rade dohot dungo hita paimahon tingki i.

-         Laos hananek ni Jesus i mangalehon sada panghirimon na mansai uli taringot hamuliaon ni Jesus na naeng dipapatar di tingki haroroNa muse, jala ido na ingkon masa tu ganup jolma na hot satia sahat ro di ujungna di bagasan haporseaon, dang dibagasan biar manang ganggu ni roha.

Di na tinuluthon nasida dope Jesus na laho i tu ginjang, nunga jongjong di lambungnasida 2 halak parulos na marlinanglinang, ima angka pardisurgo manang surusuran (ay.10). Dang diboto sisean dohot siihuthon Jesus uju i naung jongjong surusuran ala tarlalap do nasida marnida haulion ni langit di na hinsat Jesus tu surgo di bagasan hamuliaon. Surusuruan on laho padungohon asa unang lalap di angka haulion na diida nasida. On ma na paboahon halak Kristen (siihuthon Kristus) dang boi tarlalap di angka haulion na diida so mardongan ulaon. Godang do angka pangajarion na boi mambahen angka jolma gabe lalap marnida dohot mangarimangrimangi angka haulion ni surgo dang mardonganhon pangulahon, on ma na didokna haporseaon so mardonganhon ulaon. Dipaingot surusuran i do angka sisean i dohot na siihuthon Jesus uju i asa unang lalap nasida marnida saluhutna i, jala dipahot do panghirimon na ro do Ibana sogot, songon na niidanasida Ibana laho dompak banua ginjang (ay. 11). Ayat 11 on ma padungohon angka na porsea di Kristus asa mangarade jala dungo sian angka parlalapan, lalap di haulion, lalap di sitaonan, na boi mambahen lupa laho manguduti ulaon tona ni Jesus, ima gabe sitindangi Kristus marhite barita na uli nang pambahenan. Jala di bagasan hamuliaon do Jesus hinsat tu banua ginjang, jala di bagasan hamuliaon do muse Ibana ro marsogot, di tingki na ditontuhon Jahowa sandiri andigan tingki i masa. Di ayat 11 marlapatan do asa angka sisean dohot siihuthon Kristus hatiha i dang mananggalhon angka ragam sitaonon na naeng diadopannasida, jala alai ingkon do diadopi jala monang maralohon paraloan sian portibi on marhite haporseaonnasida.

Di ayat 12 tangkas do dipabotohon na mulak do nasida tu Jerusalem, sian dolok Jetun na jonok tu Jerusalem; na hadalanan di ari Sabbat do daona. Angka sisean dohot siihuthon Jesus hatiha i, mulak laho mangulahon tona na pinasahat ni Jesus Kristus, ima manghatindanghon barita taringot Jesus Kristus. Nasida mulak tu Jerusalem di tongatonga ni angka ragam ni sitaonon manang haporsuhon na naeng masa tu nasida sian angka jolma na so manjanghon Jesus. Nasida ma songon birubiru na disuru Jesus tu tongatonga ni angka babiat (Lukas 10: 3). Molo secara psikologis adong do dope mian di nasida roha biar, ganggu, gamang ala dang adong be uluan di nasida, alai marhitehite bagabaga ni Jesus tu nasida boi ma gabe pahothon haporseaonnasida jala panghirimon. Hananaek ni Jesus tu Surgo ndang na manggotap manang patubuhon panghirimon angka sisean i, alai pahothon panghirimonnasida songon naung diida nasida.

Di bagasan panghirimon dohot hatoguon haporseaon ni, dang na gabe marserak angka na porsea i songon anak ni manuk na hamagoan indukna. Alai marpungu ma nasida di sada inganannasida (ay. 13). Angka sisean na sampulusada i marpungu jala mandatdati martangiang sian sada ni rohanasida, rap dohot angka parompuan dohot si Maria, ina ni Jesus dohot angka anggi ni Jesus (ay. 14). Torop do angka na bisuk mandok anggi dison ima angka jolma na torop na sai tongtong mangihuthon Jesus uju di portibi on dope Jesus, jala nasida ma muse na mandongani jala mangurupi angka apostel laho marbarita na uli. Sai didatdati nasida do laho martangiang. Tangiang do gogonasida, martangiang sian sada ni rohanasida di tongatonga ni angka hamaolon dohot parsorion na naeng songgop tu nasida gabe sitindangi. Parange na songon on ma na ingkon diulahon angka siihuthon Kristus sahat tu sadari on. Angka na didok ni jolma na porsea ima jolma na martangiang, jala pasahathon pangidoan tu Ama i. Halak na martangiang ndada halak na so, dang adong pangulaonhon (pasiv attitude); alai halak na martangiang ima halak na margogo laho mangadopi ragam ni angka na masa di ngoluna. Halak na martangiang ima halak na mangakuhon jala marhatopothon hagaleonna tu adopan ni Jahowa jala rade laho dipargogoi Jahowa asa margogo ibana. Halak na martangiang marlapatan rade marsada di bagasan hahomion ni Jahowa, jala di bagasan hahomion i dipasahat ma pangidoan jala rade laho dipargogoi jala ditiroi Jahowa di ngoluna. Martangiang do nasida sian sada ni rohanasida paimahon hajujumpang ni bagabaga ni Jesus i.

Refleksi Teologis

            Di tingki sadari on ragam dope hasusaan dohot parsorion ni angka Kristen, tarlumobi angka sitindangi Kristus. Ise do sitindangi Kristus sadari on? Ima sandok halak na mananda jala na porsea tu pangajarion ni Jesus Kristus, jala Jesus Kristus do dalan, hangoluan, jala hasintongan, jala parhitean manopot Ama i. Halak naung tardidi dibagasan Goar ni Debata Ama, Anak, dohot Tondi Parbadia, jala naung mandapot barita na uli taringot holong ni Jahowa marhite Kristus ido gabe sitindangi. Ndang adong be alus, dang parsidohot au disi; manang ndang hubotoboto i, manang dang adong tingki. Gabe sitindangi marhite hata nang pambahenan didia pe maringanan.

Sahat tu sadari on ragam dope hamaolon dohot parsorion gabe sitindangi taringot Kritus. Songon na masa di pigapiga ari na salpu, na disegai gareja/ huria HKBP Setu, dohot di luat na asing pe, sada tanda na adong dope na manulak barita taringot Kritus jala na manghosomi Kristus di luat i. Alai taingot ma hata ni Jesus uju di portibi on dope Ibana “Molo dihosomi portibi on hamu, boto hamu ma, naung jumolo Ahu dihosomi. Aut na sian portibi on  hamu, haholongan ni portibi on do donganna. Alai ndang sian portibi on hamu. Ahu do tahe mamillit hamu sian portibi on; ala ni i do umbahen na dihosomi portibi on hamu” (Joh. 15: 18 – 19). Hata ni Jesus on ma na paingothon hita na dihosomi portibi on do angka sitindangi Kristus, jala angka na porsea ima angka naung dipillit sian portibi on, jala dang na gabe talu manang sarombang dohot portibi on. Molo sian pardagingon marnida angka na masa taringot sitindangi Kristus na sai tongtong dibagasan hasusaan manang sitaonon, tontu do sungkunsungkun do roha, didia do Kristus i? Na ditadingkon do angka sitindangiNa mangadopi angka na masa i? Boasa dipasombu Kristus angka sitindangiNa manaon ragam ni sitaonon sian portibi on?

Marhite jamita on hananaek ni Jesus on, dilehon do bagabaga tu hita taringot pandidihon Tondi Parbadia. Tondi Parbadia i ma annon na mangalehon ngolu na imbaru, manang marhiras ni roha, dang ganggu be, jala sai tongtong manghirim di angka na denggan naung pinatupa Jahowa marhite Jesus Kristus. Orang Percaya tidak pernah diajarkan untuk lari dari setiap masalah di dunia ini atau berbagai kemelut atau tantangan, tetapi orang Kristen diharuskan untuk tetap setia dalam iman dengan menghadapi setiap kemelut atau tantangan yang dihadapi, sehingga orang Kristen dikenal dengan orang yang menang, bukan orang yang kalah sebelum bertanding.

Marhite jamita on adong do 3 tona na boi patoguhon ganup huriamanang halak Kristen marhiras ni roha gabe sitindangi Kristus:

1. Jesus ro do muse di ari marsogot. Dibagabagahon do haroro ni Jesus songon hananaekNa tu banua ginjang, songon i do Ibana muse ro di ari sogot. Dibagasan hamuliaon do Ibana manaek tu banua ginjang, jala di bagasan hamuliaon do Ibana muse ro. Ndada hamuliaon ni portibi on di patuduhon, alai hamuliaon Jahowa do diojakhon, ima haoojak ni Harajaon ni Debata. Haroro ni Jesus di ari marsogot, dang be laho tubu jala mate muse, alai haroroNa gabe sada panguhum na bolon,  manguhumi halak na mangolu dohot na mate. Ise na manabur na denggan uju di ngoluna, ingkon manggotil na denggan do muse sian Jesus Kristus di bagasan hamuliaonNa. Andigan ro ari i? Jahowa, Ama i sambing do manontuhon.
2. Unang marnaloja hita mangalului jala manghasiholi Jahowa marhite Jesus Kristus. Di ragam ni angka na masa di ngolu on, las ni roha dohot arsak ni roha, unang mansadi manang marnaloja hita mangalului jala manghasiholi Jahowa marhite Jesus Kristus. Marlapatan do on, unang marnaloja hita marparsoran dohot hahomion ni Jahowa marhite tangiang, dohot manjaha buku na badia (Bibel) ai disi do pangajarion hangoluan jala taringot sangkap ni Jahowa sian panompaon ro di ujung ni tingki di tano on. Marhite parsaoran di Gareja, dohot di parsaoran ni halak Kristen. Sadari on, ndang boi be ganup huria na mandok, hurianami do na sintong; pangajarionnami do na sintong, na boi patubuhon hosom, dohot parbolatbolatan. Huria na songon i ima huria na so gabe sitindangi Kristus, alai huria na sahombar tu portibi on. Huria sadari on ingkon boi songon angka sisean dohot angka na porsea na parjolo i rap martangiang sian sada ni roha; rap marsitiopan tangan; rap pauliulihon; jala rap patoguhon gabe sitindangi Kristus; sahat di haroroNa na paduahalion di bagasan hasangapon.
3. Dilehon Jahowa do Pangurupi. Hananaek ni Jesus tu banua ginjang, dang na laho manadinghon angka na porsea di Ibana, jala ndang na pasombuhon angka halak na porsea jala sitindangi Ibana songon anak ni manuk na hamagoan indukna, na boi mambahen marserak angka na porsea i so marpanghirimon manang di bagasan hatahuton. Adong do bagabaga ni Jesus Kristus uju so mate dope Ibana jala uju na naeng manaek Ibana, ima Tondi Parbadia. Jesus mandok: “jala pangidoonHu ma tu Ama i, asa dilehon tu hamu sada Pangondian na asing, asa i mandongani hamu salelengna i”. (Joh. 14: 16). Pangondian na asing i ima Tondi na so sian portibi on, alai sian Jahowa, Ama na marsuru Ibana. Ido na mangondingi, manuturi, jala mampargogoi ganup angka na porsea di Ibana. Marlapatan ma i, sai tongtong do hape halak na porsea jala sitindangi diramoti jala didongani ni di ganup rumang na masa di ngoluna. Jesus Raja dohot Ulu ni Huria i, sai tongtong do manggomgomi jala manguluhon Huria i marhitehite Tondi Parbadia. Songon panjanghonon ni angka na porsea na parjolo i, songon i ma antong hita manjanghon Tondi Parbadia di ganup ngolunta, keluarga, mardongansaripe, mardongansahuta, dohot na maraleale. Unang ma bonsa jala mabiar rohanta gabe sitindangi Kristus di ngolunta.

Hananaek ni Jesus Kristus, Patoguhon hita gabe sitindangi Ibana

Gabe sitindangi Kristus  ma ganup na Porsea di Ibana, jala paimahon 

hamuliaon ni Jahowa patar di ngolunta.

Amen.