Bahan Jamita Minggu XIV D. Trinitatis, 28 Agustus 2016 (1 Johannes 3: 18 - 24)

BAHAN JAMITA

MINGGU XIV DUNG TRINITATIS

Minggu, 28 Agustus 2016

Ev.: 1 Johannes 3: 18 – 24; Ep.: Poda 25: 6 – 7; S. Patik: Mateus 5: 46 - 48

ULAHON MA HAHOLONGON I!

AI SIAN I DO BOI TANDAON HALAK HITA SISEAN NI KRISTUS

Patujolo

            Tutu do hita porsea di Jesus Kristus, songon na jotjot itahatindanghon di hurianta di ganup minggu i? On ma na ringkot asa itauji ma jo panghatindanghononta i maradophon angka pangalahonta manang parangenta di hasiangan on. Torop do na mandok, ahu porsea di Jahowa, Debata Ama i; dohot di AnakNa Jesus Kristus, dohot Tondi Parbadia, alai tutu do itahangoluhon na itahatindanghon i? On ma na mansai ringkot ingkon tangkas do boha do panghatindanghononta i di ngolunta be. Molo sai na gamang dope di panghangoluhonon ni haporseaonna i, ndang na tutu dope hape ibana manghaporseai Debata Ama, Anak dohot Tondi parbadia. Aha do na boi idaonta panghonaionna tu turpuk jamita on? Tangkas ma itapaihutihut hatorangan ni turpuk jamita on.

Hatorangan ni Turpuk

            Hombar tu na tarsurat di 1 Johannes 1: 1 – 4, mansai tangkas do ra ise do panurat ni surat on, ima Johannes, sada sian angka sisean ni Kristus, ibana do na langsung gabe sitindangi (saksi mata) taringot Jesus dung dipillit ibana gabe apostel sahat tu na mate Jesus Kristus. Molo manat hita manjaha buku 1 Johannes on, ra boi do botoonta, aha do na masa uju panurat ni turpuk on. Ragam na masa parpoda haliluon, angka pangajari di filsafat nang angka mamangke parbinotoanna manang pamingkirionna laho mangantusi haporseaonna i. Ro muse ma angka na sian horong gnostik dohot doketisme (suatu aliran atau sekte yang mempercayai keilahian Yesus Kristus namun tidak mengakui Yesus Kristus sebagai wujud manusia, aliran ini menolak segala proses kelahiran, kehidupan bahkan penyaliban dan kematian Kristus, Yesus Kristus datang ke dunia adalah sebagai suatu ketidak-mungkinan karena diperhadapkan dengan Keilahian Kristus yang Kudus, sedangkan dunia ini dalam daging adalah dosa dan fana, (kita perhatikan bagaimana filsuf Plato memperkenalkan ajaran dunia idenya) (idaonta ma 1 Johannes 2: 18 – 27). Marhite aliran dohot pangajarion sisongon i, torop ma halak Kristen uju i gabe gale di haporseaon, manang na gabe gamang di haporseaonna. Gabe dos do ngoluna angka na porsea di Kristus sian halak na so porsea dope di Kristus. Marhite na masa i angka na bisuk mandok molo surat 1 Johannes on disurathon ma hirahira taon 60 – 65 AD. Angka na bisuk na asing muse mandok ia surat 1 Johannes on disurathon hirahira taon 85 – 97 AD, hombar tu isi ni bungku Pangungkapon na masa tu si Johannes. Sian dua surat on, tangkas do dipodai si Johannes asa ganup halak Kristen naung mambege barita na uli marhite ibana, asa satia jala marsihohot di haporseaonna jala togu haporseaonnasida mangulahon hata dohot lomo ni roha ni Debata Jahowa nang pe ragam angka parpoda haliluon nang songon i angka haporsukhon na binahen ni angka bangso sipelebegu.

            Di bindu 3 di surat 1 Johannes on, sada sian poda ni si Johannes asa halak Kristen ingkon ma badia dirina, ala Ibana na itahaporseaon i na badia do Ibana. Tung na so tolap do hita mandapothon Jahowa ala ni lea ni dirinta hinorhon ni dosa dohot pangalaosionta di hata ni Debata. Alai, ro do Ibana na badia i laho manesa dosanta asa badia hita, jala ndang mardauk dosa be ngolunta on. Holan ala ni asi ni roha ni Debata do, tuat Ibana na badia i marhite Jesus Kristus, hata ni Debata na gabe daging, asa badia hita marhitehite hamamateNa di hau pinarsilang i. Diaing do hita sian gambe haleaon tu hamuliaonNa, asa Ibana nampuna hita salelengna. Antong, songon halak naung pinarbadiaan ni Debata hita, naeng ma masihaholongan hita.

            Manghatahon holong mansai mura do dihatahon, alai mangulahon mansai bangkol do. Di ragam angka haporsuhon, sitaonon, manang hadokdokhon naeng ma haporseaonta i togu jala hot di ngolunta be. Molo pe sai na adong mambahen na hansit, na porsuk, manang mambahen na jat tu hita unang ma sai itabaloshon i, alai itahaholongi ma nasida, ai sian do itandaon ni halak hita on sisean ni Kristus molo na tutu hita manghaholongi. Ise jala boha do hita manghaholongi? Sada sian patik raya na nilehon Jesus ima “manghaholongi dongan jolma (seluruh manusia, tanpa melihat status sosial, tanpa melihat bagaimana hidupnya, bagaimana sikapnya, dan tanpa melihat bagaimana sikapnya terhadap kita)”

            Di ayat 17-18 turpuk jamita on tangkas do disurathon asa mangulahon holong ndada holan marhite hata, alai naeng ma tarida marhite pambahenan dohot hasintongan. Di ayat on paboahon unang ma holong i songon holong pangalensem (kasih yang pura-pura). Ai ndang adong labana sai godang hita manghatahon holong, nang songon i na mangholongi Jahowa dohot manghaholongi dongan molo so adong pambahenan (bdk. 1 Korin 13: 1). Manghaholongi dongan jolma, ndada pasombuhon donganta i mian di dosa manang dihajahaton, manang unang gabe mambahen balos ni hajahatonna songon na binahen parjahat tu na porsea. Songon panghaholongion ni Jahowa tu pardosa, songon i ma nang hita angka na porsea, sai itahaholongi ma angka donganta jolma. Holong na dipodahon apostel Johannes on, ima holong na mambahen aha do hasurungan ni halak Kristen na mandok dirina porsea di Jesus sian halak sipelebegu (bdk. Mateus 5: 46 – 47). Pambahenan holong na tutu marhite hasintongan dohot hatigoran, ima karakter na ingkon adong di ganup halak na porsea i.

            Tutu do na didok torop jolma, maol do mangulahon holong na sisongon i. Alai tubu ma sungkunsungkun, na dipaloas Debata do hita so ndang mangulahon holong i ala ni maolna? Jumolo ma nian hita mananda tangkas songon dia do holong ni Debata Jahowa marhite Jesus Kristus tu hita angka na porsea, aha do na boi itapatudos holong na sisongon i? Manang aha do na boi mambalos holong na sisongon i? Holong ni roha ni Debata Jahowa marhite Jesus Kristus mamboan hita tu hangoluan salelengna jala mambahen hita marpos ni roha paimahon ari paruhuman asa marhite holongNa i, marhiras ni roha hita mandapothon Debata di hamuliaonNa i. Molo manolsoli do hita di angka dosa manang pangalaosionta nang angka na jat naung manang naeng itaulahon, disi ma hita mananda holong ni Debata na umbalga tu hita sian hita na manghaholongi Debata (ay. 19 – 20).

            Di ayat 21 – 22, Dung mananda hita di holong ni Debata di ngolunta be marhite naung itasolsoli angka dosanta i, jala taruli hita di pardamean na binahen ni Debata di holong ni rohaNa i, tung na so jadi be hita maila hinorhon ni dosanta i maradophon habadioan ni Debata na sun badia i. Jala dapot ma hita di pos ni roha mandalani ngolunta na gok hasusaan on. Di bagasan pos ni roha di haporseaon na togu i laos dipapos muse hita laho mangulahon patikNa nang songon i lomo ni rohaNa nang pe sai godang hajahaton masa. Marhite na unduk jala olo hita mangulahon patik dohot lomo ni rohaNa i, marudut ma tu pangidoanta marhite tangiang. Sai na lehononNa manang aha pe na itapangido tu Ibana. Pangidoan marhite tangiang jotjot do hita lalap holan mangido di arta, pangkat, dohot hahipason, nang lan angka ondeng, gabe tading do hita mangidohon sangkap ni Debata na ingkon tulus di ngolunta nang songon i mangido di hangoluan na so ra suda. Ndang na maol nian Debata mangelehon angka ondeng i tu ganup jolma, alai jolma dangol do hita molo holan i pangidoanta jala tung na so marlapatan do i saluhutna molo naung patar hita di adopan ni Debata di bagasan hamuliaonNa i.

            Antong, aha nama siparadeon manang sipatupaonta songon halak na porsea huhut paimahon hamuliaon ni Debata pata di adopanta di ari na balga i? Ima mangaradoti patik (ay. 23 – 24). Aha do patikNa i? Sada sian patik raya ima “manghaholongi dongan jolma”. Manghaholongi tanpa syarat (unconditional love), ido na ringkot siulahononta. Aha do hadomuan haporseaon dohot holong sisongon i? Sian holong i do patar jala tanda hita na porsea tutu hita tu Debata Ama, Anak, nang Tondi Parbadia. Molo na alangalang manang pangalensem haholongonta i, songon i do nang haporseaonta be. Antong, apostel Johannes mamodahon tu huria Kristen uju i nang songon i hita sinuaeng asa siula holong i ma hita, holong na tutu, holong na so marpangansi. Itatangianghon ma angka donganta na mian dope di hajahaton asa mulak manadinghon hajahatonna i; jala unang ma itabaloshon na jat balos ni na jat. Parroha holong jala parroha na dame ma hita halak na porsea i nang pe ingkon itabolus ragam angka hasusaan na binahen ni jolma tu hita. Ndang tingkina be hita gogo mandok ahu porsea, alai ndang olo hita unduk mangulahon hataNa, ima haholongon i.

Hahonaan ni Turpuk

1. Jamita on ndang mandok na tonggi manang na paet parngoluan on asa boi manang dang ingon do mangulahon haholongan. Marhite jamita on patar do dipodahon apostel on asa marhasurungan ma nian hita mangodapi angka na masa di hasiangon on maradophon angka sipelebegu.
2. Haholongon, ima sada parange hatiuron jala na patandahon tu jolma na tutu do hita naung ditobus jala naung taruli hita di haholongan ni Debata Jahowa marhite Jesus Kristus. patar ma hita naung pinarbaidaanNa. Ai marhite haholongan ni Debata i do boi mananda hita na arga hita ditobus jala boi mananda hita di hata dohot lomo ni rohaNa, jala togu ma haporseaonta di ngoluta on.
3. Hita naung pinarbadiaan ni Debata marhite Jesus Kristus, unduk ma hita laho mangulahon angka patik ni Debata Jahowa, ima haholongon. Manghaholongi dongan jolma di bagasan hatigoran dohot hasintongan. Molo adong donganta mian dope di hasalaanta, itatogu ma nasida; molo adong na mambahen na jat, itatangianghon ma nasida, jala unang gabe mardosa hita hinorhon dosa na mambahen jat tu hita. Sai dapatotan tua do ganup jolma na olo mangulahon hata ni Debata, amen.

Ginurithon: Pdt. Daniel Bonardo Pane

HKI Resort Khusus Hutasoit Pardomuan

Angka Ende

1. 9: 1 – 3
2. 425: 1 – 2
3. 183: 1, 3
4. 216: 2, 5
5. 481: 1.....
6. 262: 4 – 5
7. 212: 1......