ibadah Jumat Agung

PARTORDING NI ULAON JUM’AT AGUNG

PARNINGOTAN HAMAMATE

NI JESUS KRISTUS

Prosessi Jalan salib - penyaliban (diiringi lonceng gereja dan instrumen)

Saat teduh: (SL: ende ½ suara, O ulu na sap Mudar)

Votum (jongjong)

P    :  Marhitehite goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia na manompa langit dohot tano on, dipasaor ma dameNa tu tondinta

H    :  Ale Jesus Tuhannami, bereng hami na dison; pinarmahanMi do hami saluhutna na diison, sai asi roham di hami, sai pangolu hami on. Amen. (hundul)

Marende BE. 407: 1 – 2

Intoritus – tangiang

P    :  Tongon do angka sahitta diusung Ibana, jala angka pardangolanta diporsan; alai anggo rohanta mandok: Debata do maminsang, mamungkul dohot pasipal ibana

H    :  (mangendehon BE. 84:1 BL. 195) Aut na ginorga tu rohangku, bohiM di na lao mate Ho/ Aut na huingot o Tuhanku, tongtong pangkophopMi di au /Ai Ho do paluahon ahu, dosangku do pinorsanMi/ Didaoni Ho parsahitonku, martua au binahen ni i.

P    :  Pujinnami maHo, ala naung patar holong ni rohaM di hami marhite Jesus Kristus Tuhannami. Ho do napatauhon haluaon dohot hangoluan na salelenglelengna dihami marhite panghophopon ni AnakMu Jesus Kristus Tuhannami.

H    :  (mangendehon BE. 84: 3  BL. 195) Mauliate ma rohangku, di Ho o Jesus Tuhanki Ho naeng tongtong haholonganku/ Marningot denggan basaMi Antong sai tiop ma tanganku/, manogu au tu lambungMi Dijalo Ho do tangiangku, sai pos do rohangki di si.

P    :  Asi rohaM, topot ma hami na pungu on marhitehite tondiM, asa dipatubu haporseaon dohot panghirimon namangolu dibagasan dirinami.

H    :  Na pungu do hami nuaeng jala marunduk ni roha marningot hamamateM na gantung di hau pinarsilang i ala ni dosanami.

P    :  Sai pargogoi ma hami saluhutna asa rade jala unduk rohanami manjalo ndohot manganhon parpadanan na badia on, paboa na tutut hami porsea di AnakMu Tuhan Jesus Kristus, naung mate jala mulak  mangolu manggarar dohot manesa dosanami.

H    :  (mangendehon Hosianna songon mangendehon Haleluya) Hosianna! Hosianna! Hosianna!                              

Singkat ni Patik Jesaya 53: 4 – 5

Marende BE. 412: 1 – 2                                             BL. 387

Panopotion dosa + Bagabaga

P    :  Dibagasan unduk dohot serep ni roha, tatopoti ma dosanta tu Djahowa Debata.

H    :     (mangendehon ½ suara BE 171: 1   BL. 49) Tandai ma au,sungkapi ma dohot rohangku/ uji ma au, pamanat huhut dalanku/ olo ditanda Ho au Debata!

P    :     Ale Jahowa, Amanami pargogo na so hatudosan! Ho do na patupahon hasesaan ni dosa di hami halak na dangol on, marhitehite Anak haholongan ni rohaM, Tuhan Jesus Kristus, Tuhannami. Pardosa do hami sian hatutubunami jala jotjot do hulaosi hami angka patikMu. Ditaoni Ho do hamatean ala ni dosa nami, pola do durus mudarMu, ditaoni Ho angka tijur, insakinsak. Ho ma singkat nami asa mangolu hami jala dapotan hangoluan na pinatupaM.

H    :     (Mangendehon ½ suara BE. 78: 1   BL. 158) O ulu na sap mudar Binaen ni bugangMi/ Na sian jangarjangar Sisungsang duri i/ O ulu hatongamon Hian do tumpalMi Ditaon Ho haleaon Ho naeng sombaonki?

P    :     Dagingmu namabugang i gabe apul-apul dihami jala mudarmu nadurus i gabe hasesaan ni dosanami. Dibahen i, ale Jahowa, asi ma rohaM di hami, angka na mangarsakhon dosanami nuaeng tu Ho. Sai sahaphon ma tu bagasan rohanami hasesaan ni dosanami na pinatupaM i. Lehon ma tu hami TondiM na badia i, asa hot haporseaonnami di asi ni rohaM.

H    :     Tuhan Jesus do Ulu ni Huria i, ruasNa do hita. Dilehon Tuhan Jesus do patik holong niroha tu namangihuthon Ibana jala didok: sian on ma botoon ni halak, hamu siseanku, molo masihaholongan hamu sama hamu.

H    :     (mangendehon ½ suara BE. 171: 2    BL. 49)

            Asi ma roham, taringot tu pangalahongku/ olo tutu, jotjot do na lilu dalanku/ sesa dosangku sude, Debata.

P    :     Bagabaga ni Debata taringot tu hasesaan ni dosanta. Martua ma manang ise naung sinesaan pangalaosionna, naung hinungkupan dosana. Martua ma jolma, ia so dijujur Jahowa tu ibana hajahaton. Hasangapon ma di Debata na di ginjang,

H    :     Amen.

Marende BE. 165: 2 + 5                                             BL. 19

Epistel                                    : Psalmen 44: 18 – 27

Marende BE. 81: 1 + 4                                               BL. 185

Manghatindanghon hata haporseaon

Marende BE.  417: 1........... Pelean I, II                    BL. 278

Jamita                         : 1 Korint 15: 1 – 3

Marende BE. 86: 1............... Pelean III                     BL. 67

Tangiang Pelean + Pasupasu

Pdt :     Dibagasan unduk dohot serep ni roha, tapasahat ma peleanta on tu Jahowa Debata. Ale TUHAN, Debatanami na di banua ginjang. Ho do haroroan ni pasupasu dohot silehonlehon ro di angka denggan basa na mauliutus. Mauliate hupasahat hami tu Ho, ala dipasupasu Ho do ngolunami.

H    :     Hupasahat hami ma tu Ho dirinami nang sian na nilehonMi tu hami. Sai jalo ma i gabe pelean na hushus di adopanMu.

Pdt :     asi ma rohaM, sai pasupasu ma pelan na hupasahat hami tu Ho, asa huparhaseang hami i laho patimbulhon harajaonMu di tongatonga ni huriaM dohot di portibi on.

H    :     Buhai ma rohanami marhitehite TondiM na badia i, asa lam patar huida jala huboto hami godang ni selehonlehonMu di hami. Sai ajari ma hami, asa lam girgir hami mandok mauliate tu Ho, huhut pasahathon peleannami dalan laho pasangaphon Ho, marhitehite Jesus Kristus Tuhannami

H+Pdt:  nasa na nilehonmi, Tondi ro dipamatangku, hosa dohot gogongki, ro disaluhut artangku. Hupasahat i tu Ho, na so unsathonku do

Pdt :     Ale TUHAN Debata, Amanami na di banua ginjang. Parasiroha jala Pardenggan basa do Ho. Dilehon Ho do AnakMu na sasada i, Tuhan Jesus Kristus tu portibi on mamorsan pardangolan, pinsangpinsang dohot uhum, asa malua hami sian gomgoman ni dosa, sibolis dohot hamatean sisalelenglelengna.

H    :     Ibana do singkatnami manjalo uhum ala ni dosa i, asa mangolu jala dapaotan hatigoran hami di adopanMu hinorhon ni mudarNa i.

Pdt :     Dibahen i pujipujian dohot hamauliateon ma disombahon rohanami tu Ho, ala ndang marpansohotan holong ni roham mida hami.

H    :     na mangido ma hami tu Ho ale Debata, sai pargogoi jala pamonang ma hami maralohon saluhut musunami. Sai sungguli ma rohanami marhitehite TondiM i, asa huingot hami jala huauhon hami hinahansit dohot hinabernit ni na tinaon ni Tuhan Jesus Kristus Tuhannami.

Pdt :     Sai urupi ma hami, asa tongtong huihuthon hami Ho, ale Debata, jala mansohot hami mangulahon dosa. Sai dongani jala ramoti ma hami, asa mian hami di bagasan hataM, salaleng hami mangolu. Sai pahot haporseaon dohot panghirimonnami di Ho, ala ni AnakMu Tuhan Jesus Kristus, Tuhannami. Amen, rap hita mandok tangiang ale Amanami.

H    :     ale Amanami..........dst.

            (dung sae tangiang, mangendehon BE. 36: 1) Pasupasu hami, o Debatanami, sai sondangkon bohiMi tu na pungu on sude

Pdt.      Dipasupasu jala diramoti TUHAN Debata ma hamu, disondangkon TUHAN Debata ma bohiNa tu hamu jala sai asi ma rohaNa mida hamu. Didompakhon TUHAN Debata ma bohiNa tu hamu, jala dipasaor ma dameNa tu tondimuna, Amen.

H    :     (mangendeho) Amen, Amen, Amen.

Ende di Ulaon Na hohom

1.      194 ; 1-2  :

o       Aut so asi rohaM, aut so godang basaM tudia ahu, / Alai dibaen basaM dohot asi rohaM tu surgo ahu.

o       Mauliate ma di Ho o Debata, ala basaM, / Sibahen dalan i marhite anakMi tu banuaM

2.       88 : 1-2   

o       Jesusku naung manobus ahu, sai naeng haholonganku Ho/                        Tu dolok Golgatha Ho laho. Nionjar ni holongMu do/ Hupuji nasa asiMi alai gumodang holongMi.

o       Tarsolsol bagi do rohangku, paidaida dangolMi/ marningot sasude dosangku ai i do tinaonMi/ Hupuji nasa asiMi alai gumodang holongMi

3.      84 : 1-2  

1.      Aut naginorga tu rohangku, bohiM dinalao mate Ho/ Aut na huingot o Tuhanku, tongtong panghophopMi di au/ Ai ho do paluahon ahu, dosangku do pinorsanMi/ Didaoni Ho parsahitonku, martua  au binahenMi.

2.      Sai jalo ma’u ale Tuhanku, baen upa ni na tinaonMi/ Sai naeng ingoton ni rohangku tung sasude nabinaenMi/ Humopohop au pardosa godang, dibahen holong ni rohaM/ Hinorhon ni tarbaen au sonang, lao mandapothon banuaM.

4.      83 : 1

o       Na lao do birubiru i mamorsan angka dosa/ ni nasa hajolmaon i dibenget ni rohaNa/ Diporsan do sahitta  i, dilehon do diriNa  i, tu tangan ni pamunu/ ditaoni do na bernit i, ro di na tos hosaNa i, didok naeng porsanonku

5.   86 : 1   

o       Silang na badia i, ho do lombulombungki,/ maralohon dosa i dohot pandelean i/ di sude sitaonon i, ho ma lombulombungki

6. Angonangon BE. No. 84 dohot Lonceng

7.  84 : 2        

o       Sai jalo ma au ale Tuhanku, baen upa ni na tinaonMi/ Sai naeng ingoton ni rohangku tung sasude nabinaenMi/ Humopohop au pardosa godang, dibahen holong ni rohaM/ Hinorhon ni tarbaen au sonang, lao mandapothon banuaM

8. 168 : 4,6

o       Ias ma rohangki dibaen mudarNa i, so tung diharoroNa i ramun sambing ma i/ Hutundalhon ma na di pudingki/  Jesus ma haposanki diharoroNa i

o       Hugolom mudar ni Tuhanku Jesus i, Ai i do haporusanki di rohaNa i/ Hutundalhon ma na di pudingki, Jesus ma haposanki di haroroNa i

Ende Tu ulaon Na badia

1.       153: 1

o        Jesus na mamorsan dosa ni portibi on, pangolu hami./ Jesus na marmosan dosa ni portibi on, pangolu hami./ Jesus na mamorsan dosa ni portibi on, sai pasonang hami, Amen,Amen,Amen.

2.       154: 1 – 4

o        Sai palinggas ho tondingku, sai tadingkon ma arsakmu./ Ro ma ho tu hatorangan,asa dapot hasonangan./ Ai tarontang ho saonari, tu haroan na badia,/ Na manggomgom parluhutan, naeng tu ho do maringanan.

o        Sai ringkoti ma manomu, na pangolu ho tondingku/ Na manuktuk do Ibana, di roham dibaen hataNa./ Ungkap pintu ni rohamu, asa bongot ma Rajamu,/ Dok: Ingani ma rohangku, unang be tadingkononMu.

o        Sai malungun do rohangku, Ale Jesus di basaMu./ Tung na tangis do rohangku, na malungun do mannaMu./ Na mauas do tondingku, ale Jesus di mudarMu./ Pinangido ni rohangku, hasasaor tu Debatangku.

o        Las huhut do angka hitir, rohangkon di na hupingkir./ Simosimo ni panganon, di bagasan parpadanan./ Ai na so tardodo roha, pinatupa ni Jahowa./ Ingkon Tondi Parbadia, pabotohon i tu iba.

3.       155: 1 – 3

o        Tu son ma ale tondingku, di na mauas, male ho/ Manjalo basa ni Tuhanmu pinaradeNa i di ho./ Dilehon Jesus do dagingNa, marhitehite roti on,/ Dilehon dohot do mudarNa, marhitehite anggur on.

o        Ai nang tongtong pe ganup ari, mudarNa mangurasi au./ Huhut Ibana so mansadi manogu tu lambungNa au./ Sai naeng au mangan parpadanan ni Jesus Kristus, Tuhanki./ Na padamehon parbadaan, na pasonangkon rohangki.

4.       174: 1 – 4

o        Torop do pe na siat i Di hasampuran rea/ I pe hamu pardosa i Sai olo ma porsea/ Ai Debata manjou hamu Tu hasonangan situtu/ Hamu, hamu Dijou Debatamu.

o        Tama longang roham, ale Umbege pangontangna/ Antong sai unang jua pe Tangihon pamiona/ Ai Debata mamio ho Dibahen i sai ro ma ho/ Sai ro, sai ro Tu surgo ma ho ro.

o        Pardosa ho didok roham, na so tama be dohot?/ Ndang pola ala ni dosam, umbaen na sundat bongot./ Ai nunga sae do dosam i, digarar Tuhan Jesus i
Naung sae, naung sae, naung sae do dosami.

o        Haporseai ma hata i Ai i do hatuaon/ Haposi Tuhan Jesus i MudarNa i ma golom/ Ai nang gok dosa rohami Malua ho bahenon ni/ Tutu, tutu Malua baenon ni.

5.       169: 1 – 3

o        Ho sipangolu au, sai topot ma au on./ Sai unang mandaodao. Ho sian rohangkon./ Ro Sipangolu ro tibu. Baen ma au anakMu tutu./ Dohot mudarMi buri au ias songon hapas ma au. / Ias tutu, ias tutu, dohot mudarMi buri au. Ias songon hapas ma au

o        Gogo ni mudarMi Papatar ma di au/ Tondi Parngolu i Tongtong manogu au/ Ro Sipangolu ro tibu...d.u.

o        Togu ma rohangkon Sai taiti au tu Ho/ Ai langkaMi tongtong Naeng tiruonku do/ Ro Sipangolu ro tibu...d.u.

6.       227: 1 – 4

o        Jesus ngolu ni tondingku, Ho do haporusanki/ Gok di Ho na ma diringku, ro di nasa langkaki

o        Lam tangkas ma patuduhon, tu au on panghophopMi/ Asa i huhalungunhon, hot ma au di lambungMi

o        Jangkon au baen siseanMu Na girgir tu podaMi/ Sai surdukkon ma tanganMu Asa tong hutiop i.

Tangkup au Jesus Tuhanku Tiop au mansai gomos/ Asa unang runsur pathu Sian dalan na tingkos

Ibadah Kamis Putih

Partingkian ni jesus marulaon na badia rap angka sisean, 

marhata tading,

martangiang di getsemane Dohot

na di tangkup di getsemane

(Ket. P = Paragenda; H: Huria; PNB = Naposo bulung; I = Ina; A = Ama)

Prosessi (diikuti lonceng gereja; dan instrument)

Votum

P       :     Marhitehite Goar ni Debata Ama, dohot Goar ni AnakNa Tuhan Jesus Kritus, dohot Goar ni Tondi Parbadia, na manompa langit dohot tano on, dipasaor ma dameNa tu tondinta, Amen

H       :     Ale Jesus Tuhannami, bereng hami na dison. PinarmahanMi do hami, saluhutna na dison. Sai asi rohaM di hami sai pangolu hami on, Amen.

Marende BE: 81: 1                                                     BL. 185

o        Jesus mual ni ngolungku, Sipangolu tondingki/ Ai dibunu Ho musungku, ima hamatean i/ Ho manaoni hamagoan, patupahon hangoluan/ Alani hupuji Ho, tung marribu hali do.

Manjaha Ayat + Tangiang

P       :     Dipatutoru do diriNa; na gabe pangoloi do Ibana paima mate, pola tung mate tarsilang.

H       :     Ajari hami ale Jahowa, asa boi parangenami songon parange ni Kristus.

P       :     Martangiang ma hita. Ale TUHAN Debata, Amanami na di banua ginjang!

H       :     balga do asi ni rohaM dohot holongMu di hami jolma pardosa on. Nunga dilehon ho anakMu Tuhan Jesus Kristus tu hamatean, asa malua hami sian huaso ni dosa, si bolis dohot hamatean.

P       :     Dibahen i, mauliate dohot pujipujian ma hupasahat hami tu Ho. Ale TUHAN, na mangido ma hami tu Ho, sai pargogoi jala urupi ma hami manghongoluhon panghophop ni AnakMu, asa taruli hami di hasesaan ni dosa dohot hangoluan salelenglelengna, na pinatupaM marhitehite TUHAN Jesus Kristus, Tuhannami.

H       :     Amen.

Marende BE: 79: 1                                                     BL. 124

o        Di na ponjot rohangku Binaen ni dosangki/ Paingot au Tuhanku Di hamamateMi/ Di hau na pinarsilang i Digarar Ho utangku/ Marhite mudarMi

Tangiang sahalak sian Parhalado

Marende BE. 77: 1                                                     BL. 65

o        Hamu saluhut halak, ro ma hamu manatap, hangoluanmu on./ Na gantung di parsilang tumahan hamatean, naeng ingotonmu i tongtong

Manjaha Pardalanan ni Ngolu ni Jesus

P    :     Mandapothon pesta paska i, nunga diboto Jesus, naung ro tingkiNa manadingkon portibi on laho mandapothon Ama i, gabe songon panghaholongiNa di angka na di Ibana na diportibi on, laos songon i do dihaholongi nasida ro di ujunana. Di ari parhobasan parjolo pesta paska i, didapothon sisesanNa ma Jesus, ninna ma: ”Tudia ma patureonnami di Ho panganon Paska i dipangido rohaM?” dungi ninna Ibana ma mandok nasida: ”laho ma hamu tu huta i, disi bongot hamu, pajumpang ma hamu dohot sada halak siboan partuaehan, ihuthon hamu ma ibana tu bagasan jabu na binongotanna. Dok hamu ma tu nampunasa bagas i: tona ni Guru i tuho, didia do ingananami asa mangan paska i Ahu dohot anaka siseanKu?

PNB:    Dungi patuduhononna ma tu hamu bilut parginjang sada na lumbang, naung hinembangan, disi ma pature hamu. Jadi laho ma nasida, jumpang nasida ma songon na pinaboaNa i tu nasida, jala dipature ma Paska i. Asa dung dapot tingkina, hundul ma ibana rap dohot angka apostel.

P    :     Dung i ninna mandok nasida: mansai masihol rohanku naeng mangan birubiru paska o ahu Ahu rap dohot hamu, togan so songgop dope sitaononKi. Ai hudok ma tu hamu: na sotupa panganonKu be i, ia so dapot hagokgokna i di harajaon ni Debata.”

A    :     jadi di na mangan i nasida, ninna ma: situtu do na hudok on tu hamu: sada sian hamu naeng pasahathon Ahu. Tong do nian ujung ni Anak ni Jolma i songon na tarsurat hian; alai marjea do halak na pasahathon Anak ni jolma i. Tagonan unang ma sanga tubu ibana tu hasiangan on.?

I     :     jadi marsiberengan ma angka sisean i, jut ma rohanasida manang ise na nidokNa disi. Alai adong ma sada sian angka sisean i, na hundul jumonok tu Ibana, haholongan ni Jesus i. Ima dihilap si Petrus, jadi ninna mandok ibana: ”sungkun ma ise i na didokNa i” jadi dipadonok ma tu lambung ni Jesus mandok tu Ibana: ”Tuhan ise i?” gabe dialusi Jesus ma: ”Ia tusi hulehon na santopik na husornophon on, ima ibana”. Jadi disornophon ma santopik, dilehon ma tu si Judas Iskariot anak ni si Simon.

PNB:    jadi dung dibondut i, dibongoti sibolis ma ibana. Dung i didok Jesus ma tu ibana: ’ Humateop ma ula siulaonmi.” jadi di na mangan i nasida,

P    :     jadi di na mangan i nasida, dihindat Jesus ma roti, dipasupasu ma, diponggoli jala diparlehon ma tu angka siseanNa, huhut ma didok: Jalo hamu ma, pangan hamu, DagingKu do on na nilehon humophop hamu, ula hamu ma i baen parningotan di Ahu” songon i do dihindat nang panginuman, dung sun nasida na mangan i, didok ma mauliate, dilehon ma tu nasida huhut ma didok: ”sude hamu manginum sian i, murdarHu do i, mudar parpadanan i na niusehon humophop hamu bahen hasesaan ni dosa/

PNB:    dung sun nasida mangan, hehe ma Ibana, ditanggal ma ulosNa, dibuat ma basahan, ditapolhon tu Ibana. Diusehon ma aek tu sambong, dunig i diburi ma pat ni angka siseanNa, diapusi ma dohot basahan na tinoapolhonNa i. Dung i sahat ma Ibana tu si Simon Petrus, jadi didok i ma mandok Ibana: Tung Ho ma, ale TUHAN mamuri pathu? Dungi ninna Jesus ma mangalusi Ibana: ndang diantusi ho pambahenanhon na tu ho ianggo nuaeng, muse pe botoonmu i.” dung i didok si Petrus ma tu Ibana: ”Matua tano on ndang burionMu Pathu”. Dungi ninna Jesus ma mangalusi ibana: molo so burionKu ho, dang partohap ho di Ahu.

A    :     dung i ninna si Simon Petrus ma: Ale Tuhan, unang ma holan pathu, dohot ma tangan dohot ulungku”.  Gabe didok Jesus ma tu Ibana: halak naung maridi, dang be burion, ai nunga sude ibana ias. Naung ias do anggo hamu, alai ndang luhut hamu” ai ditanda do sipasahat Ibana, umbahen na didok: ndang luhut hamu ias.

I     :     asa dung diburi Jesus patnasida, diapangke ma muse ulosNa, hundul ma Ibana, didok ma tu nasida: ”ai diantusi hamu do pambahenanKi tu hamu? Digoari hamu do Ahu guru jala Tuhan, jadi ture do pandokmuna disi; ai ido Ahu tutu asa molo Ahu Tuhan jala Gurumuna, mamuri patmuna, tama ma hamu masiburian pat. Ai sitiruon do hulehon tu hamu, asa dibahen hamu songon naung hubahen i tu hamu. Na tutu situtu do na Hudok on tu hamu; ndang umbalga anak somang sian indukna, ndang sumurung suruan sian na marsuru ibana. Molo diboto hamu i, martua ma hamu mangulahonsa.

H    :     (mangendehon BE 88: 1)                                BL. 106

o        Jesusku naung manobus ahu sai naeng haholonganku Ho/ Tu dolok Golgata Ho laho Nionjar ni holongMu do/ Hupuji nasa asiMi Alai gumodang holongMi

P    :     dung i sahat ma Jesus rap dohot nasida tu porlak sada na margoar Getsmane, jadi didok ma tu angka sisean i: hundul ma hamu jolo dison, saleleng disan Ahu martangiang. Dungi ditogihon ma si Petrus dohot anak ni si Sebedeus na dua i, dung i gabe marsak situtu ma Ibana jala bobonosan. Jala didok ma tu nasida: mansai marsak situtu do rohanku, hira na mate do. Disaon ma hamu dungo rap dohot Ahu!

I     :     dung i laho ma Ibana saotik tujolo, dipatungkap ma bohina tu tano martangian, ninna ma: Ale Amang, namun na tarbahen, salpuhon ma siinumon on sian Ahu! Alai tahe, unang marguru tu rohangku; roham do! Dungi mulak ma Ibana tu angka siseanna, jala tarpodom do nasida didapot, jadi diok ma tu si Petrus: ndang margogo hamu hape dungo rap dohot Ahu nanggo sangombas?

PNB:    Dungo ma hamu jala martangiang, asa unang hamu bongot tu pangunjunan, ai na girgir do nian Tondi i, alai gale do ia daging! Dungi laho ma Ibana paduahalion martangiang, ninna ma: Ale Amang, molo so tarbahen salpu on, nda ingkon huinum, sai saut ma lomo ni rohaM. Dungi i, diida Ibana ma surusuruan sian banua ginjang i na margogoihon Ibana. Jala diparungkilon-Na i lam digogo ma martangiang, gabe songon mudar na himpal do madekdek hodokNa i tu tano.

A    :     dung i, na ro i Ibana, tarpodom muse ma nasida didapot, ai mansai dokdok do salibonnasida. Jadi didok ma tu nasida: datdatanmuna dope modom dohot mardian? Nunga dapot tingkina nuaeng, sahat ma Anak ni jolma i tu tangan pardosa. Hehe ma hamu laho ma hita! Ndi nunga ro na pasahathon ahu.

Martangiang na hohom, marningot parsitaonan ni Jesus songon na jinaha diiringi musik instrumen BE. 408: 1 ayat

H    :     (mangendehon ½ suara BE. 408: 1)               BL. 272

o        Bornginna I, di porlak I, tar bege angguk Bolon/. Hinorhon ni dok-dok na I sai on nama di jouhon :/ Ale Amang bereng au on ! Ai ingkon taononku ? Molo tung I,Saut ma I, unang tandingkon Ahu. “

P    :     Alai diboto si Judas Parjehe i do inganan i, ai jotjot do marpungu tusi Jesus dohot angka sisesanNa. Ia si Judas, diarahon ma angka soldadu dohot angka naposo ni sintua ni malim, didapothon ma tusi, mantat sulusulu palito dohot sinjata. Alai dipabotoho parjehe i hian partinandaan tu nasida, ai ninna do: Ia i na huumma, Ibana ma i, tangkup hamu ma i jala jamot ma boan hamu Ibana!

H    :     Mamintor didapothon ma Jesus, mandok: Guru! Laos diumma ma Ibana. Dungi I didok Jesus ma tu si Judas, O ale Judas, pangummaon do hape dibahen ho, pasahathon Anak ni Jolma i. Gabe dilaluhon nasida ma tangan nasida tu Ibana laho manangkup. Ia si Simon Petrus marpodang do, I ma disintak jadi ditampulhon ma tu naposo ni Sintua ni Malim, jadi dipsikhon ma pinggol siamun ni si Malkus. Dungi I ninna Jesus ma mandok si Petrus: Pasarung podangMi.

P    :     Dungi ditangkup angka soldadu dohot induk nasida rodi angka naposo ni Jahudi ma Jesus jala diihoti. Jadi ditogihon ma Ibana jumolo tu si Hannas, ima simatua ni si Kayapas, sintua ni Malim di na sataon i.

Marende BE: 83: 1-3                                     (Pelean)          BL. 214

o        Na lao do Birubiru i Mamorsan angka dosa/ Ni nasa hajolmaon i Di benget ni rohana/ Diporsan do sahitta i Di lehon do DiriNa i/ Tu tangan ni pamunu Ditaoni do na bernit i/ Ro di na tos hosaNa i Didok : Naeng porsanonku.

o        Ianggo Birubiru i , Ima alealengku/ Na paluahon tondingki Disuru Debatangku/Didok mandok AnakNa i Sai topot ma pardosa i/ Naung sun tinoruanku Balga tutu do rimashi /Alai tarbaen do mombun i Horhonon ni mudarMu

o        “Na olo au, ale Amang . Sian sandok rohangku/ Pasauthon lomo ni rohaM, RohaM sambing do guru”/ O holong ni rohaNa i Tung aha do tudosanmi /Na songon ho margogo ? Dilehon Debata hape AnakNa lao manaon sude Sitaonon ni na mago          

Tangiang Pelean + Ale Amanami + pasupasu